Tag: Ballina

Presidenca e Kosovës ka reaguar në lidhje me aktgjykimin e Gjykatës Kushtetuese.

Në reagim thuhet se aktgykimi i konfirmon argumentet juridike të dorëzuara nga Presidenca në Gjykatën Kushtetuese rreth këtij rasti, si dhe konfirmon se Presidentja Osmani nuk ka bërë asnjë shkelje kushtetuese.

Reagimi vazhdon duke thënë se Gjykata, në asnjë paragraf të aktgjykimit të saj, nuk ka konstatuar shkelje të Kushtetutës nga ana e Presidentes.

Reagimi i plotë:

Presidentja e Republikës së Kosovës e mirëpret aktgjykimin e Gjykatës Kushtetuese në rastet nr. KO 72/26 dhe KO 74/26, i cili i konfirmon argumentet juridike të dorëzuara nga Presidenca në Gjykatën Kushtetuese rreth këtij rasti, si dhe konfirmon se Presidentja Osmani nuk ka bërë asnjë shkelje kushtetuese.

Në përputhje me komentet e dërguara nga Presidenca, edhe vetë Gjykata Kushtetuese e konfirmon në paragrafët 153, 155 dhe 190 se afati 60-ditor duhet të konsumohet para afatit 30-ditor të paraparë në nenin 86.2 të Kushtetutës, dhe se ky afat 30-ditor para përfundimit të mandatit të Presidentit aktual është përfundimtar dhe detyrues, si dhe nuk mund të relativizohet.

Gjykata, në asnjë paragraf të aktgjykimit të saj, nuk ka konstatuar shkelje të Kushtetutës nga ana e Presidentes. Përkundrazi, ka konfirmuar se nuk është dekreti ai që e çon vendin në zgjedhje të reja, por është dështimi i Kuvendit për zgjedhjen e Presidentit të ri ai që i shkakton këtë proces të zgjedhjeve.

Presidenca ka shprehur të njëjtin qëndrim në komentet e dërguara në Gjykatën Kushtetuese, duke potencuar se dekreti është thjesht formalizim i një situate ekzistuese dhe se nuk është dekreti, por është vetë dështimi i Kuvendit për zgjedhjen e Presidentit që e çon vendin në zgjedhje.

Rrjedhimisht, duke qenë se rrethana e moskonstituimit të Kuvendit me kohë nuk ka qenë e paraparë me Kushtetutën e Republikës së Kosovës, Gjykata ka interpretuar një rrethanë përjashtuese që vlen për këtë rast specifik, duke sqaruar se “në të gjitha rastet e zgjedhjes së Presidentit në të ardhmen, përkatësisht procedura për zgjedhjen e Presidentit të ri, e cila nuk mund të zgjasë më shumë se 60 ditë, duhet të fillojë përpara dhe të përfundojë jo më vonë se 30 ditë para përfundimit të mandatit të Presidentit aktual.” (paragrafi 191 i Aktgjykimit)

Presidentja e mirëpret afatin 34-ditor të dhënë deputetëve të Kuvendit të Kosovës nga ana e gjykatës dhe u bën atyre thirrje që urgjentisht ta kryejnë këtë detyrim kushtetues.

Dhënia e këtij afati shtesë nga ana e gjykatës kushtetuese asesi nuk ka qenë në kompetencën e Presidentes së Republikës. Por është pikërisht dekreti i Presidentes që e ka hapur rrugën për këtë sqarim të rëndësishëm nga ana e gjykatës si autoritet i vetëm dhe përfundimtar për të interpretuar Kushtetutën.

Deklaratat politike për kinse shkelje kushtetuese tregojnë edhe keqlexim të aktgjykimit, por edhe politizim të skajshëm të një situate tashmë të qartësuar nga Gjykata Kushtetuese: që dështimi për zgjedhjen e Presidentit të vendit është i deputetëve dhe si pasojë e mungesës së vullnetit politik për të arritur konsensus rreth zgjedhjes së Presidentit.

Në vend të deklarimeve të tilla të paqëndrueshme, ftojmë Kuvendin e Kosovës që qysh nesër ta caktojë datën e seancës së re për zgjedhjen e Presidentit të ri dhe ta kryejnë detyrimin për të cilin janë zgjedhur, duke i dhënë vendit stabilitet dhe siguri.

Deputeti Nezir Kraki, duke komentuar aktgjykimin e Gjykatës Kushtetuese thotë se analiza e tij u konfirmua 100% duke iu rikthyer Kuvendit “34 ditët e munguara”.

Kraki duke komentuar anlizën e tij shprehet “më falni për mungesën e modestisë në këtë rast se nuk u durova”.

Ai i fton miqt e tij ta shikojnë videon e tij “me vëmendje”.

Video KËTU

Instituti Kombëtar i Shëndetësisë Publike të Kosovës (IKSHPK) ka bërë të ditur se sëmundjet kronike jo-ngjitëse, përfshirë hipertensionin, vazhdojnë të jenë shkaku kryesor i sëmundshmërisë dhe vdekshmërisë në vend, duke paraqitur një sfidë të vazhdueshme për sistemin shëndetësor.

Sipas të dhënave të publikuara nga IKSHPK për vitet 2023 dhe 2024, është shënuar rritje e rasteve të raportuara të këtyre sëmundjeve.

