Tag: Ballina

Kryeministri në detyrë i Kosovës ka uruar shqiptarët për 28 nëntor.

Kurti ka shkruar se nuk dihet të ketë një tjetër komb në botë që fati i tij të jetë ndërthurur kaq pazgjidhshmërisht me një datë të caktuar ashtu siç gërshetohet data 28 Nëntor me fatin e kombit tonë.

Kurti ka përmendur vitin 1443, kur u ngrit flamuri Kastriotëve në Krujë, duke udhëhequr rezistencën kundër Perandorisë Osmane, pastaj shumë shekuj më vonë shpallja e pavarësisë më 28 nëntor 1912, kur flamuri shqiptar u ngrit në Vlorë.

Në po këtë datë, në vitin 1955, në kullat e Jasharëve në Prekaz lindi Kryekomandanti i UÇK-së, Adem Jashari, njeriu që do të vihej në ballë të luftës për lirinë e Kosovës, shkruan Kurti.

Ai përmend se po ashtu, më 28 nëntor të vitit 1997, UÇK-ja, për herë të parë, doli publikisht për t’ia bërë me dije botës se ky popull ishte i gatshëm të bënte çdo flijim dhe nuk do të hiqte dorë kurrë nga lufta për liri.

Postimi i plotë:

Nuk dihet të ketë një tjetër komb në botë që fati i tij të jetë ndërthurur kaq pazgjidhshmërisht me një datë të caktuar ashtu siç gërshetohet data 28 Nëntor me fatin e kombit tonë. Kjo ditë e 28-të e muajit të njëmbëdhjetë vërtet ishte një aksident historik i vitit 1443, por një aksident i këtillë, i përsëritur me kaq ngulm përgjatë historisë, doemos u kthye dhe u bë një shenjë e shenjtë e kalendarit tonë kombëtar. Në këtë datë, mbi Kështjellën e Krujës, u ngrit flamuri kuq e zi i Kastriotëve, që u kthy e u bë edhe flamur yni kombëtar. Kështu nisi rrugëtimi i nëntorëve tanë që erdhën e u lidhën si hallka të një zinxhiri të pashkëputshëm, duke shënuar jo vetëm data kalendari, por edhe rrugën e lirisë sonë.

Pas shumë shekujsh, më 28 nëntor 1912, ky flamur u ngrit prapë në Vlorën e Labërisë, kur u shpall mëvetësia e Shqipërisë së sotme Administrative. Ky ishte Nëntori ynë i Dytë. Në këtë shpallje u njëmendësua një pjesë e projektit larpamës të Sami Frashërit, i cili kishte paraparë një Shqipëri në kufijtë e përafërt të katër vilajeteve. Ai theksonte qartë që “qëllimi i vetëm i shqiptarëve është të ruajnë Shqipërinë të mos copëtohet prej të huajve, të mbajnë gjuhën e kombësinë e tyre”. Por kjo, për fat të keq, në atë kohë u arrit vetëm pjesërisht. Për më tepër, në kujtimet e tij, në përvjetorin e parë të pavarësisë, në vitin 1913, Luigj Gurakuqi shprehej se “në jetën e kombevet, si edhe në jetën e njerëzve ndodhin hera-herë disa rasa të paprituna, që trazojnë rrjedhën e punëve dhe shkaktojnë disa ngjarje, që as nuk pritej, as nuk shpresohej të ndodhnin. Ashtu kishte ngjarë në vitin 1912, mot i mbushur me mjerime e me pësime, por që, në mes të trazimeve e të ligave të panjohura, kishte sjellë edhe nji send të pashpresuar e të paçmueshëm, dmth. lirinë, bashkimin dhe pavarsinë e Atdheut!”

Megjithëkëto, historia e nëntorëve tanë nuk mbaron këtu. Në po këtë datë, në vitin 1955, në kullat e Jasharëve në Prekaz lindi Kryekomandanti i UÇK-së, Adem Jashari, njeriu që do të vihej në ballë të luftës për lirinë e Kosovës. Po ashtu, më 28 nëntor të vitit 1997, UÇK-ja, për herë të parë, doli publikisht për t’ia bërë me dije botës se ky popull ishte i gatshëm të bënte çdo flijim dhe nuk do të hiqte dorë kurrë nga lufta për liri. Gjithë këto përpjekje, luftëra e flijime të atdhetarëve shqiptarë nëpër shekuj janë kurorëzuar sot me Shqipërinë e pavarur dhe me Kosovën e pavarur.
Natyrisht, si komb evropian, sytë i kemi të kthyer kah e ardhmja, kah një Nëntor i Tretë, që duhet të vijë nëpërmjet përpjekjeve tona, punës dhe përkushtimit tonë të vazhdueshëm. Ky Nëntor i Tretë, edhe nëse nuk do të bjerë në këtë ditë, edhe nëse nuk do të jetë muaj i nëntorit, ne mund ta pagëzojmë që sot si 28 Nëntori ynë i Tretë. Atëherë amaneti i të gjithë atdhetarëve shqiptarë, të gjallë e të vdekur, do të përmbushet. Urojmë që kjo ditë të vijë sa më shpejt!
Vëllezër shqiptarë e motra shqiptare, kudo që gjendeni, mes familjeve e miqve tuaj, në këtë ditë gëzimi e feste:
Gëzofshi 28 Nëntorin, Ditën e Flamurit!

