ATV

Blog

  • Vedat Muriqi i fokusuar te Mallorca për të shpëtuar klubin nga rënia i konfirmuar nga menaxheri Utku Cenikli

    Vedat Muriqi i fokusuar te Mallorca për të shpëtuar klubin nga rënia i konfirmuar nga menaxheri Utku Cenikli

    Ylli i Kosovës, Vedat Muriqi, po kërkohet nga disa klube, por aktualisht është i fokusuar te Mallorca, ka konfirmuar menaxheri i tij, Utku Cenikli.

    Qendërsulmuesi po kalon sezonin më të mirë të karrierës, duke shënuar 21 gola në La Liga, ndërsa synon ta ndihmojë Mallorcan të qëndrojë në elitën e futbollit spanjoll. Cenikli, në një intervistë për “AS”, ka konfirmuar interesimin për Muriqin, por ka refuzuar të flasë për detaje të një transferimi të mundshëm.

    “Isha në ndeshjen ndaj Valencias për ta parë Muriqin. E ka vizituar edhe në të kaluarën. Nuk ka zhvillime konkrete për një transferim të mundshëm,” tha Cenikli.

    “Vedati është lojtar i dëshmuar dhe shumë i pëlqyer në Mallorca. Synimi i tij është të përfundojë me sukses ndeshjet e mbetura dhe është besnik ndaj klubit. Ka interesim për të, po kalon një sezon të shkëlqyer, por është plotësisht i fokusuar te Mallorca për momentin,” shtoi ai.

    Në janar, Fenerbahce thuhet se provoi ta transferonte Muriqin, por Mallorca kërkoi 20 milionë euro për ta lënë të lirë. Kujtojmë se Muriqi, i cili pëlqehet edhe nga Barcelona, ka kontratë me Mallorca deri në vitin 2029, me një klauzolë lirimi prej 40 milionë euro.

  • UEFA pezullon Gianluca Prestianni për gjashtë ndeshje pas sjelljes diskriminuese ndaj Vinicius Junior

    UEFA pezullon Gianluca Prestianni për gjashtë ndeshje pas sjelljes diskriminuese ndaj Vinicius Junior

    UEFA ka marrë vendim zyrtar për pezullimin e Gianluca Prestianni, 20-vjeçarit argjentinas, pas sjelljes së dyshuar josportive gjatë ndeshjes së fazës së 1/8-tës së Ligës së Kampionëve midis Benficas dhe Real Madridit.

    Anësori i ri është pezulluar për gjashtë ndeshje në garat e UEFA-s për abuzim diskriminues, përfshirë komente homofobike drejtuar Vinicius Junior.

    Pavarësisht se Prestianni ka mohuar të ketë bërë komente raciste ndaj sulmuesit brazilian, ai do të humbasë të paktën dy ndeshje evropiane, pasi ka vuajtur tashmë një ndeshje nga pezullimi i tij. Tre nga gjashtë ndeshjet mbeten të pezulluara dhe mund të hiqen nëse lojtari shmang ndonjë shkelje të mëtejshme disiplinore gjatë dy viteve të ardhshme.

    Vendimi është marrë nga Organi i Kontrollit, Etikës dhe Disiplinës i UEFA-s, pas vërejtjeve të Vinicius Junior.

  • Ministri Sveçla: Drejtësia për Banjskën s’përfundon këtu

    Ministri Sveçla: Drejtësia për Banjskën s’përfundon këtu

    Ministri i Punëve të Brendshme, Xhelal Sveçla, ka reaguar pas vendimit të gjykatës për rastin e sulmit terrorist në Banjskë, ku dy nga të akuzuarit janë dënuar me burgim të përjetshëm, ndërsa i treti me 30 vite burg.

    Përmes një postimi në Facebook, Sveçla e ka cilësuar këtë vendim si një moment të rëndësishëm për drejtësinë në Republikën e Kosovës, duke theksuar se dënimet maksimale duhet të vlejnë për të gjithë të përfshirët në këtë rast, përfshirë edhe pjesëtarët e një rrjeti më të gjerë prej 45 personash të identifikuar.

