Tag: Ballina

Partia Demokratike e Kosovës (PDK), ka dalë me deklaratë për pretendimet se PDK-së i është ofruar posti i Presidentit.

Në reagim thuhet se pretendimet janë të pavërteta dhe spekulative.

“Lidhur me raportimet e fundit, sqarojmë se pretendimet se PDK-së i është ofruar posti i Presidentit janë të pavërteta dhe spekulative. Sot, Partia Demokratike e Kosovës mbajti mbledhjen e Kryesisë dhe të Grupit Parlamentar, ku u vendos që në ditët në vijim të thirret Këshilli Drejtues për të diskutuar zhvillimet aktuale politike dhe për të përcaktuar hapat e mëtejshëm”, thuhet në njoftim.

“I bëjmë thirrje mediave që të mbështeten vetëm në informacionet zyrtare dhe të verifikuara. PDK mbetet e hapur për bashkëpunim dhe e gatshme të ofrojë informata të sakta dhe në kohë për çdo çështje me interes publik. Ju falënderojmë për mirëkuptimin dhe bashkëpunimin”, përmbyllet njoftimi.

Aleanca për Ardhmërinë e Kosovës nuk ka votë për dy kandidatët aktualë të Lëvizjes Vetëvendosje për president, tha nënkryetari i kësaj partie, Ardian Gjini.

Ai pas mbledhjes së këshillit drejtues të AAK-së, tha se nuk do t’i përgjigjen asnjë ftese të kryeministrit, njëherësh liderit të LVV-së, Albin Kurti, për çështjen e zgjedhjes së presidentit.

Përkundër që Gjykata Kushtetuese dha afat 30 ditë për zgjedhjen e presidentit, Gjini tha se nuk po sheh vullnet dhe sinqeritet nga LVV-ja për të zgjedhur presidentin. Kësisoj, sipas tij, vendi po shkon drejt zgjedhjeve të reja pas konsumimit të këtij afati.

I pyetur nëse i përgjigjen pozitivisht ndonjë ftese për takim nga Kurti, ai e mohoi një gjë të tillë.

Duke folur për aktgjykimin e 25 marsit të Gjykatës Kushtetuese, ku e shpalli të pavlefshëm dekretin e presidentes Vjosa Osmani, nënkryetari i AAK-së thotë se do ta respektojnë të njëjtin.

Gjatë konferencës për gazetarë, Gjini foli edhe për zgjedhjet e brendshme në parti, ku njoftoi se të njëjtat do të vijojnë dhe se i tërë procesi do të përmbyllet në fund të muajit maj.

Gjini veçse ka shpallur kandidaturën për kryetar të AAK-së.

Në anën tjetër, u shpreh edhe kritik ndaj qeverisë, siç tha për mos heqjen e akcizës për derivate./KP

Instituti Hidrometeorologjik i Kosovës ka dalë me një njoftim lidhur me rrezikun nga erërat e forta që mund të mbizotërojnë sot mbi territorin e vendit.

Sipas njoftimit, do të fryjë erë e kategorizimit të verdhë, ndërsa shpejtësia e saj mund të arrijnë deri në 85km/h, transmeton Klankosova.tv.

IHMK tutje shton se mund të ketë dëmtime në prona, probleme me transport, dëmtime të pyjeve.

Aleanca për Ardhmërinë e Kosovës ka njfotuar se në orën 16:00, do të mblidhet Këshilli i Përgjithshëm i këtij subjekti politik.

Siç bëhet e ditur në një njoftim, në këtë mbledhje do të diskutohen zhvillimet aktuale politike në vend dhe qëndrimet e Aleancës lidhur me situatën e krijuar.

“Pas përfundimit të mbledhjes, do t’ju informojmë për vendimet dhe qëndrimet që do të dalin nga diskutimet”, theksohet më tej në njoftim.

Kryetari i PDK-së, Bedri Hamza, është pyetur sot nga gazetarët nëse do të ketë ndonjë marrëveshje me Lëvizjen Vetëvendosje për çështjen e presidentit pas aktgjykimit të djeshëm të Gjykatës Kushtetuese, e cila caktoi 34 ditë afat për zgjedhjen e shefit të shtetit.

