Tag: Ballina

Ministri i Ministrisë së Bujqësisë, Pylltarisë dhe Zhvillimit Rural, Faton Peci, në emisionin CONTEXT në ATV, tha se pronat e uzurpuara, të cilat i takojnë Ministrisë së Bujqësisë, janë në vlerë rreth 50 milionë euro.

“Diku një ë vlerë të përafërt, jo vetëm, nuk e di sa mund ta them, vetëm në Fushë Kosovë, por në pronat që i posedon Ministria e Bujqësisë, Instituti Bujqësor me seli në Pejë, diku vlerësohet që është diku rreth pesëdhjetë milionë euro”, tha Peci. /atvlive.tv

Përgatiti: Haris Ademi

Për presidenten e Kosovës, Vjosa Osmani, vetëm një shtet është më larg NATO-s, sesa Serbia.

Prandaj, sipas saj, Beogradi as nuk mund të ëndërrojë të bëhet pjesë e aleancës transatlantike.

Në këtë formë, Osmani iu kundërpërgjigj të mërkurën ambasadorit amerikan në Serbi, Christopher Hill, i cili një ditë më parë tha se Serbia aktualisht është më afër NATO-s, sesa Kosova.

“Është i vetmi shtet i Ballkanit Perëndimor që vazhdimisht ka deklaruar se nuk do të anëtarësohet në NATO dhe se është kundër NATO-s. E treta Serbia është shtet që para pak muajsh ka kryer akt agresioni kundër Republikës së Kosovës, që vazhdimisht tenton të shkatërrojë Bosnjë-Hercegovinën përbrenda, të njëjtën e bën edhe me Malin e Zi”, tha presidentja Osmani.

Për këtë deklarim të Hillit foli edhe kolegu i tij në Prishtinë, Jeffrey Hovenier, i cili tha se i kundërshton ata që bëjnë këso lloj krahasimesh. Ndërsa shtoi se SHBA e mbështet synimin e Kosovës për anëtarësim në NATO, edhe pse ka sfida për shkak të disa shteteve që nuk e njohin ende shtetin e ri ballkanik.

“Kosova rreshtohet shumë mirë me NATO-n, sa i përket vlerave e institucioneve. Më tepër janë këto çështje të pazgjidhura dhe të shohim të avancojë. Presim që plotësisht Kosova të bëhet një ditë anëtare e NATO-s dhe po punojmë në këtë synim”, tha Hovenier.

Hovenier ofroi garanci për sigurinë e kosovarëve, edhe lidhur me deklarimet e presidentit serb, Aleksander Vuciq. Ky i fundit ua dha një lloj ultimatumi shteteve perëndimore, që nëse pozicionohen me Kosovën, Serbia do ta presë momentin për të vepruar.

“Ne flemë rehat sa i përket këtij kërcënimi. Mendojmë se NATO-ja është e përgatitur dhe e gatshme dhe mendoj se as populli i Kosovës nuk duhet të mbetet pa gjumë, sepse aleanca ushtarake më e suksesshme në histori ka një prani të madhe këtu, që është e gatshme të bëjë gjënë e duhur”, tha Hovenier.

Sipas ambasadorit, përkushtimi amerikan për sigurinë e Kosovës është i fortë si kurrë më parë.

Përgatiti: Arton Hamiti

Përveç si kufij shtetërorë, Serbia vazhdon të mos e njohë Kosovën as si kufi energjetik.

Pas takimeve që pati të martën në Bruksel, zëvendëskryeministri Besnik Bislimi tha se linjat e interkonjeksionit me Serbinë vazhdojnë të jenë të bllokuara.

“Është fakt që “Elektroseveri” ka nisur faturimin e energjisë në veri, por ende nuk janë liruar linjat e interkonjeksionit. Për habinë e të gjithëve, Petar Petkovic tha para Lajcakut, se kjo nuk është pjesë e marrëveshjes për energjinë për çka u kundërshtua nga Lajcaku dhe mbetet të diskutohet kjo çështje”, tha zëvendëskryeministri i Kosovës, Besnik Bislimi.

Megjithatë, kjo çështje më shumë është teknike sesa politike, sipas ekspertit të energjisë, Naim Bujupi.

“KOSTT-i, si Operator i Transmisionit është i pranuar në ENTSOE, si anëtar me të drejta të plota që Kosova është e njohur si zonë rregulluese që realisht veç është duke e bërë alokimin e kapaciteteve dhe menaxhimin e kongjecioneve me tri shtete të tjera, Maqedoninë, Shqipërinë dhe Malin e Zi. Pra kjo është ma shumë çështje teknike me Serbinë sesa politike sepse menaxhimi i linjave është pjesë ekskluzive e KOSTT-it andaj Serbia po bën shkelje të marrëveshjes së ENTSO-së në ketë rast”, tha Bujupi.

