Tag: Ballina

Ish-guvernatori i Bankës Qendrore të Kosovës, Fehmi Mehmeti ka uruar qytetarët me rastin e Vitit të Ri 2024.

Mehmeti e ka quajtur vitin 2023 si të vështirë për Kosovën për shkak të sulmit terrorist në shtator në Banjskë.

Mehmeti ka përmendur gjithashtu edhe problemet financiare dhe inflacionin që sipas tij i ka vendosur nën presion bizneset dhe mirëqenien në familje..

Postimi i plotë i tij:

Të nderuar qytetarë të Republikës së Kosovës,

Urime viti i ri!

Uroj që në familjet tuaja të mos mungoj shëndeti dhe harmonia. Një vit i ri është një mundësi e re për t’i lënë prapa gjërat e këqija dhe për të vazhduar përpara! Qoftë viti që po vjen vit i mbarë! Gëzuar!

Të dashur qytetarë,

Viti 2023 nuk ka qenë një vit i lehtë për Kosovën, për shkak se është sulmuar sovraniteti dhe integriteti territorial i vendit.

Gjithashtu problemet financiare dhe inflacioni i ka vendosur nën presion bizneset dhe mirëqenien në familjet tona.

Një vit gjatë të cilit agjenda politike dhe dialogu dominuan në Kosovë dhe ekonomia mbeti disi e anashkaluar. Dëshiroj që në vitin 2024 të shoh në Republikën e Kosovës një dialog konstruktiv në mes të pozitës dhe opozitës, në mes të nivelit qëndror dhe atij lokal, një avancim të dialogut publiko privat dhe një dialog social më aktiv në interes të qytetarëve dhe stabilitetit social në Republikën e Kosovës.

Stabiliteti politik është parakusht i zhvillimit ekonomik dhe i tërheqjes së investimeve të huaja, por edhe i diasporës.

Të pranohet realiteti se, vetëm një sektor privat i fuqishëm është garancë e qëndrueshmërisë ekonomiko sociale, prandaj partneriteti dhe bashkërënditja e aktiviteteve ekonomike në mes të institucioneve dhe biznesit është esenciale për Kosovën.

Një diplomaci ekonomike, përcaktim i prioriteteve ekonomike për zëvendësimin e importit, funksionalizimin e një zone ekonomike nacionale, dhe kordinimi me shtetet mike siç janë SHBA-të dhe Europa, është më se e nevojshme, jo vetëm për promovim të mundësive për zhvillim ekonomik, por edhe për të përmirësuar imazhin e saj dhe për hjeqjen e masava të BE-së që iu vendosen Kosovës gjatë vitit 2023.

Tri partitë opozitare në Kosovë, PDK, LDK dhe AAK e quajnë të dështuar Qeverinë e Kosovës. Sipas tyre, ekzekutivi gjatë vitit 2023 ka stagnuar në të gjitha nivelet, pasi s’ka pasur asnjë projekt zhvillimor në ekonomi, shëndetësi e arsim, ndërkaq, siç thonë opozitarët Kurti ka lënduar marrëdhëniet edhe me aleatët ndërkombëtarë, pasi vendi është ende nën masa ndëshkuese të Bashkimit Evropian. Por të kundërtën e thonë nga ekzekutivi, të cilët konsiderojnë se kanë përmbushur të gjitha prioritetet gjatë vitit 2023.

Deputeti i PDK-së, Rashit Qalaj, thotë për KosovaPress, se Qeveria Kurti s’ka bërë asgjë pozitive gjatë këtij viti. Sipas tij, e njëjta më shumë është fokusuar në tema që kanë pasur qëllim dëmtimin e institucioneve të Kosovës dhe se ka krijuar probleme artificiale në veri për të shmangur problemet reale në Kosovë.

Kritik është edhe nënkryetari i Lidhjes Demokratike të Kosovës, Lutfi Haziri, i cili thotë për KosovaPress, se Qeveria Kurti në shumë segmente ka dështuar dhe se vendi është afër një bumi social.

Haziri përmend si të vetmen gjë pozitive reagimin e Policisë së Kosovës ndaj sulmit terrorist serb të 24 shtatorit në Banjskë.

