Tag: Ballina

Zyra Kombëtare e Auditimit (ZKA) ka identifikuar një sërë mangësish dhe shkeljesh në Ministrinë e Bujqësisë, Pylltarisë dhe Zhvillimit Rural gjatë auditimit të pajtueshmërisë për vitin 2025.

Sipas raportit të auditimit, ministria nuk kishte hartuar dhe miratuar Programin Vjetor për Grante për vitin 2025, ndonëse kjo kërkohet me legjislacionin në fuqi.

Auditorët vlerësojnë se mungesa e programit rrit rrezikun e shpërndarjes joefikase dhe jotransparente të fondeve publike, si dhe krijon pasiguri për fermerët dhe përfituesit potencialë të mbështetjes financiare, raporton Indeksonline..

“Mungesa e programit vjetor për grante rrit rrezikun e shpërndarjes joefikase dhe jo transparente të fondeve publike, ndikon në përkrahjen e fermerëve dhe zhvillimin e sektorit bujqësor, krijon pasiguri për përfituesit potencialë dhe vonesa në implementimin e masave mbështetëse. Po ashtu, cenon përputhshmërinë me kërkesat ligjore dhe dobëson llogaridhënien institucionale”, thuhet në Raportin e Auditimit.

Raporti evidenton gjithashtu mangësi në publikimin e listave të përfituesve të pagesave direkte dhe granteve nga Agjencia për Zhvillimin e Bujqësisë (AZHB). Sipas gjetjeve, nuk janë publikuar disa lista të përfituesve, ndërsa në lista të tjera mungonin emrat e disa përfituesve, duke cenuar transparencën dhe llogaridhënien në shpenzimin e mjeteve buxhetore.

“Ministria çdo vit publikon listën e përfituesve që përfshin, masën, shumën dhe informatat tjera relevante për përfituesit” me qëllim të sigurimit të transparencës dhe informimit publik. Gjatë auditimit kemi evidentuar mangësi në publikimin e listave të përfituesve si në vijim: Nuk ishin publikuar listat e përfituesve juridikë për pagesat direkte për vitin 2025 si dhe lista e përfituesve të granteve të Programit për Zhvillim Rural (PZhR) 2024 për Masën 3.5 – Prodhimi i verërave. Listat tjera të përfituesve të granteve të PZHR-së të vitit 2024 ishin publikuar në mënyrë jo të plotë, pasi mungonin disa përfitues në listat e publikuara, evidentuar nga tetë raste ku përfituesit nuk ishin përfshirë në listat e publikuara. Po ashtu, sa i përket listave që nuk ishin publikuar fare, kjo u evidentua nga 21 raste apo pagesa të ekzekutuara”, thuhet në raport.

Në raport po ashtu thuhet se mosspublikimi dhe publikimi jo i plotë i listave të përfituesve ul nivelin e transparencës dhe besueshmërisë së publikut, kufizon qasjen e publikut në informata lidhur me shpenzimin e mjeteve buxhetore, si dhe cenon përputhshmërinë me kërkesat ligjore dhe parimet e llogaridhënies.

“Ministri në kordinim me Agjencinë për Zhvillimin e Bujqësisë (AZHB) duhet të sigurojë publikimin me kohë, të plotë dhe të azhurnuar të listave të përfituesve, për pagesat direkte dhe grantet, duke vendosur procedura të qarta, kontrolle efektive dhe mekanizma monitorues për garantimin e transparencës, llogaridhënies dhe publikimit në kohë reale të të dhënave në ueb-faqen zyrtare të AZHB-së”, thuhet në raport.

Auditori ka gjetur dhe vonesa në realizimin e pagesave për përfituesit e granteve nga Programi i Zhvillimit Rural, pavarësisht se vendimet për mbështetje financiare parashohin që shumat e aprovuara të transferohen në llogaritë e përfituesve brenda 30 ditëve.

Sipas raportit, në gjashtë raste të identifikuara, pagesat janë ekzekutuar me vonesa që variojnë nga 2 deri në 84 ditë pas afatit të përcaktuar.

Rasti me vonesën më të madhe është regjistruar në kuadër të Masës 1 – Investimet në asetet fizike të ekonomive bujqësore, sektori 1.5 (Prodhimi i mishit/rritja e viçit). Vendimi ishte lëshuar më 6 nëntor 2024, ndërsa pagesa prej 31,552 eurosh është realizuar më 28 shkurt 2025, me një vonesë prej 84 ditësh.

