Zëvendëskryeministri Besnik Bislimi ka bërë të ditur se Spanja njeh pasaportat e Republikës së Kosovës.
Ai në një postim në Facebook ka shkruar se qytetarët e Kosovës mund të udhëtojnë pa viza dhe drejt këtij shteti evropian, i cili ende nuk e ka njohur pavarësinë e shtetit tonë.
“DG Home ka njoftuar se tashmë edhe Spanja i njeh pasaportat e Republikës së Kosovës. Pra, mund të udhëtojmë pa viza dhe drejt këtij shteti. Ndërsa më 1 janar nisi lëvizja pa viza, Spanja është destinacion që i shtohet vendeve të zonës Shengen ku mund të udhëtojmë përmes liberalizimit, e ku pengesë më herët ishte mosnjohja e pasaportës sonë. Vazhdojmë tutje, për të sjellë lajme të tjera të mira, e që ndikojnë pozitivisht për qytetarët tanë”, shkruan Bislimi.
Ndryshe, DG HOME, Departament i Komisionit Evropian, është përgjegjës për migracionin dhe çështjet e brendshme.
Kushtrim Hoxhaj, 28 vjeçar nga Prizreni dhe Jetmir Rexhepi rreth 30 vjeçar nga fshati Celinë e Rahovecit janë viktimat të cilat kanë ndërruar jetë derisa po vinin në Kosovë, si pasojë e një aksidenti trafiku në Hungari, ku vetura e tyre u përplas me një kamion dhe kishte marrë flakën.
Kështu thotë për KosovaPress axha i Kushtrimit, Bashkim Hoxha derisa thekson se autoritetet po e kanë të vështirë që ta identifikojnë Jetmir Rexhepin, pasi ky i fundit kishte marrë flakë në makinë bashkë me të gjitha dokumentet personale.
Ai shton se do të bëhet obduksioni i trupave të viktimave, për çka thotë se ndoshta do tu duhet edhe familjarëve të Jetmirit për të shkuar në Gjermani për të ndjekur procedurat e identifikimit.
Hoxha potencon se nuk kanë marrë ndonjë informacion të saktë se kur do të kthehen trupat e pa jetë të viktimave për varrim në Kosovë.
“Mbrëmë rreth orës 1 e 15 minuta sipas informatave që na i ka dhënë policia gjermane, janë aksidentuar me një kamion të madh në autostradë në Hungari. Makina ka marrë flakë, Jetmir Rexhepi, dhëndri ka vdekur në vend dhe janë djegur të gjitha dokumentet. Ndërsa Kushtrimi ka ndërruar jetë gjatë transportit për spital. Ne po presim para të hënës nuk po besoj që fillojnë procedurat e obduksionit dhe rregullimin e dokumenteve. Është problem me rastin e Jetmir Rexhepit të cilit iu kanë djegur të gjitha dokumentet që ka pasur në trup, nuk po mund ta identifikojnë, vetëm që e dimë kush është…Kur pritet të kthehen kufomat në Kosovë? Deri në këtë moment nuk dimë, pas të hënës fillojnë procedurat, a vonojnë dy ditë apo tri, një javë apo brenda ditës edhe ambasada nuk na jep më shumë shpjegime se nuk i di procedurat që i ka shteti. Me siguri duhet të shkojnë familjarët atje të dëshmojnë, nuk e di se si do të rrjedhi pastaj”, thotë Hoxha.
Ndër të tjera, familjari i viktimës thotë se 20 minuta para se të ndodhte aksidenti, Kushtrimi kishte kontaktuar djalin e tij dhe i kishte thënë se është rrugës për të mbërritur në Kosovë.
Gjithashtu ai tregon se Kushtrimi është djali i vetëm i vëllait të tij, që kishte lindur pas tri motrave, e që i njëjti tashme ka lënë një vajzë katër muajsh pas vetes.
Po ashtu, ai potencon se edhe Jetmiri ishte prind i djalit një vjeçar.
“(Kushtrimi) Djalë pas tri motrave ka lindur ai, ka lënë një vajzë katër muajshe, ndërsa Jetmiri e ka lënë djalin një vjeç, të dy nga një fëmijë kanë pasur…Bile 20 minuta para se të ndodhë, i kishte shkruar djalit tim Drilonit, ‘Ei mashkull mos flejë se unë mbërrijë sonte, mos flejë në gjumë’, se janë rritur bashkë ata. Më tregoi djali edhe mesazhin”, thotë Hoxha.