“Hipertensioni arterial mbetet diagnoza më e shpeshtë, duke përbërë mbi gjysmën e rasteve në të dy vitet, ndërsa diabeti, sëmundjet kronike obstruktive të mushkërive (COPD) dhe sëmundjet malinje zënë një pjesë të konsiderueshme të barrës së përgjithshme shëndetësore”, thuhet në raportin e IKSHPK-së.

Sipas këtij instituti, hipertensioni arterial primar ka shënuar rritje nga 20,472 raste në vitin 2023 në 21,425 raste në vitin 2024, që përbën një rritje prej 4.7 për qind. Sipas të dhënave, rastet dominojnë tek personat mbi moshën 50 vjeç, me përqindjen më të lartë në grupmoshën 65–69 vjeç.

Po ashtu, ndonëse prevalenca është më e lartë te femrat, meshkujt mbeten më të rrezikuar nga komplikimet kardiake, përfshirë infarktin akut të miokardit.

Sa i përket diabetit, IKSHPK njofton se kjo sëmundje paraqet një nga sfidat më serioze të shëndetit publik në Kosovë. Rastet e diabetit tip 2 janë rritur ndjeshëm nga 9,723 në vitin 2023 në 11,729 në vitin 2024, duke shënuar një rritje prej 20.6 për qind.

Në të njëjtën kohë, diabeti tip 1 ka shënuar ulje nga 3,410 në 2,681 raste. Sipas IKSHPK, kjo rritje lidhet me faktorë të tillë si obeziteti, mungesa e aktivitetit fizik, ushqyerja jo e shëndetshme dhe urbanizimi. Rastet më të shpeshta regjistrohen në grupmoshën 65–69 vjeç, por po vërehet edhe shfaqje gjithnjë e më e hershme e sëmundjes.

Në lidhje me sëmundjet e zemrës, të dhënat e IKSHPK-së tregojnë ndryshime në disa kategori. Angina pectoris ka rënë nga 1,715 raste në vitin 2023 në 403 raste në vitin 2024, ndërsa infarkti akut i miokardit është rritur nga 1,800 në 2,366 raste.

Po ashtu, sëmundjet iskemike kronike kanë shënuar ulje. IKSHPK vlerëson se këto ndryshime lidhen edhe me mënyrën e raportimit dhe kodimit të sëmundjeve, ndërsa rritja e rasteve të infarktit thekson nevojën për forcim të parandalimit dhe diagnostikimit të hershëm.

Sëmundjet malinje, sipas IKSHPK-së, vazhdojnë të mbeten një problem i rëndësishëm për shëndetin publik, pavarësisht një rënieje të rasteve të reja në vitin 2024. Në vitin 2023 janë regjistruar 4,165 raste, ndërsa në vitin 2024 numri ka rënë në 3,644 raste, duke shënuar një ulje prej rreth 12.5 për qind. Shpërndarja sipas gjinisë mbetet pothuajse e barabartë, me një përqindje pak më të lartë të rasteve te femrat në vitin 2024.

Kanceri i gjirit mbetet ndër më të shpeshtit te femrat, ndërsa te meshkujt dominojnë kanceri i lëkurës dhe ai kolorektal, sipas të dhënave të IKSHPK-së.

Visar Azemi nga Lidhja Demokratike e Kosovës ka thënë se njehsorët elektrikë janë duke matur gabimisht kohën.

Ai, ka thënë se ka bërë një hulumtim për energjinë elektrike ku si mostër kanë përdorur mbi 800 njehsor në Prishtinë dhe Ferizaj dhe në bazë të këtij hulumtimi kanë gjetur që rryma matet gabimisht dhe gjithmonë me të shtrenjtën.

“Sot jam para jush për me fol për një skandal, një ndër skandalet më të rënda të sektorit të energjisë, që ka të bëjë me regjistrimin njësor elektrik të konsumit të energjisë elektrike në tarifa të ndryshme dhe të një hulumtimi të cilin e kam bë në Prishtinë dhe Ferizaj. Me ju tregu kështu si kronologji, kam filluar e kam vërejt një anomali në njësorë të energjisë elektrike dhe pastaj kam filluar me e bë si hulumtim dhe kam inspektuar dhe kam hulumtuar dikund rreth 900 njësorë elektrikë në zonat e Prishtinës dhe Ferizajt, prej të cilëve pra 87% e këtyre njësorëve kanë rezultuar që nuk e masin kohën ashtu siç duhet, pra kanë gabim. Dhe këtu, të dashur gazetarë, të dashur qytetarë, nuk po flasim për një gabim teknik, po flasim për një mashtrim ose manipulim sistematik, sepse mostra prej 884 njësorëve nga të cilët 87% nuk është një rastësi, pra nuk mund të themi që ka një ‘glitch’ të sistemit, po po flasim që ka një manipulim ku ky skandal iu ka kushtuar qytetarëve të Republikës së Kosovës miliona euro. Pra, po i shihni disa njësorë të energjisë elektrike dhe po e shihni që nuk përkojnë me kohën reale. Pra koha në njësor këtu për shembull është 07:55 minuta në mëngjes, koha reale është 3:26 pas dite”, tha Azemi para medieve.

Sipas Azemit, qytetarët paguajnë gjithmonë me tarifa të shtrenjta edhe pse nga ora 22:00 tarifa është e caktuar me të lirën.

