Tag: Ballina

Zëdhënësi i Komisioni Qendror i Zgjedhjeve, Valmir Elezi, tha për RTKLive se Komisioni Qendror i Zgjedhjeve është në pritje të vendimmarrjes së Gjykatës Supreme lidhur me ankesat e paraqitura për rezultatet e shpallura më 27 qershor.

“Nëse vendimet nuk përmbajnë obligime për KQZ-në, mund të procedohet me certifikimin e rezultateve. Ndërkaq, nëse vendimet përmbajnë obligime për KQZ-në, ato do të zbatohen fillimisht, ndërsa më pas do të procedohet me certifikimin e rezultateve”, tha Elezi.

Ndryshe, KQZ ka publikuar, më 27.06.2026, rezultatet përfundimtare të zgjedhjeve parlamentare të mbajtura më 7 qershor. Sipas këtyre rezultateve, Lëvizja Vetëvendosje ka dalë partia e parë me 47.13 % të votave, Partia Demokratike e Kosovës ka marrë 19.44 % të votave, Lidhja Demokratike e Kosovës ka fituar 16.69 % të votave, Aleanca për Ardhmërinë e Kosovës ka siguruar 6.74 % të votave dhe shtatë mandate, ndërsa Lista Serbe ka fituar 5.40 % të votave.

Pakënaqësia e fermerëve kosovarë të qumështit ka arritur kulmin. Pas ndërprerjes së grumbullimit të qumështit të freskët, ata kanë paralajmëruar protestë për sot para Ministrisë së Bujqësisë, duke kërkuar zgjidhje urgjente për situatën që, sipas tyre, po i çon fermat drejt falimentimit.

Shoqata e Fermerëve Kosovarë të Qumështit njoftoi se vendimi për protestë u mor unanimisht në mbledhjen e mbajtur më 5 korrik, transmeton Klankosova.tv.

“Protesta është e pashmangshme me situatën e krijuar për mosgrumbullimin e qumështit të freskët nga fermat tona, duke hasur në vesh të shurdhër tek akterët kompetentë”, thuhet në njoftimin e shoqatës.

Sipas fermerëve, protesta do të mbahet duke filluar nga ora 13:00, para Ministrisë së Bujqësisë.

Ata kanë paraqitur tri kërkesa kryesore: “Rifillimin e menjëhershëm të grumbullimit të qumështit; Publikimin urgjent të rezultateve, në mënyrë që të hiqen dyshimet mbi produktet vendore; Kthimin e çmimit të mëparshëm të qumështit, për të shmangur falimentimin e fermave”.

Fermerët kanë bërë të ditur se në protestë do të marrin pjesë me mjete bujqësore dhe cisterna të qumështit.

Njëkohësisht, ata kanë ftuar qytetarët të marrin me vete bidonë, duke bërë të ditur se gjatë protestës do të shpërndahet qumësht falas.

Profesori amerikan, Edward P. Joseph, ka kritikuar klasën politike në Kosovë për mungesën e konsensusit institucional.

Sipas tij, kryeministri në detyrë Albin Kurti mban përgjegjësinë kryesore, pasi udhëheq shumicën parlamentare, por sipas tij, përgjegjësi kanë edhe të gjithë liderët e tjerë politikë.

“Nëse liderët politikë, dhe përsëri po flas në shumës, nuk po them vetëm që kryeministri Kurti ka përgjegjësi, ai ka përgjegjësinë kryesore, sepse kontrollon shumicën e votave në Parlament dhe ky është një vendim parlamentar. Por, të gjithë ata mbajnë përgjegjësi dhe votuesit, do ta them këtë, votuesit duhet t’i ndëshkojnë të gjithë liderët politikë që nuk gjejnë një konsensus, sepse kjo po e dëmton vendin”, tha ai.

Ai vlerësoi se situata aktuale nuk e cenon stabilitetin e Kosovës, por dëmton zhvillimin demokratik të vendit.

“Stabiliteti është një pyetje, ndërsa zhvillimi demokratik, këto janë dy gjëra të ndryshme. Nuk besoj se kjo ndikon në stabilitet dhe nuk do të doja ta thosha këtë, sepse besoj se Kosova është një vend i qëndrueshëm dhe një demokraci e qëndrueshme”, deklaroi profesori.

Megjithatë, Joseph tha se bllokada politike përbën një sinjal negativ për demokracinë.

“Republika e Kosovës është e tillë dhe unë e mbështes atë, si dhe mbështes hyrjen e Kosovës në NATO, për të cilën kam qenë një nga mbështetësit më të fortë. Për sa i përket zhvillimit demokratik, është e tmerrshme, është e qartë, përgjigjja është e qartë, ky nuk është një shembull i mirë i zhvillimit demokratik dhe duhet ta theksojmë këtu, ky nuk është si një ngërç tipik parlamentar, siç pati njëherë Belgjika, një ngërç njëvjeçar. Atë situatë e ke kur ke një shumicë shumë të ngushtë, por këtu keni një parti që ka një aftësi të qartë”, u shpreh ai./Klankosova.tv

Fermerët Kosovarë të Qumështit kanë vendosur të mbajnë nesër një protestë para Ministrisë së Bujqësisë.

Ata thonë se protesta është “e pashmangshme” pas mbylljes së përkohshme të fabrikës “Vita” në Istog, për shkak të një aksioni të Ministrisë.

“Ne takimin e mbajtur me antarsine e shoqates me 05.07.2026, unanimisht u vendos qe neser i bejme thirrje te gjithe fermereve te marrin pjese ne protesten e paralajmeruar per date 06.07.2026 ne oren 13.00 prane Ministrise se Bujqesise”, thuhet në njoftim.

“Protesta eshte e pashmangshme me situaten e krijuar per mos grumbullim te qumeshtit te fresket nga fermat tona, duke hasur ne vesh te shurdher tek akteret kopetent”, thuhet tutje në njoftim.

Fermerët Kosovarë të Qumështit treguan edhe kërkesat e tyre:

-Rifillim i menjehershem i grumbullimit,
-Publikimi urgjent i rezultateve ne menyre qe te hiqet dyshimi mbi produktet vendore.
-Kthimi i cmimit te meparshem per te shpetuar fermat nga falimentimi.

“Pjesemarrja do te jete me mjete bujqesore dhe cisterna qumeshti, lusim qytetaret jane te lire te marin bidona per furnizim me qumesht pa pagese”, thuhet në njoftim.

Kreu i OVL-UÇK-së, Hysni Gucati, ka bërë të ditur se në protestën “Liri për çlirimtarët”, e cila do të mbahet në Zarë të Kroacisë në mbështetje të ish-krerëve të UÇK-së që ndodhen në Hagë, pritet të marrin pjesë mbi 3 mijë qytetarë.

Në një lidhje direkte për emisionin “Info Magazine” në Klan Kosova, Gucati tha se qytetarët kanë filluar të grumbullohen pranë vendit ku do të mbahet protesta, duke veçuar praninë e madhe të familjeve me fëmijë.

“Me numër fiks nuk guxoj të shkojë, sepse duhet t’i numërojmë kokë më kokë. Unë shpresoj dhe dua të besoj se do ta kalojmë numrin prej 3 mijë qytetarësh, bashkatdhetarësh dhe njerëzish që kanë ardhur nga Kosova, Maqedonia, Shqipëria, Mali i Zi dhe Presheva, por edhe nga vende të tjera. Besoj se do ta kalojmë shifrën prej mbi 3 mijë pjesëmarrësish, edhe pse është vapë e madhe dhe temperatura është shumë e lartë në Zarë, por shpresoj se numri do të jetë mbi 3 mijë veta”, tha ai.

Sipas Gucatit, pjesëmarrja e familjeve ka një rëndësi të veçantë, pasi, siç tha ai, fëmijët po njihen me figurat e ish-krerëve të UÇK-së.

“Njerëzit kanë filluar të grumbullohen dhe të parkohen pranë vendit ku do të mbahet protesta.Më ka bërë shumë përshtypje që kanë ardhur shumë familje. Është hera e parë që shoh kaq shumë shqiptarë me familje dhe me fëmijë të vegjël në një protestë. Kjo më ka befasuar pozitivisht. Ata po mbështesin një protestë paqësore, një protestë të drejtë për lirinë e çlirimtarëve”, deklaroi ai.

Kreu i OVL-UÇK-së gjithashtu u shpreh se protesta po bëhet për një të drejtë, që siç u shpreh ai, na takon.

“Më vjen mirë që këto familje ua kanë treguar edhe fëmijëve të tyre se kush janë çlirimtarët, kush janë Hashim Thaçi, Jakup Krasniqi, Rexhep Selimi, Kadri Veseli dhe të tjerët. Kjo më ka gëzuar shumë, që anëtarët e familjeve kanë marrë edhe fëmijët e tyre për t’u treguar se ne po protestojmë për një të drejtë që na takon”, tha Gucati.

Drejtori Ekzekutiv i Odës Ekonomike Amerikane në Kosovë, Arian Zeka, ka ngritur shqetësimin se mungesa e investimeve infrastrukturore dhe vonesat në reformat ekonomike mund të çojnë në zhvendosjen e bizneseve prodhuese nga Kosova drejt vendeve të rajonit, me pasoja për ekonominë dhe punësimin.

Në një intervistë për Ekonomia Online, Zeka tha se, ndonëse Oda Ekonomike Amerikane nuk ka informata për largim të bizneseve nga Kosova, shqetësimet e komunitetit të biznesit janë të mëdha dhe lidhen me mungesën e investimeve që do të nxisnin zhvillimin ekonomik.

Ai tha se në vend të investimeve infrastrukturore me efekt afatgjatë, po vazhdohet me politika që fokusohen në asistencën sociale.

“Nuk është që kemi marrë informata për largim të bizneseve të Kosovës, për hir të së vërtetës. Megjithatë, ka shqetësime të mëdha, të cilat ndahen nga ana e anëtarëve të Odës Ekonomike Amerikane, por edhe komunitetit më të gjerë të biznesit në vend. Siç e kemi thënë edhe në deklaratat tona, nuk ka investime të mjaftueshme infrastrukturore, të cilat do të kishin efekt më të gjerë multiplikativ në zinxhirin ekonomik të vendit. Po e shohim se gati secilën herë ose dy-tri herë brenda vitit ka shpërndarje të asistencës sociale. E kuptojmë që kjo mund të jetë në linjë me politikat dhe vlerat që i promovon partia në pushtet, por megjithatë duhet të shihet efekti i tyre në ekonominë e vendit”, tha Zeka.

Sipas tij, efektet e këtyre politikave janë negative dhe mund të ndikojnë në largimin e bizneseve prodhuese nga vendi.

“Ne besojmë që efekti në masë të madhe është negativ, është gërryes dhe rrjedhimisht kjo i lë bizneset në gjendje më të vështirë, e pse jo në një të ardhme jo shumë të largët edhe të nisim të shohim largimin e tyre, ashtu siç ka paralajmëruar një pjesë e madhe e tyre. Të gjitha vendet e Ballkanit Perëndimor, duke qenë vende të vogla me ekonomi të brishta, janë në mesin e vendeve më të varfra në Evropë dhe rrjedhimisht jemi në konkurrencë me njëra-tjetrën për tërheqjen e bizneseve”, tha ai.

Zeka tha se tashmë ka biznese kosovare që janë shtrirë në vendet fqinje dhe paralajmëroi se prodhuesit mund të zhvendosen në Shkup ose Kukës.

“Në dy-tri vitet e fundit ka pasur shtrirje të bizneseve kosovare në këto vende. Mos të çuditemi që një ditë një pjesë e madhe e bizneseve prodhuese të vendit do të zhvendosen në vende si Shkupi apo Kukësi, meqenëse janë në distancë shumë të afërt gjeografike me Kosovën. Të gjitha vendet e Ballkanit Perëndimor tregtojnë pa doganë me njëra-tjetrën, që do të thotë se mallrat që dikur prodhoheshin në Kosovë mund të prodhohen në Kukës apo në Shkup dhe të futen në tregun e Kosovës pa iu nënshtruar detyrimeve doganore. Por ajo që humbet Kosova është shumë më e madhe. Do të mbylleshin vendet e punës, një pjesë e madhe e tatimit në fitim që sot gjenerohet nga këto kompani prodhuese nuk do të vazhdonte t’i paguhej buxhetit të vendit dhe kjo do të çonte në përkeqësim të aspektit socio-ekonomik”, tha ai për Ekonomia Online.

Ai shprehu shpresën që vendi të ketë sa më shpejt institucione funksionale, të cilat do të shtyjnë përpara reformat ekonomike dhe projektet infrastrukturore.

“Prandaj uroj që shumë shpejt të kemi institucione funksionale, të kemi një Kuvend që do të arrijë të shtyjë përpara reformat ekonomike dhe një qeverisje pak më pak populiste, e cila kupton se cilat janë aspektet më të rëndësishme të zhvillimit ekonomik dhe që nuk bazohen vetëm në shpërndarjen e ndihmës sociale. Ka një numër të madh të projekteve infrastrukturore të cilat nuk po arrijnë të përfundohen në këtë pesë-gjashtëvjeçarin e fundit dhe besoj që aty duhet të jetë fokusi më i madh”, tha Zeka.

Ai shtoi se përgjegjësia për krijimin e institucioneve funksionale bie mbi partinë me numrin më të madh të votave, duke theksuar se nevojitet kompromis politik.

“Kosova ka bërë hapa të mëdhenj në periudhën prej çlirimit e tutje, në këto 27 vite si shtet i lirë, dhe një pjesë e mësimeve të mira të gjeneruara gjatë këtyre viteve duhet të replikohen edhe në periudhën në vijim. Uroj të kemi qeveri funksionale dhe institucione me mandat të plotë, jo ushtrues detyre. Këtu nevojitet konsensus dhe gatishmëri për kompromis. Përgjegjësia rëndon mbi partinë që ka numrin më të madh të votave, sepse sa më e madhe fuqia, aq më e madhe është edhe përgjegjësia, përfshirë edhe përgjegjësinë për bashkëpunim”, tha Zeka.

Kreu i Qeverisës së Kosovës, Albin Kurti, ka uruar SHBA’në me rastin e 4 korrikut, Ditës së Pavarësisë. Në postimin e tij, Kurti ka rendtiur një varg me të dhëna historike për krijimin e shtetit amerikan, nisur nga viti 1776.

“Me dëshirat më të mira për të ardhmen e ndritshme të kombit amerikan, gëzuar 4 Korrikun, gëzuar përvjetorin e 250-të të Shteteve të Bashkuara të Amerikës!”, ka shkruar Kurti.

Postimi i plotë:

Një deklaratë pavarësie, shikuar si ngjarje historike, ndodh në një kohë dhe vend të caktuar. Sot, pra, festojmë përvjetorin e 250-të të Shteteve të Bashkuara të Amerikës, sepse më 4 korrik 1776, Kongresi Kontinental i 13 kolonive të Britanisë së Madhe, pas kuvendimeve në Dhomën e Asamblesë të Parlamentit Shtetëror të Pensilvanisë në qytetin e Filadelfisë, nënshkroi përfundimisht Deklaratën e Pavarësisë. Kështu, me atë datë të famshme, lindi një shtet i ri: Shtetet e Bashkuara të Amerikës.

Mirëpo, Deklarata e Pavarësisë së ShBA-ve, në përmbajtjen e saj, ka një rëndësi dhe domethënie të veçantë, e cila shkon përtej datës dhe vendit ku u miratua. “Ne i konsiderojmë këto të vërteta si të vetëkuptueshme: se të gjithë njerëzit janë krijuar të barabartë; se ata janë pajisur nga Krijuesi i tyre me disa të drejta të patjetërsueshme; se ndër këto të drejta janë jeta, liria dhe kërkimi i lumturisë”. Duke u thirrur në këto vlera dhe të drejta universale, të pakufizuara në kohë dhe hapësirë, ajo që sot quhet “Fryma e ’76-ës” ka mundur jo vetëm të mbijetojë, por edhe të jetojë, fuqishëm, në mendjet dhe zemrat e patriotëve të çdo epoke dhe çdo populli.

Kjo vlen sidomos për popullin shqiptar. Më 4 korrik 1918, këtu e 108 vite më parë, në 142-vjetorin e pavarësisë së Shteteve të Bashkuara të Amerikës, si përfaqësues i federatës shqiptare “Vatra” Fan Noli do shkëmbente nja dy-tri fjalë me Presidentin Woodrow Wilson. Në jahtin presidencial U.S.S. Mayflower, në kthim e sipër për në Washington DC nga Mount Vernon, ku kishin bërë nderimet festive te varri i George Washington-it, Noli gjeti rastin t’i thoshte presidentit të njëzetetetë amerikan që zbatimi i parimeve të tij për vetëvendosjen do t’i garantonte Shqipërisë të drejtat e saj. Presidenti Wilson iu gjegj rilindasit tonë erudit duke e siguruar atë se ato parime do të mbretëronin meqë ShBA-ja do të luftonte për to. Ajo që ne shqiptarët e quajmë Shqipëria londineze vërtet shpëtoi pas Luftës së Parë Botërore edhe në saje të parimeve të mishëruara në planin e paqes të njohur si “14 pikat e Wilsonit”.

Më pak se një shekull më pas, të njëjtave parime, që Deklarata e Pavarësisë e 4 korrikut 1776 i mbron me aq elokuencë, do t’i apelonte edhe lëvizja jonë për pavarësi. E drejta e popullit të Kosovës për vetëvendosje, që në fillim të shekullit XX ishte sakrifikuar në lojërat gjeopolitike të Fuqive të Mëdha, në fund të po atij shekulli dhe fillimit të atij vijues do të merrte mbështetjen më domethënëse pikërisht nga Shtetet e Bashkuara të Amerikës. 10 qershori i vitit 2007, kur George W. Bush deklaroi në Tiranë, “Më mirë më parë sesa më vonë, duhet të thuash këtu i erdhi fundi, Kosova është e pavarur,” bën pjesë te datat më të rëndësishme të historisë sonë më të re shtetformuese. Pra brenda një harku kohor prej gati një shekulli, nga Shqipëria londineze te Kosova e pavarur, betejat shqiptare për vetëvendosje marrin dy herë mbështetje kritike nga kombi amerikan, i cili këtu e 250 vite më parë shpalli themelimin e tij duke u thirrur në të drejtat e patjetërsueshme në jetë, liri dhe kërkim të lumturisë.

Teksti i Deklaratës së Pavarësisë së Shteteve të Bashkuara, i nënshkruar më 4 korrik 1776, vuloste vullnetin e shprehur dy ditë më parë (2 korrik) nga delegatët e Parlamentit Shtetëror në Filadelfia. Ndonëse i shkruar (kryesisht nga Thomas Jefferson) me ngut e nën trysninë e ngjarjeve të asaj kohe, ai u bë simbol i një epoke të re në historinë e mendimit politik. Koncepti i të drejtave të patjetërsueshme që është në themel të kësaj deklarate vazhdon të mbetet radikal sot e kësaj dite. Me të drejta të patjetërsueshme, etërit themelues të kombit amerikan nënkuptonin ato të drejta që nuk mund të tjetërsoheshin as dhe me pëlqimin e bartësit të tyre. Sot e kësaj dite, garantimi i këtyre të drejtave për të gjithë njerëzit pa dallim mbetet një detyrë qytetëruese për njerëzimin.

Me dëshirat më të mira për të ardhmen e ndritshme të kombit amerikan, gëzuar 4 Korrikun, gëzuar përvjetorin e 250-të të Shteteve të Bashkuara të Amerikës!

Ministria e Tregtisë ka bërë të ditura çmimet me të cilat do të shiten karburantet.

Nafta do të shitet për 1,41 euro për litër, benzina 1,36 dhe gazi 0,64.

Artane Rizvanolli, ministre e Ekonomisë ka folur edhe për projektin e gazit amerikan, atë të anuluar në vitin 2021 dhe këtë që po diskutohet tani.

Sipas saj, në vitin 2021 Qeveria e Kosovës zgjodhi projektin e baterive për shkak se ishte më i lehtë dhe më i shpejtë për t’u implementuar, ndërsa për vonesat e mosrealizimit të këtij projekti ka thënë se janë bërë për shkak të ndryshimeve që ishin bërë në fillim të administratës Trump.

Ndërsa sa u përket diskutimeve aktuale për projektin e ri të gazit amerikan, ka thënë se kjo çështje nuk është e kësaj dekade dhe është projekt që realizohet prej vitit 2030 e tutje.
Tutje ajo ka thënë se ata që propozojnë central me gaz duhet të jenë të sinqertë dhe të tregojnë edhe për parametrat financiarë dhe sa jemi të gatshëm të paguajmë.

“Janë tri çështje kyçe për projektin e vitit 2021 që qytetarët duhet t’i dinë. Në atë kohë nuk është folur për gazin amerikan. Në atë kohë ka qenë e paspecifikuar se nga do të merrej gazi. Projekti i parafizibilitetit ka ofruar kyçjen në TAP që vjen nga Azerbajxhani përmes Turqisë në Greqi e më tutje në Maqedoni. Fraza se është refuzuar gazi amerikan ka qenë e pasaktë, sepse nuk është ditur kah do të vijë. E dyta, është krijuar përshtypja se SHBA me grante do të na ndërtonin gazsjellësin dhe ne nuk e kemi dashur. Në fakt, pjesa më e madhe e tij nuk ka qenë e planifikuar të ndërtohet me grant të MCC-së. 83 prej 104 milionë dollarëve kanë qenë të planifikuara t’i investojë Qeveria e Republikës së Kosovës përmes kredisë me BERZH-in. Një linjë do të ndërtohej për SHARRCEM-in, një për Ferronikelin, dikur rreth 20 milionë eurove të taksapaguesve amerikanë, ndërsa vetë Ferronikeli është deklaruar se nuk e dëshiron. Pra ka pasur të bëjë me çështjet financiare e jo çështje tjera”, ka thënë Rizvanolli në T7.

Ministrja ka treguar se kusht i MCC-së ka qenë mbyllja e Kosovës A, sepse projekti i gazit nga Shkupi, për të qenë fizibil, ka qenë me pas një central me 250 megavat-orë energji elektrike e që punon gjashtë muaj të vitit.

“Projekti i gazit nuk bëhet në këtë dekadë se është i pamundur me u realizu, gazsjellësin dhe krejt infrastrukturën përcjellëse, edhe nëse ishte nis atëherë, edhe nëse niset sot, nuk ishin kry. Kushti për me mbyllë Kosovën A dhe me importu gaz për neve ka qenë që nuk kemi mujt ta marrim”, ka thënë Rizvanolli.

Avokati mbrojtës i ish-presidentit Hashim Thaçi, Luka Mishetiq, ka reaguar ndaj deklaratave të Avokatit të Popullit të Dhomave të Specializuara, Pietro Spera, i cili në një video të publikuar sot foli për rolin e tij në mbikëqyrjen e kushteve të paraburgimit.

Në video, Spera tha se gjatë ushtrimit të mandatit të tij u ka ofruar të paraburgosurve mundësinë e takimeve private dhe konfidenciale, duke përmend se disa prej tyre kanë pranuar të takohen me të, ndërsa të tjerë jo.

Pas kësaj deklarate, Mishetiq ka reaguar përmes rrjetit social “X”, duke vënë në pikëpyetje mënyrën se si është ushtruar ky mandat.

Sipas tij, ndonëse Spera e përshkruan veten si një autoritet të pavarur për monitorimin dhe mbrojtjen e të drejtave themelore të të akuzuarve, ai nuk ka kontaktuar asnjëherë ekipin mbrojtës të Hashim Thaçit gjatë gjashtë viteve të fundit.

While the KSC Ombudsperson says his mandate is to 'independently monitor, defend, and protect' the fundamental rights of the accused, he has not contacted Hashim Thaçi’s lawyers even once in 6 years. In contrast, the Ombudsperson of the Republic of Kosovo, Naim Qelaj, has… https://t.co/RVuf34kOWB

— Luka Misetic (@MiseticLaw) July 3, 2026

Mishetiq ka bërë edhe një krahasim me Avokatin e Popullit të Kosovës, Naim Qelaj, për të cilin tha se ka qenë vazhdimisht në komunikim me mbrojtjen në kuadër të aktiviteteve të tij monitoruese.

“Ndërsa Avokati i Popullit i DHSK-së thotë se mandati i tij është të ‘monitorojë, mbrojë dhe të mbrojë në mënyrë të pavarur’ të drejtat themelore të të akuzuarve, ai nuk i ka kontaktuar avokatët e Hashim Thaçit as edhe një herë në gjashtë vjet. Në të kundërt, Avokati i Popullit i Republikës së Kosovës, Naim Qelaj, ka kontaktuar në mënyrë aktive si pjesë e përpjekjeve të tij të monitorimit”, ka shkruar Mishetiq në “X”.