Blog

Së fundi, çmimet e naftës në Kosovë kanë shënuar rritje të vazhdueshme, duke arritur deri në rreth 1.8 euro për litër.

Me një konsum mesatar prej rreth 6 deri në 7 litra për 100 kilometra, një veturë me naftë mund të shpenzojë rreth 10 deri në 12 euro karburante për ta kaluar këtë distancë.

Por, a mund të jetë një veturë elektrike zgjidhja për qytetarët e shqetësuar nga rritja e çmimeve të karburanteve?

Përgjigjja është e thjeshtë për Fidan Hallaqin, pronar i kompanive E-Charge dhe E-Taxi, dhe Zeqir Smajlin, pronar i kompanisë DGI Kosova.

“Sot mund t’ua rekomandojmë qytetarëve në Kosovë të blejnë veturë elektrike, veçanërisht nëse jetojnë ose punojnë në qytetet kryesore dhe kanë qasje në mbushje të rregullt”, thotë Hallaqi për REL-in.

“Infrastruktura aktuale nuk është perfekte, por është e mjaftueshme për përdorim praktik të përditshëm”, shton ai.

E, si ndikon rritja e çmimit të energjisë elektrike në vitet e fundit në Kosovë?

Smajli shpjegon se kostoja e përdorimit të veturave elektrike mbetet dukshëm më e ulët sesa ajo e derivateve.

Veturat elektrike konsumojnë mesatarisht 15 deri në 20 kWh për 100 kilometra.

Kjo përkthehet në kosto dukshëm më të ulët: më pak se 1 euro për 100 kilometra nëse mbushja bëhet në shtëpi gjatë tarifës së ulët, ose deri në 3 apo 4 euro në pika publike.

E-Taxi është një kompani e taksive që operon vetëm me vetura elektrike, ndërsa E-Charge është rrjeti i parë publik i mbushjes për vetura elektrike në Kosovë.

Kurse, kompania e Smajlit, që ka dy vjet që funksionon në treg, bën importimin e këtyre veturave në Kosovë.

Smajli thotë se, në Kosovë, interesimi për vetura elektrike është rritur gradualisht, fillimisht nga bizneset me shpenzime të mëdha për karburante, e më pas edhe nga qytetarët.

“Sidomos në këto periudha të shtrenjtimit të derivateve është rritur edhe më shumë interesimi dhe shitja”, thotë ai.

Shumica e veturave elektrike që janë importuar në vitet e fundit në Kosovë, janë të reja.

Kjo për shkak se, ndryshe nga veturat e reja, ato të përdorura ngarkohen me akcizë shtesë në bazë të vjetërsisë – çka rrit çmimin përfundimtar dhe i bën më pak tërheqëse për importuesit.

Megjithatë, sipas Smajlit, edhe çmimi i blerjes së veturave të reja mbetet pengesë.

Nëse në Kosovë, një veturë elektrike mund të kushtojë rreth 24 deri në 25 mijë euro, në disa vende të tjera të Evropës, si Shqipëria, e njëjta mund të blihet për 19 deri në 20 mijë euro, thotë ai, për shkak të lehtësirave fiskale.

“Dogana dhe TVSH-ja te ne arrijnë diku rreth 28 për qind… dhe qytetarët detyrohen t’i paguajnë ato”, thotë Smajli.

Edhe pse në të kaluarën është diskutuar për heqjen e taksës së regjistrimit për veturat elektrike, aktualisht nuk ka lehtësira konkrete as për import, as për regjistrim.

Këtë e konfirmon për REL-in pronari i një kompanie që merret me regjistrimin e veturave.

Ndërsa, pyetjet drejtuar Ministrisë së Mjedisit dhe Planifikimit Hapësinor lidhur me strategjinë, subvencionet dhe planet për zhvillimin e infrastrukturës për veturat elektrike, kanë mbetur pa përgjigje.

Shumë vende të tjera po stimulojnë qytetarët drejt veturave elektrike për shkak të lidhjes edhe me përfitimet mjedisore.

Veturat elektrike nuk prodhojnë emetime direkte gjatë përdorimit, çka mund të kontribuojë në uljen e ndotjes së ajrit, që në disa qytete të Kosovës tejkalon kufijtë e lejuar, sidomos gjatë dimrit.

Megjithatë, në Kosovë, ku prodhimi i energjisë mbështetet kryesisht në qymyr, efekti i veturave elektrike në reduktimin e ndotjes mbetet i kufizuar.

