Tag: Ballina

Zëdhënësi i AAK-së, Kushtrim Xhemaili, ka thënë se pas mbledhjes së Kryesisë së partisë të enjten e kësaj jave, qëndrimi i prerë i AAK-së ka qenë se duhet të shkohet në zgjehdje të reja parlamentare.

Xhemaili ka thënë se AAK s’ka vota për Konjufcën dhe se s’bën koalicion me LVV-në.

Këtë reagim ai e ka bërë pasi një prej anëtarëve të Kryesisë së AAK-së, Besnik Krasniqi, ka përmendur idenë e bërjes së Ramush Haradinajt president.

“AAK ka mbajtur mbledhjen e Kryesisë të enjten, ku ka dalë me qëndrim të prerë, rrugëdalja e vetme nga gjendja në të cilën ndodhet vendi është shkuarja në zgjedhje të parakohshme parlamentare. Të gjithë ata që dalin në publik me ide të tjera, së pari është dashur t’i prezantojnë në mbledhje të Kryesisë, sikurse rasti i z. Besnik Krasniqit, i cili ka munguar në atë takim”.

“Nuk ka koalicion me VV, nuk kemi votë për Konjufcën dhe askënd nga radhët e tyre”, ka shkruar Xhemaili.

Shoqatat e dala nga lufta nuk janë përfshirë në projektbuxhetin e vitit 2026, kështu deklaroi kryetari i OVL-UÇK, Hysni Gucati, duke akuzuar Qeverinë se për më shumë se karët vjet radhazi nuk i ka alokuar asnjë mjet për organizatat e veteranëve, invalidëve dhe familjeve të dëshmorëve.

Përveç mungesës së fondeve, ai tha se janë ndaluar edhe trajtimet dhe rehabilitimet jashtë vendit për anëtarët e këtyre shoqatave, raporton Ekonomia Online.

Ai tha se në më shumë se pesë vitet e fundit këto shoqata nuk kanë marrë asnjë mbështetje financiare dhe po mbijetojnë vetëm me ndihmën e anëtarësisë dhe të njerëzve me vullnet të mirë.

“Shoqata e dala nga lufta, jo vetëm organizata e veteranëve, por edhe shoqata e invalideve dhe dëshmorëve, në bazë të informacioneve të sakta, për buxhetin e 2026 nuk na ka futur në buxhet hiq. Jo vetëm këtë vit, por që pesë vite qeveria në ikje apo qeveria në detyrë Albin Kurti që pesë vite nuk e kanë dhënë as një parë për shoqata e dalur nga lufta. Ne e kemi pasur një buxhet 48 mijë euro që ka qenë që çdo qeveri e ka ndarë për neve. Që pesë vite kjo qeveri nuk ka ndarë asnjë cent, ne mbijetojmë me anëtarësi dhe me njerëz të vullnetit të mirë që na ndihmojnë”, tha ai.

Gucati shtoi se qeveria ka ndaluar gjithashtu edhe shërimin jashtë vendit dhe rehabilitimin e invalidëve dhe veteranëve.

“Kjo qeveri është duke gabuar shumë, na ka ndaluar edhe mjete, kjo qeveri asnjë njeri nuk e dërgon më shëruar jashtë. Kjo qeveri nuk ka dërguar as rehabilitimin që e kemi pasur nëpër banjë shëruese, asnjë invalid, asnjë veteran, asnjë familje e dëshmorit deri sot kjo qeveri nuk e ka dërguar në banjë. Çka është më e keqja se i ka ndaluar të gjitha, më e keqja është që shërimin na ka ndaluar, se ne invalidët e kemi me ligj. Ministria e Mirëqenies Sociale dhe Ministria e Shëndetësisë e kanë në mënyrë obligative me na dërguar me na shëruar neve jashtë vendit që kemi nevojë, me komision kuptohet nga QKU-ja. Le të del kjo qeveri të thotë tre invalidë që i ka dërguar që të shërohen jashtë vendit, ndonjë veteran, një nënë të dëshmorit apo një baba, deri më sot jo. Kjo qeveri nuk e di çka mendon, kjo duhet me ditë se me gjakun e tyre është ardhur sot në pushtet, jo vetëm kjo por gjitha qeveritë”, tha ai.

Gucati kërkoi nga ekzekutivi përfshirjen e tri shoqatave në buxhetin e 2026 dhe rikthimin e fondeve për shpenzimet themelore të organizatave.

