Një sherr fizik ku nuk kanë munguar grushtet e shqelmat, ka shpërthyer në rrugën “Rrahim Beqiri” në Prishtinë.
Ende nuk dihen arsyet e kësaj përleshje, megjithatë, në videon e siguruar nga ATV mund të shikoni se në këtë përleshje janë përfshirë shtatë persona.
Kryetari i Partisë Demokratike të Kosovës, Memli Krasniqi, ka kërkuar që kryeministri Albin Kurti të raportojë në Kuvend në lidhje me situatën e sigurisë në vend. Krasniqi tha se nuk mund të sillemi normal kur ka pasur përshkallëzim të situatës në veri të Republikës.
Krasniqi u shpreh se prioritet i prioriteteve duhet të jetë kthimi i tre policëve të cilët janë rrëmbyer gjatë së mërkurës e që për kreun e PDK-së përbën një akt agresioni ndaj Republikës së Kosovës.
“Situata në vendin tonë nuk është normale andaj besoj që ne s’mund ta luajmë normaliteitn, as jetën institucionale, as veçanërisht Kuvendin e Kosovës. Dje ka ndodhur përshkallëzim i situatës së sigurisë, rrëmbimi i tre policëve të Kosovës është një akt agresioni kundër Republikës sonë, është paekuivoke shkelje e sovranitetit dhe integritetit territorial. Në këtë moment përtej qëndrimeve e vlerësimeve të kujtdo, prioritet i prioriteteve duhet të jetë kthimi i policëve tonë në Kosovë dhe pranë familjeve të tyre duke garantuar shëndetin e sigurinë e tyre”, deklaroi Krasniqi.
Krasniqi i kërkoi kryetarit të Kuvendit, Glauk Konjufca, që të thërrasë kryeministrin në një seancë në çfarëdo kohe gjatë ditës së sotme.
“Nuk është e mundur që ne të sillemi sikur se asgjë s’ka ndodhur që të mblidhemi këtu e të vazhdojmë seancat e mbetura që të bëjmë manifestime normale kur i kemi tre policë të rrëmbyer, kur kemi akt agresioni të Serbisë kundër Kosovës, na takon si Kuvend, si deputetë, si përfaqësues të qytetarëve, si përfaqësues edhe të atyre tre policëve që të jemi në nivelin e përgjegjësisë që ta kemi kryeministrin këtu, që të vijë të na informojë e të njoftojë sepse kjo situatë kërkon një sjellje tjetër”, vijoi Krasniqi.
Aktualisht, Kuvendi i Kosovës është duke zhvilluar seancë me pikat e prapambetura nga seancat e kaluara. /KP
Ish-ambasadori i Shteteve të Bashkuara në Kosovë, Greg Delawie, ka shpërndarë artikullin e ish-zëvendësshef i misionit të OSBE-së në Kosovë, Edward Joseph, i cili mendon se SHBA-ja po krijon një krizë në Kosovë.
Delawie i cili kishte shërbyer si diplomat amerikan në Kosovë nga viti 2015 deri më 2018, e ka shpërndarë në rrjetin e tij social “Twitter”.
Në tekstin që e ka shpërndarë Delawie, Joseph shkroi se mos-kritika ndaj presidentit të Serbisë, Aleksandar Vuçiq e ka bërë atë që të ringjall nacionalizmin e “Serbisë së madhe” që thotë se e solli Beogradin në konflikt me fqinjët e tij dhe NATO-n në vitet 1990.
Ai këtë e bazon në deklarimet e fundit të zyrtarëve amerikanë ndaj kryeministrit Albin Kurti, pas veprimeve në veri të vendit.
