Zëvendësdrejtori i Policisë për rajonin e Veriut, Veton Elshani, në një lidhje të drejtpërdrejt në ATV, tha se situata e sigurisë në veriun e vendit është e qetë.
“Situata e sigurisë me mbarë veriun e vendit është e qetë. Në fakt, edhe në ditët paraprake ne nuk kemi pasë ndonjë informacion që do të ketë ndonjë zhvillim këtu, për ditën e votimit, ndërsa sikurse edhe për një ngjarje tjetër të rëndësishme apo interesante që është për neve, ne punojmë plane të operative policore, të cilat i përshtaten situatës”, tha Elshani.
Ai tha se, edhe në rast se mund të ketë ndonjë veprimtari kriminale, në veri të vendit ka policë të mjaftueshëm që të reagojnë.
“Ne kemi pasë policë të mjaftueshëm nëpër qendrat e votimeve në kohë të caktuara. Në fakt që nga dje kemi qenë të angazhuar, vazhdojmë të jemi edhe sot. Nuk ka diçka për me theksu situata duket e qetë. Nuk kemi informacion që mund të ndodhë diçka. Po në rast se vjen deri tek ndonjë veprimtari kriminale apo diçka të tillë, ne kemi policë të mjaftueshëm në këtë vend që të reagojnë”, tha Elshani. /atvlive.tv
Ministri i ministrisë së Administrimit të Pushtetit Lokal, Elbert Krasniqi vizitoi qendrën e votimit në fshatin Soqanicë të Leposaviqit.
Në konferencën për media nga fshati Soçanicë e Leposaviqit, Krasniqi ka thënë se Lista Serbe, e cila ka bërë thirrje për bojkotim të procesit zgjedhor të së dielës për shkarkimin ose jo të kryetarëve të komunave veriore, i shohin institucionet vetëm për vete dhe jo për qytetarët.
“Lista Serbe dëshiron ta ketë monopolin mbi politikën e serbëve në Kosovë. Ata i shohin institucionet vetëm për vete dhe jo për qytetarët. Ata vazhdojnë t’i kenë ulëse të rezervuara për komunitetin serb në Kuvend dhe mos t’i përfaqësojnë interes të qytetarëve, mirëpo t’i marrin pagat e Kuvendit”, ka thënë ai.
Derisa u ka bërë thirrje qytetarëve të kësaj zone që të marrin pjesë në votim, Krasniqi ka njoftuar se procesi deri tani po shkon në rregull.
“Unë sot fillova t’i vizitoj disa prej hapësirave ku po organizohet votimi i pyetjes se a do të duhet të largohet kryetari i komunës nga funksioni ose jo, një proces i filluar vitin e kaluar në gusht kur filluam si ministri që të hapim mundësinë që qytetarët të deklarohen rreth pakënaqësisë së tyre për kryetarët në funksion. Udhëzimi administrativ e ka hapur mundësinë që përmes peticionit të parashtrohet me 20 për qind të votuesve të një qyteti ku ata e kanë iniciuar këtë peticion. Sot është hapur gjithçka në rregull dhe po shohim si po shkon procesi. Qeveria e Kosovës e ka pasur detyrën dhe mandatin që të mundësojë që qytetarët që dëshirojnë të shprehin pakënaqësinë e tyre ta bëjnë me të drejtën që u garantohet përmes Ligjit për Vetëqeverisje Lokale. Detyrë e jona ka qenë ta bëjmë këtë mundësi që qytetarët ta shprehin vullnetin e tyre. Detyrë e shtetit ka qenë edhe organizimi i procesit, pjesa tjetër i mbetet qytetarëve”, është shprehur ai.
Zoran Stojanoviq kryesues i Komisionit Komunal Zgjedhor në komunën e Leposaviqit ka thënë se gjithçka po shkon sipas planit. Ai ka theksuar se ka pasur probleme të vogla që janë tejkaluar shpejt, raporton Ekonomia Online.
“Çdo sen është duke shkuar në bazë të planit. Komuna e Leposaviqit ka pozitë gjeografike me territor shumë të madh ka diku rreth 550 kilometra katror dhe për shkaqe teknike nuk kemi arritë me i hapë. Por kemi arrit prap me ia dalë. Shkolla në Leposaviq e kemi pasur një inspektim me 5 prill por pas 5 prillit me një bojkot nuk na është lejuar me i hapë. Pse nuk është lejuar kanë thënë se i kemi disa aktiviteteve shkollore, nuk dihet çfarë aktivitete. Deri tash në ora 11 i kemi informatae para.