“Sot qeveria nuk e kthen kokën nga ne, kurrë në jetën e 5 viteve asnjë lek nuk e ka dhënë as për shoqatat e invalideve, as dëshmorëve, as për një. Kështu që unë i kisha bërë thirrje qeverisë që me na fut neve në buxhetin e 2026, që të ndajë mjete për tri shoqata e dala nga lufta. Nuk po kërkojmë luks, por vetëm mbulimin e shpenzimeve tona që harxhohen nga organizata e dala nga lufta: rryma, uji, flamujt nëpër varreza të dëshmorëve, shpenzimet e rrugëtimit që kemi jashtë vendit. Këto jemi duke i kërkuar, asgjë më shumë nuk kërkojmë, as nuk kërkojmë paga, vetëm këto me një projekt që bëjmë, me një plan që e dorëzojmë edhe ajo ka qenë shumë 48 mijë euro përpara, e prapë këtë vit nuk e ka futur në buxhet për 2026”, tha ai.

Ai tha se gjendja e veteranëve dhe invalidëve është e vështirë, jo vetëm materiale, por edhe shëndetësore dhe mendore.

“Gjendja e tyre nuk është e mirë, edhe materiale, edhe shëndetësore, edhe që besa mendore, se na kemi nevojë. Unë kam nevojë që të shkojnë te psikologu dhe psikiatri, nuk është marrë me shku as këto nuk i kemi nga kjo qeveri që të bëjmë një rehabilitim. Nuk është gjendje e mirë më së pari shëndetësore, kemi shumë invalid, shumë veteranë që kanë nevojë të dalin jashtë vendit për shërim. Në vet QKU nuk paguajmë pesë euro, vetëm aty jemi të liruar, krejt të tjerat duhet që t’i blejmë. Ky është turp i madh i kësaj qeverie që i ka ndaluar këto. Kemi shumë shokë tanë që ju ka refuzuar shërimi jashtë vendit, kjo qeveri nuk i ka dërguar që t’i shërojnë. Tash ka filluar me disa proteza dikur rreth 40 veta që kanë filluar që t’u ndërrojnë protezat e gjymtyrëve, që pesë vite, ata kanë nevojë me i ndërru protezat çdo vit apo çdo dy vite. Tash ka filluar edhe ato me ndihmën e Katarit, presidentja ka bërë një marrëveshje, Vjosa Osmani ka bërë një marrëveshje me Katarin. Shteti jonë e ka obligim, e obligon ligji, e obligon kushtetuta, që ne t’i kemi rehabilitimin apo shërimin jashtë vendit. Është me ligj e obliguar që këto kategori 100 për qind është e invalidit, 70 për qind veteran dhe 70 për qind është familja e dëshmorit që shërimin jashtë vendit shpenzimet t’i mbulojë qeveria apo ministria përkatëse”, tha ai.

Gjatë ditës së sotme Forca e Sigurisë së Kosovës do të kryejë stërvitje ushtarake në zonën e Gërmisë.

Siç ka njoftuar Komuna e Prishtinës në Facebook, gjatë ditës do të ketë marshim kondicional të FSK-së. Kjo nënkupton prani të pjesëtarëve të FSK-së në terren dhe lëvizje të këmbësorisë.

Komuna ka thënë se aktiviteti është në kuadër të planit të rregullt stërvitor dhe nuk ka arsye për shqetësim

“Ju njoftojmë se FSK – Forca e Sigurisë së Kosovës, bazuar në planin e saj të stërvitjeve, më 15 nëntor 2025 do të realizojë një stërvitje ushtarake, marshim kondicional në zonën e Gërmisë. Gjatë kësaj periudhe do të ketë lëvizje të këmbësorisë dhe prani të pjesëtarëve të FSK-së në terren. Ky aktivitet zhvillohet në kuadër të planit të rregullt stërvitor dhe nuk ka arsye për shqetësim”, thuhet në njoftim.

Më 9 nëntor qytetarët në 18 komuna votuan për t’i zgjedhur kryetarët e tyre përkatës. Në balotazh për të parët e qyteteve, LDK-ja fitoi pesë komuna, LVV-ja dhe AAK-ja në katër, ndërkaq PDK-ja në tre. Sipas Komisionit Qendror të Zgjedhjeve, dalja ishte mbi 32 për qind.

E ndërkaq, në Qendrën e Numërimit dhe Rezultateve sot do të fillojë numërimi i fletëvotimeve nga votimi me postë jashtë Kosovës dhe që i takojnë zgjedhjeve të raundit të dytë për kryetarë të 18 komunave, ka njoftuar dje Komisioni Qendror i Zgjedhjeve.

Numërimi është paralajmëruar se do të nisë nga ora 10:00.

KQZ-ja ka bërë të ditur se procesit të vlerësimit i janë nënshtruar më shumë se 9,800, prej të cilave janë aprovuar më shumë se 7,240, ndërkaq janë refuzuar rreth 2,570.

“Arsyeja më e shprehur se përse janë refuzuar këto pako është sepse në 2,500 raste mungon dëftesa e regjistrimit, një dokument me të dhëna unike, që votuesi i regjistruar e pranon nga KQZ. Më 11 dhe 12 nëntor, nga kutitë postare të KQZ-së në 22 shtete të ndryshme të botës, është bërë tërheqja e 13,084 pakove të supozuara me fletëvotime, të cilat i takojnë votimit me postë jashtë Kosovës në raundin e dytë të zgjedhjeve për Kryetarë të 18 komunave. Deri më tani, pjesa më e madhe e tyre janë sjellur në Kosov0ë”, ka thënë për RTKlive zëdhënësi i KQZ-së, Valmir Elezi.

Elezi shtoi se në fund të këtij procesi të vlerësimit, do të publikohen të dhënat për numrin e pakove me fletëvotime të supozuara, të cilat do të numërohen në Qendrën e Numërimit dhe Rezultateve.

Gjykata Supreme e Kosovës ka hedhur poshtë pesë ankesa të paraqitura ndaj vendimeve të Panelit Zgjedhor për Ankesa dhe Parashtresa (PZAP), duke konfirmuar kështu vlefshmërinë e vendimeve të këtij institucioni për çështjet e ngritura nga kandidatët për asamble komunale në disa komuna të vendit.

Në secilin nga pesë rastet e mëposhtme, Supremja vlerësoi se ankesat ishin të pabaza.

Rasti i parë (AA.nr.113/2025): Është refuzuar ankesa e Ardian Elshanit, kandidatit të PDK-së për Asamblenë e Fushë Kosovës, kundër vendimit të PZAP-së ZL.Anr.393/2025 të datës 07.11.2025.

Rasti i dytë (AA.nr.114/2025): Është refuzuar ankesa e Besart Lokajt të LDK-së, kandidat në Komunën e Deçanit, kundër vendimit ZL.Anr.372/2025 të datës 05.11.2025.

Rasti i tretë (AA.nr.115/2025): Është refuzuar ankesa e Vegim Ymerit të Nismës Socialdemokrate, kandidat në Komunën e Vitisë, kundër vendimit ZL.Anr.414/2025 të datës 07.11.2025.

Rasti i katërt (AA.nr.116/2025): Është refuzuar ankesa e kandidatëve të PDK-së në Gllogoc, Bekim Lestrani dhe Besnike Fazliu, kundër vendimit ZL.Anr.416/2025 të datës 10.11.2025.

Rasti i pestë (AA.nr.118/2025): Është refuzuar ankesa e Labinot Halilajt, kandidat i subjektit “Për Drenasin Kampion me Ramiz Lladrovcin”, kundër vendimit ZL.Anr.410/2025 të datës 07.11.2025.

Me këto vendime, Gjykata Supreme ka vulosur qëndrimin e saj se vendimet e PZAP-së në këto raste janë të drejta dhe në përputhje me legjislacionin zgjedhor në fuqi.

Partia Demokratike e Kosovës i është përgjigjur deputetit të saj Enver Hoxhaj, i cili sot ka kërkuar që të shtyhet konventa për zgjedhjen e kryetarit të ri të partisë.

Sekretarja e Përgjithshme e PDK-së, Vlora Çitaku, ka bërë me dije se Konventa e Jashtëzakonshme është thirrur në bazë të nenin 35 të Statutit të Partisë.

Në një prononcim për gazetën Nacionale, ajo ka thënë se sipas statut konventa duhet të mbahet brenda pesë ditësh.

Ajo ka theksuar se PDK-ja e inkurajon garën e brendshme për kryetar.