Të dy bashkëbiseduesit, Hallaqi dhe Smajli, përmendin mungesën e mbështetjes institucionale si një ndër problemet kryesore.

Hallaqi thotë se politikat aktuale nuk janë në favor të veturave elektrike.

“Tranzicioni drejt elektromobilitetit kërkon qasje afatgjatë, stabilitet rregullator dhe koordinim të fortë ndërmjet sektorit publik dhe privat.

Pa këtë, zhvillimi do të ndodhë, por me ritëm më të ngadaltë se potenciali real i tregut”, thotë Hallaqi.

Ai e përmend Shqipërinë si rrëfim suksesi sa u përket politikave favorizuese ndaj veturave elektrike, përdorimi i të cilave ka tejkaluar mesataren e BE-së.

E pikërisht në këtë pikë, thotë ai, Kosova ka pasur ngecje.

Ai shpjegon se veturat me motor me djegie të brendshme nga Bashkimi Evropian mund të përfitojnë lehtësira në import në kuadër të Marrëveshjes së Stabilizim-Asociimit, e cila parasheh heqje graduale të tarifave doganore për produktet me origjinë nga BE-ja.

Megjithatë, veturat elektrike shpesh nuk i gëzojnë këto lehtësira për shkak të rregullave të origjinës, pasi komponentët e tyre prodhohen jashtë BE-së, duke i bërë ato subjekt të tarifës doganore prej rreth 10 për qind.

Në disa raste, edhe për veturat hibride aplikohen norma më të favorshme të akcizës si masë për mbrojtjen e mjedisit, ndërsa veturat plotësisht elektrike nuk trajtohen në të njëjtën mënyrë në kuadër të legjislacionit aktual për akcizën.

Smajli thotë se kjo lidhet me faktin se korniza ligjore dhe udhëzimet administrative përkatëse janë hartuar para se veturat elektrike të ishin të pranishme në tregun vendor, duke lënë boshllëqe në trajtimin e tyre.

Strategjia e Energjisë 2022-2031 parasheh që numri i veturave elektrike në Kosovë të arrijë në rreth 15 mijë deri në vitin 2031.

Por, edhe në këtë skenar, ato do të përbëjnë vetëm një pjesë të vogël të flotës së përgjithshme të automjeteve prej mbi 400 mijë veturash që qarkullonin në vend deri në vitin 2024.

Një tjetër shqetësim i konsumatorëve për përdorim praktik të veturave elektrike mbetet i lidhur ngushtë me infrastrukturën.

Hallaqi thotë se, në Kosovë, edhe zhvillimi i këtij sektori po ecën më ngadalë krahasuar me vendet e rajonit.

Ai tregon se ende ka zona ku mungon qasja në pika të mbushjes, sidomos jashtë qendrave urbane dhe në disa korridore rrugore.

Megjithatë, sipas tij, rreziku për të mbetur pa bateri është i ulët.

“Me disiplinë operative dhe planifikim të duhur, rreziku që një veturë të mbetet pa energji gjatë punës është minimal”, thotë ai.

Kompania e tij operon 32 pika të mbushjes në rajonin e Prishtinës, në aksin Prishtinë-Tiranë dhe në Shqipëri.

“Qasja jonë ka qenë të ndërtojmë një rrjet praktik dhe të përdorshëm për përdoruesit e përditshëm, duke siguruar që mbushja të jetë e disponueshme aty ku ka kërkesë reale”, thotë ai.

Në anën tjetër, Smajli thekson se autonomia e veturave elektrike – pra distanca që mund të përshkojnë pa pasur nevojë për rimbushje – është e mjaftueshme për distancat në Kosovë dhe se infrastruktura nuk duhet të jetë pengesë për qytetarët.

“Për qytetarët e thjeshtë, [vetura elektrike] është zgjedhje jashtëzakonisht e mirë, sepse ka autonomi të mjaftueshme.

Minimumi është rreth 400 km autonomi. Nëse i llogarisim qytetet e Kosovës, qyteti më i largët prej Prishtinës është rreth 100 kilometra”, thotë Smajli.

Ngjashëm vlerëson edhe Hallaqi.

“Në terma praktikë, vendimi për të kaluar në veturë elektrike sot është më shumë çështje zgjedhjeje dhe planifikimi, sesa kufizim teknik”, përfundon ai.

Këshilli i Marrëdhënieve Shqiptaro-Amerikane (AARC) shpreh mbështetjen e tij të plotë dhe të palëkundur për studentët e drejtësisë në Maqedoninë e Veriut, të cilët po protestojnë paqësisht për të drejtën e tyre themelore për t’i nënshtruar Provimit të Jurisprudencës në gjuhën e tyre amtare shqipe.

“Është thellësisht shqetësuese – dhe sinqerisht e papranueshme – që në vitin 2026, studentët detyrohen të dalin në rrugë për të kërkuar atë që nuk është një privilegj, por një e drejtë e garantuar qartë sipas kornizës kushtetuese dhe ligjore të shtetit.

E drejta për përdorimin e gjuhës shqipe në procedurat zyrtare bazohet në Kushtetutën e Maqedonisë së Veriut, të ndryshuar pas Marrëveshjes së Ohrit, si dhe në Ligjin për Përdorimin e Gjuhëve. Këto instrumente ligjore pohojnë në mënyrë eksplicite barazinë e gjuhëve të folura nga të paktën 20% e popullsisë, përfshirë shqipen, në institucionet dhe proceset publike. Mohimi i mundësisë për të dhënë Provimin e Jurisprudencës në gjuhën shqipe jo vetëm që është në kundërshtim me këto dispozita – por është një fyerje e drejtpërdrejtë ndaj tyre.

Kjo çështje u zgjidh një gjeneratë më parë përmes Marrëveshjes së Ohrit, një gur themeli i stabilitetit që i ka mundësuar Maqedonisë së Veriut të evoluojë në një shtet më gjithëpërfshirës, demokratik dhe të respektuar ndërkombëtarisht. Progresi i vendit – kohezioni i tij i brendshëm, trajektorja e tij euroatlantike dhe përafrimi me standardet evropiane – është ndërtuar mbi parimin e barazisë mes qytetarëve të tij. Minimi i këtyre parimeve tani është sa dritëshkurtër, aq edhe i rrezikshëm”, thekson AARC.

Kjo organizatë e njohur lobiste ka përcjell një mesazh shqetësues edhe në adresë të politikës shqiptar në RMV.

“Gjithashtu, duhet të shprehim zhgënjimin tonë të thellë me përfaqësuesit politikë shqiptarë që kanë mbetur absentë, pasivë ose joefektivë për këtë çështje. Detyra e tyre nuk është simbolike – është mbrojtja aktive e të drejtave të votuesve që ata përfaqësojnë. Mbi një çështje aq të qartë, aq themelore dhe aq të bazuar fort në ligj, nuk ka asnjë arsyetim për heshtje apo mosveprim. Ky dështim nuk është thjesht politik; është një braktisje e përgjegjësisë. Në të njëjtën kohë, ne paralajmërojmë të gjitha palët kundër politizimit të kësaj çështjeje. Të drejtat themelore nuk janë monedhë këmbimi, e as nuk duhet t’u nënshtrohen manovrave partiake. Kjo është një çështje e ligjit, barazisë dhe dinjitetit bazë njerëzor – asgjë më shumë dhe asgjë më pak. Për studentët: kauza juaj është e drejtë. Zëri juaj po dëgjohet. Dhe ju nuk jeni vetëm. AARC qëndron me ju”, thekson AARC.(INA)

Këto janë 15 përgjigjet e Valmir Azirit në Pyetësorin R me Resul Sinanin:

Cili është ushqimi që sa herë e ha ta kujton fëmijërinë?

Uhhh. Tërhana.

Çfarë mendon kur e sheh veten në pasqyrë?

Ehhh. Shpesh i them: I miri ti (në kontekst me shaka)… Kur e shohim veten në pasqyrë në kontekst filozofik, asnjëherë nuk e shohim vetveten, pra shohim reflektimin tonë. Dhe si zakonisht, njerëzit të cilët kanë hatërmbetje në veten nuk janë rehat. Sipas filozofisë, ai i cili është rehat me veten (pra në vetmi) e ka arritur nivelin më të lartë të vetëdijes. Dhe unë, si zakonisht, e kam tejkaluar atë fazë të jetës dhe jam rehat me veten, nuk kam ndonjë dialog shumë të rëndë për ta shprehur.

Cila është kafsha nga e cila frikësohesh më së shumti?

Njeriu. Atë çfarë mund të bëjë njeriu për njeriun, nuk e bën kafsha për kafshën. Këtë e kam të sprovuar në jetë.

Pse mendon se vuajnë njerëzit e drejtë?

…Sepse njerëzit e tjerë të drejt nuk bëjnë as lëvizjen më të vogël për ta luftuar errësirën, dhe kjo mjafton që errësira të predominojë dritën.

Po të kishit mundësinë që ta zgjedhni vetëm njërën, cilën: logjikën apo emocionin?

Logjikën. Emocioni është pjesë e veprimit tonë logjik. Mënyra se si i përceptojmë gjërat në kontekst logjik e krijon edhe emocionin.

Cili është vendi ku mendja jote e gjen qetësinë?

Qetësinë e gjej kur jam në male. Rrallë dal, por atje e gjej qetësinë.

Filmi apo Serial?

Film. Tema trajtohet më shpejt, konsumohet më shpejt. Në kohën e tashme nuk kemi shumë mundësi për të ndarë orë të mjaftueshme për të ndjekur serialet… edhe ideja që ndonjëherë serialet, jo çdo herë, i kemi të gjitha episodet në një vend (pra duhet të presim javë), hiqet interesi dhe bie intensiteti.

Aroma e preferuar?

Jorgovani dhe busoleku. Gjyshja, zakonisht, mbillte edhe jorgovanin edhe busolekët, dhe me furkën e vet duke tjerrë leshin, i binte me dorë busolekës që të lëshonte sa më shumë aromë. Gjithë bashqes, aq sa ishte 30-40 metra katrorë, i vinte era jorgovan dhe busolek, dhe ajo më ka mbetur në mendje si erë e preferuar.

Nëse do të duhej patjetër: Udhëtim drejt së ardhmes apo të shkuarës?

Të kaluarën thuhet se nuk e ndryshon as Zoti, kështu që më mirë të pretendojmë diçka të ndryshojmë për të ardhmen. Duke u bazuar që e kaluara më nuk ekziston dhe as e ardhmja në njëfarë forme nuk ekziston, pra është “momenti” ai që e jetojmë dhe marrim veprime të cilat e determinojnë në njëfarë forme të ardhmen. Unë mendoj që duhet të fokusohemi më shumë në të ardhmen, sepse ngelja në të kaluarën ka pasoja shumë të rënda.

Nëse në këtë moment të jetës (që je tani), takon dikë që po ndihet krejtësisht siç po ndihesh TI, çfarë do t’i thoje?

Ka një thënie të Winston Churchill që e kam si motiv jete. Pra, kur ballafaqohem me momente ku të sprovohet (si thonë) edhe besimi, thotë: “Nëse je duke ecur nëpër ferr, vazhdo të ecësh”… Kjo është thënia që ia them çdo njeriut… Ne të cilët kemi fëmijë që përjetojnë sprova, jemi si një lloj komuniteti i heshtur – takohemi, bashkëbisedojmë, i shkruajmë njëri-tjetrit mesazhe për t’i dhënë kurajo. Çdo herë e them këtë: “keep going” (vazhdo).

Qentë apo macet?

Macet. Kam pasur mace edhe të mijat. E shfrytëzoj rastin publikisht të them që nusja është bërë sebep për t’i larguar… Por macet do t’i kisha zgjedhur çdo herë!

Cila është një ves, të cilin do ta hiqje përgjithmonë nga jeta jote?

Naivitetin (hahaha). Ndonjëherë, në disa situata, jam sjellë shumë naiv, por që më ka dalë për mirë. Jo që unë kam qenë ai që e ka sjellë punën deri aty që të më del për mirë, por rrethanat.

Ëndrra më e çuditshme që e ke parë?

Tentoj ëndrrat t’i harroj, pasi që ëndrrat e mia jo çdo herë janë të këndshme. Dihet, truri ripërpunon dhe në momentet e rigjenerimit të vet na sjell ato emocione që ne tentojmë t’i ndrydhim dhe janë ëndrra të përditshme (për tema të përditshme), por nuk kam ndonjë ëndërr specifike që do e kisha ndarë.

Nëse do të dëgjoje vetëm një këngë për gjithë pjesën tjetër të jetës, cila do të ishte ajo këngë?

A bën me i zgjedh dy? (hahaha)… Unë nuk e di ku është ai grup sot… Kam një këngë që e kam dëgjuar në rininë time. Kam qenë udhëheqës emisionesh në rininë time (në vitet e ’90-ta) dhe është grupi 7me7, kënga “Qielli”… Ndërsa, kënga e dytë është “Kashmir” nga Led Zeppelin… është beyond time.

Çfarë jam duke e menduar unë tani?

