Tag: Ballina

Vëllai i Rexhep Selimit, Ramandani Selimi, ka reaguar publikisht ndaj mënyrës se si, sipas tij, po trajtohen protestat dhe veprimet simbolike kundër Dhomave të Specializuara në Hagë, ku po përmenden dhe përfaqësohen vetëm disa nga ish-krerët e UÇK-së.

Në një shkrim të publikuar së fundmi, ai ka ngritur shqetësimin për atë që e quan “diferencim të çlirimtarëve”, duke iu referuar veçanërisht ngritjes së një flamuri gjigant në Drenicë që, sipas tij, i kushtohet vetëm Hashim Thaçit dhe Kadri Veselit, duke lënë anash Rexhep Selimin dhe Jakup Krasniqin.

Ramandani Selimi thekson se ky veprim hap pyetje serioze morale dhe politike, pasi të gjithë ish-krerët e UÇK-së që po mbahen në Hagë po përballen me të njëjtën aktakuzë. Sipas tij, ndarja e tyre në “më të merituar” dhe “më pak të merituar” është e padrejtë dhe dëmton vetë kauzën e luftës çlirimtare.

Ai rikujton se Hashim Thaçi, Rexhep Selimi, Jakup Krasniqi dhe Kadri Veseli janë një emër i vetëm në histori – UÇK-ja – dhe se kontributi i secilit për çlirimin e Kosovës është i pandashëm. Çdo përpjekje për t’i veçuar apo hierarkizuar, sipas tij, përbën padrejtësi historike dhe politike.

Në reagimin e tij, Selimi ngre edhe çështjen e përfaqësimit politik dhe ndjeshmërisë ndaj familjeve të të akuzuarve, duke përmendur faktin se djali i Jakup Krasniqit është nominuar për deputet, ndërsa mbështetja publike dhe simbolike, sipas tij, po fokusohet vetëm te dy emra.

Ai kritikon mospërputhjen mes deklaratave publike për mbështetjen e “katërshes” dhe veprimeve konkrete, duke theksuar se drejtësia për luftën çlirimtare nuk mund të mbrohet me simbolikë selektive.

“Nëse vërtet besojmë se gjykimi në Hagë është padrejtësi ndaj luftës çlirimtare, atëherë mbështetja duhet të jetë e barabartë, e sinqertë dhe pa dallime. Historia nuk i ndan ata. As ne nuk duhet t’i ndajmë”, shkroi Ramandani Selimi.

Një zyrtar policor u gjet i vdekur sot në veturën e tij në Prishtinë.

Trupi i pajetë i tij u zbulua pas një vetaksidenti që kishte bërë i ndjeri, megjithatë sipas policisë vdekja e tij nuk u shkaktua si pasojë e aksidentit.

Enis Pllana, zëdhënësi i Policisë për Prishtinën, se vdekja e zyrtarit policor dyshohet se ka ndodhur para përplasjes.

Ndryshe, ky vetaksident ndodhi rreth orës 06:30 në rrugën Zagrebi në Prishtinë.

“Sot rreth orës 06:30 në rrugën Zagrebi në Prishtinë, ka ndodhur një aksident trafiku, ku ka qenë e përfshirë një veturë. Njësitet policore dhe emergjenca kanë dalë menjëherë në vendin e ngjarjes, ku nga këta të fundit është konstatuar vdekja e viktimës (zyrtar policor), që dyshohet të ketë ndodhë para aksidentit. Me rastin është duke u marrë Njësia Rajonale e Trafikut, ndërsa hetimet janë në zhvillim për të sqaruar shkaqet e sakta të aksidentit”, konfirmoi zëdhënës i policisë, Enis Pllana.

Presidentja Osmani është nderuar me Çmimin Boniafcio VIII nga Akademia Bonifaciana.

Presidentja Osmani, përmes një video-inçizimi, ka bërë të ditur se mbrëmë në Anagni, qytetin e Papëve, u nderua me ‘Çmimin Boniafcio VIII’, nga Akademia Bonifaciana, si njohje për angazhimin institucional për paqen, si dhe bashkëpunimin ndërkulturor e ndërfetar.

Me këtë rast, presidentja Osmani u shpreh se ky çmim forcon përkushtimin e saj ndaj drejtësisë, paqes e dinjitetit si vlera të përhershme.

“Në frymën e vlerave që qëndrojnë në themelet e kësaj Akademie prestigjioze, e cila vendos primatin tek drejtësia, dinjiteti dhe paqja, ky vlerësim, i cili më herët ishte ndarë edhe Gjon Palit të II, forcon përkushtimin tim ndaj këtyre vlerave të përhershme”, ka deklaruar Osmani.

Janë mbushur 27 vjet nga një skenar i tmerrshëm i cili u kurdis nga Serbia, prej të cilit u vranë gjashtë të rinj serbë.

Kjo ngjarje e tmerrshme ndodhi më 14 dhjetor 1998, në një lokal në Pejë.

Krejt qëllimi i këtij krimi makabër i kryer nga aparati shtetëror i Sllobodan Millosheviqit, ishte që faji t’i mbetej shqiptarëve.

Viktima nga ky skenar i çmendur e ç’njerëzor mbetën: Ivan Radeviq (25), Ivan Obradoviq (14), Vukota Gvozdenoviq (16), Dragan Trifoviq (17), ndërsa nga plagët e marra në spital vdiqën Svetislav Ristiq (18) dhe Zoran Stanojeviq (17).

Dy persona të panjohur kishin hyrë të armatosur dhe kishin shtënë me armë për të cilin faji u hodh mbi pesë të rinj shqiptarë të Pejës.

Këta të fundit u dënuan për veprën penale të veprimtarisë armiqësore.

Ata u liruan një muaj pas fillimit të vuajtjes së dënimit, me ndërhyrje të Kryqit të Kuq, por ata nuk iu shpëtuan torturave në burgjet e Serbisë.

Mediumi “M portal” nga Mali i Zi pati raportuar se autorët e vrasjes në rastin “Panda” , kryen edhe masakrën në burgun e Dubravës. Pjesëmarrës në të dyja aktet kriminale përmenden emrat e Sinisha Petriqit që është drejtues i klanit “Zenica” dhe lideri i klanit “Shkalar”, Radomir “Boban” Baçoviq.

Presidenti i Serbisë Aleksandar Vuçiq, pati deklaruar vite më herët se ky krim nuk është kryer nga shqiptarët sikurse ishte pretenduar me vite të tëra. Serbia ende vazhdon të fshehë krimin e kryer edhe 27 vjet më vonë.

Ministrja në detyrë e Punëve të Jashtme, Donika Gërvalla-Schwarz, ka bërë të ditur se ndihma humanitare e Kosovës për popullin e Gazës ka mbërritur të dielën dhe ka nisur shpërndarja për familjet në nevojë, përmes partnerëve humanitarë në terren.

Sipas Gërvallës dërgesa në vlerë prej 500 mijë euro përfshin tenda, pako ushqimore, batanije dhe 158 mijë racione të ushqimit të ngrohtë.

“Dje pasdite morëm konfirmimin se ndihma humanitare e ndarë nga Qeveria e Republikës së Kosovës, e dedikuar për popullin e Gazës ka mbërritur në Gaza dhe menjëherë ka nisur shpërndarja për familjet në nevojë, përmes partnerëve humanitarë në terren. Dërgesa jonë, në vlerë prej 500 mijë euro, përfshin tenda, pako ushqimore, batanije dhe 158 mijë racione të ushqimit të ngrohtë”, ka shkruar ajo.

Gërvalla ka theksuar se, megjithëse asgjë nuk mund të zëvendësojë humbjen dhe dhimbjen, kjo ndihmë modeste synon të japë lehtësim familjeve, veçanërisht fëmijëve dhe të moshuarve.

