Ish-presidentja, Vjosa Osmani, sot, përmes një video adresimi, ka reaguar pasi Kuvendi ka dështuar të zgjedh presidentin dhe vendi do të shkojë në zgjedhje të reja brenda 45 ditësh. Në videon e publikuar të Osmanit, mbrapa saj në sfond, shihet fotoja e ish-presidentit Ibrahim Rugova.
Lidhur me këtë, ka reaguar Alban Krasniqi nga Vetëvendosje.
‘‘Fotoja e Rugovës në sfond nuk e mbulon tradhëtinë ndaj votuesve dhe mbështetësve’’, ka shkruar ai.
Këshilltarja e kryeministrit në detyrë, Albin Kurti, Fëllënza Podrimja, ka shkruar në “X” për krizën politike në vend dhe shkuarjen në zgjedhje të parakohshme si rezultat i dështimit të zgjedhjes së presidentit.
Pordimja ka thënë “të vërtetën” e saj lidhur me situatën duke fajësuar PDK’në dhe LDK’në dhe sipas saj çfarëdo interpretimi tjetër është i pavërtetë.
“Në zgjedhjet e fundit, LVV, partia e Albin Kurtit fitoi 51.1% të votave dhe kështu qeveria nuk kishte ndërmend të shkonte në zgjedhje të reja. Fatkeqësisht, opozita as nuk donte të propozonte një kandidat për president dhe as të votonte për kandidatin tonë jopartiak. Për më tepër, (13%) LDK refuzoi një marrëveshje politike sipas së cilës do të kishte marrë pozicionin e Zëvendëskryeministrit, Ministrinë e Punëve të Jashtme dhe tre ministri të tjera sipas zgjedhjes së saj. Të gjitha interpretimet e tjera janë mashtruese”, ka shkruar ajo.
Podrimja ka thënë se LDK s’ka propozuar zyrtarisht kandidat dhe se vetëm ka mbajtur nënshkrimet në letër.
“LDK nuk propozoi zyrtarisht një kandidat; ajo thjesht mbajti një letër të nënshkruar nga 15 deputetët e saj para kamerave të medias. Ata nuk e emëruan ish-presidentin Osmani.PDK nga ana e tyre zgjodhi të bojkotonte.Këto zgjedhje të parakohshme janë një dëshmi e pakënaqësisë së thellë që partitë e opozitës kanë ndaj shumicës së njerëzve që votuan për qeverinë tonë reformiste, progresive dhe të ligjit dhe rendit”, ka shkruar ajo.
(1/4)
In the last elections LVV, the party of Albin Kurti won 51.1% of the vote and thus the government had no intention of going into new elections.Unfortunately, the opposition neither wanted to propose a candidate for president nor vote for our non-partisan candidate.
— Fëllanza Podrimja (@FPodrimja) April 29, 2026
Për tri ditë radhazi në Prishtinë po mbahet konferenca e investitorëve amerikan.
Kjo po shihet si një mundësi strategjike për të tërhequr investime të huaja dhe për të përshpejtuar punën në infrastrukturën në kryeqytet, raporton KosovaPress.
Këto investime me theks të veçantë u përmendën për organizimin e Lojërave Mesdhetare 2030.
Para të pranishmëve, përmes një videoje, ka dërguar një mesazh edhe gjenerali Wesley Clark, i cili tha se është krenarë me popullin e Kosovës.
“Ajo që shpresojmë në Kosovë, është një mbështetje e fortë, e fortë nga komuniteti ndërkombëtar për investimet e huaja direkte në Kosovë. Ato janë burimi jetik për të çuar vendin përpara. Ne i kishim në Shtetet e Bashkuara në shekullin e 19-të. Ne nuk do të ishim bërë kurrë fuqia industriale që u bëmë pa investimet franceze, britanike dhe gjermane në hekurin, çelikun dhe hekurudhat amerikane. Në Kosovë do të jetë ndryshe. Ju keni burime të jashtëzakonshme të linjitit me cilësi të ulët, por shumë të vlefshëm. Ato po digjen aktualisht, por shumë gjëra mund të bëhen me to. Keni një komunitet të mrekullueshëm bujqësor. Keni ekologji të shkëlqyer. Keni male, qendra skijimi. Ka një potencial të mrekullueshëm për investime të huaja direkte në të gjitha këto fusha. Dhe sigurisht, ne kemi nevojë për reziliencë në të gjithë infrastrukturën. Është e vetëkuptueshme që nuk e di kurrë se çfarë do të ndodhë në botë. Prandaj kur flasim për energji elektrike, ujësjellës komunal, furnizime energjetike në përgjithësi, rezilienca është një mundësi e madhe investimi për Kosovën”, ka thënë ai.
Tutje, gjenerali Clark pati edhe një mesazh për qeverinë.
“Dua gjithashtu të them se mendoj që qeveria ka një rol të madh për të luajtur, së pari në krijimin e një ambienti të mirë këtu, duke mirëpritur investitorët, duke ofruar mbështetje qeveritare, dhe gjithashtu aftësinë për të bërë partneritete publiko-private. Pra, të gjitha këto duhet të jenë në tryezë këtë mëngjes. Jam shumë krenar për popullin e Kosovës. Ju keni përballuar shumë gjatë viteve 1980 dhe 1990. Ju e keni fituar lirinë dhe shtetësinë tuaj. Dhe kam qenë shumë i kënaqur ta shoh këtë, shumë krenar që jam kthyer dhe të jem i lidhur me shumë prej jush”, tha ai.
U nënshkrua këtë të mërkurë marrëveshja mes shoqërisë italiane Ficantieri, një nga kompanitë më të mëdha të ekselencës në Evropë dhe kompanisë KAYO, për të prodhuar në Shqipëri, në kantierin e Pashalimanit anije lundruese në dobi të ushtrisë shqiptare, por dhe të vendeve aleate.
Drejtori i KAYO, Ardi Veliu, në fjalën e tij tha se kjo marrëveshje do të ndihmojë në modernimzimin e ushtrisë shqiptare, shkruan A2 CNN.
Ndërsa ministri i Mbrojtjes, Ermal Nufi, u shpreh se falë këtij bashkëpunimi do të përfitojë ushtria por edhe ekonomia shqiptare. “Është një vlerë e shtuar jo vetëm për Shqipërinë, por edhe për eksportin. Nga ky bashkëpunim ka disa vlera strategjike. Shqipëria bëhet një bazë e re evropiane e Ficantieri për anijet e vogla dhe të mesme”, tha ai.
“Rreth 400 persona do të punësohen në këtë kantier të ri. Është një kantier i fjalës së fundit të teknologjisë që do të zhvillohet në Vlorë. Jam i bindur që kjo shoqëri e re që do të krijohet do të jetë krenari për ne”.
Nga lulet e bukura deri te kokrrat që tërheqin fëmijët dhe kafshët shtëpiake, disa bimë dekorative mund të jenë seriozisht helmuese
Në shikim të parë, gjithçka duket si nga revistat. Një kopsht i rregulluar, lule shumëngjyrëshe, aroma që përhapen nëpër hapësirë. Megjithatë, pas kësaj pamjeje shpesh fshihet diçka për të cilën rrallë mendohet. Disa nga bimët më të bukura, të cilat njerëzit me vetëdije i sjellin në oborr, mund të jenë seriozisht helmuese.
Problemi është se rreziku nuk duket si rrezik. Përkundrazi, duket tërheqës. Ngjyra të ndezura, kokrra të vogla, lule të buta. Pikërisht ato që më së shumti i tërheqin fëmijët, por edhe kafshët shtëpiake, të cilat instinktivisht e eksplorojnë hapësirën.
Bimët që duken të padëmshme, por nuk janë
Shumë prej këtyre bimëve njerëzit i blejnë sepse janë dekorative, pa qenë të vetëdijshëm se çfarë po fusin në hapësirën e tyre. Disa prej tyre madje ngjajnë me bimë të ngrënshme, gjë që e shton edhe më shumë rrezikun.
Mezereoni (Daphne mezereum), për shembull, lulëzon herët dhe duket si zbukurim ideal. Më vonë zhvillon kokrra të kuqe, të cilat lehtë mund të mashtrojnë, sepse ngjajnë me rrush pa fara. Problemi është se edhe një sasi e vogël mund të shkaktojë pasoja serioze.
Chrocusi vjeshtor (Colchicum autumnale) është një tjetër shembull i bimës që lehtë mund të mashtrojë. Në pranverë ngjan me hudhrën e egër, ndërsa në vjeshtë lulëzon si shafrani. Pikërisht kjo ngjashmëri çon te gabimet më të rrezikshme.