Lidhur me rastin ka reaguar edhe ministrja e Punëve të Jashtme, Donika Gërvalla. Përmes një postimi në Facebook ka bërë të ditur se Ministria e Punëve të Jashtme dhe Diasporës përmes misioneve diplomatike në Hungari dhe Gjermani, bashkë me autoritetet hungareze, po kryejnë të gjitha procedurat e nevojshme për kthimin e trupave të tyre.
Qëndresa Gërlica, një politikane kosovare në Belgjikë, qysh në moshë të re kontribuoj në mbrojtjen e të drejtave të shoqërisë por edhe të komunitetit të shqiptarëve, në Bruksel.
E ftuar në emisionin ‘LIBERO’, në ATV ajo shpalosi shumëçka nga jeta e saj. Ajo ndër të tjera foli edhe për babanë e saj, Bashkim Gërlicën, i cili ka qenë aktivist afër presidentit historik, Ibrahim Rrugova dhe po ashtu punonte me Anton Qetën dhe Zekeria Canën në kuadër të pajtimeve të gjaqeve, por jo vetëm.
Qëndresa rrëfeu se si babai i saj ishte i pikasur nga forcat serbe, për shkak të angazhimit të tij, në mbrojtjen e të drejtave të shqiptarëve.
“Në këtë fotografi që kam zgjedhur është babi, në kohë e paraluftës dhe është koha kur babi ishte fejuar me mamin. Babi ishte shumë aktive në revolucionin kundër pushtetit serb në atë kohë dhe ka qenë i pikasur nga forcat serbe si një person shumë aktive, për të drejtat e shqiptarëve. Kjo fotografi na kujton kohën se si babi ishte detyruar ta përbi unazën e fejesës, si formë e maltretimit nga forcat serbe dhe është momenti kur mjekët ia kanë larguar unazën”, tha ajo./atvlive.tv/
Mërgimtarët vazhdojnë të kthehen nga Kosova në vendet e tyre në Perëndim.
E një gjë e tilë ka bërë që fluksi i kalimeve në kufirin në Merdarë të jetë absolutisht i lartë.
Një gjë e tillë ka shkaktuar kolona të gjatë.
Sipas Qendrës Kombëtare për Menaxhimin Kufitar, të dhënat e sëcilës publikohen në Ministrinë e Punëve të Brendshme, kolona në Merdarë është deri në 4,5 kilometra.
Ndërsa pritja për të kaluar kufirin është deri në 7 orë (420-430 minuta).
Gjykata e Lartë në Shtetet e Bashkuara të Amerikës tha të premten se do të vendosë nëse ish-presidenti Donald Trump do të mbahet jashtë procesit të votimit në zgjedhjet presidenciale të vitit 2024.
Donald Trump dëshiron të përballet me presidentin Joe Biden në votimin e ardhshëm, për të përmbysur humbjen e tij në zgjedhjet e vitit 2020, shkruan Euronews.
Gjyqtarët në gjykatë e kanë parasysh nevojën për të marrë një vendim shpejt, pasi votuesit së shpejti do të fillojnë të hedhin votat e para presidenciale në të gjithë vendin.
Kolorado e ka ndaluar që Trump të paraqitet në fletëvotim për shkak të rolit të tij në sulmin e 6 janarit në Kapitolin e ShBA-së.
Gjykata e Lartë ka pranuar të marrë në shqyrtim ankesën e ish-presidentit amerikan kundër kësaj çështjeje.
Një ditë para përvjetorit të tretë të trazirave nga mbështetësit e Trump që synonin ta mbajnë atë në pushtet, Presidenti i ShBA-së Joe Biden paralajmëroi se përpjekjet e paraardhësit të tij për të rimarrë Shtëpinë e Bardhë në 2024 përbëjnë një kërcënim të madh për vendin.
Bashkimi Evropian është shprehur e gatshme që të fillojë themelimi i Asociacionit, duke theksuar se pret nga Kosova t’i jap komentet dhe sugjerimet e saj për draftin e Asociacionit.