“Në mbledhjen e fundit të Kryesisë, pas dorëheqjes së Kryetarit Memli Krasniqi, Kryesia vendosi të thërrasë Konventën e Jashtëzakonshme, e cila, bazuar në nenin 35 të Statutit të Partisë, duhet të mbahet brenda pesë ditësh. Ne e inkurajojmë dhe e mirëpresim garën e brendshme. Çdo anëtar apo anëtare që i plotëson kriteret e përcaktuara me Statut është i mirëseardhur të kandidojë. Gara do ta bënte Konventën edhe më madhështore”, ka vlerësuar Çitaku.

Ajo ka bërë me dije se më e rëndësishme se gara e brendshme partiake është fitorja e PDK-së në zgjedhjet parlamentare.

“Për secilin prej nesh, qofshim në garë ose jo, është thelbësore që në përfundim të këtij procesi të dalim të unifikuar, me vizion të qartë dhe me platformë të fortë për zgjedhjet e përgjithshme që na presin shumë shpejt. Më e rëndësishme se gara e brendshme është fitorja jonë në zgjedhjet parlamentare. Sepse beteja kryesore politike për secilin prej nesh është ajo se kush do të jetë Kryeministri i ardhshëm i Republikës së Kosovës”, është shprehur Çitaku.

Deputeti i PDK-së, Enver Hoxhaj, sot ka kërkuar që të shtyhet konventa për zgjedhjen e kryetarit, e cila pritet të mbahen të hënën.

Ai ka bërë me dije se një parti serioze nuk mund të mbajë një konventë politike dhe përmbajtjesore në një kohë kaq të shkurtër.

Në profilin e tij në “Facebook”, Hoxhaj ka shkruar se ka kërkua nga kryesia e partisë që konventa të shtyhet të paktën për të dielën e ardhshme.

“Konventa e PDK-së për të zgjedhur kryetarin e partisë duhet të shtyhet, sepse një parti serioze nuk mund të mbajë një konventë politike dhe përmbajtësore në një kohë kaq të shkurtër. Kërkoj nga Kryesia e PDK-së shtyrjen e Konventës për të paktën deri të dielën e ardhshshme, sepse kështu do u jepej mundësia anëtarësisë dhe delegatëve të njihen me kandidaturat dhe platformat për zhvillimin e partisë dhe për çështje serioze që prekin vendin. Kjo do ta rriste cilësinë e kandidaturave dhe konkurrencën ndërmjet platformave, pasi zhvillimet e fundit kanë qenë të befasishme”, ka shkruar ai.

Ai ka bërë me dije se do të ishte mirë që në këtë garë të kishte më shumë se një kandidaturë.

Megjithatë, ai nuk ka treguar nëse do të kanditojë për kryetar të PDK-së.

“Kjo nguti nuk garanton garë cilësore, as reformimin dhe unitetin e kërkuar e të domosdoshëm për PDK-në në këtë kohë. Në partitë demokratike, më shumë se një kandidaturë është mundësi për delegatët që të zgjedhin lirisht dhe ndihmon në pasurimin e platformave individuale, duke çuar në ndërtimin e një platforme të përbashkët për PDK-në. Për një vendimmarrje kaq të rëndësishme, kërkoj që procesi zgjedhor të shtyhet, në mënyrë që gara të hapet për të gjithë dhe baza të ketë kohën e duhur për të shprehur vullnetin e saj pa presion dhe pa imponime. Dorëheqja e kryetarit, e shoqëruar me preferenca për pasuesin, krijon përshtypjen e skemave të sajuara e të paragjykuara, të cilat nuk e çojnë partinë përpara”, ka shkruar Hoxhaj, duke shtuar se gara nuk duhet të orientohet.

“Unë jam qartësisht kundër çdo imponimi, kundër çdo tentative për të orientuar garën dhe kundër çdo formule që shpërfill bazën dhe delegatët. PDK-ja ka nevojë për drejtim të ri, jo për skema të vjetra; ka nevojë për vizion të ri, jo për ndërrim rolesh. Ky është momenti për t’i hapur rrugën ndryshimit të vërtetë”, ka shkruar ai.

Presidentja e Kosovës, Vjosa Osmani ka kritikuar Bashkimin Evropian duke thënë se ‘Brukseli zyrtar duket se nuk sheh progresin që ka bërë Kosova’.

Osmani ka thënë se Kosova nuk bën flirt me vende të tjera e fuqi keqdashëse si Rusia, Kina e Irani, të cilat i quan edhe si “trekëndëshi i së keqes”, por në të njëjtën kohë ndjen se puna s’po i vlerësohet.

“Por në të njëjtën kohë, nuk e ndiejmë që ky qasje pro-evropiane dhe fakti që ne jemi 100% të përafruar me politikën e përbashkët të jashtme dhe të sigurisë së BE-së është parë ose vlerësuar. Përkundrazi, duket sikur merret si e mirëqenë. 97% e njerëzve, sigurisht, janë pro-evropianë. Reformat tona në ekonomi, në sundim të ligjit, sidomos në luftën kundër krimit dhe korrupsionit, kanë qenë thelbësore. Megjithatë, në rrugën tonë të integrimit evropian, jemi të bllokuar. Dhe duket sikur procesi i bazuar në meritë, për të cilin BE-ja flet aq shumë, mbetet diçka që duhet të vijë. Unë ende nuk e shoh të ndodhë”, ka thënë Osmani në “Politico”.

“Por shpresoj, ashtu siç thatë ju, që Gjermania do të luajë atë rol udhëheqës në shtyrjen e një procesi të bazuar në meritë, sepse ne nuk po kërkojmë bamirësi. Nuk po kërkojmë rrugë të shkurtër. Po kërkojmë, pikërisht, respekt për punën që bëjmë dhe pranimin e reformave që ne ndërmarrim. Dhe nëse kjo do të merret parasysh, Kosova do të bëhej vendi udhëheqës. Por realiteti është se tani për tani, aplikimi ynë as nuk është shqyrtuar. Ne aplikuan në dhjetor 2022, dhe tani jemi pothuajse në dhjetor 2025. Ai ndodhet diku në sirtarët e Bashkimit Evropian, por nuk po ecën përpara”, ka thënë Osmani.

Ish-ambasadori holandez, Robert Bosch, ka zhvilluar një vizitë në një kolegj në Kosovë, ku në fjalimin e tij u përqendrua kryesisht tek procesi gjyqësor në Hagë, ku po gjykohen ish-krerët e Ushtrisë Çlirimtare të Kosovës për krime lufte.

Bosch fillimisht u shpreh tejet kritik për mënyrën se si e kishte shkruar raportin për trafikim organesh ish-senatori zviceran, Dick Marty.

“E mbaj mend se kam qenë jashtëzakonisht i irrituar kur u mbështet raporti i Dick Martyt, sepse në vlerësimin tim ai përmban shumë mangësi. Për këtë çështje kam pasur polemika edhe me zyrtarë të tjerë evropianë dhe jam habitur kur ata e mbështetën raportin e Martyt, në të cilin pretendohet se ka pasur trafikim organesh të kryera nga udhëheqës të UÇK-së”, ka thënë Bosch.

Ish-ambasadori holandez beson se ish-krerët e UÇK-së do të shpallen të pafajshëm në fund të procesit.

“UNMIK-u dhe EULEX-i kanë pasur mandat të plotë për hetimin e krimeve të luftës, prandaj lind pyetja pse ishte e nevojshme krijimi i një Gjykate tjetër. Fatkeqësisht, presioni ndërkombëtar mbi Kosovën për themelimin e Gjykatës Speciale ishte shumë i madh. Është me të vërtetë e veçantë që Thaçi dhe të tjerët u dorëzuan vullnetarisht në Hagë, dhe kjo duhet të vlerësohet. Nëse zhvillohet një proces i drejtë gjyqësor, besoj se këta njerëz do të shpallen të pafajshëm nga kjo Gjykatë”, tha ai.

Rreth 6 mijë protestues nga trojet shqiptare pritet të marrin pjesë në protestën e paralajmëruar nga Organizata e Veteranëve të Luftës së UÇK-së (OVL-UÇK) më 16 nëntor në Strasburg, përballë Asamblesë së Përgjithshme të Këshillit të Evropës.

Protesta organizohet si kundërshtim ndaj, siç thonë organizatorët, padrejtësive që po u bëhen ish-krerëve të UÇK-së në Hagë.

Kryetari i OVL-UÇK-së, Hysni Gucati, tha se përgatitjet janë drejt përfundimit dhe se koordinimet me mërgatën dhe këshillin organizativ në Evropë tashmë janë bërë.

“Jemi në fazën finale të përgatitjeve. Kemi mbajtur takime me diasporën në disa shtete të Evropës. Më 16 nëntor, në orën 13:00, para Këshillit të Evropës, do të ngrisim zërin pikërisht aty ku është miratuar rezoluta e Dick Marty-t, një dokument i mbushur me gënjeshtra’, tha Gucati.

Sipas tij, pjesëmarrës nga Kosova, Shqipëria dhe Maqedonia e Veriut kanë siguruar bileta të lira kryesisht për në Bazel dhe Shtutgard.
“Presim mbi 5 deri 6 mijë pjesëmarrës. Vetëm nga Kosova pritet të jenë mbi 1000 udhëtarë,” u shpreh ai.

Gucati konfirmoi se interesimi i lartë ka ndikuar që disa kompani t’i rrisin çmimet e biletave.
“Disa kompani i kanë shtrenjtuar biletat nga 72 në 120 euro. Më vjen keq, sepse disa qytetarë nuk do të kenë mundësi të vijnë,” tha ai.

Ai theksoi se hotelet në Strasburg tashmë janë të mbushura me rezervime nga pjesëmarrësit, ndërsa shumë shqiptarë po vendosen në qytetet përreth.
“Strasburgu është bllokuar nga rezervimet. Shumë shqiptarë kanë kaluar deri në Kolmar për të gjetur vend,” shtoi ai, duke kujtuar se protestat e kaluara kanë tejkaluar pritjet.

Gucati tha se OVL-UÇK dhe organizatat e dala nga lufta nuk kanë marrë asnjë mbështetje financiare nga qeveria dhe se gjithçka është organizuar nga donatorët.

Vetëvendosja ka edhe pesë ditë kohë për të siguruar shumicën parlamentare për votimin e Qeverisë Konjufca, por partitë opozitare po qëndrojnë të palëkundura: zgjedhje të reja. PDK dhe LDK konfirmojnë se nuk janë kontaktuar fare nga LVV, ndërsa AAK thotë se është kontaktuar, por ka refuzuar takimin.

Afati për votimin e kabinetit të propozuar nga Glauk Konjufca po i afrohet fundit, ndërsa opozita insiston se nuk ka vullnet për bashkëpunim. Dy partitë më të mëdha opozitare, PDK dhe LDK, thonë se nuk kanë marrë asnjë ftesë për bisedime dhe e shohin opsionin e vetëm politik mbajtjen e zgjedhjeve të reja.

AAK ka konfirmuar se ka pasur kërkesë për takim, por e ka refuzuar.
“Ka pasur kërkesa për takim, por nuk e shohim të arsyeshme të shkojmë. Nuk funksionon me logjikën ‘qitma votën se e du Kosovën’”, tha Ramush Haradinaj.

Edhe LDK deklaroi se nuk ka pasur asnjë kontakt nga LVV për votimin e mandatarit të dytë. Deputeti Alban Zogaj akuzoi Vetëvendosjen se po kërkon kohë, jo shumicë.
“Është e njëjta qasje si me mandatarin e parë. Nuk ka tentativë reale për krijimin e institucioneve”, theksoi ai.

Nisma Socialdemokrate, ndërkohë, mbetet po ashtu e vendosur për zgjedhje:
“Nisma nuk ka votë për askënd. Situata është thelluar dhe zgjedhjet janë e vetmja zgjidhje”, thuhet në reagimin e tyre.

Edhe PDK një ditë më parë kishte bërë të ditur se nuk ka pasur asnjë kontakt me Vetëvendosjen lidhur me votimin e Qeverisë.

Sipas hulumtuesit të IKD-së, Naim Jakaj, gjasat për formimin e qeverisë së re janë minimale, pasi Konjufca nuk ka ndërmarrë ndonjë hap konkret për të siguruar votat.
“Kabineti është praktikisht i njëjtë me atë të Kurtit dhe pa aleanca të reja nuk pritet rezultat ndryshe”, vlerësoi ai.

Vetëvendosja nuk ka sqaruar nëse ka siguruar ndonjë votë më shumë sesa në tentimin e parë. Nëse shumica nuk arrihet, vendi pritet të shkojë në zgjedhje të parakohshme në dhjetëditëshin e fundit të dhjetorit.