Tag: Ballina

Politikania Maria Corina Machado është shpërblyer me Çmimin Nobel për Paqe për vitin 2025, ka bërë të ditur Komiteti Norvegjez i Nobelit.

Komiteti ka thënë se ajo është përzgjedhur për punën e saj të palodhshme në promovimin e të drejtave demokratike për popullin e Venezuelës dhe për përpjekjet e saj për tranzicion paqësor nga diktatura në demokraci.

“Kur autoritarët e marrin pushtetin, është jetike që të njihen mbrojtësit guximtarë të lirisë, të cilët ngrihen dhe rezistojnë”, është thënë në deklaratën e Komitetit.

Çmimi Nobel për Paqe, në vlerë të rreth 1.2 milion dollarëve, do të ndahet edhe zyrtarisht në një ceremoni të organizuar në Oslo më 10 dhjetor.

Ceremonia mbahet gjithmonë në datën e njëjtë, për të shënuar edhe përvjetorin e vdekjes së industrialistit suedez, Alfred Nobel, me dëshirën e tij të cilit janë krijuar çmimet më 1895.

Në Gjykatën Themelore në Prishtinë është duke vazhduar gjykimi për vrasjen e Liridona Ademajt.

Në këtë seancë, Dëshmitari Aurel Pajaziti, pohoi se Granit Plava mori veturë me qira ditën kritike, i shoqëruar nga një person tjetër.

Sipas tij, ky shoqërues nuk gjendet në mesin e të akuzuarve në sallën e gjyqit.

I pyetur nga avokati i familjes Ademaj, dëshmitari u kthye nga të pandehurit dhe deklaroi se personi që solli Plavën me një Range Rover nuk ishte prezent, mirëpo i akuzuari Granit Plava tha se kishte kamera që e konfirmojnë.

Ndërkohë, sipas aktakuzës, Naim Murseli akuzohet se ka organizuar vrasjen e bashkëshortes së tij, ndërsa Granit Plava për ekzekutim dhe Kushtrim Kokalla për bashkëpunim.

Një grua në Dragash dyshohet se ka humbur jetën si pasojë e shpërthimit të një bombole gazi në shtëpinë e saj.

Sipas Policisë, vdekjen e viktimës e ka konstatuar mjeku, derisa trupi i saj është dërguar në Institutin e Mjekësisë Ligjore, për obduksion.

“Raportohet se viktima femër kosovare ka mbetur pa shenja jete, dyshohet si pasojë e shpërthimit të një bombole gazi në dhomën e shtëpisë ku kishte qenë duke qëndruar. Njësitet policore dhe ekipi mjekësor kanë dalë në vendin e ngjarjes dhe nga mjeku është konstatuar vdekja e viktimës. Lidhur me rastin është informuar prokurori me urdhrin e të cilit trupi i pajetë i viktimës është dërguar në IML për obduksion”, thuhet në njoftimin e PK-së.

Sot do mbahet seancë gjyqësore për rastin e vrasjes së Liridona Ademajt.

Në sencën e kaluar eksperti mjeko-ligjor, Naim Uka, gjatë seancës gjyqësore ndaj vrasjes së Liridona Ademajt, ka thënë se nga hulumtimet e kryera largohet mundësia e vetvrasjes së saj dhe se distanca e qitjes me armë ka qenë 2 deri në 5 centimetra.

Naim Murseli, Granit Plava dhe Kushtrim Kokalla janë tre të akuzuarit për vrasjen e të ndjerës, Liridona Ademajt. Dy të akuzuarit e parë kishin pretenduar se kanë çrregullime mendore, por që Instituti i Psikiatrisë Forenzike ka konstatuar se asnjëri nga ta nuk kanë pasur problematika të tilla shëndetësore gjatë kohës së kryerjes së veprës penale.

Në seancën fillestare të mbajtur më 31 janar 2025, Naim Murseli u deklarua i pafajshëm për vrasjen e bashkëshortes së tij Liridona Ademajt. Ndërkaq Granit Plava nuk ishte deklaruar rreth fajësisë, njësoj Kushtrim Kokalla kishte thënë se nuk deklarohet pa u konsultuar me mbrojtjen. Ndërsa, fajtor u deklarua i akuzuari Tom Dodaj. Ky i fundit, pasi pranoi fajësinë u dënua me 5 vjet burgim dhe 5 mijë euro gjobë.

Kuvendi i Kosovës sot do të vazhdojë seancën konstituive. Në rend të ditës është zgjedhja e nënkryetarit të Kuvendit nga radha e komunitetit serb.

Ndryshe Gjykata Kushtetuese e Republikës së Kosovës shpalli aktgjykimin e plotë me të cilin ka konstatuar se Seanca Konstituive e Kuvendit të Kosovës, e filluar më 15 prill 2025, nuk ka përfunduar si rezultat i moszgjedhjes së nënkryetarit të Kuvendit nga radhët e komunitetit serb.