— Ambassador Greg Delawie (@GregDelawie) June 14, 2023
Bernë-Prishtine, 15 qershor -Pas kidnapimit të tre policëve shqiptar në Kosovë nga policia serbe dhe pas arrestimit të 3 kosovarëve tjerë në Merdare bashkë me provokimet tjera të bandave kriminale serbe në rrugët e Serbisë duke u paraqitur here si « police » e here si « wagner », ka shkaktuar panik dhe pasiguri tek mërgimtarët shqiptare, sidomos ata kosovaret qe gjate pushimeve i bien tranzit nëpër Serbi, njofton nga Prishtina, korrespodenti i gazetës zvicerane ne shqip Le Canton27.ch
Për çdo vit tranzit përmes Serbisë kalojnë mbi dy milionë shqiptarë. Rrisin buxhetin e Serbise për një miliard.
Analistët: Me paret e shqiptarëve Serbia blen armatim kundër Kosovës
Një numër i madh i diasporës shqiptare janë edhe ata nga Zvicra te cilët e kalojnë këtë rruge me fëmije me plote panik. Sipas gazetës zvicerane ne shqip për çdo vit rrugëve te Serbisë kalojnë mbi 2 milionë shqiptarë te Ballkanit (Kosova, Shqipëria, Maqedonia Veriore, Lugina e Preshevës, Malit të Zi si dhe Greqia). Mësohet se buxheti i Serbisë rritjet për një miliardë euro ne vit nga diaspora shqiptare. Sipas analisteve kosovar, është konstatuar se Serbia, me ato mjete blen armim luftarake kundër Kosovës.
Ministria e Punëve të Jashtme dhe Diasporës ka ftuar qytetarët e Kosovës të shmangin kalimin nëpër Serbi
“MPJD, gjatë ditës ka pranuar raportime për arrestime të qytetarëve të Republikës së Kosovës nga autoritetet serbe përgjatë kalimit të tyre nëpër Serbi, dhe po merret nga afër me rastet nëpërmjet Zyrës Ndërlidhëse në Beograd.
Teksa u bëhet thirrje qytetarëve që të përdorin rrugë alternative për udhëtim.
Marrë parasysh zhvillimet e fundit, dhe duke e njohur qasjen jo korrekte të autoriteteve serbe, me qëllim të shmangies të çfarëdo incidenti, MPJD fton qytetarët që të përdorin rrugë alternative për udhëtim”, thuhet në njoftim, citon gazeta zvicerane Le Canton27.ch
Një apel te ngjashëm e kane dhënë edhe ish-presidenti i Kosovës, biznesmen i njohur zviceran Behgjet Pacolli, aktualisht kryetar i Aleancës për Kosovë të Re (AKR). Zotëri Pacolli i është lutur bashkatdhetarëve të zgjedhin rrugë alternative, e të mos kalojnë përmes Serbisë.
“I lusë gjithë bashkatdhetarët të zgjedhin rrugë alternative, e të mos kalojnë përmes Serbisë. Provokimet serbe nuk kanë të ndalur! Ju uroj mirëseardhje në Kosovë!”, ka thënë z. Pacolli për gazetën zvicerane ne shqip Le Canton27.ch. Redaksia jone ka kontaktuar edhe ambasadën zvicerane ne Prishtine dhe Beograd për te marr një deklarate rreth kësaj gjendje dhe provokimeve serbe ndaj diasporës kosovare rrugëve te Serbisë.
Kosova do të ballafaqohet nesër më Rumaninë në kuadër të kualifikimeve për në Kampionatin Evropian Euro 2024.
Para kësaj sfide, sot, në konferencë për media do të flas trajneri i Kombëtares së Kosovës, Alain Giresse nga ora 16:30.
Po ashtu, sot konferencë për media do të flas edhe Kombëtarja e Rumanisë, me fillim nga ora 17:30, raporton KP.
Në agjendën e zbuluar nga ana e Federatës së Futbollit të Kosovës bëhet e ditur se të dy kombëtaret sot do t’i zhvillojnë edhe stërvitjet e fundit para ndeshjes në stadiumin “Fadil Vokrri”.
Deputeti Haki Abazi ka reaguar në lidhje me rastin e fundit që ka ndodhur dje në Kosovë, ku u kidnapuan tre policë të Kosovës nga ata serbë.