Ndërsa Selim Mehmeti nga komuna e Novo Bërdës ka treguar se risi është se kësaj here do të votohen 10 kandidatë.
“Risi kemi që do të votohen 10 kandidatë. Trajnimi për kamera është mbajt kemi dhënë edhe udhëzues, KQZ-ja është duke e bë të pamundurën me siguru rrymë, ne jemi këtu tërë kohën”, ka thënë Selimi.
“Demokracia në Veprim” përmes ekipeve mobile po vëzhgon procesin e votimit për ose kundër largimit të kryetarëve të katër komunave veriore të vendit – Mitrovicë e Veriut, Leposaviq, Zveçan dhe Zubin Potok. Vëzhguesit tanë kanë vizituar pothuajse të gjitha qendrat e votimit të hapura në këtë pjesë. Sipas vëzhguesve, të gjitha qendrat e votimit që janë vizituar deri tani, janë hapur me kohë dhe komisionerët kanë qenë të pranishëm. Policia e Kosovës është prezente dhe po garanton sigurinë e procesit.
Në njoftimin për media thuhet se procesi i votimit, deri në orën 09:00 është i qetë dhe nuk është vërehet interes nga qytetarët për pjesëmarrje në proces të votimit. Sa i përket administrimit të procesit, KQZ është vonuar me informim për qytetarët lidhur me vendndodhjen e qendrave të votimit, meqë ky vendim është marrë vetëm një ditë para procesit të votimit. Gjatë vizitave të vëzhguesve nëpër Qendra të Votimit është vërejtur se disa prej tyre nuk mundësojnë qasje për persona me aftësi të kufizuar dhe për persona që janë në moshë të shtyer.
“Procesi i votimit brenda disa Qendrave të Votimit është aranzhuar për disa vendvotime në një hapësirë të përbashkët sipas modelit të hapur. Po ashtu është vërejtur se në të gjitha vendvotimet ka të vendosura kamera të sigurisë, ndërkohë që kabinat e votimit janë të vendosura në pozicionin që mund t’a cenojnë fshehtësinë e votës dhe mund të shihen si intimidim nga votuesit. instruksionet për vendosjen kabinave të votimit në këtë mënyrë janë përfshirë në udhëzuesit që KQZ ka përgatitur. Kjo është hera e parë që qytetarët do të votojnë nën survejimin e kamerave. Demokracia në Veprim do t’ju mbajë të informuara gjatë ditës për ecurinë e procesit”, njofton DnV.
Liderët shtetërorë dhe opozitarë i kanë deklaruar pasuritë e tyre në Agjencinë për Parandalimin e Korrupsionit.
Presidentja Vjosa Osmani i ka deklaruar gjashtë pasuri të paluajtshme në pronësi të saj dhe bashkëshortit, Prindon Sadriu. Vlerën më të madhe e ka ajo që e cilësoi banim në varg, prej 218 metrash katrorë, mbi gjysmë milioni euro, të blerë më 2023. Ndërsa një banesë e ngjashme, me 244 metra katrorë, e blerë para katër vjetëve, ka çmim 190 mijë euro.
Osmani ka deklaruar një veturë 10 mijë euroshe në pronësi të bashkëshortit, ndërsa kanë dy kredi, në vlerë totale 105 mijë euro. Paga vjetore e të dyve, është 33 mijë dhe 17 mijë euro.
Ndërsa kryeministri Albin Kurti, e ka deklaruar banesën 400 mijë euroshe të bashkëshortes së tij, të blerë me kredi. Kurse para të gatshmë ka treguar t’i ketë 1 mijë e 551 euro, ndërsa gruaja e tij, 2 mijë e 500 euro. Kurti ka pagë vjetore 19 mijë euro.
Kryeparlamentari Glauk Konjufca ka deklaruar banesën e tij në vlerë 61 mijë euro, si dhe dy banesa dhe një shtëpi të prindërve të tij. Po ashtu, një veturë të bashkëshortes, 3 mijë euro, si dhe kursime dhe akumulim të pagës, mbi 9 mijë euro.
Nga opozitarët, kryetari i Partisë Demokratike, Memli Krasniqi, ka deklaruar banesë 120 mijë euroshe, si dhe veturë 21 mijë euro. Ky posedon edhe kriptovaluta, të gjitha në shumë afër 69 mijë euro.
Lumir Abdixhiku i Lidhjes Demokratike ka deklaruar dy banesa dhe një shtëpi, në vlerë totale mbi 600 mijë euro, si dhe një veturë 25 mijëshe.
Kurse kreu i Aleancës, Ramush Haradinaj, ka katër shtëpi dhe një vilë, që kanë vlerë mbi 1.2 milionë euro.