Në vendimin e publikuar, Gjykata thekson se Kuvendi nuk është konstituuar në pajtim me nenin 66 dhe nenin 67 të Kushtetutës së Republikës së Kosovës, të cilat përcaktojnë zgjedhjen dhe mandatin e Kryetarit dhe Nënkryetarëve të Kuvendit.

Gjykata ka urdhëruar që Seanca Konstituive të përfundojë brenda 12 ditëve nga hyrja në fuqi e këtij aktgjykimi, në përputhje me afatin kushtetues dhe me aktgjykimet e mëhershme në rastet KO193/25 dhe KO196/25.

Po ashtu, Gjykata ka kërkuar nga të gjithë deputetët e Kuvendit që gjatë procesit të zgjedhjes së nënkryetarit nga komuniteti serb të ushtrojnë funksionin e tyre kushtetues “në interesin më të mirë të Republikës së Kosovës” dhe në përputhje me Kushtetutën dhe Rregulloren e Kuvendit.

Presidentja e Kosovës, Vjosa Osmani, priti në takim të ngarkuarën me punë të Shteteve të Bashkuara të Amerikës, Anu Prattipati.

Në takim u diskutua për zhvillimet e fundit në vend, për aspekte të ndryshme të bashkëpunimit dypalësh, si dhe për pritshmëritë rreth funksionalizimit të plotë të institucioneve, pas Aktgjykimit të fundit të Gjykatës Kushtetuese.

“Presidentja Osmani dhe znj. Prattipati diskutuan gjithashtu për takimet dhe bisedat e zhvilluara me Presidentin e SHBA-ve, Donald J. Trump, dhe me zyrtarë të tjerë të lartë amerikanë gjatë Javës së Nivelit të Lartë të Kombeve të Bashkuara, që u mbajt në Nju Jork.”, thuhet në njoftim.

Dibran Hoxha i njohur si Kobra është dënuar me 24 vjet burg për vrasjen e rëndë në “Cobra City”.

Rasti kishte ndodhur në Prizren, në muajin janar 2023.

Kobra u dënua për veprën penale vrasje e rëndë.

Dibran Hoxha është dënuar me 23 vite burgim për veprën e vrasjes së personit nga Kukësi që ndodhi në klub, ndërsa për armëmbajtje pa leje është dënuar me 2 vite burg. Në total, ai do të vuajë një dënim unik prej 24 vjetësh në burg.

Ndërkaq, i akuzuari tjetër, Roland Susuri, është dënuar me 7 vite burgim për tre vepra penale të ndryshme. Ai ka marrë 1 vit e 6 muaj për pjesëmarrje në rrahje, 4 vite e 6 muaj për manipulim me prova dhe 1 vit e 6 muaj për armëmbajtje pa leje.

Kujtojmë se më 09.09.2025 i akuzuari Dibran Hoxha ka dhënë mbrojtjen.

Për dallim prej të akuzuarit Dibran Hoxha, të akuzuarit e tjerë kanë zgjedhur të drejtën e tyre që të mbrohen në heshtje.

Kjo çështje penale është duke u trajtuar në Departamentin Special të Gjykatës së Prishtinës nga trupi gjykues i përbërë nga gjyqtarët: Kujtim Krasniqi (kryetar i trupit gjykues), Ngadhnjim Arrni e Vesel Ismaili (anëtarë).

Ndryshe në shqyrtimin fillestar të mbajtur më 07.03.2024, të akuzuarit nuk e kishin pranuar fajësinë për veprat penale që u vihen në barrë.

Kuvendi i Kosovës ka njoftuar se vazhdimi i seancës konstituive do të bëhet të premten (10 tetor) me fillim nga ora 10:00.

Seanca do ta ketë një pikë të vetme, zgjedhjen e nënkryetarit të Kuvendit nga radha e komunitetit serb.

Kujtojmë se që nga dje ka nisur afati 12-ditor për konstituim të Kuvendit, sipas aktgjykimit që lëshoi Gjykata Kushtetuese. Por, gjykata nuk ka treguar edhe se cilat janë pasojat nëse këtë nuk e bëjnë deputetët brenda afatit.

Gjykata kushtetuese e publikoi aktgjykimin e plotë, në të cilin vlerëson se votimi ndaras për komunitetet pakicë, mund të bëhet edhe ndaras, dhe në rastin konkret nuk kishte shkelje kushtetuese, ani pse praktika parlamentare që nga 2011-ta ishte që komunitete të votoheshin në pako.

