ATV

Tag: Ballina

  • Parlamenti Evropian i drejtohet Serbisë: Marrëveshja me Kosovën, vetëm me njohje reciproke

    Parlamenti Evropian i drejtohet Serbisë: Marrëveshja me Kosovën, vetëm me njohje reciproke

    Parlamenti Evropian ka kërkuar nga Serbia që marrëveshja me Kosovën të jetë e bazuar në njohjen reciproke në mes të dy shteteve.

    Kjo sipas njërës nga pikat e raportit të PE-së për përparimin e Serbisë në rrugën e saj drejt anëtarësimit në BE.

    “Ne ritheksojmë mbështetjen tonë të plotë për përfaqësuesin special të BE-së për dialogun ndërmjet Beogradit dhe Prishtinës, Miroslav Lajçak, dhe ftojmë Serbinë dhe Kosovën të angazhohen në këtë dialog në mirëbesim dhe në frymën e kompromisit për të arritur një marrëveshje gjithëpërfshirës, ​​ligjërisht të detyrueshme për normalizimin e marrëdhënieve të tyre bazuar në parimin e njohjes reciproke në përputhje me të drejtën ndërkombëtare dhe pa vonesa të mëtejshme”, thotë njëri paragraf i këtij raporti, shkruan mediumi serb N1.

    Raporti bën thirrje për zbatimin e plotë, në mirëbesim dhe në kohën e duhur, të të gjitha marrëveshjeve relevante nga të dyja palët, duke përfshirë themelimin e Asociacionit të Komunave me Shumicë Serbe.

    Në këtë amendament thuhet po ashtu se “besohet se një zgjidhje përfundimtare dhe gjithëpërfshirëse do të nxisë bashkëpunimin, stabilitetin dhe prosperitetin në rajonin e gjerë”.

    Aty po ashtu u bëhet thirrje të dyja palëve që të tregojnë lidership dhe të jenë të gatshme për të marrë vendimet e nevojshme që çojnë në përparimin e dialogut dhe pajtimit ndërmjet shoqërive të tyre, dhe theksohet se mjedisi aktual gjeopolitik e bën edhe më të rëndësishëm tejkalimin e trashëgimisë së të kaluarës dhe angazhimin në negociata kuptimplota.

    Theksohet se normalizimi i marrëdhënieve është prioritet dhe parakusht për anëtarësim në BE.

    “Angazhimi i shtuar i të dyja palëve pranohet dhe qeverive të Serbisë dhe Kosovës u kërkohet të përmbahen nga çdo veprim që mund të dëmtojë besimin ndërmjet palëve dhe të rrezikojë vazhdimin konstruktiv të dialogut”, thuhet në raport.

    Gjithashtu kujtohet se “përmbajtja nga retorika e luftës dhe një qasje agresive e politikës së jashtme ndaj vendeve fqinje është një parakusht për normalizimin e marrëdhënieve rajonale”.

    Të gjitha veprimet që kërcënojnë stabilitetin dhe vënë në pikëpyetje procesin e pajtimit dënohen ashpër.

    “Ka shqetësim të thellë për tensionet në veri të Kosovës dhe të shtënat e papranueshme në prag të Krishtlindjeve ortodokse dhe disa incidente të tjera të dhunshme drejtuar serbëve në Kosovë. Dënohet ndalimi arbitrar i politikanes Rada Trajkoviq në vendkalimin e Merdares në dhjetor 2022 dhe bëhet thirrje për hetime transparente dhe të plota të këtyre incidenteve dhe ftohen autorët para përgjegjësisë. Kujtohet përgjegjësia e përbashkët për paqen dhe sundimin e ligjit të të gjithë njerëzve në Kosovë dhe shprehet shqetësimi për akuzat për rolin e grupeve të organizuara kriminale që veprojnë në veri të Kosovës dhe lidhjet e tyre të pretenduara me strukturat shtetërore në Serbi”, thuhet në raportin e PE-së për Serbinë.

    Theksohet se “dështimi për të zgjidhur në mënyrë efektive tensionet në marrëdhëniet ndërmjet Serbisë dhe Kosovës rrit rrezikun e destabilizimit në rajon”.

