Presidentja e vendit, Vjosa Osmani, ka njoftuar se është pritur me nderime nga Mbreti dhe Mbretëresha e Danimarkës.
Osmani përmes një postimi në Facebook, theksoi mikpritjen e ngrohtë në Kopenhagë para fillimit të Liderëve të Komunitetit Politik Evropian.
“Faleminderit Lartmadhërive të Tyre, Mbretit dhe Mbretëreshës së Danimarkës, për mikpritjen e ngrohtë në Kopenhagë para fillimit të Samitit të Liderëve të Komunitetit Politik Evropian”, shkroi e para e shtetit.
Destinacioni i së mërkurës ishte i qartë, Kolegji AAB.
Institucionit arsimor më të madh jopublik në vend, të mërkurën iu bashkuan qindra studentë të rinj, për t’i thelluar njohuritë në nivelin e arsimit universitar.
Fletushkat që shpërndaheshin në hyrje ishin vetëm hapi i parë drejt një të ardhmeje që premton sukses.
Për t’i dhënë atmosferës peshë solemne, në teatrin “Faruk Begolli”, i priste ceremonia e përgatitur posaçërisht për ta, ku fjalët e mirëseardhjes u shndërruan urë për etapën e re.
Rektori Blerim Olluri theksoi se studentët kanë zgjedhur vendin e duhur, një hapësirë ku dija nuk mbetet vetëm në letra, por bëhet pjesë e jetës dhe e së ardhmes së tyre.
Me fjalë frymëzuese, kryetarja e Unionit të Studentëve, Rijona Bajrami, i siguroi kolegët e saj se në këtë rrugëtim nuk do të jenë kurrë vetëm.
Në këto 25 vjet, AAB ka dëshmuar se studentët e tij hyjnë në tregun e punës shpesh para se të kenë përfunduar studimet.
Ky fakt ishte arsyeja kryesore që e shtyu Elda Pantinën të zgjedhë gazetarinë në këtë kolegj.
Një pasuri tjetër e AAB-së janë marrëveshjet me universitete ndërkombëtare, që u japin studentëve shansin të studiojnë edhe përtej kufijve të Kosovës.
Në këtë ditë, Kolegji AAB nuk ishte thjesht një institucion, por një premtim për një të ardhme të ndritur.
Aeroplani i linjës direkte Xhide – Prishtinë, me 66 pasagjerë në bord, ateroi në mëngjesin e së mërkurës, në Aeroportin Ndërkombëtar të Prishtinës “Adem Jashari”.
Kështu nga kjo e mërkure zyrtarisht u hap linja më e re ajrore për në Xhide të Arabisë Saudite, që ndryshe konsiderohet edhe si porta hyrës për myslimanët që vizitojnë Mekën dhe Medinën.
“Ky rrugëtim është më shumë se një udhëtim, është urë mes popujve tanë dhe do të bëjë ndërlidhje. Kjo linjë shënon një kapitull të ri që forcon marrëdhëniet mes Kosovës dhe Arabisë”, tha Gökhan Acikgoz, drejtor i Aeroportit Ndërkombëtar të Prishtinës.
Përveç se u cilësoi moment historik, sipas ushtruesit të detyrës së Ministrit të Infrastrukturës, Hysen Durmishi, linja e re do të ndikojë edhe në turizmin kosovar.
“Besojmë se përmes rrugëtimeve dhe kontakteve do forcojmë më shumë bashkëpunimin mes dy popujve tanë që kanë traditë dhe kulturë të lashtë. Kjo linjë do të rrisë turizmin në Kosovë, do sjellë vizitorë nga Arabia dhe ata do të shijojnë bukuritë natyrore, ushqimin dhe mikpritjen e popullit tonë”, tha Durmishi.
Veç turizmit, fluturimi direkt për në Xhide e anasjelltas do të ndikojë edhe në sektorin ekonomik.
“Kosova është vend ideal për investitorë. Shpresoj që ato të gjejnë veten në tregun e Arabisë Saudite”, tha Lulzim Mjeku, ambasador i Kosovës në Arabinë Saudite.
Rëndësi më të veçantë kjo linjë direkte do ketë për Haxhilerët.