Abazi përmes një postimi në Facebook, ka thënë se Serbia ka aleat Rusinë për të vazhduar në kursin e saj të destabilizimit të Ballkanit me qëllim të vendosjes së hegjemonisë dhe dominancës rajonale dhe shtimin e pazarit për Rusinë kundrejt Evropës dhe SHBA-ve. Sipas tij Kosova duhet që të dalë nga kurthi i Serbisë ku kemi rënë.
“Përbrenda Kosovës nuk po shihet që ka as seriozitet, as gatishmëri por as edhe kapacitet për të kuptuar dhe për te sinkronizuar interesat afatgjata e strategjike të vendit tonë me shtetet dhe institucionet e botës demokratike. Kurti ka zgjedhur rrugën e gabuar për të realizuar të drejtën e Kosovës për veprim institucional”, ka shkruar Abazi.
Deputeti Abazi ka përmendur disa nga prioritetet që duhet të jenë në Kosovë, përfshirë këtu garantimi i integritetit territorial dhe funksionimi i institucioneve vitale përfshirë edhe një diplomaci aktive për të rivendosur kanalet e komunikimit me kryeqytetet e vendeve demokratike
“Kthimi i policëve të kidnapuar, Lirimi i qytetarëve Kosovar të arrestuar në Serbi, Ndërtimi i konsensusit dhe kohezionit gjithë partiak, Koordinimi i afërt dhe i rregullt me Shqipërinë, Shtendosja e situatës në veri, Kthimi normalitetit në jetën e përditshme, Luftimi i krimit dhe korrupsionit në gjithë territorin e republikës”, ka thënë Abazi.
Tutje, siç thotë ai, dëmi i shkaktuar është shumë i madh tanimë, mirëpo sipas tij kjo nuk do të thotë që duhet thelluar dimensionet e këtij dëmi dhe afatin e rikthimit në procese integruese e bashkërenduese.
“Kosova e zhvilluar dhe e ardhmja saj si pjesë e familjes euroatlantike është më e rëndësishme se çfarëdo arsyetimi dhe diskursi i momentit apo fati i individëve që kanë edhe përgjegjësi të veshur me votë. Me kokë të ftohët duhet reflektuar dhe vepruar në këtë fazë të realitetit që na rrethon, pa humbur fokusin nga e ardhmja dhe qëllimet tona si komb Evropian. Dëmi i shkaktuar është shumë i madh tanimë por kjo nuk do të thotë që duhet thelluar dimensionet e këtij dëmi dhe afatin e rikthimit në procese integruese e bashkërenduese”, përfundon statusi i tij.
Zëvendëskryetarja e delegacionit të Parlamentit Evropian për marrëdhëniet me Bosnje dhe Hercegovinën dhe Kosovën, Delara Burkhardt është takuar dje në Francë me presidenten Vjosa Osmanin, me ç’rast kanë biseduar për situatën në Kosovë.
Burkhard ka mbështetur Qeverinë e Kosovës lidhur me veprimet e fundit në veri të Kosovës, derisa ka kritikuar komunitetin ndërkombëtar me qasjen karshi Kosovës.
“Ne socialistët dhe demokratët në Parlamentin Evropian qëndrojmë fuqishëm në anën e Kosovës dhe qeverisë së Albin Kurtit. SHBA-të, si dhe Komisioni Evropian po marrin rrugën e gabuar në konfliktin Kosovë-Serbi, në mënyrë që ta lidhin Serbinë më ngushtë me kampin euroatlantik. Kjo politikë injoron rolin destabilizues të regjimit të Vuçiqit, i cili instrumentalizon rregullisht pakicat serbe në rajon për të vepruar kundër qeverive kombëtare në Ballkanin Perëndimor dhe shtetit të Kosovës. Kjo është dritëshkurtër.”, është shprehur ajo.
Eurodeputetja e SPD-së, Burkhard ka theksuar se Shtetet e Bashkuara të Amerikës dhe Komisioni Evropian duhet ta ndryshojnë rrugën e tyre. Ajo e ka konsideruar të mirë planin pesë-pikësh të kryeministrit Albin Kurti për shtensionimin në veri.
