Tag: Ballina

Gjatë orëve të fundit në Shërbimin Emergjent pranë Qendrës Klinike Universitare të Kosovës (QKUK) janë trajtuar 21 raste të lëndimit nga shpërthimi i mjeteve piroteknike.

Dy prej janë në gjendje më të rëndë, ngase njëri pacient është plagosur nga një plumb qorr, ndërkaq tjetri ka marrë lëndime nga përdorimi i fishekzjarrëve, raporton Klankosova.tv.

Njëri nga të lënduarit po vazhdon trajtimin në Klinikën e Kirurgjisë Plastike, ndërsa një tjetër në atë të Oftamologjisë. Ndërkaq, të lënduarit e tjerë, pas trajtimit janë liruar për në shtëpi.

Kështu ka bërë të ditur drejtori i Shërbimit Emergjent, Naser Syla, derisa potencon se mosha e pacientëve që kanë marrë lëndime si shkas i përdorimit të mjeteve piroteknike fillon nga një 6-vjeçar deri te një i moshuar mbi 60-vjeç.

Syla shtoi se gjatë 18 orëve të fundit në Shërbimin Emergjent janë pranuar rreth 217 pacientë.

Ndryshe, Policia e Kosovës për menaxhimin e situatës së sigurisë gjatë festës së ndërrimit të mot-motit ka përgatitur urdhrin operativ “Fund Viti – 2023 dhe fillimi i 2024” ku është paraparë shtim i prezencës policore në rrugë dhe ambiente të hapura, në sheshe e lokacione ku ka frekuentim të qytetarëve.

Më shumë se një dekadë u deshën që kosovarët më në fund ta gëzojnë të drejtën e udhëtimit në botën evropiane.

E pikërisht sot, që nga ndërrimi i mot-moteve qytetarët kanë mundësinë ta festojnë fillimin e vitit 2024 në zonën Schengen.

Rruga e Kosovës për të fituar liberalizimin

Gjithçka nisi në janar të vitit të 2012. Fillimisht, negociatat e para për liberalizimin e vizave i filloi komisionerja Evropiane për Punët e Brendshme, Cecilia Malmstrom, e cila vizitoi Kosovën me qëllimin që ta paraqiste një plan për dialog rreth kësaj çështje.

Ndërkohë, qysh prej atëherë kanë filluar që ndaj Kosovës të vendosen kritere, në mënyrë që ato të plotësohen që qytetarët të kenë të drejtë udhëtimi. Kriteret vazhdimisht me kalimin e kohës ndryshonin, por përgjigja negative jo.

Gjatë rrugës, për Kosovën këto kritere janë parë me “sy të ngopur” e janë cilësuar të tepërta për realizim. Përveç kushteve administrative e teknike, Kosova u detyrua nga BE që gjatë rrugës të përfshijë edhe çështjet politike.

Katër vite më vonë, konkretisht më 4 maj të vitit 2016 për Kosovën ishte “i gatshëm” liberalizimi i vizave. Sipas Komisionit Evropian, qytetarët e Kosovës që atëherë do të udhëtonin lirshëm. Por, edhe pse Komisioni dhe Parlamenti Evropian i thanë “po” miratimit për liberalizim potencial të vizave, prapë Këshilli i Ministrave të BE-së nuk u bind.

Anëtarët e Këshillit nuk u bindën me arsyetimin se disa nga vendet anëtare të BE-së vlerësonin se Kosova ende nuk kishte arritur lartësinë e rekomanduar sa i përket luftimit të korrupsionit dhe krimit të organizuar.

E premtimet për çdo vit se lëvizja e lirë do të nodhë nuk mungonin as nga udhëheqësit e institucionëve të Kosovës.

Kosova, dikur arriti që ta vërtetojë se kishte plotësuar pothuajse të gjitha “kriteret e tepërta”, por gjatë rrugës sërish pati një tjetër kusht. Asaj radhe u kushtëzua me ratifikimin e marrëveshjes së Demarkacionit me Malin e Zi. Drejtë realizimit të marrëveshjes u pa haptazi që kriteret ishin vendosur mbi çështje politike.

