Kryetari i LDK-së, Lumir Abdixhiku sot në seancën e jashtëzakonshme foli për rritjen e çmimit të naftës dhe prezantimin e rezolutës së kësaj partie për uljen e çmimit, si dhe veprimet që kërkojnë Qeveria t’i marrë, si masa emergjente në këtë situatë.
Me ironi, Abdixhiku iu drejtua kabintetit qeveritare se “mirë keni punu, por nafta 2 euro”.
“Nuk po themi ndalni shtesat për lehona dhe shtesat për femijë, por po themi ndaleni rritjen e çmimeve secilin produkt në Kosovë”, ka thënë Abdixhiku.
Një anije me kontejnerë në pronësi franceze ka kaluar përmes Ngushticës së Hormuzit, në atë që duket të jetë kalimi i parë i njohur i një anijeje të lidhur me Evropën Perëndimore që kur konflikti në Iran ka ndaluar pothuajse të gjithë trafikun në këtë rrugë kyçe detare.
Anija, e emërtuar CMA CGM Kribi, u nis të enjten pasdite nga ujërat pranë Dubait drejt Iranit, duke transmetuar sinjal që tregon pronësinë franceze, sipas të dhënave të ndjekjes së anijeve, shkruan bloomberg.
Ajo udhëtoi pranë bregut iranian, përmes një kanali midis ishujve Qeshm dhe Larak, dhe më pas sinjalizoi se ndodhej pranë Muscatit të Omanit, me burime që konfirmuan se kalimi ishte i suksesshëm.
Kalimet nëpër Ngushticën e Hormuzit kanë rënë ndjeshëm që nga fillimi i sulmeve të Shteteve të Bashkuara dhe Izraelit ndaj Iranit më shumë se një muaj më parë, dhe tani vetëm një numër i vogël anijesh – kryesisht të lidhura me vende që kanë raporte të mira me Teheranin – janë duke kaluar.
Iranit po i jepet rol kontrollues për këtë zonë, duke krijuar edhe sisteme ku kalimet miratohen paraprakisht, dhe disa vende si Pakistani kanë arritur marrëveshje për kalime të anijeve të tyre.
Kalimi i CMA CGM Kribi konsiderohet si zhvillim i rëndësishëm pasi tregon se, edhe në një situatë të tensionuar, anijet tregtare nga Evropa Perëndimore po gjejnë mënyra për të përdorur këtë rrugë detare kritike për tregtinë globale.
Gjatë ditës së sotme u raportua se çmimi i naftës në disa pompa të benzinës ka shkuar në 2.03 euro për litër sot.
Ministrja Mimoza Kusari-Lila nga seanca e jashtëzakonshme që po mbahet pikërisht për çështjen e çmimit të naftës, bëri thirrje që qytetarët të raportojnë operatorët që kanë bërë shkelje të vendimit të Ministrisë.
Ajo tha se sipas marzhës së përcaktuar, nafta sot mund të shihet me çmimin më të lartë 1,83 cent. Kusari-Lila tha se çdo çmim mbi 1,83 cent duhet të raportohet.
“Zyrtarisht sot nafta sipas marzhës së përcaktuar, mund të shitet me çmimin më të lartë 1,83 cent. Kudo që nafta është dy euro ju ftoj ta raportoni menjëherë, një fotografi e thjeshtë kryen punë për të pasë dënimin dhe sanksionin që këta operatorë kanë bërë shkelje të vendimit të Ministrisë”, tha Kusari Lila.
Federata Ndërkombëtare e Futbollit (FIFA) po shqyrton një propozim për të zgjeruar Kupën e Botës në 64 ekipe, duke filluar diskutimet mbi avantazhet dhe disavantazhet e mundshme të këtij veprimi.
Disa zyrtarë, përfshirë presidentin Gianni Infantino, besojnë se një zgjerim i tillë do të rrisë ndjeshëm interesin global për turneun, duke përkthyer kështu një mundësi për festimin e 100-vjetorit të Kupës së parë të Botës.
Megjithatë, disa përfaqësues të FIFA-s kanë ngritur shqetësime në lidhje me një kalendar futbolli tashmë të mbipopulluar, tendosjen fizike të lojtarëve dhe reagimin e mundshëm nga klubet profesionale. Sipas formatit të propozuar, 64 kombet do të ndahen në 16 grupe me nga katër skuadra, ku dy ekipet e para nga secili grup do të avancojnë në fazën eliminatore të fazës së 1/16-tës.
Ky ndryshim i mundshëm vjen pas Kupës së Botës 2026, e cila do të zhvillohet në Meksikë, Shtetet e Bashkuara dhe Kanada dhe do të përfshijë një fushë të zgjeruar prej 48 ekipesh.
Në Gjermani ka përsëri një debat nëse duhet të kufizohen të paktën përkohësisht kufijtë e shpejtësisë në autostrada për të kursyer karburant.
Duke pasur parasysh rritjen e ndjeshme të çmimeve të karburantit, ekonomistja Veronika Grimm është e hapur ndaj futjes së kufizimeve të shpejtësisë. “Nuk do të ishte turp – ndoshta edhe një sinjal i zgjuar për t’i bërë njerëzit të kuptojnë seriozitetin e situatës”, tha për gazetën Rheinische Post një anëtar i Këshillit të Ekspertëve të Zhvillimit Ekonomik të qeverisë gjermane.
Grimm beson se masat e marra deri më tani nuk janë veçanërisht efektive: “Qeveria duhet t’i lërë çmimet të funksionojnë për të ulur kërkesën për energji.” Subvencionet shtetërore të karburantit, kufizimet administrative të çmimeve dhe një taksë mbi fitimet e tepërta të kompanive të naftës janë, sipas mendimit të saj, “rruga e gabuar”, shkruan Deutsche Welle.
Grimm përmendi gjithashtu “vendet në jugun global”. Atje, tha ajo, “po zbatohen masa drastike, të tilla si puna e detyrueshme nga shtëpia dhe kufizimet në përdorimin e automjeteve”. “Sa më shumë shpenzojmë, aq më keq përfundon për ato vende”, shpjegoi Grimm.
Presidenti i të Gjelbërve , Felix Banaszak, kërkoi futjen e një kufizimi të përkohshëm të shpejtësisë. Kjo, siç i tha ai revistës Spiegel, “zvogëlon menjëherë konsumin e karburantit, ul çmimet dhe në solidaritet dhe thjesht ndihmon të gjithë ata që varen nga një makinë për punë”. Kolegia e tij e partisë Ricarda Lang, në gazetën e grupit mediatik Funke, kërkoi të drejtën për të punuar nga shtëpia në mënyrë që të lehtësonte punën e punonjësve.
Agjencia Ndërkombëtare e Energjisë (IEA) ka këshilluar tashmë masa për të ulur konsumin e karburantit në dritën e krizës së naftës të shkaktuar nga sulmi ndaj Iranit. Sipas IEA-s, masa të tilla si më shumë punë nga shtëpia, kufizime shpejtësie dhe kalimi në transportin publik mund të jenë të dobishme.
Kufizimet e shpejtësisë në autostrada janë diskutuar disa herë më parë në Gjermani — duke përmendur mbrojtjen e mjedisit ose sigurinë në trafik. SPD, të Gjelbrit dhe të Majtët janë në favor të kufizimit, ndërsa Unioni, AfD dhe FDP janë kundër tij. Ministri gjerman i Transportit Patrick Schnieder tha së fundmi në stacionin ARD se kufizimi i shpejtësisë “nuk është ndonjë gjë e madhe” në masat shtrënguese: “Në kontekstin e përgjithshëm është mjaft i vogël”, tha politikani i CDU-së. “Ne duhet të propozojmë masa që njerëzit mund t’i pranojnë, që mund t’i përballojnë dhe që janë ekonomikisht të qëndrueshme.”
Gjermania është praktikisht i vetmi vend në të cilin nuk ka kufizim të përgjithshëm shpejtësie në autostrada, domethënë i vetmi me një rrjet autostradash prej mbi 13 mijë kilometrash pa asnjë kufizim të përgjithshëm shpejtësie. Megjithatë, kufizimet e shpejtësisë vendosen në një pjesë të madhe të këtij rrjeti për arsye të tjera, dhe dendësia e trafikut rrallë lejon drejtimin vërtet “të lirë”. /Reporteri.net/
Mbrojtësi i Interit, Alessandro Bastoni, thuhet se ka dhënë dritën jeshile për t’u transferuar te Barcelona gjatë verës.
Gjigantët katalanas e kanë caktuar 26-vjeçarin si një objektiv prioritar për të forcuar mbrojtjen e tyre.
Sipas ekspertit të transferimeve, Matteo Moretto, Barcelona mund të finalizojë nënshkrimin e qendërmbrojtësit italian për rreth 60 milionë euro plus bonuset, me kusht që Bastoni të jetë i gatshëm t’u bashkohet atyre.
Kartoni i kuq i Bastonit gjatë humbjes së Italisë kundër Bosnjës dhe Hercegovinës në finalen e ‘play-off’-it të Kupës së Botës ka rritur më tej kritikat ndaj tij dhe mund ta detyrojë të largohet nga Serie A.
Megjithatë, reprezentuesi italian mbetet një nga mbrojtësit qendrorë më të mirë në Evropë. Stili i tij i lojës përputhet mirë me sistemin e trajnerit të ri të Barcelonës, Hansi Flick.
Në emër të grupit parlamentar të Partisë Demokratike të Kosovës, për çmimet e derivateve të naftës foli deputeti Arben Mustafa, raporton Ekonomia Online.
Mustafa në foltoren e Kuvendit tha se rritja e çmimeve po vjen si pasojë e mosveprimit nga qeveria.
“Po kalojmë në një valë të re të rritjes së çmimeve. Dhe kjo rritje e çmimeve nuk po vjen vetëm nga jashtë, po vjen nga brenda si pasojë e mosveprimit të kësaj qeverie. Dhe kjo nuk është hera e parë. Ngjashëm ka ndodhur në vitin 2022. Edhe atëherë e lat inflacionin të shpërthejë lirshëm, ndërsa qytetarët i latë të vetëm të ballafaqohen me rritjen e çmimeve.
Çmimi i naftës ka rritur rreth 1.80 cent për litër me sa i pashë disa raportime edhe me 2 euro. Për një ndër vendet më të varfra në Evropë, ky çmim i naftës është i papërballueshëm. Por problemi nuk qëndron vetëm te nafta. Kur rritet çmimi i naftës, rritet kostoja e transportit, rritet kostoja e prodhimit, kostoja e furnizimit, dhe si rezultat rriten çmimet e të gjitha produkteve që qytetarët i konsumojnë. Por në këtë rritje zinxhirore, shteti nuk është vetëm spektator, shteti është edhe përfitues. Është përfitues për shkak se nga 1 euro e 80 për një litër naftë që paguan qytetari, rreth 60 cent janë taksa që i merr shteti nga qytetarët. Pra përherë që një qytetar furnizohet me naftë, ai nuk paguan vetëm karburantin, por paguan edhe taksat për buxhetin e shtetit.
Kjo do të thotë se sa më shumë që rritet çmimi i naftës, aq më shumë rriten edhe të hyrat e shtetit. Dhe përderisa familjet detyrohen të reduktojnë shpenzimet bazike, përderisa bizneset përballen me kosto më të larta dhe bujqit hyjnë në sezon me kosto të rënduara financiare, përfituesja e vetme e kësaj rritje të çmimeve është qeveria të cilës i rriten të hyrat buxhetore. Dhe pikërisht këtu qëndron problemi kryesor“, tha Mustafa.
Shef i Grupit Parlamentar të AAK-së, Besnik Tahiri ka kritikuar Qeverinë gjatë seancës të jashtëzakonshme në Kuvend të thirrur për të diskutuar mbi çmimin e naftës.
Ai tha se, ndryshe nga shumë vende të botës që po ndërmarrin masa për të zbutur efektet e krizës globale, Kosova po qëndron pa veprime konkrete.
“Italia ka marrë vendim për pako mbështetëse, Spanja gjithashtu. Kanë marrë veprime edhe vendet e rajonit, Maqedonia e Veriut, Mali i Zi dhe Shqipëria. A mund të dimë vëlla pse ne jo? A jemi ne vendi më i pasur në Evropë që nuk po marrim veprime?” tha Tahiri.
Bashkimi Evropian ka liruar 92 milionë fuçi naftë nga rezervat emergjente për të përballuar rritjen dramatike të çmimeve të energjisë, pas ngushtimit të furnizimeve globale nga lufta në Lindjen e Mesme.
Analistët thonë se kjo naftë mund të zgjasë rreth 5 muaj, duke mbështetur pjesërisht konsumimin e 10.5 milionë fuçive në ditë nga vendet e BE-së, raporton Euronews.
Rezervat strategjike dhe magazinat e vendosura nga vendet anëtare, si Franca, Gjermania dhe Italia, po përdoren gjithashtu për të shmangur mungesat e karburanteve kryesisht për dizel dhe avionë. Ekspertët paralajmërojnë se këto burime janë të kufizuara dhe, nëse konflikti në Lindjen e Mesme zgjat, mungesa e naftës mund të rritet ndjeshëm.
Përveç përdorimit të rezervave ekzistuese, industria evropiane po shqyrton rihapjen e depozitimeve të naftës së papërdorur dhe eksplorime të reja në Detin Mesdhe dhe Detin e Zi, si një “rrjet sigurie” për furnizimet e ardhshme. Ndërkohë, BE-ja po inkurajon qytetarët të reduktojnë përdorimin e makinave dhe të përmirësojnë eficiencën e energjisë në shtëpi dhe ndërtesa.
Real Madridi ka filluar të interesohet në mënyrë serioze për transferimin e mesfushorit argjentinas, Alexis Mac Allister, gjatë verës së ardhshme. Aktualisht pjesë e Liverpool-it, Mac Allister ka shprehur dëshirën e tij për të luajtur në Santiago Bernabeu dhe është duke punuar me agjentin e tij për të mundësuar këtë lëvizje strategjike.
Edhe pse kontrata e tij me Liverpool-in është deri në vitin 2028, mungesa e një rinovimi të mundshëm ka ngritur shqetësime te drejtuesit e Real Madrid-it, të cilët e shohin lojtarin si një përforcim të rëndësishëm për mesfushën e tyre. Pas largimit të Toni Kroos, ekipi madrilen ka vuajtur për të gjetur një organizator loje që mund të diktojë ritmin e ndeshjes, dhe Mac Allister konsiderohet si opsioni ideal për të rikthyer ekuilibrin dhe rrjedhshmërinë në lojën e ekipit. Pavarësisht se nuk po kalon një periudhë të shkëlqyer nën drejtimin e Arne Slot, cilësitë e tij teknike mbeten të padiskutueshme.
Në këtë sezon, Mac Allister ka shënuar pesë gola dhe ka dhënë pesë asistime me Liverpool-in. Me 27 vjet, ai e ndien se është i gatshëm për të udhëhequr mesfushën e Real Madrid-it dhe është i vetëdijshëm se çmimi i tij mund të ulet nëse Liverpool nuk rinovon kontratën me të.
Real Madrid po ndjek një politikë të kujdesshme në lidhje me blerjet, duke vlerësuar transferimet ku çmimi i lojtarit është në përputhje me kohën e mbetur të kontratës. Përveç Mac Allister, emra të tjerë si Enzo Fernandez dhe Vitinha janë gjithashtu në radarin e klubit madrilen, por shpesh dëshira e lojtarit ka ndikim të madh në përfundimin e negociatave. Sigurimi i një organizatori të nivelit të lartë, si Mac Allister, mund të forconte konkurrencën në mesfushën kreative dhe do t’i mundësonte sulmuesve të shfrytëzonin më shumë hapësirat në transicione të shpejta.
Mac Allister ka kërkuar qartë nga agjenti i tij që ëndrra e tij për të luajtur në Spanjë të bëhet realitet, dhe pritet që negociatat me Liverpool-in të bëhen më intensive në javët në vazhdim. Në futbollin modern, dëshirat e lojtarëve kanë një ndikim të madh në ritmin e tregut dhe Real Madridi është i gatshëm të bëjë lëvizjen e duhur për të siguruar një lojtar që mund të kontrollojë lojën për dekadën e ardhshme.