Sidoqoftë, roli i këtyre linjave në sistemin elektroenergjetik të Kosovës, vlerësohet të jetë i madh, rrjedhimisht edhe dëmi ndaj KOSTT-it.

“Kosova është nyje e fortë elektroenergjetike, pra lidhet shumë me vendet përreth, sidomos me Serbinë. Me Serbinë është e lidhur me nivel të tensionit 400 kilovoltsh, 220 dhe 110 kilovoltsh. Dhe Kosova është duke humbur shumë sepse në këtë rast gjithë alokimin e kapaciteteve e bën Serbia”, tha Bujupi.

Krahas linjave të interkonjeksionit, Operatori i Sistemit të Transmisionit dhe Tregut vazhdon të mos ketë qasje fizike në nënstacionin e Vallaçit, ndonëse ishte paraparë si hap i radhës, pas faturimit të rrymës në veri.

Përgatiti: Haris Ademi

Një ditë pas takimit në Bruksel, kryenegociatorit kosovar Besnik Bislimi, i erdhi në zyrë ambasadori amerikan, Jeffrey Hovenier.

Ky i fundit tha se e sheh mundësi të mirë që Kosova dhe Serbia të japin propozimet e tyre për çështjen e dinarit, siç janë marrë vesh me ndërmjetësuesin nga Bashkimi Evropian, Miroslav Lajcak.

Hovenier përsëriti qëndrimin amerikan se kjo nuk ka të bëjë me dinarin, por se nuk pajtohet me mënyrën e implementimit të rregullores së Bankës Qendrore.

Mirëpo, mohon se ka parë ndonjë dokument të mundshëm, që Bislimi do ta nisë për në Bruksel, të premten.

“Nuk më prezantoi ndonjë propozim specifik. Mendoj se Qeveria ende po punon në këtë drejtim, siç është e nevojshme. Unë desha të shprehja mendimet tona, siç kemi bërë vazhdimisht përderisa duam të jemi konstruktiv në këtë proces, por mendojmë se është shumë çështje e rëndësishme që duhet të adresohet”, tha Hovenier.

Ndërsa, nga zyra e zëvendëskryeministrit thanë se propozimi i palës kosovare nuk do të jetë ndryshe nga rregullorja, derisa shtuan se zgjidhja duhet të bëhet sipas ligjeve të Kosovës.

“[Propozimi] nuk ka fare lidhje me rregulloren në vetvete, në sensin e përmbajtjes së saj, por me mënyrën e zbatimit dhe nëse ka krijuar ndonjë vështirësi për qytetarët nga komuniteti serb në veri”, tha Klisman Kadiu nga zyra e Zëvendëskryeministrit.

Pas dorëzimit të propozimeve, të premten, kryenegociatorët nga Kosova e Serbia, Bislimi e Petkoviq, do ta kenë edhe një takim të radhës, të hënën.

Përgatiti: Kastriot Tahiri

Kështu e nisi fjalimin presidentja, Vjosa Osmani, konferencën Java e Gruas. Nga ky organizim që kthimin në të e cilësoi si në shtëpi, Osmani bëri thirrje që gratë të mos dorëzohen së luftuari për të drejtat e tyre.

“Mos hezitoni sado që duket e vështirë në fillim mos nguroni ta ngritin zërin të kundërshtoni e të kërkoni të drejtat e tuaja. Në rrugëtimin tuaj mos pranoni kurrë t’ju ulin, t’ju dekurajojnë e t’ju bëjnë të ndryshoni kahun, sepse askush nuk e di më mirë se ju potencialin tuaj për të kontribuar drejt ndryshimit. Në secilin nga ju ka diçka që nuk mund të ketë diçka te tjetri”, tha Osmani.

Pranvera Lipovica, drejtoreshë e Programit, NDI Kosovë, tha se gjithëpërfshirja e grave dhe komuniteteve në proceset vendimmarrëse, e rrit besueshmërinë dhe legjitimitetin e institucioneve.

“Angazhimin aktiv në sferën politike, ekonomike dhe sociale forcohet tutje një shoqëri më e shëndoshë, më e drejtë për të gjithë qytetarët e saj. Java e Gruas mbetet një platformë e veçantë me shumë rëndësi për dialog me temat me prioritet për individët dhe grupet e ndryshme të shoqërisë, të cilën e kanë parë të konceptohet, zhvillohet dhe marrë formën që ka sot përgjatë këtyre 12 viteve”, tha Lipovica.

