ATV

Blog

  • Zelensky dënon sulmin “barbar” rus ndaj muzeut ukrainas

    Zelensky dënon sulmin “barbar” rus ndaj muzeut ukrainas

    Presidenti ukrainas, Volodymyr Zelensky, tha më 25 prill se Rusia po tenton të fshijë historinë dhe kulturën e Ukrainës, pas një sulmi ajror në një muze, ku u vra një punëtor dhe u plagosën dhjetë të tjerë.

    Zelensky tha se një sulm ajror rus goditi muzeun e historisë në Kupiansk, qytet që gjendet pranë vijës së frontit në verilindje të Ukrainës.

    “Ka ende persona që janë nën rrënoja”, tha Zelensky përmes një postimi në Telegram. Ai postoi edhe një video ku shiheshin persona me uniformë ushtarake duke kërkuar për të mbijetuar nën rrënojat e muzeut pjesërisht të shkatërruar.

    Rusia “po vret ukrainasit me metoda absolutisht barbare”, tha Zelensky.

    Lideri ukrainas akuzoi Moskën se “po bën gjithçka për të na shkatërruar tërësisht, për të shkatërruar historinë tonë, kulturën tonë dhe njerëzit tanë”.

    Shtatorin e vitit të kaluar, forcat ukrainase rimorën kontrollin e Kupianskut, një qendër e rëndësishme hekurudhore në verilindje të Ukrainës.

    Në fillim të marsit të këtij viti, autoritetet ukrainase urdhëruan banorët e këtij qyteti që të evakuoheshin, pas rritjes së frikës se Rusia mund të tentojë sërish të marrë kontrollin e Kupianskut./REL/

  • Reagon KMDLNJ: Qytetarët janë plaçkitur nga ZRrE përmes fryrjes së faturave, kërkojmë kompensimin e tyre

    Reagon KMDLNJ: Qytetarët janë plaçkitur nga ZRrE përmes fryrjes së faturave, kërkojmë kompensimin e tyre

    Këshilli për Mbrojtjen e të Drejtave dhe Lirive të Njeriut (KMDLNJ) ka reaguar pasi Gjykata Supreme e Kosovës ka refuzuar kërkesën e Zyrës së Rregullatorit për Energji (ZRRE) për faturimin e rrymës të qytetarëve të Kosovës për katër komunat veriore të vendit.

    KMDLNJ përmes një reagimi për media kanë thënë se qytetarët e vendit janë plaçkitur nga ZRrE përmes fryrjes së faturave për t’ua paguar rrymën serbëve në veri të Kosovës.

    Sipas tyre, ende po tregohet forma e kompensimit të qytetarëve, në ndërkohë siç thonë nga KMDLNJ  që ZRrE do të shfrytëzojë të drejtën e ankimimit.

    Tutje në reagim nga KMDLNJ thonë se qytetarët në asnjë mënyrë nuk duhet të pranojnë kompensimin nëse ky kompensim ndodh përmes “uljes“ së vlerës së faturave, pasi siç thonë ata qytetarët nuk do të përfitojnë asgjë nga ky kompensim.

    Qytetarët po ashtu sipas KMDLNJ-së duhet të paraqesin kallëzim penal për ZRrE-në për të gjitha faturat e fryra.

    “Krahas kërkesës për kompensim i cili do të jetë në baza individuale, të gjithë ata që do të kërkonin kompensim, kësaj kërkese duhet t’i bashkangjesin edhe një kallëzim penal në mënyrë që ZRrE të mos kalojë pa pasoja ligjore shkaku se e bëri një veprim, fryrje të faturave për rrymën e pashpenzuar që përbënë të gjitha elementet e veprës penale”, thuhet në reagim.

  • ​BB: Rritja ekonomike për vitin 2023 pritet të jetë 3.7 për qind

    ​BB: Rritja ekonomike për vitin 2023 pritet të jetë 3.7 për qind

    Ekonomia e Kosovës dhe rajonit është rritur duke tejkaluar nivelet e tyre para pandemisë, pavarësisht pasojave nga pushtimi rus i Ukrainës, rritjes së çmimeve të energjisë dhe ushqimeve, kushteve të pafavorshme të motit, shtrëngimit të kushteve financiare dhe pasigurisë së konsiderueshme, thuhet në edicionin e fundit të Raportit të Rregullt Ekonomik për Ballkanin Perëndimor, të publikuar të martën.

