Tag: Ballina

Emisari i BE-së për dialogun Kosovë-Serbi, Miroslav Lajçak, ka thënë se kryeministri Albin Kurti nuk do ta çojë Kosovën drejt një izolimi.

Ai ka thënë për gazetën italiane “La Stampa” se SHBA-ja qëndron në linjë me BE-së sa i përket Kosovës.

“SHBA qëndrojnë saktësisht në linjë me ne. Ai (Kurti) e di. E di se cilat janë pritjet. E di që për Kosovën është ekstremisht e rëndësishme të ketë një mbështetje të fortë ndërkombëtare, sepse pikërisht një gjë të tillë Kosova e ka gëzuar nga fillimi. Nuk kam dyshim që (Kurti) do të jetë mjaftueshëm i përgjegjshëm që të mos e fusë vendin e tij në rrezik të një izolimi. Kështu ai po nxjerr përfundimet e duhura”, tha diplomati sllovak.

Lajçak tha se Kosova dhe Serbia duhet t’i normalizojnë raportet si pjesë e procesit të dialogut të lehtësuar nga BE-ja.

“Është shumë e rëndësishme që të niset para zgjedhjeve evropiane, sepse më pas BE do të hyjë në një periudhë të tranzicionit. Pastaj SHBA do të shkojë në zgjedhje. Nuk do të jetë ky momenti për të marrë vendime,” tha ai.

I pyetur nga “La Stampa” se cilat janë pikat që BE-ja do të provojë t’i bindë Prishtinën dhe Beogradin t’i pranojnë ato, diplomati sllovak tha se “Nuk jam akoma i sigurt që do t’i pranojnë, por duhet të na thonë që nuk i pranojnë. E atëherë ne vetëm kemi humbur kohë. Filozofia është që ju e bëni pjesën e juaj dhe unë e bëj timen”.

Kryeministri i Kosovës, Albin Kurti, ka thënë se janë krenarë për arritjen e Qeverisë së tij në trevjetorin e qeverisjes, raporton Ekonomia Online.

Në konferencë për medie ku ka shpalosur punën trevjeçare të tij si kryeministër, Kurti tha se ka pasur punësim të të rinjve e formalizim të ekonomisë.

Kurti tha se falë mbështetjes së masave të ndërmarra nga Qeveria, mbi 30 mijë gra janë punësuar.

“Po i mbushim tre vjet qeverisje dhe kemi shënuar rezultate për të cilat jemi krenar dhe ballëhapur. Punësimi është më i lartë seç ka qenë ndonjëherë, kemi dyfish më shumë të rinj të punësuar në treg të punës, mbi 30 mijë gra më shumë kanë vende pune përmes masave dhe mbështetjes sonë direkte. Në këtë mes ka edhe formalizma të punësimit, por formalizmi i ekonomisë është përpjekje vazhdueshme e qeverive dhe kur aj ndodh është poashtu sukses i Qeverisë”, u shpreh Kurti.

Ndihmës sekretari i Byrosë për Çështjet Evropiane dhe Euroaziatike ambasadori James O’Brien ka folur me rastin e shënimit të 25-vjetorit të sulmeve ajrore të NATO-s, të cilat i dhanë fund regjimit të kasapit të Ballkanit Sllobodan Millosheviq.

Ai ka theksuar se këto veprime nga NATO-ja u ndërmorën për t’i dhënë fund një dhune të tmerrshme që po ushtrohej nga Serbia ndaj popullsisë së pafajshme shqiptare në Kosovë.

Diplomati amerikan ka komentuar tensionet ndërmjet Kosovës dhe Serbisë, pas agresionit të 24 shtatorit në Banjska, duke thënë se situata në terren duhet të detensionohen dhe se Vuçiq e di që çdo veprim eventual ushtarak ndaj Kosovës do të ishte i papranueshëm.