Ndërkaq, kryetari i AAK-së, Ramush Haradinaj, thotë për KosovaPress, se qeveria përmes propagandës vetëm po mashtron qytetarët, pasi s’ka asnjë rezultat konkret në asnjë sektor në vend.

Po ashtu edhe analisti politik, Artan Muhaxhiri, thotë se qeveria Kurti ka stagnuar në të gjitha nivelet, krahas premtimeve të mëdha edhe entuziazmit që ka pasur kur ka ardhur në pushtet.

Në anën tjetër, kryeministri Albin Kurti, në mbledhjen e fundit të qeverisë për vitin 2023, tha se synimi i të gjitha vendimeve qeveritare ka qenë qytetari dhe fuqizimi i shtetit.

Qeveria e Kosovës gjatë vitit 2023 ka mbajtur 62 mbledhje, derisa janë marrë gjithsej 526 vendime, ndërkaq janë miratuar 66 projektligje dhe pesë nisma legjislative.

Kryetari i Partisë Demokratike të Kosovës (PDK), Memli Krasniqi, nuk pret ikje më të madhe të qytetarëve pas 1 janarit 2024, kur nis qarkullimi i kosovarëve pa viza në zonën Shengen, sesa migrimi që ka ndodhur në dy vitet e fundit, gjatë qeverisjes së Albin Kurtit.

Kreu i PDK-së ka thënë për Ekonomia Online se shqetësuese është largimi i 200 mijë njerëzve, shumica profesionistë e të punësuar, jo vetëm i nevojtarëve, që ka ndodhur para liberalizimit të vizave. Sipas tij, kjo ka ndodhur pasi njerëzit po e humbin besimin në mundësitë që ofron Kosova.

“Unë nuk e shoh shumë problem 1 janarin 2024 dhe lëvizjen pa viza. Kjo është e mirëseardhur, është e vonuar e stërvonuar dhe mirë që ka ndodhur përfundimisht”, ka thënë Krasniqi, në një intervistë për EO, e cila e plotë do të publikohet pas Vitit të Ri.

“Ajo që ka qenë problematike është largimi i qytetarëve para liberalizimit të vizave, sepse lëvizja në zonën e Shengenit, vizita për të parë mundësitë, qofshin ato edukative, ndoshta edhe të punësimit, është më pak problematike dhe e dëmshme sesa fakti që në dy vitet e fundit, apo dy vitet e gjysmë qeverisje të Kurtit, e kanë lëshuar Kosovën mbi 200 mijë qytetarë. Shumica prej tyre me kontrata të punës, shumica prej tyre profesionistë, prej inxhinierëve, arkitektë e deri te mjekë, e cilido profesion tjetër. Kjo për mua është shqetësimi më i madh, sepse ka ndikuar që të ketë vërtet një shpopullim në disa prej viseve të Kosovës”.

“Edhe më shqetësuese është që për herë të parë e kemi parë një largim të njerëzve nga të gjitha llojet e demografive, pra jo vetëm nga zonat rurale, por edhe nga zonat urbane; jo vetëm nga një rajon, por nga të gjitha rajonet; jo vetëm nga të papunët e nevojtarët, por edhe nga profesionistët dhe të punësuarit”.

“Ka qenë pra një largim, i cili mua ma ka dhënë një frikë që ndoshta është një humbje e besimit në mundësitë që i ofron Kosova. Përgjegjësia e qeverisë është absolute në këtë drejtim”, thekson lideri opozitar.

Sipas tij, kryeministri Kurti dhe ministrat e tij janë aktivë vetëm në propagandë.

“Absurditetet e tij janë të jashtëzakonshme. Para disa ditësh, në dhjetor, dolën dhe thanë që ekonomia e Kosovës është e treta në Evropë. As fëmijët nuk mund ta besojnë një gjë të tillë. Sepse ekonomia e Kosovës duke qenë edhe ashtu e vogël, me rritjen 3.5 për qind, ndoshta mund të krahasohet me Ukrainën, e cila është në luftë… Nuk mund të krahasohet as me shtetet e rajonit. Kjo i bie që jemi më mirë se Shqipëria, kjo i bie që jemi më mirë se Mali i Zi, kjo i bie që jemi më mirë edhe se Sllovenia e si Kroacia. Por mendoj se është një absurditet në vete, por që është pjese e propagandës qeveritare e cila fatkeqësisht vazhdon që të jetë shumë aktive”.

