Tag: Ballina

Zyra Kombëtare e Auditimit (ZKA), ka publikuar raportin e auditimit për pasqyrat financiare vjetore të Organi Shqyrtues i Prokurimit (OSHP) për vitin 2025, ku janë identifikuar një sërë mangësish financiare dhe procedurale që kanë ndikuar në opinionin e auditimit dhe në përputhshmërinë me legjislacionin në fuqi.

Sipas raportit, auditori ka konstatuar mbivlerësime dhe nënvlerësime të të hyrave, si dhe mangësi në regjistrimin e pasurive dhe stoqeve.

” Konkretisht, janë evidentuar mbivlerësime të të hyrave prej 16,308 eurosh, nënvlerësime prej 4,864 eurosh, si dhe nënvlerësim i pasurive dhe stoqeve në vlerë totale prej mbi 2,700 euro.”, thuhet në raportin e ZKA-së.

Një nga gjetjet kryesore lidhet me tarifat e ankesave. ZKA ka konstatuar se në 13 raste pagesat e tarifave të ankesës ishin më të ulëta sesa niveli i përcaktuar me rregullore, duke bërë që të hyrat të nënvlerësohen për 4,864 euro. Sipas raportit, kjo ka ndodhur për shkak të mungesës së kontrolleve efektive dhe aplikimit të dispozitave të rregulloreve të shfuqizuara në disa raste.

Raporti evidenton gjithashtu mangësi në regjistrimin e pasurive. Dy pagesa për inventar dhe pajisje në vlerë prej 3 eurosh nuk ishin regjistruar në sistemin “e-Pasuria”, ndërsa materiale shpenzuese në vlerë prej 2,704 eurosh nuk figuronin në sistemin për evidentimin e hyrje-daljeve të stoqeve. Sipas auditorëve, kjo situatë ka ardhur si pasojë e mungesës së koordinimit ndërmjet zyrtarëve përgjegjës dhe problemeve teknike në sistem.

Në aspektin e përputhshmërisë ligjore, auditimi ka konstatuar se në 12 raste ekspertët shqyrtues kanë vonuar përgatitjen e raporteve nga 1 deri në 26 ditë përtej afateve të parapara ligjore. Auditori vlerëson se këto vonesa mund të ndikojnë në shtyrjen e realizimit të projekteve publike dhe të rrisin rrezikun e kontestimeve ligjore ndaj vendimeve të OSHP-së.

Po ashtu, në 54 raste janë evidentuar vonesa në nxjerrjen e vendimeve nga panelet shqyrtuese të OSHP-së. Sipas ZKA-së, vonesat bien ndesh me parimet e transparencës dhe llogaridhënies në prokurimin publik, ndikojnë negativisht në realizimin e projekteve publike dhe mund të shkaktojnë kosto shtesë ligjore.

Raporti thekson se auditimi ka rezultuar me tetë rekomandime, prej të cilave pesë janë të reja dhe tre të përsëritura nga vitet paraprake.

ZKA ka kërkuar nga drejtuesit e OSHP-së forcimin e kontrolleve të brendshme, respektimin e afateve ligjore në trajtimin e ankesave dhe përmirësimin e menaxhimit të pasurive dhe të hyrave.

Kryeministri në detyrë, Albin Kurti ka thënë se pas certifikimit të rezultateve do të nis komunikimet me partitë politike për formimin e institucioneve të Kosovës.

“Përbesë porsa të certifikohen rezultatet fillojmë komunikimet menjëherë”, tha shkurt Kurti para gazetarëve.

Në anën tjetër, nga Komisioni Qendror i Zgjedhjeve thanë të hënën për Gazetën Online Reporteri.net se do të presin 48 orë pas dy vendimeve të fundit të PZAP, ku u rrëzuan dy kërkesat e dy kandidatëve për deputet të PDK-së, dhe pastaj të bëhet shpallja e rezultateve përfundimtare dhe certifikimi i zgjedhjeve.

Sipas KQZ-së, pas plotfuqishmërisë së vendimeve do të vlerësohet nëse ato përmbajnë obligime konkrete për institucionin, para se të procedohet me shpalljen e rezultateve përfundimtare.