Shiu i artë (Laburnum anagyroides), me lule të verdha, zakonisht në tufa të varura, të gjata, shumë dekorative, shpesh është ndër zgjedhjet e para për shkak të luleve të verdha tërheqëse. Megjithatë, bishtajat e tij ngjajnë me bizele ose fasule, gjë që është veçanërisht e rrezikshme në familjet me fëmijë.
Rreziku që shpesh është fare pranë
Tisi evropian (Taxus baccata) është një nga bimët më të zakonshme në oborre dhe parqe, por pak kush e di se pothuajse e gjithë bima është helmuese. I vetmi pjesë që nuk është e rrezikshme është mbështjellësi i kuq i frutit, ndërsa fara, gjilpërat dhe lëvorja mund të jenë shumë të dëmshme, sidomos për kafshët.
Zambaku i luginës (Convallaria majalis), që shpesh lidhet me pranverën dhe me simbolikën e butësisë, po ashtu mbart rrezik. Gjethet e tij lehtë mund të ngatërrohen me hudhrën e egër, ndërsa më vonë zhvillon kokrra që fëmijëve mund t’u duken si diçka që mund ta provojnë.
Çfarë duhet shmangur në oborr
Nëse keni fëmijë të vegjël ose kafshë shtëpiake, ka bimë që kërkojnë kujdes shtesë ose që është më mirë të shmangen plotësisht. Në mesin e tyre janë mezereoni, chrocusi vjeshtor, shiu i artë, tisi, zambaku i luginës, por edhe helmarina, kukuta, ricini dhe lloje të tjera që përmbajnë toksina të fuqishme.
Thelbi nuk është që kopshti të jetë i zbrazët ose steril, por të jetë i sigurt. Bukuria e hapësirës nuk duhet të vijë me çmimin e rrezikut. Mjafton pak informim para blerjes dhe vetëdija se ajo që duket më e bukur, ndonjëherë mund ta fshehë edhe rrezikun më të madh.
Policia e Kosovës ka njoftuar se janë sulmuar me sprej dy person në Obiliq.
Në raportin policor bëhet e ditur se rasti ka ndodhur të martën, në ora 19:25.
“Dy viktimat meshkuj kosovarë kanë raportuar se janë sulmuar me sprej nga dy të dyshuar meshkuj kosovarë si dhe janë dëmtuar me thikë gomat e veturës së tyre”, thuhet në raport.
Viktimat kanë marrë tretman mjekësor, ndërsa të dyshuarit gjenden në kërkim policor.
Rreth një në katër të rinj në Kosovë nuk janë të punësuar, nuk ndjekin arsim dhe as nuk janë të përfshirë në trajnime profesionale. Kështu thuhet në studimin e organizatës Demokracia për Zhvillim (D4D) mbi Indeksin e Pjesëmarrjes së të Rinjve, raporton EO.
Drejtoresha ekzekutive në Demokracia për Zhvillim (D4D), Rezarta Krasniqi shpjegoi mënyrën e realizimit të këtij hulumtimi.
Ajo, tha se është hera e dytë që Kosova vendoset si pjesë e këtij indeksi.
“Për të realizuar sa më mirë hulumtimin, ne kemi organizuar edhe takime validuese me profesorë dhe ekspertë të ndryshëm në këtë drejtim. Andaj është hera e dytë që Kosova vendoset pjesë e indeksit të pjesëmarrjes së të rinjve, ku nga 25 indikatorë të cilët janë indikatorë rajonalë dhe bëhet një matje e institucioneve të ndryshme me këto të dhëna, kemi arritur që si Kosovë t’i mbledhim 21 indikatorë që janë të dhëna mjaft solide në këtë drejtim dhe na tregojnë shumë mirë se cilat janë sfidat e të rinjve për t’u orientuar në politika publike dhe si të jemi mjaft të informuar në këtë drejtim. Paralelisht kësaj kemi punuar dhe kontribuar edhe në hulumtimin rajonal të të rinjve në këtë drejtim që të kemi të dhëna të krahasueshme. Pra, përveç që kemi mbledhur të dhëna të vendit ku synojmë të nxisim politikat publike, kemi mbledhur të dhëna që të krahasojmë se ku qëndrojmë edhe me rajonin në këtë drejtim. Andaj kjo ka kontribuar mjaft shumë në transparencën, krahasueshmërinë edhe të tregojmë mjaft mirë bashkëpunimin rajonal të organizatave, mirëpo edhe të rinjve në këtë drejtim.
