ATV

Tag: Ballina

  • ​Këshilli i Ambasadorëve Shqiptarë mirëpret vendimin për liberalizimin e vizave

    ​Këshilli i Ambasadorëve Shqiptarë mirëpret vendimin për liberalizimin e vizave

    Këshilli i Ambasadorëve Shqiptarë ka mirëpritur vendimin e Parlamentit Evropian ku u miratua liberalizimi i vizave për Kosovën.

    Në një komunikatë të Këshillit të Ambasadorëve Shqiptarë (KASh) thuhet se “ky vendim, në të vërtetë i vonuar i Bashkimit Evropian, është një arritje historike e shtetit të Kosovës, institucioneve dhe popullit të saj, që kanë bërë të mundur plotësimin e të gjitha kushteve teknike e politike të vendosura nga Komisioni Evropian”,

    KASh shfrytëzon rastin të përgëzojë të gjitha institucionet në Republikën e Kosovës të përfshira në këtë proces për punën e tyre të palodhshme dhe profesionale në përmbushjen e kritereve dhe standardeve të kërkuara.

    “Një falënderim i veçantë shkon për znj. Viola Von Cramon, Raportuese për Kosovën në Parlamentin e BE-së, për punën dhe përkushtimin e palodhur në arritjen e këtij qëllimi, i cili është i rëndësishëm, si për Kosovën ashtu edhe për BE-në”.

    “AAC shpreh besimin se liria e lëvizjes, si e drejtë themelore dhe më se e merituar e qytetarëve të Kosovës, shkëmbimet dhe kontaktet e drejtpërdrejta ndërmjet qytetarëve, njerëzve të biznesit, shkencëtarëve, letrarëve dhe kulturës do t’i shërbejnë konsolidimit socio-ekonomik të Kosovës, promovimi i mëtutjeshëm i arsimit, shkencës dhe kulturës, imazhit dhe promovimit të Kosovës në Evropë dhe më gjerë. Rrjedhimisht, do t’i shërbente edhe forcimit të paqes, stabilitetit dhe sigurisë në rajonin tonë. I urojmë suksese të mëtejshme Kosovës në rrugën e saj të integrimeve euroatlantike!”, përfundon shkrimi i KASh-it.

  • Nënshkruhet akti ligjor për liberalizim të vizave, Reuten: Padrejtësisë ndaj Kosovës i ka ardhur fundi

    Nënshkruhet akti ligjor për liberalizim të vizave, Reuten: Padrejtësisë ndaj Kosovës i ka ardhur fundi

    Pas vendimit, radha ishte për një akt tjetër të rëndësishëm drejt liberalizmit të vizave. Në Strasburg, Kosova nënshkroi aktin ligjor që i hap rrugë lëvizjes së lirë të kosovarëve.

    Zëvendëskryeministri i Kosovës, Besnik Bislimi, teksa dha firmën në dokument, tha se nga janari nuk do të ketë “mijëra mundësi të humbura” për shtetasit e Kosovës.

    “Ky ka qenë një proces i gjatë, i vështirë, me shumë pengesa rrugës dhe ka marrë 11 vjet kohë për ta përmbyllur. Liberalizimi i vizave do të mundësojë kontakte midis njerëzve, të përforcojë lidhjet tona me BE-në, të konfirmojë përkushtimin e BE-së për rajonin dhe të rrisë aktivitetet biznesore, arsimore dhe kulturore për qytetarët tanë”, tha Bislimi.

    Pas ceremonisë së nënshkrimit, raportuesi i Parlamentit Evropian për vizat për Kosovën, Thijs Reuten, ritheksoi se më së largu nga 1 janari i vitit 2024, shtetasit që kanë pasaporta të Kosovës do të mundë të udhëtojnë pa viza në Schengen.