“Komisioni Qendror i Zgjedhjeve është në pritje të përfundimit të shqyrtimit të ankesave dhe vendimmarrjen e institucioneve përkatëse para se të procedojë me shpalljen e rezultateve përfundimtare të zgjedhjeve të parakohshme për Kuvendin e Kosovës. Mund t’iu konfirmoj se KQZ është njoftuar me vendimet e PZAP-it lidhur me 2 ankesat e paraqitura në këtë institucion. Ndaj këtyre vendimeve të PZAP-it, palët kanë të drejtë ankese brenda 48 orëve në Gjykatën Supreme, andaj KQZ do të presë që vendimet të marrin formën e prerë.

Pas plotëfuqishmërisë së vendimeve, mbetet të shihet nëse ato përmbajnë obligime konkrete për KQZ-në, për t’i zbatuar dhe pastaj për të proceduar me aktin e shpalljes së rezultateve përfundimtare”, tha të hënën zëdhënësi i KQZ-së, Valmir Elezi.

Kosova renditet e 55-ta në botë në kategorinë e militarizimit në Indeksin Global të Paqes, i cili mat nivelin e militarizimit përmes shtatë treguesve kryesorë, përfshirë shpenzimet ushtarake në raport me Bruto Prodhimin e Brendshëm (BPB), numrin e personelit ushtarak për 100 mijë banorë, si dhe importet dhe eksportet e armëve konvencionale.

Sipas këtij indeksi, Kosova ka grumbulluar gjithsej 1.696 pikë, duke u renditur menjëherë pas Marokut që mban vendin e 54-të. Në rajon, Mali i Zi renditet më lart se Kosova, në vendin e 53-të.

Bosnja dhe Hercegovina renditet dukshëm më lart në këtë kategori, në vendin e 20-të, ndërsa Serbia pozicionohet në vendin e 86-të dhe Shqipëria në vendin e 88-të.

Në krye të listës së vendeve me shkallën më të lartë të militarizimit janë Izraeli, Koreja e Veriut, Rusia, Shtetet e Bashkuara të Amerikës dhe Ukraina. Në anën tjetër, vendet me nivelin më të ulët të militarizimit përfshijnë Islandën, Malajzinë, Butanin, Moldavinë dhe Slloveninë.

Edhe pse sipërfaqja e përgjithshme e shfrytëzuar e tokës bujqësore në Kosovë u rrit me 510.9 hektarë gjatë vitit 2025, të dhënat e Anketës së Ekonomive Bujqësore tregojnë se 6,104 hektarë tokë vazhdojnë të mbeten djerrë.

Sipërfaqja e përgjithshme e shfrytëzuar e tokës bujqësore në Kosovë ka shënuar një rritje minimale gjatë vitit 2025, ndërsa mbi 6 mijë hektarë tokë vazhdojnë të mbeten djerrë.

Të dhënat e Anketës së Ekonomive Bujqësore (AEB) tregojnë se sipërfaqja e përgjithshme është rritur për vetëm 510.90 hektarë ose 0.1 për qind krahasuar me vitin 2024.

Sipas statistikave, sipërfaqja e përgjithshme e shfrytëzuar e tokës bujqësore ka arritur në 420,739.57 hektarë në vitin 2025, nga 420,228.67 hektarë sa ishte një vit më herët.

Pjesën më të madhe të tokës bujqësore vazhdojnë ta zënë livadhet dhe kullosat, duke përfshirë edhe tokën e përbashkët. Kjo kategori është rritur nga 216,534.33 hektarë në vitin 2024 në 216,697.39 hektarë në vitin 2025, një rritje që sipas raportit lidhet me shtimin e fondit blegtoral.

“Gjatë vitit 2025, gjithsej toka e punueshme, arat, ishte 189 131,22 ha, pjesa më e madhe ishte me: drithëra (128 190,63ha, ose 67,8%); bimë foragjere (36 446,35ha, ose 19,3%); perime 9 841,44 ha në fushë të hapur, në serra dhe kopshte (prej të cilave perime në fushë të hapur dhe serra ishin 8 946,37ha, ose 4,7%); patate (3 375,16ha, ose 1,8%); bishtajore (2 257,45ose 1,2%); bimë industriale ( 1 254,60ha, ose 0,7%); kultura të tjera (2 556,27ha, ose 1,4%) dhe tokë djerrë ishte 6 104,38 ha ose 3,2%”, thuhet në raport.