“Duke qenë se votimi në pako nuk është shprehimisht i përcaktuar në Kushtetutë, i njëjti mund të realizohet nëse ka dakordim në mes të grupeve parlamentare apo deputetëve. Gjykata vlerëson që një procedurë e tillë e votimit mbetet në vullnetin e deputetëve dhe grupeve parlamentare me kushtin që të realizohet zgjedhja e anëtarëve të Kryesisë së Kuvendit”, njoftoi Kushtetuesja.

Kësisoj gjykata e merr si të mirëqenë edhe zgjedhjen e Emilja Rexhepit si nënkryetare nga komunitete pakicë joserbe.

Kushtetuesja hodhi poshtë ankesën e Listës Serbe për përzgjedhjen me short të nënkryetarëve për votim, për çka konstatoi se praktika e ndjekur në këtë rast ishte në përputhje me kushtetutën.

Megjithëse shumica e deputetëve serb kanë konsumuar të drejtën e propozimit tri herë për votim, gjykata nuk e cilëson pengesë për konstituim të kuvendit.

Gjithashtu gjykata obligon deputetët që të marrin pjesë në seancë dhe të votojnë pro, kundër apo abstenim, në afat prej 12 ditësh.

LAJMI NË PËRDITESIM…

Gjykata Themelorë në Gjakovë ka aprovuar kërkesën e Prokurorisë, dhe ka caktuar masën e paraburgimit prej një muaj ndaj të pandehurit D.Z., për shkak të dyshimit të bazuar se ka kryer veprën penale të dhunimit.

Sipas kërkesës, “Nga muaji prill 2025 deri më 2 tetor 2025 në Gjakovë, i pandehuri, përmes komunikimit në rrjetin social Snapchat, ka realizuar takime me të miturën (e lindur 2010), gjatë të cilave takime pa pëlqimin e saj ka kryer akte seksuale-orale. I pandehuri e incizoi të dëmtuarën gjatë aktit dhe më pas e kërcënoi se do ta publikonte incizimin nëse i tregonte dikujt, duke e detyruar që të takohej përsëri me të”.

Sipas njoftimit, Gjykata ka vlerësuar se janë përmbushur kushtet ligjore për caktimin e masës së paraburgimit për të pandehurin në fjalë, ngase kemi të bëjmë me vepër penale të ndjeshme, ashtu që me gjetjen e mundshme të të pandehurit në liri, ekziston mundësia reale që i njëjti të pengojë në rrjedhën e procedurës penale duke ju shmangur drejtësisë, duke ndikuar në dëshmitarë, apo duke e përsëritur veprën penale.

Gjykata ka bërë të ditur se i pandehur do të mbahet në paraburgim në kohëzgjatje prej një muaji, i cili do të llogaritet prej kohës së arrestimit më 7 tetor 2025 dhe do të zgjasë deri më 6 nëntor 2025.

Palët kanë të drejtën e ankesës ndaj këtij vendimi në Gjykatën e Apelit të Kosovës.

Presidentja e Komisionit të BE-së do ta përballojë edhe një mocion të dytë për votëbesimin. Por presioni i vazhdueshëm i së majtës dhe së djathtës nxjerrin në pah një vakuum pushteti ndër vendet anëtare të BE-së.

Diskutimi ishte me tone mjaft të nxehta. Të hënën pasdite (06.10.2025) Parlamenti i BE-së u mblodh në seancë plenare në Strazburg për herë të dytë pas pushimeve të verës. Në seancë u prekën temat më të mprehta.

Kryetari francez i grupit të ekstremit të djathtë “Patriotë për Europën”, Jordan Bardella, e akuzoi presidenten e Komisionit të BE-së për mungesë transparence, dështim në politikën e migracionit dhe për humbjen e aftësisë së konkurrencës për shkak të politikës së saj për klimën.

Sipas tij edhe deal-i për doganat me SHBA-në është një katastrofë: “Ju faktikisht keni nënshkruar kapitullimin e Europës.”

Ursula von der Leyen ruan qetësinë

Pas tij e mori fjalën kryetarja e grupit të majtë, politikania franceze Manon Aubry. Edhe akuzat e saj qenë të rënda: Dështim në qendrimin ndaj Izraelit për luftën në Gazë, dështim në arritjen e një Green-Deals, fokusim tek blerja e armëve në vend të sigurisë sociale: “Ju duhet të largoheni,” përsëriste ajo vazhdimisht në mënyrë patetike.

Von der Leyen u tregua e qetë. Ajo kundërshtoi dhe bëri thirrje për unitet: “E vërteta është: kundërshtarët tanë jo vetëm janë të gatshëm të shfrytëzojnë çdo përçarje, por ato i nxisin në mënyrë aktive këto përçarje.”