O si ta heqë qafe Valmirin? (hahaha)

Për ta dëgjuar (shikuar) Pyetësorin R mund të klikoni në linkun e mëposhtëm (duke filluar nga minuta 37:10):

 

Deputeti Besian Mustafa ka reaguar pas takimit të kreut të LDK-së, Lumir Abidixhikut me kryeministrin e Kosovës, Albin Kurti.

Sipas Mutafës, shefi i qeverisë nuk dëshiron të gjejë zgjidhje për president bashkë me Lidhjen Demokratike të Kosovës.

“Albini sapo përsëriti “80-81 vota për President nuk është caku ynë”. Pra, NUK po don me gjetë zgjidhje për president bashkë me LDK-në”, shkruan deputeti.

Mustafa përfundoi postimin duke shkruar: “Veç mos thuani pastaj LDK po na çon në zgjedhje”.

Ndryshe, takimi Kurti-Abdixhiku përfundoi pa ndonjë rezultat konkret.

Policia kufitare e Shqipërisë në Kukës ka finalizuar operacionin policor të koduar “Mënyra”, duke arrestuar dy gra të përfshira në transport të paligjshëm të emigrantëve drejt Kosovës.

31-vjeçarja F. B. u kap në flagrancë në fshatin Morinë, duke transportuar me automjetin e saj shtatë emigrantë të paligjshëm, ndërsa 22-vjeçarja XH. C. shoqëronte automjetin dhe kontrollonte rrugën për të shmangur kontrollet policore.Finalizohet operacioni policor i koduar “Mënyra”.

“Transportonte me automjet 7 emigrantë për kalim të paligjshëm kufiri, vihet në pranga 31-vjeçarja, ka njoftuar Policia e Shtetit shqiptar përmes një postimi në faqen e saj zyrtare në Facebook.

Arrestohet edhe drejtuesja e automjetit shoqërues, që kontrollonte rrugën për shmangien e shërbimeve policore. Sekuestrohen 2 automjete, një sasi euro dhe një sasi parash. Shërbimet e Drejtorisë Vendore të Kufirit dhe Migracionit Kukës, bazuar në informacionet e siguruara në rrugë operative, për një mënyrë të re të tentativave për transportimin e emigrantëve të paligjshëm, me qëllim dhënien ndihmë për kalim të paligjshëm të kufirit, kundrejt fitimit, organizuan dhe finalizuan operacionin policor të koduar “Mënyra”.

Si rezultat i operacionit, u arrestuan shtetaset: F. B., 31 vjeçe, dhe XH. C., 22 vjeçe, banuese në Tiranë.

Shtetasja F. B. u kap në flagrancë nga shërbimet e Policisë kufitare, në fshatin Morinë, duke transportuar me automjetin e saj 7 emigrantë të paligjshëm, të cilëve do t’u ndihmonte të kalonin në mënyrë të paligjshme kufirin me Kosovën, kundrejt fitimit. Ndërsa shtetasja XH. C., me automjetin e saj, e shoqëronte dhe kontrollonte rrugën për të shmangur kontrollet e policisë. Në cilësinë e provës materiale u sekuestruan 2 automjetet, një sasi eurosh dhe një sasi parash të tjera. Materialet iu referuan prokurorisë, për veprime të mëtejshme”, thuhet në njoftimin e policisë.

Partia Demokratike e Kosovës ka reaguar lidhur me ftesat e Kryeministrit Albin Kurti për takime me partitë politike në funksion të zgjedhjes së presidentit të ri.

Nga Zyra e Informimit e PDK-së bëjnë të ditur se kryetari Bedri Hamza i është përgjigjur kryeministrit, duke kërkuar që iniciativa të formalizohet përmes një letre zyrtare, në mënyrë që të trajtohet me seriozitet institucional.

“Kryetari Hamza i ka kthyer përgjigje z. Kurti lidhur me ftesën për takim. Atij i është kërkuar që ta konkretizojë iniciativën e tij të re përmes një letre zyrtare, në mënyrë që të rritet serioziteti në trajtimin e kësaj çështjeje. Pas këtij konkretizimi nga ana e tij, çështja do të shqyrtohet në organet e partisë dhe më pas do të paraqitet qëndrimi përfundimtar i PDK-së”, thuhet në përgjigjen e Zyrës së Informimit të PDK-së.

PDK thekson se çdo zhvillim i mëtejmë lidhur me këtë çështje do të trajtohet në përputhje me procedurat e brendshme partiake, duke lënë të hapur mundësinë për një qëndrim zyrtar pas shqyrtimit në organet drejtuese.