Edhe toka e punueshme, arat ka shënuar rritje të lehtë. Nga 188,795 hektarë në vitin 2024, ajo ka arritur në 189,131.22 hektarë në vitin 2025, duke përbërë rreth 45 për qind të gjithë sipërfaqes së shfrytëzuar bujqësore.

Ndërkohë, jo të gjitha kategoritë kanë shënuar rritje. Kopshtet janë zvogëluar nga 912.75 hektarë në 895.07 hektarë, ndërsa edhe plantacionet e vreshtave kanë rënë nga 3,405.54 hektarë në 3,343.21 hektarë.

Në anën tjetër, plantacionet e pemëve kanë shënuar një rritje të lehtë, duke kaluar nga 10,408.21 hektarë në 10,481.08 hektarë, ndërsa fidanishtet janë rritur nga 172.86 hektarë në 191.61 hektarë.

Sa i përket strukturës së tokës së punueshme, gjatë vitit 2025 gjithsej 189,131.22 hektarë ishin të mbjella me kultura të ndryshme. Pjesën më të madhe e zënë drithërat me 128,190.63 hektarë ose 67.8 për qind, të ndjekura nga bimët foragjere me 36,446.35 hektarë ose 19.3 për qind.

Perimet janë kultivuar në 9,841.44 hektarë, ku 8,946.37 hektarë janë në fushë të hapur dhe në serra. Patatet janë mbjellë në 3,375.16 hektarë, bishtajoret në 2,257.45 hektarë, ndërsa bimët industriale në 1,254.60 hektarë.

Megjithatë, raporti evidenton se 6,104.38 hektarë, ose 3.2 për qind e tokës së punueshme, kanë mbetur djerrë edhe gjatë vitit 2025.

Të dhënat e Agjencisë së Statistikave tregojnë gjithashtu se 34,240.28 hektarë janë ujitur të paktën një herë gjatë periudhës referuese të anketës, ndërsa 123,045.50 hektarë janë trajtuar me pesticide.

Edhe sektori i blegtorisë ka shënuar rritje të lehtë. Numri i gjedheve është rritur nga 240,848 në vitin 2024 në 241,423 në vitin 2025, ndërsa numri i deleve ka kaluar nga 209,947 në 211,178.

“Rezultatet e kësaj ankete tregojnë se blegtoria në Kosovë, gjatë vitit 2025, sa i përket numrit të gjedheve ishte 241 423, ku krahasuar me vitin paraprak 2024 (që ishte 240 848), ka një rritje të lehtë. Sa i përket numrit të deleve gjatë vitit 2025 ishte 211 178, ku krahasuar me vitin paraprak 2024 (që ishte 209 947), vërehet një rritje e lehtë”. /Monitor

Policia e Kosovës ka njoftuar se një person është arrestuar lidhur me rastin e vdekjes së një punëtori në vendin e punës në Prizren.

Rasti është iniciuar si “Asgjësimi, dëmtimi apo heqja e pajisjeve mbrojtëse në vendin e punës”. I arrestuari është dërguar në mbajtje.

“Prizren/22.06.2026 – 08:00. Viktima mashkull kosovar derisa ka qenë në vendin e punës është lënduar nga një mjet pune. Nga lëndimet e marra viktima ka ndërruar jetë, vdekjen e të cilit e ka konstatuar mjeku kujdestar. Me vendim të prokurorit trupi i pajetë është dërguar në IML për obduksion, ndërsa lidhur me rastin është arrestuar i dyshuari mashkull kosovar dhe me vendim të prokurorit është dërguar në mbajtje. Rasti në procedurë hetimore”, bën të ditur policia.

Siç u bë e ditur dje, 26 vjeçari vdiq pasi dyshohet se u godit nga një pjesë e pajisjes së punës derisa ishte duke punuar në një objekt ndërtimi gjatë procesit të betonimit.