Sipas Nathalie Niedoba, zëvendësudhëheqëse e Misionit diplomatik kanadez në Kroaci e Kosovë, gjithëpërfshirja është qenësore në Qeverinë e Kanadasë.

“Tema e kësaj konference, gjithëpërfshirja dhe ekonomia është diçka që qeveria e Kanadasë e bën edhe në politikën e jashtëm dhe të brendshme. Vizioni i Kanadasë është ku të gjitha gratë janë të lira dhe të marrin pjesë në vendimmarrje. Kur gratë janë të arsimuara, ato fuqizohen në shumë aspekte në jetën e tyre. Barazia gjinore është një prioritet për Kanadanë”, tha Niedoba.

Ky është organizimi i 12-të i javës së gruas, në të cilin u diskutua për Avancimin e lidershipit gjithëpërfshirës si domosdoshmëri strategjike në adresimin e sfidave të shekullit 21.

Java e Gruas organizohet nga Instituti Demokratik Amerikan në Kosovë.

Komisioni për Buxhet, Punë dhe Transfere, ka miratuar kërkesën e Komisionit Qendror të Zgjedhjeve për ndarjen e mjeteve shtesë buxhetore për vitin 2024, raporton Ekonomia Online.

Shuma e kërkuar nga KQZ-ja është mbi 1.5 milion euro dhe ka të bëjë me procesin e zgjedhjeve në qendrat komunale të numërimit.

Kryeshef Ekzekutiv i Sekretariatit të KQZ-së, Burim Ahmetaj, shpjegoi në detaje për kërkesën për buxhet shtesë. Tha se kërkesa ka të bëjë me blerjen e kamerave në secilin vendvotim dhe për blerjen e pajisje harduerike dhe softuerike për transparencë.

“Në kuadër të transparencës KQZ ka paraparë të blejë kamera vëzhguese për secilin vendvotim, që i bjen rreth 2 mijë e 500 vendvotime për të blerë nga një kamerë, po ashtu edhe pajisjet tjera softuerike të cilat janë në shërbim të transparencës dhe për këtë janë rreth 1 milion e gjysmë euro të cilat i kemi në buxhet për vitin 2024 dhe të cilat do t’i zhvillojmë gjatë këtij viti. Janë të ndara pjesa kapitale dhe mallra dhe shërbime, sepse disa pjesë janë softuerike, disa janë pajisje që duhet blerë, por sidoqoftë janë 500 mijë euro për procesin e transparencës, janë edhe 750 mijë euro që do të blihen pajisje harduerike dhe softuerike për transparencë, si dhe një milion euro janë për blerjen e kamerave për secilin vendvotim, që në total e kalojnë 1.5 milion euro vetëm për procesin e transparencës në qendrat komunale të numërimit për gjithë vendin”, tha Ahmeti.

Kryetari KQZ-së, Kreshnik Radoniqi derisa ka raportuar në Komisionin për Buxhet, Punë dhe Transfere ka thënë se buxheti i përgjithshëm i KQZ-së për vitin 2022 ishte 6 milionë e 24 mijë e 134 euro, ndërsa ka theksuar se prej kësaj shumë është shpenzuar 93.2 për qind.

“Me ligjin e buxhetit për vitin 2022 të miratuar nga Kuvendi i Kosovës, KQZ është akorduar një fond prej mbi 5 milion e 913 mijë me qëllim të funksionimit të institucionit dhe për të përmbushur detyrimet ligjore. Pas shpalljes së zgjedhjeve të jashtëzakonshme për kryetar të katër komunave në pjesën veriore të vendit, si dhe pas vendimit të Qeverisë, buxheti i përgjithshëm i KQZ-së për vitin 2022 ishte 6 milion e 24 mijë e 134 euro. Pjesa më e madhe e këtij buxheti, shuma prej 4 milion e 200 mijë euro i takon kategorisë së subvencioneve dhe transferove, Në përgjithësi buxheti është shpenzuar 93.2 për qind, apo në shumën prej 5 milion e 617 mijë euro. Edhe një raport tjetër e kemi dorëzuar ku e kemi pasqyruar shpenzimin e buxhetit për vitin 2022, kjo ka qenë me raportin vjetor të punës së KQZ-së, i cili është dërguar Kuvendit të Kosovës vitin e kaluar”, tha Radoniqi.

Deputeti nga Vetëvendosje, Visar Korenica ka thënë se është zhgënjyese që gjatë raportit llogaritë e arketueshme nuk janë paraqitur siç duhet, për çfarë ka kërkuar të eliminohen këto probleme në të ardhmen.