“Në Serbi, presidenti Vuçiq e di shumë se çfarëdo përdorimi i forcës ndaj Kosovës do të ishte e papranueshme dhe do të shihej si rrezikim i trupave të NATO-s që janë aty për të mbrojtur popullatën, qofshin ata etnikisht serbë apo shqiptarë. AI ka thënë se nuk do të ketë përdorim të forcës. Këto ushtrime, manovra (të Serbisë) jemi duke i përcjellë, por të dyja palët duhet të zbusin tensionet në rajon dhe kjo përfshin veprime që mund të jenë të ndërlidhura me ushtrimet ushtarake. Ne e kemi bërë të qartë se individët që janë angazhuar në aktet e shtatorit të vitit të kaluar duhet të mbajnë përgjegjësinë, duhet t’iu kërkohet llogari kjo duhet të ndodhë goxha shpejt. Duam që këto tensione të mbeten të ulura dhe shpresojmë që këto veprime të mos ndodhin”, ka thënë O’Brien.

O’Brien tha se SHBA-të janë mbështetëse të fuqishme të angazhimit të Kosovës dhe anëtarësimit në organizatat ndërkombëtare dhe kjo nënkupton përmbushje të standardeve më të larta që kërkohet nga ato organizata ndërkombëtare.

Ai shtoi se në këtë kontekst shpresojnë të shohim në ditët në vijim që Qeveria e Kosovës të ndërmarrë veprime, të cilat kërkohen dhe për të cilat është pajtuar me bashkësinë ndërkombëtare.

“Sa i përket urdhrit apo rregullores së BQK-së në lidhje me përdorimin e dinarit, Miroslav Lajçaku, përfaqësuesi i BE-së ka dalë me disa ide tejet specifike. Poenta kyçe këtu është se asnjë qeveri nuk duhet të përpiqet të varfërojë qytetarët e vet dhe e shoh që në veri të Kosovës individët e kanë shumë të vështirë të blejnë produktet që iu duhen. Gabriel ka udhëtuar atje për të parë se cila është situata dhe ndjenja që ka qenë ai është se kjo rregullore të zbatohet në një mënyrë që bën të vështirë për vetë qytetarët e Kosovës të jetojnë jetën e tyre dhe ky nuk është operacion qeveritar efektiv. Miqtë e Kosovës po thonë se ky urdhër, kjo rregullore duhet të rishikohet apo të implementohet në një mënyrë që iu mundëson njerëzve që i paguajnë mallrat apo produktet që iu duhen”, tha ai.

O’Brien ka folur edhe për themelimin e asociacionit të komunave me shumicë serbe, për të cilin tha se duhet të zbatohet nga ana e Kosovës, teksa ka mirëpritur vendimin për Manastirin e Deçanit, pavarësisht se siç tha ai, këto vendime janë të rënda drejt anëtarësimit në organizata ndërkombëtare.

Ambasadori amerikan, Jeff Hovenier, në një konferencë të Këshillit të Ambasadorëve të Kosovës, ka thënë se përdorimi i forcës ishte edhe i domosdoshëm edhe legjitim nga NATO gjatë fushatës së bombardimit në vitin 1999 për të ndalë spastrimin etnik kundër shqiptarëve në Kosovë.

Ai tha se në këto ditë do të dëgjohen shumë narrativa për këto ngjarje dhe për këtë ai shpalosi qëndrimin zyrtar amerikan.

“Dua të shfrytëzoj këtë mundësi sepse në ditët në vijim do të dëgjojmë një numër narrativash për sa i përket ngjarjeve të 25 viteve më parë. Pra, që të jap një qëndrim definitiv, jo nga Jeff Hovenier, por nga ambasadori i SHBA-së, një qëndrim zyrtar të SHBA’së, pra Qeveria ime do të ketë mundësi të sqaroj edhe më mirë në ditët në vijim, por po e bëj tash për të shmangur çfarëdo lloj dyshimi sa i përket ngjarjeve para 25 vjetësh”, tha Hovenier, duke vazhduar me sqarimin.

“Pra, para 25 vitesh, bota ishte dëshmitare e një fushate të tmerrshme të spastrimit etnik nga makineria e Millosheviqit këtu në Kosovë. E mbaj mend personalisht dhe e që shumë prej jush e dini kur u përmbyllën bisedimet në Rambuje. Unë isha në Paris derisa po ndodhte. Kishim shteruar të gjitha përpjekjet dhe rrugët diplomatike për të ndalë brutalitetin e regjimit të tmerrshëm të Millosheviqit. Siç e tha presidenti Clinton në vitin 1999, një ditë para se të fillonte operacioni i forcave aleate: Nëse presidenti Millosheviq nuk dëshiron të bëjë paqe, ne kemi vullnetin për të ndaluar kapacitetin e tij për të ushtruar luftë në Kosovë. Tani e shënojmë këtë 25 vjetor në këtë bashkëpunim me solemnitet. Mbajmë mend me qindra-mijëra njerëz që kishin braktisur familjet e tyre. Ne shprehim keqardhje për humbjen e shumë jetëve të civilëve, duke përfshirë ata që kanë vdekur gjatë operacionit të NATO-s pas shterimit të të gjitha alternativave për të ndalë gjakderdhjen, NATO kishte imperativin moral për të vepruar dhe vepruam. Përdorimi i forcës ishte edhe i domosdoshëm edhe legjitim, duke marrë parasysh krizën humanitare që bota po shihte në kohë reale siç kishte shpjeguar presidenti Clinton. Po citoj: “Ne vepruam për të mbrojtur mijëra qytetarë të Kosovës nga një ofensivë luftarake policore dhe veprojmë për të ndalë një luftë më të madhe, veprojmë për të qëndruar në unitet me të gjithë aleatët tonë për paqe”.

Hovenier tha se operacioni i NATO-s ktheu refugjatët pa dallim etnie në shtëpitë e tyre dhe se përpjekjet e tyre ishin për kthimin e paqes.

“SHBA kanë mbështetur NATO-n për 78 ditë bombardime për të ndalë regjimin e Millosheviqit në spastrimin etnik, duke kontribuar edhe me presione diplomatike. Operacioni i tillë shtroi rrugën për përfundimin e armiqësisë dhe krijimin e kushteve për kthimin e refugjatëve nga të gjitha etnitë që e quajnë shtëpi Kosovën. Të gjitha përpjekjet tona ishin në përpjekje të një vizioni të përbashkët, afatgjatë të një Europë që është e tërë, e lirë dhe në paqe. I keni dëgjuar këto fjalë. Ky ka qenë parimi udhëzues për SHBA-në në angazhimin tonë edhe pas Luftës së Ftohtë. Ngjarjet e tmerrshme që kanë ndodhur 25 vjet më parë të mos ndodhin më kurrë. Mbesim të përkushtuar që të mbështesim rolin stabilizues që kryhet nga Forca e NATO-s në Kosovë, KFOR”.

Hovenier ka përkujtuar trimërinë e atyre që qëndruan kundër spastrimit etnik dhe atyre që vazhdojnë ta ruajnë paqen sot, duke ritheksuar vizionin të Europës së tërë, të lirë dhe në paqe.

Vendet që e nënshkruajnë Konventën Evropiane për të Drejtat e Njeriut, kur anëtarësohen në Këshillin e Evropës, zotohen për mbrojtjen e të drejtave dhe lirive themelore të individëve, për sundim të ligjit dhe për demokraci, shkruan Radio Evropa e Lirë.

Nga anëtarësimi në këtë organizatë ndërkombëtare përfitojnë edhe minoritetet e një shteti.

Kështu pohon edhe Sofija Todoroviq, nga zyra e Nismës së të Rinjve për të Drejta të Njeriut (YIHR) në Beograd.

“Shtohet mundësia për mbrojtje, sikurse mundësia që [ato] t’i drejtohen Gjykatës Evropiane për të Drejtat e Njeriut, si mekanizëm ligjor”, thotë ajo për Radion Evropa e Lirë.

