Tag: Ballina

Një punonjës në emergjencën në qytetin e Mitrovicës ka raportuar në Polici se është sulmuar fizikisht nga një person, pas një fjalosje rreth një tretmani mjekësor

Sipas raportit 24 orësh të Policisë së Kosovës bëhet e ditur se rasti ka ndodhur të hënën rreth orës 19:30 në rrugën “Bislim Bajgora”, në këtë qytet.

Tutje bëhet e ditur se viktima ka marrë tretman mjekësor, ndërsa i dyshuari pas intervistimit me vendim të prokurorit është liruar në procedurë të rregullt.

“Ankuesi mashkull kosovar, ka raportuar se deri sa ishte në vendin e punës në emergjencën e qytetit, një i dyshuar mashkull kosovar, pasi kishin një fjalosje rreth një tretmani mjekësor, ka sulmuar fizikisht viktimën. Viktima ka marrë tretman mjekësor, ndërsa i dyshuari pas intervistimit me vendim të prokurorit është liruar në procedurë të rregullt”, thuhet në raport.

Një ngjarje e rëndë ka tronditur Tiranën pasditen e së hënës. Gjyqtari i Gjykatës së Apelit të Juridiksionit të Përgjithshëm, Astrit Kalaja, është qëlluar për vdekje brenda sallës së gjyqit nga njëra prej palëve të përfshira në proces.

Sipas Policisë së Shtetit, autori i dyshuar është Elvis Shkëmbi, 30 vjeç, i cili ka qenë palë në çështjen gjyqësore. Ai ka qëlluar me armë zjarri ndaj gjyqtarit dhe më pas edhe drejt palës tjetër në proces – babë e bir, R. K. (65) dhe E. K. (45) – të cilët mbetën të plagosur, por janë jashtë rrezikut për jetë.

Ngjarja ndodhi rreth orës 15:40, në ambientet e Gjykatës së Apelit në Tiranë, ndërsa më pas zona u rrethua nga njësi të shumta të policisë.

Autori është arrestuar në vendngjarje, ndërsa policia ka sekuestruar edhe armën e krimit. Në njoftimin zyrtar thuhet se ai është shoqëruar në ambientet e Drejtorisë Vendore të Policisë Tiranë për hetime të mëtejshme.

Sipas raportimeve në mediat shqiptare, shkak i krimit dyshohet të jetë një konflikt pronësor. I dyshuari thuhet se ka deklaruar pas arrestimit se “e qëlloi gjyqtarin sepse po humbiste rastin, edhe pse ishte korrekt me dokumentet”.

Më herët, Elvis Shkëmbi është denoncuar nga dhjetëra familje në Shkodër për çështje të ngjashme pronësore.

Ngjarja është dënuar gjerësisht nga politika dhe organizatat ndërkombëtare, të cilat e kanë cilësuar si një sulm të papranueshëm ndaj sistemit të drejtësisë.

Sipas mediave shqiptare, gjyqtari Astrit Kalaja kishte shërbyer për gati dy dekada në sistemin e drejtësisë shqiptare.

Presidentja e Kosovës, Vjosa Osmani pas përfundimit të mbledhjes në kuadër të Samitit të Brdo-Brijonit, u shpreh me vendosmëri lidhur me sfidat dhe kërcënimet që përballet vendi ynë.

Ajo theksoi se, pavarësisht përpjekjeve për bashkëpunim rajonal, mbrojtja e interesave shtetërore, sovranitetit dhe integritetit territorial të Kosovës mbetet prioritet kryesor.

“Ne asnjëherë nuk kemi sulmuar apo pushtuar askënd, por gjithmonë kemi mbrojtur dhe do të vazhdojmë ta mbrojmë vetveten,” deklaroi Osmani, duke nënvizuar se rreziku kryesor vjen nga Serbia.

Ajo bëri me dije se Kosova do të vazhdojë të fuqizojë ushtrinë e saj për të garantuar mbrojtjen e çdo centimetri të territorit.

“Rreziku vjen nga Serbia dhe ne do të vazhdojmë të fuqizojmë ushtrinë tonë me qëllim që të mbrohet çdo centimetër i territorit Kosovës”, tha Osmani, transmeton Telegrafi.

Presidentja gjithashtu komentoi edhe sjelljen e presidentit serb Aleksandar Vuçiq gjatë samitit, duke e quajtur arrogante dhe me qëllim për të prishur arritjet e deritanishme.

“Vuçiqi iu drejtua samitit me ofendime dhe arrogancë, me qëllim që ta prishte takimin mirëpo arritëm në fund të miratojmë deklaratën e përbashkët me unanimitet,” tha Osmani.

Ajo shtoi se Kosova është për bashkëpunim rajonal, por njëkohësisht do të mbrojë interesin shtetëror, sovranitetin dhe integritetin territorial.