Është e pashembullt, që një president komisioni brenda vetëm tre muajsh përballet me dy mocione votëbesimi. Por edhe pse gjatë votimit të enjten (09.10.2025) nuk ka gjasë që ajo të shkarkohet, intensifikimi i kësaj procedure tregon se sa i fragmentarizuar është Parlamenti i BE-së dhe sa i paqëndrueshëm është bërë ndërkohë besimi midis Komisionit dhe partive të qendrës politike.

Sulme nga të majtët dhe të djathtët

Ndryshe nga mocioni në korrik, këtë herë nisma për votimin lidhur me votëbesimin vjen si nga e djathta edhe nga e majta radikale. Në përmbajtje botëkuptimet janë shumë të ndryshme, por qëllimet të ngjashme: Synimi është të goditet von der Leyen politikisht, të minohet autoriteti i saj, në mënyrë që këto parti të forocojnë pozicionet e veta të pushtetit në parlament.

Olivier Costa, drejtor i sektorit të kërkimeve pranë CNRS dhe njohës i institucioneve të BE-së, thekson, se përpos përballjeve të partive për të forcuar pozitat e tyre në parlament ka edhe dy arsye të tjera, që kanë ndikuar në krijimin e situatave të tilla: Së pari një zbehje e aftësisë për bashkëpunim ndërmjet socialdemokratëve dhe kristiandemokratëve, aleanca e dikurshme bazë e Parlamentit Europian. Së dyti edhe stili drejtues i Ursula von der Leyen, që shumë e konsiderojnë si të centralizuar dhe hierarkik.

“Presidentja e Komisionit e kupton postin e saj si të ishte kryeministre,” vëren Costa. Parimi i bashkëpunimit dhe konsensusit dalin në plan të dytë, vendimet merren me pushtet të përqendruar tek personi i saj. Kjo gjë ka krijuar pakënaqësi në parlament e po ashtu edhe në radhët e komisionit.

Raporte të vështira mazhorance

Njëkohësisht gjeometria politike në Europë është bërë më e ndërlikuar. “Koalicioni i madh” i përbërë nga konservatorët e djathtë EVP dhe socialdemokratët S&D që nga viti 2019 nuk ka më mjaftueshëm vota për një mazhorancë të qendrueshme.

“Ne ndërkohë kemi parë disa procese votimi, veçanërisht lidhur me temat për mjedisin dhe migracionin si dhe tema ndërkombëtare, që EVP nuk ngurron më të votojë me ekstremin e djathtë,” nënvizon eksperti Costa.

Kjo si rrjedhojë krijon një vakuum pushteti në spektrin e qendrës, gjë që përpiqen ta shfrytëzojnë partitë në skajet e ekstremeve politike.

Qendra po lëkundet

Ende partitë e qendrës përpiqen të bashkëveprojnë, por durimi ndaj kursit të presidentes së komisionit po humbet: “Ne ndërkohë shohim, që baza politike, mbi të cilën qendrojnë presidentja e komisionit dhe vet Komisioni i saj, ndonëse po qendron, ajo ka filluar të lëkundet veçanërisht në qendër,” konstaton politologia Almut Möller nga qendra EPC.

Kritika vijnë nga të gjitha anët: Pjesë të liberalëve kritikojnë ecurinë e çalë të reduktimit të burokracisë, në radhët e EVP ka zemërim për veprimet e mëvetësishme lidhur me politikën e jashtme, tek socialdemokratët dhe ekologjistët rritet skepticizmi ndaj ndryshimit të kursit fokusuar tek rritja ekonomike dhe aftësia e konkurrencës dhe duke u larguar prej projekteve sociale dhe Green Deal.

E rrezikshme apo gjallëruese?

A janë kërkesat për mocion një simbol për destabilizim të rrezikshëm, apo shprehje e dinamikës demokratike? “Të dyja,” thotë eksperti Costa. “Përballjet janë dëshmi e një demokracie të jetuar në BE. Por nëse ato dominojnë, atëherë rrezikon humbja e kontrollit.”

Të enjten parlamenti vendos për të ardhmen e von der Leyens. Costa nuk sheh shkas për një fund të shpejtë të mandatit të saj, por ai konsideron se do të ketë një normalitet të ri me një test të vazhdueshëm të stresit. “Von der Leyen nuk do të abdikojë dhe as nuk do të shkarkohet, për shumë forca ajo mbetet opcioni më i mirë. Sepse cila do të ishte alternativa?”

Por me rëndësi politike është, se sa i madh do të jetë kampi i atyre që do të votojnë me jo: “Një rezultat i dobët do të pasqyronte raportet e ftohura ndërmjet komisionit dhe parlamentit.”

Për shumë vëzhgues në Strazburg është e rëndësishme jo nëse ajo do të mbijetojë, por me çfarë shumice do ta arrijë këtë. Pikërisht ky raport votash do të ndikojë në punën e mëtejshme kur në axhendë janë ligjet për buxhetin, tregtinë dhe klimën. /DW