Inkuadrimi i Kosovës në këtë trup është riaktualizuar në javët e fundit, pasi, me kërkesën e Qeverisë së Kosovës drejtuar Agjencisë Kadastrale për transferimin e 24 hektarëve tokë në emër të Manastirit të Deçanit, është përmbushur njëri nga kushtet kryesore për anëtarësim.

Pronësia e Manastirit të Deçanit mbi këtë tokë ishte konfirmuar nga Gjykata Kushtetuese e Kosovës në majin e vitit 2016, por autoritetet përgjegjëse nuk e zbatonin vendimin.

Çfarë është Këshilli i Evropës?

Këshilli i Evropës – ku Kosova ka aplikuar për anëtarësim më 2022 – është organizatë lidere në Evropë në fushën e të drejtave të njeriut.

Pjesë e tij janë 46 shtete, përfshirë 27 vende anëtare të Bashkimit Evropian dhe të gjitha vendet e rajonit.

Gjykata Evropiane për të Drejtat e Njeriut – me seli në Strasburg, Francë – bën monitorimin e zbatimit të Konventës Evropiane për të Drejta të Njeriut.

Me raste, vendet duhet t’i ndryshojnë ligjet e tyre, apo të bëjnë çfarëdo ndryshimesh tjera, në mënyrë që një shkelje e evidentuar të mos përsëritet më.

Todoroviq thotë se Rusia ka qenë ndër vendet e vetme që nuk i ka respektuar vendimet e Këshillit – por ajo nuk është më pjesë e tij.

Rëndësia e anëtarësimit për minoritetet
Në disa raporte të përpiluara për Kosovën, në fushën e të drejtave të njeriut, krahas problemeve si korrupsioni dhe dhuna me bazë gjinore, si sfiduese janë përmendur edhe rastet e kërcënimeve ndaj minoriteteve etnike dhe grupeve të tjera të margjinalizuara.

Së fundi, edhe i dërguari i posaçëm i Shteteve të Bashkuara të Amerikës për Ballkanin Perëndimor, Gabriel Escobar, tha në një intervistë për Radion Evropa e Lirë se njëra nga arsyet e problemeve në komunikim ndërmjet Qeverisë së SHBA-së dhe asaj të Kosovës është trajtimi i minoriteteve.

Sipas regjistrimit të popullsisë, i kryer për herë të fundit më 2011, 91 për qind e banorëve të Kosovës janë shqiptarë, 3.4 për qind janë serbë, ndërsa 5.6 përqindëshi tjetër përbëhet nga boshnjakët, goranët, turqit, romët, ashkalinjtë dhe egjiptianët.

Në këtë proces regjistrimi nuk morën pjesë afër 50 mijë serbë që llogaritet se jetojnë në komunat veriore të Kosovës.

Gjykata Kushtetuese e Kosovës i ka thënë Radios Evropa e Lirë se në periudhë mes viteve 2010–2023, ky trup i ka pranuar 2.801 ankesa nga qytetarët e Kosovës.

Prej tyre, 247 ankesa u paraqitën nga minoritetet – 167 vetëm nga serbët.

Kur mund t’i drejtohen qytetarët Gjykatës së Strasburgut?
Një person mund të dorëzojë ankesë në Gjykatën Evropiane për të Drejtat e Njeriut në rastin kur personalisht është viktimë e shkeljes së të drejtave.

Shkelja duhet të jetë kryer nga një shtet që ka nënshkruar Konventën Evropiane për të Drejtat e Njeriut, dhe ankuesi duhet t’i ketë shfrytëzuar, paraprakisht, të gjitha shkallët e gjykimit, në vendin ku kanë ndodhur shkeljet.

Për çfarë rastesh mund t’i drejtohesh Gjykatës Evropiane?
Todoroviq përmend në veçanti çështjet e shpronësimit.

Bekim Blakaj, nga Fondi për të Drejtën Humanitare në Kosovë, nuk e përjashton asnjë mundësi.

