Një burrë ka raportuar se pas një mosmarrëveshje është sulmuar fizikisht me mjet të mprehtë nga një person.
Viktima është dërguar për tretman mjekësor në QKUK.
“LËNDIM I LEHTË TRUPOR- Rr. Hajrullah Zymi, Fushë Kosovë 20.06.2023-18:00. Viktima mashkull kosovar ka raportuar se pas një mosmarrëveshje , është sulmuar fizikisht me mjet të mprehte, nga një i dyshuar i panjohur. Viktima është dërguar për tretman mjekësor në QKUK. Rasti në procedurë hetimore”.
Kryeministrja e Serbisë, Ana Bërnabiq, u kërkoi mbrëmë liderëve të Bashkimit Evropian “që të tregojnë se qëndrojnë pas parimit të sundimit të ligjit, pra respektimit të plotë të marrëveshjeve ndërkombëtare”, si dhe përfundimisht, zbatimin e Marrëveshjes së Brukselit dhe themelimin e Asociacionit të komunave me shumicë serbe.
“Unë po ju kërkoj që të parandaloni arrestimin dhe ndalimin e njerëzve “të pafajshëm vetëm për shkak se janë serbë”, që të mos i nënshtrohen torturave vandale derisa janë në paraburgim dhe derisa as familjet e tyre dhe as përfaqësuesit e tyre ligjorë nuk mund t’i kontaktojnë ata”, ka thënë Bërnabiq, duke pretenduar se “një sjellje e tillë në tokën e kontinentit evropian nuk duhet të jetë e pranueshme në shekullin XXI”.
Ajo u kërkoi “miqve evropianë” të ndihmojnë në ruajtjen e paqes në rajon.
“Unë po ju kërkoj, të dashur miq nga BE, të na ndihmoni të ruajmë paqen, sepse paqja është pasuria më e rëndësishme evropiane. Ju gjithmonë do të keni një bashkëbisedues “të besueshëm” në Beograd”, ka thënë ajo në pritjen zyrtare para fillimit të “Javës së Mundësive të BE-së” që e organizoi Delegacioni BE-së në Serbi.
Nënsekretarja amerikane e Shtetit për Çështjet Politike, Victoria Nuland, ka bërë të ditur se është takuar me të dërguarin e Bashkimit Evropian për dialogun, Miroslav Lajçak.
Ajo ka theksuar se ata biseduan për zhvillimet në veri dhe se bashkë me Lajçak kërkojnë që të ulen sa më shpejtë tensionet në veri.
“Ne i bëjmë thirrje Kosovës dhe Serbisë që t’i ndalojnë tensionet menjëherë dhe të fillojnë zbatimin e angazhimeve nga Marrëveshja e Ohrit”.
“Ne vazhdojmë të mbështesim planin trepikësh të BE-së si mënyra më e mirë për zgjidhjen e krizës”, ka thënë Nuland.
Lajçak ka shkruar në Washigton me ftesë të amerikanëve për të zhvilluar takime lidhur me gjetjen e një zgjidhjeje për situatën e veriut.
Dje gjatë ditës ai e ka ripërsëritur thirrjen e tij bashkë me të dërguarin e ShBA-së, Gabriel Escobar, që të lirohen tre policët e kidnapuar nga Serbia, si dhe të ndalen tensionet në veri.
– Deklaratë e përbashkët e Presidentes së Sllovenisë Dr. Nataša Pirc Musar, Kryeministrit të Sllovenisë Dr. Robert Golob dhe Ministres së Punëve të Jashtme dhe Çështjeve Evropiane të Sllovenisë ,Tanja Fajon –
Sot, më datë 21 qershor, shënojmë 20-vjetorin e Samitit BE-Ballkani Perëndimor në Selanik. Në këtë ngjarje historike, Bashkimi Evropian dhe më pas shtetet anëtare dhe kandidatët potencialë nga Ballkani Perëndimor iu përkushtuan njëri-tjetrit. BE-ja u angazhua për perspektivën evropiane të Ballkanit Perëndimor, ndërsa shtetet e rajonit miratuan vlerat e përbashkëta: të demokracisë, sundimit të ligjit, respektimit të të drejtave të njeriut dhe të pakicave, solidaritetit dhe ekonomisë së tregut. Konkluzionet e samitit mbeten një premtim i qëndrueshëm për të gjithë ne – BE-në dhe shtetet e saj anëtare, përfshirë Slloveninë, si dhe Ballkanin Perëndimor.
Sllovenia vlerëson këtë samit, pasi dha shpresë për stabilizimin e rajonit pas viteve me luftëra, paqëndrueshmëri politike dhe stanjacion ekonomik që pasoi shpërbërjen e Jugosllavisë. Mundësoi fillimin e ëndrrës për një të ardhme evropiane që çon në ndryshime pozitive: rritje të prosperitetit, integrim më të mirë dhe përforcimin e lidhjeve mes njerëzve.
Në njëzet vitet e fundit, përmes bashkëpunimit të ndërsjellë është arritur shumë. Ballkani Perëndimor në përgjithësi është më i qëndrueshëm. Vendet e rajonit sot gëzojnë përfitimet e regjimit pa viza si dhe rajoni që atëherë ka përparuar dukshëm në aspektin ekonomik. BE-ja deri tani është donatori dhe investitori më i madh në rajon. BE-ja dhe Ballkani Perëndimor gravitojnë natyrshëm drejt njëri-tjetrit.
Sllovenia është mbështetëse e fortë e procesit të zgjerimit brenda Bashkimit Evropian. Partnerët tanë të Ballkanit perëndimor janë ndihmuar duke ju ofruar mbështetje politike dhe praktike. Proceset që kanë të bëjnë me zgjerimin e rajonit ndihmohen në çdo mënyrë. Kjo është politikë afatgjate e Sllovenisë që nuk do të ndryshojë.
Megjithatë, shumë mundësi janë humbur nga të dyja palët. Entuziazmi fillestar në Ballkanin Perëndimor sa i përket reformave, si duket gjatë dy dekadave të fundit, pjesërisht është zbehur. Prandaj, drita në fund të tunelit drejt anëtarësimit në BE duket më larg nga sa shpresonim të ishte në këtë pikë. Në të njëjtën kohë, BE-ja po përballet me sfidat e saja dhe zgjerimi nuk është gjithmonë prioriteti i saj. Fakti që BE-ja është e detyruar të merret me pasojat e luftës në Ukrainë, kërkon një reflektim të ri të përgjithshëm mbi qasjen ndaj procesit të zgjerimit të BE-së. Besojmë se është më se e qartë se procesi i zgjerimit është në thelb zgjedhje strategjike, jo vetëm detyrë teknike. Gjithsesi, zgjerimi i mëtejshëm duhet të ndjekë vizionin themelor të procesit të integrimit evropian, i cili bazohet në solidaritetin dhe arritjet reale të kandidateve. Janë të nevojshme vendime të guximshme politike.
Mesazhet tona për rajonin, Evropën dhe botën janë të qarta. Së pari, BE-ja është objektivisht zgjedhje shumë e mirë për rajonin, por u takon vendeve të Ballkanit Perëndimor të vendosin për të ardhmen e tyre. Së dyti, Sllovenia nuk ka interesa egoiste në rajon. Politika jonë drejtohet nga solidariteti ndaj vendeve dhe njerëzve të Ballkanit Perëndimor. Sllovenia dëshiron atë që njerëzit duan: stabilitetin dhe sigurinë si parakusht të prosperitetit dhe përparimit ekonomik.
Vendet e Ballkanit Perëndimor që kanë aspirata për anëtarësim në BE, tani dhe në të ardhmen mund të llogarisin mbështetjen e Sllovenisë.
Operacioni për shpëtimin e pesë personave në bordin e nëndetëses së zhdukur në Oqeanin Atlantik është duke vijuar.
Roja Bregdetare e Shteteve të Bashkuara të Amerikës, përmes një postimi në Twitter, ka konfirmuar lajmet se avioni kanadez P-3 kapi zhurma nënujore në zonën e kërkimit.
Si rezultat i këtyre zhurmave, Roja Bregdetare tha se tashmë operacioni ishte përqendruar te zona nga kishin ardhur zhurmat, por ende nuk ka rezultate.
CNN raportoi se zhurmat ishin dëgjuar çdo 30 minuta nga zona ku ishte zhdukur nëndetësja. Zhurmat janë dëgjuar edhe katër orë pas herës së parë kur ishin diktuar nga ekipet e shpëtimit.
Ekipet e kërkim-shpëtimit tashmë janë në luftë me kohën pasi, sipas llogaritjeve, personave në nëndetëse iu ka mbetur edhe pak orë deri në përfundim të oksigjenit.
Nëndetësja e ka humbur komunikimin me operatorët të dielën, kur ka qenë në zonën jugore të Njufaundllendit në Kanada.Ajo i dërgon turistët në zonat e thella të Atlantikut për t’i parë pjesët e fundosura të Titanikut.
Kompania OceanGate që mundëson këtë udhëtim, u kërkon pasagjerëve 250.000 dollarë për t’i parë nga afër pjesët e fundosura të anijes së famshme.
Pjesëmarrësit udhëtojnë rreth 595 kilometra me një anije të madhe, përmbi Titanik, dhe më pas e nisin një zhytje tetorëshe me nëndetësen Titan, për të arritur në thellësi.
Sot në vendin tonë do të mbahet mot me diell.
Temperaturën minimale do e mbajë Gjakova me 15 gradë Celsius, ndërsa atë maksimale Peja me 30 gradë Celsius.
Dita e nesërme në Kosovë do të jetë kryesisht me kushte të njëjta atmosferike. Temperatura minimale do të shënohet në Gjakovë me 14 gradë Celsius, ndërsa ajo maksimale në Prishtinë 31 gradë Celsius.
Ndërkohë, në Shqipëri do të ketë mot me diell dhe kthjellime. Temperaturën minimale do e ketë Korça me 14 gradë Celsius, ndërsa ajo maksimale do të jetë në Shkodër me 35 gradë Celsius. /atvlive.tv/
Parashikimin e plotë të motit, për rajon dhe Evropë, mund ta gjeni në videon e mëposhtme:
Dokumentari Pretty Baby: Brooke Shields tregon historinë e Brooke Shields, modeles dhe aktores që ka punuar që nga fëmijëria.
Dokumentari sjell një perspektivë mbi karrierën dhe përvojën e Brooke Shields në industrinë e filmit, duke shqyrtuar problematikat si fëmijë dhe trajtimin e grave në shoqëri.
Shields shpreson që dokumentari të shërbejë si një “ndërmjetës” për të nxitur biseda të rëndësishme dhe për të ndihmuar individët të kuptojnë më mirë vetveten dhe botën që i rrethon.
Ajo tha se problemet ishin pas skenës sepse shumicën e rasteve e kanë ngacmuar seksualisht dhe se në intervista sic thot ajo, njerëzit janë të interesuar të dijnë për filmin e tyre të preferuar dhe askush për mënyrën se si ishte trajtuar./ATVLIVE.TV/
Embrioni është krijuar nga qelizat staminale njerëzore pa vezore, spermatozoide apo fertilizim
Një model i embrionit njerëzor me rrahje zemre dhe gjurmë gjaku është krijuar nga shkencëtarët në një zbulim që mund të ofrojë informacione të brendshme për javët e para të jetës.
Struktura sintetike është krijuar nga qeliza staminale njerëzore pa nevojën e vezoreve, spermatozoideve apo fertilizim.
Ky krijim replikon disa nga strukturat që zakonisht shfaqen në javën e tretë dhe të katërt të shtatzënësisë, por është dizajnuar në mënyrë që të zhvillohet në një fetus.
“Këto janë vetëm modele që mund të përdoren për të shikuar nëpër aspekte specifike të zhvillimit njerëzor”, kanë thënë shkencëtarët.
Qelizat e rrahjeve të zemrës shfaqen në ditën e 23-të të një embrioni natyral, përderisa qelizat e rruazave të kuqe të gjakut nisin të shfaqen në javën e katërt.
“Kur e dëgjova rrahjen e zemrës për herë të parë, isha pak i frikësuar të jem i sinqertë”, ka thënë dr. Neupane.
Por ai paralajmëroi se kjo është e rrezikshme për të krahasuar strukturat direkte me embrionin natyral njerëzor, duke shtuar se “në të ardhmen këto krijime nuk i kanë të gjitha karakteristikat e një embrioni natyral”.
Zbulimi u arrit duke përdorur qelizat burimore embrionale – qeliza “të bardha” të marra nga një embrion njerëzor i cili më pas mund të bëhet çdo qelizë në trup, raportoi “The Guardian”.
Ato ishin krijuar në mënyrë që të rriteshin në një strukturë të ngjashme me embrionin në laborator dhe u transferuan në një lloj shisheje rrotulluese, e projektuar për të vepruar si një mitër artificiale.
Shpresohet se gjetjet – të cilat ende nuk janë botuar – mund të japin një kuptim më të madh të shkaqeve të abortit të përsëritur dhe ndikimit të çrregullimeve gjenetike.
Profesori Robin Lovell-Badge, drejtues i sektorit të biologjisë së qelizave burimore dhe gjenetikës së zhvillimit në Institutin Francis Crick në Londër, i cili nuk ishte i përfshirë në punë, tha se embrionet sintetike “nuk mund të zhvillohen për t’u implantuar për të formuar një fëmijë”.
Puna pason një zbulim më vete, të raportuar javën e kaluar, në të cilin shkencëtarët krijuan embrione që nuk përfshinin fillimet e një truri apo të një zemre që rreh, por përfshinte qeliza që do të vazhdonin të formonin placentën dhe qesen e brendshme të vezës.
Sarah Norkros, drejtoreshë e “Progress Educational Trust”, një organizatë bamirëse që ndihmon njerëzit që luftojnë me sterilitetin, tha: “Duhet të kujtojmë se këto modele nuk janë embrione njerëzore të vërteta”./ATVLIVE.TV/
Sot (e mërkurë) do të fillojë stina e verës astronomike në orën 16:57 dhe do të zgjasë deri me 23 shtator në orën 8:49.
Po sot, Instituti Hidrometeorologjik i Kosovës parashikon se do të ndodhë solstici veror, ku do të jetë dita më e gjatë e vitit dhe nata më e shkurtër.
Dita e parë e verës në Kosovë do të jetë me temperature tipike të stinës, me minimalet që do të lëvizin ndërmjet 11-14 gradë celsius ndërsa maksimalet e ditës parashihen të lëvizin ndërmjet 27-31 gradë celsius.
Përgjithësisht gjatë stinës së verës, ditët janë më të gjata dhe netët janë më të shkurtra në krahasim me stinën e dimrit. Kjo ndodh për shkak të këndit të më të madh të rrezatimit diellor në hemisferën veriore.
Stina e verës sjell me vete shumë aktivitete të ndryshme. Bregdeti, piknikët, plazhet, shëtitjet në natyrë janë mjaft të zakonshme. Në këtë stinë kemi edhe shumë koncerte e festivale të muzikës të cilat organizohen në vendin tonë.
Shumë njerëz shfrytëzojnë pushimet e tyre në stinën e verës, pasi edhe shkollat kanë pushime verore dhe shumë familje organizojnë udhëtime në destinacione turistike për t’u relaksuar.
Analisti serb, Dusan Janjic, tha në një intervistë për Euronews Albania se situata në veri të Kosovës mund të sjellë një konflikt rajonal.
Ai iu referua mesazhit të emisarëve të BE-së dhe ShBA-së, Miroslav Lajçak dhe Gabriel Escobar, nga Uashingtoni për rrezikun që bart situata në veri, teksa theksoi se njerëzit e zakonshëm janë kundër këtij konflikti.
Janjic foli edhe lidhur me tre policët e Kosovës të kidnapuar në veri, të cilët sipas tij, nëse bëhet një hetim i plotë për të sqaruar gjërat mund të lirohen për tri ose katër ditë.
“Është një çështje që mund të zgjidhet lehtë, por jo brenda natës. Për mendimin tim vizita e ambasadorit të Kosovës në Beograd tek tre policët në burg ishte diçka. Në të njëjtën kohë, familjarët e policëve kanë krijuar një grup të mirë avokatësh. Duhet një hetim për të sqaruar gjërat dhe çështja ndoshta mund të zgjidhet për 3-4 ditë”, tha ai.