Blog

Haxhiu: Kosovës nuk i duhet një kryeprokuror i paaftë dhe që s’ka integritet moral

Ministrja e Drejtësisë, Albulena Haxhiu, tha se Kosovës nuk i duhet një kryeprokuror i paaftë dhe që s’ka integritet moral, por i guximshëm që nuk i shërben grupeve të interesit.

Ajo ka thënë se Prokuroria nuk ka ndërmarrë asnjë veprim ndaj një sërë dosjesh që i ka dorëzuar Qeveria, sipas saj, për keqpërdorimet që i ka gjetur në ekzekutiv, transmeton kp.

“Neve na duhet një kryeprokuror i guximshëm që nuk e ka bishtin e zënë me derë, që nuk i shërben individëve, nuk i shërben grupeve të interesit, por ligjit, mandatit dhe Kushtetutën. Mandati i kryeprokuror të shtetit është shtatë vite, janë shumë. Nuk mundemi që edhe shtatë vite të tjera me qu me një kryeprokuror që s’ka integritet moral dhe profesional. Pra që është i paaftë dhe që nuk njihet për asnjë lëndë që e ka quar përpara. Për këtë po flasim ne, ne duam një sistem të drejtësisë të çliruar nga grupet e interesit, individët dhe oligarkët”, tha ajo.

Në anën tjetër, deputeti i Lidhjes Demokratike të Kosovës, Driton Selmanaj, tha se nuk është çudi që jo shumë larg, ministren Haxhiu ta shohin prapa grilave.

“Mënyra si po e mbroni (Nagip Krasniqin) zonja ministre, për besë nuk është çudi se jo larg kemi me të pa prapa grilave edhe ty, siç po e shoh”, tha ai.

April 26, 2023
Latifi: Dalja publike e UÇK-së në Pashtrik ndryshoi ndryshoi historinë

Me rastin e shënimit të 25-vjetorit të daljes publike të UÇK-së në zonën Operative të Pashtrikut, Komuna e Rahovecit ka organizuar manifestim në fshatin Drenoc, me ç’rast u tha se ngjarje si kjo ndryshuan historinë dhe hartën e botës.

I pari i kësaj komune, Smajl Latifi, derisa foli për luftën çlirimtare të UÇK-së, tha se nga gjaku i të rënëve për liri është fituar liria që e gëzon vendi sot.

“Lufta jonë çlirimtare mori përmasa kombëtare dhe s’kishte si të ishte ndryshe, sepse shqiptarët ndjejnë të njëjtën dashuri për atdheun, pavarësisht se ku jetojnë. Bijat dhe bijtë e këtij vendi u rreshtuan në radhët e UÇK-së dhe në forma të ndryshme kontribuuan për të mirën e përgjithshme. Dhe natyrisht, lufta ka edhe pasojat që lënë gjurmë në jetët e njerëzve, por edhe gjurmë në histori. Dalja e UÇK-së me 26 prill e më pas beteja parë dhe ajo me 14 maj, si dhe ato të tjerat, i dhanë kësaj lufte tjetër dimension. Toka u stolis me varre, por nga ai gjak është liria që po shijojmë sot. Ngjarjet si kjo na bëjnë te ndjehemi krenar që i takuam asaj epoke të lavdishme, epokës që ndryshoi historinë dhe jo vetëm atë shqiptare, por edhe hartën e botës”, tha Latifi, raporton KP.

Latifi mes tjerash përmendi edhe ish-krerët e UÇK-së që ndodhen në Hagë, për çka tha se akuzat ndja tyre janë të pa baza e vijnë nga Beogradi.

“Ne sot po e festojmë 25-vjetorin pa Hashim Thaçin, Kadri Veselin, Rexhep Selimin, Nasim Haradinajn, Hysni Gucatin, Pjetër Shalën, Salih Mustafën, pa shokë të cilët po përballen padrejtësisht në akuza të shpifura nga ata që kanë rënë me ose pa vetëdije në kurthin e armiqve tanë e në ato dosje që janë gatuar diku, janë pjekur diku në kuzhinat e Beogradit zyrtar. Pra, ndërtimi i vendit dhe përmirësimi i kushteve të punës e jetës është pjesë e detyrimeve tona ndaj dëshmoreve. Na mbetet që të punojmë me përkushtimin më të madh për rregullimin e kushteve të punës e jetës për njerëzit tanë. Duke punuar ndershëm, ne nderojmë të kaluarën, gjakun e derdhur për liri, nderojmë të tashmen dhe të ardhmen tonë, vetëm në këtë mënyrë, familjarët e dëshmorëve, martirëve mund të ndjehen të nderuar e të respektuar, ndërsa ne shpirtërisht me të qetë”, tha mes tjerash Latifi.

Publicisti dhe mbledhësi i fakteve të dëshmive historike, Qemajl Krasniqi derisa kujtoi gjithë të rënët për liri tha se falë tyre Drenoci nuk ra por u bë çerdhe prej nga hynin e dilnin luftëtarët e lirisë nga të gjitha trojet shqiptare.