Edhe këtë vit, Kopenhaga është qyteti më i lumtur në botë. Sipas Indeksit të qytetit të lumtur, i hartuar nga institucioni britanik për Cilësinë e Jetës, Kopenhaga përfaqëson më së miri ekuilibrin mes ekonomisë, mjedisit, inovacionin, përfshirjen sociale, lëvizshmërinë, arsimin dhe aksesin në kulturë, shëndet dhe mirëqenie.

Qytetet që arrijnë të përfaqësojnë më së miri këtë ekuilibër, duke u bërë modele të vërteta si kryeqyteti danez, arrijnë të kombinojnë në mënyrë harmonike historinë, inovacionin dhe qëndrueshmërinë, duke promovuar njëkohësisht rritjen kulturore të banorëve të tyre, nivelin e lartë arsimor, fuqizimin e biznesit dhe të ardhura mesatare të larta, duke ruajtur ekuilibrin midis punës dhe jetës private.

“Indeksi nuk është krijuar për të shpallur një ‘qytet më të mirë’ në botë,” theksojnë organizatorët. “Ai identifikon realitetet urbane që dinë të bashkojnë administrim të mirë, qëndrueshmëri dhe cilësi jetese, duke ofruar një vizion më të balancuar të zhvillimit urban.”

Përveç kryeqytetit danez, medaljet e arta u takojnë 50 qyteteve të para që ruajnë standarde të larta dhe të qëndrueshme në gjashtë dimensionet e Indeksit: qytetarët, qeverisja, mjedisi, ekonomia, shëndeti dhe lëvizshmëria.

Në 10-shen kryesore ndodhen nga dy qytete të Danimarkës, Suedisë dhe Zvicrës. Përveç Tokios që zë vendin e pestë, ky grup dominohet nga Helsinki, Gjeneva dhe Uppsala në Suedi, pastaj Trondheim në Norvegji, kryeqyteti zviceran Bern, Malmo, Mynihu, Aarhus (Danimarkë) dhe Zyrihu në vendin e 11-të.

Edicioni i këtij viti përfshin gjithashtu një gjest simbolik solidariteti. Ndërsa renditja formale mbulon 250 qytete, vendi i 251-të i është caktuar Kievit pa pikëzim apo krahasim, si shenjë respekti për përpjekjet e autoriteteve të qytetit ukrainas në rrethana jashtëzakonisht të vështira.

Këngëtarja Dafina Morina ka ndarë në emisionin “LIBERO” një kujtim të fuqishëm nga fëmijëria e saj, duke potencuar historinë e sakrificave dhe fillimeve të vështira.

Ajo kujtoi performancën e saj të parë live para një audience të madhe, ku kishte kënduar këngën “A vritet pafajësia”. Përmes një fotografie që e ruan me shumë vlerë, Dafina tregoi realitetin e asaj kohe, ku kushtet ekonomike ishin tepër të rënda.

“Pantollat i kam pasë pothuajse të grisura…Nëna për mos me m’qu në koncert pa tesha të mira, më ka mbulu me flamur…”, u shpreh Dafina.

Përtej dhimbjes së kujtimit, këngëtarja theksoi edhe anën e bukur të rrugëtimit të saj: suksesin që ka arritur sot, falë sakrificës dhe përkushtimit të prindërve.

Për ta dëgjuar intervistën e plotë të Dafina Morinës, klikoni linkun e mëposhtëm:

Këngëtari Rilind Alimani ka ndarë në emisionin “LIBERO” emocionet e tij pas publikimit të këngës së fundit “Edhe Malet”. Ai tregon se pjesa më e madhe e projektit u financua nga xhepi i tij: “…I kam shti të gjitha paratë që i kisha në xhep, ngela me disa të holla (sa për kafe), por shumicën – komplet në projekt i kisha…”, theksoi ai.

Rilindi tregoi se kënga është krijuar me gjithë shpirt dhe përkushtim bashkë me ekipin e tij, duke përfshirë elemente të ndryshme që e bëjnë unik projektin. Suksesi i papritur i këngës e ka surprizuar edhe vetë artistin: “…Thashë okej do bëhet viral, por jo deri në këtë nivel…”

Kjo këngë tashmë ka kapur zemrat e publikut dhe po rritet me shpejtësi në rrjetet sociale (sidomos në TikTok).

Për ta dëgjuar intervistën e plotë të Rilind Alimanit, klikoni linkun e mëposhtëm: