ATV

Blog

  • Konfirmohet rasti i parë i lisë së deleve dhe dhive në Kosovë, AUV vendos masa të rrepta në Ferizaj e Gjilan

    Konfirmohet rasti i parë i lisë së deleve dhe dhive në Kosovë, AUV vendos masa të rrepta në Ferizaj e Gjilan

    Agjencia e Ushqimit dhe Veterinarisë (AUV) ka njoftuar se është konfirmuar rasti i parë i sëmundjes Lija e Deleve/Dhive (Sheeppox/Goatpox) në Kosovë. Rasti është identifikuar në fshatin Sazli, në Komunën e Ferizajt, pas analizave laboratorike të kryera në Laboratorin e Ushqimit dhe Veterinarisë.

    Sipas njoftimit, bëhet fjalë për një sëmundje virale shumë ngjitëse që prek delet dhe dhitë, me pasoja të mëdha ekonomike për fermerët, por që nuk përbën rrezik për shëndetin e njerëzve.

    AUV ka vendosur masa të përgjithshme për kontrollin dhe parandalimin e përhapjes së sëmundjes, të cilat kanë hyrë në fuqi sot. Masat zbatohen aktualisht në rajonin e Ferizajt dhe Gjilanit, por mund të ndryshojnë në varësi të zhvillimeve epidemiologjike.

    Njoftimi i AUV:

    Është konfirmuar rasti i parë i sëmundjes Lija e Deleve/Dhive (Sheep Pox/GoatPox) në Kosovë

    Ministria e Bujqësisë, Pylltarisë dhe Zhvillimit Rural pemës Agjencisë se Ushqimit dhe Veterinarisë (AUV) njofton opinionin publik se është konfirmuar rasti i parë i sëmundjes Lija e Delve/Dhive (Sheep Pox/GoatPox), në fshatin Sazli, Komuna e Ferizajt. Pas hulumtimeve diagnostike në terren dhe zbatimit të masave për kontrollin e sëmundjes, në mostrat e testuar në Laboratori i Ushqimit dhe Veterinarisë është konfirmuar rasti i parë i sëmundjes Lija e Dhenve në një fermë të deleve në këtë fshat.

    Agjencia e Ushqimit dhe Veterinarisë sot me datë 15.04.2026 vendos masat e përgjithshme për kontrollin, parandalimin dhe luftimin e sëmundjes Lija e Deleve/Dhive (Sheep Pox/GoatPox) në Kosovë, Bazuar në Ligjit Nr. 2004/21 për Veterinarinë.

    Masat zbatohen në regjionin e Ferizajt dhe Gjilanit ( varësisht nga situata masat mund të ndryshojnë)

    I. Masat e përgjithshme:

    a) Ndalohet lëvizja e kafshëve Dele, Dhi nga fermat, tregtimi në tregje dhe shitblerja;

    b) Fermat në të cilat konfirmohet prezenca e sëmundjes, vendosen ne masë izolimi/karantine të plot. U ndalohet çdo lëvizje hyrje dalje.

    c) Obligohen fermerët mbajtës të Deleve dhe Dhive, për çdo ndryshim të gjendjes shëndetësore të kafshëve, menjëherë të njoftojnë veterinarin. Praktikat veterinare janë të obliguar të zbatojnë protokollet shëndetësore veterinare për parandalimin dhe luftimin e kësaj sëmundje

    d) Fermerët mbajtës të Deleve, Dhive të aktivizojnë masat e biosigurisë ne fermat e tyre.

    e) Të përcaktohen lokacionet për Groposjen e kafshëve të ngordhura nga Komunat;

    f) AUV vazhdon me hulumtimin epidemiologjik, marrjen e mostrave dhe kryerjen e testimeve laboratorike;

    II. Përjashtimisht nga pika I e këtij vendimi, lejohet lëvizja kafshëve nga fermat e lira nga kjo sëmundje deri në thertore të licencuara, me pëlqimin paraprak të inspektorit veterinar të Agjencisë së Ushqimit dhe Veterinarisë.