Presidentja e Kosovës, Vjosa Osmani, gjatë vizitës së saj në Shkodër në kuadër të festimeve të 28 Nëntorit, ka marrë pjesë në “Sofrën Shqiptare” të shtruar në sheshin e qytetit, ku ka ndarë mesazhe të bashkëpunimit dhe lidhjes së ngushtë ndërmjet Kosovës dhe Shqipërisë.

Kryetari i Bashkisë së Shkodrës, Benet Beci, tha se “Shkodra ka qenë gjithmonë një urë mirësie dhe bashkëpunimi dhe vllazërimi me Kosovën. Prania juaja sot është një simbol i fortë i asaj lidheje që na bashkon në histori, kulturë dhe vlera”, tha ai.

Presidentja e Kosovës, Vjosa Osmani, në fjalën e saj theksoi afërsinë e veçantë mes Kosovës dhe Shkodrës.

“Sonte jemi në zemrën e nje qyteti që nuk ka nevojë të prezantohet. Nga Kosova ne e ndjejmë Shkodrën si shtëpinë tonë të dytë, na lidh gjuha sepse shumë prej fjalive që ne i ruajmë me krenari kanë lindur pikërisht këtu, na lidh muzika që ka qenë shoqëruesja jonë në çdo dasëm guxim e festë, na lidh tradita, na lidh humori që si në Shkodër ashtu edhe në Kosovë është armë mbijetese butësi dhe mençuri”, tha Osmani.

Ministri në detyrë i Administrimit të Pushtetit Lokal, Elbert Krasniqi, dyshohet për kansoje në Pejë, me datën 23 nëntor derisa “Rruga e Re” ishte e bllokuar nga kolona.

Zëdhënësi i Prokurorisë Themelore në Pejë, Shkodran Nikçi tha se ndaj ministrit në detyrë është iniciuar vepra ‘kanosje’.

“Me urdhër të prokurorit është inicuar rast për veprën penale të kanosjes. I dyshuari është një ministër në detyrë i Republikës së Kosovës. Për këtë çështje jemi duke ndërmarrë të gjitha veprimet e nevojshme hetimore në koordinim të plotë me Policinë e Kosovës. Dyshohet se gjithçka ka ndodhur në një rrugë, derisa ka qenë e bllokuar për shkak të trafikut, dhe sipas tyre i njëjti ka dalë nga vetura dhe i ka kanosur”, ka deklaruar Nikçi.

Sipas deklaratës së viktimave, Krasniqi në ato momente e kishte vendosur dorën në armë.

Ministria e Punëve të Brendshme ka njoftuar se e premtja do të jetë ditë pushimi për nëpunësit e administratës publike me rastin e Festës së 28 Nëntorit.

Në komunikatën e MPB-së thuhet se dita e premte, do të jetë ditë pushimi, duke uruar 28 Nëntorin.

Festa e 28 Nëntorit shënon ditën e pavarësisë së Shqipërisë dhe në të gjithë vendin organizohen aktivitete kulturore e ceremonialet tradicionale.

Kujtojmë se 28 Nëntori për Kosovën është festë e katërfishtë, është: Dita e Flamurit që lidhet me Skënderbeun; Dita e Pavarësisë së Shqipërisë; Ditëlindja e komandantit legjendar Adem Jashari dhe përvjetori i daljes së parë publike të Ushtrisë Çlirimtare të Kosovës.

Ndërmarrja Publike Komunale “Trafiku Urban” në Prishtinë ka njoftuar se transporti publik do të mbetet i pezulluar deri në transferimin e mjeteve buxhetore nga institucionet qendrore, ndonëse Kuvendi Komunal ka votuar sot bartjen e buxhetit nga viti 2024.

Përmes një komunikate, ndërmarrja ka shprehur keqardhje për vështirësitë që po u shkaktohen qytetarëve, duke theksuar se pa realizimin e transferimit financiar, Trafiku Urban mbetet në pamundësi të shlyejë obligimet ndaj furnitorëve dhe të rifillojë operimin normal.

