Ministrja e Industrisë, Ndërmarrësisë dhe Tregtisë, Rozeta Hajdari, sot pritet të mbajë konferencë për media.
Aty do të lansohen tri thirrje publike për përkrahjen e ndërmarrjeve mikro, të vogla dhe të mesme për blerjen e makinerive prodhuese dhe përpunuese.
Konferenca pritet të fillojë nga ora 14:00.
Sot do të mblidhet Komiteti për Politikë dhe Demokraci të Këshillit të Evropës, ku pritet të votohet raporti i Dora Bakojanis, raportuese për Kosovën në KiE. Në Kosovë presin që raporti të marrë dritën e gjelbër dhe të kalojë për shqyrtim në Asamblenë Parlamentare, i cili do t’i hapte rrugë më pas vendimit final nga Komiteti i Ministrave të Punëve të Jashtme.
Nga Ministria e Punëve të Jashtme dhe Diasporës janë optimistë se Kosova do të anëtarësohet në Këshill të Evropës në muajin maj, ndërkaq lajme pozitive presin edhe nga opozita dhe shoqëria civile.
Për mbledhjen është deklaruar edhe Kryediplomatja e Kosovës Donika Gërvalla nga Nju Jorku.
Ajo ka thënë se nëse nesër ka kuorum, pra deputetë të mjaftueshëm, raporti i raportueses Dora Bakoyannis do të miratohet.
“Ne mendojmë se nëse nesër krijohet kuorumi i nevojshëm për trajtimin e kërkesës për Kosovën, atëherë mendojmë që një kërkesë e tillë, pra raporti do të mund të miratohet” ka thënë Gërvalla.
Çështja e kuorumit është ngritur për shkak të mundësisë që deputetët të mos udhëtojnë në Paris për shkak të festës së Pashkëve.
Ndërsa zëvendësministri i Punëve të Jashtme dhe Diasporës, Kreshnik Ahmeti, ka thënë për KosovaPress se rekomandimi i raportueses për Kosovën, Dora Bakojanis është që Kosova të bëhet anëtare e plotë e Këshillit të Evropës. Sipas tij, në raport theksohet se Kosova ka plotësuar të gjitha kushtet derisa hiqet edhe fusnota në referimin ndaj Kosovës.
“Në fund të raportit rekomandimi, opinioni i zonjës Bakojanis është që Kosova të bëhet anëtare e plotë e kësaj organizate. Për më tepër po hiqet edhe fusnota. Kosova është trajtuar me fusnotë që nga fillimi i raporteve me Këshill të Evropës, do të kemi denominim sikurse çdo vend të tjetër. Po ashtu nuk ka parakushte pasi janë plotësuar të gjitha ato, këto reflektohen edhe në opinionin e zonjës Bakojanis”, thotë ai.
Krahas kësaj, Ahmeti thotë se janë duke lobuar intensivisht që Kosova të marrë votat e nevojshme për anëtarësim në KiE, derisa shton se sot kanë konfirmuar votën pro edhe të Malit të Zi, përkundër paralajmërimeve se deputetja, Maja Vukiçeviq, që është kryetare e delegacionit malazias në Asamblenë Parlamentare, do të votojë kundër pranimit të Kosovës në këtë organizatë.
“Ne sot kishim konsultime politike me Ministrinë e Punëve të Jashtme të Malit të Zi, delegacionet e të cilave i pritëm. Mali i Zi do të votojë në favor të anëtarësimit të Kosovës dhe në këtë nuk ka asnjë dilemë. Çfarë mund të bëjë qëndrime ndonjë deputetë brenda delegacionit në Asamblenë Parlamentare është çështje e orientimeve të partive të tyre. Unë nuk shoh asnjë arsye që të kemi më pak mbështetje sesa që kishim me 24 prill, ku ambasadorët me udhëzimet e këtyre ministrave na votuan në favor me më shumë vota që ishin e nevojshme minimalisht. Jam optimist se do të kalojmë edhe në maj, kjo nuk është garanci. Askush nuk mund të garantojë as për kalimin dhe as dështimin apo shtyrjen. Asnjë shtet nuk mund t’i përfaqësojë 45 shtete të tjera. Pasi të kalojmë fazën e Asamblesë Parlamentare do të jemi në një fazë të re të lobimit dhe betejës diplomatike që Kosova të anëtarësohet”, theksoi Ahmeti.
