Blog

Në Gjykatën Speciale në Hagë, mbrojtja e Pjetër Shalës ka filluar intervistimin e dëshmitarit të shtatë të Zyrës së Prokurorit të Specializuar (ZPS). Kundër-pyetjet e mbrojtjes po zhvillohen në seancë të mbyllur për publikun.

Kjo është dita e tretë që dëshmitari i mbrojtur paraqitet në gjykatoren e Speciales.

Pjetër Shala, ndaj të cilit rëndojnë akuza për krime të pretenduara të luftës, po merr pjesë në këtë seancë përmes video-lidhjes nga qendra e paraburgimit.

Në fillim të seancës, kryetarja e trupi gjykues, Mappie Veldt-Foglia, ka dhënë një urdhër gojor përmes të cilit lejohet përdorimi i disa dokumenteve të nxjerra rishtazi si prova nga ana e mbrojtjes. Bëhet fjalë për një fotografi dhe tri harta.

Lajmi i plotë është në sistemin me parapagim.

Për dëshmitarin e shtatë të ZPS-së, të mërkurën kanë përfunduar pyetjet nga mbrojtësi viktimave, ndërsa më herët ato të Prokurorisë.

Pjesë ma e madhe e dëshmisë së tij ka qenë e mbyllur për publikun ndërsa trupi gjykues ka deklaruar se pas përfundimit të dëshmisë transkripti do të rishikohet dhe do të bëhet publik.

Ndërsa Pjetër shala, i cili ndodhet në paraburgim prej marsit të vitit 2021, ka kërkuar që seancat të jenë publike meqë identiteti i dëshmitarëve nuk po bëhet i ditur.

Sipas Speciales “Krimet për të cilat akuzohet Shala u kryen përafërsisht midis 17 majit 1999 dhe 5 qershorit 1999 kundër personave që u mbajtën të ndaluar në fabrikën e metalit në Kukës(Shqipëri), që pretendohet se përdorej prej Ushtrisë Çlirimtare të Kosovës”.

Pjetër Shala u arrestua më 16 mars 2021 nga autoritetet belge dhe u transferua në Hagë më 15 prill të atij viti, n bazë të një kërkese për bashkëpunim në zbatimin e fletëarrestit dhe urdhrit për transferim lëshuar nga Dhomat e Specializuara të Kosovës./kp

Gjatë ditës të mërkurës dhe të enjtes, disa qytetarë në Mal të Zi protestuan në mbështetje të serbëve të veriut të Kosovës.

Por, këto reagime, sipas Ministrit për të Drejtat e njeriut dhe pakica në Mal të Zi, Fatmir Gjeka, nuk janë shqetësuese, raporton Klankosova.tv.

Ai në “Sytë 7” në Klan Kosova tha se ata që reagojnë kundër Kosovës janë nga komuniteti serb, që janë diku afër 30% në Mal të Zi.

Megjithëse, Gjeka tha se nuk janë të gjithë serbët e tillë, por vetëm disa grupe të vogla që janë edhe pro-ruse.

Ai përmendi edhe faktin që muaj më parë, Komuna e Zetës, e përbërë nga serbë, kërkoi nga Parlamenti i Malit të Zi ta tërheqin njohjen e pavarësisë së Kosovës. Këto, Gjeka në “Sytë 7” në Klan Kosova tha se janë banale dhe vetëm politika për konsum ditor, e asgjë shqetësuese.

Policia e Kosovës ka njoftuar se është gjetur pa shenja jete një person në një shtëpi në Pejë.

Rasti ka ndodhur të enjten në ora 11:00.

“Është raportuar për një person pa shenja jete në një shtëpi. Njësitet relevante policore dhe një ekipe e mjekëve kanë dal në vendin e ngjarjes, ku ekipi mjekësor ka konstatuar se trupi i viktimës mashkull kosovar është pa shenja jete”, thuhet në raport.

Në lidhje me rastin është konsultuar prokurori i shtetit me urdhër të së cilit trupi i pajetë i viktimës është dërguar në IML për obduksion.

Presidentja e Kosovës, Vjosa Osmani ka bërë të ditur sot se ka takuar kryeministrin e Britanisë së Madhe, Rishi Sunak në kuadër të Samitit të Komunitetit Politik Evropian, në Moldavi.

Osmani ka potencuar se me Sunakun ka biseduar për zhvillimet e fundit në rajon dhe bashkëpunimin e fortë të Kosovës me Britaninë e Madhe.

“Shprehim mirënjohjen tonë për mbështetjen e qëndrueshme të Mbretërisë së Bashkuar dhe përkushtimin tonë të vazhdueshëm për të vazhduar përpjekjet tona të përbashkëta për paqen dhe sigurinë afatgjatë.”, ka shkruar Osmani në Twitter.

Presidentja e Kosovës, Vjosa Osmani në Moldavi ka takuar edhe presidentin e Francës, Emmanuel Macron, kancelarin e Gjermanisë, Olaf Scholz, përfaqësuesin e lartë për politikë të jashtme të BE-së, Josep Borrell e po ashtu edhe presidentin e Ukrainës, Volodymyr Zelenskyn./KP

Protestuesit serbë tashmë janë mbledhur para objekteve komunale në Zubin Potok, Zveçan dhe Leposaviq.

Pjesëtarë të KFOR-it dhe të Policisë së Kosovës të cilët po kujdesen për ruajtjen e rendit, po vazhdojnë të qëndrojnë pranë dhe brenda ndërtesës së kësaj komune.

Aktualisht situata në Zveçan, por edhe në komunat tjera veriore në përgjithësi është e qetë, ndërsa numri i protestuesve është simbolik.

Situata në këto komuna është tensionuar të premten e 26 majit kur kryetarët e betuar u detyruan të futën në zyrat e tyre të punës nën asistencën e Policisë së Kosovës.

Si pasojë e protestave të dhunshme, janë plagosur gjashtë policë të Kosovës dhe 30 ushtarë të KFOR-it, ndërkohë që serbët kanë sulmuar edhe Policinë e Kosovës dhe gazetarët.

Shtetet e Bashkuara kanë kritikuar Kosovën për përshkallëzimin e tensioneve me Serbinë, derisa anuluan edhe pjesëmarrjen e vendit në një stërvitje ushtarake të NATO-s “Defender 23”, pasi Prishtina refuzoi t’i tërheqë kryetarët e komunave dhe forcat e saj policore nga veriu i vendit.

Ndërsa një sinjal për tejkalim të situatës u pa tek të enjten, kur ambasadori amerikan Jeffrey Hovenier, tha se me kryeministrin Albin Kurti kishin një takim produktiv dhe se kishin biseduar për marrëveshjen bazë me Serbinë. Në anën tjetër kreu i ekzekutivit tha se janë të angazhuar për qetësimin e situatës në veri të vendit.