Votohet bartja e mjeteve buxhetore nga viti 2024 në 2025 në Komunën e Prishtinës

Sipas ndërmarrjes, të gjitha institucionet përgjegjëse, përfshirë ministrinë përkatëse, duhet të përshpejtojnë procedurat në mënyrë që shërbimi publik të rikthehet sa më shpejt.

Gjatë kësaj periudhe, protesta e paralajmëruar e punëtorëve të Trafikut Urban do të vazhdojë, derisa situata të zgjidhet.

Ndërmarrja gjithashtu ka bërë të ditur se qytetarëve do t’u kompensohen ditët e biletave mujore që nuk kanë mundur t’i shfrytëzojnë për shkak të ndërprerjes së shërbimit.

“Të gjitha biletat mujore të paguara do të kompensohen për ditët kur shërbimi nuk ka qenë i qasshëm”, thuhet në njoftim.

Kryeministri në detyrë, Albin Kurti, ka bërë të ditur se do të ndahen mjete për Radio Televizionin e Kosovës nga kategoria e kursimeve, si zgjidhje e përkohshme për pagat e punonjësve të këtij institucioni.

Në mbledhjen e qeverisë, Kurti ka shpjeguar se që nga muaji gusht ishte marrë një zgjidhje e përkohshme përmes overdraftit për RTK, me shpresën që pas konstituimit të Kuvendit dhe themelimit të komisioneve parlamentare të arrihej një zgjidhje permanente me përfshirjen e të gjitha partive politike.

“Ne nuk i kishim votat e mjaftueshme, pasi partitë tjera refuzuan kategorikisht pagat për RTK. Siç edhe e ka paralajmëruar ministri Hekuran Murati këtë të hënë në konferencë, kemi shqyrtuar disa opsione të mundshme për të dalë nga kjo situatë,” tha Kurti.

Ai theksoi se ndarja e sotme e mjeteve nga kursimet është një zgjidhje e përkohshme, një improvizim i detyruar, pas përpjekjeve të vazhdueshme në Kuvend për miratimin e buxhetit për RTK-në.

Prokuroria Speciale e Republikës së Kosovës ka ngritur aktakuzë ndaj T.P., i cili akuzohet për kryerjen e krimeve të luftës kundër popullsisë civile gjatë luftës në Kosovë. Sipas aktakuzës, T.P. ka marrë pjesë në vrasje, plaçkitje dhe shkatërrim të pasurisë së civilëve shqiptarë në fshatin Cerrcë dhe fshatrat përreth në komunën e Istogut.

Aktakuza përmend një ngjarje të rëndë që ka ndodhur në prill të vitit 1999, ku T.P. akuzohet se ka qenë pjesë e një grupi të forcave serbe që ka ekzekutuar pesë anëtarë të një familjeje. Viktimat, K.R., Z.R., R.R., I.R., dhe Sh.R., nën kërcënimin e armëve janë detyruar të lënë shtëpinë e tyre dhe janë dërguar në një vend tjetër, ku më pas janë vrarë. Shtëpia e tyre, së bashku me trupat e viktimave, është djegur.

Përveç vrasjeve, T.P. akuzohet edhe për vjedhjen e pasurive të luajtshme dhe shkatërrimin e shtëpive të civilëve shqiptarë në fshatrat e komunës së Istogut, në bashkëpunim me pjesëtarë të tjerë të forcave serbe.

Prokuroria Speciale ka paraqitur aktakuzën për këto krime të luftës dhe hetimet vazhdojnë për të sqaruar më tej këtë ngjarje tragjike të periudhës së luftës në Kosovë.

Kryeministri në detyrë, Albin Kurti, nga kazerma “Adem Jashari” ka uruar “Ditën e Forcës”, duke theksuar rëndësinë e kësaj dite për popullin e Kosovës dhe rolin e Forcës së Sigurisë së Kosovës në garantimin e paqes dhe sigurisë për brezat e rinj.

Ai foli edhe për investimet e mëdha të bëra në modernizimin e ushtrisë dhe pajisjet e reja që, sipas tij, po e transformojnë FSK-në në një forcë të denjë për standardet e NATO-s.

Kurti kujtoi sakrificën e dëshmorëve të kombit, me theks të veçantë ndaj komandantit legjendar Adem Jashari dhe familjes Jashari, duke thënë se falë tyre sot Kosova ka ushtrinë që e mbron popullin e vet.