Në anën tjetër, optimiste është edhe deputetja e PDK-së, njëherësh anëtare e delegacionit të Kosovës në Asamblenë Parlamentare të Këshillit të Evropës, Ariana Musliu, e cila thotë se Kosova meriton të jetë pjesë e Këshillit të Evropës.
“Kosova si shtet demokratik, në çdo hap te saj, nga viti 1999 ka qenë dhe është e përkushtuar në rrugëtimin dhe integrimin euroatlantik. Shpallja e pavarësisë, miratimi dhe mbikëqyrja e zbatimit te ligjeve, ndërtimi institucional, respektoni i të drejtave të njeriut, sundimi i ligjit, të drejtat e minoriteteve, zhvillimi i demokracisë janë dëshmi që Kosova është meritore të jetë pjesë e familjes së Këshillit te Evropës”, thotë ajo për KosovaPress.
Asambleja Parlamentare e Këshillit të Evropës do të mblidhet në muajin prill, derisa Komiteti i Ministrave të Punëve të Jashtëm në maj.
Përkushtimin për anëtarësim në Këshill të Evropës e dëshmuan edhe tre liderët e institucioneve të Kosovës, përmes një letre dërguar raportueses për Kosovën, Dora Bakojanis, ku zotohen se do t’i zbatojnë të gjitha zotimet e marra përsipër nga dialogu i Brukselit, përfshirë Asociacionin.
Kosova ka aplikuar për anëtarësim në Këshill të Evropës në vitin 2022.
Një person ka humbur jetën, ndërsa një tjetër ka mbetur e plagosur si pasojë e të shtënave sonte në Prishtinë.
Siç raporton gazeta Sinjali, viktima është E.H, rreth 30-vjeç.
Raportohet se viktima E.H u nis me urgjencë për në spital, mirëpo i njëjti s’ka arritur që t’i përballojë plagët e marra dhe si pasojë ka ndërruar jetë.
Në anën tjetër, e plagosura, kalimtare e rastit është dërguar në Emergjencë dhe sipas informacioneve të para, ndodhet në gjendje kritike.
PËRGATITI: ARTON HAMITI
Ishte një nga premtimet kryesore të Qeverisë Kurti. Madje, kryeministri Albin Kurti ishte i bindur që projekti për ndërtimin e katër mijë banesave me çmim të përballueshëm për të sapomartuarit, do të niste në vitin 2023.
Por, vetëm me 25 mars të këtij viti, Ministria e Mjedisit dhe Planifikimit Hapësinor publikoi Projektligjin për banimin social dhe të përballueshëm.
Nisur nga kjo, zor që projekti do të nisë edhe në vitin 2024, meqë deri në miratimin në Kuvend të projektligjit që tash është i hapur për komente për 15 ditë janë edhe disa procedura.
Arbër Thaçi nga Instituti Demokratik i Kosovës nuk beson që ky projektligj do të jetësohet brenda kësaj legjislature.
Projektligj për Banimin Social dhe të Përballueshëm ka për qëllim krijimin e programeve të banimit, për familjet dhe individët në nevojë.
Grupet përfituese, sipas projektligjit, janë familjet apo individët me gjendje jo të mirë ekonomike, familjet e mëdha me shumë fëmijë dhe familjet me një prind, të papunët, familjet e dëshmorëve, të të zhdukurve të UÇK-së dhe invalidët e UÇK-së të cilët janë në gjendje të rëndë ekonomike./ATVLIVE.TV
PËRGATITI: KRENARE MULLIQI
Para 4 vjetësh u hap tenderi për herë ta parë. Në këtë vend në lagjen Kodra e Trimave në kryeqytet planifikohej nisja e ndërtimit të një stacioni policor.
Kompania fituese për ndërtimin e këtij stacioni, punimet as nuk i filloi derisa u tërhoq menjëherë pas pandemisë me arsyetimin se çmimet ishin shtrenjtuar.
Vetëm në tetor të viti 2022 u hap sërish tenderi, por ai është pezulluar në shkurt të këtij viti, pasi në Organin Shqyrtues të Prokurimit, pati ankesa nga një operator ekonomik.