Siç deklaroi zëdhënësi i BE-së, Peter Stano tha se në këtë fazë të avancuar të procesit, themelimi i Asociacionit të komunave me shumicë serbe pritet të fillojë së shpejti.
“Në këtë fazë të avancuar të procesit, pritet që së shpejti të fillojë me themelimin e Asociacionit së komunave me shumicë serbe. Kosova është e ftuar të japë komentet dhe sugjerimet e saj për draftin që është në tryezë”, tha Stano në një përgjigje për REL.
Po ashtu, zëdhënësi i BE-së ka përsëritur se “presin nga të dyja palët t’i vazhdojnë bisedimet bazuar në këtë draft”.
Në një video-mesazh në fund të dhjetorit 2023, ambasadori amerikan në Kosovë, Jeffrey Hovenier, tha se SHBA-ja pret të shohë përparim në normalizimin e marrëdhënieve në vitin 2024.
Në këtë kontekst, ai tha se, edhe Kosova, edhe Serbia, duhet t’i përmbushin obligimet e tyre nga dialogu, duke përfshirë edhe përparimin për Asociacionin e komunave me shumicë serbe.
Ndryshe, SHBA-ja e mbështeti draft-statutin që më parë iu paraqit Kosovës dhe Serbisë.
Mes tjerash, ai parasheh qartë mundësinë e mbështetjes financiare të Asociacionit nga ana e Serbisë, si dhe “një kanal efikas dhe të drejtpërdrejtë të komunikimit ndërmjet komunitetit serb të Kosovës dhe Qeverisë së Kosovës përmes Ministrisë së Administrimit të Vetëqeverisjes Lokale”.
Gjithashtu, ka kompetenca të plota mbi nivelin lokal, përkatësisht në fushat e zhvillimit ekonomik, planifikimit hapësinor, shëndetësisë, arsimit dhe mbrojtjes së identitetit kulturor dhe fetar.
Përveç draftit nga BE-ja, deri më tani janë hartuar edhe katër draft statute të tjera për formimin e Asociacionit: Draft-statuti i Ekipit Menaxhues, drafti i vizionit të kryeministrit të Kosovës, Albin Kurti, drafti-statuti i kryeministrit të Shqipërisë, Edi Rama, dhe draft-statuti i Asociacionit i përgatitur nga organizata gjermane Friedrich-Ebert-Stiftung (FES).
Kryetari i Kuvendit të Kosovës, Glauk Konjufca ka reaguar në lidhje me arrestimin e ish-ushtarit të UÇK-së, Hasan Dakaj nga policia serbe në pikën kufitare me Serbinë, përkatësisht në Merdarë.
Konjufca ka thënë se ky është një sinjal i rrezikshëm në vazhdën e ngjarjeve që tregojnë se autokracitë sot po sulmojnë nga të gjitha anët stabilitetin dhe paqen.
“Arrestimi i papranueshëm në Merdare i ish-ushtarit të UÇK-së, Hasan Dakaj, nga policia serbe, përbën një sinjal tepër të rrezikshëm në vazhdën e ngjarjeve që tregojnë se autokracitë sot po sulmojnë nga të gjitha anët stabilitetin dhe paqen. E vetmja mënyrë e mbijetesës së tyre është shtypja e opozitës dhe demokracisë së brendshme, por dhe dëmtimi me çdo mjet i fqinjëve”, ka shkruar Konjufca në një postim në Facebook.
Ai tutje ka thënë se mungesa e ndëshkimit ndaj Serbisë po e rrit numrin e sulmeve mbi Kosovën.
“Në mënyrë të përsëritur, mungesa e ndëshkimit ndaj Serbisë po e rrit numrin dhe natyrën e sulmeve të saj mbi Republikën e Kosovës dhe qytetarëve të saj”, vijon ai.
Ai tutje ka bërë thirrje për lirim të menjëhershëm të ish-ushtarit të UÇK-së, Hasan Dakaj.
“Bëj thirrje për lirim të menjëhershëm të qytetarit tonë, Hasan Dakaj. Mbajtja e tij peng, vetëm pse është ish-ushtar i UÇK-së, tregon që në Serbi kemi të bëjmë me një qeveri dhe me një shtet që nuk ka ndryshuar aspak në raport me atë Serbi që bëri krime lufte, spastrim etnik dhe gjenocid në Kosovë”, ka thënë kreu i Kuvendit.