Një element shumë i rëndësishëm i gjithë këtij procesi ka qenë përfshirja e akterëve të ndryshëm në këtë drejtim apo palët e interesit dhe gjithashtu ka qenë çështje kritike niveli i lartë i të rinjve në NEET (të rinjtë që nuk janë në punë, arsim apo trajnim). Gjithashtu kemi hapur një thirrje ku kemi mbështetur 5 organizata në këtë drejtim për të forcuar ekosistemin e shoqërisë civile dhe për të rritur besueshmërinë në nivel lokal në këtë drejtim. Mirëpo për t’u përzgjedhur 5 organizata që kemi mbështetur, kemi pasur një thirrje dhe një vullnet mjaft të madh të shumë organizatave ku kemi pasur deri 31 aplikime në këtë fushë, që tregon një interesim mjaft të lartë të organizatave që të punojnë me të rinjtë në nivel lokal dhe kemi parë që të rinjtë ende kanë interesim mjaft të lartë që të merren me aktivitete jashtë sistemit kurrikular që tashmë e kanë”, tha Krasniqi.
Zëvendësshef i Bashkëpunimit nga Zyra e Bashkimit Evropian në Kosovë, Alessandro Bianciardi foli për rëndësinë e pjesëmarrjes së të rinjve, duke shtuar se të rinjtë janë ende të nën-përfaqësuar në jetën politike dhe shpesh përballen me pengesa në qasjen në arsim cilësor dhe punësim.
“Jam këtu sot për të reflektuar mbi një çështje që është thelbësore për të ardhmen e Evropës, e cila është pjesëmarrja e të rinjve. Në të gjithë kontinentin, përpjekjet për të fuqizuar të rinjtë udhëhiqen nga Strategjia e BE-së për Rininë 2019–2027, e cila promovon angazhimin, lidhjen dhe fuqizimin brenda Bashkimit Evropian dhe në rajonet partnere. Kjo është veçanërisht e rëndësishme në Kosovë, që është shtëpia e një prej popullsive më të reja në Evropë. Ky realitet demografik mbart premtime të mëdha, por gjithashtu nxjerr në pah pengesat që ende kufizojnë aftësinë e shumë të rinjve për të marrë pjesë plotësisht në shoqëri. Gjetjet e fundit nga Indeksi i Pjesëmarrjes së të Rinjve tregojnë një tablo të përzier. Ndërsa është bërë njëfarë përparimi, pjesëmarrja mbetet e pabarabartë. Të rinjtë janë ende të nën-përfaqësuar në jetën politike dhe shpesh përballen me pengesa në qasjen në arsim cilësor dhe punësim. Të kombinuara me rrezikun e vazhdueshëm të varfërisë, këta faktorë kufizojnë ndjeshëm aftësinë e tyre për t’u angazhuar dhe për të kontribuar. Përjashtimi ekonomik është një pjesë e madhe e kësaj realiteti. Nivelet e larta të papunësisë tek të rinjtë dhe numri i atyre që nuk janë në punësim, arsim apo trajnim vazhdojnë të ngushtojnë mundësitë e disponueshme për ta”, tha ai.
Zëvendësministri i Ministrisë së Sportit dhe Rinisë, Sylejman Elshani tha se indeksi përbën pasqyrë për nivelin e përfshirjes së të rinjve në fusha të ndryshme.
“Indeksi i pjesëmarrjes së të rinjve përbën një instrument të rëndësishëm analitik, i cili përmes një metodologjie të standardizuar dhe indikatorëve të qartë, ofron një pasqyrë të thellë mbi nivelin e përfshirjes së të rinjve në dimensionin politik, ekonomik dhe social. Ky indeks shërben si një bazë e fuqishme për vlerësimin e progresit, identifikimin e sfidave dhe orientimin e politikave drejt nevojave reale të të rinjve. Të dhënat dhe të gjeturat e prezantuara sot janë thelbësore për të kuptuar më mirë pozitën e të rinjve në shoqërinë tonë dhe për të ndërmarrë politika të gjithëpërfshirëse, të qëndrueshme dhe efektive. Në këtë drejtim, bashkëpunimi ndërmjet institucioneve, organizatave të shoqërisë civile dhe partnerëve ndërkombëtarë mbetet kyç për avancimin e agjendës rinore”, tha ai.
Gjykimi që përball dy themeluesit e OpenAI, Elon Musk dhe Sam Altman ka filluar në Kaliforni, me palët që paraqesin rrëfime të kundërta rreth historisë së kompanisë dhe detyrimeve ndaj konsumatorëve.
Në gjyq pritet të dëshmojnë jo vetëm Musk dhe Altman, por edhe emra të tjerë të mëdhenj të teknologjisë, e mes tyre edhe shqiptarja Mira Murati, ish-drejtoreshë e Teknologjisë e OpenAI.
Në dokumentin me listën e dëshmitarëve, të lëshuar nga Gjykata e Distriktit Verior të Kalifornisë, thuhet se Murati do të dëshmojë lidhur me aktivitetet fitimprurëse të OpenAI dhe marrëdhënien e me Microsoft.
Te pjesa mbi përmbajtjen thelbësore të dëshmisë thuhet se Murati, në cilësinë e ish-zyrtares do të dëshmojë për strukturën dhe funksionimin korporativ të OpenAI, përfshirë vendimin për të filluar komercializimin e modeleve të saj.
Ajo gjithashtu do të japë dëshmi për bashkëpunimin ndërmjet OpenAI dhe Microsoft, si dhe për mungesën e dijenisë nga ana e Microsoft lidhur me detyrimet e pretenduara ndaj Musk dhe çdo shkelje të mundshme të këtyre detyrimeve.
Për më tepër, Murati do të deklarohet edhe mbi mbështetjen e Microsoft ndaj OpenAI gjatë shkarkimit të Altman në nëntor 2023 dhe riemërimit të pasuesit të tij.
Kujtojmë se Murati dha dorëheqjen në shtator 2024.
Gjashtë muaj më pas, ajo prezantoi Thinking Machines Lab, një startup inovativ të dedikuar për zhvillimin e inteligjencës artificiale.
Agjencia e Statistikave të Kosovës ka publikuar Indeksin e Çmimeve të Prodhimeve dhe Çmimet në Bujqësi duke treguar një rritje të përgjithshme të çmimeve krahasuar me të njëjtën periudhë të vitit
Çmimet e prodhimeve bujqësore në Kosovë janë rritur krahasuar me vitin e kaluar.
Sipas të dhënave të fundit, gjatë tremujorit të parë të vitit 2026, indeksi i përgjithshëm i çmimeve ka shënuar rritje prej 5.8 për qind në raport me të njëjtën periudhë të vitit 2025.
Rritja më e madhe është vërejtur te prodhimet bimore, të cilat janë shtrenjtuar për 7.0 për qind. Në këtë kategori përfshihen drithërat, perimet, patatet, pemët dhe bimët foragjere.
Ndërkohë, edhe prodhimet blegtorale kanë shënuar ngritje të çmimeve për 4.9 për qind. Në këtë grup hyjnë kafshët për treg, si gjedhet, delet, derrat dhe pulat, si dhe produktet si qumështi, vezët dhe mjalti.
“Në kuadër të prodhimeve bimore, çmimet janë grumbulluar për këto grupe: drithëra, bimë foragjere, perime, patate dhe pemë. Në prodhimet blegtorale çmimet janë grumbulluar për blegtorinë dhe prodhimet blegtorale. Në kuadër të blegtorisë, çmimet grumbullohen për katër kategori të kafshëve: gjedhe, dele, derra dhe pula. Këto çmime janë bazuar në peshën e gjallë të kafshëve. Në kuadër të prodhimeve blegtorale çmimet janë grumbulluar për: qumësht, vezë dhe mjaltë. Të gjitha çmimet janë llogaritur në Euro, kurse njësitë matëse janë në: kg, litër dhe copë”.
Rritja e çmimeve tregon se sektori i bujqësisë po përballet me kosto më të larta të prodhimit dhe lëvizje të vazhdueshme në treg, çka pritet të reflektohet edhe te konsumatorët.
Dy persona kanë vdekur pasi një aeroplan i vogël u rrëzua në një hangar në një aeroport në Australinë Jugore, thonë autoritetet.
Avioni shpërtheu në flakë në aeroportin Parafield në Adelaide pasi u rrëzua të mërkurën pasdite sipas orës lokale, shkruan BBC.
Kryeministri i Australisë Jugore, Peter Malinauskas, shkroi në mediat sociale se disa persona të tjerë janë plagosur.