ATV

Blog

  • “A je gjallë”, ironia e Osmanit ndaj Pecit në Mitrovicë

    “A je gjallë”, ironia e Osmanit ndaj Pecit në Mitrovicë

    Dikur pjesë e së njëjtës frymë politike, por sot raportet mes Vjosa Osmanit dhe Faton Pecit kanë pësuar ndryshim.

    Dy figurat politike janë parë të mërkurën në një restorant në Mitrovicë, ku Osmani iu drejtua Pecit me fjalët “Ku je z. kryetar, a je gjallë, a je mirë?”, një komunikim që flet shumë për raportin aktual mes tyre, raporton Paparaci.

    Në zgjedhjet e 7 qershorit, Osmani është bartëse e listës së LDK-së dhe kandidate për presidente, ndërsa Peci, kryetar i Mitrovicës, vazhdon bashkëpunimin me Lëvizjen Vetëvendosje.

    Ish-anëtarë të partisë Guxo kanë deklaruar se Peci ka qenë ndër kritikët më të zëshëm të Osmanit, sidomos pas mosmbështetjes nga Lëvizja Vetëvendosje për një mandat tjetër në krye të presidencës.

    Vjosa Osmani bashkë me Faton Pecin dhe Donika Gërvallën u larguan nga LDK-ja dhe themeluan Guxo, atëherë një frymë e re politike.

    Më vonë Guxo u bashkua me LVV-në, ku Vjosa Osmani u bë presidente.

    Raportet mes Osmanit, Gërvallës dhe Pecit shpesh janë parë si simbol i bashkëpunimit të ngushtë politik. Megjithatë, zhvillimet e fundit kanë ndryshuar rrjedhën e këtij raporti.

    Pas mosmbështetjes së Osmanit nga LVV, ajo në këto zgjedhje u bashkua me LDK-në, ndërsa Gërvalla dhe Peci vazhdojnë rrugëtimin me Vetëvendosjen.

  • Zgjedhjet e 7 qershorit, publikohet lista e PDK-së

    Zgjedhjet e 7 qershorit, publikohet lista e PDK-së

    Partia Demokratike e Kosovës ka publikuar listën e kandidatëve për deputetë me të cilën do të garojë në zgjedhjet e parakohshme të 7 qershorit.

    Kandidati për kryeministër, Bedri Hamza ka thënë se lista e partisë ku ai e udhëheq, është e përbërë me profesionistë të dëshmuar në punë, në angazhim publik dhe në shërbim ndaj qytetarëve.

    Përveç listës, Hamza tha se në ditët në vijim PDK do ta prezantojë edhe programin më serioz dhe më të përgjegjshëm për shtetin dhe qytetarët.

    “Kjo është lista jonë. Profesionistë të dëshmuar në punë, në angazhim publik dhe në shërbim ndaj qytetarëve.

    Në këtë listë ka energji të re, por edhe përvojë. Njerëz që besojnë se Kosova meriton më shumë dhe më mirë. Mbi 50% e listës së kandidatëve janë prurje të reja, si pjesë e përkushtimit të PDK-së për t’u dhënë hapësirë kuadrove të rinj.

    Përveç listës, në ditët në vijim PDK do ta prezantojë edhe programin më serioz dhe më të përgjegjshëm për shtetin dhe qytetarët.

    Më 7 qershor, ju do ta keni edhe një mundësi për të vendosur për të ardhmen e vendit, ndërsa thirrja ime është e përzemërt: Besoni në Kosovë!”, ka shkruar Hamza në Facebook.

  • I kërkuar për tre vrasje, Sokol Hoxha arrestohet në ShBA pas 30 vjetësh në arrati

    I kërkuar për tre vrasje, Sokol Hoxha arrestohet në ShBA pas 30 vjetësh në arrati

    Sokol Hoxha është arrestuar pas gati 30 vjetësh në Shtetet e Bashkuara të Amerikës.

    Ai akuzohet për vrasjen e tre personave (vëllezërve Banaj) në mars të vitit 1997 në Patos dhe një gruaje në gusht të po të njëjti vit.

    Siç shkruan Top Channel, ai tashmë është dënuar nga gjykata me 25 vjet burgim derisa edhe Belgjika e kërkon për të vuajtur dënimin e vrasjes së Brunilda Dervishit.