Tutje Konjufca ka thënë se me këtë akt, qeveria serbe dëshmon se është në përputhje të plotë me politikën e regjimit të Millosheviqit.
“Akte të tilla mbi qytetarët tanë nuk do të tolerohen në asnjë mënyrë. Thirrja e komunitetit ndërkombëtar për t’i bërë presion Serbisë për lirimin e Hasan Dakajt do t’i shërbente më së miri stabilitetit dhe mundësive të së ardhmes”, ka përfunduar ai.
Nga nëntori i 2022-s, kur kryetarët e katër komunave në veri nga Lista Serbe, dhanë dorëheqje kryetarët e rinj u caktuan vetëm në prill. Zgjedhjet e jashtëzakonshme të atij muaji kaluan pa asnjë incident. Pa ndonjë telashe kaloi edhe betimi i tyre, ndonëse u bë në objekte shkollore e alternativa të tjera.
Por, kaq qetë nuk ishte edhe kur Lulzim Hetemi i Leposaviqit, Izmir Zeqiri i Zubin Potokut e Ilir Peci i Zveçanit me 26 maj hynë në objektet e komunave respektive.
Grupe të qytetarëve serbë u mblodhën para ndërtesave komunale, për të kundërshtuar hyrjen e kryetarëve të rinj shqiptarë në ndërtesat komunale, teksa sulmuan Policinë e në disa komuna pati të shtëna me kallashnikov.
Situata u përshkallëzua më 29 maj, kur protestuesit serbë në komunën e Zveçanit sulmuan pjesëtarët e KFOR-it, të cilët morën kontrollin e objektit të Komunës.
Nga mjete të forta, shok-bomba të improvizuara e gjuajtje me armë, 93 ushtarë të misionit të NATO-s u plagosën rëndë dhe lehtë. Për pasojë, disa prej tyre e patën të pashmangshëm amputimin e gjymtyrëve.
Nga sulmet nuk u kursyen as ekipet e mediave. Gazetarët, sipas AGK-së, u sulmuan mbi 20 herë. Sipas institucioneve kosovare, pjesëtarë të “Mbrojtjes Civile” dhe “Brigadës së Veriut” dy organizata këto që më pas u shpallën terroriste, ishin prapa këtyre protestave të dhunshme.
Ky mobilizim i serbëve për t’i kundërshtuar kryetarët shqiptarë, zgjati rreth 3 javë. Megjithëse, që nga maji, tendat e vendosura pranë objekteve komunale vazhdojnë të qëndrojnë.
Tensionet e fundmajit, sipas njohësve të sigurisë, sollën frikë dhe panik te qytetarët e asaj pjese.
Ndërkaq, vlerësohet se Kosova nuk e shfrytëzoi siç duhej gjithë këtë situatë të krijuar.
Në Kosovë, deri më tani, janë arrestuar dhjetë persona për “pjesëmarrje në protesta të dhunshme” dhe sulme ndaj pjesëtarëve të KFOR-it.
Si lider i “demonstruesve të dhunshëm” u identifikua Millun Millenkoviq – Llune, i cili u arrestua më 13 qershor dhe është ende në paraburgim.
Gati 70 për qind e bizneseve këtë vit kanë shprehur shqetësim për shkak të mundësisë së largimit të fuqisë punëtore pas liberalizimit të vizave.
Në një konferencë për media, Kryetari i Odës Ekonomike, Lulzim Rafuna, tha se institucionet qendrore duhet të punojnë në aspektin e përmirësimit të situatës në sektorin ekonomik.
“67 për qind e bizneseve janë shumë të shqetësuar nga largimi i punëtorëve, pas 1 janarit me liberalizimin e vizave. 27 për qind kanë deklaruar se është e shqetësuese, 4 për qind kanë deklaruar si pak shqetësuese dhe 2 për qind kanë deklaruar se nuk është aspak shqetësuese”, tha Rafuna.
