Të premten është parashikuar mot i vranët dhe me intervale me diell.
Sipas Institutit Hidrometeorologjik të Kosovës vranësirat gjatë ditës do të dendësohen duke krijuar kushte për riga shiu.
“Temperaturat minimale do të lëvizin ndërmjet 3-5-gradë Celsius, ndërsa maksimalet e ditës parashihen të lëvizin ndërmjet 14-17-gradë Celsius. Do të fryjë erë nga drejtimi i jugperëndimit me shpejtësi 1-7 m/s. Kushtet biometeorologjike dhe agrometeorologjike paraqiten të mira”, njofton IHMK.
Përgatiti: Nora Luta
Kur kanë mbetur edhe disa muaj në përfundim të mandatit të Qeverisë në pushtet, një nga premtimet kryesore të saj ka mbetur ende pa u realizuar.
Vettingu në sistemin e drejtësisë, ishte prioritet në agjendën e Ministrisë së Drejtësisë.
Njohës të sistemit thonë se ky proces është i domosdoshëm, andaj kanë kritika për punën e ekzekutivit në këtë drejtim.
Kushtetuesja dha dritën e gjelbër për vetingun, megjithatë ky proces ka mbetur peng i votave të deputetëve të Listës Serbe, të cilët e kanë bojkotuar punën.
Për të nisur në praktikë ky proces fillimisht amendamentet duhet të miratohen në Kuvend.
Pasi përmendin ndikimin politik, e marrëdhëniet me shtetin e Serbisë, shoqëria civile thotë se i takon mazhorancës, e Ministrisë së Drejtësisë që të bëjë përpjekje që ndryshimet të kalojnë në Kuvend.
Në anën tjetër Ministria e Drejtësisë nuk ka kthyer përgjigjeje në interesimin e ATV-së për këtë çështje.
Procesi i verifikimit dhe vlerësimit të prokurorëve e gjyqtarëve është konsideruar ndër prioritetet e ekzekutivit për reformën në drejtësi.
Por, Ministria pas opinionit të Komisionit të Venecias hoqi dorë nga vetingu i plotë, duke e reduktuar në një veting të pjesshëm që do të përfshijë vetëm udhëheqësit e prokurorive, gjykatave dhe anëtarëve e kryesuesve të Këshillave përkatës.
Përgatiti: Krenare Mulliqi
Të enjten u bënë fiks një muaj, prej kur Ministria e Financave nisi verifikimin shtesë për disa llogari të prindërve, që përfitojnë shtesa për fëmijët, për të kuptuar nëse jetojnë në Kosovë.
Megjithatë nga kjo ministri nuk treguan se sa është numri i llogarive që dyshohet se keqpërdorët me shtesat për fëmijët.
Në Qendrën për Punë Sociale në Fushë Kosovë, mbi 140 prind i kanë dorëzuar dëshmimit e kërkuara nga ministria e Financave.
Sipas drejtorit të kësaj qendre, procesi i verifikimit nuk ishte fare i lehtë për shkak të kushteve në qendrat për punë sociale.
Për këtë shkak që nga e hëna e 21 nëntorit, prindërit që ftohen nga Ministria e Financave, dokumente e nevojshme duhet t’i dërgojnë në Postën e Kosovës.
“Ministria e Financave ka bërë marrëveshje me postën edhe nga e hëna prindërit duhet të shkojnë atje t’i dorëzojnë dokumentet e nevojshme…”, tha drejtori i Qendrës për Punë Sociale në Fushë Kosovë, Abaz Gjigolli.
Verifikimi mund të zgjasë deri në një afat të papërcaktuar.
Megjithatë ekonomistët nuk presin që procesi të përmbyllet brenda një kohe të shkurtër, kryesisht për shkaqe elektorale.
“Ministria e Financave aktualisht bënë vetëm kalkulimin e votave sigurisht që pres që të zbatohet një gjë e tillë, këtë më shumë Ministria e Financave e bënë për frikësim..”, tha Bashkimi Mustafa, ekonomist.
Për shkak të dyshimeve për keqpërdorime me shtesat e fëmijëve, Ministria e Financave kërkoi dokumente shtesë të llogarive të prindërve.
Kësisoj për fëmijët nga 0 deri në 5 vjet ju kërkohej të dorëzojnë dëshminë e vaksinave, ndërkaq nga 6 deri në 16 vjet iu kërkua dëshmia nga shkolla.
Javën e ardhshme, që sipas të gjitha gjasave të enjten më 24 tetor, në Bruksel pritet të zhvillohet rundi i ri i takimeve në kuadër të dialogut për normalizim të raporteve mes Kosovës dhe Serbisë, në nivel të kryenegociatorëve.