“Për gjithçka. Të gjitha lëndët e mundshme mund të përfundojnë në Gjykatën Evropiane për të Drejtat e Njeriut. Atëherë kur dikush beson se i janë shkelur të drejtat individuale. Po supozoj, dikush që mendon që është ndëshkuar padrejtësisht”.

Gjykata Kushtetuese i kanë thënë REL-it se, “natyra e kërkesave të parashtruara prej minoriteteve është e ndryshme… nga mbrojtja e së drejtës në pronë, e deri te pretendimet për mohim të së drejtës në gjykim të drejtë dhe të paanshëm, të drejtës në punë dhe mbrojtjes gjyqësore të të drejtave”.

Gerald Knaus, nga Iniciativa Evropiane për Stabilitet, thotë për Radion Evropa e Lirë se nëse vendet anëtare të Këshillit të Evropës vërtet brengosen për pakicat në Kosovë, atëherë ato duhet ta mbështesin anëtarësimin e Kosovës.

“Pyetja e vetme për anëtarët e Këshillit të Evropës është se çfarë logjike do të ndjekin. Nëse logjika është mbrojtja e të drejtave të pakicave, përfshirë pakicën serbe në Kosovë, atëherë Kosova duhet të jetë anëtare, sepse Gjykata Evropiane e të Drejtave të Njeriut dhe të gjithë mekanizmat e Këshillit të Evropës do t’i forcojnë të drejtat e njeriut”, është shprehur ai.

A janë vendimet e Gjykatës Evropiane të detyrueshme?

Todoroviq tregon se po.

Shtetet përkatëse janë të obliguara që t’i zbatojnë vendimet e Gjykatës së Strasburgut, ndonëse kjo e fundit nuk ka mekanizma ndëshkues, në rast se vendimet e saj nuk merren parasysh.

A do ta forconte anëtarësimi sistemin gjyqësor në Kosovë?
Blakaj beson se po, duke e përmendur bashkë me të edhe forcimin e demokracisë.

Përveç promovimit të konventave dhe monitorimit të përparimit, vetë Këshilli bën edhe rekomandime nëpërmjet trupave të ekspertëve.

Pjesë e tij është edhe Komisioni i Venecias, në të cilin Kosova veçse është anëtare.

Ky Komision përbëhet prej ekspertëve kushtetues, të cilët ofrojnë këshilla ligjore për vendet anëtare në fusha si demokracia, të drejtat e njeriut dhe sundimi i ligjit.

Sot është afati i fundit kur Kosova dhe Serbia duhet t’i dërgojnë propozimet e tyre rreth një zgjidhjeje sa i përket përdorimit të dinarit serb në Kosovë.

Diskutimet për dinarin serb që u bënë të martën e 19 marsit në Bruksel, nuk përfunduan me ndonjë zgjidhje. Por, Kosova dhe Serbia u pajtuan që deri të premten t’i dërgojnë propozimet e tyre në adresë të Bashkimit Evropian.

Ndryshe, në Bruksel, më 19 mars u mbajt takimi i përbashkët ndërmjet emisarit të Bashkimit Evropian për dialogun Kosovë-Serbi, Miroslav Lajçak, kryenegociatorit të Kosovës në dialog, Besnik Bislimi dhe kryenegociatorit serb, Petar Petkovq.

Temë e diskutimi në këtë takim ishte Rregullorja e Bankës Qendrore të Kosovës lidhur me dinarin serb.

Bisedimet mes kryenegociatorëve të Kosovës dhe Serbisë përfunduan me zotimet e palëve që, deri më 22 mars, t`i dorëzojnë propozimet e tyre për zgjidhjen e çështjes së përdorimit të dinarit serb në Kosovë.

Kryenegociatori i Kosovës, Besnik Bislimi, pas takimit tha se janë dakorduam që deri të premten (22 mars v.j.) secila pale të sjellë propozimin e saj se si e sheh zgjidhjen afatshkurtër dhe se si të fillohet zgjidhja afatgjate e dinarit. “Javën e ardhshme do të mblidhemi sërish të diskutojmë se a mund të gjejmë hapësirë që këto dy propozime të bëhen një propozim”, ka thënë Bislimi.