    III. Urdhërohen të gjithë menaxheret e tregjeve që nga momenti i hyrjes në fuqi të këtij vendimi të pezullojnë punën për tregtimin e kafshëve të imta Dele Dhi.

    IV. Obligohen, Policia e Kosovës, organet Komunale në koordinim dhe bashkëpunim me AUV-në të bëjnë mbikëqyrjen e zbatimit të masave.

    V. Masat hynë në fuqi sot datë 15.04.2026

    Raportoni në numrin:

    0800 500 95 Pa pagese 24h

    Çfarë është sëmundja Lija e deleve/dhive?

    Lija e dhenve (e njohur edhe si sheeppox/goatpox) është një sëmundje virale shumë ngjitëse që prek delet dhe dhitë. Ajo shkaktohet nga një virus i familjes Capripoxvirus dhe është ndër sëmundjet më të rënda për këto specie, me pasoja të mëdha ekonomike.

    Simptomat?

    • Temperaturë e lartë (40–42°C)

    • Humbje oreksi dhe plogështi

    • Rrjedhje nga hunda dhe sytë

    • Lezione (puçrra, plagë) në lëkurë, sidomos në kokë, veshë, bark dhe rreth organeve gjenitale

    • Vështirësi në frymëmarrje (nëse prek mushkëritë)

    • Në disa raste: diarre dhe dobësim i përgjithshëm

    Si transmetohet?

    • Kontakt i drejtpërdrejtë me kafshë të infektuara

    • Sekrecione (pështymë, rrjedhje nga hunda)

    • Përmes mjedisit të kontaminuar (stallat, mjetet, transporti)

    Kjo sëmundje nuk është zoonotike, që do të thotë: nuk përbën rrezik për shëndetin e njerëzve dhe nuk transmetohet nga kafsha tek njeriu.

  • Tri gjëra që duhet të bëni kur zgjoheni për të ulur tensionin e gjakut

    Tri gjëra që duhet të bëni kur zgjoheni për të ulur tensionin e gjakut

    Pothuajse gjysma e të rriturve kanë tension të lartë të gjakut, por zakonet e vogla në mëngjes mund të ndihmojnë në kontrollin e tij.

    Ekspertët ndanë rekomandimet e tyre për Eating Well mbi atë që mund të bëni menjëherë pasi të zgjoheni për të ulur tensionin e gjakut dhe për të mbrojtur zemrën.

    Zgjohuni me frymëmarrje të ngadaltë

    Përpara se të hapësh sytë ose të çohesh nga shtrati, mund ta përgatitësh sistemin nervor për t’u çlodhur, gjë që do të ndihmojë në uljen e tensionit të gjakut gjatë këtij procesi. Për ta arritur këtë, fillo ditën me disa minuta frymëmarrje të ngadaltë dhe të thellë.

    Ushtrimet e rregullta të frymëmarrjes së thellë ndihmojnë në uljen e aktivitetit të sistemit nervor simpatik, i njohur si përgjigja “lufto ose ik”, e cila luan një rol në shumë raste të hipertensionit. Ato gjithashtu përmirësojnë ndjeshmërinë baroreflekse, ose aftësinë e trupit tuaj për të zbuluar dhe për t’iu përgjigjur ndryshimeve në presionin e gjakut, e cila shpesh dëmtohet tek njerëzit me presion të lartë të gjakut.

    Një përmbledhje e studimeve klinike të vitit 2023 tregoi se praktika e rregullt e frymëmarrjes së ngadaltë dhe të thellë me më pak se 10 frymëmarrje në minutë mund të ndihmojë në uljen e presionit të gjakut sistolik ashtu edhe diastolik tek njerëzit me hipertension.

    Hidratohuni së pari

    Të presësh derisa të kesh etje përpara se të fillosh të pish ujë nuk është strategjia më e mirë kur përpiqesh të ulësh tensionin e gjakut. Ndërsa ritmi cirkadian i trupit tënd bën që tensioni i gjakut të jetë më i lartë që në mëngjes, hidratimi i ulët mund t’i përkeqësojë gjërat.

    Në vend që të marrësh menjëherë kafe, mbaj një gotë me ujë pranë shtratit dhe pije atë ndërsa vazhdon rutinën tënde të mëngjesit.

