Tag: Ballina

Moskonstituimi i institucioneve shtetërore po vazhdon të ketë ndikim negativ në ekonominë e vendit, duke krijuar pasiguri te bizneset vendore dhe investitorët e huaj. Bizneset vendore dhe investitorët e huaj po përballen me një klimë të pasigurt, e cila po i detyron të ngadalësojnë aktivitetet dhe planet e tyre për zhvillim e investim, raporton KosovaPress.

Ekspertë të ekonomisë dhe afaristë vlerësojnë se mungesa e stabilitetit politik dhe qeverisës po pengon zhvillimin e qëndrueshëm ekonomik dhe sic thonë ata po krijon pasiguri të vazhdueshme në tregun vendor.

Profesori universitar Sejdi Rexhepi, thotë për KosovaPress theksoi se “situata aktuale po e lë shtetin dhe ekonominë në një gjendje të paorganizuar”. Sipas profesorit Rexhepi, përveç bizneseve vendore, kjo po ndikon në mënyrë të drejtpërdrejtë edhe tek bizneset ndërkombëtare të cilat edhe nëse kanë pasur për qëllim të investojnë në këtë periudhë, sipas tij nuk kanë investuar dhe e kanë shtyrë për një periudhë tjetër kohore kur situata të jetë stabile.

Gjithashtu eksperti financiar Emanuel Bajra thekson se përveç varësisë që është krijuar nga bizneset ndaj ndihmave dhe subvencioneve shtetërore, ngërçi politik po sjellë pasoja serioze në modelimin e ekonomisë së vendit.

Përveç kësaj, Bajra thotë për KosovaPress se është e nevojshme të gjendet një zgjidhje politike për të dalë nga kjo krizë për hirë të ekonomisë, konsumatorit dhe gjithashtu sic potencon ai për rreziqet që po vijnë nga jashtë Kosovës.

Edhe sektori privat po përballet me sfida të mëdha si pasojë e vakumit institucional. Pronari i kompanisë “ELKOS”, Ramiz Kelmendi, thotë se dëmet për ekonominë dhe bizneset janë të mëdha dhe të pambarueshme.

Përderisa situata politike vazhdon të mbetet e pasigurt, thirrjet nga ekspertët dhe bizneset për stabilitet institucional janë gjithnjë e më të zëshme, në mënyrë që të shmangen pasojat afatgjate për ekonominë e vendit.

Përveç kësaj, mungesa e formimit të institucioneve të reja, rrezikon që vendi të mbetet edhe pa buxhet për vitin e ardhshëm.

Zgjdhjet dhe bllokada në Kuvend

Kosova ka mbajtur zgjedhjet parlamentare më 9 shkurt, por ende nuk është bërë formimi i institucioneve të reja.

Seanca konstituive e Kuvendit të Kosovës u mbyll më 30 gusht nga kryeparlamentari Dimal Basha, ani pse deputetët nuk arritën të zgjedhin nënkryetarin nga komuniteti serb, krahas zgjedhjes së kryetarit dhe katër nënkryetarëve të tjerë të legjislativit.

Më 30 shtator, Gjykata Kushtetuese e Kosovës njoftoi se seanca konstituive e Kuvendit të Kosovës nuk ka përfunduar.

Kushtetuesja vendosi që Seanca Konstituive e Kuvendit, e filluar me 15 prill 2025 nuk ka përfunduar si rezultat i moszgjedhjes së nënkryetarit të Kuvendit nga radhët e deputetëve të komunitetit serb.

Sipas këtij vendimi të Gjykatës, seanca konstituive e Kuvendit duhet të përfundojë brenda afatit të përcaktuar me paragrafin 1 të nenit 66 [Zgjedhja dhe Mandati] të Kushtetutës së Republikës së Kosovës dhe sipas Aktgjykimit të Gjykatës në rastet KO193/25 dhe KO196/25, përkatësisht brenda afatit të mbetur prej 12 ditëve nga hyrja në fuqi e këtij Aktgjykimi.

