Tag: Ballina

Qeveria në detyrë do të mblidhet sot.

Zyra e Kryeministrit ka bërë të ditur se mbledhja do të mbahet në ora 15:00 në Qeverinë e Kosovës.

Ky është rendi i ditës:

Gjykata e Apelit ka vërtetuar aktvendimin e Gjykatës Themelore në Prishtinë, me të cilin kishte refuzuar kërkesat për kundërshtimin e provave dhe hudhje të aktakuzës në rastin ku Faruk Mujka- kryeshef ekzekutiv në Ndërmarrjen Hidro-Ekonomike “Ibër-Lepenc” dhe Hysen Muzliukaj- ish-drejtor për Gjeodezi në Mitrovicë, akuzohen për korrupsion.

Sipas aktakuzës, Mujka në cilësinë e nënkryetarit të Komunës së Mitrovicës, ndërsa Muzliukaj në cilësinë e Drejtorit për Gjeodezi, Kadastër dhe Pronë në atë komunë, akuzohen për keqpërdorim të detyrës zyrtare lidhur me rastin e këmbimit të pronës së ish-Bankosit me pronë private. Ndërkaq, Mujka akuzohet edhe për mosraportim apo raportim të rremë të pasurisë, me arsyetimin se në cilësinë e kryeshefit ekzekutiv të Ibër-Lepencit nuk i deklaroi 60 mijë e 50 eurot që iu sekuestruan në shtëpi, raporton “Betimi për Drejtësi“.

“REFUZOHEN si të pabazuara ankesat e paraqitura nga mbrojtësit e të akuzuarëve Faruk Mujka, avokati Xhafer Tahiri dhe Hysen Muzliukaj, avokati Ahmet Tahiri, ndërsa aktvendimi i Gjykatës Themelore në Prishtinë – Departamenti Special, i datës 16.12.2025, VËRETOHET”, thuhet në vendimin e Apelit.

Kundër aktvendimit të shkallës së parë për konfirmim të aktakuzës, kishin paraqitur ankesë mbrojtësit e të akuzuarëve Mujka dhe Muzliukaj, avokatët Xhafer Tahiri dhe Ahmet Tahiri, për shkak të shkeljeve esenciale të dispozitave ligjore si dhe shkeljeve të dispozitave të Ligjit Penal.

Mbrojtja i kishte propozuar Gjykatës së Apelit që të aprovojë si të bazuara ankesat dhe t’i shpall provat e papranueshme dhe të hudh aktakuzën, si dhe ta pushojë procedurën penale ndaj të akuzuarve.

Ndërsa, Prokuroria e Apelit kishte propozuar që të refuzohen si të pabazuara ankesat e paraqitura nga mbrojtja dhe aktvendimi i ankimuar të vërtetohet.

Sipas vendimit të Gjykatës së Apelit, pretendimet ankimore nuk janë të bazuara, pasi që gjykata e shkallës së parë ka shqyrtuar në mënyrë të mjaftueshme dhe të drejtë pretendimet e paraqitura në kundërshtimet ndaj aktakuzës dhe kërkesat për hudhje të saj, duke dhënë arsye të qarta dhe juridikisht të qëndrueshme se aktakuza e ngritur nga PSRK-ja, përmban prova të mjaftueshme që mbështesin dyshimin e bazuar mirë se të akuzuarit kanë kryer veprat penale për të cilat ngarkohen si në aktakuzë.

Tutje, në vendimin e Apelit thuhet se nuk qëndrojnë pretendimet e mbrojtjtes përkitazi me veprat penale për të cilat ngarkohen të akuzuarit, dhe në këtë fazë të procedurës penale të njëjtat janë të pabazuara, pasi që të gjitha këto pretendime do të vlerësohen në shqyrtimin gjyqësor pas administrimit të provave, ku edhe do të vërtetohet fajësia apo pafajësia e të akuzuarëve.

Sipas Apelit, pretendimet e mbrojtjes se gjykata e shkallës sëparë ka tejkaluar kompetencat e saj procedurale dhe ka paragjykuar çështjen, duke konstatuar ekzistencën e elementeve të veprës penale dhe përgjegjësinë e tëa kuzuarëve, nuk qëndrojnë.

Apeli thekson se nga analiza e tërësisë së arsyetimit të vendimit, rezulton se gjykata e shkallës së parë nuk ka nxjerrë vendim përfundimtar mbi fajësinë e të akuzuarve, por ka bërë vetëm një vlerësim paraprak të provave në funksion të ekzistimit të dyshimit të bazuar mirë, si kusht për vazhdimin e procedurës penale.

