Tag: Ballina

Kongresisti amerikan propozon amendament për ta bërë anëtarësimin e Kosovës në NATO prioritet të SHBA-së

Kongresisti republikan Brian Mast ka paraqitur një amendament në Kongresin amerikan, i cili synon ta vendosë anëtarësimin e Kosovës në NATO si një nga prioritetet kryesore të politikës së Shteteve të Bashkuara në Ballkan. Kjo nismë, e mbështetur edhe nga kongresisti Keith Self, është cilësuar nga organizata “Albanians for America” si ndër zhvillimet më të rëndësishme për rajonin që nga viti 2002.

Amendamenti përfshin disa pika kyçe, si: prioritet në emërimin e ambasadorëve amerikanë në vendet e Ballkanit, mbështetje të qartë për pavarësinë e Kosovës dhe integrimin e saj në NATO, si dhe rekomandime për forcimin e sigurisë energjetike rajonale – përfshirë zgjerimin e rrjeteve të tubacioneve në Kroaci dhe zëvendësimin e energjisë ruse me burime alternative.

Gjithashtu, nisma parasheh mbështetje për implementimin e programit të Korporatës së Sfidës së Mijëvjeçarit (MCC) në Kosovë, inkurajimin e Shqipërisë dhe Kosovës për zhvillimin e industrisë së mbrojtjes dhe rritjen e shpenzimeve të mbrojtjes sipas standardeve të NATO-s. Një element tjetër është vazhdimi i programit të Kontrollit të Eksporteve dhe Sigurisë Kufitare, duke përfshirë pajisje moderne inspektimi në pikën kufitare të Merdarit me Serbinë për të parandaluar trafikun e armëve të paligjshme.

Organizata “Albanians for America” e ka përshëndetur këtë hap, duke e quajtur “historik” dhe duke theksuar se për herë të parë pas dy dekadash, Kosova dhe Ballkani Perëndimor po vendosen në prioritet të politikës amerikane.

Amendamenti është pjesë e një procesi ligjor që duhet të shqyrtohet nga komisionet përkatëse dhe më pas të votohet në Dhomën e Përfaqësuesve dhe në Senat. Vetëm pas miratimit në të dyja dhomat, ai mund të hyjë në fuqi si pjesë e ligjit ose udhëzimit zyrtar të politikës së SHBA-së.

Komandanti i Forcës së Sigurisë së Kosovës (FSK), gjenerallejtënant Bashkim Jashari, ka pritur në takim Komandantin e Organizatës për Menaxhimin e Trajnimit dhe Asistencë të Sigurisë të Ushtrisë së ShBA-së (SATMO), kolonel Thomas Melton.

Sipas njoftimit të FSK-së, gjatë takimit u vlerësuan të arriturat e deritanishme të ushtrisë kosovare dhe performanca e lartë e pjesëtarëve gjatë aktiviteteve të përbashkëta me ekipet e SATMO-s.

Bisedimet përfshinë edhe mbështetjen e vazhdueshme të ekipeve amerikane në ngritjen e kapaciteteve trajnuese dhe procesin e validimit të njësive të FSK-së, si pjesë e planit të zhvillimit të forcës.

“Gjithashtu u diskutua për planin trevjeçar të aktiviteteve të përbashkëta që do të realizohen në të ardhmen, ku roli i ekipeve të SATMO-s është i jashtëzakonshëm në trajnimin dhe ngritjen e kapaciteteve të reja të FSK-së”, thuhet në njoftim.

Në përmbyllje, u theksua rëndësia e madhe e mbështetjes nga ekipet trajnuese të SATMO-s për avancimin e profesionalizmit të Forcës së Sigurisë së Kosovës.

Pasagjerët që planifikojnë të udhëtojnë të shtunën, më 20 shtator, duhet të bëjnë durim në disa aeroporte evropiane, pasi një sulm kibernetik ka goditur një ofrues shërbimesh përgjegjës për sistemet e regjistrimit dhe imbarkimit, duke shkaktuar ndërprerje të konsiderueshme në Bruksel, Londër dhe Berlin.

Operatori i aeroportit të Brukselit raportoi se sistemet e tij të automatizuara janë mbyllur, duke detyruar ekipet të përdorin procedura manuale.

“Kjo do të ketë një ndikim të rëndësishëm në orarin e fluturimeve dhe për fat të keq do të rezultojë në vonesa dhe anulime”, tha aeroporti në një deklaratë.

Ofruesi i prekur po punon për të zgjidhur problemin “sa më shpejt të jetë e mundur”. Pasagjerët këshillohen të konfirmojnë rezervimin e tyre me kompaninë ajrore përpara se të shkojnë në aeroport.

Rreth orës 9:00 të mëngjesit të së shtunës, shërbimi për shtyp i aeroportit njoftoi disa media belge se nëntë fluturime janë anuluar dhe rreth pesëmbëdhjetë janë vonuar me një orë ose më shumë.

Tre avionë luftarakë rusë, MiG-31, kanë hyrë në hapësirën ajrore të Estonisë më 19 shtator, disa orë pasi Komisioni Evropian propozoi paketën e 19-të të sanksioneve ndaj Moskës për shkak të pushtimit të Ukrainës.

Shumë liderë europianë dënuan këto akte të Rusisë dhe prapa me reagim nuk mbeti as kryeministri në detyrë i Kosovës, Albin Kurti.

“Lajmi për shkeljen e hapësirës ajrore të Estonisë nga Rusia është shumë shqetësues. Kosova solidarizohet me Estoninë gjatë kësaj kohe”, ka shkruar Kurti në X.

Kryediplomatja e BE-së, Kaja Kallas, ish-kryeministre estoneze, akuzoi Moskën për një “provokim jashtëzakonisht të rrezikshëm” dhe tha se shkelja e fundit ruse e kufijve lindorë të NATO-s “përshkallëzon më tej tensionet në rajon”.

Estonia ka kërkuar zyrtarisht një konsultim sipas Nenit 4 të NATO-s.

Ky mekanizëm i lejon çdo vendi anëtar të paraqesë zyrtarisht një çështje për shqyrtim nga organi kryesor vendimmarrës i NATO-s, Këshilli i Atlantikut të Veriut, për të diskutuar hapat e mëtejshëm me aleatët.

Konsultimet zhvillohen kur “integriteti territorial, pavarësia politike ose siguria” e ndonjë prej vendeve anëtare është e kërcënuar.

Ky nen nuk duhet ngatërruar me Nenin 5, gur-themelin e aleancës, i cili përcakton se një sulm i armatosur ndaj një anëtari të NATO-s konsiderohet si akt dhune ndaj të gjithë anëtarëve dhe kërkon ndihmë për vendin e prekur.

Diskutimet e nisura nga Neni 4 mund të “çojnë potencialisht në një vendim ose veprim të përbashkët”, sipas NATO-s, por rezultatet varen nga konsensusi mes vendeve anëtare.

Zëdhënësja e NATO-s, Allison Hart, ka deklaruar se Këshilli i Atlantikut të Veriut do të mblidhet në fillim të javës së ardhshme për të diskutuar më në detaje incidentin.

Today’s news about Russia violating Estonia’s airspace is very concerning. Kosova stands in solidarity with Estonia during this time.

— Albin Kurti (@albinkurti) September 19, 2025

Policia e Kosovës, ka njoftuar se një person në Klinë është plagosur në kokë nga një plumb qorr.

Viktima është dërguar së pari në QMF Klinë e me pastaj në Spitalin rajonal të Pejës për trajtim të mëtutjeshëm.

Tutje, shtohet edhe se policia është duke e hetuar rastin, për të cilin është informuar edhe prokurori.

“Pogragjë, Klinë. Viktima mashkull kosovar deri sa ishte duke qëndruar në oborrin e axhës se tij, është goditur në kokë nga një plumb qorr. Viktima, është dërguar fillimisht në QMF Klinë e me pastaj në Spitalin rajonal të Pejës për trajtim të mëtutjeshëm. Lidhur me rastin është informuar edhe prokurori, ndërsa njësitet policore kanë dalë në vendin e ngjarjes dhe janë duke hetuar rastin’’, thuhet në raportin e PK-së. 

Presidenti i Francës, Emmanuel Macron, ka njoftuar se vendi i tij do ta njohë zyrtarisht shtetin e Palestinës të hënën, gjatë një takimi në Nju Jork.

Përmes një postimi në platformën X, Macron tha se ka biseduar me Presidentin e Autoritetit Palestinez, Mahmoud Abbas, të cilin e ka falënderuar për bashkëpunimin që çoi në arrestimin e njërit prej organizatorëve kryesorë të sulmit terrorist në Rue des Rosiers, në Paris.

“Ne ramë dakord të punojmë për të siguruar ekstradimin e tij sa më shpejt që të jetë e mundur. Duke marrë parasysh urgjencën e jashtëzakonshme të situatës në Gaza dhe në territoret palestineze, i përsërita Presidentit Abbas synimin tim për ta njohur Shtetin e Palestinës të hënën në Nju Jork”, ka shkruar Macron.

Ai e cilësoi këtë hap si pjesë të një plani gjithëpërfshirës paqeje për rajonin, që synon përmbushjen e aspiratave të të dyja palëve – izraelite dhe palestineze – për siguri dhe stabilitet.

Sipas Macron, Abbas ka rikonfirmuar përkushtimin e tij për të ndërmarrë reformat e nevojshme që synojnë rinovimin e qeverisjes palestineze dhe përballjen me sfidat për ndërtimin e një shteti të qëndrueshëm.

“Franca do të vazhdojë të qëndrojë përkrah autoriteteve palestineze në këtë rrugëtim dhe do të sigurohemi që angazhimet e marra të përmbushen, për sigurinë dhe stabilitetin e gjithë rajonit”, ka theksuar Macron në deklaratën e 19 shtatorit 2025.

I have just spoken with the President of the Palestinian Authority, Mahmoud Abbas.

I first thanked him for the excellent cooperation that led to the arrest of one of the main perpetrators of the horrific terrorist attack on Rue des Rosiers.…

— Emmanuel Macron (@EmmanuelMacron) September 19, 2025

Të hënën e kësaj jave filloi procesi gjyqësor në Dhomat e Specializuara të Kosovës në Hagë, ku u dëgjua dëshmitari i parë i mbrojtjes së ish-presidentit të Kosovës, Hashim Thaçi, ish-ndihmëssekretari i departamentit të shtetit James Rubin.

Këtë proces gjyqësor e ka komentuar avokati Skënder Musa, i cili në një intervistë për Ekonomia Online ka thënë se dëshmitarët e mbrojtjes, do të vendosin drejtësi për ish-krerët e Ushtrisë Çlirimtare të Kosovës (UÇK).

“Fundi është pak proces i komplikuar për shkak se ka pasur një numër jashtëzakonisht të madh dëshmitarësh dhe dëshmitarë që ne i kemi pasur kanë qenë tmerrësisht jo kredibilë. Pastaj kemi dëshmitarë që janë propozuar nga mbrojtja e zotit Thaçi dhe Krasniqi. Dëshmitari i parë ka filluar mirë, ka arritur të vendosë shumicën e dëshmitarëve në një pozitë të pafavorshme. Presim, i kemi rreth 14 dëshmitarë. Besoj që pas dëgjimit të këtyre dëshmitarëve kaq të rëndësishëm dhe kredibilë, procesi do të ndryshojë dhe do të marrë kahjen e drejtë. Kur them kahjen e drejtë, në fund gjykata të vendosë drejt dhe nëse vendoset, ata do të lirohen”, përfundoi ai.

Sa i përket dëshmive të dëshmitarëve të Prokurorisë së Specializuar, ai ka hedhur kritika se si në Hagë u dëgjuan dëshmitë që ishin dirigjuar e përgatitur nga BIA serbe.

“Duke u nisur nga procesi gjyqësor, nga dëshmitë e dëshmitarëve, gjyqtarët e Gjykatës Speciale duhet të jenë të vetëdijshëm dhe ta kenë të qartë që provat që janë dërguar nga një shtet armik, nga një shtet me të cilin ka luftuar UÇK-ja, atyre nuk mund t’u falet besimi. Është ndryshe nëse dëshmon një person i përgatitur nga BIA e Serbisë, prokurori i Serbisë dhe nga njerëzit brenda EULEX-it, ku të gjitha provat i kanë marrë në Serbi dhe kanë lidhje me Serbinë, qoftë në aspektin emocional apo familjar me Serbinë. Ata njerëz nuk mund të paraqesin prova kredibile, ata dëshmitarë nuk mund të jenë kredibilë. Ndryshe kur është paraqitur një dëshmitar, një punëtor i sigurimit shtetëror të Serbisë dhe ndryshe kur paraqitet si dëshmitar nënsekretar i shtetit amerikan. Pa marrë parasysh tash pozitën, atëherë ka qenë në pikën kyçe i cili ka arritur së bashku me sekretarën, me presidentin, me njerëzit kryesorë të Amerikës dhe të NATO-s që ta arrijnë marrëveshje paqësore në mes Kosovës dhe Serbisë”, theksoi Musa.

Musa pa asnjë dyshim ka thënë se procesi në Hagë është absurd.

“E di që për gjykatën nuk është e rëndësishme se kush i dërgon provat dhe kush janë dëshmitarë, mirëpo edhe gjyqtarët edhe prokurorët duhet ta kenë të qartë që një shtet në të cilin është luftuar dhe ka kryer gjenocid është i interesuar dhe punon ditë e natë që të shpallet fajtor qoftë Hashim Thaçi apo të tjerët. Në mënyrë që t’i barazojë krimet që ka bërë vetë me krimet e pretenduara që kinse i ka bërë UÇK-ja. Ata nuk janë duke hequr dorë, edhe pse e kanë njohur pothuajse të gjitha shtetet demokratike Kosovën, ata ende nuk heqin dorë dhe pretendojnë dhe bindin popullin e vet dhe botën që Kosova është pjesë e tyre. Këta duhet ta kenë parasysh regjimin e Serbisë. Njerëzit që kanë dëgjuar këta dëshmitarë pothuajse janë pjesë e administratës, policisë dhe ushtrisë së Millosheviqit, i cili vetë ka qenë i akuzuar në gjykatë për krime lufte”, deklaroi ai.

Kryeministri në detyrë i Kosovës, Albin Kurti, e ka konsideruar të “shumë shqetësues” lajmin për shkeljen e hapësirës ajrore të Estonisë nga Rusia.

Kurti theksoi se Kosova qëndron në solidaritet me Estoninë gjatë kësaj situate.

“Lajmi i sotëm për shkeljen e hapësirës ajrore të Estonisë nga Rusia është shumë shqetësues. Kosova solidarizohet me Estoninë gjatë kësaj kohe”, shkroi Kurti në X.

Estonia akuzoi Rusinë për shkeljen e hapësirës së saj ajrore pas hyrjes pa leje të tre avionëve luftarakë MiG-31 në qiellin e vendit baltik.

Ministria e Jashtme e Estonisë njoftoi se incidenti ndodhi në zonën e Ishullit Vaindloo të premten në mëngjes, me avionët që qëndruan në hapësirën ajrore estoneze për gati 12 minuta, raportoi agjencia kombëtare e lajmeve ERR.

Sipas zyrtarëve, avionët nuk kishin plane fluturimi, pajisjet identifikuese ishin të fikura dhe nuk kryen radiokomunikim me shërbimet e trafikut ajror estonez gjatë shkeljes.

Autoritetet estoneze e dënuan ashpër incidentin, duke e cilësuar atë si një shkelje “të paparë brutale” të sovranitetit të vendit.

LEXONI EDHE:

Rusët provokojnë: Avionë luftarakë hyjnë në hapësirën ajrore të Estonisë

Ministri në detyrë i Financave, Hekuran Murati në një konferencë për media pas mbledhjes së Qeverisë së Kosovës ka folur edhe për Gjykatën Speciale.

Ai para gazetarëve tha se sa i përket procesit në Hagë, Lëvizja Vetëvendosje ka qenë konsistente gjatë gjithë kohës.

“Sa i përket çështja e procesit në Hagë, po besoj që Lëvizja Vetëvendosje ka qenë konsistente gjatë gjithë kohës, sa i përket Gjykatës Speciale. Ne e kemi kundërshtuar që në fillim një gjykatë që gjykon mono etnikisht, pra vetëm një etni. Ne kemi qenë kundër që të bëhet në proces i tillë, kjo është dëshmuar edhe gjatë procesit të votimit të asaj kohe, pra kemi kundërshtuar e refuzuar”, tha Murati.

Tutje, ministri në detyrë u shpreh se besojnë në pafajësinë e luftëtarëve të UÇK-së.

“Ne shpresojmë, besojmë dhe urojmë në pafajësi, pra që Gjykata të nxjerrë verdiktin e pafajësisë për të gjithë ata që po gjykohen atje dhe të kthehen këtu, pastaj janë çështje të tjera ato se çfarë ka ndodhur gjatë procesit të qeverisjeve… Sa i përket Gjykatës Speciale si të tillë, ne qysh atëherë e kemi thënë të njëjtin qëndrim që ka qenë dhe është gjykatë e padrejtë dhe ne besojmë në pafajësinë e luftëtarëve të Ushtrisë Çlirimtare të Kosovës”, është shprehur Murati.

Kryeministri në detyrë, Albin Kurti, në mbledhjen e Qeverisë të mbajtur të premten, ka sqaruar se vendimi i Shteteve të Bashkuara të Amerikës lidhet me pezullimin e planifikimit të dialogut strategjik dhe jo me ndërprerjen e tij.

Ai ka theksuar se marrëdhëniet me SHBA-në mbeten të qëndrueshme dhe se nuk ka prishje të raporteve.

“Së pari duam të qartësojmë për qytetarët tanë se bëhet fjalë për pezullim e planifikimit për dialog strategjik, jo të dialogut strategjik si proces të nisur as të komunikimit të rregullt që ne kemi. Nuk jemi prishur me Amerikën, por kemi disa dallime. I siguroj qytetarët se qeveria jonë i trajton seriozisht deklaratat e Ambasadës Amerikane. Në diplomaci kemi dallime në raport me Serbinë dhe veprimet e saj në Kosovë. Bashkëpunimi ushtarak po vazhdon. Marrëdhëniet janë të thella”, tha ai.