    Sipas këtij raporti, ekonomia e Kosovës shfaq qëndrueshmëri pavarësisht ngadalësimit të rritjes.

    “Në Kosovë, në vitin 2022 u shënua një rritje më e lehtë ekonomike prej 3.5 përqind, e shtyrë nga eksportet dhe konsumi privat—i cili vazhdoi të tregojë qëndrueshmëri pavarësisht presioneve inflacioniste. Pozita fiskale vazhdoj të përmirësohej, udhëhequr nga performanca e vazhdueshme pozitive e të ardhurave publike kundrejt efekteve të inflacionit dhe përfitimeve nga rritja e formalizimit, si dhe nga nën-shpenzimi i investimeve kapitale”, thuhet në raport.

    Sipas njoftimit të Bankës Botërore, përgjatë vitit 2023, rritja e Bruto Prodhimit Vendor pritet të jetë pak më e lartë, duke arritur në 3.7 përqind. Megjithatë, sipas BB-sw, rreziqet mbeten të larta. Presionet mund të rriten në rast të përshpejtimit të inflacionit dhe ngadalësimit të rritjes së ekonomive të BE-së përtej pritjeve të tanishme.

    Menaxheri i Bankës Botërore për Kosovën dhe Maqedoninë e Veriut Massimiliano Paolucci, ka thënë se në këtë kontekst, është qenësore të ruhen rezerva të mjaftueshme për t’iu përgjigjur ndryshimeve të papritura në mjedisin ekonomik.

    “Banka Botërore në anën tjetër do të vazhdojë të mbështesë përpjekjet e Kosovës për ta bërë ekonominë e saj më të qëndrueshme dhe gjithëpërfshirëse dhe për t’u ofruar qytetarëve të saj më shumë mundësi për një jetë më të mire”, thuhet në raprot.

    Sipas njoftimit, perspektiva për Ballkanin Perëndimor mbetet e zbehtë, me rritjen e Bruto Prodhimit Vendor që pritet të ngadalësohet në 2.6 për qind në vitin 2023, e nxitur kryesisht nga konsumi privat, eksportet dhe, për disa vende, nga investimet publike.

    Në raport thuhet po ashtu se rajoni tani përballet me sfidat e rindërtimit të rezervave për t’u përgatitur për përballimin e goditjeve të ardhshme dhe realizimit të reformave në anën e ofertës që vendosin themelet për një rritje më të qëndrueshme dhe më të gjelbër.

    Drejtoresha e Bankës Botërore për Ballkanin Perëndimor Xiaoqing Yu thotë se ekonomitë e Ballkanit Perëndimor kanë shfaqur qëndrueshmëri të jashtëzakonshme, pavarësisht përballjes me pengesa të jashtëzakonshme ekonomike.

    “Për të vazhduar përballimin e tronditjeve të shkaktuara nga goditjet e shumëfishta ekonomike, vendet mund të përfitojnë shumë duke vijuar zbatimin e reformave që nxisin produktivitetin në periudhë afatmesme, të tilla si përshpejtimi i integrimit rajonal, rritja e nivelit të konkurrencës në treg, tërheqja e investimeve me cilësi më të lartë dhe lehtësimi i barrierave që kufizojnë pjesëmarrjen, veçanërisht të grave, në tregun e punës”, thekson ajo, thuhet në njoftim.

    Sipas komunikatës, inflacioni në Ballkanin Perëndimor u rrit ndjeshëm në vitin 2022 duke arritur në nivelin më të lartë të dy dekadave të fundit, dhe presionet në kahun e rritjes së çmimeve vijojnë të jenë të larta edhe në fillim të vitit 2023, thuhet në raport. Në shumicën e vendeve të Ballkanit Perëndimor, inflacioni i çmimeve të konsumit arriti nivelin më të lartë nga fundi i vitit 2022, i nxitur nga rritja e çmimeve të energjisë dhe ushqimeve, ndërsa tani po shfaq shenja të uljes, ku faktorët e jashtëm nxitës po zbehen për shkak të ngadalësimit të rritjes së ekonomisë botërore.