Udhëheqësit e Ballkanit Perëndimor do të mblidhen të hënën në Durrës, për Samitin e Iniciativës Brdo-Brioni, me fokus kryesor perspektivën evropiane të rajonit dhe zbatimin e Planit të Rritjes së Bashkimit Evropian.

Samiti, i cili mbahet nën moton “Interesa të përbashkëta, angazhim i përbashkët për një të ardhme të përbashkët: Së bashku drejt BE-së”, organizohet nga presidentët e Sllovenisë dhe Kroacisë, Natasha Pirc Musar dhe Zoran Milanoviç, dhe drejtohet nga Presidenti i Shqipërisë, Bajram Begaj.

Në thelb të diskutimeve do të jetë Plani i Rritjes i BE-së për Ballkanin Perëndimor, një instrument financiar me vlerë 6 miliardë euro për periudhën 2024-2027, i cili synon integrimin gradual të vendeve të rajonit në tregun e përbashkët të BE-së.

Një incident i rëndë ka ndodhur pasditen e djeshme në kryeqytet, ku një i mitur është plagosur me armë zjarri në një zonë të frekuentuar afër Katedrales “Nënë Tereza” në Prishtinë.

Sipas të dhënave që do të verifikohen gjatë hetimeve, e që disponon Sinjali, më 04 tetor 2025, rreth orës 16:30, policia ka marrë informacion për një plagosje me armë zjarri në nënkalimin afër Katedrales, në rrugën “Mark Sopi”.

Në vendin e ngjarjes kanë dalë njësitë reaguese, të cilat kanë gjetur viktimën, E.G rreth 16-vjeçar me plagë në këmbën dhe dorën e majtë. I mituri është transportuar menjëherë me ndihmën e shpejtë në Emergjencë, dhe më pas është hospitalizuar në Ortopedi.

Sipas dëshmitarit që ishte me të në momentin e ngjarjes, dy persona të dyshuar, M.G rreth 20-vjeçar dhe H. M (në kërkim identiteti të plotë), kanë shtënë me armë dhe më pas janë larguar në këmbë në drejtim të panjohur.

Në vendngjarje, hetuesit kanë siguruar prova materiale, përfshirë dy gëzhoja, një fishek të pashkrepur dhe njolla gjaku, ndërsa është aktivizuar unaza e çeliktë për rrethimin e zonës.

Në rast janë përfshirë hetuesia dhe njësitë e Krim Teknikës Rajonale, që kanë zhvilluar ekzaminimet.

Pas identifikimit të të dyshuarve, policia ka lokalizuar vendbanimet e tyre, por të dy ndodhen ende në arrati.

Me udhëzim të Prokurorit të Departamentit për të Mitur, rasti është cilësuar si “Vrasje në tentativë”, ndërsa kërkimet për kapjen e autorëve janë në vazhdim.

Mbi 12 milionë euro është vlera e pasurisë së konfiskuar, ngrirë dhe sekuestruar gjatë katër viteve të fundit, të administruar Agjencia e Administrimit te Pasurive te Sekuestruara dhe te Konfiskuara.

Kështu ka shkruar ushtruesi i detyrës së ministrit të Drejtësisë, Blerim Sallahu, sipas së cilit shumë shpejt, pasuria e përfituar jashtëligjshëm nga zyrtarë publik do të jetë cak i Byrosë Shtetërore për verifikimin dhe konfiskimin e pasurisë së pajustifikueshme, e cila aktualisht pret që një kohë të gjatë pa asnjë arsyetim në sirtarët e Gjykatës Kushtetuese për hyrjen në fuqi të ligjit.

