Kryeministri i Shqipërisë, Edi Rama, ka thënë se Albin Kurti dhe Aleksander Vuçiq nuk janë të interesuar për Asociacionin, andaj sipas tij, atyre “u duhet armiku i jashtëm”.
Në një konferencë të jashtëzakonshme për media, Rama ka thënë se mbledhja e dy qeverive, Kosovë-Shqipëri, nuk mund të mbahet derisa “Kosova po digjet ngadalë, por po digjet në reputacionin e saj ndërkombëtar me ata që e krijuan si shtet.
“Ka dy njerëz që janë të pa interesuar për Asociacionin dhe në këtë pikë janë bashkë, jo janë bashkë në kuptimin që janë marrë vesh, absolutisht, por janë të interesuar që Asociacioni të mos krijohet, dhe këta janë kryeministri i Kosovës dhe presidenti i Serbisë. Pse, sepse për mënyrën se si e kanë të ndërtuar politikën e tyre të brendshme u duhet armiku i jashtëm. Pse i çon presidenti i Serbisë ushtarët në kufi me Kosovën, mendoni ju që në cepin më të largët të mendjes së vet dhe në ëndrrën e tij më kurajoze ai mendon se mund të futet një ushtarë serb 1 metër në kufirin e Republikës së Kosovës, absolutisht jo, as që nuk e imagjinon, por pse i çon, nuk i çon për të mbrojtur me armë serbët që janë në Kosovë por i çon për të ndezur shpirtin nacionalist të serbëve që janë në Beograd dhe në Serbi”, ka thënë Rama.
Rama ka theksuar se Serbia e ka humbur luftën ushtarakisht një herë e mirë në vitin 1999 dhe sipas tij prej atëherë nuk është më kërcënim për Kosovën.
“Serbia qysh nga vitit 1999 nuk është më kërcenim për Kosovën, nuk ka çka i bën fare, jo sepse është albin Kurti aty apo cilido coftë, por sepse aty është Amerika, është kjo Amerikë e cila sot është në acarimin maksimal me Qeverinë e Kosovës. Atëherë për çfarë duhet kjo histori konfrontimi permanent, se duhet për politikë të brendshme dhe cila është gjëja që e shpërbën figurën e armikut imagjinar në sytë e zgjedhësve të njërit e tjetrit, Asociacioni, që mbyll përfundimisht në këtë aspekt po flas, mundësinë për të vazhduare lufta që këta nuk na lënë të zgjedhim, këta nuk duan të zgjidhen, është shumë e qartë, prandaj unë jo vetëm që nuk prekem por përkundrazi më vjen mirë dhe është pjesë e marrëdhënies shumë të shëndetshme që kam me albin Kurti sepse themi atë që mendojë edhe kur jemi apo nuk jemi dakord. Qëllimin e kemi një, qind për qind, njohja e plotë përfundimtar e ndërkombëtare e Kosovës, edhe nga Serbia, dhe kërkimi i fjalës që Serbia duhet t’i bëjë Kosovës për krimet që ka bërë në Kosovë. Ndryshimi midis meje dhe albinit është që Albini i do këto në filli, unë them që këto vinë në fund”, ka thënë Rama.
Duke folur për mbledhjen e dy qeverive e cila ishte planifikuar të mbahet të mërkurën në Gjakovë, Rama ka thënë se nuk mund të bëhet teatër në këtë situatë kur sipas tij Kosova po digjet në reputacionin e saj ndërkombëtar.
“Nuk jemi në kushtet kur mund të bëjmë një mbledhje si ufo, Shqipëria nuk është ufo të paktën, Shqipëria është pjesë e pandashme e bashkësisë euroatlantike dhe nuk mundet as të bëjmë një teatër me marrëveshje për bujqësinë. Blegtorinë, e shumë të tjera, që janë shumë të rëndësishme, që janë gati dhe që mund të bëhen edhe pas një jave, dy javësh, tre javësh, ndërkohë që Kosova po digjet ngadalë por po digjet në reputacionin e saj ndërkombëtar me ata që e krijuan si shtet. Unë i marr me mend të gjitha nënqeshjet dhe përqeshjet me bashkësinë euroatlantike sot që krijojë sot të atyre që nuk e deshën kurr krijimin e Kosovës së pavarur, i marr me mend, kanë të drejtë të nënqeshin e përqeshin, sikur thonë ‘hë e donit shtet’, dhe këtë gjë ne nuk duhet ta lejojmë. Por për çfarë bëhet, nuk e kuptoj, për çfarë bëhet, për një të ngujuar atje që nuk ushtron dot jo detyrën pro nuk ushtron dot as funksionet bazike të një njeriu të lirë normal që të dalë të marrë ajër jashtë godinës, për çfarë”, ka thënë ai.
Pak para mbajtjes së kësaj konference, KosovaPress ka pyetur Qeverinë e Kosovës lidhur me anulimin e mbledhjes së dy qeverive, por nga ekzekutivi kanë mohuar diçka të tillë.
Zëdhënësi i Qeverisë, Përparim Kryeziu, ka thënë për KosovaPress se “mbledhja nuk është anuluar dhe gjithçka është gati në Gjakovë.
“Mbledhja nuk është anuluar. Gjithçka është gati në Gjakovë. Kryeministri Kurti tani po merr pjesë në koncertin e sontëm atje të Ansamblit Shota dhe muzikantëve nga Kosova nga Shqipëria që është edhe si uvertyrë për mbledhjen e nesërme. Për anulimin po dëgjojmë tani nga ju”, ka thënë Kryeziu për KosovaPress.
Javën e kaluar, kryeministri i Shqipërisë, Edi Rama, ka bërë të ditur se e ka dorëzuar një draft të Asociacionit të komunave me shumicë serbe te presidenti francez Emmanuel Macron dhe kancelari gjerman Olaf Scholz.
Ai ka delaruar se pret që një dokument i tillë të çoja dialogun Kosovë-Serbi në një tjetër nivel.
Ndërsa kryeministri i Kosovës, Albin Kurti, ka deklaruar se “nuk kam dyshim që kryeministri i Shqipërisë, Edi Rama beson që propozimi i tij për Draftstatutin është i mirë, dhe duke qenë kështu atëherë unë çka propozojë është që kryeministri Rama këtë draft për pakicat kombëtare të ua propozojë presidentit të Serbisë, Aleksandër Vuçiq më së largu në takimin e radhës të “Ballkanit të Hapur” për shqiptarët në Preshevë, Medvegjë dhe Bujanoc”./KP