Andaj nga Sindikata e Policisë po kërkohet që ky organ të jetë më feksibil në trajtimin e kësaj ankese.
Imer Zeqiri nga Sindikata e Policisë thotë se ndërtimi i këtij stacioni duhet të fillojë sa më parë, meqë kushtet e policëve, në objektin ku aktualisht qëndrojnë nuk janë të përshtatshme.
Për këtë foli edhe drejtori i përgjithshëm i Policisë, i cili tha se janë në pritje.
Para rreth dy vitesh, policia u largu nga objekti që ishte në “Kodrën e Trimave” dhe qëndron në një objekt në Lagjen “Arbëria”./atvlive.tv/
PËRGATITI: ARMAND HOTI
Gramoz Berisha erdhi përsëri tek varrezat ku pushojnë eshtrat e familjarëve që iu vranë nga forcat serbe, më 26 mars të 1999-ës.
Në atë të premte marsi, forcat serbe ekzekutuan 49 anëtarë të familjes Berisha nga Suhareka.
Pesë nga ta u vranë tek shtëpitë e Berishëve, kurse pjesa tjetër e familjes, përfshirë 15 fëmijë, u vra, ose të paktën kështu menduan forcat serbe, në këtë lokal, që sot shërben si muze.
Gramozi i cili në atë kohë ishte vetëm tetë vjeç, shpëtoi duke u shtirur si i vdekur.
Bashkë me nënën e tij, Vjollcën, dhe kushërirën Shyhreten, u hodhën nga mjeti ku po transportoheshin kufomat e të vrarëve.
“Na kanë pru te lokali ku ka ndodhur masakra, te piceria “Kalabria”, aty kanë filluar gjuajtjet derisa nuk ka lëvizur askush. Jam bërë si i vdekur në momentin kur kanë filluar të kapin, pastaj na kanë bartur na kanë futur në kamion dhe kamioni u nis në drejtim të Prizrenit. Gjatë rrugës për Prizren mami më ka kapur mua, fillimisht gruaja xhaxhait, Shyhretja, është hedhur nga kamioni më pas edhe mami me mua, të plagosur jemi hedhur”, tha Gramoz Berisha, i mbijetuar i masakrës.
Hysni Berisha u angazhua për të mbledhur gjësendet që mbetën nga më të dashurit e tij, duke i ekspozuar ato,në lokalin ku u krye masakra.
“Më 1 shtator të ‘99-ës kemi shkuar t’i hapim varrezat për herë të dytë. Në mesin e dokumenteveqë janë gjetur është gjetur edhe fletorja e Miratit, ai ka qenë në klasën e parë dhe e ka marrë lapsin dhe çantën me vete, duke mendu që do kthehet”, deklaroi Hysni Berisha, familjar i të masakruarve.
Kur lufta mbaroi e ushtria serbe doli nga Kosova, ai u takua sy më sy me atë që urdhëroi gjenocidin në Kosovë. Ishte koha që ai të dëshmonte në Hagë kundër Millosheviqit.
Në një moment ai thotë se unë kam punë me këtë dëshmitar më së shumti, sepse ky është dëshmitar i përgatitur”, deklaroi tutje Hysni Berisha.
25 vjet pas luftës, familja Berisha vazhdon të jetë në kërkim të 24 familjarëve të pagjetur.
“Edhe rasti i familjes Berisha, edhe përpjekja në kuptim të ndriçimit të fatit të më shumë se 20 personave, do të mbetet një nga zotimet tona, ose një nga prioritetet tona”, tha Jushtrim Gara nga Komisioni Qeveritar për të pagjeturit.
Pas luftës së fundit në Kosovë, mbi 1600 personavazhdojnë të jenë të pagjetur./atvlive.tv
PËRGATITI: ARIAN HAJDARAJ
Qysh në fillim të seancës, Gjykatësi Sabit Sadiku u jep një njoftim pozitiv katër të akuzuarve për hedhje të gazit lotsjellës në Kuvend.
Njëra nga dy veprat penale me të cilat ngarkohen Xhelal Sveçla, Salih Zyba, Drita Millaku e Fitore Pacolli, është parashkruar para 5 ditësh.