“Atëherë edhe shifrat do të jenë krejtsisht tjera, ku koncepti i realizimit të drejtësisë do të gjej efikasitetin e vet. Byroja do të jetë institucioni që nuk do të tolerojë më përfitime të “rastësishme” nga zyrtarë publik që nuk arrijnë të dëshmojnë prejardhjen e pasurisë së tyre. Pasuritë e tilla do të sekuestrohen dhe konfiskohen, pastaj ato do t’u kthehen qytetarëve si pronar legal e legjitim”, ka shkruar ai./ATVLIVE/

Presidenca e Republikës së Kosovës ka reaguar ashpër ndaj deklaratës së fundit të presidentit serb Aleksandar Vuçiq, duke e akuzuar atë për “thirrje të pamatura për luftë” dhe për përpjekje për të rikthyer politikën shkatërruese të viteve ’90 në rajon.

Në një postim të publikuar në platformën X, Presidenca shkruan se “thirrjet e pamatura të Vuçiqit për luftë janë një jehonë e rrezikshme e kapitujve më të errët të historisë së fundit”.

Përkundër përpjekjeve të pandalshme të Shteteve të Bashkuara dhe Bashkimit Evropian për të ndërtuar paqen në Ballkan, sipas Presidencës, “Vuçiq po i tregon botës se nuk ka zgjedhur rrugën e pajtimit”.

“Pavarësisht viteve të përpjekjeve të palodhura nga Shtetet e Bashkuara dhe Evropa për të hapur rrugën drejt një paqeje të qëndrueshme, Vuçiq po i tregon botës se nuk e ka zgjedhur rrugën e pajtimit. Në vend që ta kthejë faqen, Vuçiq dhe regjimi i tij po flirtojnë sërish me të njëjtat fantazi shkatërrimtare që dikur lanë pas vetes një mori jetësh të pafajshme të humbura”, thuhet në reagim.

Presidenca ka përmendur edhe të kaluarën e errët të udhëheqësit serb gjatë luftërave në ish-Jugosllavi.

“Në vitet 1990, Sllobodan Millosheviqi zgjodhi luftën gjenocidale si mjetin e tij të fundit të dëshpëruar për të ruajtur pushtetin. Ai shkaktoi dhunë çnjerëzore në Kroaci, në Bosnje dhe Hercegovinë dhe, në fund, në Kosovë, të gjitha të dokumentuara me kujdes përpara syve të botës. Përmes makinerisë së tij propagandistike, me Vuçiqin si shef propagande, ai nxiste urrejtjen që çoi në vrasje sistematike, varreza masive, shkatërrim dhe izolimin më të thellë të Serbisë. Pushteti i tij përfundoi me turp: u rrëzua nga vetë populli i tij, u gjykua si kriminel lufte dhe mbahet mend si njeriu që e çoi kombin e tij në shkatërrim – dhe si kasapi i Ballkanit,” përkujton Presidenca.

Në vijim të reagimit, theksohet se “Vuçiq duket se beson se mund të ringjallë të njëjtën formulë të helmatisur: nxitjen e konfliktit, lojën me jetët e njerëzve dhe shpresën se gjakderdhja do ta mbajë në pushtet”.

Por sipas Presidencës, “historia është e qartë dhe e pamëshirshme. Milosheviqi dështoi — dhe do të dështojë edhe Vuçiq”.

Duke përfunduar deklaratën, në reagim theksohet se për dallim nga Serbia, “Kosova ka zgjedhur paqen. Paqen që do ta mbrojmë me çdo kusht”.

Vucic’s reckless calls for war are a dangerous echo of the darkest chapters of recent history.

Despite years of tireless American and European engagement to pave the road toward lasting peace, Vucic is showing the world that he has not chosen the path of reconciliation. Instead… pic.twitter.com/fxNb4McHpd

— The Presidency of the Republic of Kosovo (@Presidenca_RKS) October 4, 2025

Senatorët amerikanë Thom Tillis dhe Jeanne Shaheen kanë paraqitur një amendament në kuadër të Aktit të Autorizimit të Mbrojtjes për vitin 2026, i cili synon të forcojë rolin e Shteteve të Bashkuara në procesin e normalizimit të marrëdhënieve ndërmjet Kosovës dhe Serbisë.