Më shumë detaje i gjeni në Edicionin Qendror të lajmeve në videon më poshtë:
Ky objekt që u mor nën kontroll nga Agjencia Kosovare e Privatizimit në fshatin Banjskë të Zveçanit pas sulmit të 24 shtatorit, për herë të parë do të shfrytëzohet si qendër alternative e vendvotimit në këtë Komunë, meqë shkollat nuk u vunë në dispozicion për votimin e së dielës.
E për shkak të mos lirimit të hapësirave shkollore nga serbët në komunat veriore, edhe komunat e tjera do të përdorin objekte tjera, më 21 prill, kur vendoset për shkarkim apo jo të kryetërave shqiptarë të veriut.
Por për dallim nga zgjedhjet e 23 prill të vitit të kaluar, ku qendra të vendvotimit u bënë disa kontejnerë, kësaj radhe objektet janë me kushte më të mira.
Nga 5 qendra të vendvotimit, në Mitrovicën e Veriut, dy prej tyre janë objekte alternative në të cilat qytetarët do të shkojnë për votim.
Votueseve të Shkollës “Sveti Sava” do t’iu mundësohet ta ushtrojnë të drejtën e tyre në kolegjin privat IBCM.
Leposaviqi, nga 8 qendra të votimit, 4 prej tyre janë alternative, ndërkaq Zubin Potoku qendër të reja të votimit janë Mala Jabuka dhe tek Ura e Bubës.
Për mbajtjen e këtji procesi gjithçka është gati, por sipas kryesuesit të kuvendit komunal në Mitrovicën e Veriut, Nexhat Ugljanin, ka rrezik që numri i votuesve do të jetë shumë i ulët.
Për asamblistin nga “Iniciativa Qytetare Mitrovicës”, Betim Osmani, serbët do ta bojkotojnë këtë votim meqë e dinë së nuk i kanë numrat e mjaftueshëm.
Në katër komunat veriore të drejtë votë kanë 46 mijë e 556 votues.
Për tu shkarkuar kryetari i Leposaviqit duhen 6 mijë e 837 vota, në komunën e Mitrovicës së Veriut duhen 9 mijë e 279 vota, Zveçan duhen 3 mijë e 605 vota, ndërkaq në Zubin Potok duhen 3 mijë 439 vota.
Më shumë detaje i gjeni në Edicionin Qendror të lajmeve në videon më poshtë:
Borut Pahor ia ka vënë syrin kësaj karrige, ku tash ulet Miroslav Lajcak.
Ish-presidenti i Sllovenisë synon të emërohet ndërmjetësues në dialogun Kosovë-Serbi, pasi Lajcak do ta lirojë këtë pozitë më 31 gusht. Pahor vlerëson se ka ngecje në dialog, por tani për tani nuk tregon çfarë planesh ka.
“Dialogu është në ngërç, ka mungesë besimi dhe ne duhet të gjejmë një mënyrë për të ecur përpara me besim më të madh”, ka thënë Pahor.
Lehtësuesi aktual i BE-së në këtë proce, Lajcak, tha fjalë të mira për Pahorin, si pasardhës i mundshëm i tij.
“Me Pahorin jemi takuar dhe kemi diskutuar për situatën në Ballkanin Perëndimor në disa raste, e di se ai është shumë i interesuar në rajon dhe ka njohuri për rajonin. Sigurisht se ky është një faktor i rëndësishëm”, ka thënë Lajcak.
Ardhja potenciale e sllovenit në postin e lehtësuesit po mirëpritet nga ish-ambasadori i Kosovës në Slloveni, Avni Kastrati.
“Mendoj qe kishte me qenë zgjidhja më e mirë e mundshme për momentin. Ketë po e them për arsye se kam pasur shumë biseda me zotin Borut Pahor është shume i sinqertë shume dashamires i Kosovës dhe një element tjetër është se shteti slloven është pro Kosovës dhe sigurisht e ka ma lehte ai me veprua”, tha Kastrati.
Pahor njihet edhe si mik i shtetit të Kosovës. Kur e vizitoi Prishtinën si president, në shtator të 2022-ës, homologia e tij, Vjosa Osmani, ia kërkoi ndihmën e Lublanës për rrugën e Kosovës drejt anëtarësimit në BE dhe NATO.
Gjatë kësaj vizite, Pahor e kishte përmendur çështjen e themelimit të Asociacionit të Komunave me Shumicë Serbe, për çka kishte kërkuar zgjidhje për marrëveshjen e arritur në Bruksel.
