Tag: Ballina

Prokuroria Speciale e Republikës së Kosovës ka njoftuar se po zhvillohet një operacion në lidhje me dyshimet për kryerjen e veprës penale të spiunazhit.

Operacioni është duke u realizuar në bashkëpunim me Inspektoratin Policor të Kosovës dhe Agjencinë e Kosovës për Inteligjencë.

Për shkak të ndjeshmërisë së hetimeve, Prokuroria ka theksuar se nuk mund të japë detaje shtesë deri në përfundimin e operacionit.

Hetimet janë ende në zhvillim dhe Prokurori i Shtetit do të ndërmarrë të gjitha veprimet e nevojshme në përputhje me ligjin.

Gjykata Themelore në Prishtinë ka dënuar Sllavisha Filiqin me 15 vjet burgim për krime lufte, duke e shpallur fajtor për torturimin dhe zhdukjen e mjekut Hafir Shala gjatë vitit 1998.

Dënimi u shpall në mungesë të të akuzuarit dhe pritet të ekzekutohet pasi aktgjykimi të bëhet i formës së prerë.

Sllavisha Filiq, si pjesëtar i Sigurimit Shtetëror të Serbisë, së bashku me dy zyrtarë të tjerë të paidentifikuar, akuzohet se ka torturuar mjekun Hafir Shala, i cili u dërgua në një objekt të Sigurimit Shtetëror në Prishtinë, pas së cilës më nuk duhet për fatin e tij.

Pas këtij aktvendimi, Gentrit Shala, djali i Hafir Shalës, ka falënderuar institucionet për punën që kanë bërë deri më tani, por ka theksuar se Sllavisha Filiq nuk ka qenë i vetmi dhe kërkon që edhe përgjegjësit e tjerë të vihen para drejtësisë.

Procesi gjyqësor ndaj ish-krerëve të Ushtrisë Çlirimtare të Kosovës, Hashim Thaçi, Kadri Veselit, Rexhep Selimit dhe Jakup Krasniqit, do të vzhdojë edhe sot në Dhomat e Specializuara të Kosovës në Hagë.

Ndërkohë, gjatë seancës së djeshme, dhanë dëshmitë dy dëshmitarë të mbrojtjes së viktimave, duke përmendur efektet traumatike që lufta ka shkaktuar, veçanërisht tek refugjatët nga ish-Jugosllavia.

Një raport i paraqitur gjatë seancës theksoi se rreth 65% e popullsisë në Kosovë ka përjetuar ngjarje traumatike gjatë luftës.

Ky proces gjyqësor vijon pas rrëzimit të mocionit të mbrojtjes, e cila kërkonte heqjen e disa akuzave nga aktakuza.

Policia sot rreth orës 16:00 ka pranuar një informacion për një mjet të dyshimtë në rrugën Prishtinë – Fushë Kosovë, saktësisht në një automjet të parkuar në një pompë të derivateve.

Lidhur me ngjarjen detaje për ATV-në ka dhënë Flora Ahmeti, zëdhënëse e policisë për rajonin e Prishtinës.

“Rreth orës 16:00 kemi pranuar informatën për një mjet të dyshuar shpërthyes në rrugën Prishtinë -Fushë Kosovë, saktësisht në një automjet të parkuar në afërsi të një pompe të derivateve. Policia menjëherë ka dalë në vendin e ngjarjes dhe ka nisur ndërmarrjen e veprimeve operative të nevojshme për të menaxhuar me situatën”, deklaroi Ahmeti.

Policia e Kosovës ka nisur bastisjet në objektin në të cilin ndodhen disa agjenci shtetërore, përfshirë Agjencinë Kadastrale të Kosovës, Agjencinë Shtetërore të Arkivave dhe Institutin për Krime të Kryera gjatë Luftës në Kosovë.

Deri tani katër persona janë arrestuar nga policia.

Policia e Kosovës, zyra për media ka njoftuar se aksioni po zhvillohet në tri komuna, dhe lidhet me dyshimet për keqpërdorim të detyrës zyrtare.

“Policia e Kosovës me njësitë e saja relevante, me autorizim të Prokurorisë kompetente, është duke realizuar një operacion policor i cili përfshin tri komuna: Prishtinë, Ferizaj dhe Shtime. Operacioni policor po realizohet mbi dyshimet për keqpërdorim të detyrës zyrtare. Pas përfundimit dhe kompletimit të zhvillimeve policore, në bashkëpunim dhe koordinim me organet e drejtësisë mund të bëhen publike informacione shtesë”, thuhet në përgjigjen e tyre.

Zëdhënësja e Prokurorisë Themelore në Prishtinë, Kaltrina Shala tha më herët se aksioni është nisur pasi kanë marrë urdhër nga gjykata.

Bastisje në disa Agjenci Shtetërore, nën dyshimet për keqpërdorim të detyrës zyrtare

Policia është duke zhvilluar një operacion të gjerë në disa agjenci shtetërore, përfshirë Agjencinë Kadastrale të Kosovës, Agjencinë Shtetërore të Arkivave dhe Institutin për Krime të Kryera gjatë Luftës në Kosovë, në kuadër të një hetimi për keqpërdorim të detyrës zyrtare.

Lajmin e ka konfirmuar zëdhënësi i Policisë, Baki Kelani, i cili tha se operacioni është realizuar me autorizim të Prokurorisë dhe se bastisjet janë duke u kryer në tri komuna, në Prishtinë, në Ferizaj dhe në Shtime. Ai tha se më shumë detaje do të jepen pas përfundimit të operacionit.

Ndërkohë, aksionin e sotëm e ka konfirmuar edhe Prokuroria Themelore në Prishtinë. Sipas njoftimit të Prokurorisë, aksioni është ndërmarrë në përputhje me një urdhëresë gjyqësore, lidhur me dyshimet për veprën penale ‘Keqpërdorim i pozitës apo autoritetit zyrtar’ sipas Kodit Penal të Kosovës.

Deputetët e Lidhjes Demokratike të Kosovës, Alban Zogaj dhe Besian Mustafa, dorëzuan sot në Prokurorinë Speciale vendimin e Gjykatës Supreme lidhur me çështjen e arkave fiskale.

Zogaj dhe Mustafa theksuan se ky vendim konfirmon se Qeveria në dorëheqje, e udhëhequr nga Albin Kurti, nuk ka pasur të drejtë të miratonte akte nënligjore të reja.

Ata shtuan se veprimi i Ministrit Murati për miratimin e udhëzimit administrativ ishte jashtë kompetencave të Qeverisë në dorëheqje dhe se ky akt nuk është në përputhje me Kushtetutën e Kosovës.

Pas vendimit nga gjykata e dhomave të specializuara për rrëzimin e mocionit të mbrojtjes së ish-krerëve të UÇK-së, ka reaguar kryetari i partisë demokratike të Kosovës, Memli Krasniqi.

Përmes një postimi në Facebook, Krasniqi theksoi se ky vendim përfaqëson një mundësi të humbur për të forcuar besimin në drejtësinë ndërkombëtare.

Ai tha se është i bindur se ish-krerët e UÇK-së do të lirohen dhe se e vërteta do të dalë gjithmonë në shesh.

Krasniqi ka theksuar se ata janë të pafajshëm dhe çlirimtarë të popullit, dhe se krenaria dhe dinjiteti i atyre që luftuan për Kosovën mbeten të pathyeshme përjetësisht.

Gjykata e Dhomave të Specializuara në Hagë ka rrëzuar parashtrimin e përbashkët të mbrojtjes së Hashim Thaçit, Rexhep Selimit, Kadri Veselit dhe Jakup Krasniqit, për t’i hequr nga aktakuza të gjitha incidentet, që sipas mbrojtjes, binin jashtë periudhës së konfliktit të armatosur.

Kryetari i trupit gjykues, Charles Smith, tha se heqja e periudhës para fundit të majit 1998 dhe pas 20 qershorit 1999, do ta fragmentonte rastin.

Ai gjithashtu theksoi se rregullat gjyqësore parashohin kundërshtimin e aktakuzës si tërësi dhe jo të pikave të veçanta , siç ka bërë mbrojtja.

Pas rrëzimit të mocionit të mbrojtjes nga trupi gjykues, seanca është duke vazhduar me dëgjimin e dëshmitarëve të Mbrojtësit të Viktimave.

Presidentja e Kosovës, Vjosa Osmani, akuzoi Serbinë se po vepron si dorë e zgjatur e përpjekjeve të Rusisë për të destabilizuar Ballkanin Perëndimor, por nuk e përsëriti deklaratën e mëparshme për rolin e pretenduar të presidentit amerikan, Donald Trump, në parandalimin e një përshkallëzimi të situatës nga Serbia në Kosovë.

Duke folur të martën në Rigë të Letonisë, përkrah presidentit letonez, Edgars Rinkeviç, Osmani e hodhi poshtë nocionin e “tensioneve” mes Kosovës dhe Serbisë, duke e paraqitur situatën si agresion nga njëra palë dhe vetëmbrojtje nga tjetra, transmeton Radio Evropa e Lirë.

“Unë nuk do t’i quaja tensione mes Kosovës dhe Serbisë, sepse ne përpiqemi të mos biem në kurthin e barazimit të të dyja palëve”, tha Osmani, duke iu përgjigjur pyetjes së një gazetari se cili është roli i Rusisë në tensionet dhe përshkallëzimet mes Kosovës dhe Serbisë.

“Ne nuk duhet ta fusim kurrë agresorin dhe viktimën në të njëjtin thes. Serbia përpiqet vazhdimisht ta destabilizojë vendin tonë, përfshirë përmes akteve të agresionit, ndërsa ne mbrohemi vazhdimisht,” tha Osmani.

“Ne kurrë nuk kemi pushtuar ose sulmuar, madje as edhe një centimetër të territorit të ndonjë fqinji. Ajo çfarë kemi bërë gjithmonë dhe do të vazhdojmë ta bëjmë, është ta mbrojmë pavarësinë tonë, ta mbrojmë integritetin tonë territorial, ta mbrojmë paqen dhe lirinë, që janë fituar me shumë sakrificë”, tha presidentja e Kosovës.

Ditëve të fundit, ajo foli në disa raste për përshkallëzimin e mundshëm të situatës nga Serbia në Kosovë.

Gjatë një ligjërate në Uashington më 10 korrik, Osmani tha se presidenti amerikan, Donald Trump, ka parandaluar së voni mundësinë e një përshkallëzimi të mundshëm të situatës nga Serbia në Kosovë.

Ajo tha se ka “informacione të besueshme” se bëhet fjalë “për zhvillime shumë, shumë të vona”.

Kjo deklaratë shkaktoi kritika nga Richard Grenell, i dërguari i Trumpit për misione speciale.

Ai e akuzoi Osmanin për “manipulim” të fjalëve të Trumpit.

“Donald Trump është nominuar për Çmimin Nobel për Paqe për punën e tij për paqe dhe normalizim ekonomik mes Kosovës dhe Serbisë në vitet 2019 dhe 2020, përmes Marrëveshjes së Uashingtonit. Osmani nuk ka qenë pjesë e asaj marrëveshjeje. Pretendimi se ka ndodhur diçka e re është absurd,” shkroi Grenell në X.

Çfarë tha Trump?
Presidenti i SHBA-së, Donald Trump, shkroi në rrjetin Social Truth më 15 qershor se gjatë mandatit të tij të parë presidencial, Kosova dhe Serbia po “shkonin drejt një konflikti serioz” dhe se lufta ishte në prag të shpërthimit, por se ai e ndaloi atë.

Pastaj, në një konferencë për media në Shtëpinë e Bardhë më 29 qershor, ai tha se, në muajt e fundit, SHBA-ja ka ndaluar ose parandaluar konflikte midis disa palëve, përfshirë Serbinë dhe Kosovën.

“Serbia, e dini, po përgatitej për luftë, me një grup që as nuk do ta përmend, sepse nuk ndodhi”, tha Trump, duke shtuar se kërcënimi për pezullimin e tregtisë kishte funksionuar në parandalimin e saj.

Pastaj, më 9 korrik, ai përsëriti: “Kam arritur të zgjidh shumë situata, si ajo me Indinë dhe Pakistanin, Kosovën dhe Serbinë. Thashë: a do të luftoni? Ne nuk do të bëjmë tregti. Dhe, duket se kjo ka qenë mjaft e suksesshme”.

Trump e përmendi rastin e Kosovës dhe Serbisë edhe gjatë një takimi me shefin e NATO-s, Mark Rutte, më 14 korrik në Shtëpinë e Bardhë.

Radio Evropa e Lirë kontaktoi Shtëpinë e Bardhë për sqarime shtesë, por nuk mori përgjigje.

Pyetjeve të REL-it se për çfarë lloj përshkallëzimi të situatës bëhej fjalë, nuk iu përgjigj as Qeveria në detyrë e Kosovës e as Ministria në detyrë e Punëve të Brendshme.

I pyetur nga gazetarët për këtë çështje më 15 korrik, ministri në detyrë i Punëve të Brendshme, Xhelal Sveçla, tha shkurtimisht: “Ne jemi jashtëzakonisht falënderues për mbështetjen e Shteteve të Bashkuara të Amerikës, përgjatë gjithë historisë së Republikës së Kosovës”.

Përshkallëzimi i fundit i madh në veri të Kosovës – zonë e banuar me shumicë serbe – ndodhi në shtator të vitit 2023, kur një grup i serbëve të armatosur, i udhëhequr nga Millan Radoiçiq, sulmoi Policinë e Kosovës në Banjskë, duke vrarë një polic.

Prishtina e cilësoi atë si sulm terrorist të orkestruar nga Serbia – një akuzë që Beogradi e mohoi.

Pas komenteve të Grenellit, ekipi i Osmanit paralajmëroi se presidentja do të mbajë një konferencë për shtyp, pasi të kthehet nga udhëtimi.

Duke folur në Rigë, Osmani po ashtu tha se ndikimi i Rusisë në Kosovë “është zero”.

“Fatkeqësisht, nuk mund ta them të njëjtën gjë për shtetin tonë fqinj, sepse Serbia është shndërruar në një shtet nën ndikimin e Rusisë – qoftë në aspektin politik, ekonomik apo ushtarak. Përmes këtij ndikimi në Serbi, Rusia përpiqet të shkaktojë pasoja destabilizuese edhe më gjerë në rajon, sepse sa më shumë të destabilizohet Evropa, aq më shumë u shërben interesave të Rusisë”, tha Osmani.

Ajo theksoi se Kosova do të punojë ngushtë me aleatët në Bashkimin Evropian dhe në NATO, përmes masave të frenimit dhe parandalimit, me qëllim që asnjë nga taktikat destabilizuese të Rusisë, të cilat kryhen përmes Serbisë, të mos ketë sukses./REL