    Lëvizni ngadalë

    Mund të jetë e vështirë të ngrihesh nga shtrati dhe të veshësh rrobat e palestrës, por edhe një shëtitje e lehtë ose një seancë joge në mëngjes mund të ndihmojë në uljen e tensionit të gjakut. Të qenit aktiv mund të ndihmojë në zgjerimin e enëve të gjakut, duke ulur në mënyrë efektive tensionin e gjakut. Praktika e rregullt e jogës, e pozicioneve, e frymëmarrjes dhe e meditimit mund të ndihmojë në uljen e tensionit të gjakut.

    Ndërkohë që përfshirja e jogës së mëngjesit në rutinën tuaj mund të ofrojë përfitimin më të madh, edhe një seancë e vetme e jogës mund të ndihmojë. Në një studim të vogël, subjektet që bënë një seancë të vetme 30-minutëshe joge përjetuan ulje më të mëdha të rrahjeve të zemrës dhe presionit të gjakut në gjendje pushimi sesa ata në një grup kontrolli, të cilët lexonin në heshtje për të njëjtën sasi kohe.

    Përveç kësaj, rekomandohet të kufizohet marrja e kripës dhe ushqimeve të përpunuara, ndërsa zgjedhja e ushqimeve të freskëta dhe erëzave në vend të kripës kontribuon më tej në shëndet. Rritja e marrjes së kaliumit (nga ushqime të tilla si bananet, perimet dhe peshku) mund të ketë një efekt të fortë mbrojtës sepse ndihmon në rregullimin e presionit të gjakut dhe zbut efektet e kripës.

    Është gjithashtu e rëndësishme të mbani një orar të rregullt gjumi, pasi gjumi i parregullt rrit rrezikun e hipertensionit. Monitorimi i rregullt i tensionit të gjakut dhe regjistrimi i rezultateve mund t’ju ndihmojë të kuptoni më mirë gjendjen tuaj dhe të qëndroni në rrugën e duhur drejt shëndetit.

  • “Njerëz me aktakuza”, Shala përplaset me Hajdarin në Komision: Mos më folni për dinjitet

    “Njerëz me aktakuza”, Shala përplaset me Hajdarin në Komision: Mos më folni për dinjitet

    Deputeti i PDK-së, Ferat Shala është përplasur me kryetaren e Komisionit për Ekonomi, Industri, Ndërmarrësi, Tregti dhe Inovacion, Rozeta Hajdarin.

    Shala tha se në Komision ka njerëz me aktakuza, referuar Hajdarit.

    “Na keni pru njeriun me aktakuzë, sot Kosova është pa rezerva. Mos më folni për dinjitet, në këtë komision ka njerëz me aktakuza e flasin për dinjitet”, u shpreh deputeti, i cili më pas e lëshoi edhe mbledhjen.

    Pak minuta më pas, Hajdari i ktheu përgjigje Shalës, duke i thënë se nuk është gjyqtar e as prokuror për të përcaktuar kush e shkel ligjin.

    “Ti nuk je as gjyqtar e as prokuror dhe nuk mundesh ti me përcaktu se kush e shkel ligjin”, u shpreh ajo.

  • Me Projektligjin e ri për Energjinë, shteti mund të ndërhyjë kur tregtarët abuzojnë me çmimin e energjisë elektrike

    Me Projektligjin e ri për Energjinë, shteti mund të ndërhyjë kur tregtarët abuzojnë me çmimin e energjisë elektrike

    Projektligji i ri për Energjinë, i cili tashmë ka kaluar në qeveri dhe komisione parlamentare, i hapë rrugë ndërhyrjes nga shteti në rast të krizave dhe në rastet kur konstatohet se tregtarët e energjisë kanë abuzuar me çmimin e energjisë elektrike.

    Kjo është një praktikë e re që nuk haset në ligjin aktual për energjinë elektrike. Deri tani, çështja e përcaktimit të çmimit të energjisë elektrike ka qenë në kompetencë ekskluzive të Zyrës së Rregullatorit të Energjisë (ZRrE). Me këtë projektligj kompetencat kalojnë edhe te Ministria e Ekonomisë, e cila mund të ndërhyjë vetëm në raste të caktuara kur vlerësohet se janë shkelur të drejtat e konsumatorëve.