Në fund të vendimit, thuhet se kolegji i Apelit ka konstatuar se arsyetimi i gjykatës së shkallës së parë nuk përbën paragjykim të rezultatit përfundimtar të procedurës penale, pasi vlerësimi përfundimtar i provave dhe konstatimi i fajësisë apo pafajësisë mund të bëhet vetëm me aktgjykim të formës së prerë, pas administrimit dhe vlerësimit të drejtpërdrejtë të të gjitha provave në shqyrtimin gjyqësor.

Vendimi i Apelit rezulton të jetë marrë më 20 shkurt 2026, nga kolegji i përbërë prej Albina Shabani-Ramës si kryetare e kolegjit, si dhe Valon Kurtaj dhe Vaton Durguti- anëtarë.

Ambasadorët e shteteve anëtare të Bashkimit Evropian, së bashku me shefen e Zyrës së BE-së në Kosovë, zhvilluan të mërkurën një vizitë në Zveçan, ku u takuan me kryetarët e katër komunave veriore për të diskutuar mbi sfidat me të cilat po përballen në ushtrimin e mandateve të tyre pas zgjedhjeve lokale të tetorit 2025.

Sipas një njoftimi të Zyrës së Bashkimit Evropian, gjatë takimit kryetarët e komunave paraqitën një sërë vështirësish që, sipas tyre, po ndikojnë në funksionimin e administratave lokale dhe në ofrimin e shërbimeve për qytetarët.

Mes sfidave të përmendura ishin mungesa e arkivave administrative, mungesa e stafit të kualifikuar, kufizimet buxhetore, çështjet që lidhen me pronat, si dhe ajo që ata e cilësuan si kontroll nga niveli qendror mbi aktivitetet komunale.

Gjatë vizitës, diplomatët evropianë zhvilluan edhe takime të ndara me përfaqësues të organizatave të shoqërisë civile dhe me anëtarë të kuvendeve komunale nga partitë opozitare, për të dëgjuar edhe perspektivat e tyre lidhur me situatën në veri të Kosovës.

Në reagimin e BE-së thuhet se Bashkimi Evropian dhe shtetet e tij anëtare mbeten të përkushtuara ndaj forcimit të vetëqeverisjes lokale dhe procesit të decentralizimit në Kosovë, në përputhje me Kushtetutën dhe Ligjin për Vetëqeverisjen Lokale.

“Bashkimi Evropian dhe shtetet e tij anëtare mbeten fuqimisht të përkushtuara ndaj një vetëqeverisjeje lokale të fortë në Kosovë dhe decentralizimit të mbështetur në Kushtetutë dhe Ligjin për Vetëqeverisjen Lokale. Ata bëjnë thirrje për përmirësimin e koordinimit ndërmjet nivelit lokal dhe atij qendror, mbështetje efektive për komunat nga ministritë përkatëse dhe zbatim të barabartë të parimeve të sundimit të ligjit në mbarë Kosovën”, thuhet në komunikatë.

BE-ja thekson se administratat komunale funksionale dhe llogaridhënëse janë kyçe për ofrimin e shërbimeve cilësore për qytetarët dhe për forcimin e besimit në institucione.

“Administratat komunale efektive, llogaridhënëse dhe plotësisht funksionale, që ofrojnë shërbime cilësore për të gjithë banorët e Kosovës, përfshirë në veri, janë në interes të publikut dhe thelbësore për ndërtimin e besimit, stabilitetit dhe prosperitetit”, thuhet më tej në reagim.

Në përfundim, Bashkimi Evropian rithekson se do të vazhdojë të mbështesë Kosovën në procesin e reformave dhe forcimin e vetëqeverisjes lokale.

“Si partneri më i fortë dhe më i besueshëm i Kosovës, si dhe donatori më i madh i asistencës financiare, Bashkimi Evropian do të vazhdojë të mbështesë komunat dhe reformat që forcojnë vetëqeverisjen lokale në mbarë Kosovën”, përfundon njoftimi i Zyrës së BE-së.

Një grup prej 41 ushtarësh të Ushtrisë Kombëtare të Moldavisë është nisur për mision paqeruajtës në Kosovë.
Për gjashtë muajt e ardhshëm, këta paqeruajtës moldavë do të punojnë krahas trupave nga vende të tjera për të monitoruar situatën e sigurisë në rajon. Para nisjes, ushtarët përfunduan një program të gjerë trajnimi, shkruan radiomoldova.md.

Si pjesë e misionit të KFOR-it, kontingjenti do të garantojë sigurinë e objekteve ushtarake dhe do të kryejë patrullime brenda zonës së tij të përgjegjësisë. Trupat moldave do të veprojnë nën Komandën Rajonale Perëndimore dhe do të vendosen në bazën ushtarake “Camp Villaggio Italia” në Pejë, Kosovë.

Lejtnantja Marina Agachi është një nga shtatë gratë që marrin pjesë në këtë mision.

“Jemi të përgatitura si moralisht dhe psikologjikisht, ashtu edhe profesionalisht. Janë zhvilluar disa lloje trajnimesh, si jashtë vendit ashtu edhe brenda tij. Unë kam besim te koleget e mia dhe, me mbështetjen e ushtarëve burra, ne nuk e lëmë njëra-tjetrën pas. Ata na ndihmojnë dhe unë u uroj atyre shumë suksese”, shprehet Agachi.

Misioni i parë paqeruajtës moldav në KOFR ka ndodhur më 8 mars, 2014.

Kosovën e ka përcjellë një javë me bilanc të rëndë në komunikacion. Brenda pak ditësh, në disa aksidente të ndodhura në vende të ndryshme kanë humbur jetën nëntë persona.

Një nga rastet më të rënda të javës u regjistrua në Maqedoninë e Veriut, ku tre qytetarë të Kosovës humbën jetën në një aksident tragjik.

Një tjetër aksident me pasoja fatale ndodhi në Istog, ku dy persona humbën jetën. Rasti riktheu shqetësimet për gjendjen e sigurisë në rrugët e Kosovës dhe për faktorët që çojnë në aksidente të rënda.

Gjatë kësaj jave u raportuan edhe raste të tjera tragjike në komunikacion.

Në afërsi të Komoranit, një person humbi jetën në një vetaksident, ndërsa tre persona të tjerë mbetën të lënduar.

Në Shirokë të Suharekës, një 52-vjeçar ndërroi jetë pas një vetaksidenti, ndërsa në një rast tjetër, një grua humbi jetën disa ditë pas një aksidenti të rëndë në Mitrovicë.

Sot, një tjetër viktimë iu shtua këtij bilanci pas aksidentit fatal në Studime të Vushtrrisë, ku një grua humbi jetën, ndërsa disa persona të tjerë u lënduan. Sipas dyshimeve fillestare, aksidenti lidhet me ngasjen në gjendje të dehur, ndërsa Prokuroria ka nisur procedurat hetimore ndaj personit të dyshuar.

Shpejtësia, moskujdesi gjatë ngasjes, drejtimi i automjetit nën ndikimin e alkoolit dhe mosrespektimi i rregullave të komunikacionit vazhdojnë të konsiderohen ndër faktorët kryesorë që shkaktojnë aksidente me pasoja të rënda.

Policia e Kosovës vazhdimisht kanë bërë thirrje për kujdes të shtuar nga ana e drejtuesve të automjeteve, respektim të kufizimeve të shpejtësisë dhe shmangie të çdo sjelljeje që mund të rrezikojë jetën në rrugë.

Një rast tragjik ka ndodhur pasditen e sotme në Bjeshkën e Strellcit në komunën e Deçanit.

Djali dyshohet se aksidentalisht ka vrarë babanë.

Lajmin e ka konfirmuar zëdhënësi i policisë në Pejë, Driton Rugova.

“Sot rreth orës 13:43 policia ka pranuar informatën se në Bjeshkën e Strellcit në oborrin e një stani një person është vrarë. Deri tani dyshohet për vrasje aksidentale mes familjarëve”, ka thënë Rugova.

Ai ka shtuar se policia ka dalë menjëherë në vendin e ngjarjes ku ka sekuestruar një armë zjarri, ndërkaq personi që dyshohet se ka kryer veprën është arrestuar.

Ndërkaq zëdhënësi i Prokurorisë në Pejë, Shkodran Nikçi, ka konfirmuar se prokurori i rastit është duke u marrë me rastin.

“Prokurori i Shtetit dhe të gjitha njësitë relevante policore ndodhen në vendin e ngjarjes, duke ndërmarrë veprimet e nevojshme hetimore”, ka deklaruar Nikçi.

Nën përkujdesjen e Ambasadës së Republikës së Kosovës në Kroaci, në qytetin e Sllavonski Brod është zbuluar një pllakë përkujtimore në nderim të dhjetë viktimave që humbën jetën në aksidentin tragjik rrugor më 25 korrik në vitin 2021.

Siç bën të ditur Ambasada, në ceremoninë përkujtimore morën pjesë Përfaqësuesi Special i Ministrisë së Punëve të Brendshme të Kosovës, Genc Metaj, prefekti i Qarkut Brod-Posavinë, Danijel Marušić, zëvendëskryetarja e Bashkisë së Sllavonski Brodit, Martina Martic Puaca, familjarë të viktimave, përfaqësues të institucioneve të Kosovës dhe Kroacisë, si dhe qytetarë të shumtë.

Ambasadori i Kosovës në Kroaci, Martin Berishaj, tha se vendosja e pllakës përkujtimore nuk është vetëm një akt simbolik, por një shprehje e përgjegjësisë morale për të ruajtur kujtesën e viktimave dhe për të treguar se dhimbja e familjeve të tyre mbetet një dhimbje e përbashkët.

Në përmbyllje të ceremonisë, prefekti i Qarkut Brod-Posavinë, Danijel Marushic, u shprehu solidaritet familjeve të viktimave, duke theksuar se asnjë fjalë nuk mund ta zbusë dhimbjen e tyre, por se ato nuk janë vetëm në këtë pikëllim.

Ai tha se pllaka do të mbetet një simbol i përhershëm i kujtimit për viktimat dhe një thirrje që tragjedi të tilla të mos përsëriten.

Instituti i Kosovës për Drejtësi (IKD) ka nisur zyrtarisht mbledhjen e nënshkrimeve për nismën legjislative qytetare për ndryshimin dhe plotësimin e Kodit Penal të Republikës së Kosovës, me të cilën kërkohet që moszbatimi i qëllimshëm i vendimeve të Gjykatës Kushtetuese dhe përdorimi i parasë publike për përfitim elektoral të parashikohen si vepra penale, raporton Ekonomia Online.

Hulumtuesi i lartë në IKD, Naim Jakaj, tha se për procedimin e kësaj nisme në Kuvend nevojiten së paku 10 mijë nënshkrime, ndërsa synimi i institutit është që ky numër të jetë edhe më i lartë.

Në një deklaratë për media, Jakaj tha se dy ndryshimet e propozuara kanë për qëllim forcimin e llogaridhënies, mbrojtjen e rendit kushtetues dhe rritjen e besimit të qytetarëve në institucionet e Republikës së Kosovës.

“Instituti i Kosovës për Drejtësi fillon zyrtarisht mbledhjen e nënshkrimeve për nismën legjislative qytetare për ndryshimin dhe plotësimin e Kodit Penal të Republikës së Kosovës. Përmes kësaj nisme propozojmë dy ndryshime konkrete. Së pari, propozojmë që moszbatimi i qëllimshëm i vendimeve të Gjykatës Kushtetuese të parashikohet shprehimisht si vepër penale”, tha ai.

“Së dyti, propozojmë që përdorimi i parasë publike me qëllim përfitimin elektoral gjatë periudhave zgjedhore dhe parazgjedhore të parashikohet si vepër penale”, tha ai.

Jakaj tha se politikat sociale duhet të jenë të qëndrueshme dhe të bazuara në ligj, duke ngritur shqetësimin për ndarjen e mjeteve publike në periudha të afërta me zgjedhjet.

“Këto dy propozime kanë një qëllim të përbashkët. Forcimin e llogaridhënies. Mbrojtjen e rendit kushtetues. Dhe rritjen e besimit të qytetarëve në institucionet e Republikës së Kosovës. Së pari, dua të ndalem te përdorimi i parasë publike. Qytetarët e Kosovës meritojnë politika sociale. Meritojnë mbështetje nga shteti. Meritojnë shtesa fëmijët. Meritojnë pensione dinjitoze pensionistët. Meritojnë mbështetje për lehonat. Meritojnë mbështetje punëtorët. Por këto politika duhet të ndërtohen mbi ligj. Duhet të jenë të qëndrueshme. Duhet të jenë të parashikueshme. Jo të varen nga afërsia e zgjedhjeve. Në dy palët e fundit të zgjedhjeve kemi parë vendime për ndarjen e mjeteve publike vetëm pak ditë para votimit”, tha ai.

