Tag: Ballina

Për më shumë se tri orë ministri i Shëndetësisë Arben Vitia ka raportuar para Komisionit për Shëndetësi dhe Mirëqenie Sociale. Teksa para anëtarëve të këtij Komisioni prezantoi punët që janë bërë në këtë sektor, Vitia u ballafaqua edhe me akuza nga opozita.

Duke elaboruar hapat që kanë ndërmarrë në sektorin e shëndetësisë, ministri Vitia tha se ligji për unifikimin e barnave është drejt zbatimit.

“Pas hyrjes në fuqi në gusht të ligjit për përcaktimin e çmimit të barnave përkundër shumë sfidave ky ligj është në rrugë të mirë për të nisur zbatimin e plotë duke e ditur se kjo është një nga çështjet më të rëndësishme në reformën në shëndetësi dhe duke e ditur se një proces i tillë po bëhet për herë të parë në vendin tonë”, u shpreh Vitia.

Deputeti i LDK-së, Armend Zemaj u shpreh se sot temë diskutimi në këtë Komision do të duhej të ishte reforma gjithëpërfshirëse, por sipas tij ende nuk ka ligj për shëndetësi, e madje edhe shumica e ligjeve janë vetëm në debatet e brendshme por jo edhe në Kuvend.

Sa i takon ligjit për sigurime shëndetësore, Zemaj e konsideroi si një ligj me shumë defekte dhe i përgatitur për fushatë zgjedhore. Ai tha se ministri Vitia nuk përmendi asgjë gjatë raportimit të tij mbi Sistemin Informativ Shëndetësor.

“Te pjesa e barnave është histori e veçantë ligji për çmimit tavat për produkte medicinale i kemi dhënë përkrahje, ligjit është shkelur nuk janë respektuar afatet kohore është miratuar një listë me të meta dhe kundërthënie të mëdha, është anuluar lista, është thënë se na duhen dy javë kohë për t’i përmirësuar…Sot akoma nuk është në fuqi, nuk e di tutje si do të jetë po fatkeqësisht nuk është në fuqi, po është rritur buxheti për barnat po pse ka mungesë të barnave sepse ka blerje deri në 400 për qind më shtrenjtë… Resurset humane janë njolla më e keqe e këtij mandati qeverisës, katër drejtorë të SHSKUK-së, drejtorë të klinikave të ngarkuara të shkarkuar, dhënie dorëheqje, drejtorë të spitaleve rajonale të emëruar të larguar, të emëruar e të ri-larguar. Nuk e përmendet spitalin e Ferizajt nga viti 2018 miliona të shpenzuar kush ka nënshkruar kush e ka dhënë tenderin, kush është mbikëqyrës i tenderit, këtu dikush duhet të jep përgjegjësi”, tha ai.

Ish-ministri i Shëndetësisë, Armend Zemaj u interesua të di më shumë për ligjin për unifikimin e çmimit të medikamenteve.

“Çka është duke u bërë me ligjin për vendosjen e çmimeve tavan…Ministër, ne duhet të flasim hapur, ata të cilët e kanë prolonguar procesin sot kanë ose janë prapa kompanive farmaceutike që janë thirrur në ekspertiza. Njeriu, i cili ka qenë kryetar i farmacisë, sot ka shkuar gjoja se iu janë falur 10% të aksioneve e ajo kompani merr miliona pikërisht nga futja e këtyre gjërave. Ti je për t’i ndalur këto. Zëvendësja shkon shefe e depos farmaceutike, një nga këshilltarët tuaj shkon në një kompaninë më të fortë. Këto tema duhet t’i flasim publikisht, nuk është marre”, tha ai.

Akuzat e Zemajt i hodhi poshtë ministri Vitia, duke thënë se asnjë këshilltar i tij nuk është i përfshirë në kompani farmaceutike. Sa i takon ligjit për sigurime shëndetësore, Vitia tha se kanë bërë ndryshime drastike.

“Kushdo që është nga këshilltarët e mi tani kjo është informatë absolutisht jo e saktë, asnjë nga këshilltarët e mi nuk është në asnjë kompani farmaceutike. Zemaj: Për ish-këshilltar që ka qenë për listën e barnave goxha i fuqishëm në ministri. Vitia: Nëse e keni fjalën për zotërinë Uka, absolutisht nuk ka qenë i rëndësishëm në pjesën e barnave, ka qenë i rëndësishëm në pjesë tjera sidomos në shëndetin publik. Kompania në fjalë është një kompani që ka fituar miliona kur kenë qenë edhe ju ministër, ku ka qenë edhe PDK që ka pasur ministra që kanë fituar dhe kur ka qenë edhe AAK që e ka qeverisur vendin me kryeministër. Ajo kompani nuk është bërë te ne”, theksoi ai.

Ndërsa, për Spitalin e Ferizajt ministri Vitia tha se të gjitha shkeljet që i kanë evidentuar te ky projekt tashmë i kanë adresuar në Prokurorinë e Shtetit dhe tani është në dorën e drejtësisë kjo çështje.

“Ju thatë çka keni bërë kjo është pyetje jo për mua unë tregova se kjo lëndë është dërguar tek organet përgjegjëse të drejtësisë nëse ata nuk ndërmarrin kurrgjë për besë unë nuk di çka ndërmarrë, unë as nuk janë prokuror e as gjykatës as asgjë për mua ka qenë se e kam identifikuar problemin”, theksoi ai.

Kritika e akuza të shumta karshi qeverisjes me shëndetësinë pati edhe deputeti nga radhët e PDK-së, Bekim Haxhiu.

Sipas tij, kjo ministri për katër vjet nuk ka arritur ta hartojë një strategji sektoriale për shëndetësi, ndërsa theksoi se janë bërë abuzime e keqpërdorime me barna, e zhvatje milionëshe në blerje të aparaturave dhe rinovimeve të klinikave.

“Dështimi për hartimin e strategjisë për shëndetësi si është e mundur pas katër viteve të qeverisjes tuaj për plotë 1370 ditë të punës tuaj si ministër nuk keni qenë në gjendje të hartimit të një strategjie. Dështim në implementimin e sigurimeve shëndetësore, dështim në implementim dhe finalizimit të SISH-it. Keqpërdorime, zhvatje milionëshe në blerje të aparaturave dhe rinovime e fasadime. Problemi i ikjes së personelit shëndetësor nuk mund të trajtohet në këtë formë duke thënë se kemi më shumë tani duke na u kthyer sesa duke na ikur. Mund të themi çka të doni, por edhe mjekët e profesionistët e qytetarët e dinë… abuzime e keqpërdorime me barna, të cilët mund ta vlerësojmë krim të organizuar për të mos e quajtur mafia farmaceutike”, tha ai.

Sa i takon investimeve në klinikat e QKUK-së sipas deputetit të PDK-së janë bërë zhvatje të buxhetit me çmime abuzive deri në 3200% më shtrenjtë.

“Kemi të bëjmë me zhvatje të buxhetit, konflikt të pastër të buxhetit, kompania që ka fituar çmimet abuzive prej 200% ma shtrenjtë se çmimet e tregut e deri 3200% më shtrenjtë se çmimet e tregut do t’i jap me fakte, na rezulton se kompania fituese ‘AGI Project’ dhe En group dhe Shkëmbi kanë fituar kontratën në gjinekologji dhe janë në pronësi të Bajram Beqiraj inxhinier në MASHT. Edhe unë kërkoj nga prokuroria t’i hetoj këto kontrata, ndoshta ministër edhe i keni parë këto, sepse kontrata me operatorë ekonomikë nuk është e nënshkruar nga ju, por prej sekretarit”, theksoi ai.

Para deputetëve, ministri Vitia theksoi se mafia farmaceutike për të cilët po hedhin dyshime opozita ato si kompani janë etabluar gjatë qeverisjeve të kaluara.

Lidhur me hartimin e strategjisë sektoriale për shëndetësi, Vitia tha se nuk do të bëjë strategji për ta vendosur në raftet e MSH-së ashtu siç ka ndodhur me strategjitë e bëra nga ministrat e kaluar.

“Ne nuk bëjmë fasadime, por bëjmë rinovime na bëjmë transformime dhe t’u kisha lutur ta lexosh fjalorin e gjuhës shqipe e ta shikosh çka është fasadim e çka transformim… Asnjë kompani, që ju thoni, nuk është bërë në kohën kur unë jam ministër dhe kanë fituar miliona. Të gjitha këto kompani që ju po i quani kriminale, mafia farmaceutike janë formuar komplet në mandatet juaj zotëri Haxhiu dhe në mandatet e juaja kanë filluar të bëhen të punohen. Haxhiu: Pse iu jep punë, pse je lidhur me ta a të ka lidhur Naimi apo je lidhur vetë…Vitia: Të gjitha këto abuzime që po thoni që janë bërë me barna e nëse e quani mafia farmaceutike po qenka etabluar në kohën tuaj, por tash me ligjet përkatëse jemi duke i goditur”, theksoi ai.

Ndërsa, për të gjitha akuzat sidomos për akuzat për abuzim me barna e me blerjet e aparaturës dhe kontratat për rinovime ministri i Shëndetësisë, Arben Vitia ftoi Prokurorinë e Shtetit të merret me këto akuza.

“Krejt dërgoni te Prokuroria edhe unë i bëjë ftesë Prokurorisë që sa më shpejt të fillojnë me hulumtimin dhe hetimin e secilës lëndë pa përjashtim që ta shohim që ndoshta edhe ndonjë lidhje familjare që mund të del që ju po pretendoni e mund të del nga diku tjetër”, tha ai.