    “Ky vendim nuk është kuptimplotë vetëm për Kosovën, për shkak se të gjithë shtetasit e tjerë të rajonit kanë mundur të udhëtojnë, përveç Kosovës. Ishte i padrejtë, i paarsyeshëm dhe kësaj situate tashmë i ka ardhur fundi. Kosova ka punuar shumë për t’i plotësuar të gjitha kushtet dhe për t’i përmbushur ato para shumë vjetësh dhe tashmë po shpërblehet për këtë gjë. Por, nuk është vetëm moment i rëndësisë së madhe për Kosovën, por është me rëndësi edhe për ne, pasi BE-ja përfundimisht e përmbushi premtimin e vet”, tha Reuten.

    Pas nënshkrimit të vendimit, hapi i fundit mbetet botimi i vendimit në Gazetën Zyrtare, që pritet të ndodhë pas 20 ditësh.

    Kosova, aktualisht, është vendi i vetëm në Ballkanin Perëndimor, qytetarët e të cilit nuk mund të lëvizin lirshëm në zonën Schengen. /atvlive.tv

  • Davenport kërkon të mos “prishen” zgjedhjet në veri

    Davenport kërkon të mos “prishen” zgjedhjet në veri

    Organizata për Bashkëpunim dhe Siguri në Evropë – OSBE bëri thirrje për zgjedhje paqësore dhe demokratike, për kryetarë dhe asamble, në katër komunat me shumicë serbe në veri të Kosovës, të dielën.

    Në një intervistë për ATV-në, ambasadori Michael Davenport tha se është shumë e rëndësishme të shmanget çfarëdo incidenti i dhunshëm dhe të mos ketë përpjekje për të prishur procesin demokratik zgjedhor.

    “Mendoj se është e rëndësishme që votuesve t’u jepet mundësia ta hedhin votën e tyre dhe ajo të bëhet në mënyrë paqësore, të zakonshme, qetësisht. Shpresoj që procesi të ecë pa probleme. Siç thashë, i dëshiroj KQZ-së sukses në drejtimin e këtyre zgjedhjeve dhe që ato të mos pengohen në asnjë mënyrë, të jenë të zakonshme dhe paqësore. Mendoj se ky është prioriteti kryesor”, tha Davenport.

    Ambasadori Davenport foli edhe për mospjesëmarrjen e Listës Serbe në zgjedhjet e 23 Prillit.

    “Do të ishte e preferueshme që të gjitha komunitetet të merrnin pjesë plotësisht. Të dyja, si kandidatët për zgjedhje, ashtu dhe votuesit, por kjo është zgjedhja që është bërë. Do të jetë e rëndësishme teksa shkohet përpara, që megjithatë interesat dhe pikëpamjet e të gjitha komuniteteve po merren parasysh dhe po merren nën të drejtën e të gjithëve të mbrohen dhe kjo është fondamentale. Një demokraci funksionale, po, ka të bëjë me zgjedhjet demokratike, por është gjithashtu edhe për atë se si shoqëria funksionon dhe si të drejtat e të gjithëve respektohen, po ashtu, ndërmjet zgjedhjeve”, theksoi Davenport.

    OSBE-ja do të ketë vetëm rol monitorues, dhe jo vëzhgues, në zgjedhjet e jashtëzakonshme lokale në Mitrovicë të Veriut, Zveçan, Leposaviq dhe Zubin Potok. /atvlive.tv

  • Escobar: Me apo pa pjesëmarrjen e serbëve, ShBA do ta njohë rezultatin e zgjedhjeve në veri

    Escobar: Me apo pa pjesëmarrjen e serbëve, ShBA do ta njohë rezultatin e zgjedhjeve në veri

    I dërguari i ShBA-ve për Ballkanin Perëndimor, Gabriel Escobar, ka komentuar vendimin e Listës Serbe për të mos marrë pjesë në zgjedhjet e 23 prillit për kryetarë të katër komunave veriore.

    Escobar tha se serbët duhet marrë pjesë në zgjedhje, mirëpo edhe nëse përfundimisht nuk marrin pjesë, ShBA prapëseprapë do t’i njohë rezultatet e zgjedhjeve.

    “I kam bërë apel serbëve që të marrin pjesë në zgjedhje. Kuptojmë shumë gjëra që ata i shohin si problematike, por sigurisht që duhet të marrin pjesë. Nëse ata nuk do të merrnin pjesë, kjo nuk do të thotë se ne nuk i mbështesim zgjedhjet. Qeveria e Kosovës ka obligim kushtetues. Do të ketë zgjedhje dhe ne do t’i njohim rezultatet dhe shpresojmë që serbët të kthehen në një moment”, tha Escobar për agjencinë serbe të lajmeve “Tanjug”, përcjell “Euronews.sr”.

    Ai tha se SHBA-të po kërkojnë që serbët të kthehen në departamentet e policisë, sepse nuk mund të ketë një komunitet që nuk ka shërbime komunale dhe që nuk ka forcë policore.

    “Kemi kërkuar që serbët të kthehen në institucione që të mos ketë arsye që shqiptarët etnikë të jenë të pranishëm atje. Kjo është një pyetje vërtet komplekse. Do të duhet një kompromis nga të dyja palët për të gjetur një zgjidhje”.

    Emisari Escobar po ashtu ka dënuar veprimet e ndryshme kriminale që kërcënojnë sigurinë në rajon, përfshirë këtu djegjen e veturave në veri.

    “Djegia e automjeteve, pasurisë së paluajtshme dhe kërcënimet ndaj njerëzve që duan të integrohen nuk vijnë nga shqiptarët etnikë, por nga serbët, kështu që mendoj se kërcënimet ndaj komunitetit serb në Kosovë duhet të ndalen nga të gjitha anët”, tha Escobar.

  • Arrestohet Nagip Krasniqi

    Arrestohet Nagip Krasniqi

    Me urdhër të Prokurorisë Speciale të Republikës së Kosovës (PSRK), Policia e Kosovës, ka arrestuar një person me inicialet N.K. për shkak të dyshimit të bazuar se i njëjti ka kryer veprat penale ‘’Keqpërdorimi i pozitës apo autoritetit zyrtar’’ nga neni 414 paragrafi 2 lidhur me paragrafin 1 të KPRK, ‘’Ushtrimi i ndikimit’’ nga neni 424 paragrafi 1 të KPRK-së, dhe veprën penale ‘’Konflikti i interesit’’ nga neni 417 paragrafi 2 lidhur me paragrafin 1 të KPRK-së.

    Po ashtu, Njësia e Veçantë e Hetimeve sot ka bastisur zyrën e të pandehurit N.K. në Prishtinë, dy banesa në lokacione të ndara në Prishtinë, në pronësi dhe të shfrytëzuara nga i njëjti, me qëllim gjetjen e dëshmive të cilat kanë të bëjnë me veprat penale të lartcekura. Gjatë bastisjes janë sekuestruar dokumente të ndryshme që ndërlidhen me rastin, pajisje elektronike si tre (3) kompjuter, një (1) llap-top, një (1) celular, një (1) USB, në cilësi të provave materiale që do të shërbejnë për procedurën e mëtejme.

    Me aktvendim të prokurorit të shtetit i pandehuri me inicialet N.K., është dërguar në mbajtje në kohëzgjatje prej 48 orësh.​

  • Ambasadori i OSBE-së, Michael Davenport, para studentëve të AAB-së: Tani kemi rol mbështetës në konsolidimin e institucioneve

    Ambasadori i OSBE-së, Michael Davenport, para studentëve të AAB-së: Tani kemi rol mbështetës në konsolidimin e institucioneve

    Shefi i Organizatës për Bashkëpunim dhe Siguri në Evropë për Kosovë, ambasadori Michael Davenport, vizitoi Kolegjin AAB.

    I shoqëruar nga dekani i Fakultetit Juridik, Veton Vula, ambasadori i OSBE-së, Davenport, zhvilloi një bashkëbisedim me studentë të juridikut, shkencave politike, administratës publike dhe të tjera drejtimesh.

    Ambasadori u shpjegoi studentëve për misionin e OSBE-së dhe rolin mbështetës për institucionet e sigurisë, drejtësisë, komunat, komunitetet dhe mbarëvajtjen e zgjedhjeve në të kaluarën.

    “OSBE-ja gjithmonë ka luajtur rol mbështetës këtu. Puna e vërtetë është bërë nga ata në Kosovë, që ishin të vendosur të ndërtonin këto institucione me mbështetjen e OSBE-së. Cili është roli tani? Policia është tani, gjykatat janë. Përgjigjja është, tani ka të bëjë me konsolidimin e institucioneve”, tha Davenport.

    Ai lavdëroi punën dhe avancimin e Komisionit Qendror të Zgjedhjeve dhe Avokatit të Popullit, teksa përmendi edhe sfidat dhe rolin në zgjidhjen e tyre – me theks ato në sistemin e drejtësisë.

    “KPK-ja, KGJ-ja dhe Ministria e Drejtësisë bënë një deklaratë të përbashkët për forcimin e drejtësisë, trajnimet, vlerësimin profesional. Vërtetë e mirëpres këtë, sepse kemi pasur një periudhë shumë të vështirë, praktikisht kishim bojkot të Qeverisë nga gjyqësori lidhur me pagat. Ne ishim të përfshirë në diskutimet për këtë deklaratë dhe miratimin e saj”, theksoi Davenport.

    Dekani Veton Vula e vlerësoi lart bashkëpunimin e OSBE-së me kolegjin AAB dhe paralajmëroi projekte tjera të përbashkëta.

    “Vitin e kaluar, kishim disa takime dhe konferenca ndërmjet OSBE-së dhe kolegjit tonë për të drejtat e njeriut dhe religjionin. Këtu ishin të gjithë përfaqësuesit e religjioneve në Kosovë. Ne do të vazhdojmë edhe në nëntor dhe dhjetor, sepse në dhjetor e kemi ditën e të drejtave të njeriut”, tha Vula.

    Diplomati britanik, i cili në të kaluarën ka shërbyer si ambasador i Britanisë së Madhe, por edhe Shef i BE-së në Serbi, u përgjigj në pyetjet e studentëve për sfidat e misionit në Kosovë dhe përvojat nga e kaluara.

    Ambasadori Davenport ishte i interesuar në pikëpamjet e studentëve për ndikimin e liberalizimit të vizave në të ardhmen e tyre.

    Shumica e studentëve thanë se liberalizimi i vizave krijon mundësi më të mira për zhvillimin profesional dhe personal, përmes studimeve jashtë vendit, por theksuan se preferojnë kthimin për të dhënë kontribut në Kosovë.

  • Bislimi pas nënshkrimit të marrëveshjes për heqjen e vizave: Përçohet mesazhi se jemi pjesë e Evropës

    Bislimi pas nënshkrimit të marrëveshjes për heqjen e vizave: Përçohet mesazhi se jemi pjesë e Evropës

    Në Stazburg ka përfunduar ceremonia e nënshkrimit të vendimit për liberalizimin e vizave për Kosovën.

    Zëvendëskryeministri Besnik Bislimi ka thënë se me këtë rast është mbyllur një proces i gjatë që kishte edhe pengesa gjatë rrugës.

    “Ka marrë 11 vjet kohë. Kishte ngecur në Këshill për shumë vjet. Por kemi punuar ngusht me të gjitha shtetet anëtarë që kjo të bëhej e mundur”, është shprehur Bislimi.

    “Dua t’i falënderoj të gjithë qytetarët për durimin. Do të bëjmë fushata për t’i njoftuar ata se çfarë është dhe çfarë nuk është liberalizimi”.

    Bislimi ka thënë se me heqjen e liberalizimit të vizave, kosovarët do të ndjehen më evropianë.

    “Është mesazh për qytetarët se edhe ne jemi pjesë e Evropës. Ka të bëjë me studentët, sportistët, të cilët mund ta eksplorojnë Evropën”.

    Ai ka theksuar më tej se me këtë vendim, nuk do të ketë më pengesa për sportistët e artistët, të cilët janë penguar të marrin pjesë nëpër ngjarje, shkaku i mosdhënies së vizave.

  • Nënshkruhet vendimi për liberalizimin e vizave

    Nënshkruhet vendimi për liberalizimin e vizave

    Në Strasburg është nënshkruar akti ligjor i Bashkimit Evropian për liberalizimin e vizave për Kosovën.

    Eurodeputeti holandez, Thijs Reuten në një konferencë për media pas nënshkrimit të aktit ligjor pë vizat, tha se më në fund qytetarët e Kosovës do të lëvizin pa viza drejt Evropës.

    “Më në fund para gjysmë ore nënshkruam aktin ligjor që u mundëson qytetarëve të Kosovës të lëvizin lirshëm drejt BE-së pa viza. Më në fund udhëtimi drejt BE-së për pushime, vizita familjare, udhëtime biznesi do të jetë më e lehtë”, tha Reuten.
    Ai shtoi se lëvizja pa viza drejt BE-së për qytetarët e Kosovës do të bëhet më së largu më 1 janar 2024.

    “Nga 1 janari 2024 të paktën bartësit e pasaportës kosovare do të mund të udhëtojnë drejt BE-së pa viza. Dua të falënderoj ish-raportuesen për Kosovën dhe ministren e Punëve të Jashtme të Sllovenisë, Tanja Fajon për punën e suksesshme që ka bërë në muajt e kaluar për këtë proces”, tha eurodeputeti holandez.

    Reuten shtoi se Kosova i kishe përmbushur kriteret për heqjen e vizave shumë vite më parë.

    “Kosova ka punuar shumë për të përmbushur të gjitha kushtet dhe i ka plotësuar ato shumë vite më parë. Nuk është vetëm moment i rëndësisë së madhe për Kosovën, është i rëndësishëm edhe për ne, sepse BE-ja më fund po e përmbush premtimin e saj për Kosovën”, tha Reuten.

    Një ditë më herët, më 18 prill, Parlamenti Evropian e miratoi vendimin për vizat, duke përmbyllur procedurat vendimmarrëse për këtë çështje.

    Miratimi u bë pa votim, pasi nuk pati asnjë kundërshtim, dhe i hapi rrugën qytetarëve të Kosovës që të lëvizin pa viza në vendet e zonës Schengen prej 1 janarit të vitit 2024.
    Zëvendëskryeministri i Kosovës, Besnik Bislimi, ka marrë pjesë në ceremoninë e nënshkrimit, së bashku me ministren e Jashtme të Kosovës, Donika Gërvalla-Schwarz.

    Ceremonia e nënshkrimit u zhvillua në selinë e Parlamentit Evropian, dhe u drejtua nga shefja e këtij institucioni, Roberta Metsola.

    Pjesëmarrës në ceremoni ishte edhe një përfaqësues i Suedisë, meqë ky shtet kryeson Bashkimin Evropian në këtë periudhë.

  • ​Haxhiu: Jemi në koordinim me deputetët e LVV-së që ta procedojmë Kodin Civil

    ​Haxhiu: Jemi në koordinim me deputetët e LVV-së që ta procedojmë Kodin Civil

    Ministrja e Drejtësisë, Albulena Haxhiu deklaroi sot se janë në koordinim me deputetët e LVV-së për votimin e Kodit Civil. Ajo tha se duhet të sigurohen se i njëjti do të kalojë në Kuvendin e Kosovës, për çka u shpreh se kjo u ka marrë kohë.

    Para gazetarëve, gjatë së mërkurës, ministrja e Drejtësisë shtoi se do të kenë nevojë edhe për mbështetjen e opozitës për këtë projektligj.

    “Besoj që jeni në dijeni, jemi në koordinim edhe me Grupin Parlamentar në mënyrë që ta procedojmë Kodin Civil. Ju e dini që unë kam thënë qëndrimet e mia sa i përket votimit në kuvend, rrëzimit të tij. Mendoj që Kuvendi i Kosovës nuk ka bërë mirë. Megjithatë, ka qenë nën mandatin e tyre që të vlerësojnë ashtu. Paraprakisht ne duhet të sigurohemi që Kodi Civil kalon. Dhe për këtë arsyeje kjo na ka marrë kohë, sepse jemi në koordinim me deputetët edhe me të Grupit Parlamentar, sikurse pastaj kemi nevojë edhe për mbështetjen e opozitës që i njëjti të kalojë”, deklaroi Haxhiu, raporton KP.