“SHBA dhe Komisioni Evropian duhet të ndryshojnë rrugën e tyre. Ne duhet të emërtojmë dhe të kundërveprojmë politikën e jashtme destabilizuese të Serbisë në mënyrë që të mbështesim Republikën Demokratike të Kosovës të drejtuar nga vlerat e BE-së. Plani 5-pikësh i qeverisë Kurti është një pikënisje e mirë.”, ka shtuar tutje ajo.
Protestuesit serbë po kundërshtojnë hyrjen e kryetarëve shqiptarë në ndërtesat komunale në veri. Situata në këto komuna është tensionuar të premten e 26 majit, kur kryetarët e betuar janë detyruar të hyjnë në zyrat e tyre të punës nën asistencën e Policisë së Kosovës. Të hënën (29 maj) protestuesit me maska e edhe ata pa maska kanë ushtruar dhunë ndaj pjesëtarëve të KFOR-it, Policisë së Kosovës dhe gazetarëve. Ata kanë hedhur gjësende të ndryshme në drejtim të paqeruajtësve, derisa kanë dëmtuar e djegur vetura të mediave.
Qeveria e Kosovës është kritikuar lidhur me veprimet në veri të vendit.
Të martën (13 qershor), është raportuar se Bashkimi Evropian ka përgatitur masa fillestare, si sanksione kundër Kosovës për shkak të mospërfilljes së kërkesave për hapa të menjëhershëm nga Qeveria e Kosovës për uljen e tensioneve në veri. Sipas këtyre masave, sanksionet do të përfshijnë pezullimin e ftesave për pjesëmarrjen e Kosovës në ngjarjet e nivelit të lartë dhe vizitave dypalëshe nga Bashkimi Evropian dhe vendet anëtare. Ndërsa, të mërkurën (14 qershor) Bashkimi Evropian ka deklaruar se kanë vendosur të ndërmarrin masa ndaj Kosovës, por që të njëjtat nuk janë sanksione. Sipas zëdhënësit Peter Stano, nuk përjashtohet mundësia për masa të tjera nëse Qeveria e Kosovës nuk i përmbush kërkesat e ndërkombëtarëve./KosovaPress
Zyra e Prokurorit të Specializuar (ZPS) ka bërë shkelje të urdhrit të trupit gjykues sa i përket zhvillimit të procedurës gjyqësore.
Kështu ka bërë të ditur kryetari i trupit gjykues, në rastin kundër Thaçit dhe të tjerëve, derisa ka theksuar se prokuroria nuk e ka sjellur dëshmitarin e radhës në seancën e sotme gjyqësore.
Kryegjykatësi Charles Smith ka paralajmëruar ZPS-së se një shkelje e dytë do të shqyrtohet për marrje sanksionesh.
Oda Ekonomike Gjermano-Kosovare, ka thënë se po i ndjek me shqetësim zhvillimet aktuale në veri të vendit.
OEGJK tha se si përfaqësuese e 198 kompanive anëtare, përfshirë kompani gjermane dhe kosovare, investitorë potencialë dhe kompani anëtare, po dëgjojë shqetësime nga ankesat e pranuara.
“Anëtarët e OEGJK-së janë të shqetësuar se kompanitë gjermane mund të heqin dorë nga investimet në Kosovë, ose të ndërpresin aktivitetet ekzistuese. Lajmet për paqëndrueshmëri politike dëmtojnë besimin e klientëve dhe investitorëve gjermanë në mënyrë të konsiderueshme. Kjo ndikon negativisht në marrëdhëniet ekonomike gjermano-kosovare dhe i shkakton dëm Kosovës, si lokacion për investime dhe biznes”, thuhet në njoftim.
Tutje, kjo odë i ka bërë thirrje vendimmarrësve politikë në Kosovë që të ndërmarrin hapa për rivendosjen e një mjedisi të qëndrueshëm politik, pasi sipas tyre, lehtësimi i tensioneve është faktor për krijimin e një klime të mirë e të bërit biznes.
