FSK ka njoftuar se disa pjesëtarë po stërviten për qitje në distanca të largëta.
“Pjesëtarë të Forcës së Sigurisë së Kosovës kanë ndjekur trajnimin e specializuar në qitje në distanca të largëta me qëllim të ngritjes së kapaciteteve luftatake të FSK.”
FSK thotë se ku trajnim ka për synim certifikimin e pjesëtarëve si snajperistë profesionalë operativë, të aftë të përdorin kalibra të ndryshëm sipas standardeve moderne ushtarake.
“FSK vazhdon përkushtimin për zhvillimin dhe profesionalizimin e ushtarakëve të saj në nivelin më të lartë.”/ATVLIVE/
Altin Krasniqi ka udhëtuar sot drejt Hagës për ta vizituar babanë e tij, Jakupin i cili po mbahet në paraburgim tash e disa vjet.
Bashkë me Altinin, ishte edhe Doari – hera e parë e tij në vizitë tek xhaxhai, ndaj dita e sotme ishte shumë emocionuese.
“Sot, bashkë me Doarin, ishim për vizitë në Hagë. Hera e parë për Doarin te axhi Jakup ishte shumë emocionuese”, ka shkruar djali i Jakup Krasniqit në Facebook kur ka postuar edhe një fotografi.
Agjencia e Ushqimit dhe Veterinarisë ka thënë se prania e parazitëve të llojit “Anisakis simplex” në peshkun që importohet në Kosovë nuk e rrezikon shëndetin në rast se është i ngrirë.
Sipas AUV, peshku i ngrirë është i sigurtë për konsum, veçanërisht kur gatuhet në temperatura mbi 60 gradë.
“Theksojmë qartë: Prania e këtyre parazitëve nuk përbën rrezik për shëndetin e njeriut në rastin e peshkut të ngrirë, sepse procesi i ngrirjes në temperatura të ulëta i ka shkatërruar aftësinë e tyre për të shkaktuar sëmundje. Peshku i ngrirë është i sigurt për konsum, veçanërisht kur gatuhet në temperatura mbi 60°C – standard që siguron asgjësimin e çdo rreziku të mundshëm.”, thuhet në njoftimin e AUV-it.
Agjencia thotë se ndonjë incident mund të paraqitet vetëm në rastin e konsumimit të peshkut të freskët (të pa ngrirë) i cili nuk është trajtuar fare me nxehtësi apo ngrirje, veçanërisht në përgatitje si “crudo”, sushi apo sashimi.
“Kjo nuk është vetëm praktikë e vendeve të Bashkimit Evropian, SHBA-së apo Kanadasë, por është e përcaktuar qartë edhe në legjislacionin e Kosovës, të harmonizuar me direktivat e BE-së për sigurinë ushqimore. Këto standarde janë të bazuara në studime të shumta shkencore dhe në rekomandimet e institucioneve prestigjioze ndërkombëtare si: EFSA (Autoriteti Evropian për Siguri Ushqimore), FAO (Organizata e OKB për Ushqim dhe Bujqësi)”, thuhet tutje në njofim.
Kryeministri në detyrë, Albin Kurti ka folur për pezullimin e dialogut strategjik me SHBA-në.
Kurti ka thënë se pengesat në raport me Amerikën janë në fushën e diplomacisë. Sipas tij SHBA e konsideron shumë të rëndësishme ta tërheqë Serbinë nga hemisfera lindore, sepse Serbia është e lidhur ngushtë me Moskën.
Por, ai ka thënë se butësia me autokratët nuk është provuar kurrë të jetë e suksesshme.
Kurti po ashtu ta se nuk mund të bëjë kompromise me sundimin e ligjit në veri të vendit.