“Në momentin kur Zyra e Rregullatorit të Energjisë i aprovon tarifat dhe ne kemi tarifën e dimrit dhe të verës, kemi tarifën e ulët dhe të shtrenjtë në orën 22:00 në mbrëmje, gjatë muajve të dimrit, supozohet që qytetarët e Kosovës me përdorë tarifën e ulët të energjisë elektrike. Dhe në atë kohë ne i kemi ndezë pajisjet elektroshtëpiake, pra në orën 22:00 kemi lëshuar ndoshta nxemjen, kemi lëshuar lavatriçen, pajisjet për larjen e enëve, ku ta di unë, duke menduar që po faturohemi me të lirën, realisht energjinë jemi duke e paguar me të shtrenjtën. Dhe dallimi këtu në çmim e dini që është 6 e sa centë me të lirën dhe 13 centë është me të shtrenjtën, pra ka një dallim dikun prej 112% rritje. Pra ky është një mashtrim. Po i shihni këta katër njësorë, varion dallimi prej dy orë e tetë minuta në të parin, tre orë e gjysmë këtu, shtatë orë e gjysmë këtu, i fundit ka tetë orë e tetë, po ka edhe raste ku kjo diferencë shkon deri në 15 orë. Pra është komplet disbalancë dhe çakordim i komplet sistemit të faturimit të energjisë elektrike” tha Azemi.

Për këtë skandal siç e quan Azemi, kërkohet dorëheqja e bordit të ZRRE-së dhe hetim penal.

“Pra, këtu duhet me kërkua një përgjegjësi, sepse po shohim qartë që qytetari nuk paska abuzue, paska abuzua KEDS-i në këtë rast. Dhe KEDS-in e monitoron dikush: Zyra e Rregullatorit të Energjisë, që është bashkëfajtore në këtë mashtrim. Pra, nëse Zyra e Rregullatorit të Energjisë i ka aprovuar tarifat dhe ka tregu se kur qytetari duhet me u faturua me çmim të lirë dhe kur duhet me u faturua me çmim të shtrenjtë, atëherë ata është dashtë me u kujdesë që ai implementim i atyre rregulloreve, i atij ligji që kanë nxjerrë vetë Zyra e Rregullatorit të Energjisë, të zbatohet. Pra ata nuk janë kujdes dhe ka ardhë deri te kjo të cilën po e shohim në ekran, në fotografitë të cilat i paraqita edhe pak më herët. Dhe në fund tash, unë mendoj që këtu duhet të shikohet zinxhiri i përgjegjësisë. Pra, të gjithë ata që kanë përgjegjësi duhet të marrin dënimin e merituar. Ne si Lidhje Demokratike e Kosovës kërkojmë që të ketë hetim të pavarur, forenzik madje, dhe auditim të sistemit të faturimit të KEDS-it, me parë se sa është e madhe kjo humbje, sa duhet me e ditë qytetarët se sa para kanë paguar në formë jo të ligjshme në faturat e energjisë elektrike. Duhet dhe po kërkojmë tërheqjen e bordit të Zyrës së Rregullatorit të Energjisë, sepse këta kanë dështue me implementue vendimet e tyre, ligjet e Republikës së Kosovës, kodin e faturimit dhe kanë dështue me mbrojtë interesin e qytetarit. Pra Zyra e Rregullatorit të Energjisë është për me rregullue tregun dhe sistemin energjetik, është edhe me mbikëqyrë implementimin e vendimeve të veta, po është edhe me mbrojtë interesin e qytetarëve të Republikës së Kosovës. Prandaj kërkojmë tërheqjen e menjëhershme të bordi” tha Azemi. /Ekonomiaonline

Kosova, me 1.5 milion banorë, ka vetëm një aeroport ndërkombëtar të certifikuar që e lidh me botën: Aeroportin “Adem Jashari” në Prishtinë.

Pak e dinë se brenda territorit të saj fshihen edhe 12 fusha apo pista ajrore, të regjistruara si kategori e veçantë e aerodromeve në komuna të ndryshme.

Këto hapësira janë ndërtuar kryesisht mbi toka bujqësore dhe shtrihen në komunat: Drenas, Skenderaj, Rahovec, Malishevë, Prizren, Suharekë, Ferizaj, Gjilan, Istog, Podujevë dhe dy në Klinë.

Ato nuk janë aeroporte komerciale dhe zakonisht nuk pranojnë fluturime komerciale.

Edhe pse para luftës së viteve 1998/1999 kishin funksion të qartë bujqësor, si spërkatje e tokave, sot gjendja e tyre është krejt ndryshe: disa janë mbuluar nga mbeturinat, disa janë privatizuar, e disa përdoren nga auto-shkollat.

Karakteristikë e përbashkët e tyre është madhësia e pistës – zakonisht 450 metra gjatësi dhe 18 metra gjerësi.

Një dokument i publikuar nga Autoriteti i Aviacionit Civil të Kosovës (AAC) në vitin 2015 konfirmon ekzistencën e këtyre fushave, por thekson se ato nuk kanë status formal regjistrimi apo autorizimi për operime ajrore, duke shërbyer vetëm për të pasqyruar gjendjen e tyre infrastrukturore.

Historiku i fushave ajrore

Fusha ajrore është një zonë e caktuar mbi tokë, e cila përdoret plotësisht apo pjesërisht për aterim, nisje dhe lëvizje të mjeteve ajrore.

Në Kosovë, këto fusha apo pista u ndërtuan në vitet ‘70 dhe ‘80 nga ish-ndërmarrja shoqërore “Agro-Kosova” për spërkatjen e tokave bujqësore.

Shtrirja e tyre ishte planifikuar për të mbuluar të gjitha rajonet e vendit.

Megjithatë, gjatë viteve ‘90, kur edhe nisën masat e dhunshme të regjimit të atëhershëm serb, aviacioni i përgjithshëm ndaloi zhvillimin në Kosovë, duke sjellë edhe degradimin gradual të këtyre hapësirave.

Pas përfundimit të luftës, më 1999, administrimi i këtyre hapësirave kaloi fillimisht tek Agjencia e atëhershme Kosovare e Mirëbesimit (AKM), e më pas tek Agjencia Kosovare e Privatizimit (AKP).

Me ligj, AKP-ja është e autorizuar për administrim, shitje dhe transferim të ndërmarrjeve shoqërore.

Por, ajo nuk iu përgjigj pyetjeve të Radios Evropa e Lirë për numrin e fushave ajrore të privatizuara apo mënyrën e trajtimit të tyre.

Kush i menaxhon aerodromet?

Autoriteti i Aviacionit Civil (AAC) është institucioni përgjegjës për certifikimin, aprovimin dhe regjistrimin e aerodromeve për shfrytëzim civil.

Aerodromet kategorizohen si të certifikuara, të aprovuara dhe të regjistruara, në varësi të natyrës së operimeve dhe shkallës së shfrytëzimit.

Arianit Islami, ushtrues i detyrës së drejtorit të përgjithshëm të AAC-së, thotë për Radion Evropa e Lirë se përdorimi dhe zhvillimi i këtyre hapësirave nuk është në kompetencë të drejtpërdrejtë të këtij institucioni, por se varet nga pronarët e tyre dhe operatorët potencialë.

“Roli i AAC-së është që, në rast të iniciativave për funksionalizimin e tyre për qëllime aeronautike, të sigurojë që çdo zhvillim dhe operim të jetë në përputhje me kërkesat rregullatore dhe standardet e sigurisë në fuqi”, thotë Islami.

Aktualisht, sipas tij, asnjë nga fushat ajrore të identifikuara nuk ka status të regjistruar, të aprovuar apo të certifikuar, prandaj nuk konsiderohen funksionale për operime ajrore civile.

Megjithatë, thekson se disa prej këtyre hapësirave mund të përdoren për aktivitete ajrore, pas vlerësimit nga inspektorët e institucionit dhe përmbushjes së kërkesave përkatëse rregullatore.

Gjendja e fushave ajrore komunë për komunë

Malishevë

Deri më tani, vetëm aerodromi i Malishevës është shfrytëzuar herë pas here për operime ajrore, pas përmbushjes së kërkesave të përcaktuara nga AAC-ja.

Më 14 qershor 2024, ky institucion regjistroi fushën e parë ajrore që gjendet në fshatin Banjë të kësaj komune.

Një ditë më pas, më 15 qershor, AAC-ja njoftoi në faqen e saj zyrtare se në këtë hapësirë janë realizuar fluturimet e para, me dy aeroplanë të huazuar dhe me përkrahjen e Aeroklubit Shkupi nga Maqedonia e Veriut.

Sipas AAC-së, ky aktivitet kishte për qëllim promovimin e aviacionit të përgjithshëm dhe rritjen e ndërgjegjësimit për funksionalizimin e fushave ajrore në Kosovë, si hapësira që mund të shfrytëzohen nga pilotët dhe entuziastët e aviacionit.

Drenas

Fusha ajrore në fshatin Korroticë, në komunën e Drenasit, ndodhet rreth 25 kilometra nga Prishtina dhe vetëm 10 kilometra vijë ajrore nga Aeroporti Ndërkombëtar i Prishtinës “Adem Jashari”.

Megjithatë, kjo pistë sot është pothuajse tërësisht e mbuluar me mbeturina dhe gurë të mëdhenj, duke e bërë të papërdorshme.

Gjendja e saj konfirmohet edhe nga Zyra për Informim e Komunës së Drenasit.

“Fusha është nën përgjegjësinë e Agjencisë Kosovare të Privatizimit (AKP) dhe aktualisht nuk shfrytëzohet për ndonjë aktivitet specifik”, thuhet në përgjigjen e komunës për Radion Evropa e Lirë.

Podujevë

Fusha ajrore në Dumosh të Podujevës është marrë në administrim nga institucionet qendrore të Kosovës, përkatësisht nga Ministria e Mbrojtjes dhe Forca e Sigurisë së Kosovës, për përdorim në funksione që lidhen me sigurinë dhe mbrojtjen.

Kështu bëri të ditur për Radion Evropa e Lirë Zyra për Informim e Komunës së Podujevës.

E, Ministria e Mbrojtjes nuk i dha sqarime REL-it lidhur me mënyrën konkrete të shfrytëzimit të kësaj hapësire apo institucionin që e përdor atë.

Suharekë

Pas përfundimit të luftës, në aerodromin e Suharekës u vendosën trupat e misionit paqeruajtës të NATO-s, KFOR.

Pas largimit të tyre, disa vite më vonë, prona kaloi nën administrimin e Agjencisë Kosovare të Privatizimit dhe më pas u privatizua.

“Aktualisht është pronë private dhe, sipas hartave zonale komunale, është e përcaktuar si zonë komerciale”, konfirmon Arta Gashi, nënkryetare e Komunës së Suharekës, për Radion Evropa e Lirë.

Skenderaj

Fusha ajrore në Skenderaj ndodhet 40 km larg qytetit të Prishtinës dhe vetëm 20 km vijë ajrore nga Aeroporti Ndërkombëtar i Prishtinës “Adem Jashari”.