Sipas tij, përdorimi i parasë publike duhet të jetë në funksion të interesit të qytetarëve dhe jo të interesave partiake apo elektorale.

“Këto veprime, me të drejtë ngrisin dyshime dhe debat publik nëse buxheti i shtetit po përdoret për politika sociale apo për përfitim elektoral. Demokracia nuk duhet të lërë hapësirë për dyshime të tilla. Paraja publike është e qytetarëve. Ajo duhet të përdoret për interes publik. Jo për interesa partiake apo elektorale. Pikërisht për këtë arsye propozojmë që përdorimi i parasë publike për përfitim elektoral të sanksionohet si vepër penale”, tha Jakaj.

Duke folur për propozimin e dytë, Jakaj tha se moszbatimi i vendimeve të Gjykatës Kushtetuese cenon autoritetin e Kushtetutës.

“Po aq i rëndësishëm është edhe ndryshimi i dytë. Vendimet e Gjykatës Kushtetuese janë përfundimtare. Janë të detyrueshme. Dhe duhet të zbatohen nga të gjitha institucionet. Megjithatë, në Kosovë kemi parë raste kur ato nuk janë zbatuar. Një nga shembujt më të qartë është aktgjykimi i Gjykatës Kushtetuese për Ligjin për Pagat në Sektorin Publik. Gjykata obligoi Kuvendin që, brenda gjashtë muajve, ta harmonizonte ligjin. Kjo nuk ndodhi. Si rezultat, edhe sot mbi 94 mijë zyrtarë publikë nuk kanë përfituar pagesat që burojnë nga ky aktgjykim. Kur nuk zbatohen vendimet e Gjykatës Kushtetuese, nuk cenohet vetëm një aktgjykim. Cenohet autoriteti i Kushtetutës”, tha ai.

Ai theksoi se nisma nuk është e drejtuar kundër ndonjë partie politike apo individi, por synon forcimin e shtetit të së drejtës.

“Pikërisht për këtë arsye propozojmë që moszbatimi i qëllimshëm i vendimeve të Gjykatës Kushtetuese të ketë pasoja të qarta penale. Dua të theksoj se kjo nismë nuk është kundër asnjë partie politike. Nuk është kundër asnjë qeverie. Dhe nuk është kundër asnjë individi. Kjo është një nismë në mbrojtje të Kushtetutës. Në mbrojtje të zgjedhjeve të lira dhe të ndershme. Dhe në mbrojtje të shtetit të së drejtës. Për ta proceduar këtë nismë në Kuvend nevojiten të paktën 10 mijë nënshkrime. Sot e fillojmë këtë proces në Prishtinë. Në javët në vijim do të jemi në komunat e Kosovës për t’i informuar qytetarët dhe për t’i ftuar të bëhen pjesë e kësaj nisme. Ftoj secilin qytetar të informohet për përmbajtjen e saj. Dhe, nëse beson se askush nuk duhet të jetë mbi Kushtetutën dhe se paraja publike duhet t’u shërbejë qytetarëve, ta mbështesë këtë nismë me nënshkrimin e tij. Sepse demokracia nuk mbrohet vetëm në ditën e zgjedhjeve. Ajo mbrohet edhe duke kërkuar përgjegjësi”, tha Jakaj.

Ai ka shpjeguar edhe procedurën që do të ndiqet pas mbledhjes së nënshkrimeve, duke thënë se ato do t’i dorëzohen Kuvendit dhe do të verifikohen nga Komisioni Qendror i Zgjedhjeve.

“Sapo t’i mbledhim së paku dhjetë mijë nënshkrime, synojmë një numër më të lartë, por së paku dhjetë mijë, ne këtë nismë e procedojmë solemnisht tek kryetari ose kryetarja bashkë me Kryesinë e Kuvendit. Këtë nismë dorëzohen nënshkrimet, i verifikon Komisioni Qendror i Zgjedhjeve, riprocedohen pastaj prej KQZ-së në… në Kuvend të Kosovës dhe pastaj fillon ftesa për ne si IKD që të shkojmë ta prezantojmë këtë nismë në komisionin parlamentar përgjegjës… respektivisht në Komisionin për Legjislacion. Pasi që Komisioni për Legjislacion ta shqyrton, e miraton në parim apo jo, ne presim dhe do të kontribuojmë me takime të ndryshme tek partitë politike që ta miratojmë këtë… këtë propozim. Shkon në seancë, në seancë kemi të drejtën e prezantimit të kësaj seance ose e dërgojmë dikë nga deputetët me autorizim, preferojmë dhe do të kërkojmë me ngulm që ta prezantojmë vetë këtë nismë legjislative dhe pastaj i mbetet Kuvendit që të votojë. Normalisht ne presim që Kuvendi e voton këtë nismë, i bën këto ndryshime në mënyrë, siç e thashë edhe më herët, me mbrojt kushtetutshmërinë, ligjshmërinë dhe integritetin zgjedhor në Republikën e Kosovës”, tha ai.