Emisari special të BE-së për dialogun Kosovë – Serbi, Miroslav Lajcak, pas përfundimit të takimit në Bruksel mes kryenegociatorëve të Kosovës Besnik Bislimi dhe atij të Serbisë Petar Petkoviq, ka njoftuar se takimi do të vazhdojë të hënën, duke theskuar se marrëveshja do të duhet të adresohet nga liderët.

Lajçakak përmendi marrëveshje për normalizimin e marrëdhënieve mes dy vendeve dhe çështjen e rregullores së BQK-së për para të gatshme.

Kryeministri i Republikës së Kosovës, Albin Kurti ka publikuar para pak çastesh pamje të ushtrisë serbe fare pranë kufirit me Kosovën.

Përmes një postimi në rrjetin social “Facebook”, shefi i ekzekutivit ka shkruar se sot gjatë ditës, njësi të specializuara të ushtrisë së Serbisë janë vërejtur vetëm disa metra larg kufirit me Kosovën, në afërsi të fshatit Banje të Zubin Potokut.

“Lëvizje të ngjashme janë regjistruar edhe në fshatin Oslare të Bujanovcit, në afërsi të kufirit me Kosovën”, shkroi mes tjerash ai.

Më poshtë edhe postimi i plotë:

Ditë më parë, Presidenti i Serbisë, Aleksandar Vuçiq, kërcënoi publikisht Kosovën, duke thënë se “Serbia do të presë momentin më të mirë të mundshëm dhe do ta shfrytëzoj mundësinë për të vepruar”.

Sot gjatë ditës, njësi të specializuara të ushtrisë së Serbisë janë vërejtur vetëm disa metra larg kufirit me Kosovën, në afërsi të fshatit Banje të Zubin Potokut. Lëvizje të ngjashme janë regjistruar edhe në fshatin Oslare të Bujanovcit, në afërsi të kufirit me Kosovën.

Jemi të vetëdijshëm se Forcat e Armatosura të Serbisë janë duke realizuar stërvitjet e rregullta dhe ato janë duke i përdorur si pretekst për të shkaktuar provokime të qëllimshme në afërsi të kufirit me Kosovën.

Jemi duke vëzhguar me kujdes se a do të përpiqen ta kalojnë kufirin, gjersa edhe ky afrim i automjeteve të tyre ushtarake nuk është normal.

Kryeministri i i Kosovës Albin Kurti, në një intervistë për Radiotelevizionin e Kosovës, ka folur për aktualitetin politik në vend dhe problemet që janë shfaqur me Bashkësinë Ndërkombëtare. Ka folur për marrëdhëniet me Shtetet e Bashkuara të Amerikës. Temë e intervistës ka qenë edhe çështja e dinarit serb, por edhe lëndët që po trajtohen nga Gjykata Kushtetuese e për të cilat thotë se janë selektive.

Kryeministri Albin Kurti në intervistën për RTK-në ka thënë se marrëdhëniet me Shtetet e Bashkuara të Amerikës janë shumë të mira. Por, siç ka thënë ai marrëdhënia do të thotë edhe marrje edhe dhënie dhe në anën tjetër duhet të jetë një raport me rrugë dy kahore.

“Marrëdhëniet me Shtetet e Bashkuara të Amerikës si një aleat i pazëvendësueshëm, e i paçmueshëm, si një partner substancial në të kaluarën, në të ardhmen e sidomos tani në këtë vit të rëndësishëm dhe si një mik të dëshmuar janë shumë të mira, por marrëdhënia do të thotë edhe marrje edhe dhënie dhe në anën tjetër duhet të jetë një raport me rrugë dy kahore. Nëse për të pasur marrëdhënie të shkëlqyeshme kushti dhe garancia, dhe mundësia është veç serviliteti do t’i kishin pas ata që kanë shkuar jo unë, pse erdhi puna unë të bëhem kryeministër. Sepse populli i Kosovës po donë marrëdhënie më të thella e më të gjëra, jo me shkëlqye nga serviliteti, por me përfitu nga normaliteti. Populli dëshironte që edhe me partnerët edhe aleatët tanë të mos përfitojmë ne si individ, por të përfitoj shteti edhe ne si individ humbim nga pak”, ka theksuar Kurti.