Ndryshe nga fushat e tjera, zyrtarët e kësaj komune bëjnë të ditur se parcela është e regjistruar dhe pronë e Komunës së Skenderajt.

“Parcela ka sipërfaqe mbi 350 metra katrorë. Në bazë të evidencës zyrtare nuk ka ndonjë objekt të regjistruar apo bazë të funksionimit të fushës ajrore, edhe pse në gjendjen reale është e ndërtuar”, thotë Besjana Thaçi, zyrtare për informim në komunë, për Radion Evropa e Lirë.

Sipas dokumentit të AAC-së nga viti 2015, kjo fushë ajrore “mund të bëhet funksionale me një investim minimal”. Hapësira është shumë e përshtatshme për aktivitete të aviacionit të përgjithshëm dhe në disa raste përdoret nga auto-shkollat lokale për trajnim të vozitësve fillestarë, thuhet në dokument.

Klinë

Në territorin e komunës së Klinës ekzistojnë dy hapësira të identifikuara si fusha ajrore: njëra në fshatin Jashanicë dhe tjetra në Krushevë.

Nikson Daka, drejtor i Kadastrës, Gjeodezisë dhe Pronësisë në këtë komunë, thotë për Radion Evropa e Lirë se këto hapësira nuk janë në funksion të rregullt për operime ajrore civile apo komerciale dhe janë jashtë përdorimit aktiv.

“Të dyja këto hapësira kanë kaluar në menaxhim të AKP-së; njëra është privatizuar, ndërsa tjetra vazhdon të mbahet nën administrimin e kësaj agjencie”, thotë ai, duke shtuar se ato kanë nevojë për investime në infrastrukturë, mirëmbajtje dhe standarde sigurie.

Rahovec

Fusha ajrore në Rahovec ishte në pronësi të kompanisë NBI-Rahoveci, e cila më pas u privatizua.

Zyrtarë të komunës thanë për REL-in se “në periudhën e NBI-Rahovecit, kjo fushë shërbente si pistë për avionët bujqësorë dhe përdorej për spërkatjen e vreshtave. Pas privatizimit, ajo mbeti jashtë funksionit”.

Prizren

Në territorin e komunës së Prizrenit ka ekzistuar një ngastër kadastrale e destinuar si fushë ajrore për nevoja bujqësore të ndërmarrjes Progresi.

Komuna nuk ka asnjë kompetencë ligjore apo administrative mbi këtë tokë.

“Pas vitit 1999, tokat e Progresit kaluan në menaxhim të AKM-së, pastaj të AKP-së, dhe nuk kemi informata se çfarë ka ndodhur me këtë pronë bujqësore”, thonë nga Komuna e Prizrenit për Radion Evropa e Lirë.

Sipas dokumentit të AAC-së, fusha ajrore në këtë komunë është privatizuar dhe ndarë nëpër parcela të ndryshme – çka e bën identifikimin e saj praktikisht të pamundur.

Gjilan, Istog, Ferizaj

Radio Evropa e Lirë nuk mori përgjigje nga zyrtarët e komunave të Gjilanit dhe Istogut për gjendjen e aerodromeve, ndërsa Komuna e Ferizajt konfirmoi se “nuk ka në menaxhim ndonjë hapësirë të tillë”.

Sipas AAC-së, vetëm 5 nga 12 fushat ajrore ishin në gjendje të mirë fizike dhe infrastrukturore një dekadë më parë.

Privatizimi i pistave ajrore – gabim strategjik

Ekspertët e aviacionit e konsiderojnë degradimin dhe privatizimin e këtyre hapësirave si gabim strategjik.

Eset Berisha, ish-drejtor i Autoritetit të Aviacionit Civil të Kosovës, thotë se përmes një strategjie të qartë të aviacionit civil, disa pista nuk duhej të shiteshin, pasi ato mund të shfrytëzoheshin për qëllime të aviacionit dhe nevoja të tjera publike.

“Këto hapësira mund të shfrytëzoheshin, për shembull, për shkollimin e pilotëve dhe zhvillimin e kuadrove të reja në aviacion. Por, nëse është ndryshuar destinimi, shteti ka humbur kontrollin dhe mundësinë për t’i përdorur për këto qëllime”, thotë ai për Radion Evropa e Lirë.

Ngjashëm vlerëson edhe Afrim Aziri, ish-drejtor në Aeroportin Ndërkombëtar të Prishtinës, i cili thekson se mungesa e planifikimit afatgjatë, ka rezultuar me humbjen e potencialit të këtyre hapësirave për zhvillimin e aviacionit.

“Këto hapësira mund të shfrytëzoheshin për fluturime akrobatike dhe sportive, për hapjen e shkollave të fluturimit, ku kostoja e trajnimit të pilotëve të rinj do të ishte më e ulët, si dhe për trajnim dhe shkollim profesional për pilotimin e dronëve”, thotë Aziri për Radion Evropa e Lirë.

Islami i AAC-së thekson se zhvillimi i infrastrukturës së aviacionit civil, përfshirë aerodromet e vogla, është pjesë e politikave qeveritare dhe planifikimit institucional, e jo kompetencë e drejtpërdrejtë e AAC-së.

Sipas tij, AAC-ja mbështet zhvillimin e aviacionit civil, përfshirë atë sportiv, për sa kohë respektohet korniza ligjore në fuqi.