Ajo gjithashtu ka shprehur mirënjohjen për Republikën e Turqisë dhe Gjysmëhënën e Kuqe Turke për mbështetjen në këtë operacion humanitar.

“E dimë që asgjë nuk e zëvendëson humbjen dhe dhimbjen atje. Por shpresojmë që kjo ndihmë modeste t’u japë sadopak mbështetje e lehtësim familjeve, sidomos fëmijëve dhe të moshuarve, në ditë kur edhe gjërat më bazike mungojnë. Shpreh mirënjohjen time të sinqertë për Republikën e Turqisë dhe Gjysmëhënën e Kuqe Turke për bashkëpunimin dhe mbështetjen që e bënë të mundur këtë operacion humanitar”, ka përfunduar Gërvalla.

Komisioni Qendror i Zgjedhjeve ka nisur procesin e dërgimit të pakove zgjedhore që përmbajnë fletëvotimet për qytetarët e Kosovës të regjistruar jashtë vendit, të cilët kanë zgjedhur të ushtrojnë të drejtën e votës përmes postës në zgjedhjet e parakohshme për Kuvendin e Kosovës.

Sipas të dhënave të KQZ-së, pakot me fletëvotime do t’u dërgohen rreth 58 mijë votuesve që janë regjistruar për votim me postë. Ndërkohë, 19,257 votues të tjerë, të cilët janë regjistruar për votim fizik jashtë Kosovës, do të votojnë më 27 dhjetor në përfaqësitë diplomatike ku janë të regjistruar.

Zëdhënësi i KQZ-së, Valmir Elezi, ka bërë të ditur se fletëvotimet janë prodhuar në Slloveni dhe kanë mbërritur në Kosovë më 12 dhjetor. Pas pranimit të tyre, shërbimi votues i KQZ-së ka përfunduar përgatitjen e pakove individuale, të cilat tashmë janë të gatshme për t’u dërguar në adresat e votuesve jashtë vendit.

“Fillimisht, pakot do të dërgohen në aeroport dhe gjatë ditës së nesërme do të fillojë shpërndarja e tyre në shtete të ndryshme, përmes shërbimeve postare, në adresat e votuesve. KQZ njofton se gjatë javës në vijim do të përmbyllet i gjithë procesi i dërgimit të pakove me fletëvotime për votuesit jashtë Kosovës. Në çdo dërgesë postare, është vendosur nga një numër i veçantë gjurmimi dhe u është dërguar votuesve të regjistruar, të cilët mund të shohin vazhdimisht vendndodhjen e pakos me fletëvotim”, tha Elezi.

Sipas njoftimit të KQZ-së, afati për votimin përmes postës është deri më 27 dhjetor, ndërsa votuesit këshillohen që dërgesën me fletëvotim ta postojnë sa më herët, në mënyrë që ajo të mbërrijë brenda afatit të paraparë.

“Është e rëndësishme të theksohet se votimi përmes postës përfundon më 27 dhjetor 2025. Kjo periudhë votimi vlen vetëm për rreth 58 mijë votuesit e regjistruar jashtë Kosovës dhe që kanë përzgjedhur të votojnë përmes postës. KQZ u bën thirrje votuesve që të mos presin ditën e fundit për ta dërguar pakon e tyre me fletëvotim. Pakot duhet të dorëzohen në adresën e njërës nga kutitë postare të KQZ-së në shtetin ku jetojnë votuesit, apo në kutitë postare më të afërta. Votuesit inkurajohen që këtë ta bëjnë sa më shpejt që është e mundur, në mënyrë që pakoja të arrijë me kohë në kutinë postare nga ku do të tërhiqet dhe do të dërgohet në Kosovë për procesin e numërimit”, tha Elezi.

KQZ njofton se, për të mundësuar një proces më të lehtë të votimit për qytetarët e regjistruar për votim me postë, ka vënë në funksion kuti postare në gjithsej 23 shtete. Këto shtete janë: Australia, Austria, Belgjika, Çekia, Danimarka, Franca, Gjermania, Holanda, Hungaria, Italia, Kanadaja, Kosova, Kroacia, Mali i Zi, Maqedonia e Veriut, Mbretëria e Bashkuar, Norvegjia, SHBA-ja, Shqipëria, Sllovenia, Suedia, Turqia dhe Zvicra.

Parlamenti i Kosovës me 106 vota pro dhe një abstenim, më 14 dhjetor 2018 miratoi tri ligjet që e ndryshojnë mandatin e Forcës së Sigurisë së Kosovës (FSK) në ushtri të Kosovës, por pa iu ndërruar emri.

Ligjet që u miratuan ishin Projektligji për Ministrinë e Mbrojtjes, Projektligji për Forcën e Sigurisë së Kosovës dhe Projektligji për shërbim në Forcën e Sigurisë së Kosovës.

Amendamentet e ligjeve u votuan një nga një, shkruan KO, transmeton Klan Kosova.

Deputetët serbë në Parlamentin e Kosovës nuk morën pjesë në seancë. Ata e kanë kundërshtuar formimin e Ushtrisë së Kosovës.

Udhëheqësit e institucioneve të Kosovës, votimin dhe miratimin e ligjeve për ushtrinë e cilësuan si “një ditë historike dhe një nga vendimet më të rëndësishme që nga shpallja e pavarësisë së Kosovës në vitin 2008”.

Për rreth një orë rresht, mijëra qytetarë të cilët morën pjesë në tubim kërkuan drejtësi për Hashim Thaçin, Kadri Veselin, Jakup Krasniqin dhe Rexhep Selimin, të cilët po gjykohen nga Gjykata Speciale për të ashtuquajtura krime kundër njerëzimit.

Gjatë tubimit u hap një pankartë e madhe me fotografitë e krerëve të UÇK-së ku shkruhej: “Çlirimtarët duhet të nderohen, jo të gjykohen”.

Protesta u zhvillua nën mbikëqyrje të rreptë policore dhe pa ndonjë incident të raportuar.

Qëllimi i protestës, e thirrur nga kategoritë e dala nga lufta e UÇK-së, ishte shprehja e pakënaqësive ndaj gjyqit ndaj ish-eprorëve të saj në Dhomat e Specializuara të Kosovës në Hagë. Gjyqi ndaj Thaçit, Veselit, Krasniqit dhe Selimit nisi më 2023 dhe pritet të përmbyllet në fillim të vitit të ardhshëm.

Të gjithë ata mohojnë akuzat për krime lufte dhe krime kundër njerëzimit para dhe gjatë luftës së viteve 1998–1999.

Hysni Gucati, kryetar i Organizatës së Veteranëve të Luftës së UÇK-së, tha se sot “jemi mbledhur këtu për ta ngritur zërin” dhe për të kërkuar “drejtësi të mirëfilltë” për ish-krerët e UÇK-së.

“Ne sot, me këtë numër kaq të madh njerëzish… i tregojmë Trendafilovës se Ushtria Çlirimtare e Kosovës buron, lind dhe vepron nga populli,” tha Gucati duke iu referuar Ekaterina Trendafilovës, kryetares së Dhomave të Specializuara të Kosovës në Hagë.

Ai shtoi se UÇK-ja “u rrit dhe u mbrojt nga populli dhe sot populli i qëndron mbrapa asaj. Ne sot kërkojmë drejtësi. Kjo gjykatë i ngjan gjykatave të Serbisë dhe merret me fakte të falsifikuara dhe fabrikuara, të cilat nuk qëndrojnë”.

Në protestë morën pjesë edhe kryetari i Bashkimit Demokratik për Integrim (BDI) nga Maqedonia e Veriut, Ali Ahmeti, si dhe politikanë nga Kosova, si Fatmir Limaj dhe Daut Haradinaj.

Kryeministri i Maqedonisë së Veriut, Hristijan Mickoski, ditë më parë ka deklaruar se nuk e mbështet këtë protestë, por ka siguruar se institucionet do të kujdesen që gjithçka të zhvillohet sa më mirë dhe pa incidente.

Para kësaj proteste, OVL-UÇK ka mbajtur protesta edhe në Hagë, Tiranë, Strasbourg dhe Prishtinë, në mbështetje të ish-krerëve të UÇK-së, të cilët po gjykohen në Gjykatën Speciale për krime që pretendohet se janë kryer gjatë luftës në Kosovë.

Kryetari i OVL-UÇK-së, Hysni Gucati, ka kërkuar drejtësi për ish-krerët e UÇK-së.

Para protestuesve në Shkup, ai ka thënë se sot këtu janë për t`i treguar Evropës së UÇK-ja bëri luftë të drejt.

“Sot jemi mbledhur këtu për t’i treguar partnerëve ndërkombëtarë dhe komunitetit ndërkombëtar në Maqedoninë e Veriut se UÇK nuk ka kryer krime. UÇK ka qenë një ushtri çlirimtare që mbrojti kombin e vet dhe qytetarët e saj. Ne jemi këtu për të ngritur zërin, siç e bëjmë në çdo protestë, duke bashkuar shqiptarët siç bëri edhe Skënderbeu në kohët më të vështira. Kjo gjykatë është formuar nga një individ i çmendur, i cili në vitin 2011 ngriti një rezolutë në Parlamentin dhe Këshillin e Europës, duke pretenduar se UÇK ka kryer krime. Por ne jemi këtu për të treguar se e vërteta është ndryshe”,  tha Gucati.

Pakot ushqimore, batanijet dhe 158 mijë racione të ushqimit të ngrohtë për banorët në nevojë atje si ndihmë humanitare që Qeveria e Kosovës dha për popullin e Gazës tashmë është nisur nga porti i Mersinit në Turqi.

Se anija e ngarkuar me ndihmën humanitare të Qeverisë së Kosovës e ka bërë të ditur kryeministri në detyrë, Albin Kurti.

“Sapo morëm njoftimin se anija e ngarkuar me ndihmën humanitare të Qeverisë së Republikës së Kosovës, e dedikuar për popullin e Gazës, është nisur nga porti i Mersinit në Turqi. Dërgesa jonë humanitare, me vlerë prej 500 mijë euro, përfshin tenda, pako ushqimore, batanije dhe 158 mijë racione të ushqimit të ngrohtë për banorët në nevojë atje.  Edhe pse Qeveria e Republikës së Kosovës e ka marrë këtë vendim që në janar, realizimi i tij u bë i mundur vetëm pas marrëveshjes së fundit të paqes, të arritur nën udhëheqjen e Presidentit të Shteteve të Bashkuara, Donald Trump. Kjo ndihmë humanitare përfaqëson angazhimin e Republikës së Kosovës si pjesë e solidaritetit ndërkombëtar dhe përkushtimin tonë për të mbështetur popullatën civile që po përballet me vështirësi tejet të mëdha në Gaza. Na gëzon fakti që jemi qeveria e parë e Republikës së Kosovës që arrijmë të ofrojmë një mbështetje të tillë për banorët e Gazës. Shpresojmë që ajo të kontribuojë, qoftë edhe në mënyrë modeste, në lehtësimin e vuajtjeve dhe në përpjekjet për paqe, siguri dhe stabilitet për të gjithë.  Me këtë rast, dua të shpreh mirënjohjen time të thellë për Republikën e Turqisë dhe Gjysmëhënën e Kuqe Turke, për bashkëpunimin e ngushtë dhe ndihmën në realizimin e këtij operacioni humanitar”, ka shkruar Kurti.