Nënkryetari i Kuvendit të Kosovës, gjatë një vizite zyrtare në Izrael, ku bashkë me Grupin e Miqësisë me Izraelin nga Kuvendi i Kosovës, kanë zhvilluar takime me liderë izraelitë.
Enver Hoxhaj, ish-ministri i jashtëm i Kosovës, gjithashtu mori pjesë në Forumin Global të Komitetit Amerikano-Hebre, ku foli për marrëdhëniet midis Kosovës dhe Izraelit, por edhe arritjen e Kuvendit kur deputetët javën që lamë pas, votuan Deklaratë kundër antisemitizmit.
Hoxhaj, ndër të tjerash tha se Kosova duhet të jetë shtet mik i Izraelit në Ballkan dhe Izraeli i Kosovës në Lindjen e Mesme, duke e mbështetur fuqishëm njëra-tjetrën!
Ky është shkrimi i plotë i Enver Hoxhajt: Miq të dashur, Kam kënaqësinë ta ndaj me ju një pjesë nga fjalimi im në Forumin Global 2023 të Komitetit Amerikano-Hebre, të mbajtur në Izrael.
“Para se të vizitoja ndonjëherë Izraelin, të qëndroja zyrtarisht në Jeruzalem apo privatisht në Tel Aviv, 30 vite më parë, gjatë kohës së studimeve në Universitetin e Vjenës, u njoftova me idenë e shtetit të Izraelit, me shkrimet e mendimtarit të madh dhe të liderit historik, Theodor Herzl. Kjo ishte koha e okupimit serb në Kosovë dhe kur une isha student/aktivist, në Vjenë ishin disa hebrenjë austriakë në media dhe në diplomaci që e mbështetën kauzën e çlirimit dhe të shtetësisë së Kosovës! Kjo ishte koha kur neve, shqiptarëve të Kosovës, nuk mund të na ofrohej asgjë tjetër përpos shpresës! Nuk jam këtu për t’ju treguar histori të vogla personale, por jam këtu për ta falenderuar Komitetin Amerikano-Hebre, për mbështetjen për ta ndalur gjenocidin serb më 1999, sikurse edhe për mbështetjen që i dhanë refugjatëve shqiptarë kudo në Ballkan, gjatë luftës në Kosovë!
Njëashtu, dua të falenderoj kryeministrin Benjamin Netanyahu, për mikpritjen e tij ndaj refugjatëve nga Kosova! Unë kam qenë disa herë në Izrael dhe në kohën kur vendet tona nuk kishin marrëdhënie diplomatike, ishte Komiteti Amerikano-Hebre adresa dhe platforma ime e vetme, dhe falë këtij bashkëpunimi kemi marrë vendime ta shpallim Hezbullahun organizatë terroriste!
Jemi mirënjohës për njohjen ndaj Kosovës sikurse krenar me vendimin për ta hapur ambasadën e Kosovës në Jeruzalem. Ne jemi të interesuar që Kosova të jetë shtet mik i Izraelit në Ballkan dhe Izraeli i Kosovës në Lindjen e Mesme, duke e mbështetur fuqishëm njëra-tjetrën! Kosova është demokracia më e re në Ballkan, por edhe shoqëria më kritike, e cila duke i rezistuar regjimeve të huaja, veçanërisht atij serb, ka një vullnet për të debatuar dhe kundërshtuar çdo formë të pushtetit arbitrar! Natyrisht, kemi edhe një depat parlamentar demokratik dhe shpeshherë nuk pajtohemi mes vete për temat dhe çështjet politike të ndryshme, por jemi të bashkuar për tema të mëdha dhe të rëndësishme!
Kështu, jam krenar që të ju informoj që Kuvendi i Kosovës, me shumicë votash ka miratuar një Deklaratë për miratimin e përkufizimit të përdorshëm për antisemitizmin, përcaktuar nga Aleanca Ndërkombëtare për Përkujtimin e Holokaustit, si dëshmi e fundit e marrëdhënieve të fuqishme mes Kosovës dhe Izraelit!”.