Qeveria e Kosovës nuk iu përgjigj interesimit të REL-it nëse ka ndonjë strategji për aviacionin dhe cilat janë planet për të ardhmen e këtyre aerodromeve.

Presidentja Vjosa Osmani po merr pjesë në organizimin “Java e Gruas”, pjesëmarrje të cilën e para e vendit e cilësoi si shumë të rëndësishme, për shkak se ndodhet në prag të përfundimit të mandatit të saj si shefe e shtetit.

Në fjalën e saj, Osmani tha se kishte privilegjin të takonte gra që nuk përkufizohen nga kufij, por nga horizontet që vetë i ka hapur, transmeton Klankosova.tv.

“Bindjet asnjëherë nuk janë imponuar, por janë pjekur këtu. Andaj kam mirënjohje të thellë, faleminderit që e bëtë këtë platformë të qëndrueshme dhe të vlefshme. Kisha privilegjin të takoj gra që s’përkufizohen nga kufij, por nga horizontet që vetë i kanë hapur”, u shpreh Osmani.

Pos tjerash, ajo kërkoi përgjegjësi ndaj atyre që shfrytëzojnë teknologjinë për propagandë.

“Një shoqëri që mësohet me narrativë të tillë, e humb busullën morale. Nuk është luftë ndaj një personi, është mesazh për secilën grua e vajzë që do të hyjë në jetën publike dhe politike”, u shpreh e para e vendit.

“Kjo s’është çështje personale, është e demokracisë. Ajo nuk rrëzohet nga krizat e mëdha, dobësohet kur e vërteta goditet dhe bëhet e parëndësishme, kur shpifja bëhet mjeti kryesor”, tha ajo.

Në Kosovë është funksionalizuar platforma “Kosovo Volunteers”, një nismë e re që synon të njohë dhe dokumentojë angazhimin vullnetar të të rinjve, duke e shndërruar atë në një vlerë të matshme për zhvillimin profesional.

Sipas ministrit të Rinisë dhe Sportit, Blerim Gashani, kjo platformë do të mundësojë edhe certifikimin zyrtar të punës vullnetare, duke i dhënë asaj peshë konkrete në tregun e punës.

“Përmes saj, kontributi juaj do të njihet si një vlerë konkrete që ndikon në zhvillimin tuaj profesional. Në të njëjtën kohë, vullnetarizmi përmes kësaj platforme do të shërbejë si një parapërgatitje e rëndësishme për tregun e punës duke ju ndihmuar të ndërtoni aftësi praktike, përvojë dhe besim në vete”, ka theksuar Gashani.

Ai ka inkurajuar të rinjtë që të përfshihen aktivisht në këtë platformë, duke u bërë pjesë e një nisme që, sipas tij, fuqizon rininë dhe kontribuon drejtpërdrejt në zhvillimin e shoqërisë.

Ish-kryetari i Odës Ekonomike të Kosovës, Safet Gërxhaliu ka paralajmëruar për pasoja të mundshme ekonomike në vend si rezultat i zhvillimeve të fundit në Lindjen e Mesme, duke theksuar se rritja e çmimeve dhe çrregullimet në tregjet globale mund të prekin drejtpërdrejt edhe Kosovën.

Gërxhaliu në një intervistë për Ekonomia Online, tha se lufta në Lindjen e Mesme po krijon ndryshim në shumë dimensione.

“Është më se e vërtetë që pas sulmeve të Shteteve të Bashkuara të Amerikës dhe Izraelit në Iran dhe ajo çfarë është duke ndodhur në Gjirin Persik, bota nuk është më ajo çka ka qenë më parë. Gjërat janë duke ndryshuar në shumë dimensione, jo vetëm në aspektin gjeostrategjik, jo vetëm në aspektin politik, por edhe në aspektin ekonomik dhe social. Vetë fakti që kemi të bëjmë me vende të cilat janë prodhuesit më të mëdhenj dhe eksportuesit më të mëdhenj të derivateve të naftës, këto shtete të Gjirit Persik e dëshmon rëndësinë strategjike të tyre. Vetë fakti që partnerët më të mëdhenj të blerjes së kësaj nafte janë ekonomitë më të zhvilluara në botë, duke filluar nga Kina, duke filluar nga India, Pakistani dhe shumë shtete të tjera, dhe ato janë të varura nga kjo naftë, e dëshmon më së miri faktin e çrregullimit të tregut global në furnizim të derivateve të naftës. Bota nuk njeh distancë. Ajo çfarë sot ndodh në Amerikë apo në Kinë apo në vende të tjera, bartet me shpejtësi në vende të ndryshme të botës dhe në këtë drejtim edhe Kosova nuk mund të jetë e pa goditur”, tha ai.

Ai thotë se ngërçi politik është një prej gjërave më negative që i ka ndodhur Kosovës për vitin 2026.

“Ajo çka e vështirëson situatën më shumë në Kosovë, është fakti që Kosova po hyn me krizë në krizë dhe jemi tani në një ngërç politik. Dhe mungesa e stabilitetit politik edhe nga viti 2025 i vazhduar në vitin 2026 është më e keqja që i ka ndodhur Kosovës në këtë kohë të turbulencave globale. Në vend që të kemi një angazhim më aktiv, që të gjenden forma për të minimizuar pasojat e ngritjes së çmimeve në këtë mënyrë dhe efektit të tyre në ekonominë e Kosovës, ne ende tutje merremi me politikë. Dhe e tëra kjo po e dëmton sot edhe standardin e qytetarëve, por edhe më tepër ekonominë dhe zhvillimin ekonomik”, u shpreh ai.