Ky amendament përfshin mbështetjen e SHBA-së për njohjen reciproke midis dy vendeve, si dhe refuzimin e çdo politike që nxit ndarjen e territoreve, transmeton Telegrafi.

Më poshtë Neni 1280 që flet për marrëdhëniet ndërmjet Kosovës dhe Serbisë:

Qëndrim i Kongresit.

Ky është qëndrimi i Kongresit që:

1. Marrëveshja për Rrugën drejt Normalizimit të Marrëdhënieve, e cila u arrit midis Kosovës dhe Serbisë më 27 shkurt 2023, me ndërmjetësimin e Bashkimit Europian, përbën një hap pozitiv përpara drejt avancimit të procesit të normalizimit midis dy vendeve;
2. Serbia dhe Kosova duhet të angazhohen për të bërë përparim të menjëhershëm në Aneksin e Zbatimit të marrëveshjes së përmendur në pikën (1);

3. Pasi të jetë arritur përparim i mjaftueshëm në Aneksin e Zbatimit, Shtetet e Bashkuara duhet të shqyrtojnë mundësinë e nismave për forcimin e marrëdhënieve dypalëshe me të dyja vendet, që mund të përfshijnë:

(A) Krijimin e dialogut strategjikë dypalësh me Kosovës dhe Serbisë; dhe

(B) Nisma konkrete për thellimin e lidhjeve ekonomike dhe investimeve me të dyja vendet;

4. Shtetet e Bashkuara duhet të vazhdojnë të mbështesin një marrëveshje përfundimtare gjithëpërfshirëse midis Kosovës dhe Serbisë, të bazuar në njohje reciproke.

(b) Shprehje e politikës shtetërore

Politika e Qeverisë së Shteteve të Bashkuara është që:

1. Të mos ndjekë asnjë politikë që mbështet shkëmbime territoresh, ndarje ose forma të tjera të rishkrimit të kufijve mbi baza etnike në Ballkanin Perëndimor si mënyrë për zgjidhjen e mosmarrëveshjeve ndërmjet shteteve të rajonit; dhe

2. Të mbështesë demokracitë pluraliste në vendet e Ballkanit Perëndimor, si një mënyrë për të parandaluar rikthimin e konflikteve etnike që kanë karakterizuar më parë rajonin. /Telegrafi/

Është përuruar sot rruga ndërkufitare Gorozhup (Has i Prizrenit) – Pogaj, projekt që vjen në kuadër të marrëveshjeve të nënshkruara ndërmjet Kosovës dhe Shqipërisë, me vlerë prej afër 1 milion euro dhe gjatësi prej 3.7 kilometrash.

Në ceremoninë e inaugurimit mori pjesë edhe kryeministri në detyrë, Albin Kurti, i cili e vlerësoi këtë rrugë si të rëndësishme për banorët e zonës, duke theksuar gjithashtu ndikimin që ajo ka në zhvillimin e turizmit malor e kulturor për të dy shtetet e të njëjtit komb.

“Kjo është një pjesë e vogël e borxhit të madh që kemi ndaj këtij komuniteti, që i ka dhënë shumë edhe zhvillimit ekonomik edhe historisë sonë kombëtare. Pas përfundimit të rrugës Kërstec-Pakishtë-Zapot, e cila ishte me vlerë prej 2.6 milionë euro, kjo rrugë që inauguruam sot, Gorozhup-Pogaj është në vlerë prej afër 1 milion euro dhe me gjatësi prej 3.7 kilometra. I lidhë këto fshatrat, Gorozhup edhe Pogaj, që historikisht kanë qenë një dhe të cilat i bashkojnë familja, tradita dhe jeta e përditshme. Pra, lidhja jonë me Shqipërinë, përveçse historike e shpirtërore, duhet të jetë edhe fizike, e pikërisht kjo rrugë që e inaugurojmë sot është një dëshmi për hapat konkretë në drejtimin e duhur”, citohet të ketë thënë Kurti, sipas njoftimit të Zyrës së Kryeministrit.

Kryetarja e Alternativës, Mimoza Kusari-Lila, e cila është pjesë e Grupit Parlamentar të Lëvizjes Vetëvendosje, ka deklaruar se mbajtja e zgjedhjeve të reja parlamentare është bërë e domosdoshme, pasi Kosova tashmë ka hyrë në muajin e tetë pa institucione të reja pas zgjedhjeve të 9 shkurtit. Megjithatë, ajo vlerëson se para shpalljes së zgjedhjeve duhet të arrihet një marrëveshje politike për formimin e një qeverie të përkohshme, me mandat vetëm legjislativ.

Në një intervistë për KosovaPress, Kusari-Lila tha se një qeveri e tillë do të kishte për detyrë miratimin e projektbuxhetit për vitin 2026 dhe disa marrëveshje ndërkombëtare që lidhen me fondet e Bashkimit Evropian për Kosovën.

“Zgjedhjet janë të domosdoshme, sepse kanë kaluar tetë muaj prej mbajtjes së tyre dhe ende nuk kemi Kuvend të konstituuar. Në një situatë të tillë, vendimi më demokratik është t’i kthehemi qytetarëve. Megjithatë, përpara se të shkohet në zgjedhje, duhet të sigurohemi që buxheti dhe marrëveshjet e BE-së të mos bllokohen”, tha ajo.

Pa numra për qeverinë “Kurti III”

Deputetja e Grupit Parlamentar të Vetëvendosjes pranoi se shumica aktuale nuk i ka numrat për formimin e qeverisë së re, edhe nëse rikthehen negociatat me Nismën Socialdemokrate.

“Edhe nëse ka pajtim me Nismën, nuk arrihen 61 vota. Kjo nënkupton që funksionimi i qeverisë do të ishte i brishtë. Prandaj, një marrëveshje politike për kalimin e buxhetit dhe disa projektligjeve jetike është më e arsyeshme”, theksoi ajo.

Vendimi i Kushtetueses, në pritje të aktgjykimit të plotë

Kusari-Lila tha se është e rezervuar për të komentuar vendimin e Gjykatës Kushtetuese, e cila ka konstatuar se Kuvendi nuk është konstituuar, për shkak se nuk është zgjedhur nënkryetari nga komuniteti serb. Ajo pret publikimin e aktgjykimit të plotë për të parë nëse ai do të specifikojë të drejtën ekskluzive të Listës Serbe për ta nominuar kandidatin.

“Nëse Kushtetuesja nuk e lidh këtë pozitë vetëm me Listën Serbe, atëherë kjo do të mund të hapte rrugë për një pluralizëm më të madh politik brenda komunitetit serb”, shtoi ajo, duke theksuar se nuk do të votojë asnjë kandidat të Listës Serbe për nënkryetar të Kuvendit.

Koalicioni me Vetëvendosjen

Duke folur për raportet e Alternativës me Lëvizjen Vetëvendosje, Kusari-Lila tha se do të kërkojë që bashkëpunimi të formalizohet në formën e një koalicioni zyrtar, për të siguruar stabilitet dhe qartësi politike.

“Kërkojmë që të jemi zyrtarisht në koalicion me LVV-në. Nuk kemi pasur kërkesa për poste apo kushte, por mendojmë se një marrëdhënie e qartë politike është e nevojshme për mbarëvajtjen e jetës institucionale dhe për identitetin tonë politik”, përfundoi ajo.

Pas deklaratave të Hamasit dhe presidentit amerikan Donald Trump lidhur me propozimin për t’i dhënë fund luftës në Gaza dhe për lirimin e pengjeve, Forcat Mbrojtëse të Izraelit (IDF) njoftuan se Shefi i Shtabit, Gjenerallejtënant Eyal Zamir, është takuar me gjeneralët më të lartë për një “vlerësim të posaçëm të situatës në dritën e zhvillimeve”.

Në një deklaratë të ushtrisë thuhet se “sipas urdhrit të nivelit politik”, Zamir u ka kërkuar Forcave Mbrojtëse të Izraelit që të përgatiten “për zbatimin e fazës së parë të planit të Trump për lirimin e pengjeve”, pa dhënë detaje të saktë mbi përmbajtjen e këtij urdhri, raporton timesofisrael.

Deklarata gjithashtu konfirmon raportimet se liderët politikë i kanë urdhëruar IDF-së të ndalojë ofensivën për marrjen e qytetit të Gazës dhe të përqendrohet në operacione mbrojtëse, duke theksuar: “Siguria e forcave tona është me rëndësi supreme dhe të gjitha kapacitetet e IDF-së do t’i caktohen Komandës së Jugut për mbrojtjen e trupave tona”.

“Shefi i shtabit theksoi se, për shkak të ndjeshmërisë operative, forcat duhet të tregojnë një gatishmëri dhe vetëdije të shtuar. Po ashtu, u theksua nevoja për një reagim të shpejtë për të neutralizuar çdo kërcënim”, shtohet në deklaratë.

Kjo vjen pas një video-mesazhi të presidentit amerikan, Donald Trump, në të cilin ai i bëri thirrje Izraelit të ndalojë bombardimet në Gazë, pasi Hamasi ka pranuar propozimin amerikan për t’i dhënë fund luftës.

Radioja ushtarake izraelite raportoi se urdhri kërkon që operacionet të reduktohen në minimum dhe që trupat në terren të kryejnë vetëm të ashtuquajturat “manovra mbrojtëse”.

Ky urdhër u dha pas bisedimeve gjatë natës midis zyrtarëve izraelitë dhe atyre amerikanë.

Një protestë gjithëkombëtare pritet të mbahet më 17 tetor në sheshin “Skënderbeu” në Tiranë, në mbështetje të ish-krerëve të Ushtrisë Çlirimtare të Kosovës që po gjykohen në Hagë.

Kjo do të jetë protesta e tretë me radhë gjatë këtij viti, përmes së cilës është kërkuar lirimi i tyre.

Kjo protestë është mbështetur nga dy krerët e partive opozitare në Kosovë, Memli Krasniqi nga Partia Demokratike e Kosovës (PDK) dhe Ramush Haradinaj nga Aleanca për Ardhmërinë e Kosovës (AAK).

Krasniqi ka thënë se le të jetë kjo protestë thirrje e të gjithë shqiptarëve, kudo që jetojnë, për të mbrojtur historinë, dinjitetin dhe luftën për liri.

“Nga Tirana në Prishtinë, nga Shkupi në Ulqin, nga Presheva deri në diasporë, një zë, një qëndrim, një kauzë: Drejtësi për çlirimtarët tanë!”, ka shkruar ai në ‘Facebook’.

Mbështetje kësaj proteste i ka dhënë edhe Haradinaj. “Qëndrojmë gjithmonë në të drejtën e luftës sonë për liri”, ka thënë ai.

Organizata e Veteranëve të Luftës së Ushtrisë Çlirimtare të Kosovës ka njoftuar se protesta do të jetë paqësore, me kërkesën për drejtësi ndaj ish-eprorëve të UÇK-së.

Kryetari i OVL-UÇK-së, Hysni Gucati, nga Tirana u bëri thirrje qytetarëve dhe forcave politike që t’i bashkohen protestës, duke theksuar se ajo pason demonstratat e mbajtura më parë në Prishtinë dhe në Hagë, ku ndodhet selia e Dhomave të Specializuara.

“Sot nga kjo tryezë ju drejtohemi të gjithë shqiptarëve, partive politike, bashkohuni me ne në këtë protestë paqësore në Tiranë. Le të ngrihemi të gjithë si një vend i vetëm që t’i kundërvihemi padrejtësive”, tha Gucati.

Organizatorët theksojnë se protesta synon të shndërrohet në një thirrje të përbashkët gjithëkombëtare kundër procesit gjyqësor ndaj ish-krerëve të UÇK-së, të cilin e konsiderojnë të padrejtë.