    “Sulmi i 24 shtatorit 2023 nuk ishte një akt i izoluar, por një operacion i organizuar me mbështetje shtetërore nga Serbia, me synim cenimin e rendit kushtetues dhe aneksimin e një pjese të territorit të Kosovës”, tha ministri.

    Ai ka theksuar se përballimi i këtij sulmi nga Republika e Kosovës ndali një skenar të rrezikshëm për ndarje, duke shtuar se faktet dhe provat dokumentojnë përfshirjen e drejtpërdrejtë të Serbisë.

    Sveçla ka bërë të ditur gjithashtu se strukturat kriminale dhe paramilitare në veri janë çmontuar dhe se rendi kushtetues është mbrojtur.

    Ai i ka bërë thirrje Serbisë që të mbahet përgjegjëse për rolin e saj politik, financiar dhe logjistik në këtë agresion.

    Ministri ka theksuar se ky vendim nuk mund ta kthejë heroin Afrim Bunjaku, por përbën një hap drejt drejtësisë për sakrificën e tij dhe dhimbjen që mbetet te familja, kolegët dhe qytetarët.

    “Drejtësia për Banjskën nuk përfundon këtu. Ajo përmbyllet vetëm kur të gjithë përgjegjësit të dalin para drejtësisë, me në krye Milan Radoiçiqin”, ka shkruar Sveçla.

  • Deputetët serbë lëshojnë sallën pas vendimit për sulmin terrorist në Banjskë

    Deputetët serbë lëshojnë sallën pas vendimit për sulmin terrorist në Banjskë

    Deputetët serbë kanë lëshuar sallën e Kuvendit të Kosovës gjatë seancës, pasi kryeparlamentarja Albulena Haxhiu mirëpriti dënimet për sulmin terrorist në Banjskë, dhe vendimi u duartrokit nga të gjithë deputetët.

    Gjykata Themelore në Prishtinë sot ka shpallur aktgjykimin ndaj të akuzuarve për sulmin terrorist në Banjskë.

    Pas 2 vjet e 7 muajsh nga sulmi, Vlladimir Tolliq, Bllagoje Spasojeviq janë dënuar me burgim të përjetshëm, kurse Dushan Maksimoviq u dënua me 30 vjet.

    Nga sulmi terrorist i shtatorit të vitit 2023, mbeti i vrarë rreshteri policor 50-vjeçar nga Vushtrria, Afrim Bunjaku, ndërkaq u plagos zyrtari policor Alban Rashiti e u lënduan Çlirim Shaqiri, Mirsad Kryeziu e Sedat Dushi.

  • Prokurori Naim Abazi pas aktgjykimit për Banjskën: Do të kërkojmë arrestimin e të tjerëve përmes Interpolit

    Prokurori Naim Abazi pas aktgjykimit për Banjskën: Do të kërkojmë arrestimin e të tjerëve përmes Interpolit

    Pas shpalljes së aktgjykimit ndaj tre të dënuarve për sulmin terrorist në Banjskë, ka reaguar prokurori special i rastit, Naim Abazi.

    Ai ka deklaruar se aktgjykimi i sotëm jep sinjal të qartë se të gjithë personat e përfshirë në këtë sulm do të marrin dënimin e merituar.

    Sipas Abazit, institucionet e drejtësisë nuk do të ndalen vetëm me këtë vendim, por përmes bashkëpunimit ndërkombëtar dhe Interpolit do të kërkohet arrestimi edhe i pjesëtarëve të tjerë që ndodhen në arrati.

    “Përmes ndihmës ndërkombëtare dhe Interpolit do të kërkojmë arrestimin edhe të pjesëtarëve të tjerë. Të gjithë ata që kanë urdhëruar, financuar dhe koordinuar sulmin do të përgjigjen para organeve të drejtësisë”, ka deklaruar ai.