“Raporti i auditimit të cilin e kemi pranuar po paraqet që nuk është gjendje e mirë e mbajtjes së llogarive në këtë institucion. Raporti është i kualifikuar, që është për më tepër zhgënjyese që mos të paraqitet si duhet llogarite e arketueshme. Kuptoj që keni pas mundësi të keni ndonjë problem me pasurinë për regjistrimin e stoqeve, por që me pas probleme me llogaritë arketueshme nuk po e shoh të arsyeshme”, tha Korenica.

Ndërsa, për këtë Radoniqi ka thënë se e kanë trajtuar këtë çështje, porse ka të bëjë me disa gjoba që janë shqiptuar disa subjekteve politike që nuk ekzistojnë më dhe nuk kanë subjektivitet, derisa shtoi se nuk ka asnjë mundësi KQZ t’i inkasojë këto mjete.

Deputeti i Partisë Demokratike të Kosovës, Mërgim Lushtaku, pati kritika për raportin e vitit 2022, përderisa tha se jemi në vitin 2024.

“Ne jemi duke e trajtuar një raport të vitit 2022 dhe jemi në vitin 2024, në vend se të mendojmë për raportimin e vitit 2023, ne ende para dy viteve merremi me raportet e institucioneve të pavarura, nuk është vetëm ky komision. Ne e kemi miratuar në Kuvendin e Kosovës një rregullore dhe goxha jemi krenuar që kemi bërë një ndryshim, dhe kemi sjellë një burokraci më të tepruar dhe një barrë më ë madhe sa i përket llogaridhënies së institucioneve dhe një vonesë, ku çdo vonesë është edhe në mundësinë e përmirësimit të gjendjes. Është mirë që të bëjmë një kërkesë kryesisë së Kuvendit që këtë rregullore të ndryshojmë në sensin që mos të ketë burokraci në miratimin kohor të rregullores dhe llogaridhënia të jetë më e shpejtë”, tha Lushtaku.

Ambasadori amerikan në Kosovë, Jeffrey Hovenier, i është kundërpërgjigjur kërcënimeve për luftë të presidentit serb, Aleksandar Vuçiq.

Hovenier ka thënë se nuk ndihen të shqetësuar dhe as populli i Kosovës nuk duhet të ndihet i shqetësuar nga kërcënimet e presidentit serb Aleksandar Vuçiq.

Ai ka thënë se aleanca më e fortë ushtarake është në Kosovë, duke iu referuar NATO-s.

“SHBA ka qëndruar fuqishëm për paqen e njerëzve në Kosovës. Mund të them që jemi të përkushtuar për sigurinë e Kosovës. Ne nuk e humbim gjumin natën duke u shqetësuar për atë kërcënim sepse ne besojmë që NATO është e gatshme dhe e përgatitur. Dhe nuk mendoj që as njerëzit e Kosovës duhet të mbesim pa gjumë sepse aleanca ushtarake më e suksesshme në histori ka një prezencë të fuqishme dhe është e gatshme të bëjë të nevojshëm”, tha Hovenier.

Ndihmës Sekretari amerikan për Byronë Ndërkombëtare të Narkotikëve dhe Çështjeve të Zbatimit të Ligjit, Todd Robinson do të jetë për vizitë dyditore në Kosovë nga sot deri më 22 mars.

Siç njofton Departamenti Amerikan i Shtetit, Robinson do të takohet vetëm me presidenten e vendit, Vjosa Osmani, por jo edhe me kryeministrin Albin Kurti, ashtu siç ndodhi me zyrtarin amerikan i cili në dy ditët e fundit ishte për vizitë në Tiranë, e që pati takim me kryeministrin Edi Rama.

“Nga data 20-22 mars, Ndihmës Sekretari Robinson do të udhëtojë në Prishtinë, Kosovë, ku do të takohet me Presidenten e Kosovës Vjosa Osmani dhe me partnerët e INL-së në sektorin e zbatimit të ligjit dhe drejtësisë”, thuhet në njoftim.

Me Kurtin s’u takua as zyrtarja e lartë e USAID-it, Erin McKee, e cila pati takim vetëm me presidenten e vendit, Vjosa Osmani.

Mungesa e takimeve me zyrtarë të lartë amerikanë me Kurtin vjen pas acarimit të raporteve në mes Qeverisë Kurti dhe Administratës Biden.

Këtë e ka bërë të ditur edhe emisari special i ShBA-së për Ballkanin Perëndimor, Gabriel Escobar, i cili tha se në pothuajse tri vite të Qeverisë Kurti nuk ka pasur asnjë takim të nivelit të lartë “mes askujt në Qeverinë e Kosovës dhe dikujt në administratën amerikane”.