Po ashtu, në kuadër të Masës 7 – Diversifikimi i fermave dhe zhvillimi i bizneseve, sektori 7.5 (Aktivitetet jo-bujqësore në zonat rurale), një pagesë prej 35,000 eurosh është realizuar më 15 maj 2025, 63 ditë pas afatit të paraparë me vendimin e datës 13 shkurt 2025.

Auditori ka evidentuar edhe raste të tjera me vonesa më të vogla. Një grant prej 142,717 eurosh në kuadër të Masës 3 për përpunimin e pemëve dhe perimeve është paguar me 15 ditë vonesë, ndërsa pagesat prej 99,475 euro, 98,810 euro dhe 99,681 euro janë realizuar me vonesa prej 4, 3 dhe 2 ditësh respektivisht.

Sipas gjetjeve të auditorit, vonesat në ekzekutimin e pagesave pas afatit të përcaktuar janë rezultat i mungesës së një sistemi efektiv të kontrollit në menaxhimin e pagesave, duke ndikuar në respektimin e afateve të parapara për përfituesit e granteve.

Ushtruesja e detyrës së presidentes Albulena Haxhiu ka deklaruar se po presin certifikimin e rezultateve të zgjedhjeve të 7 qershorit për të filluar takimet me partitë politike për çështjen e presidentit.

“Le të presim njëherë që të ndodhë certifikimi i rezultateve dhe pastaj pas certifikimit të rezultateve natyrisht që do të ketë takime me partitë politike dhe urojmë që ta gjejmë një konsensus në mënyrë që ta votojë Kuvendi i Republikës së Kosovës me mandat pesë vjeçar dhe të vazhdojnë punët dhe përgjegjësitë që i kemi para qytetarëve”, ka thënë ajo.

“Le ta konstituojmë Kuvendin, le ta zgjedhim Qeverinë dhe menjëherë pra, pas konstituimit të Kuvendit, kryetari i ri i Kuvendit ose kryetarja kushdo që të jetë ai apo ajo do të ketë të drejtën kushtetuese ta mandatojë kandidatin për kryeministër të vendit.

Ndërsa, e pyetur se a do të jetë kandidate për presidente, Haxhiu është përgjigjur shkurt.

“Jo nuk do të jem kandidate për presidente”, ka thënë shkurt Haxhiu.

Kurse, sa i përket raportimeve të mediave që Kosova nuk është ftuar në Samitin e NATO-s, Haxhiu ka dhënë këtë përgjigje.

“Ende jemi duke marrë informacione për këtë, natyrisht ju lutem që të pyesni me shkrim institucionet kompetente dhe do të përgjigjen”, ka shtuar ajo.

Korporata Energjetike e Kosovës (KEK) ka njoftuar dhënien e kontratës për realizimin e punëve që kanë të bëjnë me demontimin, furnizimin, montimin, lëshimin në punë dhe komisionimin e sistemit të monitorimit të vibrimeve, zgjatjeve diferenciale, zhvendosjeve aksiale dhe zhvendosjes absolute në Bllokun B1 dhe B2 të Termocentralit Kosova B.

Sipas njoftimit zyrtar, vlera e përgjithshme e kontratës është 265,712.40 euro, ndërsa në procesin e tenderimit kanë marrë pjesë tre operatorë ekonomikë.

Kontrata i është dhënë grupit të operatorëve ekonomikë Bionics Sh.P.K. dhe TURBOCOM d.o.o., me adresë në Prishtinë.

Data e dhënies së kontratës është 17 qershor 2026, ndërsa nënshkrimi i saj është planifikuar për 24 qershor 2026.

Sipas dokumentit, kontrata nuk parashihet të nënkontraktohet.

Projekti synon avancimin e sistemit të monitorimit dhe kontrollit të pajisjeve në njësitë prodhuese të Termocentralit Kosova B, duke kontribuar në rritjen e sigurisë dhe efikasitetit operacional të tyre.

Njoftimi është publikuar nga KEK në përputhje me dispozitat e Ligjit për Prokurimin Publik të Republikës së Kosovës.

Ministria e Industrisë, Ndërmarrësisë, Tregtisë dhe Inovacionit ka publikuar çmimoren e re për derivatet, e cila vlen për ditën e sotme.