    Më tej, Haxhiu shtoi se nuk është mirë për Kosovën që Kodi Civil të ta ketë fatin e herës së kaluar.

    “Pendenca apo synimet tona janë që i njëjti të kalojë, pra që të mos ketë fatin sikurse ka pasur në të kaluarën. Nuk mendoj që është mirë për Kosovën, sidomos kur ne pretendojmë të anëtarësohemi në Këshillin e Evropës që të mos e votojë një dokument që ka të bëjë me të drejtat e njeriut. Prandaj edhe uroj që Kuvendi i Kosovës ta miratojë atë”, u shpreh ajo.

    E pyetur në lidhje me personat përgjegjës për zhdukjen e mostrave të Astrit Deharit, Haxhiu tha se nuk është në dijeni që të njëjtit janë duke avancuar në pozita.

    “Nuk jam në dijeni dhe do ta kundërshtojë ndonjë tendencë për avancim të ndonjë personi, i cili po hetohet për zhdukjen e mostrave të Astrit Deharit. Sic jeni në dijeni, tre persona kanë qenë përgjegjës për hapësirën ku ruhen provat. Fatkeqësisht komisioni i ankesave i ka kthyer në punë. Sepse siç e dini Komisioni Disiplinor i kishte suspenduar. Mirëpo, unë në këtë drejtim nuk kam pasur mandat që të ndërhyjë, por nuk kam dëgjuar për një tendencë për avancim. Njëra nga personat që ka pasur qasje, Flutura Goga ka qenë në proces të avancimit si drejtore e përgjithshme e Institutit të Mjekësisë Ligjore. Ne kemi pezulluar këtë proces deri sa prokuroria të na theksojë se cilat janë veprimet që kanë ndërmarrë”, theksoi ministrja Haxhiu.

  • Mbrojtja e Veselit nis marrjen në pyetje të dëshmitarit, seanca vazhdon të jetë private

    Mbrojtja e Veselit nis marrjen në pyetje të dëshmitarit, seanca vazhdon të jetë private

    Në Dhomat e Specializuara të Kosovës (DhSK) në Hagë, pas përfundimit të pyetjeve të mbrojtësit të Hashim Thaçit, Peter McCloskey, tani dëshmitari është duke u përgjigjur në kundër-pyetjet e mbrojtësit të Kadri Veselit, Ben Emmerson.

    Seanca po vazhdon të jetë private.

    Dëshmitari i dytë i Zyrës së Prokurorit të Specializuar (ZPS), po dëgjohet sot për të tretën ditë me radhë, pasi dëshmia e tij filloi të hënën dhe vazhdoi edhe të martën.

    Rasti Thaçi dhe të tjerët, dëshmitari i dytë po vazhdon të dëgjohet në seancë private edhe sot

    Në Dhomat e Specializuara të Kosovës (DhSK) në Hagë, edhe sot po vazhdon gjykimi ndaj ish-krerëve të Ushtrisë Çlirimtare të Kosovës (UÇK), ish-presidentit Hashim Thaçit, ish-kryeparlamentarëve Kadri Veseli dhe Jakup Krasniqi, si dhe ish-deputetit Rexhep Selimi, ku po dëgjohet në seancë private dëshmitari i dytë.

    Dëshmitari i dytë i Zyrës së Prokurorit të Specializuar (ZPS), po dëgjohet sot për të tretën ditë me radhë, pasi dëshmia e tij filloi të hënën dhe vazhdoi edhe të martën, raporton “Betimi për Drejtësi“.

    Dëshmitari është duke u përgjigjur në kundër-pyetjet e mbrojtësit të Hashim Thaçit, Peter McCloskey.

    Ndryshe, të hënën, në Dhomat e Specializuara ka përfunduar dëshminë e saj, dëshmitarja e parë, e cila po ashtu ishte dëgjuar në seancë private. Kjo dëshmitare e mbrojtur e Prokurorisë, ka dhënë dëshminë e saj më 11 prill, 12 prill, 13 prill dhe më 17 prill.