    Nenin 22 i këtij projekligji i jep shtetit kompetenca të drejtpërdrejta për të ndërhyrë në treg, kur interesi publik vihet në rrezik.

    Ky nen rregullon të ashtuquajturin “Obligim i Shërbimit Publik”, duke i lejuar autoritetet që t’u vendosin detyrime kompanive të energjisë për të garantuar furnizim të sigurt, cilësor dhe me çmime të përballueshme.

    Ligji parashikon që në situata të caktuara, si krizat energjetike apo rreziku për furnizim – shteti mund të imponojë masa të jashtëzakonshme.

    Këto masa mund të përfshijnë edhe ndërhyrje në çmimin e energjisë elektrike.

    “Rregullatori ose Ministria në rastet e përcaktuara në paragrafin 11 të këtij neni, në përputhje me kërkesat dhe kushtet e paragrafit 1 të këtij neni mund të vendos obligimin e shërbimit publik drejtpërdrejtë ndaj një ndërmarrjeje të energjisë, jashtë procedurave të rregullta, kur kërkohet ndërhyrje e menjëhershme për mbrojtjen e interesit të përgjithshëm publik, përfshirë edhe masa që lidhen me çmimin e furnizimit me energji elektrike, në përputhje me këtë ligj dhe Ligjin përkatës për Energjinë Elektrike”, thuhet në këtë nen.

    Kjo masë mund të merret gjatë krizës energjetike të shpallur sipas dispozitave të këtij ligji dhe Ligjit përkatës për Energjinë Elektrike, si dhe në çdo situatë që kërkon reagim të menjëhershëm për të parandaluar rrezikimin e sigurisë së furnizimit.

    “Kurdoherë që është e përshtatshme dhe e nevojshme, Rregullatori ose Ministria në rastet e përcaktuara në paragrafin 11 të këtij neni mund të vendosin obligimin e shërbimit publik për një ndërmarrje të energjisë e cila është përzgjedhur si Furnizues i Shërbimit Universal siç përcaktohet në Ligjin përkatës për Energjinë Elektrike”.

    Një tjetër element i rëndësishëm i këtij ligji është garantimi i furnizimit universal. Kjo do të thotë se asnjë konsumator nuk duhet të mbetet pa energji elektrike, edhe nëse nuk është ekonomikisht “fitimprurëse” për kompanitë.

    Përmes këtij mekanizmi, ligji synon të mbrojë veçanërisht kategoritë më të cenueshme – familjet me të ardhura të ulëta dhe komunitetet në zona të largëta.

    Neni 22 kërkon që çdo obligim i vendosur ndaj kompanive të jetë i qartë, transparent dhe jodiskriminues. Kjo synon të parandalojë abuzimet dhe të sigurojë që ndërhyrjet e shtetit të mos favorizojnë operatorë të caktuar në treg.

    Aktualisht, ky projektligj ka kaluar në Komisionin për Ekonomi të Kuvendit dhe pritet të dalë në seancë për miratim nga deputetët.

    Sipas ministres së Ekonomisë, Artane Rizvanolli, ligji synon të rrisë mbrojtjen e konsumatorëve dhe të përafrojë sektorin me standardet e Bashkimit Evropian.

    Rizvanolli tha se projektligji i ri është më i qartë dhe më i detajuar se ai aktual, duke vendosur theks të veçantë te të drejtat e konsumatorëve.

    “Ndryshe nga ligji aktual, që është hartuar në përputhje me pakon e tretë të energjisë dhe vendos vetëm rregullat bazë për organizimin dhe funksionimin e sektorit, ky projektligj i ri, përveç që mbulon çështjet ekzistuese, ka në fokus kryesor të drejtat dhe mbrojtjen e konsumatorit, duke sqaruar më mirë çështje konkrete që janë me shumë interes për qytetarët dhe bizneset. Ky projektligj ka karakter kornizë dhe përcakton parimet dhe strukturën e përgjithshme të sektorit të energjisë, ndërsa rregullimi i detajuar i aktiviteteve specifike zhvillohet përmes ligjeve sektoriale dhe akteve nënligjore të miratuara nga institucionet kompetente. Pra, një nga këto ligje specifike që e përmenda është edhe ai për energjinë elektrike, të cilin do ta pranoni sot si Kuvendi i Republikës së Kosovës. Ky ligj është i hartuar në përputhje me acquis të Bashkimit Evropian dhe transpozon pjesërisht Direktivën për rregullat e përbashkëta për tregun e brendshëm të energjisë elektrike, Rregulloren për tregun e brendshëm të energjisë elektrike dhe Rregulloren BE mbi qeverisjen e Unionit të Energjisë dhe veprimit për klimën”, tha ajo.

    Në anën tjetër, diskutimi për këtë çështje në Komisionin për Ekonomi është shoqëruar me kritika nga deputetët e opozitës, të cilët kanë thënë se projektligji kërkon centralizim të kompetencave dhe cenim të rolit të Zyrës së Rregullatorit të Energjisë (ZRrE)./Buletini Ekonomik

  • I dyshuari për krime lufte në Skenderaj u arrestua në Leposaviq, policia jep detaje

    I dyshuari për krime lufte në Skenderaj u arrestua në Leposaviq, policia jep detaje

    Njësitet policore të DHKL-së kanë arrestuar një person nën dyshimin se në vitin 1999 në bashkëkryerje duke vepruar si pjesëtar i grupeve kriminale ka kryer veprën “Krime lufte kundër popullësisë”.

    Në raportin 24 orësh të Policisë së Kosovës bëhet e ditur se personi dyshohet se në një nga lagjet në Skenderaj ka vrarë, torturuar, rrahur e dëbuar dhjetëra civilë shqiptarë.

    “Njësitet policore të DHKL-së, me datë 14.04.2026 (në Leposaviq) kanë arrestuar të dyshuarin mashkull kosovar, nën dyshimin se në vitin 1999, në bashkëkryerje duke vepruar si pjesëtar i grupeve kriminale ka kryer veprën e cekur, ndaj popullatës civile në një nga lagjet në Skenderaj, duke vrarë, torturuar, rrahur e dëbuar dhjetëra civilë shqiptarë. Me vendim të prokurorit, i dyshuari pas intervistimit është dërguar në mbajtje”, thuhet në raport.

  • Mbrëmje vendimtare në Champions, Real Madrid kërkon përmbysje ndaj Bayernit, Arsenali mbron epërsinë

    Mbrëmje vendimtare në Champions, Real Madrid kërkon përmbysje ndaj Bayernit, Arsenali mbron epërsinë

    Sonte rikthehet magjia e UEFA Champions League, me dy përballje të mëdha që do të vendosin emrat e fundit të gjysmëfinalistëve për sezonin 2025/2026.

    Vëmendja kryesore do të jetë në Allianz Arena, ku Bayern Munich pret Real Madrid në një duel të zjarrtë. “Los Blancos” hyjnë në këtë sfidë me detyrën e vështirë për të përmbysur humbjen 2-1 nga ndeshja e parë në Santiago Bernabéu Stadium. Për madrilenët, kjo sfidë ka marrë përmasa “finaleje”, pasi shpresat për trofe në La Liga dhe Copa del Rey janë zbehur ndjeshëm.

    Në Londër, në Emirates Stadium, Arsenal do të synojë të mbrojë epërsinë minimale 1-0 ndaj Sporting CP. Edhe pse “Topçinjtë” kanë pasur luhatje në Premier League, skuadra e Mikel Arteta mbetet favorite për të prerë biletën e gjysmëfinales.

    Ndërkohë, dy emrat e parë që kanë siguruar një vend në katërshen më të mirë janë Atlético Madrid dhe Paris Saint-Germain, të cilat eliminuan respektivisht FC Barcelona dhe Liverpool FC.

    Të dyja përballjet e sontme pritet të nisin në orën 21:00, duke premtuar spektakël dhe emocione deri në sekondën e fundit.

  • Gjendet pa shenja jete një person në Prishtinë, rasti po hetohet

    Gjendet pa shenja jete një person në Prishtinë, rasti po hetohet

    Një person është gjetur pa shenja jetë në rrugën “Rrahman Dini”, në Prishtinë.

    Sipas raportit 24 orësh të Policisë së Kosovës bëhet e ditur se rasti ka ndodhur pasditen e së martës rreth orës 05:30.

    Tutje bëhet e ditur se me vendim të prokurorit, trupi i pajetë i viktimës është dërguar në IML për obduksion.

    “Viktima mashkull kosovar, është gjetur pa shenja jete. Njësitet policore dhe ekipi mjekësor kanë dalë në vendin e ngjarjes, ku edhe është konstatuar vdekja e viktimës. Me vendim të prokurorit, trupi i pajetë i viktimës është dërguar në IML për obduksion”, thuhet në raport.

  • Punëtorët teknikë në QMF-të e Prishtinës nisin grevë për shkak të vonesës së pagave

    Punëtorët teknikë në QMF-të e Prishtinës nisin grevë për shkak të vonesës së pagave

    Punëtorët teknikë në Qendrat e Mjekësisë Familjare në Prishtinë kanë hyrë sot në grevë, si pasojë e vonesës së pagave.

    Lidhur me këtë situatë, kryetari i Federatës Sindikale të Punëtorëve Teknikë të Sektorit Privat të Kosovës, Jusuf Azemi, ka zhvilluar një takim me drejtorin e Drejtorisë së Shëndetësisë në Komunën e Prishtinës, Izet Sadiku.

    Gjatë takimit, drejtori Sadiku ka deklaruar se përgjegjësia për vonesën e pagave bie mbi kompaninë, duke shtuar se greva do të ishte më e përshtatshme të zhvillohej para objektit të kompanisë dhe jo në QMF.

    Në këtë bisedë kanë qenë të pranishëm edhe punëtorët teknikë që po mbajnë grevën, si dhe përfaqësues të menaxhmentit të Qendrës Kryesore të Mjekësisë Familjare, përfshirë kryeshefen, menaxheren e kontratës dhe kryeinfermieren.

    Punëtorët kanë bërë të ditur se nuk do ta ndërpresin grevën deri në ekzekutimin e pagave në llogaritë e tyre bankare.

  • Hasi në një mjet të pashpërthyer në Drenoc të Malishevës, njësitet e FSK-së e shpërthejnë në mënyrë të sigurt

    Hasi në një mjet të pashpërthyer në Drenoc të Malishevës, njësitet e FSK-së e shpërthejnë në mënyrë të sigurt

    Një person ka raportuar se derisa ishte duke punuar në një mur të vjetër ka hasur në një mjet të dyshuar të pashpërthyer.

    Sipas raportit 24 orësh të Policisë së Kosovës bëhet e ditur se ngjarja ka ndodhur më 10.04.2026 në fshatin Drenoc të Malishevës.

    Tutje bëhet e ditur se njësitet policore kanë siguruar vendin e ngjarjes, ndërsa njësitet e FSK-së për deminim.

    “Fsh. Drenoc, Malishevë 14.04.2026 – 09:30. Ankuesi mashkull kosovar, ka raportuar se derisa ishte duke punuar në një muri të vjetër, ka hasur në një mjet të dyshuar të pashpërthyer. Njësitet policore kanë siguruar vendin e ngjarjes, ndërsa njësitet e FSK-së për deminim, kanë dalë në vendin e ngjarjes dhe kanë bërë shpërthimin e mjetit në mënyrë të kontrolluar dhe të sigurt”, thuhet në raport.

  • Hoti: Projektligji për çmimet tavan i papërmirësueshëm, do të dëmtojë tregun dhe konsumatorin

    Hoti: Projektligji për çmimet tavan i papërmirësueshëm, do të dëmtojë tregun dhe konsumatorin

    Deputeti i LDK-së, Avdullah Hoti ka kritikuar ashpër projektligjin për çmimet tavan, duke thënë se ai është i papërmirësueshëm përmes amendamenteve dhe se në formën aktuale do të sjellë çrregullime në treg.

    Ai thekson se pas analizës së projektligjit, nuk ka hapësirë për përmirësime që do ta bënin atë funksional në kushtet e tregut të lirë.

    “PROJEKTLIGJI PËR ÇMIMET TAVAN ËSHTË I PAPËRMIRËSUESHËM PËRMES AMENDAMENTEVE. Projektligji për çmimet tavan, i cili kaloi në lexim të parë me procedura të shkurtuara, është i papërmirësueshëm. Sot, me shumë kujdes e analizuam këtë projektligj për të parë nëse mund të propozohen amendamente për të evituar çrregullimet në treg që pritet të sjellë ky projektligj nëse hyn në fuqi në formatin aktual të propozuar nga Qeveria”, ka shkruar Hoti.

    Sipas tij, masat e propozuara nuk e arrijnë qëllimin për mbrojtjen e konsumatorit.

    “Vlerësimi i përgjithshëm është se asnjë amendament nuk mund ta sjellë këtë projektligj në linjë me kërkesat dhe parimet për funksionimin e tregut të lirë në kohë të krizave dhe inflacionit, sikurse që po kalojmë tani. Masat e parapara në këtë projektligj nuk do ta mbrojnë konsumatorin. Ato masa do ta dëmtojnë biznesin dhe nuk sigurojnë arritjen e qëllimit për të cilin ndërmerren”, ka deklaruar ai.

    Hoti ka kritikuar edhe mungesën e debatit publik për këtë çështje.

    “Nuk e kuptoj përse nuk organizohen debate publike me oda ekonomike dhe me organizata të tjera për të marrë vlerësimet e tyre. Nuk e kuptoj përse Qeveria nuk e sqaron publikisht si do të arrihet qëllimi i këtij ligji, që është mbrojtja e konsumatorit, përmes masave të parapara në këtë projektligj”, ka shkruar ai.

    Sipas tij, ndërhyrjet në krizë ekonomike duhet të bëhen si në anën e kërkesës ashtu edhe në atë të ofertës.

    “Logjika ekonomike në situata të tilla kërkon që ndërhyrjet të jenë në të dy anët e tregut, në anën e kërkesës dhe të ofertës. Në anën e kërkesës duhet ndërmerren masa për të ruajtur grupet më të ndjeshme të qytetarëve, si: punëtorët që marrin pagën minimale, pensionistët, studentët, familjen në asistencë sociale dhe grupe të tjera të ngjashme”, ka shkruar Hoti.

    Ai ka shtuar se mbështetja sociale duhet të jetë e përshtatur me kohëzgjatjen e krizës.

    “Mbështetja e këtyre grupeve nga buxheti i shtetit mund të jetë e njëhershme nëse kriza është e përkohshme dhe nëse çmimet stabilizohen shpejt. Nëse kriza vazhdon, atëherë mbështetja duhet të jetë e përhershme duke i indeksuar të ardhurat e këtyre grupeve për normën e inflacionit të produkteve të konsumit elementar”, ka theksuar ai.

    Duke folur për anën e ofertës, Hoti ka propozuar ulje të ngarkesave tatimore.

    “Në anën e ofertës duhet të intervenohet në uljen e kostos për bizneset për ofrimin e mallrave në treg. Në këtë aspekt, masë e menjëhershme është ulja e ngarkesave tatimore, siç janë TVSH dhe akciza. Duke qenë se të hyrat buxhetore rriten në kohë inflacioni për shkak të TVSH-së më të lartë që mbledh shteti, është e natyrshme që ulja e normës së TVSH të ketë efekt minimal ose zero në të hyrat buxhetore”, ka deklaruar Hoti.

    Në fund, ai ka kritikuar Qeverinë për mungesë të masave alternative dhe ka përmendur edhe praktika evropiane.

    “Prandaj, mungesa e masave të tilla nga ana e Qeverisë së Kosovës është e pakuptueshme se kujt i shërben. Disa nga këto masa janë ndërmarrë nga vendet evropiane. Shembulli më i fundit ishte Gjermania”, ka shkruar ai.