Vdekja e tij u konstatua në vendngjarje.

Iniciativa e të Rinjve për të Drejtat e Njeriut në Beograd (YIHR) ka njoftuar se gjatë vitit 2025 ka identifikuar të paktën 110 raste, në të cilat autoritetet dhe institucionet në Serbi kanë mohuar krimet e luftës të kryera gjatë luftërave të viteve ’90.

Sipas raportit të ri të titulluar“Gjendja e mohimit”, janë regjistruar të paktën 60 raste të lavdërimit të 10 personave të dënuar për krime lufte, si dhe të paktën 50 raste të formave të ndryshme të mohimit të krimeve.

Raporti përfshin mohimin e krimeve në Reçak të Kosovës, mohimin e rrethimit të Sarajevës, ekzistencës së kampeve në Prijedor, por edhe të varrezave masive në Batajnicë pranë Beogradit, ku ishin varrosur trupat e viktimave nga Kosova.

Gjenocidi në Srebrenicë, sipas YIHR-së, vazhdon të jetë krimi që mohohet më së shumti. Vetëm gjatë vitit 2025 janë dokumentuar të paktën 30 raste të mohimit të tij.

Në raportin e katërt vjetor të organizatës thuhet se praktikat e mohimit dhe glorifikimit të kriminelëve të dënuar të luftës, përfshirë Ratko Mlladiqin, nuk janë të pranishme vetëm te përfaqësuesit e pushtetit, por edhe në disa media, parti politike, qarqe fetare dhe në një pjesë të komunitetit akademik.

Autorët e raportit kanë veçuar disa ngjarje të vitit 2025, përfshirë varrimin e gjeneralit të pensionuar të ish-Ushtrisë së Jugosllavisë, Nebojsha Pavkoviq, në Rrugicën e Qytetarëve të Merituar në Beograd.

Pavkoviq u varros me nderimet më të larta shtetërore dhe ushtarake, ndërsa YIHR e ka vlerësuar këtë si një precedent të rrezikshëm.

Në raport përmenden edhe raste të pengimit të bashkëpunimit me institucionet ndërkombëtare të drejtësisë, kundërshtimi i vendimeve të Gjykatës së Bosnjë e Hercegovinës dhe emërimi i disa zyrtarëve publikë, të cilat sipas organizatës dëshmojnë për bllokadë institucionale në përballjen e Serbisë me të kaluarën e luftës.

Drejtoresha e YIHR-së, Sofija Todoroviq, ka deklaruar se mohimi dhe relativizimi i krimeve të luftës janë shndërruar në një nga shtyllat kryesore të politikës në Serbi.

Sipas saj, kjo përdoret si mjet për nxitjen e urrejtjes dhe si instrument nacionalist për shpërqendrimin e opinionit publik, duke krijuar ndarje të thella në shoqëri.

Ajo ka theksuar se viti i kaluar tregoi qartë se qëllimi i mohimit dhe keqpërdorimit të së kaluarës së luftës është dobësimi i kapaciteteve demokratike të shoqërisë serbe.

Ministria e Industrisë, Ndërmarrësisë, Tregtisë dhe Inovacionit ka bërë të ditura çmimet maksimale të lejuara të derivateve të naftës për ditën e martë.
Sipas njoftimit, çmimi maksimal i naftës është caktuar në 1.38 euro për litër.

Ndërkaq, benzina do të tregtohet me çmim maksimal prej 1.33 euro për litër, ndërsa gazi me 0.67 euro për litër, njësoj si një ditë më parë.

Sipas ministrisë, këto çmime hyjnë në fuqi nga ora 10:00.

Kosova ka kërkuar qasje në dokumentet e klasifikuara të Brigadës së 37-të të Motorizuar dhe rikthimin për gërmime në Batajnicë, duke i parë si test të përmbushjes së zotimeve të Serbisë të Deklaratës për Persona të Zhdukur. Ndërkaq, në kuadër të Komisionit të Përbashkët për persona të zhdukur Serbia ka kërkuar më shumë informata dhe hetime sidomos pas përfundimit zyrtar të luftës.