“Hapja e zyrës së kësaj kompanie ndihmon udhëtarët me shërbime më cilësore, sidomos ata që kryejnë haxh dhe umre”, tha Faisal Ghazi Ismail Hifzi, ambasador i Arabisë Saudite.
Kompania Flynas do ta realizojë fluturimin mes qytetit të dytë më të madh të Arabisë dhe Prishtinës.
“Ne kemi bërë historinë duke lidhur Kosovën me Arabinë Saudite. Sot fillojmë me 3 fluturime në javë drejt Jeddah dhe shpresojmë që ky numër do të rritet, duke ju uruar fluturim të këndshëm me Flynas”, tha Abulelah Aledi, president i kompanisë “Flynas”.
Nga Aeroporti i Prishtinës fluturimet drejt Xhides realizohen të mërkurën të premten dhe të dielën.
Ambasadori i Bashkimit Evropian në Kosovë, Aivo Orav, tha se komuniteti ndërkombëtar po analizon vendimin e publikuar nga Gjykata Kushtetuese e Kosovës, teksa u bëri thirrje partive politike që sa më shpejt të formojnë institucionet e reja.
“Jemi duke e analizuar aktualisht, por sigurisht shpresa jonë është që Kuvendit të konstituohet sa më shpejt që të jetë e mundur dhe shpresojmë që të ketë një qeveri me mandat të plotë sa më shpejt që të jetë e mundur”, tha Orav gjatë një prononcimi për media më 1 tetor.
Një ditë më parë, Gjykata Kushtetuese publikoi njoftimin për vendimin e saj lidhur me çështjen e Kuvendit, duke deklaruar se organi ligjvënës nuk është konstituuar, ashtu siç kishte pandehur në fund të gushtit kreu i ri i Kuvendit, Dimal Basha.
Kushtetuesja tha se Kuvendi nuk konsiderohet i konstituuar pa zgjedhjen e nënkryetarit nga radhët e komunitetit serb.
“Ju lutem, konstituojeni Kuvendin dhe ju lutem formoni një qeveri”, bëri thirrje ambasadorit i bllokut evropian në Kosovë.
Kushtetuesja tha se seanca konstituive – e nisur më 15 prill – nuk ka përfunduar dhe e njëjta duhet të përfundojë brenda 12 ditësh.
Aktgjykimi i plotë i Kushtetuese ende nuk është publikuar dhe vetëm pas publikimit të tij nis rrjedhja e afatit 12-ditor.
Kushtetuesja urdhëroi deputetët që “në pajtim me nenin 4 [Forma e Qeverisjes dhe Ndarja e Pushtetit], nenin 7 [Vlerat], paragrafin 4 të nenit 67 [Zgjedhja e Kryetarit dhe Nënkryetarëve] dhe nenin 74 [Ushtrimi i Funksionit] të Kushtetutës së Republikës së Kosovës, që gjatë procedurës së zgjedhjes së nënkryetarit të Kuvendit të Republikës së Kosovës nga radhët e deputetëve të komunitetit serb, të ushtrojnë funksionin e tyre kushtetues në interesin më të mirë të Republikës së Kosovës dhe në pajtim me Kushtetutën dhe Rregulloren e Kuvendit”.
Gjykata më e lartë në Kosovë e mori këtë vendim pas ankesës së Listës Serbe – partisë më të madhe të serbëve në Kosovë – lidhur me votimin ndaras të kandidatëve për nënkryetarë të Kuvendit të Kosovës nga radhët e pakicave.
Emilija Rexhepi është zgjedhur nënkryetare e Kuvendit nga minoriteti joserb, ndërsa asnjëri deputet serb nuk i ka siguruar votat e nevojshme për pozitën e rezervuar për këtë minoritet, pavarësisht disa rundeve të votimit.
Lista Serbe politik beson se kryetari i Kuvendit, Dimal Basha, nuk ka vepruar në mënyrë të drejtë kur, njëanshëm, e ka shpallur Kuvendin të konstituuar pa u zgjedhur edhe nënkryetari serb.
Pas pranimit të ankesës, Gjykata Kushtetuese ka vendosur një masë të përkohshme, e cila ua ka ndaluar deputetëve të ndërmarrin veprime drejt formimit të Qeverisë së re deri më 30 shtator, meqë ka pasur dyshime për ndonjë shkelje kushtetuese.