  • 357 vëzhgues të akredituar për procesin e zgjedhjeve në veri të dielen

    357 vëzhgues të akredituar për procesin e zgjedhjeve në veri të dielen

    Të dielën do të mbahen zgjedhjet e jashtëzakonshme për kryetar të komunave në Mitrovicë të Veriut, Zubin Potok, Leposaviq dhe Zveçan dhe zgjedhjet t parakohshme për kuvendet komunale në Zveçan dhe Leposaviq.

    Përmes një komunikate për media, zëdhënësi i KQZ-së, Valmir Elezi ka publikuar numrin e përgjithshëm të vëzhguesve të akredituar nga Komisioni Qendror i Zgjedhjeve.

    Në njoftimin e lëshuar për media thuhet se të akredituar janë 357 vëzhgues duke përfshirë subjektet politike, përfaqësi të huaja në Kosovë, shtëpi mediave dhe organizata joqeveritare.

    Numri i vëzhguesve për parti politike është 75, për përfaqësi të huaja dy, për shtëpi mediatike 171 dhe për organizata joqeveritare është 109.

    Më poshtë i keni të gjitha detajet për vëzhguesit:

  • Kosovarët të parët në Evropë për prona të shtëpive

    Kosovarët të parët në Evropë për prona të shtëpive

    Kosova është e para në Evropë për pronësi të shtëpive, sipas të dhënave të “Eurostatit”, përpiluar nga “Landgeist”.

    Pronësia e shtëpive është pjesë e rëndësishme në jetët e njerëzve, pasi ofron stabilitet, siguri dhe një ndjenjë pasurie. Në Evropë, shkalla e pronësisë së shtëpive dallon nga shteti në shtet. Si shkallë më e lartë në përgjithësi prin rajoni i Evropës Lindore.

    Kosova është me përqindjen më të lartë, gati 98 për qind, ndjekur nga Shqipëria e Rumania. Gjermania, Zvicra e disa shtete të tjera në perëndim, kanë shkallën më të ulët. Këto dy shtete janë të vetmet në Evropë ku pronarët e shtëpive janë pakicë.

    Një nga faktorë e mundshëm që ndikon në shkallën e pronësisë së shtëpive në Evropë është çmimi i pronave. Në shtetet si Gjermania e Zvicra, kostoja e blerjes së një prone është shumë më e lartë, duke e bërë të vështirë blerjen. Në shtete të tjera kjo konsiderohet më e lirë.

    Një faktor tjetër është edhe çështja e popullaritetit të banesave sociale. Në disa shtete, si Holanda e Austria, qiramarrësit kanë më shumë të ngjarë të marrin banesa në pronësi publike pasi kanë vlerë më të ulët të qirasë.

  • Pas vendimit për liberalizim vizash, serbët e veriut duan pasaporta të Kosovës

    Pas vendimit për liberalizim vizash, serbët e veriut duan pasaporta të Kosovës

    “Po pres të më njoftojnë për të shkuar për ta marrë pasaportën e Kosovës”, thotë Nenadi nga Mitrovica e Veriut, i cili do që të udhëtojë pa regjim vizash.

    Vendimin për t’u pajisur me pasaportë të Kosovës e mori pasi dëgjoi nga mediat se qytetarët e Kosovës do të kenë me siguri liberalizim vizash.

    Nenadi dëshiron të udhëtojë, sepse, siç thotë, ka shumë të afërm dhe miq në vendet perëndimore.

    “Nuk kam mundur, sepse nuk kam dashur… Si ta them pa u treguar i vrazhdë… jam shtypur me atë pasaportën e qendrës së koordinimit që është lëshuar”, thotë ai për Radion Evropa e Lirë.

    Bashkëqytetari i tij, Zorani, thotë se nuk e njeh “pasaportën e Kosovës”.

    “Ajo që kanë marrë ata, është e turpshme. Nuk do ta merrja kurrë pasaportën e tyre, pra atë të Kosovës, edhe me çmimin që nuk dal kurrë prej vendit”, thotë Zorani.

    Parlamenti Evropian ka miratuar më 18 prill vendimin për liberalizimin e vizave për Kosovën, në bazë të të cilët qytetarët e vendit do të mund të udhëtojnë lirshëm në 27 shtete të Evropës, që përbëjnë zonën Schengen.

    Një ditë më vonë, akti ligjor i BE-së për liberalizimin e vizave është nënshkruar po ashtu në Parlamentin Evropian.

    Vendimi për lëvizje të lirë pritet të hyjë në fuqi nga 1 janari i vitit 2024, por regjimi i vizave do të vazhdojë të mbetet në fuqi për ata qytetarë të Kosovës që pasaportat i marrin nga Administrata Koordinuese e Ministrisë së Brendshme të Serbisë. Për këta qytetarë nuk ka vlejtur kurrë as liberalizimi i vizave për Serbinë, i cili ka hyrë në fuqi në dhjetor të vitit 2009.

    Raportuesi i Parlamentit Evropian për vizat për Kosovën, Thijs Reuten, u pyet të mërkurën nga gazetarët në Strasburg nëse liberalizimin e vizave do të mund ta gëzojnë edhe serbët, të cilët kanë pasaporta të lëshuara nga Administrata Koordinuese e Serbisë.

    “[Legjislacioni] është formuluar goxha me kujdes, ashtu siç thuhet, asgjë më shumë, asgjë më pak: qytetarët e Kosovës me dokument të lëshuar nga autoritetet e Kosovës mund të udhëtojnë lirshëm”, tha ai.

    Zëvendëskryeministri i parë i Kosovës, Besnik Bislimi, i cili mori pjesë në ceremoninë e nënshkrimit të aktit ligjor për liberalizim vizash, tha se të gjithë shtetasit serbë të Kosovës, që ende nuk janë të pajisur me pasaporta kosovare, do të kenë afat prej tetë muajsh t’i marrin ato, para se vendimi për vizat të hyjë në fuqi.

    Të dhënat e Ministrisë së Punëve të Brendshme të Kosovës, në lidhje me pajisjen e qytetarëve serbë me pasaporta të Kosovës, janë këto:

    E ndikuar nga Beogradi zyrtar, shumica e serbëve në komunat veriore të Kosovës – Mitrovicë e Veriut, Zubin Potok, Zveçan dhe Leposaviq – kundërshton pavarësinë e Kosovës dhe institucionet e saj.

    “Duhet t’i besojmë vendit tonë, Serbisë”

    Zorani, i cili jeton në Mitrovicë të Veriut, beson se do të gjendet zgjidhje edhe për pasaportat e Administratës Koordinuese, të cilat i lëshon Serbia.

    “Unë mendoj se do të vijë zgjidhja, njerëzit le të jenë të durueshëm, ne duhet të besojmë në vendin tonë – Serbinë”, shprehet ai.

    Darkoja, një tjetër qytetar i Mitrovicës së Veriut, thotë se nuk është i gatshëm ta nxjerrë pasaportën e Kosovës, por nuk pret as nga Serbia që ta zgjidhë çështjen e pasaportave të lëshuara nga Administrata Koordinuese.

    “Gjithçka është gënjeshtër. Madje, edhe shteti ynë – Serbia – nuk është shumë i sjellshëm me ne. Edhe nënë, edhe njerkë, kryesisht njerkë”, thotë Darkoja.

    Për këto arsye, ai thotë se nuk udhëton.

    “Ne nuk duam të jemi qytetarë të kësaj ‘kuazi-republike’”, thotë ai.

    Bojan Milletiq, në anën tjetër, thotë se nuk e di se çfarë do të bëjë për çështjen e pasaportës.

    “Nuk kam ndonjë qëndrim për këtë, por do të shoh, do të mendoj, pse jo”, shprehet ai.

    Zoran Millenkoviq thotë se, me siguri, nuk do ta marrë pasaportën e Kosovës. Ai pret zgjidhje nga bisedimet për normalizimin e marrëdhënieve midis Kosovës dhe Serbisë, që zhvillohen në Bruksel.

    “Do të bëhet diçka që ne serbët ta kemi atë pasaportë serbe, ndoshta. Nuk e di tani, gjithçka varet se si do të na trajtojnë ata nga Serbia”, thotë ai.