Pala kosovare po pret qasje në dosjet e klasifikuara të Brigadës së Motorizuar, 37-të, të kohës së luftës, dhe kthimin për gërmime në Batajnicë, në mesin e kërkesave kryesore që ka paraqitur te Komisioni i Përbashkët për Persona të Zhdukur mes Kosovës e Serbisë.

Ky Komision pritet të mblidhet sërish këtë muaj, me ndërmjetësimin e Bashkimit Evropian, në takimin e tretë me radhë që nga themelimi i tij dhe pala kosovare insiston që këto dy kërkesa janë test nëse Serbia do të nisë ta zbatojë deklaratën e nënshkruar tri vite më parë e cila përfshin qasjen në arkiva.

Kreu i Njësisë për Persona të Zhdukur në Zyrën e Kryeministrit, Kushtrim Gara, ka thënë se qasja në arkivin e klasifikuar do të ndihmojë kërkimet për të zhdukurit nga maskarat e kryera nga kjo brigadë, në zonën e Drenicës, që në atë kohë komandohej nga gjenerali, Lubisha Dikoviq.

“Shumë nga viktimat e masakrave Rezallë, Çikatovë e Vjetër e Zabel i Ulët të kryera nga kjo brigadë janë gjetur në Rashkë”, i ka thënë Gara Radio Kosovës.

“Komplet arkivat e kësaj brigade janë riklasifikuar në vitin 2014, kur ne kemi qenë duke gërmuar në Rashkë, ku kjo brigadë e ka pasur bazën”, ka shtuar ai.

Gara ka treguar se pala kosovare po kërkon të rikthehen gërmimet në Batajnicë ngase janë siguruar të dhëna të reja ku dyshohet të jenë një numër viktimash të zhdukura të luftës.

“Në bazë të dhënave të reja që kemi siguruar dhe analizës së informacionit ne kemi konkluduar që në Batajnicë afër poligonit të stërvitjes duhet të jetë edhe një vend me 58 trupa të personave të zhdukurve”, ka thënë ai.

Mes viteve 2001 e 2002, mbetjet e 744 viktimave u gjetën të varrosura në 9 gropa, ngjitur me poligonin e stërvitjes ushtarake në Batjnicë, afër Beogradit, qindra kilometra larg vendit ku u vranë.

Zyra e ndërmjetësit të Bashkimit Evropian për Dialogun, Kosovë- Serbi, Peter Sorensen, i ka thënë Radio Kosovës se BE u “kërkon me ngulm palëve bashkëpunim dhe angazhim” në zbatimin e Deklaratës për Personat e Zhdukur të vitit 2023. Gjithashtu është theksuar se Komisioni i Përbashkët “ofron një kornizë për të mbështetur këtë proces dhe për të adresuar çështjet praktike që lidhen me zbatimin”.

Sipas Deklaratës për Persona të Zhdukur, obligimet e Kosovës, përfshijnë hetime të rasteve të personave të zhdukur, sidomos atyre pas përfundimit zyrtar të luftës.

Policia e Kosovës ka hapur një tender të ri për në kuadër të procedurave të prokurimit publik, për renovimin e kampit “Enver Zymeri”.

Sipas dokumentit zyrtar afati për dorëzimin e ofertave është i hapur deri më 2 korrik 2026 ora 14:00.

Autoriteti kontraktues ka bërë të ditur se procedura synon furnizimin e nevojshëm për funksionimin e rregullt të institucionit, në përputhje me standardet dhe kërkesat ligjore të prokurimit publik.

Sipas dokumentacionit të publikuar, kontrata është e kategorisë së furnizimit dhe ka për qëllim sigurimin e materialeve të nevojshme për realizimin e punimeve renovuese në këtë qendër.

Vlera e parashikuar e kontratës është 15 mijë e 927.50 euro, ndërsa projekti synon përmirësimin e kushteve infrastrukturore dhe funksionale të objektit.

Dokumentet e tenderit tregojnë se kontrata nuk është e ndarë në pjesë, duke nënkuptuar se furnizimi do të realizohet si një tërësi.

