Blog

Deputeti i LDK-së, Armend Zemaj, ka kërkuar sqarime nga ministri për Punë, Familje dhe Vlerat e Luftës Çlirimtare, Andin Hoti, lidhur me ekspozitën “Masakrat në Kosovë 1998–1999”, për të cilën ai tha se ka përmbajtur pasaktësi si rezultat i interpretimit të gabuar të të dhënave.

Zemaj theksoi rëndësinë e kësaj ekspozite, duke ngritur shqetësime për përmbajtjen e saj dhe përputhshmërinë me të vërtetën historike, ndërsa kërkoi edhe sqarime për financimin dhe shpërndarjen e materialeve të lidhura me të.

“Për rëndësinë e kësaj ekspozite, e cila për pjesët e Ushtrisë Çlirimtare të Kosovës por edhe deklaratat që kanë dalë nga protagonistët e këtyre ngjarjeve nuk rezultojnë me të vërtetën historike. Është një devijim që konsiderohet i qëllimshëm ose i paqëllimshëm, por që duhet të vërtetohet në aspektin institucional edhe kjo pjesë e përgjegjësisë ju takon edhe juve si kategori e re institucionale për mbrojtja e vlerave të luftës çlirimtare. Shohim cili ka qenë financimi i shtetit edhe për këtë ekspozitë ose librat të cilat tash përfolen, ndër librat që ekziston pjesa faktike financimi i Ministrisë së Punëve të Jashtme, ku është shpërndarë, kush i ka shpërndarë, cili ka qenë qëllimi, a ka pasoja nga këto devijime historike të cilat janë të dëmshme, të cilat kanë të bëjnë me ngjarjet tragjike të luftës, ku flitet për masakra, evidentimin e numrit të njerëzve, familjarëve edhe diçka që lidhet që është temë edhe sensitive, por është në fund të fundit është çmimi që ka paguar populli shqiptar për liri dhe pavarësi, sidomos në fundit e fundit”, pyeti ai.

Ministri Andin Hoti tha se është krijuar një perceptim i gabuar publik për përgjegjësinë e ministrisë që ai drejton lidhur me këtë ekspozitë, duke theksuar ndarjen e qartë të kompetencave institucionale në Kosovë.

“Ajo çka ka ndodhë, dy javët e fundit, dhe në veçanti ajo ngjarje në Prishtinë, padasht me hi në debat politik këtu, krijimi i një opinioni publik se qenka ministria që unë udhëheq, pavarësisht emërtimit që e ka, dhe tash po ua shpjegoj pse, ëh, ka një lloj përgjegjësie në raport me atë çka ka ndodhë në ekspozitën në shesh. Më leni me ju tregu që në Republikën e Kosovës mekanizmat, institucionet janë të ndara në fushëveprimtarinë e tyre. Rrjedhimisht, mekanizmi ose institucioni, instituti, që bën përmbledhjen e historisë nuk jam unë, është Instituti i Historisë. Institucioni që bën verifikimin e fakteve është Instituti për Krimet e Luftës, IKKl-ja, që është themelu para dy-tre vjetësh. Ministria e ka për mandat reagimin, mbrojtjen e vlerave, reagimin. Dhe çka kam bo unë është, nuk po thom që jam i pari, e ndër të parët që kam reagu për këto, për ekspozitën çka qe në shesh”, tha ai.

Pas kësaj, deputeti Armend Zemaj reagoi sërish duke kërkuar sqarime shtesë, ndërsa kryetarja e Komisionit, Fatmire Mulhaxha-Kollçaku, e akuzoi atë për politizim të çështjes.

Ndërkohë, ministri Andin Hoti shtoi se iniciatori i ekspozitës, Shkëlzen Gashi, nuk është kryeministri Albin Kurti, por bëhet fjalë për një iniciativë individuale të vetë autorit. /eo

Pas sulmeve me raketa iraniane që goditën Emiratet e Bashkuara Arabe, reputacioni i Dubait si parajsë për elitën botërore ka filluar të zbehet. Super të pasurit tani po shikojnë përsëri nga Evropa, dhe Milano, qendra financiare italiane, është ngritur në krye të listës së destinacioneve më të dëshirueshme, raporton The Guardian.

“Italia ofron kushtet më të mira, taksa të sheshta dhe një cilësi të lartë jetese,” thotë Armand Arton, konsulent që ndihmon multimilionerët dhe miliarderët të zhvendosen përmes programeve të shtetësisë për investitorët.

“Njerëzit që largohen nga Emiratet e Bashkuara Arabe mund ta imagjinojnë lehtësisht veten duke jetuar në Romë ose Milano, qendra të mëdha ndërkombëtare dhe urbane.”

Milano është tashmë shtëpia e disa prej bankierëve, avokatëve dhe investitorëve më të pasur të Evropës, duke e bërë qytetin një destinacion tërheqës për të pasurit që kërkojnë cilësi të lartë jetese dhe përfitime fiskale. Sipas sistemit të taksave me normë të sheshtë të Italisë, banorët e huaj mund të paguajnë 300,000 euro në vit për të gjitha të ardhurat e huaja, një shumë e papërfillshme për multimilionerët dhe miliarderët.

Sot do të varroset Jeton Babaj që dje humbi jetën dje tragjikisht në Llaushë të Skenderajt.

Varrimi i të ndjerit do të bëhet në orën 15:00.

‘’Njoftim Mortor

Ju njoftojmë se Jeton Babaj, i cili ndërroi jetë dje në mënyrë tragjike, varroset sot, më 8 prill 2026, në ora 15:00, në Llaushë, në varrezat e lagjes Babaj.

Ngushëllime familjes’’, thuhet në njoftim.

Ministria e Sportit dhe Rinisë ka nënshkruar memorandume bashkëpunimi me 39 federata sportive për vitin 2026. Ky aktivitet ka shënuar formalizimin e mbështetjes institucionale për zhvillimin e sportit në vend.

Ministri Blerim Gashani ka theksuar se federatat sportive janë partnerë kyç në këtë rrugëtim dhe mbartin rol të pazëvendësueshëm në zhvillimin e sportit.

Ai ka nënvizuar se Ministria do të vazhdojë të jetë në përkrahje të tyre, duke kërkuar standarde të larta profesionalizmi, përkushtimi dhe arritje konkrete në secilin sport.

Sipas tij, përmes këtyre memorandumeve po konkretizohet mbështetja financiare në vlerë prej mbi 6.5 milionë euro, në bazë të kategorizimeve të sporteve. Ai ka shtuar se kjo mbështetje synon të forcojë qeverisjen në sport, të rrisë performancën e sportistëve dhe të promovojë një shoqëri më aktive dhe të shëndetshme.

Gashani ka theksuar gjithashtu rëndësinë e transparencës dhe llogaridhënies, duke vlerësuar se besimi i qytetarëve ndërtohet përmes punës së ndershme dhe raportimit të hapur, si standard i përbashkët për të gjitha federatat.

Komisioni për Buxhet në mbledhjen e sotme ka miratuar projektligjin për shërbimet e pagesave.

Për këtë projektligj në komision raportoi ministri i financave, Hekuran Murati i cili tha se me këtë projektligj ulen kostot e shërbimeve të pagesave bankare.

Murati tha se ky projektligj synon ngritjen e nivelit të sigurisë së shërbimeve të pagesave, nxitjen e konkurrencës dhe inovacionit, përmirësimin e mbrojtjes së përdoruesve të shërbimeve, si dhe uljen e kostove për shërbimet e pagesave të ofruara brenda vendit dhe për transferet ndërkufitare.

“Ky projektligj përafron kornizën ligjore dhe rregullative me direktivat dhe rregulloret e Bashkimit Evropian në fushën e pagesave. Si rezultat, ai ofron mundësinë për përfshirjen e ofruesve të shërbimeve të pagesave (banka dhe jo-banka) në Zonën e Vetme të Pagesave në Euro, e njohur si SEPA (Single Euro Payments Area). Në këtë aspekt, projektligji paraqet bazën kryesore për plotësimin e kritereve për aplikim dhe pranim të vendit tonë në SEPA. Projektligji ofron një kornizë të përshtatshme me specifika teknike për shërbimet e pagesave dhe aktivitetet e ndërlidhura brenda Kosovës, duke u harmonizuar me direktivat përkatëse të BE-së dhe Marrëveshjen e Stabilizim-Asociimit (MSA). Përmes këtij projektligji, synohet transpozimi i plotë i direktivave relevante”, tha Murati

Ndërsa, kryetari i komisionit për buxhet nga radhët e VV-së,, Enver Haliti e pyeti ministrin për impaktin e këtij projektligji.

“Zoti ministër, sapo thatë që do të ulet edhe kostoja e transfereve ndërkombëtare sa i përket bizneseve që bëjnë transfere për pagesa të ndryshme ndërkombëtare. A mund të tregoni edhe njëherë se cili është impakti pas implementimit të këtij projektligji dhe fillimit të procedurave, të operacioneve pas standardizimit në SEPA”, tha Enver Haliti.

