Tag: Ballina

Lituania ka hapur Konsullatën e saj në Kosovë, teksa kjo ngjarje është parë si kapitull i ri në thellimin e marrëdhënieve ndërmjet dy vendeve.

Në ceremoninë zyrtare të organizuar me këtë rast, para të pranishmëve u drejtua ambasadori jorezident i Lituanisë për Kosovën, Eduardas Borisovas, i cili theksoi se hapja e konsullatës përfaqëson një hap konkret drejt forcimit të bashkëpunimit institucional, ekonomik dhe kulturor. Ai nënvizoi mbështetjen e vazhdueshme të Lituanisë për integrimin evropian të Kosovës dhe për konsolidimin e shtetësisë së saj në arenën ndërkombëtare.

Të pranishmëve iu drejtua edhe nënkryetari i Kuvendit të Kosovës, Ardian Gola, i cili e cilësoi këtë akt si dëshmi të besimit të ndërsjellë dhe të partneritetit strategjik mes dy vendeve. Sipas tij, thellimi i marrëdhënieve parlamentare dhe shkëmbimi i përvojave në fushën e reformave demokratike mbetet prioritet i përbashkët.

Ministri i Punëve të Brendshme, Xhelal Sveçla, vlerësoi rëndësinë e bashkëpunimit në fushën e sigurisë dhe sundimit të ligjit, duke theksuar se prania konsullore do të lehtësojë komunikimin institucional dhe do të forcojë koordinimin në çështje me interes të përbashkët.

Ndërsa konsulli i nderit, Bashkim Zeqiri, u shpreh i nderuar për besimin e dhënë dhe u zotua se do të punojë për promovimin e interesave të ndërsjella, duke ndihmuar në ndërtimin e urave të reja bashkëpunimi në ekonomi, arsim, kulturë dhe investime.

Hapja e kësaj konsullate përfaqëson jo vetëm një prani diplomatike më të fuqishme të Lituanisë në Kosovë, por edhe një sinjal të qartë për përkushtimin e dy vendeve drejt një partneriteti afatgjatë, të bazuar në respekt, solidaritet dhe vizion të përbashkët evropian.

Drejtoria e Arsimit e Komunës së Prishtinës ka njoftuar ndryshime në organizimin e procesit mësimor në shkollat e kryeqytetit, për shkak të muajit të shenjtë të Ramazanit dhe në respekt të nxënësve dhe stafit që agjërojnë.

Sipas njoftimit, mësimi do të fillojë nga ora 07:30, ndërsa kohëzgjatja e mesndërrimit dhe pushimet e gjata janë reduktuar. Qëllimi i këtyre ndryshimeve është që dita mësimore të përfundojë më së largu deri në orën 17:00, pa u zvogëluar numri dhe kohëzgjatja e orëve, duke ruajtur cilësinë dhe vazhdimësinë e procesit mësimor.

Drejtoria e Arsimit thekson se këto masa kanë për qëllim lehtësimin e nxënësve dhe stafit gjatë periudhës së agjërimit, duke garantuar një organizim të përshtatshëm dhe efikas të mësimit në shkollat e kryeqytetit.

Zyra Kombëtare e Auditimit ka kërkuar mbi 654 mijë euro buxhet shtesë nga shuma e përgjithshme e paraparë në Projetkligjin për buxhetin e vitit 2026.

Kjo pasi nga kjo zyre thanë se duhet të rekrutojnë staf shtesë e po ashtu u duhet buxhet edhe për mallra, shërbime e kategori tjera.

“Këto 10 pozita të reja kemi kërkuar t’i mbulojmë për auditimin e fondeve të BE-së”, ka sqaruar drejtori i përgjithshëm i ZKA-së, Safet Berisha.

Kërkesa e kësaj zyre është duke u shqyrtuar në Komisionin parlamentar për mbikëqyrjen e financave. Kryesuesi i komisionit, deputeti i PDK-së, Arben Mustafa paraqiti kërkesën e ZKA-së dhe projeksionet e parapara për sivjet.

“ZKA-ja ka kërkuar 654 mijë e 18 euro buxhet shtesë nga ajo që është paraparë. ZKA-ja ka 185 punëtorë dhe ka në planifikim edhe 10 punëtorë shtesë. 2 milionë e ka buxhetin për paga dhe mëditje. Po ashtu kërkesa e tyre është edhe për mallra dhe shërbime, shpenzime komunale, shpenzime kapitale”, ka deklaruar Mustafa.

Anëtarët e komisionit nga radhët e LVV-së kërkuan që në këtë fazë të mos bëhen ndryshime në buxhet.

Sipas tyre, kërkesat e institucioneve publike mund të përfshihen në buxhet kur të bëhet rishikimi i tij muajin e ardhshëm.

“Kërkesa është e arsyeshme. Në këtë fazë do të kemi shume kërkesa nga shumë organizata buxhetore. Në këtë fazë, kryesisht janë kërkesa që kanë të bëjnë me paga e mallra dhe shërbime te cilat akomodohen brenda buxhetit shumë lehtë kur të bëhet rishikimi i buxhetit. Prandaj në këtë fazë mendoj se nuk duhet të bëjmë ndryshime në buxhet pasi edhe ashtu seanca është nesër. Për shkak se muajin tjetër do të nisë rishikimi i buxhetit dhe të gjitha kërkesat mund të përfshihen në buxhet”, ka deklaruar deputeti i LVV-së, Hysen Durmishi.

Mirëpo këtë e kundërshtuan deputetë të opozitës.

“Kërkoj me kujdes të shqyrtojmë kërkesat e tyre. Këto janë në përputhje me Ligjin e pagave e rregullore të tjera. Nëse këtyre ju ndalim këtë mundësi, në fund të vitit ne kemi me qenë përgjegjës për mosrealizimin e planit të ZKA-së. Unë besoj që sot ose duhet ta miratojmë kërkesën e tyre ose mazhoranca të marrë zotim, që këto të shkojnë përpara”, ka deklaruar deputëti i LDK-së, Avdullah Hoti.

Edhe nga PDK-ja kërkuan që sot të miratohet kërkesa e Zyrës Kombëtare të Auditimit. Mirëpo, me 3 vota për, 5 kundër dhe 1 abstenim, kërkesa e Zyrës Kombëtare të Auditimit nuk u miratua./rtk/

Zyra Kombëtare e Auditimit ka kërkuar mbi 654 mijë euro buxhet shtesë nga shuma e përgjithshme e paraparë në Projetkligjin për buxhetin e vitit 2026. Por Komisioni për mbikëqyrje të financave publike ka refuzuar kërkesen e ZKA-së.

E në lidhje me këtë ka reaguar deputeti nga radhët e Lidhjes Demokratike të Kosovës (LDK) Abdullah Hoti.

Hoti ka thënë se kjo sjellje e shumicës parlamentare është një fillim i keq i kësaj legjislature.

“Në mbledhjen e sotme, deputetët e shumicës parlamentare në Komisionin për mbikëqyrje të financave publike votuan kundër kërkesës së Zyrës Kombëtare të Auditimit për buxhet shtesë. Ky buxhet shtesë është i domosdoshëm në mënyrë që Zyra Kombëtare e Auditimit të arrijë të kryejë të gjitha auditimet e parapara në kohë dhe me cilësi të duhur. Kjo sjellje e shumicës parlamentare është një fillim i keq i kësaj legjislature. Ky veprim tregon tendencën se si pritet të menaxhohet paraja publike në vitet në vijim, duke bërë gjithçka që të pamundësohet mbikëqyrja adekuate e shpenzimeve buxhetore”, ka thënë Hoti..

Hoti po ashtu ka pohuar se ka qenë praktikë e etabluar në të gjitha legjislaturat paraprake që kërkesat buxhetore të institucioneve të pavarura, të cilat burojnë drejtpërdrejt nga Kushtetuta, siç është rasti i Zyrës Kombëtare të Auditimit, të miratohen gjithmonë në komisionet parlamentare dhe në kuvend.

Miratimi i kërkesave të tilla sipas tij është bërë nën supozimin se ato janë të bazuara në ligje dhe rregullore përkatëse.

Ndërsa ka theksuar se një qasje e tillë e kuvendit dhe e komisioneve parlamentare sa i përket kërkesave buxhetore të institucioneve të pavarura kushtetuese siguron balancën e pushteteve dhe ruan pavarësinë e tyre nga qeveria.

Gjykata Themelore në Prishtinë ka shpallur aktgjykim dënues ndaj Endrit Nikës, duke e dënuar me 18 vjet burgim lidhur me akuzën për vrasjen e shtetases argjentinase (të dashurës së tij) në Fushë-Kosovë më 2023.

Aktgjykimi u shpall të enjten nga kryetari i trupit gjykues, Gazmend Bahtiri dhe anëtarët Gëzim Ademi dhe Alltën Murseli, raporton “Betimi për Drejtësi“.

Prezent në shpallje ishin prokurori Armend Hamiti, i akuzuari Nika dhe mbrojtësi i tij, avokati Drilon Imeri, si dhe pala e dëmtuar me përfaqësuesin ligjor, Betim Shala.

Në seancën e 28 majit 2025, i akuzuari u deklarua i pafajshëm.

Sipas aktakuzës së ngritur më 11 shkurt 2025 nga Prokuroria Themelore në Prishtinë, Endrit Nika akuzohej se më 1 gusht 2023 në një hotel në Fushë-Kosovë, pas një mosmarrëveshje paraprake me të dashurën e tij- tani të ndjerën M.K-U., të cilën paraprakisht e godet në vazhdimësi dhe tenton ta shkelë me veturë tek parkingu jashtë hotelit, dhe pasi që hyjnë në hotel- në dhomën ku ishin duke që ndruar, i pandehuri Nika me dashje që ta privojë nga jeta tani të ndjerën M.K-U ka vazhduar përleshjen dhe goditjet ndaj të dëmtuarës, duke e dërguar në qoshe të dhomës nga ku nuk ka pasur mundësi të largohet dhe nga goditjet dhe shtyrjet që i ka bërë tani të ndjerës M. K-U., e ka nxjerrë kornizën e dritares duke e hedhur të ndjerën nga dritarja e dhomës së hotelit nga kati i gjashtë. Me ç’rast, tani e ndjera si pasojë e lëndimeve edhe përkundër trajtimit mjekësor ka ndërruar jetë në QKUK.

Sot, në Kuvendin e Kosovës do të mblidhen njëmbëdhjetë komisione parlamentare për të shqyrtuar Projektligjin mbi ndarjet buxhetore për Buxhetin e Republikës së Kosovës për vitin 2026.

Mbledhjet do të fillojnë që nga ora 09:00 dhe përfshijnë:

Komisioni për Mbikëqyrjen e Financave Publike – shqyrton buxhetin e ZKA-së

Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit – shqyrton ligjin buxhetor dhe miraton fushëveprimet.

Komisioni për Mbikëqyrjen e Agjencisë së Kosovës për Inteligjencë,

Komisioni për Arsim, Shkencë dhe Teknologji,

Komisioni për Ekonomi, Industri, Ndërmarrësi, Tregti dhe Inovacion,

Komisioni për Çështje të Sigurisë dhe Mbrojtjes,

Komisioni për Kulturë, Turizëm dhe Sport,

Komisioni për Punë të Jashtme dhe Diasporë,

Komisioni për Shëndetësi,

Komisioni për të Drejtat dhe Interesat e Komuniteteve dhe Kthim,

dhe Komisioni për Buxhet, Punë dhe Transfere – të gjithë do të shqyrtojnë pjesët përkatëse të projektbuxhetit që hyjnë në fushëveprim të tyre.

Mbledhjet zhvillohen në dhomat përkatëse të Kuvendit dhe do të vazhdojnë gjatë gjithë ditës sipas rendit të miratuar për secilin komision.

Sot në Washington pritet të mbahet takimi Inaugurues të Bordit të Paqes.

Në këtë strukturë të re marrin pjesë 26 vende, mes të cilave Shqipëria dhe Kosova kanë konfirmuar praninë e tyre.

Shqipëria ratifikoi aderimin me 110 vota pro në Kuvend, pas ftesës së Edi Ramës nga Donald Trump, ndërsa presidentja e vendit Vjosa Osmani përfaqësoi Kosovën në Davos, ku nënshkroi dokumentin themelues.

Presidentja Osmani e ka vlerësuar përfshirjen e Kosovës në Bordin e Paqes, si vend anëtar dhe bashkëthemelues, si një nga zhvillimet më të rëndësishme të politikës së jashtme të vendit në vitet e fundit, duke theksuar se ky hap e fuqizon drejtpërdrejt subjektivitetin ndërkombëtar të Kosovës.

“Republika e Kosovës mbetet e përkushtuar të punojë ngushtë me aleatin tonë kryesor, SHBA-të, dhe me Bordin e Paqes për të sjellë rezultate konkrete, për të mbështetur paqen dhe stabilitetin në rajonet e prekura nga konfliktet dhe për të promovuar një të ardhme të bazuar në bashkëpunim, siguri dhe prosperitet të përbashkët”, ka theksuar Presidentja Osmani.

Trump, do të kryesojë takimin e parë të Bordit të tij të Paqes të enjten, me çështje të pazgjidhura mbi të ardhmen e Gazës që varen mbi një ngjarje që pritet të përfshijë përfaqësues nga më shumë se 45 vende.

Çarmatimi i militantëve të Hamasit, madhësia e fondit të rindërtimit dhe rrjedha e ndihmës humanitare për popullsinë e Gazës së shkatërruar nga lufta janë ndër pyetjet kryesore që ka të ngjarë të vënë në provë efektivitetin e bordit në javët dhe muajt në vijim, shkruan Reuters.

Trump do t’i drejtohet grupit në Institutin Amerikan të Paqes Donald J. Trump – një ndërtesë në Uashington të cilës presidenti së fundmi ia ndryshoi emrin e tij – dhe do të njoftojë se vendet pjesëmarrëse kanë mbledhur 5 miliardë dollarë për fondin e rindërtimit.