Operatorët ekonomikë të interesuar duhet të përmbushin një sërë kriteresh ligjore dhe profesionale, përfshirë dëshmitë nga Administrata Tatimore, Gjykata Themelore dhe dokumentacionin përkatës që vërteton regjistrimin e biznesit dhe statusin e TVSH-së.

Po ashtu, operatori ekonomik që shpallet fitues do të jetë i obliguar të ofrojë siguri të ekzekutimit në vlerë prej 10 për qind të shumës së kontratës, në përputhje me kushtet e përcaktuara në dosjen e tenderit.

Policia e Kosovës ka ftuar të gjithë operatorët ekonomikë të interesuar që të shqyrtojnë dokumentacionin e tenderit dhe të paraqesin ofertat e tyre brenda afateve të parapara, në përputhje me rregullat dhe procedurat e prokurimit publik.

Renovimi i këtij kampi ka ardhur pas raportimit në media për gjendje të rëndë të tij. Në disa media janë publikuar fotografi ku shihen dyer e dritare të thyera dhe pjesë të tjera të objektit tejet të dëmtuara, e ku zyrtarët policorë të Njësisë Speciale qëndrojnë gjatë punës së tyre.

Biznesmeni kosovar Behgjet Pacolli i ka bërë thirrje Prokurorisë së Posaçme kundër Korrupsionit dhe Krimit të Organizuar në Shqipëri që të nisë hetime lidhur me, siç e ka cilësuar ai, një skandal të rëndë në Aeroportin e Vlorës.

Pacolli ka deklaruar se qytetarët nuk janë informuar për “gjendjen reale” në aeroport, duke kërkuar që të hetohen personat që, sipas tij, kanë vepruar në kundërshtim me ligjin.

“Koha për të zbardhur të vërtetën dhe për të vënë përgjegjësit para drejtësisë është tani”, ka shkruar Pacolli.

Pacolli ka kërkuar nga SPAK një hetim “të plotë, të pavarur dhe gjithëpërfshirës”, pa mbrojtje për askënd, pavarësisht pozitës apo ndikimit që mund të ketë.

“Për këtë arsye, i bëj thirrje urgjente SPAK-ut të nisë menjëherë hetime të plota mbi këtë skandal të rëndë, të krijuar dhe ushqyer nga individë që kanë vepruar dhe vazhdojnë të veprojnë në kundërshtim me ligjin, duke cenuar rëndë shtetin e së drejtës dhe sistemin juridik të Republikës së Shqipërisë”. Koha për të zbardhur të vërtetën dhe për të vënë përgjegjësit para drejtësisë është tani.”

Ai thotë se terminali i Aeroportit të Vlorës ka qenë i bllokuar dhe i uzurpuar për më shumë se dhjetë muaj, ndërsa ka thënë se kompania MABCO dhe nënkontraktorët e saj tashmë janë rikthyer në vendet e punës.

“Sot MABCO dhe nënkontraktorët tanë kanë mundur të rikthehen në vendet e tyre të punës. Në këto momente po kryhet verifikimi dhe evidentimi i dëmeve të shkaktuara nga vandalizmi, vjedhjet dhe shkatërrimet”, ka deklaruar ai.

Sipas Pacollit, dëmet përfshijnë inventarin e projektuar dhe instaluar për funksionimin e aeroportit, por edhe pajisje dhe mjete pune që u përkasin kompanive nënkontraktuese.

Ai ka ngritur dyshime edhe për mbështetje ose tolerim institucional ndaj personave që i ka akuzuar për veprime të paligjshme.

“Më shqetësues është fakti se veprimtaria e tyre dyshohet se është mbështetur ose toleruar nga individë që fshihen pas petkut institucional”, ka thënë Pacolli, duke shtuar se në disa raste, sipas tij, është tentuar të ndikohet edhe në procese gjyqësore.

Ai ka theksuar se duhet të identifikohet i gjithë zinxhiri i personave që mund të jenë përfshirë në ngjarjet e pretenduara, duke kërkuar gjithashtu masa për garantimin e sigurisë së punonjësve dhe kompanive kontraktuese në Aeroportin e Vlorës.