Kastrati thotë se mënyra e punës së ish-presidentit slloven i përshtatet edhe vetë Josep Borrelit, përfaqësuesit të Bashkimit Evropian për politikë të jashtme dhe siguri.
Ish-ambasadori beson se procesi i dialogut nën udhëheqjen e Pahorit do të jetë më dinamik, meqë sipas tij, Miroslav Lajçak shpesh nuk ishte në krye të detyrës. Megjithatë, Kastrati nuk pret marrëveshje finale se shpejti.
“Zotëri Lajçak e ka pasur një problem që ka ardhur prej një shteti i cili nuk na njeh dhe ai sigurisht ka pasur për obligim me u sjell në kornizat e kërkesës së shtetit të vet pavarësisht qe ka përfaqësuar Bashkimin Evropian kurse Pahori do te ishte në një pozitë krejt tjetër dhe besoj se procesi i dialogut do të jetë më dinamik. Por varet prej palëve nëse dëshirojnë marrëveshje ose jo.. sepse kam bindje qe nuk dëshirojnë”, tha Kastrati.
Borut Pahor, tani 60 vjeçar, ishte President i Sllovenisë nga viti 2012 deri në vitin 2022, pasi shërbeu si Kryeministër nga 2008 deri më 2012. Kurse paraprakisht, për katër vjet, ishte anëtar në Parlamenti Evropian.
Më shumë detaje i gjeni në Edicionin Qendror të lajmeve në videon më poshtë:
Gazetari gjerman, Michael Martens, ka thënë se kryeministri Albin Kurti do të shkojë në Berlin më 25 prill në një organizim të fondacionit Bertelsmann Stiftung në një ngjarje të Bundestagut.
Ai tha se temë diskutimi do të jetë anëtarësimi i Kosovës në Këshill të Europës.
“Kryeministri i Kosovës Albin Kurti po vjen në Berlin të enjten (25 prill) për të folur në fondacionin Bertelsmann Stiftung në një event në Bundestagun gjerman dhe bashkëbiseduesve të tjerë. Tema: Anëtarësimi i Kosovës në Këshillin e Evropës dhe rruga përpara. Prisni zhvillime”, ka shkruar ai.
Ndihmëssekretari amerikan i Shtetit për Evropën dhe Euroazinë, James O’Brien, tha se Kosova ka premtuar se do të themelojë Asociacionin e komunave me shumicë serbe dhe Uashingtoni pret që ky zotim të realizohet.
“Nëse ka shqetësim se komuniteti ndërkombëtar nuk po përmbush obligimin për të ndihmuar në këtë çështje, unë shpresoj që ne do të bëjmë gjithçka që kemi në dorën tonë për të ndihmuar në përmbushjen e premtimit ndaj vetes dhe të tjerëve”, tha zyrtari i lartë amerikan gjatë një konference për media në Beograd më 20 prill, pas takimit që zhvilloi me presidentin e Serbisë, Aleksandar Vuçiq.
Ndërkaq, Vuçiq tha se pak çfarë merren vesh me Kosovën, është që “duhet ruajtur paqja dhe stabiliteti”.
Në kuadër të dialogut për normalizimin e raporteve, që ndërmjetësohet nga Bashkimi Evropian, Kosova dhe Serbia kanë arritur marrëveshje më 2013 dhe më pas më 2015 për themelimin e Asociacionit.
Po ashtu, themelimi i Asociacionit është përfshirë edhe në Marrëveshjen në rrugën drejt normalizimit të raporteve që palët arritën vitin e kaluar.
BE-ja dhe SHBA-ja vazhdimisht i kanë bërë thirrje Kosovës që themelojë Asociacionin. Vitin e kaluar, bashkësia ndërkombëtare i paraqiti Kosovës dhe Serbisë një draft-statut për Asociacionin.
Palët fillimisht e pranuan draft-statutin, por ende nuk është ndërmarrë ndonjë hap drejt themelimit të tij. /REL/
Presidenti serb, Aleksandar Vuçiq, ka nisur takimin me James O’Brien, Ndihmëssekretar për Çështje Evropiane dhe Euroazisë në Departamentin Amerikan të Shtetit.
Duke folur për këtë takim të premten, Vuçiq paralajmëroi se do të jetë një “bisedë e rëndësishme dhe e vështirë”, pa dhënë më shumë detaje.
Siç ka njofton zyra e shtypit e presidentit të Serbisë, Vuçiq dhe O’Brien pas takimit do t’u drejtohen mediave.
Diplomati amerikan sot në Beograd do të ketë takim edhe me Ana Bërnabiq kryetare e Parlamentit të Serbisë.