Dhjetë oficerë të Forcës së Sigurisë së Kosovës kanë diplomuar në Akademinë e Forcave të Armatosura të Republikës së Shqipërisë.

Në një njoftim për media thuhet se kursi përgatitor për oficer, kishte nisur pas marrëveshjes së arritur mes dy ushtrive shqiptare, në tetor të vitit 2025.

“Kadetët e FSK-së diplomuan dje në ceremoninë solemne të diplomimit të gjeneratës 2026 të kadetëve të Akademisë së Forcave të Armatosura të Republikës së Shqipërisë. Ceremonia u zhvillua në praninë e Kryeministrit të Republikës së Shqipërisë dhe me pjesëmarrjen e drejtuesve të institucioneve të mbrojtjes dhe sigurisë të Republikës së Shqipërisë dhe Republikës së Kosovës.”, thuhet në njoftimin e FSK-së.

Sipas njoftimit, kjo arritje shënon një tjetër hap të rëndësishëm në forcimin e bashkëpunimit dypalësh në fushën e arsimit ushtarak dhe zhvillimit profesional të udhëheqësve të rinj.

“Oficerët e diplomuar kanë përfunduar me sukses programin akademik dhe ushtarak, duke fituar njohuri të avancuara në fushën e udhëheqjes, planifikimit operacional, vendimmarrjes dhe menaxhimit ushtarak në përputhje me standardet e NATO-s.”, thuhet në njoftim.

Demokraci Plus (D+) ka publikuar raportin me titull “Kostoja e procedurave të papërfunduara: rivlerësime të përsëritura dhe mungesa e kontratave”, i cili analizon ligjshmërinë, efikasitetin dhe transparencën e pesë procedurave të prokurimit publik me vlerë të përgjithshme prej 22.5 milionë euro.

Sipas D+, raporti bazohet në monitorimin e procedurave të zhvilluara nga Ministria e Industrisë, Ndërmarrësisë, Tregtisë dhe Inovacionit (MINTI), Ministria e Infrastrukturës dhe Transportit (MIT), Ministria e Punëve të Brendshme (MPB) dhe Ministria e Shëndetësisë (MSh).

Në raport thuhet se janë evidentuar një sërë shkeljesh dhe praktikash problematike që kanë ndikuar në zvarritjen e procedurave, anulimin e tyre ose moslidhjen e kontratave.

Sipas D+, gjetjet përfshijnë “emërimin e parregullt të anëtarëve të komisioneve të vlerësimit, paraqitjen e arsyeve të reja për eliminimin e operatorëve ekonomikë vetëm në fazën e rishqyrtimit, rekomandimin për dhënie të kontratës operatorëve me çmime jo normalisht të ulëta pa një vlerësim të plotë dhe të dokumentuar, si dhe shkurtimin e pajustifikuar të afateve ligjore për dorëzimin e ofertave.”

Raporti evidenton gjithashtu se disa procedura kanë mbetur të bllokuara për më shumë se dy vjet, pavarësisht vendimeve të përsëritura të Organit Shqyrtues të Prokurimit (OShP), duke shkaktuar vonesa në realizimin e kontratave dhe duke dëmtuar efikasitetin e shpenzimit të parasë publike.

Bazuar në gjetjet e monitorimit, D+ rekomandon që autoritetet kontraktuese të sigurojnë emërimin e ligjshëm të komisioneve të vlerësimit, të respektojnë parimin e sigurisë juridike gjatë shqyrtimit të kërkesave për rishqyrtim, të bëjnë vlerësim të rregullt të ofertave me çmim jo normalisht të ulët, të garantojnë proporcionalitet dhe transparencë në procedurat e prokurimit, si dhe t’i përfundojnë procedurat brenda afateve ligjore duke zbatuar në mënyrë efektive vendimet e OShP-së.

Raportin e plotë mund ta gjeni KËTU.