Tag: Ballina

Njësitet policore të Drejtorisë për Hetimin e Krimeve të Luftës, në koordinim me Institutin e Mjekësisë Ligjore (IML) dhe Komisionin Qeveritar për Persona të Zhdukur, kanë kanë zhvilluar gërmime në varrezat e fshatit Hajvali, në Prishtinë.

Gërmimet u bënë në bazë të një urdhërese të lëshuar nga Gjykata Themelore në Prishtinë dhe kanë rezultuar me zbulimin e mbetjeve eshtërore që dyshohet t’i përkasin të paktën tre personave të zhdukur gjatë luftës së fundit në Kosovë (1998–1999).

Sipas autoriteteve, mbetjet janë tërhequr nga terreni dhe janë dërguar në Institutin e Mjekësisë Ligjore për ekzaminime mjeko-ligjore dhe identifikim të mëtejshëm.

“Prishtinë 1998-1999. Më 20.10.2025 njësitet policore të Drejtoria për Hetimin e Krimeve të Luftës, në koordinim me IML-në dhe Komisionin Qeveritar për Persona të Zhdukur, kanë realizuar urdhëresën e Gj. Th. Prishtinë për gërmim në varrezat e fshatit Hajvali, me ç’rast kanë gjetur mbetje eshtërore të njeriut, që dyshohet të jenë të paktën tre personave të zhdukur gjatë luftës së fundit në Kosovë 1998-1999. Mbetjet eshtërore janë tërhequr nga IML-ja për ekzaminime mjeko-ligjore. Punimet pritet të vazhdojnë edhe ditëve në vijim. Rasti në proces hetimi”, ka njoftuar Policia e Kosovës./ATVLIVE/

Kryeministri në detyrë i Kosovës, Albin Kurti, ka udhëtuar drejt Mbretërisë së Bashkuar, kjo për të marrë pjesë në Samitin e radhës të Procesi të Berlinit.

Samiti do të mbahet më 21 dhe 22 tetor 2025.

Për këtë ka njoftuar zyra e kryeministrit, të hënën, duke paralajmëruar edhe takime bilaterale.

“Kryeministri në detyrë i Republikës së Kosovës, Albin Kurti, ka udhëtuar drejt Britanisë së Madhe, ku do të marrë pjesë në Samitin e radhës të Procesit të Berlinit. Gjatë qëndrimit në Londër, kryeministri Kurti do të ketë edhe takime bilaterale, si dhe do të marrë pjesë në ngjarjet e organizuara në kuadër të samitit”, thuhet në njoftim.

Ndërkaq, Serbia do të përfaqësohet me kryeministrin, Đuro Macut. Nuk dihet nëse do të ketë takim mes Kurtit dhe Macut.

Gati një vit pas sulmit terrorist në kanalin e ujit të Ibër-Lepencit, autoritetet ende nuk kanë ngritur aktakuzë ndaj të dyshuarve. Për ngjarjen e ndodhur më 29 nëntor 2024 në fshatin Varagë të Zubin-Potokut, janë arrestuar dy persona, Dragisha dhe Jovan Viçentijeviq, të cilët po mbahen në paraburgim që nga fillimi i dhjetorit të kaluar.

Sipas hetimeve fillestare, dy vëllezërit dyshohen se kanë përdorur eksploziv dhe mjete të tjera shpërthyese për të dëmtuar kanalin e ujësjellësit, që furnizon me ujë veriun e Kosovës, rajonin e Mitrovicës, Prishtinën me rrethinë dhe Korporatën Energjetike të Kosovës (KEK). Gjatë bastisjeve të kryera dy ditë pas sulmit, policia kishte sekuestruar armë dhe pajisje ushtarake në shtëpitë e tyre.

Nga Prokuroria Speciale e Republikës së Kosovës është konfirmuar se hetimet janë ende në zhvillim.
“Prokuroria Speciale ka ndërmarrë dhe po ndërmerr të gjitha veprimet hetimore për konstatimin e plotë të gjendjes faktike, në përputhje me Kodin e Procedurës Penale. Me qëllim të ruajtjes së integritetit të procesit hetimor, në këtë fazë nuk mund të ofrojmë më shumë informacione,” tha zëdhënësja e institucionit, Arbnora Luta.

Ndërkohë, avokati i njërit prej të dyshuarve, Valdet Hoxha, e ka arsyetuar vonesën me kompleksitetin e rastit.
“Ky është një rast shumë kompleks që kërkon hetim gjithëpërfshirës dhe bashkëpunim të ngushtë me mekanizmat e tjerë të sigurisë, brenda dhe jashtë vendit. Duhet ekspertiza të shumta për vërtetimin e plotë të gjendjes faktike,” deklaroi Hoxha.

Sipas dosjes hetimore të Prokurorisë, vëllezërit Viçentijeviq dyshohen se kanë vepruar me qëllim për të dëmtuar infrastrukturën publike të ujësjellësit, duke kryer veprën penale të terrorizmit.

Pas sulmit, policia zhvilloi bastisje në dhjetë lokacione në veri të vendit, ku u konfiskuan armë, municione dhe pajisje të tjera ushtarake. Ngjarja kishte shkaktuar shqetësim për sigurinë e furnizimit me ujë dhe për rrezikun e sulmeve ndaj infrastrukturës kritike.

Rasti i Ibër-Lepencit po hetohet në mënyrë të ngjashme me atë të sulmit terrorist në Banjskë të Zveçanit, ku u vra rreshteri Afrim Bunjaku, për të cilin aktakuza u ngrit pas një viti dhe përfshinte 45 persona, në krye me Milan Radoiçiqin.

Hetimet për Ibër-Lepencin mbeten të hapura, ndërsa autoritetet nuk kanë dhënë ende afat se kur pritet ngritja e aktakuzës.

Shefi i Misionit të Kosovës në Bruksel, Agron Bajrami, ka takuar të hënën shefin e kabinetit të Komisioneres së Bashkimit Evropian për Zgjerim, Marko Makovec, ku në qendër të diskutimit ishte procesi i zgjerimit të BE-së në Ballkanin Perëndimor dhe perspektivat “afatshkurtra, afatmesme dhe afatgjata” të integrimit të Kosovës në BE.

“Ambasadori Bajrami dhe z. Makovec shkëmbyen pikëpamje edhe mbi Planin e Rritjes dhe instrumentet e tjera të BE-së për të avancuar projektin strategjik të zgjerimit në rajon”, thuhet në njoftimin e lëshuar për shtyp nga zyra e Kosovës në Bruksel.

Nga gjashtë vendet e Ballkanit Perëndimor, përveç Kosovës, të gjitha ose kanë statusin e kandidatit për anëtarësim në klubin eksluziv evropian, ose kanë nisur tashmë negociatat. Kosova ka dorëzuar aplikacionin për anëtarësim në BE në vitin 2022.

Kosova prej shpalljes së pavarësisë në vitin 2008 e ka përcaktuar qartë orientimin e saj drejt integrimit në BE dhe NATO, në kuadër të përpjekjeve për të siguruar stabilitet afatgjatë dhe zhvillim ekonomik, si garanci për paqe në Ballkanin Perëndimor.

Ndryshe, shefja e Komisionit Evropian, Ursula von der Leyen, ka deklaruar se është e rëndësishme për Kosovën të vazhdojë të ndërtojë institucione të fuqishme dhe t’i zbusë tensionet në veri, pas takimeve me udhëheqësit e vendit më 15 tetor në Prishtinë.

Këshilli i Sigurimit do të mblidhet sot për takimin e dytë të rregullt këtë vit mbi situatën në Kosovë.

Zëvendës përfaqësuesi Special dhe Zyrtari i Përgjegjshëm i Misionit të Administratës së Përkohshme të OKB-së në Kosovë (UNMIK), Milbert Dongjon Shin, pritet të informojë mbi raportin e fundit të Sekretarit të Përgjithshëm mbi UNMIK-un , i cili iu shpërnda anëtarëve të Këshillit më 10 tetor dhe mbulon zhvillimet nga 16 marsi deri më 15 shtator.

Shin pritet të nxjerrë në pah zhvillimet kryesore politike dhe të sigurisë në Kosovë gjatë periudhës së mbuluar nga raporti i Sekretarit të Përgjithshëm.

Ai do të flasë rreth zbatimit të marrëveshjeve të lehtësuara nga BE-ja, përfshirë Marrëveshjen e shkurtit 2023 në rrugën drejt normalizimit (e njohur edhe si Marrëveshja e Ohrit), dhe se tensionet midis Serbisë dhe Kosovës kanë vazhduar të vazhdojnë.

Më 9 qershor dhe 11 shtator, përfaqësuesi Special i BE-së për Dialogun Kosovë-Serbi, Peter Sørensen, lehtësoi dy takime trepalëshe në Bruksel me kryenegociatorët përkatës nga Kosova dhe Serbia, Besnik Bislimi dhe Petar Petkoviç, mbi zbatimin e marrëveshjeve të mëparshme, përfshirë Marrëveshjen e Ohrit dhe Deklaratën e majit 2023 për Personat e Zhdukur.

“Asnjëri takim nuk rezultoi në një rezultat të deklaruar. Takimi i 11 shtatorit përfundoi pa përparim domethënës midis të dyja palëve për shkak të pikëpamjeve të ndryshme mbi përparimin e çështjeve në zbatimin e marrëveshjeve të mëparshme. Për më tepër, megjithëse palët ranë dakord zyrtarisht për krijimin e Komisionit të Përbashkët për Personat e Zhdukur në dhjetor 2024, takimi i tij inaugurues nuk u zhvillua siç ishte planifikuar pas bisedimeve të 11 shtatorit. Në këtë drejtim, në takimin e së martës, Shin do t’u bëjë thirrje Kosovës e Serbisë që të angazhohen me mirëbesim drejt përmbledhjes së bisedimeve të normalizimit dhe të përfitojnë nga krijimi i komisionit brenda kornizës së dialogut të lehtësuar nga BE-ja”, raporton securitycouncil.

Në të njëjtën kohë, disa anëtarë, kanë vënë në dukje në të kaluarën se situata në Kosovë ka ndryshuar ndjeshëm që nga themelimi i misionit në vitin 1999.

Ata në mbledhjen e kaluara kanë bërë thirrje gjithashtu për një rishikim strategjik të misionit, ndërsa Rusia pritet të kundërshtojë çdo modifikim të mandatit, stafit ose buxhetit të UNMIK-ut./Sinjali

Presidentja e vendit, Vjosa Osmani është deklaruar me shqetësim mbi vonesat e krijimit të institucioneve të reja të Kosovës, për të cilat tha se janë vetëm në dëmtim të interesave të shtetit.

Megjithatë ajo u shpreh se krijimi i qeverisë varet nga krijimi i koalicioneve politike, por thekson se vonesa që tenton Lista Serbe dëmton interesat e qytetarëve të të gjitha komuniteteve, transmeton klankosova.

”Ka pasë vonesa të jashtëzakonshme në krijimin e institucioneve besoj që ky është tentim tjetër për vonesa që e kanë dëmtuar interesin e Kosovës është në interes të Kosovës që të kemi qeveri me mandat të plotë”.

”Krijimi i qeverisë varet nga krijimi i koalicioneve politike besoj mund t’i pyesni partitë deri ku kanë arritur në këtë çështje”.

”Vonesa që po tentohet të krijohet nga Lista Serbe i dëmton jo vetëm interesat e Kosovës por të gjithë qytetarëve përfshirë edhe serbët që jetojnë në Kosovë”.

”Nuk mund të supozoj se cili mund të jetë vendimi final i Gjykatë Kushtetuese lidhur me kërkesën e Listës Serbe”.

Organizatat e shoqërisë civile nëpërmjet një letre të përbashkët i janë drejtuar Presidentit të Këshillit Evropian, Antonio Costa, Presidentes së Komisionit Evropian, Urusla von der Leyen, Përfaqësueses së Lartë e Bashkimit Evropian për Punë të Jashtme dhe Politikë të Sigurisë, Nënkryetare e Komisionit Evropian, Kaja Kallas dhe shefit të zyrës së BE-së në Kosovë, Aivo Orav, rreth masave që Bashkimi Evropian nuk po ia heq Kosovës.

Letër e hapur:

Me respekt, ne organizatat e shoqërisë civile në Kosovë të nënshkruara më poshtë, po ju drejtohemi me këtë letër për të kërkuar që Bashkimi Evropian të heqë masat e mbetura ndaj Kosovës. Përderisa e kuptojmë se Bashkimi Evropian ka pasur arsyet e veta për vendosjen e atyre që u përshkruan si masa të përkohshme dhe të kthyeshme, si organizata të shoqërisë civile të përkushtuara në avancimin e integrimit evropian të vendit tonë, jemi thellësisht të shqetësuara për ndikimin negativ që këto masa kanë shkaktuar në aspiratat evropiane të qytetarëve të Kosovës.

Më shumë se dy vjet më vonë, kemi parë se këto masa nuk rezultuan të jenë as të kthyeshme e as të përkohshme. Ato e kanë sfiduar, por jo edhe thyer, besimin dhe partneritetin që lidh Kosovën me Bashkimin Evropian dhe idealet e tij të parimeve, drejtësisë, solidaritetit dhe shpresës. Përtej ndikimit të tyre financiar, këto masa kanë dekurajuar përpjekjet për reforma, kanë kufizuar punën e shoqërisë civile dhe kanë zvogëluar ndihmën në sundim të ligjit, shëndetësi dhe arsim. Kjo situatë vazhdon të pengojë integrimin evropian të Kosovës, i cili mbetet vendi i vetëm në kontinent me orientim të qartë drejt BE-së që ende nuk ka marrë statusin e kandidatit.

Ne besojmë fuqimisht se heqja e plotë dhe përfundimtare e këtyre masave në këtë fazë është e përshtatshme dhe e nevojshme. Ndërsa tensionet janë ulur dhe pjesëmarrja politike është përmirësuar, situata në veri mbetet e ndërlikuar dhe kërkon angazhim të vazhdueshëm dhe ndërtim të besimit. Pjesëmarrja e serbëve të Kosovës në zgjedhjet e fundit lokale është një hap pozitiv drejt rikthimit të përfaqësimit dhe legjitimitetit. Sulmi terrorist në Banjskë dhe aktakuzat ndaj përgjegjësve shënuan një moment të rëndësishëm në përballjen me strukturat kriminale në veri. Këto zhvillime, megjithëse të brishta, nënvizojnë se llogaridhënia dhe dialogu janë thelbësorë për siguri dhe bashkëpunim të qëndrueshëm. Angazhimi konstruktiv dhe i balancuar i BE-së mbetet vendimtar për të ruajtur këtë përparim dhe për të mbështetur stabilitetin për të gjitha komunitetet.

Si organizata të shoqërisë civile, jemi mirënjohëse që në maj të vitit 2025 Bashkimi Evropian filloi tërheqjen graduale të masave ndaj Kosovës, si dhe për vendimin e Komitetit Ekonomik dhe Social Evropian për ta përfshirë Kosovën në iniciativën ECM, duke krijuar një hapësirë të re për përfaqësimin e zërit të qytetarëve në proceset evropiane. Besojmë se rrethanat që fillimisht nxitën vendosjen e masave tashmë nuk ekzistojnë më. Me rastin e krijimit të institucioneve të reja në nivel lokal, heqja e masave do të përcillte një mesazh pozitiv bashkëpunimi ndërmjet BE-së dhe Kosovës dhe do të forconte më tej besueshmërinë e BE-së dhe angazhimin e saj në rajon.

Prandaj, me respekt ju bëjmë thirrje që Bashkimi Evropian të shqyrtojë heqjen e plotë të masave të mbetura. Hapat e parë për t’i tërhequr ato janë dëshmuar të suksesshëm, dhe një rikthim i plotë në normalitet do të ndërtonte mbi momentumin pozitiv të krijuar me organizimin e zgjedhjeve lokale. Populli i Kosovës vazhdon të përballet me sfida, dhe heqja e këtyre masave do të ofronte optimizëm të ri për rrugën tonë evropiane. Jemi të bindur se udhëheqja juaj do të bashkojë të gjitha shtetet anëtare rreth së mirës së përbashkët të BE-së dhe Kosovës.

Janë numëruar 60% e votave me postë në komunën e Prishtinës.

Sipas rezultateve të publikuara nga Komisioni Qendror i Zgjedhjeve, kandidati i VV-së për kryetar të kryeqytetit, Hajrulla Çeku udhëheq në votat e diasporës, me 54.88%.

Derisa sipas rezultateve të përmbledhura, Rama zë vendin e parë me një dallim prej 634 votash ndaj Çekut.

Analisti në institutin GAP, Bekim Salihu ka shkruar në lidhje me rezultatet e zgjedhjeve për Kuvendin e Prishtinës.

Ai ka thënë se në këtë Kuvend, LDK do të ketë 15 ulëse, PDK 12 ulëse, VV do të ketë 10 ulëse, AAK 7, Feim Kupina 4 dhe Nisma, guxo dhe PSD nga një ulëse secila.

Salihu ka thënë se bazuar në këto rezultate, është problem të krijohet një shumicë në këtë Kuvend Komunal.

“Nëse fiton Përparim Rama, për të siguruar shumicën e thjeshtë në Kuvend, që nënkupton 26 vota, nuk i mjafton koalicioni me AAK-në dhe tri partitë e vogla (PSD, Guxo dhe Nisma). Pra, atij i duhet ose vota e Feim Kupinës, ose një koalicion me “elefantët” (PDK ose VV). LDK mund të llogarisë në një koalicion të lehtë me AAK-në, PSD-në dhe Nismën. Nëse fiton Hajrullah Çeku nga VV, edhe nëse i merr në koalicion Kupinën, AAK-në, Nismën, PSD-në dhe Guxon, prapëseprapë nuk e përbën shumicën e thjeshtë, gjë që nënkupton se për një qeverisje eventuale të VV-së në Prishtinë, do t’i duhej vota e PDK-së ose e LDK-së. VV, me këtë përbërje të Kuvendit Komunal, favorizohet nga Feim Kupina dhe lista Guxo”, ka shkruar Salihu.

Trump dhe Putin do të takohen në kryeqytetin hungarez për samitin e tyre të dytë

Volodymyr Zelensky siguroi se ishte gati të bashkohej me takimin e planifikuar së shpejti në Budapest midis homologëve të tij amerikanë dhe rusë, Donald Trump dhe Vladimir Putin, nëse merrte një ftesë për këtë qëllim.

Këta të fundit do të takohen në kryeqytetin hungarez për samitin e tyre të dytë që synon të gjejë një rrugëdalje nga lufta në Ukrainë.

Volodymyr Zelensky, nga ana e tij, kthehet nga një vizitë në Washington të premten, gjatë së cilës nuk arriti të bindë presidentin amerikan të dërgojë raketat Tomahawk në Kiev.

“Nëse ftohem në Budapest, nëse është një ftesë në formën e një takimi trepalësh, ose siç quhet ndryshe, një diplomaci udhëtuese, ku Presidenti Trump takohet me Putinin dhe Presidenti Trump takohet me mua, atëherë në një formë ose në një tjetër do të arrijmë një marrëveshje”, tha Volodymyr Zelensky në një konferencë për shtyp.

Megjithatë, ai ndjeu se Budapesti nuk është “vendi më i mirë për këtë takim”.

Një aleat i ngushtë i Donald Trump brenda Bashkimit Evropian, kryeministri hungarez Viktor Orban mbeti pajtues me Vladimir Putinin pavarësisht pushtimit të Ukrainës dhe, përkundrazi, ishte shumë kritik ndaj Volodymyr Zelensky-it.

Sipas Zelensky-it, kushtet e Rusisë për arritjen e paqes mbeten të pandryshuara, duke përfshirë tërheqjen e forcave ukrainase nga i gjithë Donbasi, një rajon industrial në Ukrainën lindore që Moska dëshiron ta aneksojë.

Ai tha se u shpjegoi bashkëbiseduesve të tij amerikanë gjatë vizitës së tij në Washington se “qëndrimi i Ukrainës nuk kishte ndryshuar”, domethënë, ajo i hodhi poshtë kushtet ruse.

“Ne nuk do t’u japim fitoren rusëve”, këmbënguli ai.