    Kjo rritje e çmimeve ka prekur veçanërisht familjet me të ardhura të ulëta.

    Më tej në raport thuhet se, pavarësisht rritjes së punësimit, ritmi i krijimit të vendeve të reja të punës u ngadalësua në të gjitha vendet e Ballkanit Perëndimor në gjysmën e dytë të vitit 2022.

    Raporti shton se një fushë investimi me potencial për përfitime të rëndësishme ekonomike për Ballkanin Perëndimor është ajo në efiçencën e energjisë. Madje edhe përmirësimet në nivele të moderuara në efiçencën energjetike të firmave do të sillnin reduktime të konsiderueshme të emetimeve të gazrave serrë të lidhura me energjinë, do të rrisnin fitimet e firmave, do të krijonin përfitime të mëdha sociale dhe do të ndihmonin në mbrojtjen ndaj goditjeve të ardhme në çmimet e energjisë elektrike dhe gazit.

  • Ushqimet më të mira për t’i ngrënë në pranverë për një shëndet më të mirë

    Ushqimet më të mira për t’i ngrënë në pranverë për një shëndet më të mirë

    Pranvera është një stinë kur shumë njerëz ndjejnë rinovim dhe rikthim të energjisë. Ditët më të gjata, moti më i ngrohtë dhe lulëzimi i bukur e bëjnë këtë stinë perfekte për t’u fokusuar në ushqyerjen e shëndetshme dhe për të përfshirë në dietën tuaj ushqime të freskëta dhe sezonale. Ngrënia e ushqimeve të sezonit pranveror nuk ndihmon vetëm shëndetin tuaj, por edhe mjedisin dhe fermerët lokalë.

    Një nga mënyrat më të mira për të përfituar nga stina e pranverës është përfshirja e një larmie të frutave dhe perimeve të freskëta dhe të ngjyrosura në vaktet tuaja të ushqimit. Disa nga ushqimet më të mira për t’i ngrënë në pranverë janë arrat, shpargu, hudhra e pranverës, bishtajoret, spinaqi, karrota, pjeshka, luleshtrydhe, karçofët, salmoni, vezët dhe lakra e egër.

    Këto ushqime jo vetëm që janë të shijshme, por ofrojnë edhe substancat ushqyese shumë të rëndësishme si vitamina, minerale dhe fibra që mund të mbështesin shëndetin dhe mirëqenien tuaj të përgjithshme. Spinaqi, për shembull, është i pasur me vitaminë K dhe folat, ndërsa karrota është një burim i mirë i fibrit dhe antioksidantëve. Pjeshka është e pasur me proteinë dhe hekur, ndërsa luleshtrydha ka shumë vitaminë C dhe manganezium.

    Përfshirja e këtyre ushqimeve pranverore në vaktet tuaja nuk është vetëm një mënyrë shumë e shijshme dhe e shëndetshme për të ngrënë, por mund të jetë gjithashtu edhe një mënyrë argëtuese dhe kreative për të provuar receta dhe shije të reja. Me shumëllojshmërinë e prodhimeve të freskëta dhe sezonale të disponueshme gjatë kësaj kohe, ka mundësi të pafundme për përfshirjen e këtyre përbërësve në vaktet tuaja të ushqimit. /atvlive.tv

  • Kryeshefi i IPK-së nderohet nga DASH-i

    Kryeshefi i IPK-së nderohet nga DASH-i

    Kryeshefi Ekzekutiv i Inspektoratit Policor të Kosovës, Kushtrim Hodaj është nderuar dje nga Departamenti i Shtetit në Washington për sukses të jashtëzakonshëm operacional.

    Hodaj, siç ka bërë të ditur IPK është përzgjedhur fitues i çmimit kryesor për sukses të jashtëzakonshëm operacional, si i nominuar për realizimin me sukses operacionit antikorrupsion të Inspektoratit Policor të Kosovës, me ç’rast janë arrestuar 74 zyrtarë policorë në operacionin e vitit të kaluar të koduar me emrin “PIKA 1 dhe PIKA 2”.