Sipas njoftimit të ministrisë, çmimi maksimal i lejuar i naftës është 1.36 euro për litër, një cent më lirë se një ditë më parë.

Ndërsa benzina do të tregtohet deri në 1.35 euro për litër, një cent më shtrenjtë se dje.

Ndërkaq, çmimi maksimal i gazit është caktuar i njëjtë sikur ditën paraprake, për 0.67 euro për litër.

Nënkryetari i Lidhjes Demokratike të Kosovës, Lutfi Haziri, ka dalë me një sqarim publik lidhur me interesimin e opinionit për qëndrimet e partisë rreth zhvillimeve politike dhe procesit paszgjedhor.

Haziri ka theksuar se qëndrimi i LDK-së mbetet i pandryshuar sa i përket nominimit për president.

“Asgjë s’ka ndryshu. Nominimi për presidente i Vjosa Osmani mbetet i vetmi emër nga radhët e LDK-së”, ka deklaruar Haziri.

Ai shtoi se në kuadër të debatit paszgjedhor ka paraqitur vetëm parime gjithëpërfshirëse dhe modalitete për bashkëpunim të mundshëm politik, me qëllim të krijimit të stabilitetit institucional.

“Në kuadër të debatit paszgjedhor, në emër të LDK-së kam paraqitur parimet gjithëpërfshirëse dhe modalitetet për bashkëpunim të mundshëm, për krijimin e stabilitetit politik dhe institucional”, ka thënë ai.

Haziri ka potencuar gjithashtu se kryetari i partisë mbetet adresa kryesore për proceset e ardhshme politike.

“Kryetari Lumir Abdixhiku mbetet adresa e vetme për zhvillimin e proceseve politike në të ardhmen e afërt”, ka deklaruar ai.

Në fund, Haziri ka theksuar se çdo kërkesë politike do të trajtohet brenda strukturave të partisë, duke shtuar se demokracia nënkupton liri dhe pavarësi të Republikës.

“Kauza ‘një parti, një shtet’ është kauzë e humbur. Askush mbi Republikën!”, ka thënë Haziri.

Sqarimi i tij vjen pas një deklratate të dhënë në REL, ku Haziri theksoi se LDK po kërkon postin e presidentit në kuadër të negociatave politike, ku si emra të mundshëm ka përmendur kryetarin e partisë Lumir Abdixhiku dhe vetën.

“Në rast se ky emër është Lumiri Abdixhiku, kryetar i partisë ose emri im, atëherë mund të unifikohemi. Lumirit i bie të jetë i pari, sipas detyrës zyrtare, sepse është kryetar. Pas Lumirit, konsensus më të madh brenda LDK-së kam unë”, theksoi Haziri më herët.

Në zgjedhjet e 7 qershorit, LDK-ja garoi me emrat e Vjosa Osmanit si kandidate për presidente dhe të Lumir Abdixhikut si kandidat për kryeministër. Kjo parti siguroi 18 ulëse në Kuvendin e Kosovës.

Presidenti amerikan, Donald Trump, ka vendosur të zgjasë edhe për një vit gjendjen e jashtëzakonshme që lidhet me Ballkanin Perëndimor, një masë që përfshin edhe Kosovën.

Vendimi është bërë publik përmes një dokumenti të Regjistrit Federal të ShBA-së, i cili i është përcjellë Senatit dhe mban datën 22 qershor 2026.

Në dokument thuhet se gjendja e jashtëzakonshme vazhdon për shkak të, siç thuhet, kërcënimeve të vazhdueshme ndaj stabilitetit të rajonit. Sipas autoriteteve amerikane, individë dhe grupe të caktuara vazhdojnë të sfidojnë sovranitetin dhe integritetin territorial të vendeve të Ballkanit Perëndimor, të minojnë marrëveshjet dhe institucionet e krijuara pas luftërave, si dhe të përfshihen në raste të rënda korrupsioni që dëmtojnë sundimin e ligjit.

“Për këtë arsye, gjendja e jashtëzakonshme kombëtare e shpallur me Urdhrin Ekzekutiv 13219, në kuadër të së cilës u ndërmorën hapa shtesë me Urdhrin Ekzekutiv 13304, e cila u zgjerua në fushëveprim me Urdhrin Ekzekutiv 14033 dhe në kuadër të së cilës u ndërmorën hapa të tjerë shtesë me Urdhrin Ekzekutiv 14140, duhet të vazhdojë të mbetet në fuqi edhe pas 26 qershorit 2026”, thuhet në dokument.

Kjo masë, e cila rinovohet çdo vit nga administrata amerikane, u mundëson autoriteteve të ShBA-së të vendosin sanksione ndaj personave dhe grupeve që konsiderohen se rrezikojnë paqen, stabilitetin dhe proceset demokratike në Ballkanin Perëndimor.

Qeveria në detyrë e Republikës së Kosovës ka zhvilluar sot mbledhje të rregullt, në të cilën ka:

-Miratuar vendimin për qiradhënie për sipërfaqen prej 99715 metër katrorë nga sipërfaqja e përgjithshme prej 1685079 metër katrorë, sipas kërkesës së Agjencisë Pyjore të Kosovës/Ministria e Bujqësisë, Pylltarisë dhe Zhvillimit Rural, në kohëzgjatje prej 15 vite për nxjerrjen dhe shfrytëzimin e gurit gëlqeror, Zona Kadastrale, Seqisht, Komuna Hani i Elezit.

-Miratuar vendimin për rialokimin e mjeteve buxhetore në shumë prej: 1,150,000.00 €, Ministrinë e Infrastrukturës dhe Transportit nën programi Projektet e Bashkëfinancimit me Kuvendet Komunale, nga kategoria e shpenzimeve kapitale konkretisht nga projekti kapital “Programi i Bashkëfinancimit me Kuvendet Komunale”, në 4 (katër), projekte kapitale të reja në përputhje me memorandumet e mirëkuptimit për projekte kapitale të nënshkruara nga Ministri i Infrastrukturës dhe Transportit dhe Kryetarët e Komunave përkatëse.

*Miratuar vendimin për rialokimin e mjeteve buxhetore në shumën prej 1,050,000.00 €, në Ministrinë e Administrimit të Pushtetit Lokal, nën programi Administrata Qendrore, kategoria e shpenzimeve kapitale konkretisht nga projekti kapital “Programi komunal për zhvillim të infrastrukturës socio-ekonomike dhe bashkëpunim ndër-komunal”, në 4 (katër) projekte kapitale në përputhje me 4 (katër) marrëveshjet për mbështetje financiare për projektet kapitale të nënshkruara nga Ministri i MAPL-së dhe Kryetarët e Komunave përkatëse.

-Miratuar vendimin për ndalimin e ekzekutimit të Rregullores për pranimin dhe trajtimin e thirrjeve telefonike në sistemin e caktimit të avokatëve, sipas detyrës zyrtare (Ex-Officio) të Odës së Avokatëve të Kosovës, deri në vendimin përfundimtar të gjykatës kompetente.

-Miratuar vendimin për ndalimin e ekzekutimit të aktit administrativ mbi lartësinë e shpenzimeve për regjistrim, të Odës së Avokatëve të Kosovës, deri në vendimin përfundimtar të gjykatës kompetente.

-Miratuar vendimin për emërimin e Komisionit për Kompensimin e Viktimave të Krimit.

-Miratuar vendimin për rialokimin e mjeteve buxhetore në shumë prej 350,000.00 € (treqind e pesëdhjetë mijë euro), në Ministrinë e Zhvillimit Rajonal, nën programi Administrata Qendrore, nga kategoria e investimeve kapitale, konkretisht nga projekti “Programi për Zhvillim Rajonal”, në tetë (8) projekte të investimit kapital në pajtim me Marrëveshjet e Mirëkuptimit për bashkëfinancim të projekteve të nënshkruara nga Ministri i Zhvillimit Rajonal dhe Kryetarët e Komunave.

-Miratuar vendimin për shqyrtimin e mëtejmë të kërkesës për shpronësim për interes publik të pronave të paluajtshme të pronarëve dhe zotëruesve të interesit të cilat preken nga realizimi i projektit: Sanimi i Rrëshqitzës në rrugën: Hani i Elezit-Gorancë, Zona Kdadastrale: Rezhancë, Komuna e Hanit të Elezit.

-Miratuar vendimin për shqyrtimin e mëtejmë të kërkesës për shpronësim për interes publik të pronave të paluajtshme të pronarëve dhe zotëruesve të interesit të cilat preken nga realizimi i projektit: Rehabilitimi i rrugës Rajonale R112, segmenti: Gjonaj-Bishtazhin, Zona Kadastrale: Gjonaj, Komuna e Prizrenit.

-Miratuar Kërkesën e Ministrisë së Drejtësisë për ndarjen e mjeteve buxhetore në shumën prej 200,000.00 € (dyqind mijë euro), për financimin e furnizimit dhe instalimit të një gjeneratori të ri në Burgun e Sigurisë së Lartë.

-Miratuar Kërkesën e Agjencisë Kosovare të Privatizimit për kthimin e fondeve në shumën prej 12,513.00 € (dymbëdhjetë mijë e pesëqind e trembëdhjetë euro), të transferuara në Buxhetin e Republikës së Kosovës, për Ndërmarrjen Shoqërore “Komogllava”.

-Miratuar Nismën për lidhjen e Marrëveshjes së Grantit ndërmjet Republikës së Kosovës, e përfaqësuar nga Ministria e Financave, dhe Asociacionit Ndërkombëtar për Zhvillim, për KOMPAS – Projekti i Qasjes Gjithëpërfshirëse të Kosovës për Forcimin e Sistemit Shëndetësor.

-Emëruar Bordin e Përkohshëm të Drejtorëve të Ndërmarrjes Publike Qendrore ”lnfrakos” Sh.A., në këtë përbërje:

1. Getuar Zogu, kryesues;

2. Detrina Alishani Sopi, anëtare;

3. Fjolla Gashi, anëtare;

4. Genc Hundozi, anëtar.

-Aprovohet ndarja e mjeteve buxhetore në shumë prej 44,004.22 € (dyzet e katër mijë e katër euro e njëzet e dy centë) për Komunën e Shtimes, për përfundimin e projektit ‘Impianti për trajtimin e ujërave të zeza, Shtime, përmes Klauzolës së Investimeve.

-Ndarë mjete buxhetore në shumën prej 3,000,000.00 € (tre milionë euro) për zbatimin e Masës 4.5 “Mbështetja e Mërgatës” të Pakos së Ringjalljes Ekonomike.

Ministria e Industrisë, Ndërmarrësisë, Tregtisë dhe Inovacionit ka gjobitur edhe me 25 mijë euro KEDS-in për shkak se janë hasur edhe pesë njehsorë të rrymës, me afat të skaduar të verifikimit.

Pas ankesave të paraqitura nga konsumatorët për mospërputhje të orës te njehsorët elektrikë, më 31 mars të këtij viti është themeluar një komision nga MINT-i, ndërsa më 1 prill ka nisur verifikimi i njehsorëve. Gjoba e parë ndaj KEDS-it është shqiptuar më 14 prill në vlerë prej 6 mijë eurosh, ndërsa shuma totale nga gjithsej gjashtë gjoba të shqiptuara deri më tash qe 311 mijë euro, pa 25 mijë eurot për të cilat është njoftuar sot.

Zyra e Rregullatorit për Energji pati paralajmëruar se konsumatorët që vërtetohet se janë dëmtuar nga devijimi i orës “do të kompensohen plotësisht”. ZRRE-ja pati njoftuar se për të përfituar kompensim, qytetarët duhet fillimisht të paraqesin ankesë në MINT, pastaj te KEDS-i e në rast se nuk pajtohen me përgjigjen e tyre, atëherë ankesën mund ta bëjnë edhe te ZRRE-ja.

Në fillim të qershorit, KESCO nuk pati treguar se kur do të nisë procesi i kompensimit.

Në një lidhje live për Euronews Albania me Thimi Samaraxhiun, komandanti Hysni Gucati dha më shumë detaje sa i përket debatit lidhur me Dritan Goxhajn dhe dokumentet e publikuara nga Kryeministri Rama, nëse ato janë autentike dhe cili ka qenë roli i Dritan Goxhajt si anëtar i luftëtarëve të UÇK-së.

Sipas tij, dokumenti i publikuar nga Kryeministri Rama përsa i përket firmës është origjinale dhe i përket komandant Plakut, teksa thekson se Dritan Goxhaj nuk është anëtar i Organizatës së Veteranëve të Luftës.

“Po, duke njohur firmën e komandant Plakut, se komandant Plakun e ka njohur personalisht edhe komanda, por edhe familjen e tij e njoh personalisht dhe firma është e komandant Plakut, është origjinale. E Xheladin Gashit është origjinale firma.

Firma është origjinale, përmbajtjen e letrës e kam lexuar, e kam parë, por firma është origjinale e komandant Plakut, i cili e ka nënshkruar në atë kohë në territorin apo në tokën e Shqipërisë. Unë Dritan Goxhajn e kam njohur vonë. Unë babanë e tij e kam njohur më herët.

Dritan Goxhaj është mirë të dalë e të deklarojë se në cilën zonë operative ka qenë në luftë, në cilën brigadë ka qenë në luftë dhe çfarë ka vepruar në territorin e Kosovës apo të Shqipërisë që ka punuar për Ushtrinë Çlirimtare të Kosovës. Unë e njoh në respekt për këtë kështu, por për Dritan Goxhajn vetëm një gjë garantoj apo mund t’ju flas 100%, Dritan Goxhaj nuk është anëtar i Organizatës së Veteranëve të Luftës. Kjo është e vërtetë.

Tani, nuk ka dokumentacion, nuk ka certifikatë të veteranit, nuk ka letërnjoftim tek ne, nuk ka aplikacion të mundshëm dhe nuk ka kartelë të veteranit. Kjo është e vërtetë 1 milion për qind. Për këtë që flas, jap llogari unë, jap llogari para Zotit dhe para njeriut”, u shpreh ai.

Lidhja e Bizneseve të Kosovës ka vlerësuar se sigurimi i qasjes në gazin e lëngshëm natyror – amerikan (LNG) dhe zhvillimi i infrastrukturës së nevojshme për të duhet të trajtohen si prioritete strategjike për zhvillimin ekonomik dhe sigurinë energjetike të vendit.

Sipas një njoftimi për media thuhet se Kosova vazhdon të mbështetet kryesisht në termocentrale të stërvjetruara me linjit dhe import të energjisë, derisa bizneset dhe ekonomia përballen me pasiguri të vazhdueshme në furnizim dhe me kosto të larta.

“Në një kohë kur vendet e rajonit po investojnë në linja të reja të gazit dhe po sigurojnë qasje në burime më të ndryshme energjetike, Kosova rrezikon të mbetet jashtë zhvillimeve që do të përcaktojnë konkurrueshmërinë ekonomike në vitet në vazhdim”, thuhet në njoftim.

Po ashtu në njoftim thuhet se për komunitetin e biznesit, çështja e energjisë nuk është më vetëm çështje furnizimi, por çështje mbijetese dhe konkurrence.

“Ndikimin e kostove të energjisë te bizneset vendore e kemi parë pas daljes së qindra ndërmarrjeve në tregun e lirë të energjisë. Disa prej tyre tashmë po përballen me vështirësi serioze operimi, ndërsa ka biznese që po shqyrtojnë seriozisht zhvendosjen e fabrikave të tyre në vendet fqinje për shkak të pamundësisë për të përballuar kostot aktuale të energjisë”.

Po ashtu siç thuhet në njoftim: “Prandaj, qasja në gaz natyror do t’i jepte Kosovës një alternativë të rëndësishme për diversifikimin e burimeve energjetike, do të rriste sigurinë e furnizimit dhe do të krijonte kushte më të favorshme për zhvillimin e industrisë dhe prodhimit vendor. Njëkohësisht, investimet në këtë drejtim do të forconin edhe partneritetin strategjik të Kosovës me Shtetet e Bashkuara të Amerikës”.

Lidhja e Bizneseve të Kosovës i bën thirrje Qeverisë së Kosovës që të ndërmarrë hapa konkretë për integrimin e vendit në rrjetin rajonal të gazit natyror dhe të punojë seriozisht për përmirësimin e klimës së të bërit biznes.

Institucionet duhet të kenë parasysh se bizneset janë shtylla kryesore e ekonomisë dhe kontribuuesit më të mëdhenj në buxhetin e shtetit. Nëse kostot vazhdojnë të rriten, konkurrueshmëria bie, ekziston rreziku real që një pjesë e këtyre bizneseve të mos operojnë më në Kosovë. Prandaj, vendimet strategjike për energjinë nuk duhet të shtyhen. Ato janë vendime për të ardhmen ekonomike të vendit, për ruajtjen e vendeve të punës dhe për krijimin e kushteve që bizneset të investojnë e të rriten në Kosovë, e jo jashtë saj.