Hamza tha se do të diskutojnë brenda partisë dhe mbi bazën e vendimeve të organeve të PDK’së, do të dalin me qëndrimin e tyre.

“Para diskutimit në organet e PDK’së nuk është e duhura sepse për këtë janë diskutimet. Për të debatuar, diskutuar dhe për të marrë vendime dhe për të qëndruar në këto vendime”.

Ndërkaq, i pyetur nëse janë ftuar nga Lëvizja Vetëvendosje, Hamza tha: “Nuk ka ftesë”.

Sot është mbajtur një tubim përkujtimor në 27-vjetorin e Masakrës së Krushës së Madhe, ku u nderuan viktimat e një prej krimeve më të rënda të regjimit serb në Kosovë.

Presidentja e Republikës, Vjosa Osmani, theksoi rëndësinë e kujtesës dhe drejtësisë për familjen Berisha nga Suhareka, e cila u përball me mizorinë e regjimit gjenocidal të Serbisë.

“Në pragun e shtëpisë së tyre, aty ku duhej të mbretëronte jeta dhe siguria, anëtarë të familjes Berisha u përballën me barbarinë e regjimit gjenocidal të Serbisë. 49 anëtarë të kësaj familje, prej të cilëve 19 viktima kanë qenë të moshës nën 18-vjeçare, u masakruan mizorisht, ndërsa trupat e tyre u zhdukën e u bartën gjetiu, në përpjekje për të fshehur krimin dhe për t’i shuar gjurmët e së vërtetës,” shkruan Osmani.

Ajo shtoi se fati ka shpëtuar tre nga familjarët: Vjollcën me të birin Gramozin dhe Shyhretjen, të cilët mbetën jo vetëm dëshmitarë të krimit, por edhe zë i kujtesës që nuk shuhet.

“Kjo histori nuk është vetëm dhimbje, por thirrje për drejtësi. Kujtesa për krime si kjo është themel i së vërtetës dhe i kërkesës për drejtësi. Qoftë i përhershëm kujtimi për martirët!” përfundon Osmani.

Visar Azemi nga Lidhja Demokratike e Kosovës dje në një konferencë për media tha se njehsoret elektrike tyre e matin kohën gabim, duke thënë se ka bërë hulumtim për këtë.

Ai tha se reagimi i KESCO për këto deklarime të tij ishte “vërtetim”.

“Nëpërmjet disa artikujve të sponsorizuar, KESCO paska reaguar lidhur me konferencën që e mbajtëm sot për problemet me njehsorë elektrik. Por, reagimi i tyre nuk po e mohon problemin! Në fakt po e vërteton atë. Sepse vetë thanë se mund të ketë devijime. Pra, devijimet po ekzistojkan edhe sipas tyre. Por, nga 884 mostrat të cilat unë personalisht i kam vërtetuar, 87% e tyre tregojnë se ka probleme në matje. Pra, nuk po flasim për gabim. Po flasim për një dështim sistemik. Tani pyetja është shumë e thjeshtë: nëse devijimet po ekzistojkan, pse është dashur që qytetarët e Republikës së Kosovës të faturohen me çmim të shtrenjtë të energjisë në kohën kur sipas Zyrës së Rregullatorit të Energjisë është dashur të faturohen me çmim të lirë?”.

Ai tha se KESCO tash duhet të tregojë se sa qytetarë janë dëmtuar nga këto anomali”

Shumica e familjeve tona e presin orën 22:00, atëherë kur fillon tarifa e lirë, për me lëshu bojlerin, me lëshu nxejmjen, me i la enët dhe me i la rrobat. Pra, ky është skandali. Shumica e këtyre familjeve janë vjedhur. Prandaj pyetja është e thjeshtë: KESCO duhet me tregu qartë se sa qytetarë janë manipuluar, sa është kostoja e këtyre manipulimeve dhe se kur do të kompenzohen këta qytetarë për këto manipulime? Nuk mjaftojnë artikujt e sponsorizuar në media. Nuk mjaftojnë arsyetimet. Unë nuk do të ndalem me kaq. Do t’i ftoj organet për hetim. Do të kërkoj përgjegjësi. Do të kërkoj kompensim për qytetarët e Kosovës dhe këtë do ta bëj menjëherë. Prandaj i bëj thirrje Prokurorisë Speciale që të merret me këtë rast”.

Në Gjykatën Themelore të Prishtinës janë sjellë të akuzuarit për vrasjen e Liridona Ademajt, Naim Murseli, Granit Plava dhe Kushtrim Kokalla.

Kryetarja e trupit gjykues, Fatime Dermaku ka ballafaquar me prova të akuzuarin Naim Murseli duke faktuar se viktima Liridona Ademaj në natën kritike kishte pasur stoli të arit (dy bylyzykë dhe një unazë).

Naim Murseli paraprakisht tha se Liridona nuk ka pasur me vete gjëra me vlerë.

Pas kësaj Murseli tha se në momentin e grabitjes grabitësi kishte kërkuar vetëm para dhe telefona.

“Këtë pyetje më ka bërë edhe prokurorja kur kam qenë në prokurori dhe po ju përgjigjem edhe juve: Në momentin e grabitjes të vetmen gjë që e ka kërkuar ka qenë telefonat dhe paratë, nuk ka kërkuar gjë tjetër”, tha Murseli.

Liridona Ademaj u vra më 29 nëntor të vitit 2023 në ora 20:25 në rrugën “Dalip Alshiqi” në fshatin Bërnicë të Prishtinës.

Sot bëhen 19 vjet që kur ish-presidenti finlandez Martti Ahtisaari dërgoi raportin përfundimtar në Këshillin e Sigurimit të OKB-së, në të cilin thoshte se Kosova duhej të bëhet e pavarur.

Derisa SHBA-të përkrahnin planin e Ahtisaarit dhe mendonin se Kosova duhet të bëhet e pavarur, serbët vazhduan ta kundërshtojnë planin.

Rusia bëri deklarata që mund të interpretohen si kundër pavarësisë, por nuk përmendi përdorimin e vetos, transmeton KosovaPress.

Tri ditë më vonë, më 29 mars 2007, Parlamenti Evropian miraton një rezolutë me 490 vota pro, 80 kundër dhe 87 abstenime, ku shprehej përkrahja për pavarësinë e mbikëqyrur për Kosovën.

Ndërsa, pavarësia e vendit tonë u bë më 17 shkurt të vitit 2008 në ora 15:39 minuta, në Kuvendin e Republikës së Kosovës në Prishtinë.

Deputeti i Partisë Demokratike të Kosovës (PDK), Përparim Gruda ka komentuar vendimin e Gjykatës Kushtetuese për çështjen e presidentit.

Gruda ka thënë se aktgjykimi i Gjykatës Kushtetuese ka përcaktuar qartë tri çështje kryesore.

“Afati 30-ditor për zgjedhjen e Presidentit para përfundimit të mandatit të Presidentit aktual është obligues dhe detyrues”, ka shkruar Gruda duke shtuar se ky afat ka qenë gjithmonë pikë kyçe e diskutimeve.

Së dyti përcaktohet se në rast të shkeljes së afatit 30-ditor, Kuvendi shpërndahet automatikisht ex constitutione, pa pasur nevojë për ndonjë dekret presidencial.

“Gjykata ka parashikuar një afat shtesë prej 34 ditësh për rastin specifik që Kuvendi u konstituua më 11 shkurt dhe nuk kishte në dispozicion 60 ditë të plota për procedurën e zgjedhjes së Presidentit”, u shpreh Gruda në Debat plus.

Deputeti i PDK-së nënvizon se afati 30-ditor nuk është zhvleftësuar, por është marrë parasysh në kuadër të një situate të veçantë, duke reflektuar vonesën në konstituimin e Kuvendit.