Deri në vitin 2018, Kosova arriti që ta ratifikojë atë marrëveshje, por BE edhe asaj radhe “tradhtoi” marrëveshjen. Kështu BE veproi gjatë, duke mos e mbajtur premtimin për vite me radhë, që për pasojë la peng liberalizimin për qytetarët.

Qysh nga ai vit, Kosova i kishte përmbushur të gjitha kushtet për liberalizimin e vizave, sipas Komisionit Evropian. Por, sërish ishin disa vende anëtare që shprehnin rezerva, që për pasojë prapë nuk u mundësua konfirmimi i plotë për liberalizim.

Ndërkohë, Komiteti për Liritë Qytetare, Drejtësi dhe Çështje të Brendshme (LIBE), në vitin 2019 votoi për fillimin e negociatave me Këshillin e BE-së, për të vazhduar me hapat e mbetur drejt liberalizimit. Më 28 mars u mbajt leximi i parë nga ana e Parlamentit Evropian. Në atë periudhë 331 eurodeputetët kanë votuar pro, 126 kundër dhe 12 kanë abstenuar. Si pasojë e kësaj, Këshilli nuk ka ndërmarrë mendimin e Parlamentit dhe rrjedhimisht procesi ishte bllokuar.

Tri vite pas, saktësisht në tetor të 2022-tës, u realizua takimi i Grupit Punues për Viza. Në atë takim u diskutua për liberalizim brenda Këshillit, që Kosova asnjëherë më parë nuk kishte arritur deri në atë pikë, pra brenda procesit vendimmarrës të BE-së. Atë ditë të gjitha vendet anëtare kishin “mbështetur” e “mirëpritur” gjerësisht liberalizimin. Pas dy muajsh, ishin ambasadorët e BE-së që vulosën liberalizimin e vizave për Kosovën, si hapi i fundit.

Gjatë atij viti, ajo vulë mbylli procedurën teknike për liberalizim, duke “shpresuar” që në muajt e ardhshëm të mbetej vetëm votimi formal në seancën plenare të Parlamentit Evropian dhe Këshillit për Punë të Brendshme.

Gjithashtu, në liberalizimin e vizave “mollë sherri” konsiderohej edhe procesi i dialogut Kosovë – Serbi, që sot e asaj kohe ende nuk është arritur normalizimi i plotë i marrëdhënieve mes të dyja palëve.

Kosova nuk u dorëzua deri në nënshkrimin e liberalizimit

Kosovarët ishin të vetmit qytetarë të Ballkanit Perëndimor, të cilët nuk mund të udhëtonin lirshëm.

Por, Kosova nuk u dorëzua deri në miratimin e plotë për liberalizim, ku hapat përfundimtar arritën pas 12 viteve.

Më 9 mars të 2023-tës, Këshilli i Ministrave ka miratuar njëzëri liberalizimin, ku pas këtij hapi kishte mbetur edhe miratimi në seancën plenare të Parlamentit Evropian, që parashikohej përsëri përkrahje me unanimitet. Derisa, dy javë më pas, me 47 vota pro, 8 kundër dhe 4 abstenime, Komisioni për Drejtat Civile, Drejtësi dhe Punët e Brendshme (LIBE) dha miratimin përfundimtar të legjislacionit që t’ia mundësojë qytetarëve lëvizjen e lirë.

Kosova shënon rekord në historinë e procesit të liberalizimit

Kosova është vendi i vetëm, procesi i të cilit zgjati me më së shumti vite në historinë e liberalizimit të vizave. Qysh prej fillimit të negociatave e deri në lëvizjen e lirë u dashen plot 12 vite. Përkundër që procesi i liberalizimit në Shqipëri ka zgjatur vetëm tri vite, ndërsa në Serbi dy.

Qytetarëve të Kosovës, më 18 prill të 2023-tës Parlamenti Evropian ua miratoi përfundimisht liberalizimin e vizave. Miratimi u bë pa votim, pasi që nuk kishte asnjë kundërshtim. Gjithashtu, pas këtij miratimi ishte bërë e qartë se zbatimi i vendimit nuk do të shtyhet më larg se sot. Ky vendim kishte qenë i lidhur me Sistemin Evropian i Informacionit dhe Autorizimit të Udhëtimit (ETIAS) të udhëtimit në Evropë.