“Pengimi i personit zyrtar e ka arritë parashkrimin me 21.03.24. Seanca sot vazhdon veç për përdorim të armës apo mjetit të rrezikshëm. Megjithatë, ndaj të akuzuarve do të vazhdojë gjykimi për veprën penale “përdorim i armës apo mjetit të rrezikshëm”, tha Sabit Sadiku, kryetar i Trupit Gjykues.
Përballë kësaj aktakuze, ministri e deputetët u deklaruan të pafajshëm, por që në deklarimin rreth fajësisë, e akuzuara Fitore Pacolli foli më gjatë.
Kundërshtimin e provave avokatët e caktuar, sipas detyrës zyrtare, thanë se do ta bëjnë më vonë.
Sipas aktakuzës që e posedon ATV-ja, ministri Sveçla dhe tre deputetët e Vetëvendosjes, më 21 mars 2018, kishin ndezur disa bombola të gazit lotsjellës, të cilat i kishin hedhur brenda sallës së Kuvendit, ku po mbahej seanca plenare./atvlive.tv/
Ambasadori i Gjermanisë në Kosovë, Jorn Rohde, tha se masakrat si ajo në Krushë të Madhe të Rahocecit 25 vjet më parë treguar se kishte ardhur koha për ndërhyrjen e NATO-s.
Rohde foli për masakrën që la rreth 250 viktima dhe rreth 60 të zhdukur që prej atëherë, ndërsa tha se qëndrojnë pas vendimit se intervenimi ushtarak i NATO-s “ishte gjëja e duhur”.
“Kjo si dhe masakrat tjera, vetëm treguan se kishte ardhur koha tashmë që NATO të ndërhynte për ta shmangur atë tragjedi humanitare si dhe spastrimin etnik i cili po ndodhte këtu”, tha Rohde.
Ambasadori gjerman kërkoi që autorët e kësaj masakre të dalin para drejtësisë.
“Shumica e atyre që i kanë kryer këto krime janë ende në arrati dhe krejt çka mund të them, është që kjo nuk do të duhej të lejohej”, tha ai.
Në fund, Rohde uroi që Kosova të anëtarësohet në BE së shpejti.
“Shpresoj që Kosova bashkë me të gjithë fqinjët e saj, së shpejti do t’i bashkohet familjes europiane”, tha ai.
Ish-zëdhënësi i NATO-s, gjatë luftës në Kosovë, Jamie Shea ka siguruar të gjithë se nuk do të ketë luftë në Kosovë.
Pavarësisht se inteligjenca lëshoi paralajmërimin për një rrezik të lartë për konflikte ndëretnike në Ballkanin Perëndimor, Shea mendon se nuk duhet dramatizuar situata.
“Nuk shoh perspektivë për një luftë mes Serbisë dhe Kosovës. Por ka tensione, sigurisht, dhe kjo është një nga arsyet pse NATO dërgoi forca shtesë në KFOR vitin e kaluar, si para incidentit në Banjskë, ashtu edhe pas incidentit në Banjskë, për t’u siguruar që ka mjaft ushtarë të NATO-s në Kosovë, përfshirë këtu në veri, për të parandaluar çdo lloj agresioni, për të parandaluar çdo lloj sulmi. Pra NATO është shumë vigjilente”, ka thënë Shea.
Ai pohon se situata është e tensionuar, por sipas tij NATO është plotësisht e mobilizuar.
“Kështu është edhe BE-ja, për të menaxhuar krizat, për të parandaluar incidentet, për të ulur tensionet dhe mbi të gjitha, për të rikthyer në shina dialogun politik me Beogradin dhe Prishtinën”.
Për ta arritur këtë, sipas Sheas është e rëndësishme që kryeministri i Kosovës Albin Kurti ta dëshmojë se është partner i besueshëm i SHBA-së e BE-së, ashtu siç ishin qeveritë e kaluara.
“Është shumë e rëndësishme që kryeministri Kurti të tregojë se ai është gjithashtu një partner i besueshëm përballë Shteteve të Bashkuara dhe ndaj Bashkimit Europian. Ajo që ka qenë e suksesshme në të kaluarën është se qeveria e Kosovës ka punuar shumë, shumë ngushtë me miqtë e saj të mëdhenj në BE, në NATO, me Shtetet e Bashkuara, me vendin tim, Britaninë e Madhe. Ne kemi qenë partnerë të mirë dhe duhet ta ruajmë këtë partneritet edhe në vazhdim”, tha Shea për A2cnn.