Kushtetuesja tha se masa e përkohshme do të mbetet në fuqi.
Lëvizja Vetëvendosje – partia fituese e zgjedhjeve të 9 shkurtit – ka deklaruar më herët se votimi në pako i dy nënkryetarëve të komuniteteve joshumicë nuk kërkohet me Kushtetutë, siç ka pretenduar Lista Serbe, dhe se Rregullorja e Kuvendit nuk është mbi dokumentin më të rëndësishëm të vendit.
Pavarësisht se zgjedhjet janë mbajtur në shkurt, Kosova vazhdon të mos i ketë institucionet e reja. Partitë më të mëdha shqiptare nuk kanë arritur pajtueshmëri për të çuar procesin përpara dhe për rrjedhojë Gjykata Kushtetuese është detyruar të dalë disa herë me aktgjykime.
Në zgjedhjet parlamentare, Lëvizja Vetëvendosje doli e para dhe fitoi 48 ulëse në Kuvend. Partia Demokratike e Kosovës doli e dyta me 24 ulëse, Lidhja Demokratike e Kosovës e treta me 20, pasuar nga Lista Serbe me nëntë dhe koalicioni mes Aleancës për Ardhmërinë e Kosovës dhe Nismës Socialdemokrate, me tetë të tilla.
Edhe 11 ulëse tjera janë të pakicave.
Faktori ndërkombëtar ka bërë disa herë thirrje që Kosova t’i formojë sa më shpejt institucionet e reja./REL
Misioni i OSBE-së në Kosovë ka riafirmuar mbështetjen për Gjykatën Kushtetuese, duke theksuar se vendimet e saj duhet të respektohen dhe të zbatohen plotësisht, pa ndikuar apo ndërhyrë në mënyrë të panevojshme në punën e saj.
Në reagimin e bërë publik, OSBE-ja ka theksuar se pavarësia e institucioneve gjyqësore është një gurthemel i shoqërisë demokratike.
“Misioni vëren me shqetësim deklaratat e fundit publike dhe iniciativat që, drejtpërdrejt apo tërthorazi, synojnë të sfidojnë ose diskreditojnë autoritetin e Gjykatës Kushtetuese. Përpjekjet për të politizuar punën e Gjykatës dhe të sistemit gjyqësor në përgjithësi, e dëmtojnë besimin e publikut në institucionet e Kosovës, e gërryejnë sundimin e ligjit dhe mund të vënë në pikëpyetje zhvillimin demokratik të vendit. Misioni i OSBE-së nënvizon se pavarësia e gjyqësorit është një domosdoshmëri për demokracinë”, thuhet në reagim.
Tutje, OSBE-ja ka theksuar se përfaqësuesit politikë dhe institucionet kanë përgjegjësi për të respektuar autoritetin e Gjykatës, duke forcuar besimin e publikut në kornizën kushtetuese të Kosovës dhe në sistemin e drejtësisë në përgjithësi.
“Misioni u bën thirrje të gjithë akterëve politikë që të mbështesin konstituimin e Kuvendit në përputhje me kornizën ligjore dhe me vendimet e Gjykatës Kushtetuese. Ne jemi të gatshëm të bashkëpunojmë ngushtë me Kuvendin dhe me deputetët e tij, pasi ai të jetë konstituuar plotësisht,” përfundon reagimi i OSBE-së.
Ky reagim vjen pas vendimit të Gjykatës Kushtetuese, e cila të martën konstatoi se Kuvendi i Kosovës nuk është i konstituar dhe se duhet të zgjidhet një nënkryetar nga radhët e komunitetit serb. Deputetëve iu dha afat prej 12 ditësh nga publikimi i aktgjykimit për ta përfunduar konstituimin, vendim që u mor pas ankesës së paraqitur nga Lista Serbe.
Presidentja Vjosa Osmani do ta përfaqësojë Kosovën në samitin e liderëve të Komunitetit Politik Evropian (EPC), i cili këtë edicion do të mbahet në Kopenhagë të Danimarkës dhe do të mbledhë 45 liderë evropianë, përfshirë edhe përfaqësues të institucioneve të Bashkimit Evropian.