“Edhe pse Vuçiqi pati ankesa për marrëveshjen Kosovë-Kroaci-Shqipëri në fushën e mbrojtjes, ai mori konfirmimin e përbashkët se kjo ka qëllim mbrojtjen tonë,” tha Osmani.

Presidentja theksoi shqetësimet në lidhje me procesin e anëtarësimit të Kosovës në Bashkimin Evropian.

“Edhe pse aplikacioni ynë për anëtarësim u dorëzua qysh në vitin 2022, deri tani për shkak të disa shteteve anëtare nuk është mandatuar komisioni evropian për të marrë në shqyrtim statusin e kandidatit për Kosovën,” tha ajo.

Osmani shtoi se ky proces nuk po bazohet në merita, por në zhvillime politike dhe konsiderata vetanake që shtetet anëtare herë pas here i marrin parasysh për të shtyrë apo përkthyer procesin.

“Po të ishte bazuar në merita, Kosova, si reformatorja numër një jo vetëm në rajon, por edhe në Evropë dhe numër tre në botë, do të ishte shumë afër anëtarësimit, por fatkeqësisht zhvillimet politike në disa shtete anëtare po e bllokojnë këtë,” shtoi ajo.

Samiti 2-ditor i Brdo-Brijunit po mbahet këtë vit në Shqipëri.

Liderët e vendeve të Ballkanit Perëndimor u mblodhën në Durrës, ndërsa në fokus pritet të jenë çështjet që prekin rajonin, si dhe proceset integruese të Ballkanit Perëndimor.

Temat e diskutimeve lidhen me bashkëpunimin rajonal, marrëdhëniet e fqinjësisë së mirë, integrimin europian, Planin e Rritjes së BE-së, rininë dhe hartimin e politikave për mbajtjen e fuqisë së kualifikuar punëtore, sidomos të rinisë.

Veç Seancës Plenare dhe Konferencës për Shtyp që Presidenti Begaj do të mbajë së bashku me homologët e Sllovenisë dhe Kroacisë, gjatë punimeve të këtij samiti janë parashikuar edhe takime dypalëshe mes liderëve pjesëmarrës.

Ky samit pritet të dalë me konkluzionet përkatëse, të cilat konsiderohen si shtysë për rritjen e bashkëpunimit mes vendeve pjesëmarrëse dhe progresit të tyre.

Shqipëria, Kosova, Mali i Zi, Maqedonia e Veriut, Bosnjë dhe Hercegovina dhe Serbia janë pjesë e Procesit të Brdo-Brijuni-t, iniciativë e vitit 2010 e Sllovenisë dhe Kroacisë, dy shtete anëtare të BE-së.

Mjeku ligjor Naim Uka ka dhënë dëshminë e tij sot në gjykimin për vrasjen e Liridona Ademajt, ku ka prezantuar raportin e autopsisë dhe është përgjigjur në pyetjet e prokurores së rastit.

Prokurorja i është referuar faqes 8 të raportit, ku thuhet: Kaviteti i kokës dhe trurit, kafka, pjesa kockore në regjionin e djathtë dhe temthor, konstatojmë plagën hyrëse të krijuar si rezultat i veprimit dinamik të predhës së hedhur nga arma e zjarrit, e cila shoqërohet me një gaver dhe një kockë mangu.”

“Pas kësaj e keni dhënë mendimin tuaj. A mund të na tregoni cilin mendim për mënyrën e vrasjes së të ndjerës Liridona?”, ka pyetur prokuroja mjekun e IML-së, Naim Uka.

“Gjatë procedurave të autopsisë mjekoligjore është vërtetuar veprimi dinamik nga armë e zjarrit. Është e rëndësishme të ceket se pjesë metalike të kësaj predhe janë gjetur në anën murore të kokës, e cila është dorëzuar si provë.Si rezultat i kësaj plage ka ardhur edhe gjakderdhja e brendshme trurore, e cila është edhe shkaku i vdekjes.”, është përgjigjur Uka.

Ai ka sqaruar se plaga ka qenë në pjesën e prapme të kokës dhe ka përshkruar më tej karakteristikat e saj.

“Gjatë ekzaminimit të plagës hyrëse kemi konstatuar, përmes vrimës hyrëse, prezencën e faktorëve plotësues të qitjes që kanë shkaktuar djegie lëkurore me prezencë të grimcave të barutit. Në bazë të këtyre provave mjekoligjore, distanca e qitjes sillet nga 2 deri në 5 cm. Përjashtohet mundësia e vrasjes me puthitje apo gjysmëputhitje për shkak të mungesës së stampimit të tytës së armës.”, deklaroi ai.

“Në këtë rast kemi kryer ekzaminimet e të dy duarve të tashmë të ndjerës, në mënyrë që, bazuar në prezencën apo mungesën e faktorëve plotësues të qitjes dhe njollave, është eliminuar mundësia që e njëjta të ketë përdorur ndonjë armë apo të ketë shkaktuar vetëvrasje. Dhe mungesa e shtrëngimit të gishtit kapalotik është tregues që e plotëson konstatimin e parë dhe nuk lë asnjë dyshim për mundësi tjetër.”, theksoi Uka.

Një aksident me fatalitet ka ndodhur të dielën mbrëma në Novosellë të Kamenicës, si pasojë e të cilit ka humbur jetën një person dhe janë lënduar dy tjerë, ka njoftuar Policia e Kosovës.

Dyshohet se deri te aksidenti erdhi për shkak të mospërshtatjes së shpejtësisë, ndërsa vetura ka goditur anësoret e metalit.

Një pasagjer ka humbur jetën, ndërsa është lënduar një pasagjer tjetër dhe shoferi. Policia ka njoftuar se shoferi është dërguar në mbajtje.

“Fsh. Novosellë, Kamenicë / 05.10.2025 – 18:30. Është arrestuar i dyshuari mashkull kosovar pasi i njëjti derisa ishte duke drejtuar veturën dyshohet se nga pakujdesia dhe mospërshtatja e shpejtësisë me kushtet e rrugës ka humbur kontrollin mbi veturë dhe ka dalë jashtë rrugës duke goditur kështu anësoret e metalit. Si pasojë viktima mashkull kosovar/pasagjer në veturë ka ndërruar jetë në vendin e ngjarjes, ndërsa lëndime ka pësuar edhe pasagjeri tjetër mashkull kosovar si dhe vet drejtuesi-i dyshuari. Me vendim të prokurorit, trupi i pajetë i viktimës është dërguar në IML për obduksion, ndërsa i dyshuari-drejtuesi është dërguar në mbajtje”, ka njoftuar Policia e Kosovës./ATVLIVE/

Në shërbim të rendit, drejtësisë dhe sigurisë publike, Policia e Kosovës qëndron në vijën e parë të përballjes me shkelësit e ligjit, duke vepruar me vendosmëri dhe profesionalizëm për të garantuar siguri për të gjithë qytetarët.

Vetëm gjatë javës së fundit, në të gjitha rajonet e Kosovës janë arrestuar 102 persona për vepra të ndryshme penale.

Sipas të dhënave nga raporti 24-orësh i policisë, për periudhën nga 29 shtatori deri më 4 tetor, numri më i madh i arrestimeve lidhet me rastet e dhunës në familje.

Pas kësaj vepre penale, prangat e policisë u përdorën më së shumti për personat që mbanin armë pa leje, sulme ndaj zyrtarëve policorë, për posedim të narkotikëve, e madje edhe për kalim ilegal të kufijve.

Po ashtu, në ditët e fundit të shtatorit dhe në fillim të tetorit, 65 persona të tjerë u dërguan në mbajtje për përfshirje në veprime të kundërligjshme.

Arrestimi i personave të dyshuar për vepra penale nuk është vetëm një akt i zbatimit të ligjit, por një mesazh i qartë se askush nuk është mbi ligjin. Përmes profesionalizmit dhe përkushtimit të saj, Policia e Kosovës vazhdon të dëshmojë se lufta kundër kriminalitetit nuk njeh kompromis./ATVLIVE/

Në bazë të të dhënave të publikuara nga Agjencia e Statistikave të Kosovës (ASK), remitencat nga diaspora për vitin 2024 në Kosovë kanë arritur në shifrën prej 1 miliardë e 350 milionë eurove.

Këto të dhëna janë publikuar në raportin “Vjetari Statistikor” për vitin 2025, ndërsa janë bazuar në të dhënat e Bankës Qendrore të Kosovës.

Sipas këtij raporti, nga viti 2014 kur remitancat kanë qenë 622.3 milionë euro, ato vazhdimisht kanë shkuar duke u rritur. Në vitin 2021 për herë të parë kanë kaluar shifrën e 1 miliardë eurove.

Në anën tjetër, sipas të njëjtit Raport, eksporti i mallrave në vitin 2024 nga Kosova ka arritur në vlerën prej 941.5 milionë eurove, kurse importi ka shkuar në 6.4 miliardë euro.

Gjithashtu, para 10 vjetësh apo në vitin 2014 eksporti i mallrave arrinte në 324.5 milionë euro, kurse importi në atë vit ishte 2.5 miliardë euro.

Sipas ASK-së, inflacioni vjetor në vitin 2024 ka qenë 1.6%, për dallim nga viti 2023 ku arrinte në 4.9%. Ndërsa në 10 vitet e fundit, shifra më e lartë e inflacionit, sipas Raportit të ASK-së, ka qenë në vitin 2022, ku arrinte në 11.6%.

Për çdo vit, Agjencia e Statistikave të Kosovës (ASK) publikon raportin e njohur si “Vjetari Statistikor”, i cili ofron të dhëna themelore statistikore për Kosovën, si në fushën demografike, ekonomike, bujqësore.

Aty përfshihen statistika për popullsinë, ekonomitë familjare, lindjet, vdekjet, arsimin, kulturën, shëndetësinë, mirëqenien sociale apo energjinë./ATVLIVE/

Lidhja e Bizneseve të Kosovës ka shprehur shqetësimin për situatën e krijuar pas zgjedhjeve të 9 shkurtit, ku sipas tyre, mungesa e institucioneve funksionale dhe vendimmarrjes e ka futur vendin në ngërç të plotë ekonomik.

Në reagim thuhet se ekonomia e vendit po stagnon, investimet po bien ndërsa qytetarët dhe bizneset po e ndjejnë barrën e papërgjegjësisë politike çdo ditë e më shumë.

“Për inate politike po dëmtohet ekonomia e vendit, ndërsa Kosova po përballet me rritje të importit dhe ulje të eksportit, gjë që thellon më tej bilancin negativ tregtar dhe dëmton konkurrueshmërinë e prodhimit vendor”.

“Mungesa e reformave fiskale dhe pezullimi i politikave zhvillimore kanë krijuar një klimë pasigurie në sektorin privat. Shumë borde dhe agjenci shtetërore kanë mbetur me ushtrues detyre, pa legjitimitet për të marrë vendime strategjike, duke paralizuar proceset ekonomike”, thuhet në reagim.

Tutje, Lidhja e Bizneseve tha se nga një vend që dikur Kosova ishte model për rajonin, sot është kthyer prapa me ekonomi të ngadalësuar dhe me mungesë të plotë të vizionit ekonomik.

“Mbi 1 miliard euro kredi dhe grante zhvillimore mbeten të bllokuara në Kuvend për shkak të mosfunksionimit institucional. Këto mjete, që do të mund të investoheshin në energji, infrastrukturë, arsim dhe prodhim, sot qëndrojnë të palëvizshme, ndërsa bizneset përballen me vështirësi të mëdha në terren”.

“Kosova po përballet njëkohësisht me çmime të larta të energjisë dhe kosto të shtuara të prodhimit; mungesë investimesh të huaja dhe rreziku për largim të kapitalit ekzistues; ngadalësim të rritjes ekonomike dhe humbje të vendeve të punës; pezullim të dialogut strategjik Kosovë–SHBA, që dëmton rëndë imazhin dhe besueshmërinë ndërkombëtare të vendit”.

“Lidhja e Bizneseve të Kosovës apelon për përgjegjësi institucionale dhe zgjidhje urgjente të krizës politike, në mënyrë që vendi të rifitojë stabilitetin ekonomik dhe besimin e investitorëve”, thuhet tutje në reagim.

Lidhja e Bizneseve tha se bizneset në vend kërkojnë qeverisje funksionale, vendimmarrje dhe klimë të qëndrueshme zhvillimore e jo bllokadë e pasiguri./ATVLIVE/

Durrësi do të jetë nesër nikoqir i Samitit të Brdo-Brijunit, ku në qendër të këtij samiti do të jetë perspektiva evropiane e Ballkanit Perëndimor.

Fokus të veçantë në samitin e nesërm do të ketë Plani i Rritjes për rajonin, e cili do të udhëhiqet nga presidenti i Shqipërisë, Bajram Begaj.

Në Samitin e Brdo-Brijunit do të marrin pjesë presidentja e Kosovës, Vjosa Osmani, presidenti i Sllovenisë, Natash Mirc Musa, ai i Kroacisë, Zoran Millanoviq, ai malazez, Jakov Millatoviq, presidentja maqedonase Gordana Siljanovska-Davkova dhe presidenti serb Vuçiq.

Takimi i këtij viti do të mbahet nën moton “Interesa të përbashkëta, angazhim i përbashkët për një të ardhme të përbashkët: së bashku drejt BE-së”. Përveç çështjes së perspektivës evropiane të vendeve të Ballkanit Perëndimor, do të përqendrohet edhe në forcimin e bashkëpunimit rajonal, njoftuan organizatorët.

Kosova pritet të marrë një total prej 880 milionë eurosh nga Plani i Rritjes deri në fund të vitit 2027, Maqedonia e Veriut mbi 750 milionë euro, Shqipëria mbi 920 milionë euro, Serbia mbi 1.5 miliard euro, Mali i Zi 380 milionë euro dhe Bosnja dhe Hercegovina rreth 900 milionë euro, pasi Komisioni uli fondet e tyre me dhjetë për qind për shkak të vonesave në plan./ATVLIVE/