“Sikur të ishin punët mirë në këtë vend nuk kishin ikur 200 mijë qytetarë prej qeverisjes së Albin Kurtit. Nëse vërtet këta ministra e ky kryeministër besojnë që kanë bërë punë të mira, a munden me na dhënë përgjigje pse e kanë lëshuar vendin 200 mijë njerëz”, ka deklaruar kryetari i PDK-së, Memli Krasniqi.

Policia në raportin e saj ditor njofton se gjatë patrullimit në veri dje, ka hasur në dis automjete.
Dhe në përpjekjet e tyre për ti ndaluar, janë detyruar të përdorin edhe armët.

Njëri nga ta është arrestuar, ndërsa të tjerët kanë ikur duke braktisur automjetet e tyre.

Në automjetin e të arrestuarit janë gjetur 40 dele, ato janë dërguar në terminalin doganor.

Njoftimi i policisë:

Bube, Zubin Potok / 30.12.2023 – 06:15. Policia gjatë patrullimit kanë vërejtur disa automjete të dyshuar duke lëvizur dhe në përpjekje për ti ndaluar kanë hasur në rezistencë të armatosur nga personat e dyshuara me ç’rast policia në vetëmbrojtje janë obliguar të përdorin armët zyrtare duke bërë të mundur arrestimin e njërit prej tyre të dyshuarin mashkull kosovar/s, ku gjatë kontrollit në kamion i janë gjetur 40 dele pa dokumente përcjellëse, ndërsa janë konfiskuar dy automjete tjera të cilat të dyshuarit tjerë i kanë braktisur dhe janë larguar në drejtim të panjohur. Përveç dëmeve të shkaktuara në automjetin e policisë nuk raportohet për lëndime në njerëz. Me vendim të prokurorit delet me kamion janë dërguar në terminalin doganor, ndërsa i dyshuari është dërguar në mbajtje.

Mandatin e udhëheqjes së Bashkimit Evropian në fillim të vitit 2024 pas Spanjës do ta marrë në dorë Belgjika. Me këtë rast, njohës të politikave ndërkombëtare në vend, nuk presin ndonjë progres të madh sa i përket trajtimit të aplikimit të Kosovës për anëtarësim në BE. Për këtë, arsyet janë të shumta

Fundi i vitit 2023 ka sjellë edhe përfundim të mandatit të Spanjës në krye të Bashkimit Evropian.

Nga 1 janari 2024, këtë përgjegjësi do ta marrë Belgjika, brenda të cilës gjendet edhe selia e BE-së.

Gjatë udhëheqjes së Spanjës, e cila nuk njeh pavarësinë e Kosovës, nuk pati asnjë hap sa i përket aplikimit të vendit për anëtarësim në BE.

Mirëpo, njohës të marrëdhënieve ndërkombëtare nuk presin progres në këtë drejtim as nën udhëheqjen belge.

“Maksimumi që Kosova mund ta pret në këtë fazë është që fillimisht të largohen këto masa të cilat i ka marrë BE-ja në formë të sanksioneve e më pas të shihet se si do të rrjedhë procesi i negociatave Kosovë-Serbi, aq më tepër që ky proces ka filluar të përcaktohet edhe nga dinamika e dialogut Kosovë-Serbi”, ka thënë Dorajet Imeri – Profesor i marrëdhënieve ndërkombëtare.

Se rruga e Kosovës drejt bllokut evropian do të jetë sfiduese po vlerëson edhe njohësi tjetër i politikave ndërkombëtare, Fidan Ukaj.

Sipas tij, edhe zgjedhjet brenda BE-së do të ndikojnë në këtë proces.

“Përkundër asaj që presidencën e radhës e merr një shtet njohës i Kosovës, megjithatë BE-ja do të jetë e angazhuar në proceset zgjedhore brenda saj dhe gjasat që të merret me aplikimin e Kosovës mendoj që janë minimaliste”, ka theksuar Fidan Ukaj – Analist.