Gërxhaliu sqaroi edhe çështjen e inflacionit dhe se një gjë e tillë sipas tij është më e lartë se sa vendet e rajonit dhe se po ndikon në stagflacion.

“Dhe çka e bën më të veçantë në këtë situatë Kosovën është fakti që derisa vendet e rajonit dhe vendet evropiane kanë rezervat e produkteve strategjike dhe të produkteve elementare, ndoshta në një periudhë kohore 60 apo 70 ditore me normativa evropiane duhet të jetë 90 ditë – Kosova nuk e ka një siguri të tillë dhe e bën situatën shumë më të brishtë sesa në vendet tjera. Prandaj definitivisht është duke u rritur norma e inflacionit në vende të ndryshme. Kosova e ka pasur një normë shumë të lartë krahasuar me vendet evropiane apo dyfishin e inflacionit 6%, dhe e tëra kjo që është duke ndodhur me rritjen e inflacionit në botë po ndikon në një stagflacion, i cili është kombinimi më fatal për një qëndrueshmëri ekonomike. Që krahas rritjes së inflacionit dhe ngritjes së çmimeve të produkteve qoftë bazike qoftë elementare, e kemi do të thotë edhe ngecjen e zhvillimit dhe e tëra kjo do të jetë vërtet një goditje për mbarë botën dhe ajo do të reflektohet edhe në Kosovë”, thekson ai.

Ai thotë se situata po cilësohet normale derisa, sipas tij, pasojat do të shihen në të ardhmen.

“Është me rëndësi të kuptohet e vërteta që lufta dihet kur fillon por kurrë nuk dihet kur mbaron. Sa më tepër do të zgjasë, me siguri rreziku do të jetë më i madh, por e tëra kjo duhet të jetë një këmbanë për politikanët kosovarë që të mendojnë më tepër për shtet dhe për ardhmëri, sesa lufta për pushtet dhe për pozita qeveritare. Sepse vërtet, derisa vendet e rajonit dhe evropiane janë në një situatë emergjente, në Kosovë si duket kjo situatë pranohet si një gjë normale që do ta dëmtojë më vonë ardhmërinë, sepse dikur do të jetë vonë për të tentuar të bërë diçka. Është koha për veprim”, potencon ai.

Gërxhaliu përmendi edhe formimin e këshillit emergjent duke shtuar se situata është më serioze se sa paraqitet.

“Është e vërtetë që Kosova nuk ka ndikim apo nuk ka fuqi për të ndikuar në Gjirin Persik, por Kosova duhet t’i bëjë detyrat e shtëpisë. Në këtë drejtim besoj që është koha kur duhet të kemi një këshill emergjent që do të merret me këtë situatë të krijuar. Është koha kur ekspertët e fushës ekonomike duhet ta japin kontributin e vet duke dhënë propozime. A duhet të kemi një ngrirje të akcizës, a duhet të kemi përgjysmim të akcizës në produkte strategjike, a duhet të ngrihet apo të kemi një lëvizje në tatimin mbi vlerën e shtuar? Kjo duhet të jetë një prioritet. Dhe e dyta, nuk është më pyetja a do të kemi ngritje të çmimeve, por problemi më i madh do të jetë se cili do të jetë zinxhiri furnizues dhe a do të ketë mallra qoftë ushqimore qoftë të produkteve të tjera. Prandaj besoj që sot situata është shumë më serioze sesa që e mendojnë dhe si mendojnë politikanët kosovarë”, u shpreh tutje Gërxhaliu.

Gjykata Kushtetuese pritet që së shpejti të marrë një vendim lidhur me çështjen e dekretit të presidentes dhe procesin e zgjedhjes së kreut të shtetit, një zhvillim që konsiderohet kyç për tejkalimin e ngërçit aktual institucional në vend.

“Kjo kërkesë është duke u shqyrtuar. Vendimi do të merret pasi që të shqyrtohen të gjitha aspektet kushtetuese të pretendimeve të bëra në kërkesë nga pala parashtruese, në përputhje me Kushtetutën, Ligjin për Gjykatën Kushtetuese dhe Rregulloren e punës së Gjykatës”, thuhet në përgjigjen e Gjykata Kushtetuese e Kosovës për FrontOnline.

Në të njëjtën kohë, në media është raportuar se vendimi i mundshëm i kësaj gjykate mund të përfshijë një afat prej 60 ditësh për kryeministrin Albin Kurti, me qëllim që t’i jepet hapësirë institucioneve për zgjedhjen e presidentit dhe shmangien e një krize më të thellë politike.

Lidhur me këtë çështje, njohës të Kushtetutës kanë dalë me qëndrime, duke interpretuar bazën ligjore të një afati të tillë dhe rolin që mund të ketë Gjykata Kushtetuese në orientimin e zgjidhjeve politike brenda kornizës kushtetuese.

Ish-gjyqtari i Gjykatës Kushtetuese, Kadri Kryeziu, për FrontOnline ka vlerësuar se dekreti i presidentes për shpërndarjen e Kuvendit ka qenë në përputhje me Kushtetutën, ndërsa vendimi i mundshëm i Gjykatës për një afat 60-ditor synon të ruajë balancat institucionale dhe të shmangë pasojat e pariparueshme.

Sipas Kryeziut, roli i Gjykatës Kushtetuese është që të garantojë funksionimin e drejtë të rendit kushtetues dhe të mbajë ekuilibrin mes institucioneve shtetërore.