    Edhe pse vetë nuk dëshiron të ketë pasaportë të Kosovës, ai beson se njerëzit, gjithnjë e më shumë, do të fillojnë të marrin dokumente udhëtimi që i lëshon Kosova.

    “E njëjta gjë ka ndodhur edhe me letërnjoftimet. Duam t’i nxjerrim, nuk duam t’i nxjerrim. Në fund i kanë nxjerrë të gjithë, 90 për qind, nëse jo më shumë”, thotë Millenkoviq.

    Serbia nuk e njeh ende pavarësinë e Kosovës, e cila është shpallur në vitin 2008.

    Qytetarëve të Serbisë me adresë banimi në Kosovë, pasaportat ua lëshon Administrata Koordinuese, e cila funksionon në kuadër të Ministrisë së Brendshme të Serbisë, dhe ata përjashtohen nga lëvizja pa viza.

    Në vitin 2009, Serbia është dashur ta formojë këtë organ për të siguruar liberalizimin e vizave.

    Para kësaj, shtetasit serbë me banim në Kosovë i kanë marrë pasaportat në Drejtoritë e Policisë, të cilat Beogradi zyrtar i ka zhvendosur në qytetet e Serbisë, pas luftës në Kosovë më 1999.

    Kosova nuk i njeh këto pasaporta, sepse konsideron se ato lëshohen nga “institucione paralele ilegale”. /REL/

  • Integrimi në BE dhe zotimet e dialogut, temë në vizitën e Billstromit

    Integrimi në BE dhe zotimet e dialogut, temë në vizitën e Billstromit

    Procesi integrues i Kosovës në Bashkimin Evropian ishte kryetemë në takimin e ministres për Punë të Jashtme, Donika Gërvalla, me homologun e saj suedez, Tobias Billstrom.

    Ministrja Gërvalla e vlerësoi si shumë të rëndësishme vizitën e Billstromit në Prishtinë, në cilësinë e përfaqësuesit të Presidencës Suedeze të Këshillit Evropian, një ditë pas nënshkrimit të vendimit për liberalizimin e vizave për kosovarët, nga 1 Janari 2024.

    “Natyrisht gjatë ditëve të ardhshme, javëve dhe muajve të ardhshëm, deri në atë kohë do të kemi një kampanjë të gjerë informuese, e cila do të tregojë se çfarë është dhe çfarë nuk është liberalizimi i vizave. Por në ndërkohë kemi të pranishëm ministrin Billstrom, si përfaqësues të Presidencës”, tha Gërvalla.

    Duke shmangur afatet, diplomati suedez tha se vendi i tij mbështet ambiciet e Kosovës për anëtarësim në Bashkimin Evropian.

    “Ne mbështesim procesin e integrimit të Kosovës në BE dhe përpjekjet për reforma lidhur me aplikimin e Kosovës për anëtarësim, ne po konsultohemi me të gjitha vendet anëtare të BE-së për rrugën përpara, si procedurë e rregullt”, tha ministri i Jashtëm i Suedisë, Tobias Billstrom.

    Pasi tha se presidenca suedeze do ta mbajë Ballkanin Perëndimor lart në agjendë, Billstrom foli për rëndësinë e zbatimit të marrëveshjes së Ohrit.

    “Kam qenë i qartë edhe në Beograd, edhe në Prishtinë, nëse zotoheni për një marrëveshje, ju duhet ta përmbushni atë. Kjo nënkupton që Serbia duhet të ndalen së penguari Kosovën, në anëtarësime në organizata ndërkombëtare. Kjo është e qartë. Këshilli i Evropës është një shembull. Në anën tjetër, është mirë të shohim Kosovën t’i përmbushë zotimet e saj, duke formuar Asociacionin e komunave”, tha Billstrom.

    Krahas procesit integrues në BE, temë në takim ishte edhe aplikimi i Kosovës për anëtarësim në Këshillin e Evropës, për çka ministrja Gërvalla tha se shpreson të ketë lëvizje pozitive.

    Ministri i Jashtëm i Suedisë, Tobias Billstrom, takoi edhe presidenten Vjosa Osmani dhe kryeministrin Albin Kurti. /atvlive.tv

  • Kryeministri sulmon Blerim Isufajn, akuzon prokurorinë se ka disponim negativ ndaj Qeverisë

    Kryeministri sulmon Blerim Isufajn, akuzon prokurorinë se ka disponim negativ ndaj Qeverisë

    Gjuhë të ashpër ka përdorur kryeministri Albin Kurti nga foltorja e Kuvendit ndaj kryeprokurorit të Prokurorisë Speciale, Blerim Isufaj, i cili nga Këshilli Prokurorial është përzgjedhur kryeprokuror i shtetit.

    Kurti e ka akuzuar Prokurorinë dhe ka sulmuar Isufajn, duke ia bërë të ditur se atë nuk e dëshiron në pozitën e kryeprokurorit.

    Një ditë pas arrestimit të kryeshefit të Korporatës Energjetike të Kosovës, Nagip Krasniqi, kryeministri e ka akuzuar Prokurorinë se nuk i ka hetuar keqpërdorimet, që, sipas tij, janë bërë në të kaluarën në KEK.

    Prokurorinë e sulmuan edhe ministrja Artane Rizvanolli e deputetët e partisë në pushtet që udhëhiqet nga Kurti, Halil Thaçi, Arbër Rexhaj, Artan Abrashi e Adnan Rrustemi, duke thënë se arrestimi i Krasniqit është hakmarrje e Blerim Isufajt që nuk po dekretohet si kryeprokuror.

    Por, sipas shoqërisë civile, sulmet e tilla përbëjnë ndërhyrje të drejtpërdrejtë dhe presion në punën dhe pavarësinë e prokurorisë.

    Duke kritikuar ekzekutivin për standarde të dyfishta, monitorues të sistemit të drejtësisë, theksojnë se i vetmi reagim i Qeverisë, do të duhej të ishte shkarkimi i Krasniqit.

    “Qeveria është dashur të reagojë dhe reagimi të jetë shkarkimi i Krasniqit, për faktin që sa ka qenë në opozitë. LV-ja e ka ngritë parimin se me hajna nuk ka shtet dhe se të dyshuarit për korrupsion nuk duhet marrë pozita, andaj për këtë shkak ai duhet të shkarkohet”, tha analisti Arton Demhasaj.

    “Duke qenë se kemi të bëjmë me sisteme të ndara, sistemi duhet të veprojë në mënyrë të pavarur. Deklaratat e tilla janë të papranueshme dhe nuk duhet të ndodhin, por duhet të kërkohet luftimi i kësaj vepre”, tha ERANDA ZEKAJ nga IKD.

    Ndaj deklaratave të kryeministrit e zyrtarëve të Vetëvendosjes ka reaguar edhe Këshilli Prokurorial, duke thënë se ka konstatuar se disa zyrtarë të lartë shtetërorë po tentojnë të ndikojnë sistematikisht në punët e sistemit prokurorial.

    “Sa i përket rastit “Sopa”, është e vërtetë që z. Blerim Isufaj ishte prokuror i rastit në fazën fillestare të hetimeve, porse ju informojmë se ndërkohë këtë rast e ka marrë në trajtim një prokuror tjetër dhe është mirë që të pyetet prokurori i rastit, sepse vetëm ai mund të japë përgjigje adekuate. KPK-ja demanton deklaratat e pavërteta se ka pasur raste edhe me herët, por kinse nuk janë trajtuar, pra kjo deklaratë rezulton të jetë e pavërtetë dhe natyrisht se edhe për këtë rast, nëse ka informata të tilla, le të deklarohen ato publikisht dhe të dihet se cili rast ishte dhe kush e ka trajtuar atë”, thuhet në reagimin e Këshillit Prokurorial i Kosovës.

    Kurti e deputetët e tij akuzuan Isufajn, i cili është prokuror i rastit rreth hetimeve për keqpërdorime në KEK, ku nën dyshimin për korrupsion e keqpërdorim të detyrës zyrtare, u arrestua kryeshefi ekzekutiv Nagip Krasniqi.

    Krasniqi i cili u emërua në këtë pozitë në Qeverisjen Kurti 2, në tetor të vitit 2021, ishte më parë drejtues i Komitetit për Energji në Lëvizjen Vetëvendosje. /atvlive.tv

  • ​Komisioni Evropian përshëndet nënshkrimin për liberalizimin e vizave

    ​Komisioni Evropian përshëndet nënshkrimin për liberalizimin e vizave

    Komisioni Evropian ka përshëndetur nënshkrimin e vendimit për liberalizimin e vizave për Kosovën, i cili u bë të mërkurën nga Parlamenti Evropian. Në një komunikatë për media, thuhet se udhëtimi pa viza do të sjell përfitime për qytetarët nga të dy anët si dhe do të forcojë më tutje raportet e Bashkimit Evropian me Kosovën.

    Sipas Komisionit Evropian, Kosova në vazhdimësi i ka përmbushur të gjitha kriteret dhe kushtet duke dëshmuar përkushtim në këtë drejtim.

    “Udhëtimi pa viza sjell përfitime për qytetarët nga të dyja anët, duke forcuar më tej marrëdhëniet e BE-së me Kosovën. Kosova në vazhdimësi i ka përmbushur të gjitha kriteret dhe ka treguar përkushtimin e saj”, thuhet në komunikatë.

    Tutje, bëhet e qartë se lëvizja e lirë për bartësit e pasaportave të Kosovës do të bëhet realitet më së voni më 1 janar 2024.

    “Udhëtimi pa viza për bartësit e pasaportave të Kosovës do të bëhet realitet më së voni më 1 janar 2024. Pas pajtimit në mes Parlamentit Evropian dhe Këshillit, në bazë të propozimit të Komisionit Evropian, bartësit e pasaportave të Kosovës do të lejohen të udhëtojnë në Bashkim Evropian pa viza për një qëndrim maksimal deri në 90 ditë, në periudhën prej 180 ditësh” thuhet tutje në komunikatë.

    Në këtë komunikatë, Komisioni thotë se në vitin 2016 i kishte propozuar Parlamentit Evropian dhe Këshillit, mundësinë që qytetarët e Kosovës të mund të udhëtojnë pa viza.

    Në vitin 2018, thuhet në komunikatë, Komisioni kishte vlerësuar se Kosova i ka përmbushur të gjitha kriteret.

    Vendimi për liberalizimin e vizave për Kosovën është nënshkruar të mërkurën.

    Për të hyrë në fuqi, ai pritet të botohet në gazetën zyrtare të Bashkimit Evropian.

  • Kush janë 13 zyrtarët që nuk e deklaruan pasurinë në afatin e caktuar?

    Kush janë 13 zyrtarët që nuk e deklaruan pasurinë në afatin e caktuar?

    Data 31 mars ka qenë afati i fundit ligjor për subjektet deklaruese që ta deklarojnë pasurinë. Mirëpo, jo të gjithë e kanë deklaruar pasurinë në afatin e caktuar.

    Këtë vit, janë 13 subjekte deklaruese të cilët nuk e kanë deklaruar pasurinë në afatin e caktuar.

    Agjencia për Parandalimin e Korrupsionit sot ka publikuar listën e 13 zyrtarëve që nuk e kanë bërë deklarimin e pasurisë në afatin e caktuar, ku prijnë këshilltarët komunalë, ndërsa në mesin e tyre është edhe deputetja e Kuvendit të Kosovës nga radhët e LDK-së, Vlora Dumoshi. /atvlive.tv

  • ​Kurti për Blerim Isufaj: Asnjë rast nuk e ka të fituar në gjykatë

    ​Kurti për Blerim Isufaj: Asnjë rast nuk e ka të fituar në gjykatë

    Kryeministri Albin Kurti tha se Blerim Isufaj që po synon të bëhet kryeprokuror i shtetit, nuk e ka asnjë rast të fituar në gjykatë. Për të njëjtin u shpreh se nuk është vullneti i presidentes, kryeparlamentarit dhe kryeministrit.

    Shefi i ekzekutivit u shpreh se në Prokurorinë e Shtetit ekziston disponim negativ ndaj qeverisjes së tij. Teksa ka folur për arrestimin e djeshëm të kryeshefit të KEK-ut, Nagip Krasniqi, ai shtoi se prokuroria është e zellshme të merret me udhëheqjen e re të bordeve.

    Gjatë seancës plenare, kryeministri Kurti ka deklaruar se emri i kundërshtimit të ndryshimit të madh në Kosovë është vet Blerim Isufaj.

    “Unë nuk kam dyshim që në Prokurorinë e Shtetit dhe atë sa më lartë aq më shumë, ekziston një disponim politik negativ ndaj qeverisjes sonë. Dhe jo vetëm ndaj meje si kryeministër, por ndaj qeverisjes sonë. Dhe jo vetëm ndaj qeverisjes sonë, por edhe ndaj pushtetit të ri të dalë nga 14 shkurti i vitit 2021 nga zgjedhjet e lira dhe demokratike, të cilat e sollën ndryshimin e madh në Republikën tonë. Dhe kjo lidhet më shumë se me askënd tjetër me figurën e prokurorit Blerim Isufaj. Bëhet fjalë për një prokuror i cili është i mirënjohur në skenën tonë publike që rastin e vrasjes së ish-shefit të AKP-së, Dino Hasanaj e kategorizoi në vetëvrasje, ndërkaq rastin e vetëvrasjes së ish-drejtorit të informimit në kryeministri, Hamdi Sopa, e shndërroi në vrasje. Dhe njëkohësisht bëhet fjalë për një prokuror, i cili asnjë rast nuk e ka të fituar në gjykatë. Dhe pikërisht ky prokuror dëshiron të bëhet kryeprokuror përkundër vullnetit të presidentes, kryeparlamentarit dhe të kryeministrit të qeverisë”, ka thënë ai.

    Më tej, Kurti ka shtuar se vendi më i lakmuar në Kosovë është pozita e kryeprokurorit të shtetit.

    “Është siklet i madh dhe mbështetje e madhe për një njeri, i cili përkundër tre krerëve shtetëror, përkundër përvojës së hidhur që ka i gjithë vendi me të, dëshiron të bëhet kryeprokuror. Me ministrin Murati e bëjmë alokimin e buxhetit, por vendi më i lakmuar në Republikën tonë del të jetë pozita që bën alokimin e rasteve, e kjo është kryeprokurori i shtetit. Drejtësia, sistemi gjyqësor në Kosovë lëngon, pikërisht për shkak se kemi një prokurori e cila nganjëherë nuk donë, nganjëherë nuk dinë, e shpesh edhe të dyja ”, ka shtuar ai.

    Shefi i ekzekutivit tha se udhëheqja e re e bordit ka dërguar me dhjetëra dëshmi e fakte për keqpërdorimet që ka gjetur aty, por prokuroria nuk është marrë me to.

    “Kjo çështje ka fakte dhe ato ne urojmë dhe shpresojmë që të merren me profesionalizëm dhe me përpikëri. Në anën tjetër, është fakt se pati një gëzim opozitar për arrestimit e kryeshefit, Krasniqi. Por, ky është i opozitës, nuk është fakt i çështjes. Ne e dimë që ka pasur shumë kryeshefa ne KEK, në të kaluarën, ka pasur keqpërdorime marramendëse, mirëpo asnjëherë nuk janë trajtuar nga sistemi i drejtësisë, përkatësisht nga prokuroria. Prokuroria është shumë e zellshme në këtë rast kur fitimi i KEK-ut në vitin 2022 ka qenë 107 milionë euro. Natyrisht që udhëheqja e re e KEK-ut ka deponuar me dhjetëra fakte, dëshmi materiale për keqpërdorimet që i ka gjetur aty. Por, zelli i prokurorisë për tu marrur me deponimet e fakteve, e dëshmive për keqpërdorimet e mëhershme ka qenë zero”, ka deklaruar Kurti.

    Teksa u shpreh se opozita është gëzuar për arrestimin e Krasniqit, kryeministri Kurti shtoi se ‘dënim me vdekje nuk ka në Kosovë’.

    “Nagip Krasniqi është në burg, dënim me vdekje në Kosovë nuk ka. Dhe me siguri ai e sheh në televizor këtë gëzim opozitar për arrestimin e tij. Nuk është hera e parë që kemi gëzim në sallë të kuvendit për njerëzit të cilët janë në burg me sistem prokurorial, i cili nga viti në vit është gjykuar në raportet ndërkombëtare”, shprehet ai.