Belgjika do ta marrë kryesimin në moment kyç për BE-në, pasi në fund të mandatit të kësaj Presidence, në fillim të qershorit, do të zhvillohen zgjedhjet evropiane.

Gjatë realizimit të detyrave e aktiviteteve policore, zyrtarë policorë nga Njësia e Ndërhyrjes së Shpejtë e Policisë Kufitare, sot rreth orës 06:15, në Bube të Zubin Potokut, kanë vënë re lëvizje të dyshimta të disa automjeteve.

Në përpjekje për t’i ndaluar dhe kontrolluar automjetet e dyshuara, policia ka hasur në rezistencë të armatosur nga persona të dyshuar.

Të ndodhur në një situatë të tillë, për të mbrojtur vetën dhe vënë situatën nën kontroll, zyrtarët policorë i janë kundërpërgjigjur sulmit me armë dhe kanë arritur ta arrestojnë njërin nga të dyshuarit D.I., (1981), serb nga Zubin Potoku. Gjatë shkëmbimit të zjarrit, zyrtarët policorë dhe i arrestuari nuk kanë pësuar lëndime.

Gjatë kontrollit të kamionit, janë gjetur 40 copë dele, pa dokumentacion përcjellës e që dyshohet se janë kontrabandë nga Serbia në Kosovë. Po ashtu janë hasur edhe dy automjete të braktisura, të cilat dyshohet se kanë qenë në përcjellje të kamionit.

Në vendin e ngjarjes kanë dalë njësitet përkatëse policore, përfshirë IPK-në dhe për rastin është njoftuar prokurori.

Ndaj të dyshuarit është iniciuar rasti kundrejt dy veprave penale sulmi ndaj personit zyrtar dhe kontrabanda e mallrave.

Kamioni me dele është dërguar në terminalin doganor, dy veturat e hasura në vend-ngjarje janë konfiskuar, ndërsa me aktvendim nga prokurori, i dyshuari dërgohet në mbajtje 48 orë.

Kryeprokurori i Prokurorisë Speciale të Kosovës, Blerim Isufaj ka thënë se ka dhënë pëlqimin për heqjen e urdhërarrestit ndaj të sanksionuarit të ShBA-së dhe BE-së, Milan Radojçiq. E derisa ai nuk tregoi arsyen e kësaj, drejtori i institutit “Octopus”, Agim Musliu thotë se asgjë nuk e justifikon një gjë të tillë, pasi ky i fundit ka sulmuar Republikën e Kosovës më 24 shtator.

Musliu thekson për KosovaPress, se asnjë marrëveshje e fshehtë ndërkombëtare nuk mund të aplikohet në raste të tilla, kur bëhet fjalë për një kryekomandant të terroristëve, i cili kryen agresion dhe akte të tilla ndaj një vendi.

“Milan Radojçiq është kriminel i ndjekur edhe ndërkombëtarisht edhe nga INTERPOL-i edhe nga EUROPOL-i edhe është në listën e zezë të Shteteve të Bashkuara të Amerikës. Sa i përket kësaj që e thatë ju, që Isufaj e ka ndaluar ndjekjen penale të kryeterroristit Milan Radojçiq unë nuk kam koment, nuk i di rrethanat se pse ka ndodhur kjo, por sidoqoftë nuk ka asnjë arsye të bëhet kjo sepse Milan Radojçiq ka qenë kryekomandanti i terroristëve i cili ka sulmuar direkt shtetin e Kosovës, Republikën e Kosovës, një territor të saj ka pretenduar që ta shkëpus nga Republika e Kosovës dhe janë aktet më të rënda dhe më të sanksionuara me të gjitha ligjet edhe ndërkombëtare por edhe ato të Republikës të Kosovës, me ligj akt më i rëndë nuk ekziston”, tha Musliu.

Javë më parë KosovaPress, pati raportuar se INTERPOL ka lëshuar urdhërarrest për terroristin Milan Radojiçiq.

Ky i fundit ka pranuar se qëndron prapa sulmit terrorist në Banjskë të Zveçanit, por që vazhdon të endet i lirë në Serbi.

PSRK-ja konfirmon urdhërarrestin ndaj Milan Radojiçiqit