Lidhja Demokratike e Kosovës (LDK), do të mbajë sot tubim në AMC Hall Prishtina.
Aty do të prezantohet edhe kandidatja për presidente Vjosa Osmani dhe kandidati për kryeministër Lumir Abdixhiku nga kjo parti politike.
Ngjarje zhvillohet në ora 18:00, të dielën.
Të shtunën, Abdixhiku ka ftuar qytetarët që të marrin pjesë, pasi kumtoi kandidaturat.
Ministria Industrisë, Ndërmarrësisë, Tregtisē dhe Inovacionit (MINTI) ka caktuar çmimet e reja të derivateve për dy ditët e ardhshme, 10 dhe 11 maj.
Sipas vendimit bazuar në marzhë tregtare, nafta do të shitet me çmim prej 1.61 euro për litër.
Ndërsa benzina është përcaktuar të shitet me 1.50 euro për litër.
Po ashtu, çmimi i gazit do të jetë 0.79 euro për litër, sipas MINTI-t.
Këshilli i Përgjithshëm i Lëvizjes Vetëvendosje e ka nominuar Albin Kurtin si kandidat për kryeministër për zgjedhjet e 7 qershorit.
Nominimi i Kurtit ka marrë mbështetjen e të gjithë anëtarëve gjatë mbledhjes së së shtunës.
Kryetarja e Forumit të Gruas në këtë parti, Albulena Haxhiu, ka pasur lëvdata për bashkëpartiakun teksa ka dhënë propozimin.
“E propozoj se e njoh nga afër. E them me bindje me plotë, ai nuk e ka kuptuar pozitën e kryeministrit as si rehati e as si privilegj. Për të, pozita ka qenë për t’i ndihmuar qytetarëve. Për Albin Kurtin, shteti matet aty ku prek jetën e qytetarit. Përtej qeverisjes më të suksesshme, me te shteti nuk është strehë për të fortët e as strehë për plaçkë. Është i pashantazueshëm në politikë”, ka thënë ndër të tjera Haxhiu.
Ministri i Infrastrukturës dhe Transportit, Dimal Basha ka reaguar pas raportimeve lidhur me vendndodhjen e Deklaratës së Pavarësisë në objektin e ri të ministrisë, duke thënë se dokumenti nuk është “hedhur”, por është pjesë e inventarit që po sistemohet gjatë bartjes në hapësirat e reja.
Përmes një postimi publik, Basha tha se ministria aktualisht ndodhet në proces të bartjes, sistemimit dhe inventarizimit të hapësirave të punës në objektin e ri.
“Sa i përket lajmit për vendndodhjen e Deklaratës së Pavarësisë, dua ta sqaroj për opinionin publik se aktualisht jemi në proces të bartjes, sistemimit dhe inventarizimit të hapësirave të punës në objektin e ri të Ministrisë”, ka shkruar ai.
Ai theksoi se procesi i bartjes dhe organizimit të inventarit nuk menaxhohet nga ministri, por nga zyrtarët e logjistikës, pasi sipas tij bëhet fjalë për çështje teknike dhe operative.
“Me procesin e bartjes dhe organizimit të inventarit nuk mirret Ministri, por janë zyrtarët e Logjistikës, sepse këto janë çështje teknike dhe operative të organizimit”, ka deklaruar Basha.
Ministri shtoi se objekti aktualisht funksionon në kushte të përkohshme, me orendi të bartura nga objekti i vjetër dhe me organizim të improvizuar.
Sipas tij, edhe Deklarata e Pavarësisë është pjesë e inventarit të bartur dhe po pret të vendoset në mur nga zyrtarët përgjegjës.
“Pjesë e inventarit dhe e materialeve të bartura është edhe Deklarata e Pavarësisë, e cila ‘nuk është hudh’, siç është raportuar padrejtësisht dhe me tendencë në shumë portale, por është sjell në zyrë nga objekti i vjetër dhe po pret derisa zyrtarët e logjistikës ta varin në mur”, ka theksuar ai.
Basha u bëri thirrje qytetarëve që të mos bien pre e interpretimeve tendencioze, duke shtuar se ministria do të vazhdojë punën në shërbim të qytetarëve.
“Ftojmë opinionin publik të mos bjerë pre e interpretimeve tendencioze dhe theksojmë se ministria vazhdon t’u shërbejë qytetarëve me nder, përkushtim dhe përgjegjësi të plotë ndaj interesit publik dhe qytetarëve të Republikës së Kosovës”, ka shtuar ai.
Presidenti i Këshillit Europian, Antonio Costa, i është drejtuar qytetarëve të Kosovës me një video për Ditën e Europës, duke iu drejtuar si “anëtarë të ardhshëm të BE’së”.
Costa në këtë video kujtoi se anëtarët që themeluan Bashkimin Europian i tejkaluan ndarjet dhe zgjodhën të bashkëpunojnë.
“Të dashur qytetarë të Kosovës, po ju drejtohem sot si anëtarë të ardhshëm të Bashkimit Evropian. Në Ditën e Europës, ne festojmë projektin tonë të përbashkët europian, kur anëtarët tanë themelues zgjodhën unitetin mbi ndarjen dhe bashkëpunimin mbi konfliktin. Ata vendosën të ndërtojnë një të ardhme paqeje, lirie dhe prosperiteti mbi hirin e Luftës së Dytë Botërore”.
Costa tha se e ardhmja e kosovarëve përket në BE sikurse e atyre në rajon dhe tha se po bëhet shumë punë që kjo të ndodhë.
“Ne besojmë se e ardhmja juaj është në Bashkimin Europian. Po bëhet shumë punë e madhe që kjo të ndodhë. Ju ndani të njëjtin destinacion me pjesën tjetër të rajonit — Bashkimin Europian. Vazhdoni të punoni që kjo të realizohet. Së bashku, do të ndërtojmë një të ardhme të përbashkët evropiane. Rroftë Europa!”, tha Costa.
Lidhja Demokratike e Kosovës mban sot nga ora 12:00 mbledhjen e Këshillit të Përgjithshëm.
Gjatë kësaj mbledhjeje pritet të dalin emrat e Vjosa Osmanit për presidente dhe të Lumir Abdixhikut për kryeministër.
Ndërkohë, mbrëmë ka reaguar kryetari i LDK-së, Lumir Abdixhiku, i cili përmes një postimi në Facebook iu është drejtuar anëtarësisë së partisë, duke theksuar zotimin e tij për bashkimin e të gjitha grupeve brenda subjektit.
Ai ka deklaruar se synon t’i bashkojë ata që kanë qëndruar në parti, ata që janë larguar, ata që kanë heshtur dhe ata që ende besojnë në LDK.
Policia e Kosovës ka bërë të ditur se Drejtoria për Hetimin e Krimit të Organizuar dhe Krimeve të Rënda ka pranuar në trajtim një informacion lidhur me një kanosje të drejtuar ndaj Kryeministrit në detyrë, Albin Kurti, e publikuar në rrjete sociale.
Sipas njoftimit të Policisë, kanosja është adresuar përmes profilit të quajtur “Severna Brigada”, e njohur edhe si “Brigada e Veriut”, organizatë e shpallur terroriste nga institucionet e Republikës së Kosovës.
“Drejtoria për Hetimin e Krimit të Organizuar dhe Krimeve të Rënda, më datë 08 maj 2026, ka pranuar në trajtim një informacion lidhur me një kanosje të adresuar ndaj Kryeministrit të Republikës së Kosovës, z. Albin Kurti, në rrjetet sociale nga profili i quajtur ‘Severna Brigada’”, thuhet në njoftim.
Policia ka bërë të ditur se, në koordinim me Prokurorinë Speciale të Republikës së Kosovës (PSRK), janë ndërmarrë menjëherë veprime intensive hetimore, me mbështetjen edhe të Drejtorisë për Hetimin e Krimeve Kibernetike.
“Në koordinim me Prokurorinë Speciale të Republikës së Kosovës (PSRK), menjëherë janë ndërmarrë veprime intensive hetimore, me mbështetjen edhe të Drejtorisë për Hetimin e Krimeve Kibernetike”, thuhet më tej.
Nga hetimet e deritanishme është konstatuar se kanosja është publikuar përmes llogarisë në Facebook “facebook.com/severna.brigada.2025”, ndërsa sipas të dhënave të siguruara, postimi dyshohet se është bërë nga territori i Republikës së Serbisë, konkretisht nga qyteti i Kralevës.
“Bazuar në të dhënat e siguruara, postimi është bërë nga territori i Republikës së Serbisë, konkretisht nga qyteti i Kralevës në Republikën e Serbisë. Me këtë rast janë identifikuar IP-adresa e përdorur dhe të dhënat personale të përdorura gjatë regjistrimit”, thuhet në njoftim.
Policia e Kosovës thekson se hetimet po vazhdojnë dhe janë siguruar të dhëna shtesë që do të ndihmojnë në zbardhjen e plotë të rastit.
“Nga analizat e kryera nga njësitë kompetente janë identifikuar të dhëna shtesë që mund të ndihmojnë në hetimin intensiv të mëtejshëm nga Policia e Kosovës dhe PSRK”, përfundon njoftimi.
Ish-deputetja e Vetëvendosjes, Adelina Grainca, ka publikuar sot një fotografi me ministrin në detyrë të Infrastrukturës, Dimal Basha, ku vëmendje ka marrë fakti se prapa kauçit në zyrën e Bashës shihet se është lënë për tokë Deklarata e Pavarësisë së Kosovës.
Lidhur me këtë ka reaguar OVL-UÇK. Këta të fundit kanë thënë se fotografia e lënë mbrapa divanit, është ‘’rrëfim politik’’ dhe se, Deklarata e Pavarësisë ‘’përdhoset nga ministri i Qeverisë Kurti’’, përcjell Gazeta Express.
‘‘Albin Kurti dhe LVV-ja nuk mund t’i lajnë duart nga kjo. Lartësuan figura të tilla dhe normalizuan armiqësinë ndaj themeleve të Republikës, duke e kthyer pushtetin institucional në strehë për ata që nuk u pajtuan kurrë me pavarësinë e Kosovës. Arroganca e tyre ndaj Luftës Çlirimtare është kthyer në arrogancë ndaj vetë shtetit’’, ka thënë mes tjerash OVL-UÇK.
Postimi:
Fotografia nga zyra e Dimal Bashës është rrëfim politik. Deklarata e Pavarësisë, e vulosur me sakrificë, gjak, burgime, mërgim dhe luftë, përdhoset nga ministri i Qeverisë Kurti.
Basha nuk ka bërë thjesht një gabim protokollar. Ka shpërfaqur një vazhdimësi. Një njeri që dikur u vinte firmën shkrimeve që shpifnin kundër UÇK-së duke e quajtur kriminale, nuk mund të fshihet sot pas pakujdesisë kur simboli i shtetësisë së Kosovës nëpërkëmbet nën autoritetin e tij. I njëjti përçmim, veçse i inskenuar brenda institucioneve që ekzistojnë falë atyre që ai ka fyer.
Albin Kurti dhe LVV-ja nuk mund t’i lajnë duart nga kjo. Lartësuan figura të tilla dhe normalizuan armiqësinë ndaj themeleve të Republikës, duke e kthyer pushtetin institucional në strehë për ata që nuk u pajtuan kurrë me pavarësinë e Kosovës. Arroganca e tyre ndaj Luftës Çlirimtare është kthyer në arrogancë ndaj vetë shtetit.
Organizata e Veteranëve të Luftës së UÇK-së, duke e dënuar këtë akt të poshtër, i kujton Qeverisë se pavarësia e Kosovës nuk është dekor. UÇK-ja nuk është material shpifjesh për oportunistët politikë që ndërtuan karrierë mbi varret e atyre që vetë i dënuan. Prokuroria e Shtetit duhet të nis hetimet. Basha duhet të sqarojë se në llogari të kujt i përdhos dokumentet me vlerë të posaçme shtetërore, e Kurti duhet të përgjigjet për kulturën antishtetërore që ka instaluar qëllimisht në qeveri.
Kryetari i Lidhjes Demokratike të Kosovës, Lumri Abdixhiku, përmes një postimi në rrjetin social në Facebook, i është ‘’zotuar’’ anëtarësisë së kësaj partie, se do t’i ‘’bashkojë të gjithë’’.
Abdixhiku ka thënë se, ka ardhur koha që ‘’shtëpia’’ e LDK’së të bëhet ‘’sërish një’’.
Postimi:
Anëtarësisë së Lidhjes,
Ju zotohem, do t’i bashkoj të gjithë.
Ata që kanë qëndruar gjithmonë.
Ata që janë larguar.
Ata që kanë heshtur.
Ata që ende besojnë.
Sepse LDK-ja ka qenë gjithmonë më e madhe se secili prej nesh. LDK-ja ka qenë gjithmonë shtëpia e njerëzve të saj.
Dhe koha ka ardhur që kjo shtëpi të bëhet sërish një.
Ish-presidentja e Kosovës, Vjosa Osmani, ka njoftuar se ish-ministrja dhe deputetja në 4 mandate, Albena Reshitaj, do t’i bashkohet listës së saj për zgjedhjet e 7 qershorit.
Osmani e ka cilësuar Reshitajn si një bashkëpunëtore të kahmotshme, duke vlerësuar rolin e saj në momente të rëndësishme politike në vend.
“Kur u zgjodha Presidente në vitin 2021, me votën e saj vendimtare, Albena krijoi kuorumin e nevojshëm dhe bllokoi rolin e Listës Serbe në krijimin e institucioneve, pa asnjë interes personal e pa kërkuar absolutisht asgjë”, ka shkruar Osmani.