Rregullorja 2023/850 që mundëson liberalizimin, më 25 prill u publikua në gazetën zyrtare të BE-së e veçse hyri në fuqi më 15 maj 2023.

Ndodhi heqja e vizave për shtetasit e Kosovës, por gjithashtu më pas KE propozoi që vizat të hiqen edhe për bartësit e pasaportave të Republikës së Serbisë, të cilët banojnë në Kosovë. Pra, Komisioni propozoi që të ndryshohet vendimi për liberalizimin e vizave për shtetin serb. Por kjo gjë u kundërshtua nga Qeveria e Kosovës, e cila tha se qytetarët serbë që jetojnë në Kosovë mund të lëvizin lirshëm në BE vetëm me pasaportën e Kosovës.

Çfarë nënkupton liberalizimi?

Liberalizimi i vizave nënkuptohet atëherë kur arrihet një marrëveshje mes një shteti dhe Bashkimit Evropian, ku më pas mundësohet leja e udhëtimit pa vizë. Kjo marrëveshje nuk përfshin leje pune të çfarëdoshme apo mundësi për të jetuar në një nga shtet që janë pjesëmarrëse në marrëveshje.

Kosovarët që ia mësyjnë Evropës

Me liberalizimin e vizave tashmë qytetarët e vendit kanë të drejtë të udhëtojnë lirshëm në shtetet e Bashkimit Evropian, sikurse Belgjika, Austria, Bullgaria, Danimarka, Estonia, Finlanda, Franca, Greqia, Gjermania, Holanda, Hungaria, Italia, Kroacia, Letonia, Lituania, Luksemburgu, Malta, Polonia, Portugalia, Qipro, Republika Çeke, Rumania, Sllovakia, Sllovenia, Suedia. Po ashtu, kosovarët mund të udhëtojnë edhe në disa vende që janë nënshkruese të marrëveshjes, ani pse nuk janë anëtare të BE-së, siç janë Islanda, Norvegjia, Zvicra e Lihteshtajni.

Por, kosovarët nuk mund të udhëtojnë në Spanjë edhe pse është në zonën Schengen, pasi që ky vend nuk i njeh pasaportat e Kosovës.

Kushtet për udhëtarët

Qytetarët para se të udhëtojnë në zonën Schengen duhet të plotësojnë edhe disa kushte të tjera. Pasaporta biometrike, dëshmi mbi qëllimin e udhëtimit, dëshmi mbi qëndrimin si rezervimi i hotelit ose vendin ku do të qëndrojnë detajet e udhëtimit, duke përfshirë rezervimin e biletës kthyese e nëse udhëton me veturë, dokumentet e nevojshme të veturës, e dëshmi se kanë mjete të mjaftueshme financiare.

BE do ta vëzhgojë Kosovën

Edhe përkundër marrëveshjes, Kosova vazhdimisht do të jetë nën vëzhgimin e BE-së. Sepse, liberalizimi i vizave nuk është vendim i vlefshëm pafundësisht, prandaj mbetet që situata të rivlerësohet.

Bazuar në marrëveshje, Bashkimi Evropian ka “mekanizmin e pezullimit të vizave”. Pra, Kosova do jetë në rrezik të pezullimit të liberalizimit përkohësisht në qoftë se udhëtarët keqpërdorin lëvizjen pa viza.

Kryeministri i Kosovës, Albin Kurti, i shoqëruar nga kryetari i kuvendit të Kosovës, Glauk Konjufca, ministri i Punëve të Brendshme, Xhelal Sveçla dhe kryetari i Mitrovicës së Veriut, Erden Atiq i kanë shkuar në konak kryetarit të Leposaviqit, Lulzim Hetemit.

Kurti theksoi se Hetemi u tregoi për punët e mira që po bëhen në komunën e Leposaviqit, për rregullin e vendosur, planet zhvillimore dhe korrektësinë e praktikuar.

“Para tri ditëve, kryetari i komunës së Leposaviqit, Lulzim Hetemi, doli nga zyra e tij dhe e vizitoi kryetarin e komunës veriore të Mitrovicës, Erden Atiqin. E ky ia ktheu sonte vizitën në shtëpinë e Lulzimit ku ishin mbledhur familja e gjerë e tij. Me Erdenin ishim edhe ne: Kryetari i Kuvendit të Kosovës, Glauk Konjufca, Ministri i Punëve të Brendshme, Xhelal Sveçla, dhe, unë”, shkroi Kurti.