    Shefi i ekzekutivit, Albin Kurti shtoi se edhe pas katër vitesh, prej kur mundësohet gjykimi në mungesë, rezultatet janë të pakta.

    Kurti: Rezultatet janë më pak se të pakta për gjykimin në mungesë
    (Video)
    “Me 30 maj, në lexim të dytë e votuam plotësim-ndryshimin e Kodit të Procedurës Penale në mënyrë që krimenelët serbë që kanë kryer krime gjatë luftës, t’i gjykojmë e t’i dënojmë në mungesë. Me 30 maj sivjet, bëhen katër vjet. Rezultatet janë më pak se të pakta”, ka thënë Kurti.

    Po ashtu, Kurti shtoi se Agjencioni i Kosovës për Intelegjencë ka dërguar fakte e dëshmi për shkeljet e panumërta që janë bërë në veri të Kosovës.

    “Agjencioni i Kosovës për Intelegjencë pa numër dëshmi, pa numër fakte, i ka dërguar prokurorisë gjatë muajit dhjetor dhe janar, për 16 barrikadat e strukturave paralele në veri të Kosovës. asnjë aktakuzë, Si është e mundur që Agjencioni i Kosovës për Intelegjencë i dërgon aq shumë fakte prokurorisë tonë dhe ajo nuk vepron kundrejt atyre të cilët në mënyrë krimininale, me uniforma të zeza, në lidhje me vagnerin rus të dirigjuar nga Beogradi, i vendosën barrikadat, ndërkohë që prapra tyre ishin të armatosur. Asnjë aktakuzë”, shprehet ai.

    Ai ka përsëritur se me 14 shkurt ka ndodhur ndryshimi i madh për drejtësi dhe punësim, por për të parën u shpreh se nevojitet vettingu. /KP

  • ​Kurti: Në Prokurorinë e Shtetit ka disponim negativ ndaj qeverisjes sonë

    ​Kurti: Në Prokurorinë e Shtetit ka disponim negativ ndaj qeverisjes sonë

    Kryeministri Albin Kurti tha se në Prokurorinë e Shtetit ekziston një disponim negativ ndaj qeverisjes së tij.

    Në seancën e Kuvendit të Kosovës, Kurti tha se ka pasur gëzim opozitar për arrestimin e kryeshefit ekzekutivit të KEK-ut.

    “Unë nuk kam dyshim që në Prokurorinë e Shtetit, dhe atë sa më lartë aq më shumë, ekziston një disponim politik negativ ndaj qeverisjes sonë. Dhe jo vetëm ndaj meje si kryeministër, por ndaj qeverisjes sonë. Dhe jo vetëm ndaj qeverisjes sonë, por edhe ndaj pushtetit të ri të dalë nga 14 shkurti i vitit 2021 nga zgjedhjet e lira dhe demokratike, të cilat e sollën ndryshimin e madh në Republikën tonë”, tha ai, transmeton KP.

    Kurti tha se udhëheqja e re e bordit ka dërguar me dhjetëra dëshmi e fakte për keqpërdorimet që sipas tij kanë gjetur aty.

    “Kjo çështje ka fakte dhe ato ne urojmë dhe shpresojmë që të merren me profesionalizëm dhe me përpikëri. Në anën tjetër, është fakt se pati një gëzim opozitar për arrestimin e kryeshefit, Krasniqi. Por, ky është i opozitës, nuk është fakt i çështjes. Ne e dimë që ka pasur shumë kryeshefa ne KEK, në të kaluarën, ka pasur keqpërdorime marramendëse, mirëpo asnjëherë nuk janë trajtuar nga sistemi i drejtësisë, përkatësisht nga prokuroria. Prokuroria është shumë e zellshme në këtë rast kur fitimi i KEK-ut në vitin 2022 ka qenë 107 milionë euro. Natyrisht që udhëheqja e re e KEK-ut ka deponuar me dhjetëra fakte, dëshmi materiale për keqpërdorimet që i ka gjetur aty. Por zelli i prokurorisë për tu marrë me deponimet e fakteve, e dëshmive për keqpërdorimet e mëhershme ka qenë zero”, tha Kurti.