    Ndryshe, Gjykata Themelore në Prishtinë dënoi me burgim të përjetshëm Bllagoje Spasojeviqin dhe Vlladimir Toliqin, ndërsa Dushan Maksimoviq u dënua me 30 vite burgim për sulmin terrorist të vitit 2023 në Banjskë, ku mbeti i vrarë rreshteri Afrim Bunjaku dhe u plagosën dy zyrtarë policorë.

  • Dushan Maksimoviq i vetmi në sallë kur u shqiptua dënimi për Banjskën

    Dushan Maksimoviq i vetmi në sallë kur u shqiptua dënimi për Banjskën

    Dushan Maksimoviq i cili është dënuar sot me 30 vjet burg për sulmin terrorist në Banjskë ka qenë i vetmi që ka marrë pjesë në seancë ku është shqiptuar dënimi.

    Dy të tjerët, Bllagoje Spasojeviq dhe Vladimir Tollic s’kanë qenë të pranishëm. Të dy janë dënuar me burg të përjetshëm.

  • “Lavdi heroit Afrim Bunjaku”, vendimi për sulmin terrorist në Banjskë pritet më duartrokitje në Kuvend

    “Lavdi heroit Afrim Bunjaku”, vendimi për sulmin terrorist në Banjskë pritet më duartrokitje në Kuvend

    Lajmin për vendimin e Gjykatës Themelore të Prishtinës për dënimin me burgim të përjetshëm ndaj dy të akuzuarve për sulmin terrorist në Banjskë dhe 30 vjet burgim për të akuzuarin e tretë ua dha deputetëve gjatë seancës së sotme kryekuvendarja Albulena Haxhiu.

    Ky lajm u prit me duartrokitje nga deputetët.

    “Më lejoni të përshëndes vendimin e Gjykatës Themelore me burgim të përjetshëm për sulmin terrorist në Banjskë”, tha Haxhiu, e cila shtoi se me këtë vendim s’përmbyllet dënimi për sulmin e shtatorit të 2023-ës.

    “Megjithatë, drejtësia për sulmin në Banjskë nuk përfundon këtu, ajo përmbyllet kur kryeterroristi Milan Radoiçiq transferohet në Republikën e Kosovës së bashku me terroristët tjerë. Lavdi heroit të Kosovës, rreshterit Afrim Bunjaku”.

  • Osmani: Anëtarësimi në Bordin e Paqes, hap i madh për Kosovën

    Osmani: Anëtarësimi në Bordin e Paqes, hap i madh për Kosovën

    Ish-presidentja Vjosa Osmani ka reaguar pasi Kuvendi i Kosovës ratifikoi marrëveshjen për për anëtarësimin e Kosovës në Bordin e Paqes.

    Ajo e cilësoi këtë një hap i madh që forcon subjektivitetin ndërkombëtar dhe e vendos Kosovën aty ku e meriton: krah për krah me Amerikën.

    “Ishin Tomahawk-ët amerikanë që, në vitin 1999, çanë errësirën dhe ndalën makinerinë gjenocidale serbe mbi popullin tonë. Ishte Amerika ajo që qëndroi në anën e drejtësisë, kur ne kishim më shumë nevojë se kurrë për shpresë dhe shpëtim. Dhe është Amerika përsëri sot, ajo që qëndron përkrah nesh. Faleminderit SHBA-ve dhe Presidentit Trump për besimin dhe ftesën që të jemi shtet themelues i Bordit të Paqes”, shkruhet tutje në reagimin e saj.

  • Drejtësia flet për Banjskën: Dy dënime të përjetshme për sulmin terrorist, njëri 30 vjet

    Drejtësia flet për Banjskën: Dy dënime të përjetshme për sulmin terrorist, njëri 30 vjet

    Gjykata Themelore në Prishtinë ka dënuar me burgim të përjetshëm Bllagoje Spasojeviq dhe Vlladimir Tolliq, ndërsa me 30 vite dënoi Dushan Maksimoviq për sulmin terrorist në Banjskë.