“Na njoftoi për aq shumë palë që i pret gjatë ditës, përditë, çdo orë. Ua dëgjon me vëmendje ankesat e kërkesat dhe i shqyrton ato me seriozitet e i trajton me shpejtësi. Serbishtja e tij nuk është aq e mirë, ashtu qysh nuk është e mirë as shqipja e serbëve në Leposaviq, mirëpo shumë mirë po merren vesh sepse e kanë qëllimin e mirë, interesimin e njëmendtë dhe interesin e përbashkët për mirëqenie dhe të drejta për të gjithë qytetarët pa dallim. Lulzim Hetemi është udhëheqës i drejtë dhe punëtor”, shtoi tutjej shefi i qeverisë.

“Në festën e Vitit të Ri në gjirin familjar ishin edhe Kosovarja, vajza e Kryetarit, dhe Albaniku, të dy mbesë e nip të dëshmorës Fatime Hetemi, e që pardje u bënë pjesë e 325 rekrutëve të rinj të cilët iu bashkuan ushtrisë sonë, Forcës së Sigurisë së Kosovës”.

Ai theksoi se pasi e kanë përfunduar vizitën, Hetemi është kthyer në zyrën e tij në Leposaviq.

“Pas kësaj vizite sonte në familjen e Lulzim Hetemit, ne u kthyem në Prishtinë për të vazhduar festën, ndërkaq ai u nis për në zyrën e tij në Leposaviq për të punuar dhe festuar me disa kolegë të tij si dhe me policët tanë e ushtarët e KFOR-it amerikan”.

“Viti 2023 ishte fort i veçantë për Lulzim Hetemin: nuk ia ka marrë mendja që do të bëhet kryetar komune e mandej aq më pak që do ta pres ndërrimin e motmoteve si kryetar komune. Kryetari i komunës së Leposaviqit, Lulzim Hetemi, është kryetari më i rëndësishëm, jo vetëm në Kosovë, jo vetëm i komunës. Gëzuar 2024!”.

ATV mbyll vitin 2023 me rekord të video shikimeve të përmbajtjes në facebook.

Të dhënat janë bazuar në analizat e CrowdTangle, ndërsa ky sukses i ATV-së është reflektim i strategjisë së shkëlqyer dhe përmbajtjes së përshtatshme të ofruar për shikuesit dhe ndjekësit e vet.

Le të jetë ky sukses i jashtëzakonshëm dhe ky pozicion i palëkundur i ATV-së një dhuratë për shikuesit e vet dhe të gjithë shqiptarët kudo janë, për Vitin e Ri 2024!

Kryeministri Albin Kurti përmes një postimi në Facebook ka shkruar se Afrim Bunjaku e Enver Zymeri janë dy emra heronjsh, që si oficerë policie ranë në krye të detyrës për sundimin e ligjit, integritetin territorial dhe sovranitetin shtetëror të Republikës së Kosovës.

Postimi i tij:

Afrim Bunjaku e Enver Zymeri janë dy emra heronjsh, që si oficerë policie ranë në krye të detyrës për sundimin e ligjit, integritetin territorial dhe sovranitetin shtetëror të Republikës së Kosovës.

Bashkë me Ministren e Drejtësisë, Albulena Haxhiun, Ministrin e Punëve të Brendshme, Xhelal Sveçlën dhe Drejtorin e Policisë, Gazmend Hoxha, sot vizituam familjet e tyre në Vushtrri.

Në Samadrexhë, gruas Lumnijes, vajzës Arbenitës dhe dy djemve Fatlumit e Jetlumit, motrës Fexhrijes si dhe të afërmve të tjerë, iu shprehëm edhe njëherë mirënjohjen e thellë për sakrificën dhe kontributin e rreshterit të Policisë, heroit tonë Afrimit. Aty shkuam bashkë me djalin e Enver Zymerit, Sokolin.

Nga aty, me dy djemtë e Afrim Bunjakut, Fatlumin e Jetlumin vizituam familjen e Enver Zymerit. Na pritën vëllau Egzoni, gruaja Drita, djali Sokoli, vajzat Luljeta e Rinesa, axha Ramadani dhe shumë të tjerë.
Enverin e kujtoj dy herë. Një herë për shërbimin dhe sakrificën e tij dhe një herë tjetër për Bacën Rremë, babain e tij, Muharremin, shokun tim të burgut, me të cilin e kam ndarë të njëjtën qeli për një vit, në burg të Serbisë, e i cili ndërroi jetë para dy vitesh.

Festat e fundvitit do të ishin më të plota me Afrimin e Enverin, por ne nuk i harrojmë asnjëherë sepse ata janë historia krenare e Republikës sonë.

Presidentja Vjosa Osmani ka njoftuar se në prag të Vitit të Ri, përveç Klinikës Emergjente dhe atë të Kardiologjisë, ka vizituar edhe Stacionin Policor në Qendër.

Përmes një postimi në Facebook, ajo është shprehur mirënjohëse ndaj puëntorëve në këto institucione, duke thënë se burrat dhe gratë që janë në vijë të frontit, e bëjnë shtetin më të sigurt.

“Përkushtimi dhe devotshmëria e stafit mjekësor dhe atij policor në mbarë Kosovën ndaj qytetarëve tanë janë burim krenarie për Republikën tonë. Përderisa shumica festojmë pranë më të dashurve, policia, klinikat e shumë të tjerë do të jenë në krye të detyrës për t’u kujdesur për qytetarët tanë. Janë gratë dhe burrat në vijë të frontit ata që e bëjnë shtetin tonë më të sigurt çdo ditë të vitit”, ka shkruar Osmani.

Gjatë një periudhe katër orëshe toga e lagunarit simuloi një patrullë me aktivitete të tjera të kombinuara amfibe dhe gjithashtu simuloi një ulje në një mjedis jo lejues.

“Lagunari italian, pjesë e Batalionit Rezervë Operacional të dislokuar në veri të Kosovës si pjesë e misionit të KFOR-it të udhëhequr nga NATO me Regjimentin 186-të Italian Paracadutisti “Folgore”, së fundi kreu stërvitje specifike në liqenin e Gazivodkos”, thuhet në njoftim të KFOR-it.

KFOR-i njofton, si zakonisht, se “vazhdon të zbatojë mandatin e tij të OKB-së për të siguruar një mjedis të sigurt për të gjitha komunitetet që jetojnë në Kosovë dhe lirinë e lëvizjes; në çdo kohë dhe në mënyrë të paanshme”.

Në Klinikën e Emergjencës së QKUK-së janë bërë të gjitha përgatitjet që stafi të jetë sa më i plotësuar për t’u dalë në ndihmë mjekësore qytetarëve që kanë nevojë në natën e ndërrimit të moteve, raporton EO.

Kështu ka deklaruar për Ekonomia Online, drejtori i Klinikës Emergjente, Naser Syla.

“Jemi në natën e Vitit të Ri dhe Qendra Emergjente si zakonisht është e përgatitur si në aspektin e personelit që janë ekipet kujdestare e po ashtu edhe në aspketin medikamenteve dhe materialeve hargjuese. Jemi të përgatitur që t’i trajtojmë të gjitha ato raste që kërkojnë trajtim emergjent dhe që kërkpjnë ndihmë në qendrën emergjente”, tha Syla.

“Janë ekipet kujdestare të cilat e mbajnë atë barrën kryesore. Janë ekipet që kanë qenë, mirëpo thënë të drejtën nuk është bërë diçka ekstra që të përgatitemi më shumë edhe pse presim një rritje të madhe të pacientëve, dashtë Zoti të mos ketë. Pra kjo është diçka e zakonshme në emergjencë”, u shpreh Syla, teksa apeloi te qytetarët që të festojnë pa armë e pa mjete piroteknike.

Kryeministri i Republikës së Kosovës, Albin Kurti, në adresimin e tij të fundvitit ka folur për marrëdhëniet e ngushta të vendit me aleatët ndërkombëtarë dhe procesin e dialogut për normalizim të raporteve me Serbinë.

Përmes një videomesazhi të publikuar në Facebook, Kurti ka thënë se Kosova ka bashkëpunim me aleatët në procesin e normalizimit me Serbinë me synim për të sjellë paqe e siguri dhe “për ta hequr barrën që do ta ngadalësojë rritjen e prosperitetin tonë”.

“Do të doja të siguroja qytetarët se çdo marrëveshje që do të nënshkruhet me Serbinë do të jetë në të mirë të vendit tonë dhe nuk do të kërcënojë sigurinë dhe integritetin territorial, kushtetutshmërinë e rendin ligjor të vendit tonë”, ka thënë Kurti, shkruan Sinjali.

“Kosova jonë është në prag të një të ardhme që është më afër asaj se çka meritojmë dhe për të cilën kemi punuar intenzivisht”.

Marrëveshjen për rrugën drejt normalizimit të raporteve mes Kosovës dhe Serbisë e kishin arritur më 27 shkurt të këtij viti kryeministri i Kosovës, Albin Kurti, dhe presidenti i Serbisë, Aleksandar Vuçiq.

Ndërsa, më 18 mars ishin pajtuar në Ohër për aneksin e zbatimit të marrëveshjes.

Por, ato marrëveshje nuk u nënshkruan pasi një gjë e tillë u refuzua nga presidenti i Serbisë, Aleksandar Vuçiq.

Mes tjerash marrëveshja kërkon respektimin e integritetit territorial mes palëve ndërsa neni 4 i saj, i cili tash është problematik për Serbinë, parasheh që Serbia të mos e kundërshtojë anëtarësimin e Kosovës në asnjë organizatë ndërkombëtare.

Aeroporti Ndërkombëtar i Prishtinës “Adem Jashari”, ka shënuar rritje të fluturimeve mbi 4% më shumë në krahasim me vitin 2022, duke kapur shifrën prej 40 mijë fluturime për vitin 2023. Po ashtu, për herë të parë në historinë e aeroportit, kanë udhëtuar rreth 3.4 milionë udhëtarë, si dhe këto shifra udhëtimesh priten të rriten gjatë këtij viti me liberalizimin e vizave për Kosovën. Aeroporti e sheh veten të përgatitur për këtë numër të udhëtarëve, por se janë duke investuar edhe në hapësira të reja për çfarëdo fluksi tjetër të mundshëm.

Ndërsa, sa i përket liberalizimit të vizave, qytetarët janë shprehur të lumtur për këtë mundësi që tashmë e ka Kosova. Kurse, agjencionet turistike kanë thënë se procedura për udhëtime tashmë do të jetë shumë më e lehtë.

Zëdhënësja e aeroportit, Valentina Gara ka thënë për KosovaPress, se janë duke shtuar linja ajrore dhe destinacione të reja.

Gara u ka bërë thirrje të gjithë udhëtarëve që dëshirojnë të udhëtojnë pa viza, të përgatisin të gjitha dokumentet e nevojshme në mënyrë që mos t’i anulohet fluturimi për mungesë të ndonjë dokumenti.

Ndërkaq, qytetarët shprehen të lumtur për mundësin e udhëtimit pa viza. Ata thanë se Kosova e ka merituar liberalizimin e vizave dhe se do të vizitojnë të gjithë familjarët e tyre jashtë vendit.

Elbasan Muja tha se Kosova ka qenë i vetmi vend pa liberalizim të vizave.

Aferdita Zyliu tha se është e lumtur për heqjen e vizave dhe se shkon mysafir në Gjermani.

Në anën tjetër, në Agjensionin Turistik “Fibula”, kanë thënë për KosovaPress, se heqja e vizvaë është lehtësim i madh si për qytetarët, ashtu edhe për vet ata.

Fetije Sipahi nga kjo agjensioni, tha se qytetarët tashmë për udhëtime jashtë vendit, me liberalizimin e vizave do të paguajnë 100 euro më pak.

Sipahi tha se rezervime më shumti ka për Gjermani dhe Zvicërr.

Sipas të dhënave nga Aeroporti i Prishtinës, totali i udhëtarëve për vitin 2022, ishte mbi 2 milionë, si dhe destinacionet më të frekuentuara kanë qenë Gjermani dhe Zvicërr.