“Është një ditë e gëzuar për të gjithë ne, sepse me Forcën e Sigurisë së Kosovës, të pajisur gjithnjë e më mirë, brezat e rinj do të rriten më të sigurt për të jetuar në paqe, për t’u zhvilluar dhe për të lulëzuar. Sakrifica e dëshmorëve, mbi të gjitha e kryekomandantit Adem Jashari dhe familjes Jashari, si dhe kontributi i veteranëve e invalidëve të UÇK-së, qëndron në themel të çdo të arriture. Ndërsa sot shohim fëmijët që vijnë ta shohin ushtrinë e tyre, gjë që u ngroh zemrat dhe u jep shpresë për të ardhmen”, tha Kurti.

Ai theksoi se FSK ka kaluar nga mungesa e pajisjeve në një periudhë investimesh të mëdha dhe modernizimi të armatimit.

Kryeministri në detyrë falënderoi Shtetet e Bashkuara të Amerikës dhe aleatët ndërkombëtarë për mbështetjen e vazhdueshme.

“Duhet veçuar sigurimi i sistemit antitank ‘Javelin’ nga SHBA-të dhe procesi i marrjes së helikopterëve ‘Black Hawk’. Kjo është arsyeja pse i falënderojmë aleatët tanë, NATO-n dhe posaçërisht Shtetet e Bashkuara, që na mbështesin në pajisje, armatim, municion dhe trajnime. Trajnimet jashtë vendit janë katërfishuar dhe buxheti për mbrojtje është trefishuar. Ky është obligimi ynë ndaj mbrojtjes së Republikës së Kosovës”, përfundoi Kurti.

Presidentja Vjosa Osmani, ka uruar Ditën e Forcës të Ushtrisë së Kosovës, ku sot është organizuar Dita e Hapur në të gjitha kazermat e FSK-së.

Gjatë vizitës në kazermën “Adem Jashari”, Osmani tha se Forca e Sigurisë së Kosovës është pasardhëse e denjë e Ushtrisë Çlirimtare të Kosovës.

“Sot është një ditë krenarie për gjithë popullin e Kosovës. Është ditë krenarie, sepse ushtria jonë e sotme, është pasardhëse e denjë e krenare e Ushtrisë Çlirimtare të Kosovës, e djemve, vajzave të cilët vunë themelet e lirisë sonë. Sot, këta djem e vajza na bëjnë krenarë , jo vetëm brenda vendit, por kudo që ata shërbejnë”, u shpreh Osmani.

Nga ana tjetër, ish-kryetari i Kuvendit të Kosovës, Dimal Basha, tha se janë të lumtur për punën e jashtëzakonshme të FSK-së, të cilën e quajti amanet të njerëzve që ranë për lirinë e Kosovës.

“Jemi jashtëzakonisht të lumtur për një punë të jashtëzakonshme të ushtrisë tonë, një vazhdimësi e një historie të lavdishme e popullit tonë, dhe trashëgimi e drejtpërdrejt e Ushtrisë Çlirimtare të Kosovës”, tha Basha.

E krejt në fund, një urim për Ditën e Forcës e pati edhe kryeministri në detyrë, Albin Kurti.

“Na bëjnë krenar, e ndihemi të sigurt si shtet”, tha ai për Forcën e Sigurisë të Kosovës.

Në kazermën “Adem Jashari”, dyert sot janë hapur për të gjithë qytetarët të cilët duan të shohin nga afër ushtrinë e Kosovës.

Në “Ditën e Forcës” presidentja e vendit, Vjosa Osmani, kryeministri në detyrë, Albin Kurti, kryekuvendari, Dimal Basha dhe ministri në detyrë i Mbrojtjes, Ejup Maqedonci vizituan kazermën duke parë nga afër pajisjet ushtarake të FSK-së.

Mes tjerash edhe fëmijët të cilët kishin mundësi të vizitonin kazermën me brohoritje përqafuan dhe shkëmbyen fotografi me liderët e vendit.

Ndërkaq, në “Ditën e Forcës” tradicionalisht ushtria pret qytetarët e saj.

Ndryshe, më 14 dhjetor të 20218-ës, Kuvendi i Kosovës pati miratuar tri ligjet me të cilat mundësohet transformimi i Forcës së Sigurisë së Kosovës në Ushtri të Kosovës, pra, Ligjin për Ministrinë e Mbrojtjes, atë për Forcën e Sigurisë së Kosovës dhe Ligjin për Shërbim në Forcën e Sigurisë së Kosovës.

Pas këtij vendimi, po në kazermën “Adem Jashari” në Prishtinë ishte mbajtur një ceremoni ku është prezantuar Forca e Sigurisë së Kosovës.Në atë kohë, President i Kosovës ishte Hashim Thaci, Kryeministër Ramush Haradinaj dhe Kryetar i Kuvendit, Kadri Veseli.