Kryetari i Aleancës Kosovare të Bizneseve (AKB), Agim Shahini, thotë për Ekonomia Online se brenda tre muajve, në Kosovë janë shuar afër 400 kompani dhe se kjo po bëhet për shkak të borxheve e konkurrencës jo ferr.
Këtë fakt, Shahini e sheh shqetësuese, teksa pret veprime institucionale.
“Është shqetësim për vendin, po flasim aktualisht për tre muajt e fundit ku mesatarisht janë mbyllur rreth 400 kompani e që këto kompani kryesisht janë mbyllur për shkaqe të problemeve të njëpasnjëshme që kanë pas për shkak të humbjes së fuqisë në treg të borxheve dhe të konkurrencës jo ferr”, thotë Shahini.
“Prandaj shuarja e bizneseve nuk mund të jetë vullnetare përderisa ata nuk kanë arritur objektivat e veta. Asnjë biznes nuk mbyllet vullnetarisht që i ka punët mirë por që i ka punët keq dhe kjo e bën që Kosova të mos jetë një vend atraktiv për bizneset e reja por edhe bizneset me traditë janë duke shkuar drejt falimentimit për arsye të ndryshme të goditjeve të njëpasnjëshme që vijnë në biznes”, shtoi ai.
Mundësitë e reja zhvillimore ato të investimit si dhe mbështetëse janë tre faktorë tejet të rëndësishëm për tu zhvilluar një biznes, thotë Shahini.
Shahini numëron edhe ngarkesat që bizneset i kanë në vend, përfshirë ato tatimore e infrastrukturore.
“Qeveria e vendit duhet të bëjë edhe më shumë, për të krijuar mundësi të reja zhvillimore, mundësi të reja investuese dhe mbështetëse duke i pasur këta tre faktorë të rëndësishëm për të mbajt aktiv ekonominë e vendit. Bizneset janë tepër të angazhuar dhe të bëjë gjithçka që ata të mos mbyllen, por në fund vjen momenti kur edhe mund të dorëzohen dhe nuk mund t’i përballen qoftë ngarkesave të njëpasnjëshme duke përfshirë këtu ngarkesat e larta tatimore, ato të larta të interesit bankar, infrastruktura shpesh e bën ajo fizike që disa biznese mund të mbyllen edhe për këtë çështje po ashtu për humbje të fuqisë konkurruese, humbja e tregjeve dhe mungesa e punëtorëve që kohët e fundit një fenomen po bëhet i zakonshëm”, thotë ai.
Shahini kërkon që termi “bizneset po mbyllen vullnetarisht” të mos përdoret, pasi siç thekson ai, askush “nuk shkon te shtëpia me prit ndonjë ndihmë sociale”.
“Bizneset zakonisht pas përfundimit të dorëzimit dhe aktivitetit të vetë ekonomik para konkurrencës, para fuqisë konkurruese ata mund të fillojnë procedurat për mbylljen e bizneseve dhe atyre askush nuk shkon me e mbyll biznesin por ata në mënyrë vullnetare që duhet ta përmbyllin procesin por vullnetarisht ata nuk e kanë mbyll punën e vetë, biznesin dhe aktivitetin e vetë”.
“Nuk duhet përdoret termi ‘vullnetar’, për arsye se vullnetarisht ata i kanë hap bizneset por ka ardhur momenti kur ata edhe duhet të dorëzohen në mënyrë ligjore të paraqesin ç’regjistrimin e biznesit dhe të shikojnë të gjejnë alternativa tjera për tu punësuar ata njerëz ose për të krijuar ndonjë mundësi tjetër ose largim nga vendi ose të gjejnë mundësi tjetër të bashkojnë kapitalin e vetë në ndonjë biznes tjetër apo ndonjë individ tjetër por prape së prape askush vullnetarisht nuk e mbyll biznesin e vetë dhe askush nuk shkon te shtëpia me prit ndonjë ndihmë sociale përderisa ai është i aftë për punë”, thotë Shahini.