E, në përgjigjen e tij ministri Murati, tha se me rastin e integrimit në SEPA, kostot e transfereve do të uleshin nga disa qindra euro (që janë aktualisht për shuma më të mëdha) në vetëm disa euro

“Aktualisht, sipas vlerësimit në një studim që është bërë nga German Economic Team, pra një ekip me ekspertë gjermanë, përllogaritet që bizneset kosovare, por edhe familjet kosovare (përfshirë edhe diasporën), për momentin paguajnë rreth 58 milionë euro më tepër sesa që do të paguanin po të ishim të integruar në SEPA. Përbërja e kësaj kostoje është afërsisht gjysmë për gjysmë: Bizneset paguajnë rreth 28-29 milionë euro më tepër sesa që duhet ndërkaq Familjet dhe amvisëritë: Paguajnë pjesën tjetër të mbetur. Me rastin e integrimit në SEPA, kostot e transfereve do të uleshin nga disa qindra euro (që janë aktualisht për shuma më të mëdha) në vetëm disa euro. Kjo vlen për transferet ndërkombëtare me shtete si Zvicra, Gjermania apo vende të ngjashme që janë në të njëjtin sistem të integruar, por gjithashtu edhe me vendet e rajonit”, tha Murati para komisionit.

Sekretari i Përgjithshëm i NATO-s, Mark Rutte, ka filluar një vizitë të rëndësishme tre-ditore në Uashington mes kërcënimeve të përsëritura nga Presidenti i SHBA-së, Donald Trump, për të tërhequr Shtetet e Bashkuara nga aleanca. Rutte është ngarkuar me detyrën për të bindur Trumpin për rëndësinë e qëndrimit të SHBA-së në NATO, dhe vizita vjen mes tensioneve për shkak të refuzimit të aleatëve evropianë për të mbështetur fushatën ushtarake SHBA-Izrael kundër Iranit, raporton Euronews.

Takimi i Rutte-s me Trump në Shtëpinë e Bardhë është planifikuar për të mërkurën, dhe në të do të marrin pjesë Sekretari i Shtetit Marco Rubio dhe Sekretari i Mbrojtjes, Pete Hegseth. Mbërritja e sekretarit të përgjithshëm vjen pas njoftimit të një armëpushimi me Teheranin të martën, i cili thuhet se përfshin një armëpushim dyjavor dhe rihapjen e Ngushticës së Hormuzit, megjithëse detajet e marrëveshjes mbeten të paqarta.

Gjatë vizitës së tij, Rutte do të zhvillojë gjithashtu bisedime me anëtarë të Kongresit, dhe të enjten, ai do të mbajë një fjalim në Institutin dhe Fondacionin Presidencial Ronald Reagan.

Një temë kryesore diskutimi pritet të jetë zhgënjimi i Washingtonit që aleatët e saj nuk i janë bashkuar SHBA-së dhe Izraelit në një fushatë ushtarake kundër Iranit dhe nuk kanë lejuar përdorimin e hapësirës së tyre ajrore nga avionët amerikanë të përfshirë në konflikt.

Vendimi e ka zemëruar Trumpin, duke e shtyrë atë të kritikojë ashpër qeveritë evropiane dhe të vërë në pikëpyetje vlerën e anëtarësimit të vazhdueshëm të Amerikës në Aleancë. Trump ka shprehur prej kohësh pakënaqësi me atë që ai e sheh si kontribut joproporcional të Amerikës në sigurinë evropiane.

Javën e kaluar, presidenti amerikan tha se do të rishikonte kontributin e Amerikës në NATO, duke e quajtur aleancën pa SHBA-në një “tigër letre”. Komentet e tij u mbështetën nga Sekretari i Shtetit Rubio, i cili njoftoi se SHBA-të do të rivlerësonin marrëdhënien e tyre me aleatët e tyre.

Kryeministri i Kosovës, Albin Kurti, gjatë përurimit të objektit të Administratës Tatimore të Kosovës në Mitrovicën e Veriut, ka deklaruar se institucionet e vendit funksionojnë në shërbim të të gjithë qytetarëve pa dallim.

I pyetur nga gazetarët serbë nëse ka demokraci në Kosovë, Kurti theksoi se qeveria e tij po punon për barazi dhe sundim të ligjit.

“Ne punojmë për të gjithë qytetarët. Unë nuk jam mbi ligjin. Koha para qeverisë sonë nuk ka qenë normale. Nuk them se tani është gjithçka normale, por them se gjithçka po normalizohet. Kjo sepse ligji nuk është ai që e ndan shoqërinë në ata që nuk janë të mbrojtur dhe në ata që askush nuk guxon t’i prek. Mirëpo e bashkon shoqërinë me bashkim dhe barazi. Nuk mund ta jepni asnjë shembull ku organet e pushtetit: policia e Kosovës, e tani edhe administrate tatimore nuk u shërben të gjithëve njëjtë dhe profesionalisht”, tha ai.

Derisa është pyetur edhe nëse vizitën tek kryetari i Mitrovicës në Veri.

“Kësaj radhe nuk e kam takuar, por sigurisht që në rastet tjera do të kemi mundësi të takohemi. Ka qenë një transferim paqësor i pushtetit, që do të thotë se në komunat në veri të Ibrit mund të bëhesh kryetar komune, mund të bëhesh asamblist, mund të bëhesh drejtor, por vetëm nëpërmjet zgjedhjeve në Republikën e Kosovës”, tha ai.