Gjatë raportimit para Komisionit për Shëndetësi e Mirëqenie Sociale, kreu i shëndetësisë kosovare tha se kanë proceduar 4 ligje dhe 20 akte nënligjore. Ai tha se tashmë lista e pritjes për rezonancë magnetike është zvogëluar në 4 deri në 6 javë. /kp

Për t’u kthyer në dialog, kryeministri i Kosovës Albin Kurti kërkoi nga Serbia dorëzimin e Milan Radoiçiqit, i cili mori përgjegjësinë për sulmin terrorist që ndodhi vitin e kaluar në Bansjkë.

Ai në një intervistë për mediumin BNN Bloomberg i kërkoi gjithashtu BE-së të ushtrojë më shumë presion mbi Beogradin për të ndihmuar në lehtësimin e tensioneve me një marrëveshje për normalizimin e marrëdhënieve.

“Duhej të ndodhte dje”, tha Kurti. “Unë besoj se është e mundur”, shpreh Kurti.

Kryeministri i Kosovës, Albin Kurti, në një intervistë për televizionin polak ka theksuar se lidhjet e Beogradit me Moskën janë një ndër arsyet kryesore të marrëdhënieve të tensionuara mes Kosovës dhe Serbisë dhe po pengojnë përpjekjet e Kosovës për t`u anëtarësuar në Bashkimin Evropian.

Kurti ka vënë në dukje se Kosova është njohur nga 117 vende, megjithatë pesë shtete anëtare të BE-së – Spanja, Greqia, Rumania, Sllovakia dhe Qiproja – ende nuk e kanë njohur zyrtarisht pavarësinë e Kosovës.

Me katër nga këto vende (përveç Qipros) që janë gjithashtu pjesë e NATO-s, anëtarësimi i Kosovës në të dyja këto organizata po pengohet, tha Kurti në TVP World.

Ai shtoi se beson se Kosova, ashtu si Polonia, do të anëtarësohet në NATO para Bashkimit Evropian, duke synuar që Kosova të anëtarësohet në të dyja këto organizata, “jo vetëm për të përfituar, por edhe për të kontribuar”.

Kurti theksoi se ato shtete anëtare të BE-së që nuk e njohin zyrtarisht Kosovën i përdorin si justifikim çështjet e pazgjidhura me Serbinë. Në këtë kontekst, ai përmendi se ka një marrëveshje me Serbinë vitin e kaluar, e cila kishte për qëllim normalizimin e marrëdhënieve.

“Problemi është se Serbia vazhdimisht e ka shkelur këtë marrëveshje dhe jemi shumë larg zbatimit të saj”, shtoi i pari i ekzekutivit kosovar.

Kurti argumentoi se një pengesë në marrëdhëniet me Serbinë është fakti që “ata refuzojnë të emancipohen nga Putini”.

“Serbia është i vetmi vend në Evropë, së bashku me Bjellorusinë, që nuk iu bashkua sanksioneve të BE-së dhe SHBA-ve kundër Federatës Ruse”, tha Kurti. Ai shtoi se lidhjet e Beogradit me Moskën nënvizojnë “tensionin e vazhdueshëm mes Kosovës dhe Serbisë,” duke akuzuar Serbinë për sjellje agresive ndaj Kosovës “që të pëlqehet nga Federata Ruse”.

Kryeministri i Kosovës shprehu shpresën që gjatë mandatit aktual të Komisionit Evropian, Serbia do të detyrohet të zgjedhë mes një “Federate Ruse despotike të presidentit Putin” dhe “demokracisë, pluralizmit politik, sundimit të ligjit dhe të drejtave të njeriut”.

Duke komentuar mbi luftën në Ukrainë, Kurti tha: “Gjenerata jonë po jeton në kohën e fashizmit rus. Dhe ne duhet ta luftojmë atë me demokraci, me sovranitet. Ne duhet të luftojmë me solidaritetin e të gjitha kombeve dhe shteteve evropiane”.

Kryeministri Kurti, ka deklaruar se Serbia është zëri i Rusisë, ndërsa Kosova është sukses i NATO-s.

Shefi i ekzekutivit kosovar, në një intervistë për mediumin polak Polsat, ka folur për kërcënimet ndaj Kosovës.

“Serbia është, si të thuash, zëri i Rusisë,” tha ai.

Kurti shtoi gjithashtu se Kosova është një sukses i NATO-s, në të cilin Polonia ka luajtur një rol të rëndësishëm. “Ne jemi kampionë në Ballkan,” ka deklaruar ai.

Instituti Kombëtar i Shëndetësisë Publike ka njoftuar se ditën e djeshme ekipet e tyre kanë marrë 16 mostra nga një zonë që furunizohet me ujë nga Liqeni i Badocit, pas njoftimit për ngritje të vlerave të manganit, ku prej tyre 15 kanë rezultuar me tejkalim të standardit të lejuar manganit.

