Blog

Një delegacion i kadetëve nga Qendra për Studime Universitare e Forcës së Sigurisë së Kosovës ka marrë pjesë në Javën Ndërkombëtare të Kadetëve, e cila është zhvilluar në Akademinë Ushtarake në Dresden të Gjermanisë.

Sipas FSK-së, vizita është realizuar në kuadër të bashkëpunimit dypalësh dhe forcimit të marrëdhënieve ushtarake ndërkombëtare.

Në këtë aktivitet morën pjesë udhëheqës të ardhshëm ushtarakë nga vende të ndryshme aleate, ndërsa kadetët e Kosovës patën mundësinë të shkëmbejnë përvoja dhe të njihen me metodat bashkëkohore të trajnimit, doktrinës dhe udhëheqjes ushtarake.

FSK-ja ka bërë të ditur se pjesëmarrja në këtë aktivitet shërben edhe për forcimin e diplomacisë mbrojtëse dhe ndërtimin e bashkëpunimit me partnerët ndërkombëtarë që në fazat e para të karrierës ushtarake.

“Përfaqësimi i dinjitetshëm i kadetëve tanë dëshmon edhe një herë përkushtimin e forcave tona për ngritjen profesionale sipas standardeve më të larta të NATO-s”, thuhet në njoftimin e FSK-së.

Nga FSK-ja kanë përgëzuar kadetët për përfaqësimin e Kosovës në këtë aktivitet ndërkombëtar.

Një gjerdan i rrallë me qindra diamante, që dikur i përkiste Mbretëreshës Nazli të Egjiptit, është vjedhur nga Muzeu i Arteve të Aplikuara në Vjenë.

Bizhuteria, e punuar nga shtëpia e njohur franceze Van Cleef & Arpels, ishte pjesë e një ekspozite që përfshinte më shumë se 300 vepra.

Sipas të dhënave të muzeut, gjerdani përmban 673 diamante me një peshë totale prej mbi 200 karatësh dhe dikur ishte në pronësi të Mbretëreshës Nazli të Egjiptit.

Ajo e kishte mbajtur bizhuterinë në vitin 1939, gjatë dasmës së vajzës së saj, Fauzia, me Mohammad Reza Pahlavin, i cili më vonë u bë Shah i Iranit.

Gjerdani ishte shitur për rreth 4.3 milionë dollarë në një ankand të Sotheby’s në Nju Jork në vitin 2015.

Sipas policisë austriake, dy persona të panjohur kanë hyrë me forcë në vitrinën ku ndodhej bizhuteria, në kohën kur muzeu ishte i hapur, dhe më pas janë larguar me vrap.

Autoritetet kanë publikuar pamje të dy personave të dyshuar, të kapur nga kamerat e sigurisë brenda muzeut.

Nga grabitja nuk është raportuar për persona të lënduar, ndërsa policia po vazhdon hetimet për identifikimin dhe arrestimin e autorëve.

Gjerdani mbetet ende i zhdukur.

Shefi i UNMIK-ut, Peter Due, ka bërë thirrje për veprime urgjente nga institucionet dhe autoritetet përkatëse në Kosovë për t’i dhënë fund dhunës ndaj grave.

Reagimi i tij vjen pas vdekjes së dy grave, të cilat, sipas raportimeve, u vranë nga bashkëshortët e tyre brenda pak ditësh.

Përfaqësuesi Special i Sekretarit të Përgjithshëm dhe Shefi i UNMIK-ut, Peter Due, ka shprehur trishtim të thellë për këto raste, ndërsa familjeve dhe të afërmve të viktimave u ka shprehur ngushëllimet më të thella.

“Këto vdekje tronditëse janë një kujtesë e dhimbshme se dhuna ndaj grave mbetet një çështje serioze dhe urgjente e të drejtave të njeriut. Një dhunë e tillë nuk duhet të tolerohet, normalizohet apo trajtohet kurrë si çështje private”, tha Due.

Ai u ka bërë thirrje institucioneve dhe autoriteteve përkatëse që të sigurojnë hetime të shpejta, të plota dhe të paanshme për rastet, si dhe respektimin e procesit të rregullt ligjor dhe vendosjen e përgjegjësisë së plotë.

Në reagimin e tij, Due ka kërkuar gjithashtu intensifikimin dhe koordinimin e veprimeve për parandalimin e dhunës me bazë gjinore.

Ai ka kërkuar që gratë në rrezik të kenë mbrojtjen e nevojshme, ndërsa të mbijetuarat të kenë qasje në kohë në shërbime mbështetëse, mbrojtje dhe drejtësi.

Misioni i OSBE-së në Kosovë ka reaguar pas vendimit të Këshillit Gjyqësor të Kosovës (KGJK) lidhur me gjyqtarët dhe stafin gjyqësor serb që kishin dhënë dorëheqje në vitin 2022.

Ushtruesja e detyrës së Presidentit, Albulena Haxhiu, njoftoi sot se KGJK-ja i ka liruar nga detyra gjyqtarët serbë që kishin dhënë dorëheqje.

Pas këtij vendimi, OSBE-ja i ka bërë thirrje KGJK-së që pozitat e lira në sistemin gjyqësor të plotësohen sa më shpejt, duke respektuar procedurat transparente, gjithëpërfshirëse dhe të bazuara në meritë.

“Misioni i OSBE-së në Kosovë merr në dijeni vendimin e Këshillit Gjyqësor të Kosovës lidhur me kërkesat e gjyqtarëve dhe stafit gjyqësor serb të Kosovës për të tërhequr dorëheqjet e tyre”, thuhet në reagimin e OSBE-së.

OSBE-ja ka theksuar se plotësimi i pozitave duhet të bëhet në përputhje me kornizën kushtetuese dhe ligjore në fuqi, duke garantuar edhe përfaqësimin e komuniteteve.

“Misioni i bën thirrje KGJK-së që, në mënyrë të shpejtë, t’i plotësojë pozitat e lira përmes procedurave transparente, gjithëpërfshirëse dhe të bazuara në meritë për rekrutim dhe emërim, në përputhje me dispozitat kushtetuese dhe ligjore në fuqi për përfaqësimin e komuniteteve”, thuhet në reagim.

Sipas OSBE-së, përfaqësimi i komuniteteve në sistemin e drejtësisë është i rëndësishëm për garantimin e qasjes së barabartë në drejtësi.

“Një sistem gjyqësor që pasqyron komunitetet të cilave u shërben është thelbësor për të siguruar qasje të barabartë dhe efektive në drejtësi për të gjithë”, përfundon reagimi i Misionit të OSBE-së në Kosovë.

Shtatë persona janë lënduar si pasojë e një aksidenti të trafikut që ka ndodhur sot në fshatin Kijevë, në rrugën Pejë–Prishtinë.

Lajmin e ka konfirmuar zëdhënësi i Policisë për Rajonin e Gjakovës, Sheremet Elezaj, i cili bëri të ditur se në aksident janë përfshirë tri automjete.

“Sot rreth orës 13:10 jemi njoftuar për aksident trafiku në fshatin Kijevë, në rrugën Pejë–Prishtinë. Në aksident janë përfshirë tri automjete, ndërsa, sipas informatave të deritanishme, raportohet se shtatë persona janë dërguar për trajtim mjekësor. Aktualisht gjendja e tyre shëndetësore është jashtë rrezikut për jetë”, ka deklaruar Elezaj.

Sipas tij, në vendin e ngjarjes është angazhuar Njësia Rajonale e Komunikacionit Rrugor, e cila po merret me trajtimin e rastit.