“Së pari dialogu strategjik nuk është pezulluar, por planifikimi për dialogun strategjik është pezulluar. Kjo është për dy arsye kryesore: E para për shkak të fillimit të sundimit të ligjit në veri të Kosovës, i cili rezultoi të ishte kundër strukturave ilegale serbe dhe nuk mund të bëjë kompromise këtu. Nuk mund tia lë këtë problem gjeneratës tuaj. Mendoj se brezi im duhet ta përfundojë këtë. Marrëdhënia jonë me SHB-në është tridimensionale, që do të thotë mbrojtje, zhvillim dhe diplomaci. Sinqerisht shtylla e mbrojtjes qëndron më mirë se të tjerat…. Aty ku i kemi disa pengesa është në diplomaci sepse sipas meje SHBA e konsideron shumë të rëndësishme ta ngrenë Serbinë nga hemisfera lindore, sepse Serbia është e lidhur ngushtë me Moskën.
Dhe ne, duke qenë të palëkundur me sundimin e ligjit, demokracisë, sovranitetit shtetëror dhe integritet territorial – disa politikanë dhe diplomatë në SHBA vlerësojnë se ne nuk po u ndihmojmë SHBA-ve ta shkëpusin Serbinë nga Federata Ruse, por sinqerisht kjo s’duhet të jetë problemi im. Më falni për sinqeritetin. Ashtu është. Pra unë përfaqësoj interesat e Republikës së Kosovës, dhe nëse jeni pak më të butë Beogradin, kjo nuk është provuar kurrë e dobishme sepse sa më mirë të silleni me ta aq më keq bëhen, sepse autokratët dhe diktatorët, nëse u shfaqë pak bujari, mendojnë se ke frikë nga ta”, ka thënë Kurti.
Kryeministri në detyrë, Albi Kurti, ka bërë homazhe te varrezat e vëllezërve Bytyqi, Yllit, Agronit e Mehmetit, në New York.
Në një njoftim të Kryeministrisë të shtunën në mbrëmje, Kurti është cituar të ketë thënë se ideali i vëllezërve që u vranë 26 vjet më parë nga forcat serbe, është udhërrëfyes për të ecur përpara.
“Duke i kujtuar e përkujtuar dëshmorët e kombit, në këtë rast vëllezërit Bytyqi, ne ia përkujtojmë vetes sonë se sa i lartë ishte çmimi që kemi paguar për lirinë që e gëzojmë dhe popullin që kemi, por njëkohësisht edhe ideali i tyre na shërben si udhërrëfyes për të ecur përpara, në mënyrë që të arrijmë atë çfarë ata e kanë dashur e për të cilën janë flijuar. Yllin, Agronin dhe Mehmetin do t’i kujtojmë përgjithmonë dhe brezi ynë ka për detyrë që këtë ta bëjnë edhe brezat pas nesh”, u shpreh ai.
Vëllezërit Bytyqi ishin luftëtarë të Ushtrisë Çlirimtare të Kosovës, pjesëtarë të njësitit të vullnetarëve “Atlantiku”. Më 23 qershor të vitit 1999, pak ditë pas çlirimit të Kosovës, tre vëllezërit shqiptarë kishin ndërmarrë një nismë shumë njerëzore: të përcjellin një familje rome nga Prizreni drejt kufirit me Serbi, që po shkonte drejt Kralevës. Gjatë këtij udhëtimi, ata të tre e kaluan paqëllimshëm kufirin, për çka u arrestuan nga policia serbe dhe u dënuan nga Gjykata për Kundërvajtje në Prokuple me 15 ditë burgosje. Kur po përfundonin dënimin, tre vëllezërit Bytyqi u dërguan në një bazë trajnimi të policisë serbe, ku u vranë me plumba pas koke dhe ua zhdukën gjurmët. Trupat e tyre u gjetën në vitin 2001, në një varrezë masive në Petrovo Sello, afër qytezës Kladovo, bashkë me shqiptarë të tjerë të vrarë nga forcat serbe gjatë luftës në Kosovë.
Në tetor të vitit 2019 dhe në korrik të vitit 2022, Dhoma e Përfaqësuesve e Kongresit Amerikan, ka miratuar dy rezoluta, me anë të të cilave, SHBA-ja i ka kërkuar veprime konkrete Serbisë dhe bashkëpunim me drejtësinë ndërkombëtare, për të nxjerrë para drejtësisë personat e përfshirë në këtë krim.
Presidentja e Kosovës, Vjosa Osmani ka marrë pjesë në një ngjarje të veçantë në New York, ku ka ndarë rrëfimin e Kosovës nga çlirimi e deri më sot, së bashku me ish-Presidentin e Shteteve të Bashkuara, Bill Clinton.
Në prani të një audience ndërkombëtare të përbërë nga figura të njohura dhe përfaqësues nga e gjithë bota, Osmani ka theksuar rrugëtimin e vendit drejt lirisë, demokracisë dhe shtetndërtimit.
“E nderuar që rrëfimin e Kosovës ta ndaj së bashku me Presidentin Clinton në New York, në prani të një audience të jashtëzakonshme nga e gjithë bota,” ka deklaruar Osmani përmes një postimi në rrjetet sociale.
Ajo shprehu mirënjohje të përjetshme për rolin historik të Shteteve të Bashkuara në lirinë dhe pavarësinë e Kosovës.
Kryeministri i Shqipërisë, Edi Rama, ka folur për Gjykatën Speciale dhe procesin “Thaçi dhe të tjerët”.
Rama tha se nuk ka vullnet në Kosovë për të dalë me një rezolutë të Parlamentit të Kosovës, një rezolutë që tha se Shqipëria do t’i bashkohej menjëherë ndaj Gjykatës Speciale.
“Nuk ka vullnet në Kosovë për të dalë me një rezolutë të Parlamentit të Kosovës, një rezolutë përtej partive politike të cilës ne do t’i bashkoheshim menjëherë ndaj Gjykatës Speciale dhe ndaj gjithë kësaj farse sepse ka shumë farsë në këtë mes”, ka thënë Rama pêr Klankosova.
Ai foli edhe për bisedat që i ka me ish-presidentin Hashim Thaçin, me të cilin tha se nuk dëgjohen shpesh.
“Hashimi dhe të tjerët dhe Parlamenti i Kosovës bënë një akt mirëbesimi. Nuk dëgjohemi shpesh [me Thaçin] por kam përshtypjen që ndjehemi gjatë gjithë kohës pa ndërprerje”, tha Rama, njofton Klankosova.tv.
Tutje, Rama tha se historia e Gjykatës Speciale do të lë gjurmë tek vendet që e sponsorizojnë atë, e për të cilat tha se ka përshtypjen që në një moment do të zgjohen për ta reformuar këtë lloj sistemi.
“Pa shkuar në parashikime ogurzeza, e gjithë kjo histori është një histori shumë e trishtueshme dhe zhgënjyese që unë kam përshtypjen që do të lë gjurmë tek vendet që e sponsorizojnë këtë gjykatë dhe kam përshtypjen që në një moment të caktuar do të zgjohen për ta reformuar këtë lloj sistemi kaq zhgënjyes”.
“Por, fatkeqësisht, në momentin që flasim, nuk kemi çfarë të bëjmë tjetër përveç se të ndjekim procesin duke shpresuar që në fund do të ketë një dritë ndërgjegjeje në momentin e marrjes së vendimit dhe nuk do të jetë deri në fund një tunel pa dritë si ky që ka qenë deri tani”, tha ai
Në një institucion që ka parë deputetë të vijnë e të shkojnë, reforma që kanë ndryshuar rrjedhën politike, dhe investime që kanë transformuar çdo cep, që nga holli e deri në sallën plenare, një element i vetëm ka mbetur stoik.
Kohës e teknologjisë moderne, në Kuvend i shpëtoi ky televizor, gjysmë çerek shekulli i vjetër, që ende transmeton seancat plenare.
Nga ky ekran i vjetër e i ngushtë, punëtorët e sigurimit përcjellin në kohë rrjedhën e seancës, për të qenë të përgatitur nëse kërkohen intervenimi i tyre.
Ndryshimet e kuvendit, e qëndrueshmërinë e televizorit, i pa nga afër edhe gazetari që përcolli punën e kuvendit ndër vite, Kosovë Gjoci.
“Një kohë e mbaj mend që ka qenë brenda tek ajo pjesa ku ne kemi qëndruar si gazetar sepse ka pasur periudha kur edhe e kemi pasur të ndaluar të rrimë në holl sepse dikur deputetet këtu kane pi cigare. Mandej me kohën kanë ndryshuar gjërat, ata kanë kaluar tek pjesa mbrapa por ky televizor realisht ka vite që qëndron këtu”, tha Gjoci.
Për një kohë, Gjoci thotë se iu shërbeu edhe gazetarëve.
“E mbaj mend në periudha të atëhershme kur kemi përdoru digdafon dhe kemi punuar kryesish për media të shkruara, e kemi përdor këtë televizor për me incizu zërin që na u është dashtë për ato çka është deklaru sepse atëherë edhe qasja në sallën ku tash shkojmë si media, nuk e kemi pas të drejtën me shku atje”, tha Gjoci.
Me një kërkim të thjeshtë në Google, vërtetohet se ky televizor është pjesë e një gjenerate tashmë të zhdukur, modelet analoge që shpenzojnë më shumë energji dhe nuk prodhohen më.
Në ndërkohë nga kuvendi bëjnë me dije se mos ndërrimi i tij nuk ka qenë për shkaqe mundësie, por vetëm për ta ruajtur si vlerë.
Kryeministri në detyrë i Kosovës, Albin Kurti, ishte folës kryesor në diskutimin e organizuar nga Instituti Zolberg on Migration and Mobility në kuadër të universitetit The New School në SHBA, me temën: “Mbështetja e qytetarëve të thjeshtë në një krizë ekonomike globale: Çfarë mund të mësojë bota nga Kosova”.
Kurti prezantoi qasjen e qeverisë së tij në përballjen me krizat globale, duke theksuar se Kosova ia ka dalë të ndihmojë qytetarët pa rritur taksat dhe pa shtuar borxhin publik.
Ai foli për masat e marra kundër inflacionit, përfshirë rregullimin e çmimeve tavan për disa produkte, mbështetjen për fermerët, bizneset e vogla e të mesme, subvencionimin e energjisë, si dhe programet për punësim të të rinjve e bursa për studentët.
“Është jetike që qeveritë të mbështesin qytetarët pa u zhytur në spiralen e rritjes së borxheve dhe pagesave me interes”, tha Kurti.
Ai shtoi se politikat e qeverisë kanë pasur në fokus barazinë shoqërore, zhvillimin ekonomik, sundimin e ligjit dhe luftimin e korrupsionit.
Një varrezë e re e zbuluar në Bjeshkët e Strellcit ka sjellë një zhvillim në kërkimin e të pagjeturve, por njëkohësisht ka ngritur pikëpyetje të reja.
Ndërsa Komisioni Qeveritar për Persona të Zhdukur ka njoftuar për gjetjen e mbetjeve mortore që dyshohet se u përkasin viktimave të luftës së fundit, banorët e zonës hedhin dyshime mbi këtë version.
Përballë këtyre versioneve të kundërta, Kushtrim Gara nga Komisioni Qeveritar për Persona të Zhdukur shpjegon për ATV-në se për të konfirmuar përputhshmërinë e mbetjeve mortore me familjarët që kanë dorëzuar mostra referuese, kërkohet një rezultat i saktë shkencor.
“Po flasim për një përputhshmëri prej 99.9% ose 99.95%, do të thotë se vetëm në raste të tilla mund të ketë konfirmim të përputhshmërisë” deklaroi për ATV-në Kushtrim Gara
Megjithatë, ai sqaron se ka edhe përjashtime nga ky rregull i përputhshmërisë së lartë, të cilat kërkojnë procedura shtesë dhe një rishqyrtimi të hollësishëm nga ekspertët.
“Mund të jenë raste specifike që pastaj duhet investim shtesë, po flas në kuptimin e mostrave shtesë referuese apo një rikthim në shqyrtimin e serishëm të mostrave” tha ai.
Ndërkohë që ekspertët mjeko-ligjorë po punojnë për identifikimin e eshtrave të Strellcit, Kosova vazhdon t’i kërkojë Serbisë të hapë arkivat shtetërore, për të kuptuar vendndodhjen e afër 1,600 personave që ende mungojnë që nga përfundimi i luftës.