Sipas njoftimit të Presidencës, para fillimit të samitit, Osmani do të pritet nga Lartmadhëritë e tyre, Mbreti dhe Mbretëresha e Danimarkës, ndërsa gjatë punimeve do të marrë pjesë në të dy seancat kryesore të këtij edicioni.
“Presidentja po ashtu do të marrë pjesë në tryezën mbi sfidat kryesore të sigurisë me të cilat po përballet Evropa, përfshirë rritjen e kërcënimeve hibride dhe provokimet e paprecedentë nga Rusia ndaj shteteve anëtare të NATO-s. Në këtë kontekst, liderët evropianë do të diskutojnë mënyrat për të shfrytëzuar momentumin politik për marrjen e vendimeve të domosdoshme, përfshirë forcimin e gatishmërisë mbrojtëse”, thuhet në njoftim.
Në kuadër të samitit, Osmani pritet të zhvillojë edhe takime dypalëshe me liderë evropianë pjesëmarrës.
Në Dhomat e Specializuara të Kosovës në Hagë vazhdon procesi gjyqësor ndaj ish-krerëve të Ushtrisë Çlirimtare të Kosovës, Hashim Thaçit, Kadri Veselit, Rexhep Selimit dhe Jakup Krasniqit.
Në seancën e sotme, dëshminë e vazhdon dëshmitari amerikan James Peter Covey, i cili gjatë viteve 1999-2001 ka shërbyer si zëvendës i përfaqësuesit të posaçëm të Sekretarit të Përgjithshëm të OKB-së në Kosovë, Bernard Kouchner.
Të martën dëshmitari u pyet nga mbrojtja e Hashim Thaçit, e përfaqësuar nga avokati Luka Mishetiq. Pasi përfundoi pyetjet mbrojtja e Thaçit, tri ekipet tjera mbrojtëse njoftuan se nuk kanë pyetje për këtë dëshmitar.
Gjatë dëshmisë, Covey theksoi se UÇK-ja ishte më shumë një lëvizje sesa një ushtri e mirëorganizuar, ku komandantët në terren kishin autonomi të gjerë dhe vepronin në bazë të vendimeve të tyre lokale.
“Ata mendonin që mund të bënin atë që vendosnin të bënin në zonën e tyre. Kjo ishte mënyra se si e kemi kuptuar ne”, deklaroi Covey.
I pyetur për rolin e Hashim Thaçit, Covey tha se UNMIK nuk e ka trajtuar kurrë atë si komandant të UÇK-së dhe se ai nuk jepte urdhra.
Gjatë seancës u shfaq edhe një dokument i nënshkruar nga Thaçi si “komandant i përgjithshëm i UÇK-së”, dërguar Kouchnerit në kuadër të marrëveshjes së çarmatosjes së UÇK-së, përmes së cilës kërkohej leje që disa pjesëtarë të UÇK-së të mbanin armë brezi.
Sidoqoftë, Covey sqaroi se ky gjest u interpretua si përpjekje për të shërbyer një interesi tjetër dhe jo si shenjë e ndonjë autoriteti ushtarak real. Ai shtoi se për këtë kërkesë nuk ka pasur përgjigje nga UNMIK-u, pasi çështja binte nën kompetencën e KFOR-it.
Covey foli gjithashtu për përpjekjet për integrimin e ish-luftëtarëve të UÇK-së në Policinë e Kosovës, si dhe për sfidat në bindjen e elementëve më radikalë brenda UÇK-së që të angazhoheshin në strukturat e reja të sigurisë. Ai tha se nuk ka pasur një pasqyrë të qartë të strukturës komanduese të UÇK-së, dhe se në terren ekzistonte një larmi komandantësh me lidhje të ndryshme dhe të paqarta hierarkike.
Dëshmitari përshkroi marrëdhënien e Thaçit me komandantët e zonave si të ndërlikuar dhe me rezerva reciproke. Ai tha se gjatë një takimi në shtator të vitit 1999, ku Bernard Kouchner kishte shkuar për të bindur komandantët për demilitarizim, Thaçi nuk kishte folur fare dhe se nuk kishte respekt të dukshëm ndaj tij nga komandantët lokalë.
Sipas avokatit të Thaçit, Luka Mishetiq, dëshmia e Covey-it konfirmon se Thaçi nuk kishte autoritet real mbi UÇK-në dhe nuk ishte në pozitë për të organizuar apo ndalur ndonjë akt dhune gjatë verës së vitit 1999.
Një tërmet i fuqishëm me magnitudë 6.9 të shkallës Rihter ka goditur Filipinet Qendrore, duke shkaktuar humbjen e jetës së mbi 60 personave, sipas zyrtarëve të menaxhimit të fatkeqësive.
Goditja ka prekur kryesisht qytetin e Bogos dhe disa qytete të tjera të rajonit, të cilat kanë shpallur gjendjen e katastrofës, ndërsa ekipet kanë nisur vlerësimin e dëmeve.
Tërmeti ndodhi pak para orës 22:00 sipas kohës lokale (14:00 GMT) të martën, në brigjet e qytetit Cebu. Si pasojë, shumë ndërtesa u dëmtuan, energjia elektrike u ndërpre dhe qindra familje mbetën pa strehë. Qyteti Cebu, me rreth një milion banorë, është një nga zonat më të banuara në vend dhe ka përjetuar pasiguri të mëdha pas goditjes.
Instituti i Vullkanologjisë dhe Sizmologjisë shpalli fillimisht një paralajmërim për cunami, por më pas e anuloi, duke theksuar se “çdo efekt për shkak të çrregullimeve të vogla të nivelit të detit ka kaluar kryesisht”.
Autoritetet ndërkohë vijojnë përpjekjet për shpëtim dhe ofrojnë ndihmë për të prekurit, ndërsa banorët e rajonit janë ende të tronditur nga shkalla e katastrofës.
Komisioni Qendror i Zgjedhjeve (KQZ) sot mban mbledhjen e radhës.
Mbledhja do të mbahet në ora 13:30, derisa pritet të miratohet akreditimi i vëzhguesve ndërkombëtarë për zgjedhjet lokale
Rendi i Ditës
1. Hyrje: z. Kreshnik Radoniqi, Kryesues i mbledhjes së KQZ-së;
2. Shqyrtimi dhe miratimi i procesverbalit të mbledhjes Nr.60/20253. Aktivitetet e Zyrës
3.1. Shqyrtimi dhe miratimi i rekomandimit për akreditimin e vëzhguesve ndërkombëtar dhe
përfaqësive diplomatike në Republikën e Kosovës.
4. Këshillat e KQZ-së
4.1. Këshilli për Operacione Zgjedhore
4.1.1. Shqyrtimi dhe miratimi i Procedurës të Veprimit në Qendrën Komunale të Numërimit për
4.1.2. Shqyrtimi dhe miratimi i rekomandimit për emërimin e ekipeve të numërimit në Qendrat Komunale të Numërimit për
Zgjedhjet Lokale 2025
5. Të ndryshme.
Kryeministri në detyrë i Republikës së Kosovës, Albin Kurti, takoi në Washington D.C. senatoren amerikane nga radhët e Partisë Republikane, Joni Ernst.
Gjatë takimit, palët diskutuan për zhvillimet aktuale në vend dhe në rajon, për siguri, mbrojtje, integrim euro-atlantik dhe zhvillim ekonomik të Kosovës.
Kurti veçoi rëndësinë dhe vlerën e marrëdhënieve ndërmjet Gardës Kombëtare të Iowa-s dhe Forcës së Sigurisë së Kosovës në fushën e mbrojtjes, duke shprehur përkushtimin e tij dhe të qeverisë për t’i thelluar edhe më tej ato.
Ai gjithashtu theksoi rëndësinë e investimeve amerikane në Kosovë dhe paraqiti mundësitë që Kosova ofron për investitorë të huaj në infrastrukturë, energji dhe teknologji.
Kryeministri në detyrë e falënderoi senatoren Ernst për miqësinë dhe mbështetjen e saj të palëkundur për popullin e Kosovës dhe për angazhimin dhe kontributin në forcimin e lidhjeve dhe raporteve ndërmjet Kosovës dhe shtetit të Iowa-s, si dhe të Shteteve të Bashkuara të Amerikës në përgjithësi.