Ai ka folur edhe për takimet dhe raportet që ka me të të dërguarin e posaçëm i SHBA-së për Ballkanin Perëndimor, Gabriel Escobar.

“Vazhdimisht diskutojmë dhe se për shumicën e gjërave pajtohemi por jo për gjithçka. Nganjëherë neve na duket që për hollësi të caktuara kemi më shumë informacion, por këto nuk paraqesin mospajtime që do të shndërrohej në tension”, ka deklaruar kryeministri i vendit.

Zëvendëskryeministëri i parë për Integrim Evropian, Zhvillim dhe Dialog, Besnik Bislimi, në emisionin CONTEXT në ATV, tha se në Bruksel nuk është diskutuar as kontestuar Rregullorja e BQK-së, por ai thotë se janë diskutuar modalitetet se si kjo mund të arrihet brenda kësaj rregullore.

“Në Bruksel nuk është diskutuar as kontestuar Rregullorja e Bankës Qendrore, për arsye se Banka Qendrore e Kosovës ka monopol në dizajnimin e politikës monetare, por në atë moment kur një politikë dizajnohet atëherë janë qytetarët ata të cilët janë të ngarkuar me zbatimin e saj. Për shembull, kur unë udhëtoj në Londër dhe vozis në anën e majtë, unë bëhem hisedar në zbatimin e një politike të komunë trafiku që kanë aranzhuar institucionet në Britani të Madhe, e njëjta ndodh këtu. Ne kemi Rregulloren e Bankës Qendrore, e cila specifikon qartë se si duhet të kryhet importi dhe eksporti i monedhave dhe në atë moment që është vërejtur se kjo ka krijuar komplikime për bartjen e mbështetjes financiare që Serbia dërgon për qytetarë të komunitetit serb në Kosovë, ne jemi të treguar të gatshëm të diskutojmë modalitetet se si kjo mund të arrihet edhe më tej brenda Rregullores së Bankës Qendrore”, tha Bislimi.

Ai tha se ajo që do të dorëzojnë nesër, nuk janë propozime për rregulloren, por janë ide se si transferi i mbështetjes financiare të Serbisë drejt qytetarëve të komunitetit serbë është i mundshëm brenda kësaj Rregullore. /atvlive.tv

Intervistën e tij të plotë në CONTEXT e gjeni në videon më poshtë:

Ndihmëssekretari për Byronë Ndërkombëtare për Narkotikë dhe Sundim të Ligjit të SHBA-së, Todd D. Robinson, në emisionin CONTEXT në ATV, tha se është me rëndësi që policët dhe gjykatësit e dorëhequr në veri, duhet të kthehen në vendet e tyre të punës.

“Fillimisht mendojmë se është me rëndësi për të gjitha institucionet qofshin ato të drejtësisë, korrektuese apo policia e gjykatat, konsiderojmë që është me rëndësi që ato të jenë të qasshme për të gjithë kosovarët andaj është me rëndësi që ata policë të kthehen. Është me rëndësi që ata gjykatës të kthehen në sistem. Kjo ka rëndësi edhe për shkak të integrimeve euro-atlantike por akoma më e rëndësishme për çdo qytetar që të dinë se janë të përfaqësuar në ato institucione, për të krijuar demokraci më të mirë, më të sigurt, më transparente”, tha Robinson. /atvlive.tv

Intervistën e plotë të ndihmëssekretarit për Byronë Ndërkombëtare për Narkotikë dhe Sundim të Ligjit të SHBA-së, Todd D. Robinson dhënë për emisionin CONTEXT në ATV, e gjeni në videon më poshtë: