Blog

Kosova ka avancuar në fushën e sundimit të ligjit dhe luftimit të korrupsionit, u tha në takimin e përbashkët të grupit punues në mes të përfaqësuesve të institucioneve të Republikës së Kosovës dhe përfaqësuesve nga Këshilli i Evropës.

Zëvendësministri i Punëve të Jashtme dhe Diasporës, Kreshnik Ahmeti, tha se Kosova është përmirësuar për njëzet vende në dy vitet e fundit në indeksin e Transparency International, raporton KosovaPress.

“Progresi i vazhdueshëm i Kosovës është shënuar edhe nga organizata të ndryshme ndërkombëtare të pavarura , Ëorld Justice Project, e ka renditur Kosovën të parën në Evropë dhe të dytën globalisht për përmirësimin më të madh në sundimin e ligjit. Në indeksin Transparency International, Kosova ka përmirësuar pozitën e saj për 20 vende në dy vitet e fundit, në fushën e luftimit të korrupsionit. Përfundimi i fazës fillestare të anëtarësimit është një moment i rëndësishëm në rrugën tonë drejt integrimit të plotë në bashkësinë ndërkombëtare dhe e sjell Kosovën më afër se kurrë në Këshillin e Evropës dhe qytetarët e Kosovës më afër se kurrë në përfitimet nga Këshilli i Evropës dhe mekanizmat e saj”, tha Ahmeti.

Ai shtoi se kalimi i fazës së parë të anëtarësimit në Këshillin e Evropës është një moment i rëndësishëm për Kosovën.

“Kjo arritje pasqyron përpjekjet tona të vazhdueshme për të përmirësuar pozitën e Kosovës në të gjitha shtyllat vitale të demokracisë veçanërisht në fushën e të drejtave të njeriut, sundimit të ligjit dhe lirisë së mediave. Në këtë drejtim, paralelisht me procesin bazë të të anëtarësimit, ne jemi duke prioritizuar konventa të ndryshme, relevante për Republikën e Kosovës dhe të rëndësishme për qytetarët tanë, pra, Konventa të Këshillit të Evropës në të cilat do të bëhemi pjesë në të ardhmen”, tha ai.

Ndërsa,drejtori për Koordinim të Programeve të Këshillit të Evropës, Claus Neukrich, tha se në bazë të raporteve të monitorimit është parë një avancim sa i përket kornizës ligjore të Kosovës, sidomos me përfshirjen e Konventës së Stambollit në Kushtetutën e Kosovës.

Ai shtoi se pret një shkëmbim të frytshëm dhe të mirë për aktivitetet e përbashkëta mes KiE-së dhe Kosovës.

“Ne kemi kryer disa procese të monitorimit në të kaluarën dhe projekte të bashkëpunimit, duke përfshirë luftimin e korrupsionit dhe pastrimin e parave. Në sistemin e drejtësisë më e rëndësishmja është të përmendim rezultatet e raporteve të grupit të ekspertëve kundër trafikimit me qenie njerëzore, duke u bazuar edhe në Konventë ne KiE-së, por edhe Konventës së Stambollit për dhunën në familje dhe ndaj grave, këto janë të theksuara në raportin për Kosovën. Bazuar në këto vlerësime të monitorimit ne i kemi përshtatur aktivitetet për Kosovën”, tha ai.

Kosova ka kaluar fazën e parë të anëtarësimit në Këshillin Evropian në muajin prill të këtij viti. Procesi tani ka kaluar në Asamblenë Parlamentare, ku pritet të caktohen disa raportues për hartimin e raportit për përshtatshmërinë e Kushtetutshmërisë së Kosovës me Konventat e Këshillit të Evropës, pastaj i njëjti do të dërgohet në Asamblenë Parlamentare për shqyrtim.

Kryeministri i Kosovës, Albin Kurti ka dhënë detaje për mbledhjen e përbashkët në mes të dy qeverive shqiptare, e cila do të mbahet nesër në Gjakovë.

Kurti në një konferencë për media, ka thënë se nesër në Gjakovë do ta mbajnë mbledhjen e përbashkët me Qeverinë e Shqipërisë.

“41 marrëveshjeve të më hershme, prej të cilave 39 të zbatuara plotësisht e dy të tjera në fazën finale të zbatimit, do t’i shtohen edhe 13 të reja në fushën e drejtësisë, arsimit, shëndetësisë, bujqësisë, kulturës, ndërmarrësisë e mbrojtjes dhe një deklaratë e përbashkët për forcimin në fushën e sigurisë. Në rend të ditës së nesërme do ta kenë edhe diskutimin lidhur me bashkëpunimin për realizimin e një qëllimi të kamotshëm, atë të bashkimit doganor. Krahas marrëveshjeve e memorandumeve të bashkëpunimit në njohjen e të drejtës për ushtrimin e avokatit dhe ndërmjetësit, për bursa studentore, ofrimin e shërbimeve shëndetësore, lehtësimin e procedurave të mallrave ushtarake dhe të produkteve me origjinë joshtazore”, tha ai.

Sipas tij, veçanti e kësaj mbledhje është edhe takimi i kryetarëve të komunave të zonave kufitare në të dy anët, ku do të diskutohet që sfidat të kthehen në mundësi dhe mundësit në përfitim për qytetarët.

Sipas tij, lëvizjes së qytetarëve në zonat ndërkufitare i kanë dhënë rëndësi të duhur dhe është rritur në 26 numri i vendkalimeve të veçanta kufitare.

“Nga prillin i këtij viti mbi 200 mijë shtetas të Kosovës dhe Shqipërisë që banojnë në zonat deri në 30 kilometra nga kufiri tokësor, kanë të drejt të kalojnë kufirin lirshëm dhe të qëndrojnë në zonën kufitare për arsye sociale, kulturore, familjarë e shëndetësore”, tha ai.

Kryeministri Albin Kurti tha se i ka propozuar vendeve të QUINT-it një listë me pikat për de-eskalimin e situatës në veri të vendit, raporton Ekonomia Online.

“Ditën e fillova me ambasadorët me të cilët folëm për propozimin e Qeverisë në lidhje me de-eskalimin e situatës në veri të vendit. Kam pasur një telefonatë Borellin në lidhje me situatën në veri kurse sot kanë mburritur në takim vendet e QUINT-it”.

“De-eskalim dhe normalizimi. Unë i kam ofruar dje Borelit dhe vendeve të QUINT-it një listë. Hapi i parë sundimi i ligjit në katër komunat e veriut të Kosovës, duke përfshirë identifikimin dhe arrestimin e tyre. E dyta Grupet e dhunshme tërhiqen menjëherë nga Kosova. Forcat e policisë monitorojnë sipas situatës. Tre Policia e Kosovës dhe KFOR-i do të kryejnë së bashku monitorimin”, tha ai.

Policia në Gjilan ka arrestuar një person që ishte i dënuar me burgim prej 6 muajsh për veprat penale “Cenim i pa prekshmërisë së banesave dhe objekteve”.

Pas përfundimit të procedurave i njëjti është dërguar në vuajtje të dënimit.

Njoftimi i plotë:

Arrestohet personi i kërkuar me urdhëresë të gjyqësore

Gjilan, 13 qershor 2023

Drejtoria Rajonale e Policisë Gjilan, Stacioni Policor Gjilan me datën 13.06.2023 në kuadër të planit operativ për realizim të urdhëresave gjyqësore ka arrestuar personin e kërkuar kosovare     G.B.

Ai ishte i kërkuar në bazë të urdhëresës së lëshuar nga Gjykata Themelore Gjilan me dënim burgimi gjashtë (6) muaj për veprat penale ‘’Cenim i pa prekshmërisë së banesave dhe objekteve’’.

Pas përfundimit të procedurave i njëjti është dërguar në vuajtje të dënimit.

Drejtoria Rajonale e Policisë në Gjilan do të vazhdojë me realizimin e urdhëresave ndaj personave që ende nuk i janë përgjigjur thirrjes së gjykatave.

Ministri Mjedisit, Planifikimit Hapësinor dhe Infrastrukturor, Liburn Aliu ka vizituar komunën e Leposaviqit, ku është pritur nga kryetari, Lulëzim Hetemi.

Vizita e ministrit Aliu ka ndodhur të martën në mëngjes, por derisa ka dalë nga ndërtesa e komunës, protestuesit kanë hedhur vezë dhe ngjyrë në drejtim të veturës së ministrit, raporton KosovaPress.

Ministri Aliu kishte provuar edhe javën e kaluar që të bënte një vizitë të tillë Leposaviq, por që vet ministri ka thënë se nuk ishte e mundur të bëhej vizita pasi që Policia e Kosovës e kishte udhëzuar që të kthehej pas.

Ndërkohë, Aliu i pati quajtur të pavërteta edhe lajmet se KFOR-i e ndaloi ta takoi kryetarin e Leposaviqit.

Në Dhomat e Specializuara të Kosovës në Hagë edhe sot ka vazhduar marrja në pyetje e dëshmitarit të tetë nga Zyra e Prokuroritë të Specializuar në gjykimin kundër ish-krerëve të UÇK-së, Hashim Thaçit, Kadri Veselit, Jakup Krasniqit dhe Rexhep Selimit.

Seancën e sotme gjyqësore kundër tyre nga salla e gjykimit po e përcjellin Thaçi, Veseli e Rexhepi, ndërsa Krasniqi përmes video-lidhjes.

Me kërkesë të Zyrës së Prokurorisë qysh në nisje të pyetjeve seanca ka kaluar e mbyllur për publikun.

Dëshmitari i tetë ka nisur nga dje dhënien e dëshmisë së tij kundër ish-krerëve të UÇK-së.

Gjykimi ndaj ish-krerëve të UÇK-së ka nisur më 3 prill me deklaratat hyrëse të palëve.

Para trupit gjykues, Thaçi, Veseli, Selimi dhe Krasniqi janë deklaruar të pafajshëm për akuzat për krime të pretenduara të luftës.

Ata ndodhen në qendrën e paraburgimit në Hagës prej nëntorit të vitit 2020.

Kryeministri i Kosovës, Albin Kurti, është zotuar për avancimin e rolit të grave në vendimmarrje.

Në konferencën e dytë vjetore të Federatës Ndërkombëtare të Grave për Paqe Botërore që po mbahet në Prishtinë, Kurti tha se ekzekutivi po bënë përpjekje për të rritur edhe më tej pjesëmarrjen e grave në institucionet të sigurisë.

Ai shtoi se Kosova është shteti me demokratik në Ballkanin Perëndimor.

“Paqja vjen pas çlirimit dhe gratë e dinë mirë rëndësinë e çlirimit nga shtypja”, tha ai.

Avancim të rolit të gruas në shoqëri kërkuan edhe pjesëmarrësit e tjerë në këtë konferencë.