    Ata u gjetën fajtorë për sulmin terrorist në Banjskë të Zveçanit më 24 shtator 2023, ku mbeti i vrarë rreshteri i Policisë së Kosovës, Afrim Bunjaku.

    Kundër këtij aktgjykimi është e lejuar ankesa në afat prej 30 ditësh nga dita e marrjes së këtij vendimi në Gjykatën e Apelit në Prishtinë.

    Tre të akuzuarit janë pjesë e një grupi prej 45 individëve, ndaj të cilëve u ngrit aktakuzë rreth një vit pas sulmit në pjesën veriore të Kosovës, duke përfshirë këtu Millan Radoiçiqin, ish-nënkryetar i partisë më të madhe të serbëve në Kosovë, Listës Serbe, i cili në aktakuzë cilësohet si “kreu i grupit terrorist”.

    Gjykata vendosi ta veçonte procedurën penale ndaj Spasojeviqit, Tolliqit dhe Maksimoviqit, të cilët ndodhen në paraburgim nga shtatori i 2023-tës, kurse për 42 të tjerë refuzoi kërkesën e Prokurorisë Speciale të Kosovës për gjykim në mungesë.

    Sipas Prokurorisë, të akuzuarit dyshohet se, përmes përdorimit të dhunës dhe armatimit të rëndë, kishin tentuar ta shkëpusnin pjesën veriore të Kosovës, për t’ia bashkuar Serbisë, me ç’rast ishte vrarë polici Bunjaku, ishte plagosur nga armë zjarri polici tjetër Alban Rashiti, ndërsa ishin lënduar policët Çlirim Sahiti, Mirsad Kryeziu dhe Sedat Dushi, por ishte rrezikuar edhe jeta e policëve të tjerë dhe e popullatës civile.

    Për këto veprime, të njëjtit akuzohen për kryerjen e veprës penale “Veprat e rënda kundër rendit kushtetues dhe sigurisë së Republikës së Kosovës”.

    Ndërkaq, në Serbi nuk ka asnjë aktakuzë të ngritur përkundër thirrjeve nga BE dhe NATO që autorët e sulmit të Banjskës të mbahen përgjegjës.

  • Viza “Gold Card” prej 1 milion dollarësh e Trumpit është marrë vetëm nga një person

    Viza “Gold Card” prej 1 milion dollarësh e Trumpit është marrë vetëm nga një person

    Administrata e presidentit amerikan, Donald Trump ka miratuar deri më tani vetëm një aplikant për programin e ri të vizave “Gold Card”, sipas deklarimeve të Sekretarit të Tregtisë, Howard Lutnick.

    Programi, i nisur në dhjetor, u lejon të huajve të marrin leje qëndrimi në SHBA në këmbim të një “kontributi” prej 1 milion dollarësh për qeverinë amerikane, pas një procesi të rreptë verifikimi.

    Sipas Lutnick, aplikimi për këtë vizë është finalizuar së fundmi në bashkëpunim me Departamentin e Sigurisë Kombëtare, i cili mbikëqyr procesin. Përveç shumës prej 1 milion dollarësh, aplikantët duhet të paguajnë edhe 15 mijë dollarë tarifë për përpunim.

    Ai deklaroi se deri tani është miratuar vetëm një person, ndërsa qindra të tjerë ndodhen në proces shqyrtimi dhe verifikimi, shkruan cbsnews.

    Lutnick theksoi se kontrolli i aplikantëve është jashtëzakonisht i rreptë dhe, sipas tij, më i detajuari në historinë e programeve qeveritare të këtij lloji.

    Trump e ka prezantuar këtë program si një mënyrë për të tërhequr investime të mëdha nga të huajt dhe për të gjeneruar të ardhura për shtetin amerikan, duke u dhënë një rrugë të shpejtë drejt qëndrimit ligjor në SHBA.

    Megjithatë, autoritetet nuk kanë bërë të ditur identitetin e personit të vetëm të miratuar deri tani.

    Sipas zyrtarëve, procesi mbetet ende në fazat e hershme dhe pritet që në të ardhmen të përpunohen më shumë aplikime.