“Pikërisht këtu zuri fill Zona Operative e Pashtrikut, zonë që u mbijetoi sfidave dhe ballafaqimeve te mëdha e të rrezikshme me forcat armike deri në çlirimin e vendit në qershor te vitit 1999. Aty u organizuan bujq e blegtorë, mjeshtër e profesionistë të ndryshëm, studentë, mësues e intelektualë me grada të larta shkencore… Por, Drenoci nuk ra por u bë çerdhe prej nga hynin e dilnin luftëtarët e lirisë nga të gjitha trojet shqiptare. Mblodhi ata njerëz që në zemër e në mendje e kishin dashurinë dhe respektin për luftën dhe dëshmorë dhe për Ushtrinë Çlirimtare të Kosovës. Kazerma e Drenocit kishte një udhëheqje operative dhe kooperative ushtarake që drejtonte operacionet anembanë Anadrinit dhe sot me shumë merita i takon epiteti ‘Fshati-kazermë’, fshat ku zuri fill Brigada 124 ‘Gani Paçarizi’ e fshat ku zuri fill Zona Operative e Pashtrikut”, tha Krasniqi.

E përfaqësuesi i shoqatave të dala nga lufta e UÇK-së, Xhavit Jashari, duke folur për luftën e UÇK-së, apeloi krerët shtetërorë që për ta të kërkojnë drejtësi nga instancat ndërkombëtare të drejtësisë.

“Duke e kujtuar e shkruar historinë, qëndrojmë mirë sot dhe ecim bindshëm në realizimin e amanetit të dëshmorëve, pra amanet i cili duhet të jetë jetik për çdo shqiptar përveç lirisë, së kësaj pjese të atdheut, pra të realizojmë rrugën e madhe që ma hapur rruga e lavdishme e UÇK-së… Lirinë nuk na ka falë askush, se për të ardhur deri te liria është dashur si domosdoshmëri lufta e lavdishme dhe e pastër e UÇK-së. Duhet të themi me shumë zë, të gjithë atyre qe i bënë këto padrejtësi qofshin vendorë dhe ndërkombëtarë, se nuk ka forcë që mund ta barazojë luftën e pastër dhe të drejtë të UÇK-së. Duhet të besojmë se pafajësia do të vërtetohet dhe do të dështojnë të gjithë ata. Institucionet tona, sidomos kryeministri dhe kryetarja e shtetit duhet të deklarohen rreth kësaj dhe të kërkojnë nga instancat ndërkombëtare të drejtësisë se ku mbeten këto shpifje dhe si sillen ata që e sajojnë atë”, tha Jashari.

Ai tha se dëshmorët e lirisë janë figura të ndritshme të vendit.

April 26, 2023
Rizvanolli i drejtohet opozitës: Si është e mundur të dini kaq shumë rreth tenderëve?

Në Kuvendin e Kosovës është duke u zhvilluar debati parlamentar lidhur me zhvillimet në Korporatën Energjetike të Kosovës (KEK) dhe përgjegjësinë e institucioneve qendrore në sektorin energjetik.

Ministrja e Ekonomisë, Artane Rizvanolli, i ka pyetur deputetët nga opozita se si është e mundur që ata të dinë kaq shumë rreth tenderëve.

“Ministria e Ekonomisë është duke bashkëpunuar me bordin mbikëqyrës të KEK-ut për t’u siguruar se operimet vazhdojnë me sukses”.

“Desha të ju pyes se pse përgjatë këtyre dy viteve aq pak keni folur për politikat, por aq shumë dini për tenderët. Nuk do t’ju pyes sepse ju njoh, andaj nuk ka nevojë për përgjigje”.

April 26, 2023
Përplasje në Kuvend, ministrja Haxhiu përmend pasurinë e Haradinajt

Ministrja e Drejtësisë, Albulena Haxhiu, është përplasur me kryetarin e Aleancës për Ardhmërinë e Kosovës, Ramush Haradinaj, në seancën e sotme të Kuvendit ku po debatohet për zhvillimet e fundit në KEK.

Duke replikuar me Haradinajn për ndërhyrjen në drejtësi, Haxhiu përmendi ish-prokurorin, Elez Blakaj, derisa tha se kur bëhet fjalë për krim dhe korrupsion duhet shikuar pasuria e Haradinajt për të parë se kush është i përfshirë.

“Në Republikën e Kosovës, një prokuror special është detyruar të lëshojë vendin për shkak teje zotëri Haradinaj. Sa ke qenë kryeministër ti i ke kërkuar raport me shkrim që brenda 30 ditëve me të jep informacione për lëndët që i ka pasur në adresim ish prokurori Elez Blakaj. Kjo është ndërhyrja brutale në sektorin e drejtësisë. Kur flasim për krim dhe korrupsion zotëri Haradinaj, Kosova është vend i vogël, mos thuani diçka në foltore të Kuvendit që nuk e besoni edhe vet. Ne e dina shumë mirë se ku keni qenë dhe ku jeni. Sa pasuri keni pasur dhe sa keni. Prandaj kur flasim për krim dhe korrupsion vetëm me ta pa pasurinë tënde që ke kriju prej momentin kur ke fillu me punu në institucioni është mjaftueshëm me kuptu kush është i përfshirë në krim dhe korrupsion”, tha ajo, përcjell KP.

Mirëpo, ndryshe reagoi Haradinaj.

“Kur fol pas shpine, të them të drejtën nuk e di a është krejt e ndershme dhe logjikshme, pasi gjatë fjalimit të parë timin isha i penguar prej ministres. Kjo është zonjë, më vjen keq me përdor ndonjë fjalor, por vazhdimisht pengohem prej zonjës ministre pas shpine. Faleminderit për ato që i the”, tha kreu i AAK-së.

April 26, 2023
Këto janë të gjitha vendimet që i mori Qeveria sot

Qeveria e Kosovës ka mbajtur sot mbledhjen e radhës.

Në këtë mbledhje janë marrë një sër vendimesh.

Këto janë të gjitha vendimet që mori Qeveria në mbledhje:

Projekt-rregulloren për Zëvendësimin apo Mungesën e Përkohshme nga Puna e Nëpunësit Civil. Kjo Rregullore përcakton rregullat dhe procedurat për plotësimin e pozitës në rast të nevojës të zëvendësimit apo mungesës së përkohshme nga puna, të një nëpunësi civil.

Udhëzimin Administrativ për Shitjen e të Dhënave Statistikore. Me këtë Udhëzim Administrativ përcaktohet mënyra dhe kushtet e shitjes së të dhënave statistikore, kryerja e shërbimeve të veçanta për shfrytëzues të ndryshëm, llogaritja e shpenzimeve (profesionale dhe operative) për kryerjen e tyre, si dhe mënyra e përdorimit të të hyrave të fituara me shitjen e të dhënave statistikore nga ASK dhe prodhuesit e tjerë të statistikave zyrtare.

Udhëzimin Administrativ për Mbrojtjen e të Dhënave Statistikore dhe Qasjen në të Dhëna Mikro. Me anë të këtij Udhëzimi Administrativ përcaktohen masat për mbrojtjen e të dhënave statistikore si dhe kushtet dhe të drejtat e përdoruesve për lejimin e shfrytëzimit të të dhënave të fshehta statistikore.

Vendimin për lehtësimin e qasjes së personave të verbër në aktet nënligjore të Qeverisë dhe ministrive të publikuara në Gazetën Zyrtare të Republikës së Kosovës. Një ndryshim i këtillë në kuptimin teknik ndikon drejtpërdrejtë në informim më të saktë dhe punë më cilësore, por mbi të gjitha ndihmon personat me aftësi të kufizuar të gëzojnë të drejta të barabarta, ashtu siç u takon.

Vendimin për aprovimin e ndarjes së mjeteve buxhetore për zbatimin e masave të efiçiencës së energjisë sipas Planit të Zbatimit për zbutjen e ndikimit të menjëhershëm socio-ekonomik të krizës energjetike. Për këtë qëllim janë ndarë mjetet në vlerë prej dhjetë milionë euro. Mjetet e ndara transferohen te Fondi i Kosovës për Efiçiencë të Energjisë dhe do të përdorën për zbutjen e ndikimit të menjëhershëm socio-ekonomik të krizës energjetike.

Vendimin për plotësimin e listës së artikujve për përdorim të përbashkët që janë objekt i procedurës qendrore të prokurimit, të aprovuar me Vendimin e Qeverisë Nr. 06/ 27 të datës 30 prill 2020. Vendimit i është bashkangjitur edhe Lista me artikujt dhe shërbimet që janë pjesë e prokurimeve të përbashkëta.

Vendimin për ndarjen e mjeteve financiare për zbatimin e pikës 1.1 të Vendimit të Qeverisë Nr.31/99, në kuadër të Masës 3.7 – Mbështetje në tejkalimin e krizës energjetike të Pakos së Ringjalljes Ekonomike. Nëntë milionë euro janë ndarë për zbatimin e vendimit për mbështetjen e tejkalimit të krizës energjetike në kuadër të pakos së Ringjalljes ekonomike. Vendimi gjithashtu aprovon bartjen e shpenzimeve aktuale të realizuara deri në fund të muajit shkurt 2023 në vlerën prej tetë milionë e dyqind e shtatëdhjetë e dy mijë eurove.

Vendimin për shfuqizimin e Vendimit të Qeverisë Nr.05/36 të datës 19 tetor 2020, i ndryshuar dhe plotësuar me Vendimin Nr. 15/19 të datës 14 korrik 2021 dhe Vendimin Nr. 29/116 të datës 28 dhjetor 2022 (MFPT) Shfuqizohet Vendimi i Qeverisë së Republikës së Kosovës Nr.05/36 i datës 19.10.2020, i plotësuar dhe ndryshuar me Vendimin Nr. 15/19 të datës 14.07.2021 dhe Vendimin Nr. 29/116 të datës 28.12.2022. Qeveria e Republikës së Kosovës me datë 19.10.2020 ka nxjerrë Vendimin Nr. 05/36 me anë të të cilit ka ndaluar procedurat e blerjes së veturave zyrtare nga ministritë dhe agjencitë në vartësi të tyre përmes procedurave të prokurimit publik.

Qeveria ka aprovuar Nismën për lidhjen e Marrëveshjes plotësuese të Grantit në vlerë 13.2 milionë euro ndërmjet Republikës së Kosovës e përfaqësuar nga Ministria e Financave, Punës dhe Transfereve, KfË Frankfurt am Main dhe Kompanisë së Ujësjellësit “Prishtina” për Projektin “ Programi i Ujërave të Zeza të Kosovës II”. Negocimi i kësaj marrëveshjeje do të bëhet konform dispozitave të kushtetutës së Republikës së Kosovës dhe Ligjit për Marrëveshje Ndërkombëtare.

Vendimin për të kërkuar nga Presidentja e Republikës së Kosovës dhënien e autorizimit Ministrit të Financave, Punës dhe Transfereve për nënshkrimin e Marrëveshjes për Financim ndërmjet Republikës së Kosovës dhe Asociacionit Ndërkombëtar për Zhvillim për Projektin për “Forcimin e Qeverisjes Digjitale për Ofrimin e Shërbimeve”. Marrëveshja e Financimit në mes të Republikës së Kosovës dhe Asociacionit Ndërkombëtarë për Zhvillimin e projektit “Projekti për forcimin e qeverisjes digjitale për ofrimin e shërbimeve është përmbyllur me sukses dhe kjo marrëveshje do t’i mundësojë Qeverisë që të përmirësojë cilësinë e një numri të shërbimeve administrative publike dhe do të zvogëlojë barrën administrative përmes avancimit dhe sigurimit të ndërveprueshmërisë se sistemeve të përzgjedhura.

Kërkesën e Ministrisë së Punëve të Brendshme për ndarjen e mjeteve buxhetore për financimin e Projektit “Sistemi i monitorimit elektronik”, për vitin 2023. 600 mijë euro janë ndarë për këtë qëllim.

Vendimin për ndarjen e mjeteve buxhetore në shumën prej 15 mijë euro për Forumin Ekonomik të Vjenës me qëllim të Promovimit të Republikës së Kosovës, dhe bazuar në marrëveshjen e bashkëpunimit ndërmjet Forumit Ekonomik të Vjenës dhe Qeverisë së Kosovës/Zyrës së Kryeministrit të Kosovës të datës 12 janar 2023.

Projektligjin për Ratifikimin e Marrëveshjes ndërmjet Republikës së Kosovës dhe Republikës së Sllovenisë për Zbatimin e Ndërsjellë të Aktgjykimeve në Çështjet Penale.

Projektligjin për Ratifikimin e Marrëveshjes ndërmjet Republikës së Kosovës dhe Republikës së Sllovenisë për Ekstradimin.

Projektligjin për Ratifikimin e Marrëveshjes Ndërmjet Republikës së Kosovës dhe Republikës së Sllovenisë për ndihmë të Ndërsjellë Juridike në Çështje Penale.

Projektligjin për Ratifikimin e Marrëveshjes për Statusin dhe Funksionet e Komisionit Ndërkombëtar për Personat e Zhdukur. Qeveria e Republikës së Kosovës është e përkushtuar për të zbardhur zhdukjet me dhunë gjatë luftës. Në shërbim të kësaj, po iniciojmë aderimin e Republikës së Kosovës në ICMP. Kjo nismë shton mundësitë për rritje të bashkëpunimit rajonal e më gjerë, në procesin e ndriçimit të fatit dhe vendndodhjes së personave të zhdukur me dhunë. Po ashtu, i shërben rritjes së kapaciteteve të mjekëve ligjorë dhe specialistëve të tjerë të fushës së antropologjisë dhe arkeologjisë forenzike në institucionet tona.

Vendimin me të cilin Qeveria e Republikës së Kosovës, në pajtim me Kërkesën e Kuvendit të Republikës së Kosovës me Nr. 689 të datës 20 prill 2023 jep mendim lidhur me Nismën Legjislative “Projektligji për Zgjedhjet e Përgjithshme në Republikën e Kosovës”. Qeveria ka vlerësuar nismën dhe ka rekomanduar miratimin e tij, Ky Ligj ka për qëllim që të përcaktojë rregullat e organizimit të sistemit zgjedhor, duke përfshirë edhe rregullat e përgatitjes, zhvillimit, administrimit, mbikëqyrjes, dhe shpalljes së rezultateve të zgjedhjeve për Kuvendin e Republikës së Kosovës.

Është informuar për zbatimin e Planit të Veprimit për zbatimin e Agjendës për Reforma Evropiane (PV ERA II) gjatë periudhës tetor – dhjetor 2022 (ZKM). Për zbatimin e këtyre prioriteteve, institucionet e Republikës së Kosovës, në bashkëpunim me Komisionin Evropian, kanë hartuar Planin e Veprimit (PV ERA II), i cili është miratuar nga Qeveria, më 11 gusht 2021, dhe nga Kuvendi, më 4 tetor 2021. Prioritetet e ERA II, përmes këtij plani të veprimit, do të zbatohen brenda një periudhe dyvjeçare, deri në mesin e vitit 2023.

Vendimin për ndarjen e mjetet financiare në vlerë prej 157 mijë euro për bashkëfinancim të projektit për përmirësimin e sistemit të qeverisjes digjitale,

Vendimin për ndarjen e mjeteve për zbatimin e Pakos për Ringjallje Ekonomike, për masat e mbështetjes së punësimit të grave, likuiditetin familjar.

Plotësim ndryshimin e Pakos së Ringjalljes Ekonomike edhe me masën për mbështetjen e punësimit të punëkërkuesve nga komunitetet jo shumicë në Kosovë.

Vendimin për zbatimin e masës së re në Pakon e Ringjalljes Ekonomike, mbështetja e punësimit të punëkërkuesve nga radhët e komuniteteve jo shumicë, janë ndarë fillimisht tre (3) milion euro.

Vendimin për emërimin e Bordit Drejtues të Shërbimit Spitalor, Klinikë, Universitar të Kosovës përbërjen si në vijim:

Dr.Dren Boshnjaku, si përfaqësues nga Qendra Klinike Universitare e Kosovës;

Dr.Tetore Olloni, si përfaqësuese nga Qendra Klinike Universitare Stomatologjike e Kosovës;

Dr.Rrezarta Bajrami, nga Instituti Kombëtar i Shëndetit Publik;

Dr.Besim Demolli, nga Spitali i Përgjithshëm i Ferizajt në bazë të rotacionit dhe përmbushjes së indikatorëve të kualitetit të shërbimeve shëndetësore;

Dr.Vjollca Kadolli, nga Shërbimi i Kujdesit Parësor Shëndetësor;

Dr.Naim Bardiqi, si përfaqësues nga Ministria e Shëndetësisë;

Në Bord është edhe një ekspert i menaxhimit shëndetësor, që zgjidhet përmes konkursit publik.

April 26, 2023
Qeveria ndan edhe 10 mln euro për zbatim të masave të efiçiencës së energjisë

Një shtetas i Shqipërisë u arrestua mbrëmë rreth orës 23:00 në Aeroportin Ndërkombëtar të Prishtinës “Adem Jashari”.

I arrestuari ishte në kërkim me urdhërarrest ndërkombëtar.

Policia informoi se i arrestuari është personi me inicialet M.M, 59 vjeç, shtetas i Republikës së Shqipërisë.

“Përderisa personi në fjalë është dërguar në qendrën e mbajtjes, zyrtarët policor të stacionit të Lipjanit, po ndërmarrin të gjitha veprimet e nevojshme në koordinim me Njësitin për Bashkëpunim Ndërkombëtar dhe institucionet përkatëse, lidhur me procedimin e mëtejmë të tij”, bëri të ditur Policia.

April 26, 2023
Osmani: Aleatët t’i bëjnë presion Serbisë për respektimin e obligimeve të Ohrit

Presidentja e vendit, Vjosa Osmani shpreson që aleatët e Kosovës t’i bëjnë presion Serbisë që kjo e fundit të respektojë obligimet që i ka nga aneksi i dakorduar një muaj më parë në Ohër. Osmani ka thënë se Kosova është përgatitur për raundin e ri të bisedimeve në Bruksel dhe ka theksuar se do të jetë konstruktive me zgjidhje që i kontribuojnë paqes dhe stabilitetit afatgjatë.

Për procesin e dialogut, Osmani ka folur në Shkup, pas takimit që ka zhvilluar me homologun e saj, Stevo Pendarovski.

“Se cilat do të jenë veprimet e Serbisë pak a shumë mund të nuhasim nga deklaratat e te të fundit por mbi të gjitha nga veprimet e tyre të cilat kanë qenë shkelje të marrëveshjes së arritur në Bruksel dhe aneksit në Ohër, siç e dini neni 4 i kësaj marrëveshje parasheh që Serbia nuk do të kundërshtojë anëtarësimin e Kosovës në asnjë organizatë ndërkombëtare. Sjellja e tyre të hënën në Këshillin e Evropës por edhe lobimi i tyre kundër votimit pro Kosovës e ka dëshmuar këtë shkelje flagrante, dhe natyrisht edhe ndërhyrja e tyre e paligjshme në zgjedhjet në Republikën e Kosovës është shkelje e nenit 2 të kësaj marrëveshje, dhe njëkohësisht e akteve dhe normave juridike ndërkombëtare të cilat janë të aplikueshëm për të gjitha shtetet tona”, ka thënë Osmani.

Ajo ka thënë se pret që aleatët ndërkombëtar të bëjnë presion mbi Serbinë në mënyrë që kjo e fundit të respektojë obligimet që i ka marrë.

“Shpresoj shumë që miqtë dhe aleatët tanë do të sigurohen që të bisedojnë gjatë kësaj periudhe, të bëjnë presion mbi Serbinë në mënyrë që edhe ajo të respektojë obligimet që janë marrë nga ky proces i cili mendoj që ka qen një hap i rëndësishëm ku Kosova dhe Serbia trajtohen nga aspekti i së drejtës dhe marrëdhënieve ndërkombëtare si dy palë të barabarta sa I përket raporteve ndërshtetërore ku të dyja palët e njohin sovranitetin, në këtë rast Serbia e njeh sovranitetin dhe integritetin territorial të Republikës së Kosovës që e ka kontestuar por nëpërmjet neneve të kësaj marrëveshje është një njohje defacto e cila assesi nuk mund të mohohet nga cilido njeri që e lexon tekstin e marrëveshjes”, ka thënë ajo.

Sipas presidentes Osmani, Kosova është e përgatitur për takimin që pitet të zhvillohet në mes të palëve më 2 maj.

“Çka mund të garantoj unë si president e Republikës së Kosovës, që Kosova do të marrë pjesë edhe në këtë raund të bisedimeve në mirëbesim, do të jetë jashtëzakonisht konstruktive dhe e hapur gjithnjë duke mbrojtur sovranitetin e Kosovës, funksionalitetin e brendshëm të shtetit por edhe duke kontribuar me zgjidhje që i kontribuojnë pastaj paqes dhe stabilitetit afatgjatë…Më 2 maj siç e dini do të ketë diskutime për pika të ndryshme të kësaj marrëveshje, ju siguroj që Kosova është e përgatitur për gjithsecilën, jemi duke bërë përgatitje intensive, takime të shumë me kryeministrin, me ministrat e qeverisë, me ekipet tona të cilat po punojnë në dokumente të të cilat do të prezantohen. Por një gjë është e qatë, Kosova vazhdimisht do të respektojë sovranitetin e saj, integritetin territorial funksionalitetin e brendshëm,, kushtetutën e saj”, ka thënë Osmani.

Ndërsa presidenti i Maqedonisë së Veriut, Stevo Pendarovski, ka thënë se janë të interesuar që sa më parë të shohin fundin e këtij procesi.

“Nëse dikush dëshiron të shikojë në përvojën tonë dhe të mësojë diçka prej përvojës sonë si shtet që e kemi, para se gjithash mendoj për Marrëveshjen e Ohrit në vitin 2001, nuk do të gabojë sepse specifikat e çdo shteti diktojnë edhe zgjidhje specifike për atë shtet, nuk them se situata është identike, dhe se zgjidhjet e Marrëveshjes së Ohrit mund të reflektohen në një marrëveshje të ardhmen midis Kosovës dhe Serbisë, pro këtu ka modele të kohabilitimit brenda në shtet, dhe midis shteteve ,të cilat mund të shfrytëzohen. Por vendimin final çka do të pranojnë në atë dialog, kuptohet e kanë organet legjitime në Beograd dhe në Prishtinë. Ne këtu jemi vetëm fqinjë të mirë të cilët duan që sa më parë të shohin fundin e këtij kontesti të gjatë që objektivisht e ngadalëson bashkëpunimin rajonal që është shumë i rëndësishëm, si përgatitje për integrimin e tërësishëm n strukturat euroatlantike”, ka thënë ai.

Pendarovski e ka pritur presidenten e Kosovës me nderime të larta shtetërore e ushtarake.

Osmani e ka falënderuar atë për votën pro për pranimin e aplikacionit të Kosovës për anëtarësim në Këshillin e Evropës. /kp

April 26, 2023
Krasniqi: Qeveria Kurti abuzimet më të mëdha i ka bërë në sektorin e energjisë

Kryetari i Partisë Demokratike të Kosovës, Memli Krasniqi deklaroi se Qeveria Kurti abuzimet më të mëdha i ka bërë në sektorin e energjisë.

Lideri opozitar, në seancën e sotme të Kuvendit, ku po diskutohet për zhvillimet e fundit në KEK tha se këto abuzime janë bërë përmes skemave korruptive dhe keqpërdorimit të pushtetit absolut të instaluar në këtë sektor.

“Qeveria Kurti abuzimet më të mëdha i ka bërë në sektorin e energjisë, përmes skemave korruptive dhe keqpërdorimit të pushtetit absolut që ka instaluar në këtë sektor. E dyta, qytetarët e Kosovës sot e kanë jetën më të vështirë dhe jetojnë më keq si pasojë e këtyre abuzimeve. Me këto para që janë abuzuar në KEK dhe tërë sektorin e energjisë ka pasur mundësi të bëhen përmirësime të jashtëzakonshme në shumë sektor”, tha ai, transmeton kp.

Kryetarit të PDK-së i reagoi ministrja e Ekonomisë, Artane Rizvanolli, e cila tha se është tragjikomike të dëgjohet PDK-së kur flet për keqpërdorime dhe brengosjen për qytetarët.

“Është tragjikomike me dëgju PDK-në se si brengoset për pacientët, nxënësit, përfituesit e ndihmës sociale dhe për qytetarët. Mos t’iu kishim njohur dhe mos të kishim ditur sa keni bërë ju, edhe ju kishim besu ndoshta. Për rrymën në veri pse nuk e ndalët ju dhe pse paguat atë 20 vjet”, theksoi ajo.

April 26, 2023
Zbuloni simptomat e pazakonta të diabetit në sy: Ja si duket një sy diabetik

Diabeti mund të ndikojë në trupin tuaj në shumë mënyra.

Ndikon në aftësinë e trupit për të prodhuar ose përdorur insulinë në mënyrë efektive për të kontrolluar nivelet e sheqerit (glukozës) në gjak. Insulina është një hormon që përdoret për shndërrimin e glukozës (që trupi e merr nga ushqimi) në energji.

Kur një person diagnostikohet me diabet, kjo do të thotë se ai/ajo ka shumë glukozë në gjak. Diabeti mund të dëmtojë zemrën, veshkat dhe enët e gjakut. Madje dëmton edhe enët e vogla të gjakut në sy. Edhe nëse diabeti kontrollohet mirë, ai mund të ndikojë në në shikimin tuaj.

Si ndikon diabeti te sytë?

Sëmundja diabetike e syrit, përfshin probleme të mundshme të syrit që mund të prekin një pacient. Këto komplikime në sytë e një diabetiku, mund të përfshijnë retinopati diabetike, edemën makulare diabetike, kataraktet dhe glaukomën. Ka 4 kontribuues kryesorë për një sy diabetik, këto përfshijnë:

-Sheqeri i lartë i pakontrolluar në gjak

-Presioni i lartë i gjakut

-Kolesteroli i lartë i pa menaxhuar në gjak

-Pirja e tepërt e duhanit

Cilat janë simptomat e sëmundjes diabetike të syrit?

-Shikim i turbullt, ose të shohësh gjithçka tepër të turbullt.

-Ndryshim i shpeshtë i shikimit ndonjëherë nga dita në ditë.

-Zona të errëta ose humbje të shikimit.

-Në pamundësi për të kuptuar ose zbuluar ngjyrat.

-Njolla ose vargje të errëta (të quajtura edhe floaters).

-Blicet e dritës.

-Ankth në cepat e syve.

Megjithatë, ka diçka që duhet ditur edhe për këtë gjendje dhe simptomat e saj të hershme në sy. Sipas ekspertëve, shpesh nuk ka simptoma të hershme të sëmundjes së syrit diabetik. Dikush mund të mos ketë as ndonjë lloj dhimbjeje ose ndryshimi në shikim, pasi dëmtimi fillon të rritet brenda syve, veçanërisht me retinopatinë diabetike.

Si të menaxhoni sytë me diabet?

Sipas ekspertëve, diabeti i pakontrolluar mund të shkaktojë dëme të rënda në sy dhe gjithashtu mund të çojë në humbje të shikimit ose verbëri. Por kjo mund të menaxhohet me disa ndryshime të lehta të stilit të jetesës, ose thjesht duke u kujdesur për gjendjen. Më poshtë janë renditur disa nga mënyrat më të mira për të menaxhuar diabetin dhe për të mbajtur sytë të shëndetshëm.

Kontrolloni në mënyrë të vazhdueshme nivelet e glukozës në gjak.

-Menaxhoni presionin e gjakut dhe nivelet e kolesterolit.

-Ushtroni rregullisht për të mbajtur nën kontroll presionin e gjakut dhe obezitetin.

-Nëse pini duhan, merrni ndihmë për të lënë duhanin.

-Bëni një ekzaminim të zgjeruar të syve një herë në vit./TCH

April 26, 2023
Kryeministri falenderon Bislimin, Gërvallën e Sveçlën që me “punën e palodhshme” arritën ta zhbllokojnë liberalizimin e vizave

Kryeministri i Kosovës, Albin Kurti, në mbledhjen e sotme të Qeverisë ka falendereuar zëvendësat e tij, Besnik Bislimi e Donika Gërvalla, si dhe ministrin Xhelal, të cilët sipas tij, “me punën e palodhshme dhe të suksesshme” arritën që ta zhbllokojnë liberalizimin e vizave për Kosovë, “pas 4 vjetësh ngecjeje”.

Sipas Kurti, tani çdo qytetar i Republikës po ndihet më evropian dhe më afër Evropës.

“Nga 1 janari i vitit të ardhshëm, qytetarët tanë më në fund, do të mund të udhëtojnë pa viza, në 32 vende të tjera e reja evropiane përfshirë këtu edhe Bullgarinë, Rumaninë dhe Qipron që nuk janë pjesë e zonës Schengen. Pasaporta jonë do të jetë më e fuqishme, ashtu siç shteti ynë po bëhet përherë e më i fortë”, ka deklaruar Kurti.

Adresimi i plotë i kryeministrit Kurti në mbledhjen e 140-të të Qeverisë:

Të nderuar zëvendëskryeministra,

Ministra e zëvendësministra,

Të dashur qytetarë,

Javën që lamë pas edhe këtë javë, çdo qytetar i Republikës është ndjerë më evropian dhe më afër Evropës.

Liberalizimi i vizave kishte ngecur për katër vjet në agjendën e Këshillit të BE-së. Me shumë punë dhe angazhim, veçanërisht në raport me vendet hezituese, vitin e kaluar arritëm që gjatë Presidencës Çeke të zhbllokojmë këtë proces.

Javën e kaluar me 18 prill, Parlamenti Evropian kaloi vendimin e liberalizimit të vizave, për të nënshkruar pastaj të nesërmen me 19 prill. Dua të falënderoj edhe një herë zëvendëskryeministrat Besnik Bislimi dhe Donika Gërvalla, sikurse edhe ministrin e Punëve të Brendshme, Xhelal Sveçla, dhe stafet e tyre për punën e palodhshme dhe të suksesshme.

Nga 1 janari i vitit të ardhshëm, qytetarët tanë më në fund, do të mund të udhëtojnë pa viza, në 32 vende të tjera e reja evropiane përfshirë këtu edhe Bullgarinë, Rumaninë dhe Qipron që nuk janë pjesë e zonës Schengen. Pasaporta jonë do të jetë më e fuqishme, ashtu siç shteti ynë po bëhet përherë e më i fortë.

Ndërkaq, këtë javë u mor një vendim tjetër i rëndësishëm në po të njëjtin qytet, në Strasburg. Të hënën pra pardje me 24 prill, Komiteti i Ministrave me mbi 2/3 e votave të nevojshme votoi për pranimin e aplikimit të Kosovës për anëtarësim. Ne besojmë thellësisht që si shtet i ri, demokratik dhe paqedashës, do të japim kontributin e çmueshëm në të ardhmen si anëtar me të drejta të plota në Këshillin e Evropës. Dhe natyrisht që rezultatet gjithnjë e më të mira sa i përket tri vlerave fundamentale të Evropës, sundimit të ligjit, demokracisë dhe të drejtave të njeriut kanë ndikuar shumë në këtë arritje të madhe.

Këto dy vendime të rëndësishme, brenda më pak se një jave, konfirmojnë rrugën tonë evropiane. Konfirmojnë që jemi në rrugën e duhur dhe konfirmojnë që Kosova i përket Evropës – si Union, si vlerë.

Sot do të shqyrtojmë edhe Projektligjin për Ratifikimin e Marrëveshjes për Statusin dhe Funksionet e Komisionit Ndërkombëtar për Personat e Zhdukur. Kjo iniciativë e aprovuar në parim vite më parë, sot po konkretizohet dhe po merr drejtimin e duhur.

Çështja e personave të zhdukur me forcë gjatë luftës në Kosovë është një çështje aktuale dhe permanente deri në zgjidhjen e plotë të saj. Temë prioritare, e cila do të vazhdojë të adresohet edhe më tutje si çështje e natyrës urgjente. Miratimi i këtij Projektligji sot, është i një simbolike të veçantë dhe gjithashtu i një rëndësie të madhe. Jo vetëm për faktin që jemi në prag të shënimit të 27 Prillit- Dita e Personave të Zhdukur me Dhunë gjatë Luftës në Kosovës, por është edhe në vazhdën e iniciativave të konkretizuara së fundmi si në procesin e liberalizimit të vizave ashtu dhe në procesin e anëtarësimit në Këshillin e Evropës, e po ashtu në kohën kur çështja e personave të zhdukur me forcë ka marrë një dinamikë të re edhe në kuadër të dialogut mes Republikës së Kosovës dhe Serbisë.

Shteti ynë, Komisioni Qeveritar për Persona të Zhdukur në Zyrën e Kryeministrit, tanimë ka një histori të gjatë të bashkëpunimit me ICMP. Ky aderim, pas mandatit dhe statusit të ri që ICMP ka marrë viteve të fundit, do të jetë një rritje e këtij bashkëpunimi në këtë fazë të rëndësishme të procesit , njëkohësisht do të jetë edhe një mundësi që e kam prezantuar edhe kohë më parë gjatë takimit me ekspertët tanë mjekoligjorë mbi gatishmërinë për angazhim dhe dhënie të kontributit në ndriçimin e të vërtetës si në rastet e luftërave të tjera jashtë vendit tonë, siç ishte ajo në Ukrainë së fundmi por edhe vatrat e tjera anë e mbanë botës. Kapacitetet tona institucionale e profesionale, përmes edhe angazhimit si anëtarë në ICMP, do të jenë në shërbim te të gjitha vendeve e shteteve që kanë kaluar nëpër tragjedi të ngjashme të luftës, e kësisoj do të jemi në shërbim të paqes dhe në shërbim të adresimit të proceseve të ballafaqimit me të kaluarën kudo.

April 26, 2023