Sfidë kryesore, sipas tij, gjatë viti 2023 bizneset kanë pasur edhe mungesën e personelit të kualifikuar. Mes tjerash, Rafuna shtoi se pritet që këtë vit të mos ketë rritje të inflacionit.
“Pritjet tona janë që në vitin 2024 nuk do të këtë rritje të inflacionit dhe normave të interesit. Do të këtë ulje të inflacionit. Ky është një lajm i mirë edhe për bizneset që në vitin 2024 do të këtë rënie të normave të interesit. Kemi bërë një analizë me 500 biznese të sektorëve të ndryshëm dhe kemi nxjerrë se cilat kanë qenë sfidat dhe barrierat në vitin 2023. Del që gjatë vitit ka pasur një mungesë të kërkesës, këtu hyn edhe ndërtimtaria te shitja e banesave, 53 për qind kanë deklaruar që ka mungesë të porosive. 70 për qind kanë deklaruar që kanë mungesa të personelit të kualifikuar. Problemi me mungesë të energjisë elektrike kanë deklaruar se kanë 28 për qind”, tha Rafuna.
Sidoqoftë, ai tha se Oda Ekonomike gjatë këtij viti do të realizojë një sërë projektesh për normalizimin e situatës në aspektin ekonomik për kompanitë private. Derisa nga masat e vendosura nga Bashkimi Evropian, Kosova ka humbur rreth 300 milionë euro projekte.
Mitrovica e Veriut, Zveçani, Leposaviqi e Zubin Potoku, ishin cak i Policisë për kryerjen e shumë aksioneve, gjatë vitit 2023.
“Ka ardhë koha që ne të veprojmë – kemi vepru. Sfidat kanë qenë të mëdha. Rasti në Banjskë, vrasja e Afrimit. Sulmet me armë. Bllokadat. Ka pasë shumë aktivitete. Por duhet të pasqyrohen në raport të veçantë”, tha zëvendësdrejtori i stacionit të Policisë në Veri, Veton Elshani.
Kështu, niveli i sigurisë në këtë pjesë të Kosovës, sipas zëvendësdrejtorit të policisë, ka arritur në fazë ku nuk mund të ketë kthim prapa.
“Mund të them se asnjëherë nuk ka qenë më në kontroll. Këtë e kemi pa në praktikë. Ndryshe ka qenë në nëntor të vitit të kalum dhe në prill të këtij viti. Ndryshe është sot. Tash mund të dalësh me makinë dhe lëviz kudo në veri”, tha Elshani.
Për të arritur në këtë pikë, një moment konsiderohet pikë e vërtetë kthese – aksioni në Banjsjkë.
“Konsideroj që nëse flasim me matematikë: 10 për qind kanë ndiku veprimet para Banjskës, dhe 90 për qind ka ndiku reagimi në Banjskë, në kthesën për kontroll. Banjska e ka pasë viktimën, po mënyra e reagimit tonë, ka tregu se jemi të vendosur, nuk do të thotë që nuk munden me na dëmtu, por ne jemi të vendosur në rrugën tonë”, tha Elshani.
“29 maj. Nuk duhet me e harru këtë datë. Sepse gjithçka filloi aty e kulmoi më 24 shtator. Prej asaj dite dhe tani ku po flasim, është arritur një qetësi”, tha Arben Dashevci, njohës i çështjeve të sigurisë.
Megjithatë, vlerësohet se ende kanë mbetur punë të pakryera.
“Ne kemi sfida të tjera. Kemi banesa të uzurpume, të cilat duhet me u liru me abitat. Ura psh: është simbol i ndarjes, nuk ka asnjë arsye me qenë ashtu”, tha Elshani.
“Në 2024 pres që në veri të shtrihen edhe institucionet e tjera siç është edhe ARBK-ja, regjistrimet e bizneseve, njerëzit duhet të fillojnë të paguajnë taksa, ujë rrymë…”, tha Elshani.
Asgjë nuk do jetë siç ka qenë. Organet tona janë konsolidu. Kanë kapacitete për veprim në çdo kohë e çdo vend, për arsye sepse e mbrojnë”, tha Dashevci.
Ndërkohë, Bashkimi Evropian është në pritje të një raporti përfundimtar të institucioneve të Kosovës, lidhur me hetimet për sulmin terrorist në Banjskë.