Nga IKSHP kanë rekomanduar që për këtë periudhë uji të mos konsumohet për pije dhe të përdoret vetëm për higjienë personale dhe ambientale.

Tejkalimet fillojnë nga vlera më e ulët prej 0.062mg/L deri në vlerën më të lartë 0.250 mg/L.

“Të dhënat e analizave të bërë dhe krahasimi i tyre me të dhënat e ditëve paraprake si dhe përvoja nga situata e vitit 2023, na tregojnë se gjatë kohëzgjatjes së këtij fenomeni, vlerat e manganit kanë tendencë të rritjes së vazhdueshme ditë pas dite, andaj IKSHPK për këtë periudhë rekomandon që uji të mos konsumohet për pije dhe të përdoret si ujë teknik për higjienë personale dhe ambientale”, thuhet ne njoftim.

Sipas Udhëzimit Administrativ Nr: 10/2021 “Për cilësinë e ujit të destinuar për konsum nga njeriu”, norma e lejuar për Mangan në ujin për pije është 0.05 mg/L.

Bazuar në këto rezultate, IKSHP ka dalë me disa rekomandime për Ujësjellësin “Prishtina”:

Të kontrollohet procesi i dezinfektimit në mënyrë që vlera e Cl rezidual të jetë 0.1-0.2mg/L, e cila garanton cilësinë e ujit në aspektin bakteriologjik dhe në të njëjtën kohë ndihmon në proceset oksido-reduktive;

Të përcjellet ndotja organike (TOC) në ujin e liqenit dhe në rrjetin shpërndares;

Zbatimi i procedurave standarde për situatën e krijuar në të gjitha fazat e trajtimit të ujit;

Shpërlarja e rrjetit shpërndarës – gypave magjistral;

Shpërlarja e rrjetit shpërndarës – segmenteve të vogla;

Të sigurohet ujë higjienik për pije për qytetarët.

“IKSHPK njofton se deri me datën 02.10.2024 në rezultatet e mostrave të marra sipas planit të Monitorimit për ujin e pijshëm, nuk ka pasur mostra që kanë rezultuar me vlera të shtuara të manganit mbi standardin e paraparë (0.05 mg/L) sipas Udhëzimit Administrativ Nr: 10/2021 “Për cilësinë e ujit të destinuar për konsum nga njeriu””, thuhet në fund të njoftimit.

Me një situatë të tillë, Kosova është përballur edhe vitin e kaluar.

Paraqitja e “fenomenit” te Manganit në Liqenin e Badovcit është dukuri e vazhdueshme, e cila ndodh kryesisht në kohën e ndrrimit të stinëve. IKSHP ka thene se kjo dukuri në vitin e kaluar ishte shqetësuese, sepse përveç vlerave të shtuara të Manganit 2valent, u shoqërua edhe me kohëzgjatje të këtij fenomeni.

Edhe pse Mangani konsiderohet një lëndë ushqyese thelbësore dhe kontribuon në shumë funksione trupore, duke përfshirë metabolizmin e aminoacideve, kolesterolit, glukozës dhe karbohidrateve, në formimin e kockave, mpiksjen e gjakut dhe reduktimin e inflamacionit, vlerat mbi 50 µg/L në ujin e pijshëm sillet si ndotës dhe ka ndikim të dëmshëm në shëndet, e posaçërisht tek fëmijët deri në 5 vjeç.

Qytetarët e komunitetit serb në veri të Kosovës janë duke marrë ditëve të fundit paralajmërime për ndërprerje të energjisë elektrike, për shkak të borxheve të papaguara.

Paralajmërimet, që i pa Radio Evropa e Lirë, jepen nga kompania serbe, Elektrosever, e krijuar në bazë të Marrëveshjes për Energjinë, e cila është arritur në kuadër të dialogut për normalizimin e marrëdhënieve ndërmjet Kosovës dhe Serbisë.

Afati për shlyerjen e borxheve për rrymën e konsumuar është 15 ditë.

Zyra e Rregullatorit për Energji, e cila monitoron punën e kompanisë Elektrosever, konfirmon se një numër i madh i qytetarëve të Mitrovicës së Veriut, Leposaviqit, Zveçanit dhe Zubin Potokut nuk i paguajnë faturat e energjisë elektrike.

“Energjia elektrike llogaritet nga subjekti i autorizuar [Elektrosever], faturat shpërndahen, por niveli i pagesës së faturave nga qytetarët është ende i ulët”, thonë nga Zyra e Rregullatorit për Energji.

Megjithatë, në përgjigjen e tyre nuk specifikohet saktësisht se sa qytetarë nuk i paguajnë faturat në komunat me shumicë serbe në veri të Kosovës.

“Në bazë të raportit që kemi marrë së voni nga Elektroseveri, llogaritet se në veri janë rreth 23 mijë konsumatorë. Sipas legjislacionit aktual dhe licencave të lëshuara, është përgjegjësi e Elektroseverit që t’i marrë të gjitha masat për pagesën e energjisë elektrike”, thuhet në përgjigje.

Kompania Elektrosever mori licencën për të punuar në Kosovë në qershor të vitit 2023. Ndërsa, në fillim të këtij viti nisi dërgimin e faturave të para te konsumatorët.

Ata nuk e paguan rrymën e shpenzuar që nga paslufta në Kosovë, më 1999.

Si funksionon kompania Elektrosever?

Elektrosever është një kompani në pronësi të kompanisë energjetike të Serbisë, EPS, e cila është e regjistruar në Kosovë sipas ligjeve të Kosovës.

Ajo buron nga Marrëveshja mes Kosovës dhe Serbisë për Energjinë, e arritur në kuadër të dialogut për normalizimin e marrëdhënieve, të ndërmjetësuar nga Bashkimi Evropian.

Në faqen e internetit të kompanisë Elektrosever thuhet se, në bazë të licencës së marrë në Kosovë, ajo ka të drejtë të blejë dhe të shesë rrymë në tregun e energjisë elektrike, t’i rishesë kapacitetet e tepërta me çmime të dakorduara, si dhe të importojë dhe eksportojë energji elektrike.

Pse qytetarët nuk e paguajnë energjinë elektrike?

Predragu nga Mitrovica e Veriut nuk i paguan faturat e rrymës, sepse beson se njehsori i tij është i vjetër dhe se faturat për shpenzimet e tij janë joreale.

Ai thotë se faturat i merr rregullisht, por se e ka paguar vetëm të parën, të cilën e ka marrë në shkurt të këtij viti. Të tjerat thotë se nuk do t’i paguajë, sepse janë “anormale”.

“Njehsori është i vjetër, i paraluftës… Askush nuk ka ardhur ta shikojë. Vijnë disa fatura anormale, nga 90 deri në 200 apo 250 euro”, thotë Predragu.

Ai shton se pret që në periudhën e ardhshme ta ndërrojë njehsorin, që do ta lexonte bilancin e ri dhe në bazë të të cilit do t’i paguante faturat.

Në fund të prillit, Elektroseveri nisi ndërrimin e njehsorëve të vjetër dhe vendosjen e të rinjve në objektet e reja që nuk kishin, por ky proces është ende në zhvillim e sipër.

Njehsor të vjetër të rrymës ka edhe Nenadi, por ai thotë se i paguan rregullisht faturat.

Ai tregon se, gjatë periudhës së verës, ka paguar mesatarisht 10 euro në muaj dhe thotë se mban rregullisht evidencë për rrymën e shpenzuar.

“Unë paguaj [rregullisht] që të mos më grumbullohen faturat. Rryma duhet paguar. Një vendim i tillë është marrë dhe zyrtarët [e Elektroseverit] më kanë thënë se [faturat] duhet të paguhen”, thotë Nenadi.

Aleksandra nga Mitrovica e Veriut thotë se nuk ka dashur t’i paguajë faturat për rrymën e shpenzuar, kur ka filluar shpërndarja e tyre në fillim të vitit, por se, ndërkohë, ka ndërruar mendje.

“Kam paguar faturën e parë… e cila ishte si një paradhënie. Më pas, kam bërë një pauzë të gjatë, por tani i kam shlyer të gjitha faturat”, thotë Aleksandra.

Sipas saj, njehsorët e energjisë elektrike në veri të Kosovës e llogaritin vetëm rrymën e shtrenjtë dhe kjo është arsyeja përse disa amvisëri kanë fatura të larta.

Çfarë thonë nga Elektroseveri?

Kompania Elektrosever nuk iu përgjigj pyetjeve nëse qytetarët e komunave në veri të Kosovës i paguajnë rregullisht faturat, sa konsumatorë ka, çfarë masash do të merren ndaj atyre që nuk paguajnë dhe të ngjashme.

Por, më 23 shtator, kjo kompani e njoftoi opinionin se paralajmërimi për ndërprerjen e furnizimit me energji elektrike do t’u dërgohet të gjithë konsumatorëve, borxhi i prapambetur i të cilëve është mbi 100 euro.

Kompania, gjithashtu, u bëri thirrje qytetarëve që t’i mundësojnë qasjen në njehsorë, në mënyrë që të regjistrohet konsumi, dhe i ftoi sërish ata që të lidhin kontrata me Elektroseverin për furnizimin me energji elektrike.

Nga Elektroseveri i kanë thënë më herët REL-it se ata që nuk kanë paguar faturën e parë preliminare dhe nuk kanë nënshkruar kontratë me ta, automatikisht bëhen konsumatorë të Kompanisë për Furnizim me Energji Elektrike të Kosovës (KESCO).

Por, në njoftimin e fundit thanë se Elektroseveri ka të drejtë ligjore që t’ua pezullojë furnizimin me energji elektrike konsumatorëve që nuk kanë kontratë me ta, si dhe atyre që nuk kanë mundësuar qasjen në njehsorë.

“Furnizimi i sigurt dhe i qëndrueshëm me energji elektrike arrihet me shlyerjen e rregullt të faturave”, thuhet në njoftim.

Në KESCO nuk iu përgjigjën pyetjes nëse kanë konsumatorë në komunat në veri të Kosovës.

Në qershor të vitit 2023, Kosova dhe Serbia nënshkruan një udhërrëfyes për zbatimin e Marrëveshjes për Energjinë, e cila u arrit në vitin 2013 në kuadër të dialogut për normalizimin e marrëdhënieve.

Pas kësaj, në fillim të dhjetorit të vitit 2023, BE-ja njoftoi se kompania serbe, Elektrosever, ka nënshkruar një kontratë komerciale me Kompaninë Kosovare të Shpërndarjes së Energjisë Elektrike (KEDS).

Komisioni Hetimor Parlamentar për procesin e subvencionimit të blerjes së teksteve dhe mjeteve mësimore sot do të mbajë mbledhjen e radhës.

Në këtë mbledhje pritet që të intervistohen ish-ministrat e Arsimit dhe Financave: Hykmete Bajrami, Ramë Likaj, Shyqeri Bytyçi, Arsim Bajrami, Ramë Buja, Enver Hoxhaj, Bedri Hamza, Besim Beqaj dhe Avdullah Hoti.

Mbledhja e këtij komisioni pritet që t137 filloj në ora 13:30.

Në Qendrën Klinike Universitare të Kosovës sot është përuruar Klinika e re e Ortopedisë, për të cilën u tha se është me kushte moderne dhe ndikon në uljen e listës së pritjes për pacientët.

Ministri i Shëndetësisë, Arben Vitia tha se kjo klinikë bashkëkohore ka gjithsej 22 dhoma e 44 shtretër dhe tani e tutje qytetarët do të kenë mundësi të marrin shërbimet më moderne mjekësore.

Vitia theksoi se kostoja e ndërtimit të këtij objekti është rreth 2.8 milionë euro.

“Një klinikë moderne me rreth 3 mijë 500 metra katror e me 22 dhoma e 44 shtretër që do të thotë se kemi nga dy pacientë në një dhomë, dhoma me klimatizim e mekanizëm të thirrjes për infermierë dhe mjekë, dhoma për regjistrim të secilit mjekë dhe infermierëve që vjen në kontroll pas thirrjes së pacientëve…Jam jashtëzakonisht i lumtur që kjo klinikë moderne me gjithë këto investime që diku janë rreth 2.8 milionë euro tash po hapet dhe është në shërbim të pacientëve që do t’i marrin këto shërbime në këto kushte moderne”, tha ai.

Ministri, Vitia potencoi se investimet në këtë klinikë do të ndikojnë të ketë ulje në listën e pritjes, për çka u zotua se shumë shpejtë do të nis ofrimi i shërbimeve ortopedike edhe në spitalet regjionale.

“Janë katër salla operative ku tri nga to do të përdoren vazhdimisht, ndërsa njëra nga sallat do të përdoret ekskluzivisht për operacionet elektive për të zvogëluar listën e pritjes dhe natyrisht ky investim përveç shërbimit shumë më të mira, më moderne dhe më korrekte që do të marrin qytetarët e Kosovës do të mundësoj edhe uljen e listës së pritjes një problem tashmë që shumë vite në Klinikën e Ortopedisë për këtë lloj operacionesh dhe me punën e vazhdueshme që do ta bëjë Klinika e Ortopedisë tani me investimet që jemi duke i bërë edhe në spitalet regjionale për aktivizimin e këtyre operacioneve në spitale regjionale ne jemi të bindur që shumë shpejtë kjo listë e pritjes do të pësoj një rënie shumë substanciale. Shumë shpejtë do të fillojmë edhe me këso investimesh edhe në spitalet regjionale në mënyrë që edhe pacientët nga viset tjera nga Kosova të kenë mundësi të njëjtat shërbime t’i marrin edhe afër qyteteve të tyre”, tha ai.

Drejtori i Klinikës së Ortopedisë, Xhavid Gashi u shpreh se pacientët e repartit të Ortopedisë që janë në Klinikën e Kirurgjisë nga java e ardhshme do të zhvendosen në ambientet e reja të kësaj klinike.

Ai u shpreh optimistë se në vitin e ardhshëm do të rinovohet edhe Klinika Ortopedike ku aktualisht është funksionale dhe në shërbim të pacientëve.

“Në bllokun operativ ka vazhduar gjithnjë, ndërsa zhvendosja e pacientëve sepse e kemi një pjesë në klinikat e vjetra tek Klinika e Kirurgjisë zhvendosja e pacientëve bëhet prej javës tjetër sepse janë në proces programet operative të tyre që të mos pengohet puna në pjesën operative prej javës tjetër pacientët do të zhvendosën këtu”, theksoi ai.

E sa i takon pjesës së vjetër ku deri më sot ka qenë duke operuar Klinika Ortopedike sipas ministrisë të Shëndetësisë, Arben Vitia do të shfrytëzohet për vendosjen e pacientëve të klinikave që do të rinovohen në vijim.

“Do të mbetet e zbrazët po them kushtimisht do të investimet dhe problemet që i kemi pasur gjatë investimeve, transformimeve dhe punimeve në disa reparte e klinika që i keni parë gjatë këtij viti ku ka qenë një sfidë jashtëzakonisht se nuk kemi pas ku t’i zhvendosim derisa janë bërë këto transformime ajo do të jetë një pjesë ku pastaj pacientët në klinikat e ardhshme që do të transformohen do ta kenë mundësinë që do të zhvendosën në atë pjesë”, u shpreh Vitia.

Ministri i Shëndetësisë, Arben Vitia u shpreh se me veprimet që po marrin deri në fund të vitit do të jetësohet shërbimi IFV në sektorin publik shëndetësor.

“Pajisjet e IFV-së janë duke u montuar.. Ka ardhur për përditësimin e ri ku do të futen edhe barnat për IVF për barna në listën esenciale dhe kjo e përmbyll komplet ciklin që deri në fund të vitit ky shërbim kaq i nevojshëm për qiftet edhe gratë në Kosovë të merret edhe në shëndetësinë publike”, theksoi ministria Vitia.

Lidhur me konferencën e Federatës Sindikatave të Shëndetësisë së Kosovës, që është paralajmëruar për sot e ku pritet të paraqiten pakënaqësitë e punëtorëve shëndetësorë, kreu i këtij dikasteri theksoi se si Qeveri kanë bërë hapa pozitivë si në rritjen e pagës ashtu edhe tek krijimi i kushteve më të mira të punës.

“Në aspektin e rritjes së pagave përmirësim të kushteve, aparaturës dhe infrastrukturës ne mendojë që kemi bërë dhe po vazhdojmë të bëjmë aq sa duhet. A janë bërë të gjitha natyrisht jo kishte me qenë arrogancë nëse them se janë bërë të gjitha, mirëpo e mira është se se të gjitha këto janë në plane dhe të gjitha këto janë duke u realizuar”, u shpreh ministri i Shëndetësisë./kp

Komisioni i Pavarur i Mediave ka miratuar Planin e Veprimit për zgjedhjet e përgjithshme të shkurtit të vitit të ardhshëm, plan i cili paraqet aktivitetet që KPM-ja planifikon t’i ndërmerr në bazë të mandatit ligjor të përcaktuar me Ligjin e KPM-së dhe Ligjin për Zgjedhjet e Përgjithshme.

Ky plan i veprimit sipas KPM-së është i ndarë në tri pjesë që përfshinë aktivitetet e planifikuara para fillimit të fushatës zgjedhore, gjatë dhe pas fushatës zgjedhore.

“Periudha para fushatës zgjedhore përfshinë aktivitetet e KPM-së në hartimin e Rregullores për sjelljen e mediave gjatë fushatës dhe heshtjes zgjedhore, si obligim i paraparë në Ligjin e ri për Zgjedhjet e Përgjithshme. Kjo periudhë përfshinë edhe aktivitetet që kanë të bëjnë me komunikimin dhe sensibilizimin e të licencuarve të KPM-së me qëllim të njoftimit rreth obligimeve të mediave gjatë këtij procesi”, thuhet ndër të tjera në njoftimit e nxjerrë nga KPM-ja.

Aktivitet tjetër sipas tyre në këtë periudhë është edhe ngritja e kapaciteteve njerëzore dhe teknike të Zyrës së KPM-së.

Ndërkohë siç bëhet e ditur periudha gjatë fushatës zgjedhore deri në mbylljen e vendvotimeve do të përfshijë monitorimin dhe vlerësimin e pajtueshmërisë së të licencuarve të KPM-së me legjislacionin në fuqi, si dhe vendimmarrjen e shpejtë në rast të shkeljeve të identifikuara.

Ndërsa, periudha pas zgjedhore siç ka njoftuar KPM-ja do të fokusohet në prezantimin e të gjeturave nga monitorimi i të licencuarve gjatë periudhës zgjedhore.

“Në përgjithësi, zbatimi i Planit të Veprimit do të bëhet brenda një periudhe shtatë mujore, shtator 2024 – mars 2025”, thuhet tutje në njoftim.

Ndërkohë objektivat e KPM-së mbi procesin zgjedhor përfshijnë krijimin e akteve nënligjore të bazuara në ligj dhe konsultim publik, udhëzimin e mediave të licencuara për një qasje të drejtë dhe të paanshme gjatë fushatës zgjedhore, sigurimin e kushteve të barabarta dhe mos diskriminuese për qasjen e subjekteve politike të certifikuara në mediat e licencuara, informimin dhe sensibilizimin e duhur te subjekteve të licencuara, krijimin e kushteve të favorshme teknike për monitorim intensiv gjatë fushatës zgjedhore si dhe vendimmarrjen e shpejtë të masave proporcionale në rast të shkeljes së legjislacionit në fuqi.

Liderët politik serbë janë duke vazhduar fushatën e tyre nëpër botë për çnjohjen e pavarësisë së Kosovës.

Me këtë fushatë Serbia po vazhdon avazin e vjetër dhe po shkelë marrëveshjet me Kosovën të ndërmjetësuara nga Bashkimi Evropian.

Edhe pse në këto marrëveshje thuhet që Serbia nuk do të pengojë Kosovën drejt aspiratave evropiane, po ndodhë e kundërta.

Pavarësisht kritikave dhe kërkesave nga ndërkombwtarët, Serbia po e vazhdon fushatën e saj kundër njohjes së pavarësisë së Kosovës.

Këtë e bëri sërish zëvendëskryeministri dhe ministri i Punëve të Brendshme i Serbisë, Ivica Daçiq, në inaugurimin e presidentes së re të Meksikës, duke e falënderuar Meksikën për mosnjohje të Kosovës.

“Meksika nuk e ka njohur pavarësinë e Kosovës. Në këtë kuptim, ndërtimi i marrëdhënieve të mira me Meksikën është interesi ynë jetik dhe kombëtar”, tha Daciq.

Ndaj deklarimeve të Daçiqit reagoi Ministria e Punëve të Jashtme e Kosovës. Zëvendësministri Kreshnik Ahmeti tha se kjo fushatë e Serbisë kundër pavarësisë së Kosovës dhe kundër normalizimit të marrëdhënieve, duhet të ndëshkohet nga Bashkimi Evropian.

“Qasja e tillë e Beogradit, tregon qartë që regjimi atje nuk janë të interesuar për normalizim të marrëdhënieve me Republikën e Kosovës. Kjo është shfaqur shumë herë dhe në forma të ndryshme. Kishim me dhjetëra deklarata të përfaqësuesve të lartë të Beogradit nëpërmjet të cilave ata tregonin haptas që nuk do t’i zbatojnë pikat e Marrëveshjes së Brukselit. Gjithashtu, fushata e Beogradit për të ashtuquajturat “ç’njohje” nuk është ndalur asnjëherë. Megjithëse në vitet e fundit kanë dështuar në secilin lobim në drejtim të këtij qëllimi, sigurisht që kjo tregon se Beogradi nuk është i interesuar për normalizim. Çdo shkelje e pikave të Marrëveshjes e Brukselit do të duhej të njihej si e tillë fillimisht dhe pastaj të ndëshkohej. Në këtë rast, Bashkimi Evropian, si lehtësues dhe ndërmjetësues në procesin e dialogut, do të duhej të ndërmerrte masa kundër Beogradit për secilin veprim të tyre që e pamundëson normalizimin’, tha Ahmeti per rtv21.

Edhe kryetarja e Komisionit parlamentar për Integrim Evropian nga radhët e LDK-së, Rrezarta Krasniqi, theksoi nevojën e ndëshkimit të Serbisë për fushatën e saj kundër pavarësisë së Kosovës.

Bashkimi Evropian ndërkaq nuk dha ndonjë përgjigje në lidhje me qasjen e Serbisë kundër pavarësisë së Kosovës dhe as nëse do të ketë ndonjë ndëshkim për të, për shkeljen e marrëveshjes së Brukselit dhe aneksit të Ohrit.

Kosova dhe Serbia kanë arritur pajtueshmëri për normalizim marrëdhëniesh në shkurt të vitit të kaluar, ndërsa në mars të po atij viti, për aneksin e zbatimit të saj.

Sipas marrëveshjes, Serbisë i ndalohet çdo lloj fushate kundër Kosovës dhe anëtarësimit të saj në organizata ndërkombëtare.

Presidentja e Kosovës, Vjosa Osmani është pritur në Berlin nga presidenti i Gjermanisë, Frank-Walter Steinmeier.

Presidenca gjermane tha se Steinmeier i tha Osmanit se Gjermania është e interesuar për stabilitetin në rajon dhe anëtarësimin evropian të Kosovës.

“Gjermania është shumë e interesuar për stabilitetin e rajonit dhe e mbështet anëtarësimin e Kosovës në Bashkimin Europian dhe Këshillin e Europës, theksoi Presidenti Federal gjatë bisedimeve. Vendi duhet të punojë për t’i krijuar kushtet e nevojshme për këtë”, thuhet në njoftimin e Presidencës në Gjermani.