    “Përfaqësuesit e Kosovës, Malit të Zi dhe të Ganës, të diplomuar në Akademinë Ndërkombëtarë të Zbatimit të Ligjit u vlerësuan që me punën e tyre kanë bërë një ndryshim të madh në komunitetet e tyre dhe sektorët e drejtësisë penale në mbarë botën.”, është bërë e ditur në komunikatë.

    Në këtë ceremoni kanë qenë të nominuar zyrtarë nga 52 shtete nga e gjithë bota, ndërkaq çmimi është ndarë nga nënsekretarja e Shtetit, Uzra Zeya dhe Ndihmës Sekretari i INL-it (Byroja për Çështje të Narkotikëve dhe Zbatimit të Ligjit), Todd Robinson.

    Hodaj është duke vazhduar vizitën zyrtare në Washington, ku gjatë ditëve ne vijim do të pritet nga zyrtarë të lartë nga fusha e sigurisë dhe drejtësisë në SHBA.

  • Urdhri për transferimin e lëndës nga Kosova në Hagë, Gjykata Speciale jep detaje

    Urdhri për transferimin e lëndës nga Kosova në Hagë, Gjykata Speciale jep detaje

    Nga vitit 2020 deri në vitin 2022, Gjykata Speciale me seli në Hagë pati një zhvillim të rëndësishëm për të cilin publiku në Kosovë nuk ishte në dijeni. Fillimisht Prokuroria kishte kërkuar që një lëndë të transferohet nga gjykatat e Kosovës në Dhomat e Specializuara të Hagës.

    Një dëshmitar i mbrojtur i Speciales në një rast që mbeti sekret, kishte qenë i akuzuar nga një gjykatë e Kosovës. Madje, gjyqtari i rastit kishte caktuar seancën ku i njëjti do të duhej të dilte publikisht.

    Gjithë situata nxiti reagimin e Prokurorisë së Specializuar, e cila kërkoi nga gjyqtari i procedurës paraprake në Hagë që ta kërkojë transferimin e lëndës. Në një përgjigje për gazetën Nacionale, Gjykata Speciale ka bërë të ditur se më 15 shtator 2022 Prokuroria kishte kërkuar pushimin e hetimeve.

    “Më 20 janar 2020, një gjyqtar i vetëm pranoi një kërkesë nga Zyra e Prokurorit të Specializuar (ZPS) që procedurat para një gjykate të Kosovës t’i transferoheshin Dhomave të Specializuara të Hagës. Megjithatë, më 15 shtator 2022, Prokuroria e njoftoi gjyqtarin e vetëm për vendimin e saj për pushimin e kësaj procedure dhe për të mos dorëzuar aktakuzë për konfirmim”, thuhet në përgjigje.

    Specialja ka thënë se procedurat mbesin konfidenciale.

    “Para se aktakuza të konfirmohet dhe të bëhet publike nga një gjyqtar i procedurës paraprake, procedurat para Dhomave të Specializuara janë konfidenciale. Tani që procedurat janë mbyllur, procesverbalet gjyqësore janë bërë publike. Megjithatë, gjyqtari i vetëm mund të redaktojë informacione të caktuara për arsye të privatësisë së personit në fjalë ose për të mbrojtur viktimat ose dëshmitarët ose familjet e tyre”, thuhet në përgjigje.

    Por, a ka të drejtë Specialja të marrë lëndë nga Kosova? Specialja ka thënë se kjo lejohet bazuar në disa nene të Rregullores për Procedura dhe Prova.

    “Nenet 10(1) dhe 54(1) të Ligjit për Dhomat e Specializuara dhe Zyrën e Prokurorit të Specializuar parashikojnë që Dhomat e Specializuara do të kenë përparësi ndaj të gjitha gjykatave të tjera në Kosovë në lidhje me rastet brenda juridiksionit të saj. Në përputhje me nenet 10(2) dhe 54(3), (9) të Ligjit dhe rregullin 203(3)-(4) të Rregullores së Procedurës dhe Provave, urdhri për shtyrje mund të përfshijë një kërkesë që çdo rast të i transmetohet Gjykatës Speciale apo Prokurorisë sipas rastit. Çdo gjykatë ose prokuror që merr një urdhër të tillë duhet ta zbatojë atë pa vonesë”, përfundon përgjigja e Speciales për Nacionalen.

    Por, çfarë ndodhi?

    Sipas këtij dokumenti bëhej fjalë për një dëshmitar të mbrojtur të Prokurorisë së Specializuar të Hagës, që ishte i akuzuar në një tjetër procedurë në Kosovë.

    Në gjithë këtë mjegull që u krijua si rezultat i mbajtjes sekret të shumë dokumenteve nga Specialja, po del se e gjithë lënda tashmë është mbyllur. Prokuroria e Specializuar e Hagës nuk ka vendosur të dorëzojë ndonjë aktakuzë tjetër për konfirmim.

    Nacionale sjell komplet përkthimin e kësaj lënde ashtu siç e ka paraqitur Prokuroria në kërkesën për mbylljen e lëndës:

    REDAKTUAR është një dëshmitar i mbrojtur në Prokurorinë e Specializuar. Dëshmia e tij e parashikuar REDAKTUAR ka të bëjë, ndër të tjera, me krimet në REDAKTUAR dhe REDAKTUAR.

    Në [REDAKTUAR], dëshmitari ishte nën masa mbrojtëse, duke përfshirë moszbulimin e identitetit të tij për publikun. Po kështu, para Dhomës së Specializuar (‘DHP’), dëshmitarit iu dhanë masa mbrojtëse [REDAKTUAR], duke përfshirë moszbulimin e identitetin e tij për publikun.

    Më[REDAKTUAR], Kryeprokurori i EULEX kërkoi që Prokuroria Speciale eKosovës të merrte përsipër shtyrjen e procedurës kundër REDAKTUAR, REDAKTUAR dhe REDAKTUAR.

    Më REDAKTUAR në kontekstin e Procedurave të Shtyra.Nuk ka asnjë tregues në dosjen e çështjes së Procedurës së Shtyrë se janë ndërmarrë hapa të mëtejshëm hetimor. Gjithashtu nuk ka asnjë provë për ndonjë suspendim apo zgjatje gjyqësore. Pa një pezullim apo zgjatje, hetimi do të duhej të kishte përfunduar pas dy vjetësh, në pajtim me nenin 159(1) të Kodit të Procedurës Penale të Kosovës.

    Më REDAKTUAR dhe REDAKTUAR Prokurroia e Specializuar intervistoi REDAKTUAR, REDAKTUAR, REDAKTUAR dhe REDAKTUAR.

    Veçanërisht, më pak se dy javë pas intervistës së Prokurorisë dhe përkundër faktit se hetimi duhej të përfundonte në REDAKTUAR, një prokuror i shtetit të Kosovës ishte caktuar për Procedurat e Shtyra më [REDAKTUAR].

    Më[REDAKTUAR], pothuajse nëntë muaj pasi u caktua, prokurori i ri paraqiti një njoftim për ‘fillimin’ e hetimeve në Procedurën e Shtyrë. Ndërsa prokurori i ri tregoi në njoftim se hapa të mëtejshëm hetimor ishin të nevojshëm, duke përfshirë marrjen në pyetje të [REDAKTUAR], nuk ka asnjë tregues se ndonjë hap i tillë ishte ndërmarrë ndonjëherë.

    Në vend të kësaj, më [REDAKTUAR], prokurori lëshoi aktakuzën duke e akuzuar [REDAKTUAR] me [REDAKTUAR], në kundërshtim me [REDAKTUAR] të Kodit Penal të Kosovës. Përkundër statusit të mbrojtur [I REDAKTUAR], prokurori propozoi një seancë dëgjimore gojore, publike në lidhje me këtë aktakuzë. Kodi Penal i Kosovës nuk përfshin ndonjë procedurë të konfirmimit të aktakuzës, të ngjashme me atë në GJD.

    Më [REDAKTUAR] 2021, Prokuroria e Specializuar pasi u njoftua se [REDAKTUAR] ishte thirrur për t’u paraqitur në një seancë publike para [REDAKTUAR] në lidhje me aktakuzën, kërkoi shtyrjen e rastit.

    Më [REDAKTUAR] 2021, gjykatësi i procedurës paraprake urdhëroi shtyrjen e kërkuar. Ai konsideroi, ndër të tjera, se shtyrja ishte e përshtatshme ‘për të siguruar që provat e [REDAKTUAR] do të ruhen me qëllim që të paraqiten [REDAKTUAR]. 37 Gjyqtari i vetëm konfirmoi se çdo hap i mëtejshëm në procedurën e shtyrë i nënshtrohej nenit 35 dhe kornizës së aplikueshme të Gjykatës Speciale.

    Më REDAKTUAR, seanca fillestare e planifikuar përpara [REDACTED] u shty për një kohë të pacaktuar.

    Më REDAKTUAR dhe REDAKTUAR ia transferoi dosjen e lëndës për procedurën e shtyrë Prokurorinë e Specializuar të Hagës.

    Më 29 korrik 2022, Gjyqtari refuzoi një kërkesë [REDAKTUAR] për përjashtimin e Prokurorit të Specializuar dhe stafit të Prokurroisë dhe për caktimin e një amicus curiae për të ndjekur penalisht [REDAKTUAR].

    Duke pasur parasysh mandatin dhe detyrimet e saj sipas Ligjit 42 dhe Rregullave 43 dhe pas shqyrtimit të kujdesshëm të të gjitha rrethanave dhe informacioneve relevante, Prokuroria e Specializuar ka vendosur të ndërpresë procedurën e shtyrë dhe të mos dorëzojë aktakuzë për konfirmim.

  • Liberalizimi i vizave, publikohet rregullorja në gazetën zyrtare të BE-së

    Liberalizimi i vizave, publikohet rregullorja në gazetën zyrtare të BE-së

    Është publikuar në gazetën zyrtare të Bashkimit Evropian, rregullorja e cila mundëson liberalizimin e vizave për Kosovës. E njëjta pritet të hyjë në fuqi më 15 maj të këtij viti ndërsa kosovarët do të mund të lëvizin pa viza në shtetet e zonës Schengen nga 1 janari 2024.

    Vendimi për liberalizimin e vizave për Kosovën është nënshkruar më 19 prill në selinë e Parlamentit Evropian.

    Një ditë më herët, PE kishte miratuar vendimit për vizat, veprim ky që kishte përmbyllur proceduat vendimmarrëse.

    Për miratimin e këtij vendimi nuk ka pasur asnjë kundërshtim.

    Pas liberalizimit të vizave, qytetarët e Kosovës do të mund të udhëtojnë deri në 90 ditë, në një periudhë brenda gjashtë muajsh, në të gjitha shtetet që janë anëtare në zonën Schengen.

    Regjimi pa viza nuk nënkupton leje pune, por kosovarët do të mund të realizojnë vizita turistike apo të tjera për çështje familjare.

    Komisioni Evropian kishte konfirmuar në vitin 2018 se Kosova i ka përmbushur të gjitha kushtet për lëvizje të lirë.

    Megjithatë, qytetarët e Kosovës janë të vetmit në Ballkanin Perëndimor që ende nuk mund të lëvizin pa viza në Schengen.

  • Gjendet pa shenja jete një person te Bulevardi i Ri në Tiranë

    Gjendet pa shenja jete një person te Bulevardi i Ri në Tiranë

    Një 67-vjeçar është gjetur pa shenja jete te Bulevardi i Ri, në Tiranë.

    Personi në fjalë, i cili është identifikuar si shtetasi Dh. S., 67 vjeç, u gjet i vdekur pranë biçikletës së tij, në fund të Bulevardit të Ri.

    Nga hetimet paraprake, viktimës nuk i janë konstatuar shenja dhune dhe dyshohet se ka të bëjmë me një vdekje natyrale.

    Pritet ekspertiza mjeko-ligjore për të përcaktuar shkaqet e sakta të vdekjes së 67-vjeçarit.

    “Më datë 25.04.2023, rreth orës 05:55, në fund të Bulevardit të Ri, është gjetur në rrugë (afër një biçiklete), pa shenja jete, shtetasi Dh. S., 67 vjeç. Nga këqyrja paraprake nuk janë konstatuar shenja dhune. Dyshohet se vdekja ka ardhur nga shkaqe natyrale. Grupi hetimor po punon për sqarimin e rrethanave të ngjarjes”, thuhet në njoftimin e policisë./Euronews.al

  • Nënkryetarja serbe e Parlamentit të KE: Hungaria na gëzoi, Greqia na dëshpëroi

    Nënkryetarja serbe e Parlamentit të KE: Hungaria na gëzoi, Greqia na dëshpëroi

    Nënkryetarja e Asamblesë Parlamentare të Këshillit të Evropës, përfaqësuesja serbe Elvira Kovaç ka deklaruar se Hungaria, e cila votoi kundër, ishte befasia më e madhe në votim për pranimin e kërkesës së Kosovës për pranim në Këshillin e Evropës.

    Komiteti i Ministrave të Këshillit të Evropës pranoi kërkesën e Kosovës për anëtarësim në këtë organizatë. Kjo është faza e parë e pranimit e anëtarësimit në këtë organizatë. Pason deklarata e Asamblesë Parlamentare, e cila përbëhet nga përfaqësues kombëtarë të shteteve anëtare.

    “Edhe pse lista e vendeve duhet të jetë sekrete, 33 vende anëtare votuan për, kurse bashkë me Serbinë shtatë vota ishin kundër, pesë abstenuan, ndërsa një vend nuk mori pjesë në votim. Befasia më e madhe “e këndshme” ishte Hungaria, e cila votoi kundër. Vendet e tjera (që ishin kundër) janë miq tradicionalë të Serbisë dhe kjo pritej prej tyre”, thotë Kovaç.

    Sipas saj, Greqia, Ukraina, Sllovakia dhe Bosnja dhe Hercegovina abstenuan.

    Ajo tha se procedura e mëtejshme kërkon votim në Këshillin e Evropës, i cili parashikohet se do të zhvillohet, për shkak të procedurave, nga disa muaj deri në dy vjet.

    Ajo tha se delegacioni serb do të vazhdojë të marrë pjesë në punimet e Asamblesë Parlamentare të Këshillit të Evropës.

    “Si dikush që kam marrë pjesë në punën e këtij organi për 16 vjet, sinqerisht shpresoj se nuk do të marrim udhëzime për ta braktisur atë. Ambasadorja serbe u largua nga ky takim. Ne kemi vënë re në mesin e politikanëve se qëndrimet e Greqisë janë zbutur dhe kanë ndryshuar, dhe se miqtë tanë më të sinqertë, përveç Hungarisë, janë Spanja, Qiproja dhe Azerbajxhani”, përfundon Kovaç.

  • Nis shitja e armës inteligjente që shkrep vetëm në duart e pronarit, këto janë çmimet

    Nis shitja e armës inteligjente që shkrep vetëm në duart e pronarit, këto janë çmimet

    Pronësia e armëve ka qenë dhe vazhdon të jetë një temë debati në Shtet e Bashkuara të Amerikës nga grupe të ndryshme. Një pjesë mendon se kjo ka të bëjë me lirinë personale, e një pjesë tjetër besojnë se numri i rasteve tragjike mund të bie nëse reduktohet përdorimi i tyre, raporton Reuters.

    Në startupin amerikan Biofire, besojnë se një armë mund të përdoret vetëm nga pronarët e saj dhe nëse bie një revole në duart e dikujt tjetër s’mudn të përdoret për sulme apo vrasje.

    Biofire Smart Gun ka dalë me këtë opsion, duke e përdorur të njëjtin të njëjtën si për telefona. Pra, arma mund të përdoret vetëm nga pronari i saj, deri në pesë persona (duke i përfshirë anëtarë të familjes) të cilët mund të regjistrohen për të përdorur biometrikën.

    Një armë e tillë është shfaqur në tregun amerikan javën që po lëmë pas dhe siç thuhet nga kompania, një model është i shitur dhe dërgesat do të fillojnë në fund të këtij viti.

    Çmimi i modelit bazë është 1500 dollarë dhe janë dy versione më të shtrenjta dhe kushtojnë 1900 apo edhe 2500 dollarë.

    Secili prej këtyre modeleve lejon personalizim, siç është zgjedhja e ngjyrës apo konfigurimi i armës për majtakë.