“Dekreti i Presidentes ka qenë ligjor dhe legjitim. Gjykata Kushtetuese e ka për detyrë me i ruajtur balancat shtetërore. Nëse ajo ka konsideruar se zbatimi i këtij dekreti ka efekte të pariparueshme, atëherë ka marrë një vendim udhëzues për t’i dhënë hapësirë subjekteve politike për zgjedhjen e Presidentit”, ka deklaruar ai.

Ai ka theksuar se presidentja Vjosa Osmani nuk ka bërë shkelje kushtetuese, duke argumentuar se veprimet e saj kanë qenë të bazuara në dispozitat e Kushtetutës.

“Jo absolutisht, Osmani nuk ka bërë shkelje Kushtetuese, sepse nuk ka pasur zgjedhje tjetër, edhe sipas nenit 85, pika 6 të Kushtetutës”, u shpreh Kryeziu.

Profesori i së drejtës kushtetuese, Kolë Krasniqi, për FrontOnline ka komentuar zhvillimet e fundit rreth vendimit të mundshëm të Gjykatës Kushtetuese lidhur me afatin 60-ditor për zgjedhjen e presidentit, duke theksuar se ky afat është i lidhur drejtpërdrejt me fillimin e procedurës parlamentare.

Sipas tij, afati prej 60 ditësh duhet të llogaritet nga momenti kur ka nisur procedura për zgjedhjen e presidentit, konkretisht kur janë paraqitur kandidatët dhe janë verifikuar nga komisioni përkatës i Kuvendit.

“Procedura ka filluar në momentin kur janë paraqitur dy kandidatë dhe komisioni për verifikim i parlamentit ka konstatuar se ata i plotësojnë kriteret për zgjedhje. Prej atij momenti fillon të rrjedhë afati deri në 60 ditë”, ka deklaruar Krasniqi.

Ai theksoi se, ndonëse Kushtetuta nuk e përcakton në mënyrë eksplicite këtë afat, në praktikë është respektuar periudha 60-ditore si standard kushtetues.

“Kushtetuta nuk i ka dhënë afat të prerë, por është respektuar afati 60-ditor, pavarësisht interpretimeve të ndryshme. Gjykata Kushtetuese vetëm sa i ka implementuar këto rregulla kushtetuese”, u shpreh ai për FrontOnline.

Krasniqi ka vlerësuar gjithashtu se presidentja ka vepruar në përputhje me kompetencat e saj, duke argumentuar se Kuvendi i Kosovës nuk ka arritur të procedojë në kohë zgjedhjen e kreut të shtetit.

“Presidentja kishte të drejtë, pasi Kuvendi nuk e ka proceduar me kohë zgjedhjen e Presidentit. Megjithatë, Gjykata ka dy opsione dhe duket se po mundohet të gjejë zgjidhje të reja në këtë situatë”, shtoi ai.

Në fund, Krasniqi paralajmëroi se zhvillimet aktuale mund të çojnë drejt një epilogu politik me zgjedhje të reja në vend.

“Unë besoj se do të ketë zgjedhje të reja”, përfundoi ai.

Policia në Serbia ka arrestuar katër shtetas shqiptarë, duke i akuzuar për nxitjen e urrejtjes dhe intolerancës kombëtare, racore dhe fetare.

Sipas autoriteteve, të ndaluarit janë A.S. (1989), E.V. (1984), E.G. (1978) dhe A.C. (2005). Ngjarja lidhet me publikimin e një videoje në rrjetet sociale, ku ata shfaqen duke udhëtuar me një automjet në autostradë në territorin serb, ndërsa ekspozojnë simbole kombëtare shqiptare.

Videoja, e postuar nga njëri prej tyre në Facebook, përkon me përvjetorin e fillimit të bombardimeve të NATO-s, çka sipas mediave serbe e ka bërë situatën edhe më të ndjeshme.

Katër të arrestuarit janë vendosur në ndalim për 48 orë dhe pritet të dalin përpara Prokurorisë së Lartë Publike në Beograd.

Policia serbe shkruan:

Pjesëtarët e Ministrisë së Punëve të Brendshme, Drejtorisë së Policisë Kriminalistike, kanë arrestuar në territorin e Republikës së Serbisë A. S. (1989), E. V. (1984), E. G. (1978) dhe A. C. (2005), shtetas të Republikës së Shqipërisë, pasi dyshohen se kanë kryer veprën penale të nxitjes së urrejtjes dhe intolerancës kombëtare, racore dhe fetare.

Dyshohet se A. S. sot, në ditën e shënimit të fillimit të bombardimeve të NATO-s, në llogarinë e tij në rrjetin social Facebook ka publikuar një video në të cilin ndodhet në një automjet “Audi”, në shoqëri me të dyshuarit e tjerë, gjatë lëvizjes në autostradë nëpër Serbi, ku në mënyrë të papërshtatshme kanë shfaqur simbole të “Shqipërisë së Madhe”, si dhe në mënyrë verbale, në kontekst negativ, kanë përmendur Republikën e Serbisë, duke përdorur fjalë të papërshtatshme.

Të dyshuarve u është caktuar masa e ndalimit deri në 48 orë, pas së cilës, me kallëzim penal, do të dërgohen në Prokurorinë e Lartë Publike në Beograd – Departamenti i posaçëm për luftimin e krimit të teknologjisë së lartë. /TCH/