Në BE gjithmonë e përdorin fjalën “takime”, pasi nuk janë të sigurt nëse do të ketë takim trepalësh, pra takim mes dy delegacioneve në prani të lehtësuesit nga BE-ja.
Deri më tani, zakonisht janë zhvilluar takime dypalëshe mes të dërguarit të BE-së për dialogun, Mirosllav Lajçak, dhe kryenegociatorëve të Kosovës dhe Serbisë, por jo edhe takime trepalëshe.
Herën e fundit kur është zhvilluar një takim trepalësh ka qenë takimi i 2 korrikut të këtij viti. Megjithatë, pas takimit palët dolën me qëndrime diametralisht të kundërta rreth asaj që kishte ndodhur në takime. Palët e kishin akuzuar njëra-tjetrën për “mungesë të gatishmërisë për dialog”.
Ditëve të fundit, Lajçak ka mbajtur konsultime me palët. Por, përpos pohimeve se po shqyrtohet rruga përpara në dialog, nga ana e BE-së – që ndërmjetëson këtë proces që ka nisur më 2011 – nuk kanë dhënë hollësi se me cilat tema do të merren palët në takimet e radhës.
Në BE, por edhe në NATO gjithnjë e më shumë po shprehin pakënaqësi lidhur me rrjedhën aktuale të dialogut, duke thënë se procesi nuk po prodhon rezultatet e pritura. Kështu ka konstatuar edhe sekretari i Përgjithshëm i NATO-s, Mark Rutte, duke shprehur shqetësim për këtë.
Emisari evropian për dialogun, Mirosllav Lajçak, ka mandat në këtë post deri në fund të muajit janar të vitit 2025. Ndërkaq, në BE presin të shohin se çfarë qasje rreth dialogut do të ketë përfaqësuesja e e re e lartë për politikë të jashtme, Kaja Kallas, pasi ajo të marrë mandatin. Mandati i saj do të nisë kur të jetë gati i tërë ekipi i ri i Komisionit Evropian, pasi të konfirmohet nga Parlamenti Evropian.
Kryeministri i Kosovës, Albin Kurti, ka deklaruar se pret dinamikë të re nga Komisioni Evropian, sa i përket dialogut./rel
Studiuesit e Këshillit Gjerman për Punë të Jashtme – DGAP, kanë thënë se pavarësisht se kush i fiton zgjedhjet në Amerikë, roli i Shteteve të Bashkuara në Ballkanin Perëndimor do të reduktohet.
Sipas autorëve të kësaj analize, Millan Niq dhe Frauke Seebass, Ballkani Perëndimor, me konfliktet e tij të pazgjidhura dhe integrimin e ngecur, do të ketë nevojë për një angazhim më serioz dhe strategjik nga BE-ja dhe Gjermania, pavarësisht emrit të ri në krye të Shtëpisë së Bardhë, njofton Klankosova.tv.
Në këtë analizë, autorët thonë se nën presidencën e parë të Donald Trumpit, politika e Shteteve të Bashkuar për Ballkanin Perëndimor mori një kthesë më të njëanshme. Ata përmendin Marrëveshjen e Uashingtonit, të nënshkruar në Shtëpinë e Bardhë në shtator të vitit 2020, për të cilën thonë se vetëm një pjesë e vogël e saj u zbatua.
Sipas këtij studimi, “veprime të tilla të pakoordinuara nga administrata Trump shërbyen si një thirrje zgjimi për BE-në dhe e ndihmuan atë të ringjallë rolin e saj ndërmjetësues në dialogun Kosovë – Serbi”,
Më tej, Niq dhe Seebass, thonë se në rast të një fitoreje të Trumpit, angazhimi i Uashingtonit në një nivel të lartë do të ishte “shumë më selektiv dhe transaksional, gjë që do t’i konvenonte liderëve joliberalë të Ballkanit”.
“Brenda rajonit, do të forconte pozitat dominuese rajonale të Serbisë dhe Shqipërisë në kurriz të fqinjëve të tyre më të vegjël si Mali i Zi dhe Kosova, duke rritur rreziqet e sigurisë dhe tensionet rajonale. Një rrezik edhe më i madh për sigurinë e Ballkanit do të vinte nga gërryerja e besueshmërisë së NATO-s dhe kërcënimi i tërheqjes së trupave amerikane nga KFOR-i. Kjo jo vetëm që do të dobësonte marrëdhëniet transatlantike, por gjithashtu do të sfidonte rrënjësisht strategjinë e BE-së për përdorimin e fondeve të reja dhe kushtëzimit për të integruar gradualisht shtetet e Ballkanit Perëndimor”.
Ndërsa, për sa i përket mundësisë që kandidatja demokrate, Kamala Harris, të vinte në krye të Shtëpisë së Bardhë, autorët e analizës thonë se në këtë situatë, Uashingtoni do të ishte më pak tolerant ndaj qasjes së vazhdueshme balancuese të Beogradit me Rusinë e Kinën, teksa do ta rriste presionin mbi të gjitha vendet e Ballkanit për t’i reduktuar lidhjet ekonomike me Pekinin.
“Udhëtimi i fundit i drejtorit të CIA-s, William Burns në Bosnje dhe Hercegovinë, Serbi dhe Kosovë është një tregues i qartë se Uashingtoni po mban një sy të mprehtë në lëvizjet destabilizuese, siç është fushata secesioniste e Presidentit të Republikës Srpska, Milorad Dodik në Bosnje dhe Hercegovinë ose tentativa për kontrabandë me armë nga serbët vendas etnikë dhe grupet e krimit të organizuar në Kosovë që rezultoi me një shkëmbim zjarri vdekjeprurëse me forcat e policisë në Banjskë. Burns thuhet se dha gjithashtu një paralajmërim të ashpër kundër lëvizjeve të njëanshme të qeverisë së Albin Kurtit të Kosovës që mund të përshkallëzojnë tensionet me komunitetet etnike serbe në veri të Kosovës”.
“Kjo strategji e balancimit diplomatik dhe kontrolleve të sigurisë në Ballkanin Perëndimor mund të vazhdojë nëse demokratët mbajnë Shtëpinë e Bardhë, por rajoni me siguri do të ketë më pak vëmendje politike në nivelet e larta. Kjo mund të varet nga këshilltari afatgjatë i Harris për sigurinë kombëtare, Philip Gordon, i cili ka ekspertizë të gjerë në politikën evropiane. Bazuar në punën e tij të mëparshme, Gordon ndoshta do të kërkonte të vendoste një qasje të kujdesshme ndaj rajonit”, thuhet në analizë, transmeton Klankosova.tv.
Autorët më tej thonë se në parim, administrata Harris do t’ia delegonte çështjen e Ballkanit Perëndimor Departamentit të Shtetit, ku në krye për rajonin është Zëvendës Ndihmës Sekretari për Evropës, Alexander Kasanof, i cili aktivitetet e tij i koordinon me aleatët kryesorë evropianë nërpëmjet Quint-it, njofton Klankosova.tv.
Niq dhe Seebass vlerësojnë gjithashtu se periudha e kalimit në administratën e re amerikane dhe Komisionin e ri Evropian i ofron Gjermanisë mundësi të mirë për të dërguar sinjal të fortë mbështetjeje për Ballkanin Perëndimor në mënyra të ndryshme.
Ndër mënyrat që vjen si propzim nga dyshja janë ndërtimi i shtyllës evropiane të NATO-s dhe forcimi i misioneve të saj në rajon, ruajtja e aspiratës politike për zgjerimin e BE-së, ndërtimi mbi arritjet brenda Procesit të Berlinit, krijimi i një ure ndërmjet Tregut të Përbashkët Rajonal të Ballkani Perëndimor dhe Tregu i Vetëm i BE-së, në kërkim të mënyrave dhe formateve të reja për koordinim më të ngushtë me Britaninë e Madhe, e cila ka kërkuar të forcojë rolin në rajon që nga kthimi i laburistëve në pushtet.
Paraditen e sotme pritet të fillojë takimi i shumëpritur i Ministrave të Mbrojtjes së aleancës Veriatlantike, NATO, në selinë e saj në Bruksel të Belgjikës.
Dyert për përfaqësuesit e mbrojtjes të 32-shteteve anëtare do t’i hapë i zoti i ri i shtëpisë së NATO-së, Mark Rutte, duke filluar nga ora 09:00 deri në 09:15.
Pas hapjes së këtij takimi nga Rutte, nga ora 09:15 pritet që të vijnë ministrat e Mbrojtjes, përfshirë edhe atë të Shqipërisë, Pirro Vengu.
Të pranishëm me ministrat e Mbrotjes do të jenë edhe nga vendet partnere të NATO-s, përfshirë ministrat e Ukrainës, Australisë, Zelandës së Re dhe Koresë së Jugut.
Agjendës së Rutte këtë ditë pritet t’i bashkohet edhe Sekretari amerikan i Mbrojtjes, Lloyd Austin.
Sesioni i parë i takimit të Ministrave të Mbrojtjes do të fillojë nga ora 15:00, pritet të mbarojë diku rreth orës 17:30.
Në fund të ditës së parë të takimit, i cili do të zgjasë edhe nesër, Sekretari i Përgjithshëm i NATO-s, do të mbajë në konferencë për dhënë detaje për temat e diskutuara.
Dje në një konferencë për media para takimit është folur në vija të trasha për agjendën e sotme, sekretari i Përgjithshëm i NATO-s, Mark Rutte, ka deklaruar se KFOR-i është në Kosovë dhe do të vazhdojë të qëndrojë aty.
Kështu tha shefi i NATO-s mbi zhvillimet e fundit në Kosovë por edhe për ndikimin e Rusisë në Ballkanin Perëndimor.
“Forcat e KFOR-it janë aty dhe aty do të qëndrojnë. Le të mos tregohemi naivë, Rusia është siç e dimë ne dhe mund ta shohim, dhe ju mund ta shihni, se po kërkon të minojë demokracitë në rajon që ne e dimë me të vërtetë. Kemi kërcënime kibernetike dhe hibride, janë absolutisht aty, dhe ju përballeni me ta dhe dezinformimi është aty. E dimë se ata përpiqen të përdorin dobësitë e brendshme për të nxitur përçarje dhe kështu ta bëjmë më të vështirë, për shembull për Prishtinën dhe Beogradin për të arritur një lloj diskutimi dhe për të gjitha pjesët e rajonit për t’u siguruar se ata i parandalojnë lëvizje secesioniste të avancojnë”.
“Kjo është ajo që Rusia po bën gjithmonë, duke u përpjekur të krijojë vështirësi dhe ajo që ne duhet të bëjmë është të qëndrojmë të qetë dhe të përqendruar dhe KFOR-i po e bën këtë, NATO po e bën këtë. E di që partnerët tanë në Ballkanin Perëndimor po e bëjnë këtë”, ka thënë Rutte në një konferencë për media.
Ai përmendi edhe takimin e Procesit të Berlinit këtë javë në Berlin, teksa tha se kjo është dëshmi se “po ata (rusët) po tentojnë të interferojnë në Ballkanin Perëndimor, por ne nuk do të lejojmë të shpërqendrohemi, do të qëndrojmë të përqendruar në këtë”.
Pos kësaj, Rutte ka thënë se pjesë e takimit do të jetë edhe diskutimi i situatës në Ballkanin Perëndimor, lufta në Ukrainë dhe problemet me sigurinë globale.
Tre të plagosur është bilanci i të shtënave me armë zjarri që tronditën qytetin belg të Antwerp, pasditen e kësaj të mërkure.
Ngjarja u regjistrua në një apartament në lagjen Jesus, në zemër të qytetit belg, pranë urë Kipdorp & Sint-Jacobsmarkt.
Mësohet se protagonist ka qenë një grup shqiptarësh, ku tre prej tyre kanë mbetur të plagosur.
Policia belge ka arrestuar 4 persona që akuzohen për ngjarjen, ndër të cilët 3 ishin shqiptarët e plagosur. Të gjithë të ndaluarit janë të moshës 23 deri në 38 vjeç, por ende nuk janë publikuar identitetet e tyre të plota.
Wouter Bruyns, zëdhënës i policisë lokale konfirmoni se katër të dyshuar janë arrestuar. “Tre prej tyre janë të plagosur, dy prej të cilëve janë në rrezik për jetën”, tha ai për mediat vendase.
Rrethanat e të shtënave janë ende të paqarta, por sipas dëshmitarit Leno, i cili drejton një dyqan tatuazhesh, papritmas u dëgjuan tre të shtëna në një nga apartamentet sipër, raporton A2.
“Doja të dilja jashtë kur një burrë hyri papritur në biznesin tim dhe bërtiti: ‘Telefononi ambulancën’. Në korridor kishte gjurmë gjaku. Shërbimet e urgjencës mbërritën shumë shpejt dhe gjetën një të plagosur në një banesë. Njësia e zjarrfikësve u thirr për ta nxjerrë burrin nga banesa me një ashensor me shkallë”, tha dëshmitari.
Pak më vonë, shërbimet e urgjencës morën një telefonatë nga parkimi i makinave Meir/Opera në Sint-Jacobsmarkt. Pranë një automjeti ndodheshin dy persona të plagosur me armë zjarri, të cilët ndodhen në gjendje të rëndë aktualisht.
Policia ka mundur të arrestojë një person të katërt që ndodhej pranë parkingut ku u gjetën të plagosurit, por që vetë nuk kishte pësuar lëndime.
Ndërtesa në rrugën Jesus ku ka ndodhur ngjarja njihet si rezidencë për evropianolindorët, kryesisht shqiptarë dhe bullgarë. Pak vite më parë, në rrugën Jesus u kap një bandë shqiptare droge që furnizonte qendrën e qytetit me kokainë.
Avokati i familjes së Faton Hajrizit, Gent Gjini, do të dorëzojë padi dhe kallëzime penale ndaj kryeministrit Albin Kurti, zëvendësit të tij, Besnik Bislimi dhe ministres së Drejtësisë, Albulena Haxhiu.
Këtë, avokati Gjini pritet ta bëjë sot në ora 13:30. Ai tha se fjala “kriminel” ishte arsyeja kryesore se pse do të bëhet kjo padi.
I pranishëm aty do të jetë edhe vëllai i Fatonit, Artan Hajrizi.
Faton Hajrizi, u vra më 19 korrik në Lloznicë të Serbisë.
Kryeministri i Kosovës, Albin Kurti, në 25-vjetorin e Qendrës Kosovare për Rehabilitimin e të Mbijetuarave të Torturës (QKRMT) tha se përkundër traumave të pashlyeshme, të mbijetuarat e dhunës seksuale kanë treguar forcë të jashtëzakonshme për të ndërtuar një jetë të re, raporton Ekonomia Online.
Kurti u shpreh se kanë filluar me procesin e dokumentimit të krimeve të kryera gjatë luftës në Kosovë.
“Përveç ofrimit të përkrahjes ndaj të mbijetuarave të dhunës seksuale gjatë luftës, organizatat e grave kanë kontribuar edhe në hartimin e politikave që avancojnë drejtësi tradicionale e që reflektojnë realitetin dhe nevojat e të mbijetuarave. Përkundër traumave të pashlyeshme, të mbijetuarat e dhunës seksuale gjatë luftës, kanë treguar forca të jashtëzakonshme për të ndërtuar një jetë të re. Prandaj krahas mbështetjes së përhershme dhe të thellë, e kemi edhe një dhimbje për to”.
“Teksa punojmë për përballje me të kaluarën, me përkushtimin tonë të përbashkët për të luftuar padrejtësitë dhe për të ndërtuar një shoqëri më të drejtë dhe më të ndjeshme. Me këtë qëllim kemi themeluar për herë të parë pas luftës, Strategjinë për Drejtësi Tradicionale. Kemi filluar me procesin e dokumentimit të krimeve të kryera gjatë luftës në Kosovë”.
Osmani: Historia nuk mbyllet pa dalë para drejtësisë autorët e dhunimeve seksuale gjatë luftës
Presidentja e Kosovës, Vjosa Osmani, ka thënë se shteti serb gjatë luftës në Kosovës, ka përdorur si mjet të fortë dhunën seksuale.
Në 25-vjetorin e Qendrës Kosovare për Rehabilitimin e të Mbijetuarve të Torturës (QKRMT), Osmani i ka quajtur heroina dhe vetë nderi i Kosovës të mbijetuarat e dhunës seksuale gjatë luftës.
“Për gjatë 25 viteve, KRTC ka bërë një gjë që vështirë të përshkruhet me një fjalim. U siguruan që mund të flasin para popullit të Kosovës por edhe para botës dhe mund të vazhdojë luftën për drejtësi. Dua të iu siguroj që mbështetja për juve nuk do të ndalet por do të vazhdojë dhe ne do të luftojmë për këtë kauzë”.
“Për gjatë këtyre, ne vazhdimisht e kemi kujtuar dhimbjen e së kaluarës, e mbi të gjitha ka një vendosmëri për të kërkuar drejtësi. Dhuna seksuale u përdor edhe si mjet nga udhëheqësi gjenocidial i Millosheviqit, në mënyrë që të vuajnë edhe gjeneratat pasuese. Historia dëshmoi një qendresë të popullit tonë, dhe kjo u dëshmua nga të mbijetuarat e dhunës seksuale për të treguar të vërtetën”, u shpreh ajo.
Tutje, presidentja Osmani potencoi se historia nuk mbyllet pa dalë para drejtësisë autorët e krimit.
“Edhe sot me praninë tuaj po e dëshmoni që historia të mos përsëritet, padrejtësitë nuk duhet të kalojë në heshtje dhe historia nuk mbyllet pa dalë para drejtësisë autorët e krimit. Jam e lumtur që Kosova për këto vite ka krijuar mekanizma që secila e mbijetuar ta ndjejë ndihmën e shtetit. Unë jam krenare për punën që po bën Vasfija”, ka thënë ajo.