    Pasi kreu vrasjen e dyfishtë në vendin e tij të lindjes, Hoxha u arratis, duke u fshehur fillimisht në Greqi dhe më pas duke u zhvendosur në Belgjikë.

    Tutje TCh, raporton se pas hetimeve shumëvjeçare të agjencive më të mëdha të zbatimit të ligjit në Evropë dhe jo vetëm, aktiviteti kryesor i Sokol Hoxhës në Belgjikë ka qenë prostitucioni.

    Madje edhe vrasja e kryer në këtë vend lidhet ngushtë me këtë aktivitet gjithashtu të paligjshëm.

    Dyshohet se Sokol Hoxha kishte sajuar një martesë me Brunilda Hoxhën, por ai e shfrytëzonte për prostitucion, derisa e qëlloi për vdekje në një bar në Bruksel. Dyshohet se arsyeja e kësaj vrasjeje kishte qenë kundërshtia e viktimës për t’iu bindur Hoxhës në tentativën e tij për ta shfrytëzuar.

    Sipas hetimeve, raportohet se pas vrasjes në Belgjikë, Hoxha u transferua në Britaninë e Madhe me dokumente të falsifikuara kosovare, siç shumë shqiptarë bënin në atë periudhë, duke përfituar nga lufta e Kosovës. Përmes këtyre dokumenteve false ai ka arritur të sigurojë leje qëndrimi në Britani.

    Por frika ishte ende ekzistente se mund të zbulohej dhe ai dysohet se mori vendimin për t’u transferuar përtej Atalantikut, në SHBA në fillim të viteve 2000. Ai nisi kështu një jetë të re, me identitet krejt tjetër, por sërish me barrën e rëndë të tre viktimave në Shqipëri dhe në Belgjikë.

    Pas më shumë se dy dekadash, agjencitë hetimore shqiptare morën indicie se vendodhja e Hoxhës ishte në SHBA, pasi agjenci ligjzbatuese amerikane, belge, britanike, kosovare u angazhuan për të shkëmbyer informacione mbi këtë person.

    Ministria e Drejtësisë e Shqipërisë bëri lëvizjen e radhës, duke bërë një kërkesë ekstradimi në SHBA në vitin 2019. Në të njëjtën periudhë, në Britani u ndalua një shqiptar me emrin Sokol Hoxha, por pas verifikimeve nga Interpoli, ai u lirua pas vetëm një jave, pasi rezultoi të ishte një tjetër person, por me të dhëna të ngjashme me të kërkuarin.

    Në vitin 2021 hetimet në SHBA u intensifikuan dhe u përqendruan tek shtetasi shqiptar i cili kishte shtegtuar drejt SHBA në vitet 2000. Investigimet i derguan hetuesit tek Sokol Hoxha i vertetë, duke përputhur shenjat e gishtave dhe fotografitë e asaj kohe. U vërtetua plotësisht se shtatsi me pasaportë false me identitet të ri është Sokol Hoxha, i dënuar me 25 vite burgim në Shqipëri dhe një dënim të përjetshëm kapital në Belgjikë.

    Mësohet se më 5 maj në Ohajo, i shumëkërkuari për gati tre dekada është arrestuar dhe autoritetet amerikane po vlerësojnë hapat e mëtejshëm për dorëzimin dhe largimin e këtij të arratisuri në Shqipëri ose Belgjikë. Sokol Hoxha sot është 51 vjeç.

    Një mbyllje e suksesshme e një hetimi prej thuajse 30 vitesh për këtë të dënuar, që tashmë do të duhet të përballet me ligjin. Me siguri në vazhdim ai do të tentojë të shfrytëzojë anekset ligjore për shkak se krimet janë kryer shumë kohë më parë.

  • Qytetari i ndërhyn Dardan Molliqajt: A po lufton kundër pushtetit apo opozitës?

    Qytetari i ndërhyn Dardan Molliqajt: A po lufton kundër pushtetit apo opozitës?

    Kreu i Partisë Socialdemokrate Dardan Molliqaj, ka mbajtur të mërkurën një konferencë për media pas aksionit simbolik të PSD-së në sheshin “Nëna Terezë”, ku foli për rolin e opozitës dhe kritikat ndaj partive opozitare në vend, raporton Ekonomia Online.

    Gjatë konferencës pati edhe ndërhyrje nga një qytetar, i cili e pyeti drejtpërdrejt se kundër kujt po vepron PSD-ja – pushtetit apo opozitës.

    “Ti a po lufton kundër pushtetit apo kundër opozitës?”, pyeti ai.

    Molliqaj u shpreh se, kur ai ishte pjesë e Lëvizjes Vetëvendosje, kryeministri në detyrë Albin Kurti kishte 26 për qind të mbështetjes, ndërsa, sipas tij, opozita e ka dyfishuar këtë përkrahje.

    “Jo, po qe po ta thashë, po të tregoj. Nëse e ke problem qeverisjen e vendit, duhet me pasë opozitë. Nëse s’e ke problem, atëherë jemi në rregull. Ama këta e kanë rritur Kurtin. Se po më thonë mua kaq njerëz qytetarë [se unë e rrita]… me të drejtë, unë kam ndihmuar dhe kam kontribuar atje. Ama unë e kam lënë Kurtin 26%. Këta e kanë prurë 51%. Dyfishim! Prandaj unë besoj që opozita është e rëndësishme me qenë përnime. Le të bëhen opozitë përnime dhe bashkëpunojmë. Ama qishtu siç i shërbejnë atij dhe të tjerëve, nuk bën”, u shpreh Molliqaj.

    Ndërsa, i pyetur nga gazetarët se cili do të jetë ndryshimi i PSD-së nga partitë e tjera opozitare nëse siguron ulëse në Kuvend, ai tha se partia e tij do të jetë prezente në seanca dhe do të reagojë varësisht nga çështjet që trajtohen.

    “Varësisht nga problemi. Pra, ne besojmë që reagimi nuk është as shabllon, as i paramenduar. Varësisht çka ndodh, varësisht sa problem është, edhe kundër reagimi ynë. Ajo që është e qartë: ne nuk jemi opozitë që flet dhe ne nuk jemi opozitë që kur në Kuvend votohet ose diskutohet për çështje të rëndësishme, të dalim jashtë Kuvendit e të bëjmë selfie dhe të ankohemi”, u shpreh tutje ai./EO/

    Molliqaj për PDK-në: Uran Ismaili udhëheq “klikën”, refuzimi i Limajt nuk u bë në mbledhjen e kryesisë

  • Samsung i përgjigjet Dua Lipës pasi kjo e paditi për përdorim të imazhit

    Samsung i përgjigjet Dua Lipës pasi kjo e paditi për përdorim të imazhit

    Artistja e njohur Dua Lipa ka bërë një padi prej 15 milionë dollarësh kundër kompanisë të njohur Samsung Electronics, duke e akuzuar kompaninë për përdorim pa leje të imazhit të saj në paketimet e televizorëve,sipas artistes kjo përbën shkelje të të drejtave të autorit dhe të imazhit Samsung ka mohuar akuzat, duke deklaruar se fotografia ishte përdorur vetëm pasi një partner i jashtëm kishte garantuar se të gjitha lejet e nevojshme ishin të siguruara.

    Në një deklaratë zyrtare, Samsung u shpreh: “Imazhi u përdor vetëm pas marrjes së sigurimit të qartë nga partneri i përmbajtjes se leja ishte marrë. Duke u nisur nga kjo garanci, ne mohojmë çdo akuzë për keqpërdorim të qëllimshëm.

    Megjithatë, ekipi ligjor i Dua Lipës pretendon se imazhi i saj vazhdoi të përdorej me muaj të tërë edhe pasi kompania ishte paralajmëruar zyrtarisht për ta ndalur atë.

    Dua Lipa ngre padi prej rreth 14 milionë eurosh kundër Samsung për përdorimin e fytyrës së saj në marketingun e televizorëve

  • Molliqaj për PDK-në: Uran Ismaili udhëheq “klikën”, refuzimi i Limajt nuk u bë në mbledhjen e kryesisë

    Molliqaj për PDK-në: Uran Ismaili udhëheq “klikën”, refuzimi i Limajt nuk u bë në mbledhjen e kryesisë

    Partia Socialdemokrate (PSD) ka zhvilluar sot një aksion simbolik në sheshin “Nënë Tereza” në Prishtinë, të cilin ia kushtoi Partisë Demokratike të Kosovës (PDK), duke akuzuar këtë subjekt për mungesë opozitarizmi dhe kontroll nga një “klikë” brenda partisë.

    Kryetari i PSD-së, Dardan Molliqaj, adresoi akuza të drejtpërdrejta ndaj figurave udhëheqëse të PDK-së, veçanërisht ndaj Uran Ismailit.

    Molliqaj tha se PDK-ja kontrollohet nga një grup i vogël njerëzish që, sipas tij, marrin vendime jashtë strukturave formale të partisë.

    “Udhëheqësi i klikës së PDK-së edhe i klanit brenda PDK-së është Uran Ismaili. Paramendojeni, nga katër anëtarë të kësaj klike, dy prej tyre as nuk garojnë. Njëri ka qenë kryetar partie, tjetri ka qenë shef i grupit, ministra… as nuk hyjnë në garë fare. Por janë vendimmarrësit në këtë parti“, tha ai.

    Ai pretendoi se refuzimi i Fatmir Limajt për t’u rikthyer në PDK ishte vendosur paraprakisht dhe jo në organet e partisë.

    “A e dini që refuzimi i Fatmir Limajt nuk është bërë në mbledhjen e kryesisë të PDK-së? Një javë më herët e keni një intervistë në ‘Pressing’, udhëheqësi i klikës së PDK-së, Uran Ismaili, i cili thotë që nuk do ta marrim Fatmir Limajn. Mbledhja e kryesisë ka qenë veç formalizim i vendimit të tij“, u shpreh ai.

    Sipas Molliqajt, në kryesinë e PDK-së nuk kishte pasur as votim për këtë çështje.

    “Kryetari u çu dhe e ka mbyllë çështjen pa debat fare për këtë. Sepse klika ka kushtëzuar që nëse kthehet Fatmir Limaj, këta nuk marrin pjesë. Dikush nuk bëhet shef shtabi, dikush nuk hyn në listë, e dikush nuk garon“, thotë Molliqaj.

    Kreu i PSD-së kritikoi edhe mënyrën e organizimit të listave zgjedhore brenda PDK-së, duke përmendur se kandidatë me më shumë vota janë lënë pas në renditje.

    “A e dini që ky është i vetmi kandidat nga zgjedhjet e tetorit, i cili ka dalë, nëse s’gaboj, i katërti i votuar në parti, e është numër 2? Pra i vetmi kandidat që s’iu ka ndërru numri prej këtyre të votuarve është ky. I ka dy kandidatë më poshtë që janë Gruda dhe Tahiri, të cilët kanë marrë vota shumë e shumë më shumë se ky, e ky është prapë numër 2.”

    Ai akuzoi drejtuesit aktualë të opozitës se nuk kanë interes për përballje politike me pushtetin.

    “Me këta njerëz që e kanë në kontroll opozitën, qysh është dyshja Vjosa dhe Lumiri andej, dhe këta katër këndej në krye me Uranin, të cilët jetojnë jetë luksoze, nuk kanë me mujt me bë opozitë. Dhe nuk duan me bë opozitë. Në fakt, duan me qeverisë sa më shumë e kudo që munden“, thekson tutje ai.

    Molliqaj bëri thirrje që votuesit dhe strukturat e PDK-së të “çlirohen” nga kjo qasje politike dhe të mbështesin PSD-në si alternativë opozitare.

    “Duhet me u çliruar, e mënyra për me u çliruar nga kjo lloj opozite, kjo lloj qasje, është veç një rrugë: me e votuar një opozitë përnjëmend qysh është Partia Socialdemokrate. Çfarëdo tendenca të tjera janë rrugë të shkurtra e të cilat bëhen gjithmonë më të gjata dhe rezultati është i njëjtë: vendi mbetet pa opozitë.”

  • Driton Selmanaj vendos të mos garojë për deputet në këto zgjedhje

    Driton Selmanaj vendos të mos garojë për deputet në këto zgjedhje

    Ish-deputeti Driton Selmanaj tha se ka vendosur vetë që të mos përfshihet në listën e LDK-së për zgjedhjet e jashtëzakonshme parlamentare të 7 qershorit.

    Ai tha se do të angazhohet për “fitoren e LDK-së”.

    “Të nderuar anëtarë, aktivistë dhe mbështetës të Lidhjes Demokratike të Kosovës, Përgjatë gjithë angazhimit tim politik, kam besuar se LDK-ja nuk është thjesht një subjekt politik, por një ideal, një mision shtetformues, një identitet politik dhe moral që ka mbajtur gjallë shoqërinë tonë, frymën institucionale dhe orientimin perëndimor të Kosovës. Pikërisht për këtë arsye, çdo përgjegjësi që më është besuar e kam trajtuar me përkushtim, me kujdes e ndershmëri dhe respekt ndaj vendit tim dhe anëtarësisë sonë të jashtëzakonshme. Edhe në këto zgjedhje, si Kryetar i Degës dhe Shef i Shtabit Zgjedhor në Prizren, do të jem plotësisht i angazhuar për mobilizimin dhe fitoren e LDK-së, sepse besoj se Kosovës i duhet një LDK e fortë dhe me vizion të qartë shtetëror”, shkroi ai në një postim në Facebook.

    “E me gjithë këtë, përkundër kërkesave të mëdha nga anëtarësia dhe strukturat tona, unë kësaj radhe kam vendosur që të mos jem pjesë e listës së kandidatëve për deputetë”, shtoi ai.

    Selmanaj tha se “ky nuk është vendim kundër LDK-së”.

    “Përkundrazi. Është një vendim për ta ruajtur dinjitetin politik dhe për të mos lejuar që kontributi politik të matet me standarde të momentit apo nevoja të përkohshme. LDK-ja është më e madhe se secili prej nesh. LDK-ja është një ideal, është bindje është historia jonë përplotë lavdi dhe e ardhmja që garanton stabillitet dhe zhvillim të shtetit tonë!”, shkroi ai.

    “Unë do të vazhdoj të jem aty ku kam qenë gjithmonë — në shërbim të LDK-së dhe të qytetarëve që besojnë në frymën rugoviane, në përgjegjësinë shtetërore dhe në politikën me dinjitet. Jam i bindur se LDK do ta rigjejë forcën për t’u kthyer plotësisht te vlerat e saj burimore, aty ku parimet dhe merita janë themeli i çdo vendimi. Faleminderit secilit për besimin dhe mbështetjen e vazhdueshme. Zoti e bekoftë LDK-në, Zoti e bekoftë Kosovën tonë!”, shtoi Selmanaj.

  • Behrami: Kthimi i Thaçit e Veselit, më afër se kurrë – t’ia sjellim PDK-së fitoren në prag të ardhjes të tyre

    Behrami: Kthimi i Thaçit e Veselit, më afër se kurrë – t’ia sjellim PDK-së fitoren në prag të ardhjes të tyre

    Ish-deputeti i Partisë Demokratike të Kosovës (PDK), Artan Behrami, ka paralajmëruar kthimin e ish-presidentit Hashim Thaçi dhe të ish-kryekuvendarit Kadri Veseli në Kosovë.

    Përmes një postimi në Facebook, mes tjerash, ai ka kërkuar punë ndër anëtarë të partisë për, siç thotë, t’i sjellë fitoren PDK-së “në prag të kthimit të tyre”.

    “Që nga shkuarja e Presidentit Thaçi dhe kryetarit Veseli në Hagë, elektorati i PDK-së nuk është thyer kurrë. Tani, kur kthimi i tyre është më afër se kurrë, ne nuk duhet të demoralizohemi. Sot, si kurrë më parë, duhet të japim krejt çfarë kemi për t’ia sjellë fitoren e madhe PDK-së në prag të kthimit të tyre”, shkroi Behrami.

    Ai shtoi se partia e tij është “shumë afër fitores së dyfishtë: fitores së PDK-së, të Bedri Hamzës dhe fitores së kthimit të krerëve të UÇK-së në Kosovë”.

    PDK-ja ende nuk e ka publikuar listën e kandidatëve për deputetë. As Behrami nuk ka treguar nëse do të jetë sërish kandidat në zgjedhjet e 7 qershorit.

  • Prokuroria Speciale ndalon për 48 orë një të dyshuar në rastin “Laboratori ‘25”

    Prokuroria Speciale ndalon për 48 orë një të dyshuar në rastin “Laboratori ‘25”

    Prokuroria Speciale ka njoftuar se ka ndaluar për 48 orë një të dyshuar në rastin “Laboratori ’25”, shkruan Reporteri.net.

    Në njoftimin e Prokurorisë thuhet se personi me inicialet S.D., është paraqitur sot vullnetarisht në Policinë e Kosovës në Prishtinë, lidhur me rastin që është duke u hetuar.

    Ai dyshohet për “Pjesëmarrja ose organizimi i grupit kriminal të organizuar” dhe “Falsifikimi i dokumentit”.

    “Hetimet lidhur me rastin “Laboratori ‘25”, janë në zhvillim dhe Prokuroria Speciale së bashku me Policinë e Kosovës do të ndërmarrin të gjitha veprimet e nevojshme në përputhje me ligjet në fuqi”, thuhet në njoftim.

    Rasti lidhet me vepra penale të falsifikimit të dokumenteve publike si, pasaporta, patentë-shofera, e dokumente të tjera, të prodhuara për mbi 50 shtete të ndryshme të botës.

  • “Edi kundër Eddy”, Rama replikë gazetarit italian për intervistën e Hoxhës, reagon edhe Meloni

    “Edi kundër Eddy”, Rama replikë gazetarit italian për intervistën e Hoxhës, reagon edhe Meloni

    Kryeministri Edi Rama ka replikuar gazetarin Eddy Wax pas publikimit të intervistës së ministrit të Punëve të Jashtme Ferit Hoxha në lidhje me marrëveshjen për emigrantët me Italinë.

    Në një reagim në rrjetet sociale, Rama shprehet se është ‘qesharake të krijosh histori Edi kundër Eddy’. Ai shtoi se nuk ka pasur ankesa për gazetarin, por sipas tij citimi i reduktuar i deklaratave është përdorur në mënyrë mashtruese.

    Në fund të mesazhit të tij, kryeministri thekson se marrëdhënia mes Shqipërisë dhe Italisë mbetet e pandryshuar.

    “I dashuri im Eddy Wax

    E kuptoj plotësisht që është qesharake të krijosh një histori Edi kundër Eddy-t, por këtu nuk ka vend për këtë, sepse së pari, nuk u ankova për Edin tjetër, dhe së dyti, tani që e keni botuar me bujari transkriptin e plotë, është shumë e qartë se citimi i reduktuar ishte mjaftueshëm mashtrues për këdo që ka një interes të brendshëm ideologjik ta përdorë atë. Por realisht, pa asnjë ndjenjë të keqe. Njëri Eddy duhet të bëjë çfarë të dojë, dhe tjetri Edi duhet të durojë atë që duhet.

    Në fund të fundit, mbetet e pandryshuar: atë që Italia kërkon nga Shqipëria, Italia e merr nga Shqipëria”, shkruan Rama.

    Raportuesi u habit kur pa një postim në rrjetet sociale nga kryeministri i Shqipërisë Edi Rama të martën, ku sfidonte raportimin tonë për një intervistë të zhvilluar të hënën me ministrin e Jashtëm të vendit, Ferit Hoxha, e cila nxiti debat politik në Itali.

    Intervista u përqendrua te deklarata e Hoxhës se marrëveshja Itali-Shqipëri për emigracionin nuk do të zgjatet pas vitit 2030, sepse deri atëherë Shqipëria pret të jetë anëtarësuar në BE.

    Komentet u pasqyruan gjerësisht në shtypin italian, nga La Stampa deri te Corriere della Sera. Ministri i Jashtëm italian Antonio Tajani u tha gazetarëve: “2030 është shumë larg; le të përqendrohemi te ajo që duhet të bëjmë tani.”

    Rama shkroi online: “Të gjithë gazetarëve nga Italia dhe më gjerë, që po kontaktojnë lidhur me një citim mashtrues të raportuar nga një media … më lejoni të ritheksoj, qartë dhe shpresoj njëherë e mirë, se Protokolli ynë me Italinë është këtu për të qëndruar, për aq kohë sa Italia ta dëshirojë.”

    Giorgia Meloni iu përgjigj postimit të tij mbrëmë me një mesazh të shkurtër: “Faleminderit Edi.”

    Për korrektësi, kjo është ajo që Hoxha më tha, fjalë për fjalë: “Po ju them se pas pesë vitesh, sapo Shqipëria të anëtarësohet, kjo nuk do të jetë më ekstraterritoriale. Do të jetë territor i Bashkimit Europian. Së pari, marrëveshja është për pesë vite dhe nuk jam i sigurt që do të ketë zgjatje. Së dyti, nuk do të ketë zgjatje sepse ne do të jemi anëtarë të Bashkimit Europian.”

    Do të isha i lumtur t’i dërgoja kryeministrit një kopje të transkriptit, nëse ai dëshiron ta shohë.

    Tetova rrit pagat e administratës komunale me 7% për tre vite
    Read more