Tag: Ballina

Presidentja e Republikës së Kosovës, Vjosa Osmani, sot në ora 10:00 pritet në Selinë e Shenjtë, në audiencë nga Papa Leo XIV në Pallatin Apostolik.

Osmani, së bashku me Zotërinë e Parë, Prindon Sadriu, dje ka udhëtuar në Selinë e Shenjtë më Vatikan. Presidentja do të zhvillojë takim me Sekretarin e Shtetit të Vatikanit, Kardinalin Pietro Parolin, njofton zyra për informim e Presidentes.

Gjatë vizitës në Vatikan, Presidentja Osmani viziton edhe Bazilikën e Shën Pjetrit.

“Në selinë e Misionit të Posaçëm të Republikës së Kosovës në Selinë e Shenjtë, ndërkaq, Presidentja Osmani do të organizojë një pritje të fundvitit me përfaqësues të Selisë së Shenjtë, përfaqësues diplomatik dhe personalitete të tjera. Gjatë kësaj vizite ajo do të realizojë edhe një sërë aktivitetesh të tjera me qëllim të thellimit të raporteve ndërmjet Republikës së Kosovës dhe Selisë së Shenjtë”, ka njoftuar Presidenca.

Protesta e radhës kundër padrejtësive të Gjykatës Speciale ndaj ish-krerëve të UÇK-së do të mbahet sot në Shkup, në ora 13:00.

Edhe kjo protestë ka mobilizuar shqiptarët e Kosovës, Maqedonisë dhe trevave të tjera shqiptare.

Një ditë para protestës, shumë politikanë kanë bërë thirrje që shqiptarët të marrin pjesë, duke theksuar rëndësinë e mbrojtjes së dinjitetit dhe të së vërtetës historike.

Një thirrje të tillë ka bërë edhe lideri i shqiptarëve të Maqedonisë, Albi Ahmeti.

Në profilin e tij në “Facebook”, ai shkroi se nesër Shkupi do t’i bashkojë të gjithë shqiptarët.

“Nesër, më 13 dhjetor, në orën 13:00, në Sheshin ‘Skënderbeu’ në Shkup, bashkohemi për një qëllim të qartë: kërkesën për drejtësi dhe hedhjen poshtë të akuzave të fabrikuara të Serbisë dhe Rusisë”, tha Ahmeti.

Ai vlerësoi se emri i UÇK-së do të mbetet gjithmonë pjesë e identitetit dhe dinjitetit kombëtar.

“Ne dalim me përgjegjësi, për të nderuar sakrificën dhe për të mbrojtur të vërtetën e historisë sonë. Liria ka emër, UÇK. Dhe ky emër mbetet pjesë e identitetit dhe dinjitetit tonë kombëtar. Ju ftoj të gjithëve që nesër të jemi bashkë”, shtoi ai.

Mbështetje kësaj proteste i dha edhe lideri i AAK-së, Ramush Haradinaj, i cili shkroi: “Gjithmonë në përkrahje të luftës së drejtë çlirimtare!”

Ndërsa ish-kryetari i PDK-së, Memli Krasniqi, bëri thirrje për pjesëmarrje të gjerë qytetare në protestën gjithëkombëtare që do të mbahet më 13 dhjetor, në ora 13:00, në Sheshin “Skënderbeu” në Shkup, në mbrojtje të krerëve të Ushtrisë Çlirimtare të Kosovës që po gjykohen në Hagë.

Në një postim në Facebook, Krasniqi theksoi se pas Prishtinës dhe Tiranës, Shkupi do të jetë qendra e radhës ku shqiptarët do të ngrejnë zërin për drejtësi.

“Pas Prishtinës dhe Tiranës, këtë të shtunë, jehona për drejtësi e shqiptarëve do të ngrihet fuqishëm edhe në Shkup. Më 13 dhjetor, në ora 13:00, në Sheshin ‘Skënderbeu’, bashkohen zërat nga të gjitha trojet për të mbrojtur dinjitetin, të vërtetën dhe luftën e drejt të UÇK-së”, shkroi ai.

Krasniqi e cilësoi protestën si një kauzë të përbashkët të shqiptarëve kudo që jetojnë: “Një protestë gjithëkombëtare, një kauzë e përbashkët. Drejtësi dhe liri për çlirimtarët!”

Ndërsa kryetari i OVL-UÇK-së, Hysni Gucati, foli për protestën e nesërme kundër Gjykatës Speciale dhe bëri me dije se janë bërë të gjitha përgatitjet për këtë tubim.

Gucati tha se në protestë pritet të marrin pjesë rreth 20 mijë qytetarë.

“Interesimi është shumë i madh nga qytetarët e Kosovës, sidomos nga qytetarët e Maqedonisë së Veriut. Ne presim numër të madh protestuesish, rreth 20.000 nga të dy shtetet, megjithëse interesi më i madh vjen nga Kosova”, theksoi ai.

Kryeministri i Maqedonisë së Veriut, Hristijan Mickoski, ditë më parë ka deklaruar se nuk e mbështet këtë protestë, por ka siguruar se institucionet do të kujdesen që gjithçka të zhvillohet sa më mirë dhe pa incidente.

Para kësaj proteste, OVL-UÇK ka mbajtur protesta edhe në Hagë, Tiranë, Strasbourg dhe Prishtinë, në mbështetje të ish-krerëve të UÇK-së, të cilët po gjykohen në Gjykatën Speciale për krime që pretendohet se janë kryer gjatë luftës në Kosovë.

Një ngjarje e rëndë është raportuar pasditen e djeshme në Prishtinë, ku një grua e re është gjetur pa shenja jete në banesën e saj, në rrugën “Ismet Jashari”, mëson Gazeta Sinjali.

Sipas informatave të para, rreth orës 15:00 Policia ka pranuar njoftim për një person të dyshuar të vdekur. Njësitë policore kanë dalë në vendngjarje, ku kanë hasur G. Sh, rreth 29-vjeçare të shtrirë në tokë. Në lokacion ka intervenuar edhe ekipi i emergjencës, i cili ka konstatuar vdekjen e saj.

Burimet bëjnë të ditur se viktima dyshohet se kishte qenë me grip disa ditë më parë dhe kishte marrë tretman mjekësor në shtëpi. Në vendngjarje është intervistuar edhe një familjare e saj, e cila ka dhënë deklaratë lidhur me gjendjen shëndetësore të së ndjerës ditët e fundit.

Në vendin e ngjarjes kanë dalë njësitë e hetimeve dhe Instituti i Mjekësisë Ligjore, të cilët kanë tërhequr trupin e pajetë për ekzaminim të mëtejmë.

Me urdhër të Prokurorit të Shtetit, rasti është iniciuar si “Hetim mbi vdekjen”, ndërsa autoritetet po hetojnë rrethanat e plota që çuan në këtë rast tragjik.

Njësia e Hetimeve Rajonale në Gjilan, përkatësisht Ekipi i Krimeve Kibernetike, me autorizim të Prokurorit të Shtetit, ka zhvilluar veprime intensive hetimore lidhur me një rast të dyshimit për disa vepra të rënda penale financiare.

Sipas informatave, hetimet kanë të bëjnë me dy të mitur, A.M., rreth 17-vjeçar dhe E.S., rreth 16-vjeçar, të cilët dyshohet se gjatë periudhës shtator 2025 deri më 6 tetor 2025, përmes mashtrimit kanë keqpërdorur të dhëna bankare të disa qytetarëve, me qëllim përfitimi material të kundërligjshëm.

Më 8 dhjetor 2025, me autorizim të Prokurorit të Shtetit, janë iniciuar veprime fillestare hetimore për veprën penale “Lëshimi i çeqeve pa mbulesë ose të rreme dhe keqpërdorimi i kartelave bankare apo kreditit”. Gjatë procedurës janë siguruar prova të besueshme që ngritin dyshimin se të dy të miturit kanë qenë të përfshirë edhe në “Mashtrim” dhe “Shpërdorim të pasurisë”.

Më 11 dhjetor 2025, me autorizim të Prokurorit të Shtetit, janë kryer kontrolle në dy lokacione të ndara në Gjilan, ku janë sekuestruar prova materiale që forcojnë më tej bazën e dyshimit ndaj të dyshuarve.

Pas arrestimit, të miturit janë intervistuar në përputhje me procedurat ligjore për të mitur, ndërsa me vendim të Prokurorit të Shtetit janë dërguar në mbajtje për 24 orë.

Rasti është duke u hetuar nga Ekipi i Krimeve Kibernetike, ndërsa hetimet pritet të zgjerohen edhe ndaj rasteve të tjera të mundshme të keqpërdorimit financiar.

Policia e Kosovës ka zhvilluar me sukses një ushtrim të përbashkët me Ambasadën e Shteteve të Bashkuara në Prishtinë, në zonën e Ambasadës Amerikane në lagjen Arbëria.

Qëllimi i ushtrimit ishte vlerësimi i gatishmërisë institucionale, forcimi i kapaciteteve reaguese dhe koordinimi ndërmjet njësive të Policisë së Kosovës dhe personelit të sigurisë së Ambasadës Amerikane për situata krize dhe emergjencash.

Gjatë ushtrimit, i cili u trajtua me seriozitet të lartë, u angazhuan rreth 790 zyrtarë të profileve të ndryshme. Policia njofton se:

“Falë profesionalizmit të njësive të angazhuara dhe bashkëpunimit të qytetarëve, ushtrimi u realizua pa incidente, duke ofruar mundësi për të vlerësuar dhe përmirësuar qasjet operacionale të sigurisë.”

U demonstrua funksionimi efektiv i mekanizmave të komunikimit dhe reagimit të shpejtë, përdorimi i mjeteve të specializuara të sigurisë, testimi i procedurave operative dhe simulimi i skenarëve të ndryshëm të menaxhimit të krizave.

Policia e Kosovës falënderon qytetarët për mirëkuptim dhe pjesëmarrësit në trafik:

“Falënderojmë qytetarët dhe pjesëmarrësit në trafik, të cilët treguan kulturë të lartë dhe mirëkuptuan ndërprerjet përkohshme të qarkullimit të trafikut në zonën e ushtrimit.”

Ky ushtrim konfirmon partneritetin e fuqishëm ndërmjet Policisë së Kosovës, Ambasadës Amerikane dhe institucioneve të tjera:

“Ky ushtrim konfirmon edhe një herë partneritetin e fuqishëm dhe bashkëpunimin e vazhdueshëm ndërmjet Policisë së Kosovës, Ambasadës Amerikane dhe institucioneve të tjera, me synim garantimin e një ambienti sa më të sigurt për qytetarët, institucionet dhe stafin diplomatik në Republikën e Kosovës.”

Policia e Kosovës thekson se do të vazhdojë të organizojë aktivitete të ngjashme:

“Policia e Kosovës mbetet e përkushtuar për rritjen e kapaciteteve profesionale dhe forcimin e bashkëpunimit ndërkombëtar, ndërsa do të vazhdojë me aktivitete që rrisin ndjenjën e sigurisë dhe gatishmërinë institucionale për çdo situatë emergjente.”

Fushata zgjedhore për zgjedhjet parlamentare të 28 dhjetorit ka hyrë në fazën e prezantimit të mesazheve kryesore, ndërsa partitë politike kanë publikuar slloganet me të cilat synojnë t’i drejtohen elektoratit.

Lëvizja Vetëvendosje (LVV) ka dalë me slloganin “Siguri dhe begati. Mos lësho pe!”, duke u bërë thirrje qytetarëve që të këmbëngulin në kërkesën për siguri, zhvillim dhe mirëqenie.

LVV thekson se synon forcimin ekonomik të vendit, mbështetjen e familjeve punëtore dhe garantimin e sigurisë së përgjithshme në çdo aspekt të jetës.

Partia Demokratike e Kosovës (PDK) ka zgjedhur slloganin “Bashkë. Përpara.”, të shoqëruar me mesazhin “Për të gjithë qytetarët. Për Kosovën”, duke u fokusuar në unitetin politik dhe ecjen përpara me një vizion të përbashkët për vendin.

Lidhja Demokratike e Kosovës (LDK) ka prezantuar slloganin motivues “Zgjidh shpresën”. Zgjedhni punën. Zgjedhni LDK-në.”, duke synuar të tërheqë votuesit përmes ofertës së stabilitetit, punës dhe rikthimit të besimit në institucione.

Aleanca për Ardhmërinë e Kosovës (AAK) ka dalë me slloganin e shkurtër dhe emocional “Krah teje”, që synon të komunikojë afërsinë dhe mbështetjen ndaj qytetarëve në sfidat e përditshme.

Ndërsa Nisma Socialdemokrate ka vendosur të garojë me slloganin “me Fatmir Limaj”, duke e personalizuar fushatën rreth figurës së liderit të saj.

Ministri në detyrë i Infrastrukturës, Hysen Durmishi, ka njoftuar se nesër do të mbyllet përkohësisht segmenti Smrekonicë hyrja në Vushtrri (drejtimi për Prishtinë), për shkak të punimeve në asfaltimin e bypass-it të qytetit të Vushtrrisë.

Përmes një njoftimi në facebook Durmishi ka bërë të ditur se rruga do të jetë e mbyllur nga ora 08:00 deri në 14:00.

“Nesër, më 13.12.2025, për shkak të asfaltimit të bypass-it të Vushtrrisë, segmenti Smrekonicë – hyrja në Vushtrri (drejtimi për Prishtinë) do të jetë i mbyllur nga 08:00 – 14:00. Përdorni rrugën alternative nëpër qytetin e Vushtrrisë. Faleminderit për mirëkuptimin.”, ka shkruar Durmishi.

Policia e Kosovës ka apeluar tek qytetarët që të tregohen të kujdesshëm në vozitje, pasi ka filluar shfaqja e mjegullës në vendet ku pozita gjeografike është më e ulët.

Në njoftimin e lëshuar për media, Policia u bën thirrje vozitësve që t’i përdorin dritat e mjegullës, por jo edhe ato me rreze të gjatë.

“Ngasja e automjetit me drita të gjata mund të reflektojë jashtë mjegullës dhe mund të kthehet në automjetin tuaj, e cila gjithashtu e bën të pamundur që shoferët e tjerë t’ju shohin”, thuhet në njoftim.

Lëvizja Vetëvendosje ka bërë publik sloganin e zgjedhjeve të parakohshme të 28 dhjetorit.

“Siguri dhe begati” është slogani i partisë që po synon të qeverisë edhe për 4 vjet të tjera, e që pohon se punon për pasuruar shtetin, shoqërinë dhe ata që nuk kanë.

Motoja e LVV-së bazohet mbi mos të lëshuarit pe.

“Ne punojmë për siguri dhe begati të vendit tonë. Ne nuk do të lëshojmë pe. Mos lëshoni dhe ju pe për Kosovën të begatë e të sigurtë” thuhet në njoftim.

Ky është postimi i plotë i partisë:

I ftojmë qytetarët tanë, kudo ku janë e punojnë që të mos lëshojnë pe nga kërkesa për begati e siguri.

Ne punojmë për ta pasuruar shtetin, shoqërinë, ata që nuk kanë, brezat e rinj, e mbi gjitha familjet, prindërit që punojnë çdo ditë me plot sakrifica.

Ne punojmë për ta pasur shtetin e sigurtë, ekonominë e forcuar, sigurinë e jetës, punës, familjes, sigurinë financiare çdo grua e burrë në vendin tonë.

Ne punojmë për siguri dhe begati të vendit tonë. Ne nuk do të lëshojmë pe. Mos lëshoni dhe ju pe për Kosovën të begatë e të sigurtë.

Policia e Kosovës ka njoftuar se ushtrimi i përbashkët i planifikuar të realizohet sot në orët e mbrëmjes (15:00 -21:00), së bashku me Ambasadën e Shteteve të Bashkuara në Prishtinë, tani veçse ka filluar dhe është në fazën fillestare.

Varësisht nga informacionet dhe skenarët e përgatitur në ushtrim, do të kyçen njësitë policore, duke filluar nga njësitë patrulluese të rendit publik, njësitë e reagimit të shpejtë e deri te njësitë elite speciale të profileve të ndryshme, të cilat do të përdorin mjetet dhe pajisjet e nevojshme logjistike, për veprime policore varësisht nga situata dhe rrethanat e paraqitura.

“Kërkojmë bashkëpunim dhe mirëkuptim të plotë nga qytetarët e në veçanti nga pjesëmarrësit në trafik, që në këtë kohë të shmangin qarkullimin në zonën përreth Ambasadës Amerikane në Prishtinë – lagjja Arbëria, për shkak të zhvillimit të ushtrimit dhe ndërprerjes së qarkullimit të përkohshëm të disa segmenteve rrugore në atë zonë’, ka njoftuar Policia e Kosovës.