Blog

Ministri i Punëve të Brendshme, Xhelal Sveçla, dhe homologu i tij nga Shqipëria, Taulant Balla, kanë vizituar pikën e përbashkët kufitare në Morinë ku kanë diskutuar për problemin e pritjes me të cilin po përballën diaspora gjatë udhëtimit në Kosovë. Derisa kanë folur para mediave për ketë çështje, ata nuk kanë dashur të komentojnë anulimin e mbledhjes së dy qeverive dhe raportin në mes të kryeministrit të Kosovës, Albin Kurti dhe atij të Shqipërisë, Edi Rama.

Sveçla ka shprehur vullnetin politik që problematika e pritjes së mërgimtarëve të marr fund sa më shpejt.

Ndërsa është zotuar se po punojnë në zbatimin e të gjitha marrëveshjeve të arritura deri tani në mes dy qeverive.

“Si rezultat i marrëveshjes e keni parë që nuk ka shtetas të Kosovës dhe Shqipërisë të cilët me targat e këtyre vendeve presin në rend. Vështirësinë që e kemi tash është me mërgatat tona të cilat vijnë qoftë në Kosovë apo Shqipëri për pushimet e tyre, ne kemi vullnetin më të mirë të mundshëm që mërgatave tona tu shërbejmë shpejt me efikasitet dhe po mendojmë disa variante se si të tejkalohen këto vështirësi, zgjidhje ka patjetër që ka vullnet të jashtëzakonshëm politik dhe unë besoj që shumë shpejt do të vërehen ndryshimet….Ka tashmë përmirësime po flasim për zgjidhje tash menjëherë“, theksoi ai.

Edhe Taulant Balla theksoi se duhet të gjendet një zgjidhje që koha e pritjes për mërgimtarët në pikën kufitare mes Kosovës dhe Shqipërisë të shkurtohet.

“Ka një rritje të numrit të mërgimtarëve dhe jo vetëm dhe udhëtarëve të tjerë nga vende të ndryshme të cilët udhëtojnë nga Shqipëria për në Kosovë dhe për shkak se për të gjitha target në përjashtim të targave të Shqipërisë do të duhet që të pajisjen me siguracion kjo merr një kohë të caktuar…shqetësimi im është që sa kohë që mërgimtarët bëjnë me orë të tëra udhëtim nga gjitha Evropa dhe jo vetëm për t’u kthyer të gjejmë të gjitha mundësitë që gjatë kthimit të tyre në Kosovë përmes pikës kufitare të Morinës, koha të jetë shumë e shkurtër ose të gjejmë një modalitetet se si t’i japim një zgjidhje që pajisje me siguracion të mos ta bëjnë në pikën e kalimit kufitar, një propozim ka qenë ta bëjnë brenda një kohe të caktuar sapo hyjnë në territorin e Kosovës, ose brenda një distance të caktuar…Mendojmë se një nga arsyet e këtij niveli të lartë të trafikut është pikërisht kjo…..Këtu nuk ka një pengesë nga dy policitë tona, pra këtu bëhet fjalë për një çështje administrative”, u shpreh Balla.

Derisa nuk e ka komentuar anulimin e mbledhjes së dy qeverive, Balla ka thënë se ministrave u takojnë t’i zbatojnë marrëveshjet e firmosura nga kryeministri i Shqipërisë, Edi Rama dhe ai i Kosovës, Albin Kurti.

“Mërgimtarët presin prej nesh që të bëjmë zgjidhje për këtë çështje dhe unë mendoj se ne do ta zgjidhim këtë çështje, dhe unë mendoj që do ta zgjidhim këtë çështje. Sa i për çështje tjera kemi kohë plotë të flasim dhe natyrshëm ajo që I takon dy ministrave është të zbatojnë marrëveshjet që kryeministrat kanë firmosur”, theksoi ai.

Ndërsa ministri Sveçla, i pyetur për lirim e serbëve të arrestuar pas sulmeve në veri të vendit, ka thënë se ka opinion të kualifikuar për këto çështje, por do ta adresojë në një rast tjetër.

“Kam shumë opinion të kualifikuar për këto çështje që do t’i adresoj në një rast tjetër”, u shpreh shkurt Sveçla.

Kryeministri i Republikës së Kosovës, Albin Kurti, së bashku me zëvendëskryeministrin e parë, Besnik Bislimi, priti sot në takim lamtumirës ambasadorin e Norvegjisë në Kosovë, Jens Erik Grøndahl.

Të dy falënderuan ambasadorin Grøndahl për bashkëpunimin e shkëlqyer në mes të dy vendeve, si dhe për angazhimin dhe përkushtimin e tij në këtë drejtim, duke i uruar atij suksese në angazhimet dhe përgjegjësitë e radhës.

Krahas takimit në zyrën e tij të pritjeve, kryeministri, për nder të ambasadorit Grøndahl, shtroi edhe një mëngjes të përbashkët edhe me këshilltarët e angazhuar në Qeveri nëpërmjet mbështetjes së ambasadës norvegjeze.

Kryeministri shprehu mirënjohjen e thellë të tij për kontributin e shtetit norvegjez dhe ritheksoi se Norvegjia është dhe mbetet partnerja jonë e rëndësishme me të cilën ndajmë vlera, bindje dhe pikëpamje për sigurinë dhe paqen në rajon e më gjerë.

Kompania Rajonale e Ujësjellësit “Prishtina”, ka njoftuar se sot do të realizohen punime teknike, në përmirësimin e infrastrukturës së rrjetit të ujësjellësit.

Sipas njoftimit, punimet realizohen te lagja 038, me ç’rast pa furnizim me ujë, nesër 24 korrik duke filluar nga ora 09:00-16:00 mbesin zona e Veternikut dhe Çagllavicës.

“Ju rekomandojmë që për shkak të punimeve, kur vjen uji në krojet tuaja, leni ato të rrjedhin për pak minuta sepse mund të vjen i turbullt në fillim, por pa shqetësim”, thuhet në njoftim.

Breshri e stuhia kanë shkaktuar dëme të konsiderueshme në kulturat bujqësore në Malishevë. Raportohet se dëmet më të mëdha janë në fshatin Plloqicë.

Lidhur me këtë, Komuna e Malishevës ka bërë të ditur se është aktivizuar komisioni që do të bëjë vlerësimin e dëmeve.

“Do të jemi gjithmonë pranë qytetarëve, e në veçanti pranë bujqve e fermerëve, të cilët janë dëmtuar rëndë gjatë ditës së djeshme”, ka deklaruar drejtori për Bujqësi, Sylë Dukolli, derisa ka vizituar fshatin Plloqicë.

Si pasojë e stuhisë, janë dëmtuar serrat dhe të mira të tjera materiale.

Sipas njoftimit të Komunës, në familjen e Shkumbin Malokut, stuhia i ka dëmtuar rreth 80 ari serrë.

“Përveç dëmeve të rënda në serrat e tyre, në tokë shihej breshëri i rënë gjatë ditës së djeshme, e që ende nuk është shkrirë dhe krahas serrave dhe pemëve, breshëri e stuhia i ka dëmtuar në masë të madhe edhe kulturat tjera, si grurin e pa korrur dhe misrin”, është bërë e ditur në njoftim.

Kryetari i Aleancës për Ardhmërinë e Kosovës, Ramush Haradinaj, ka akuzuar kryeministrin Albin Kurti sipas tij se u ka ngulur thikë pas shpine dy vlerave sublime të vendit, aleatëve ndërkombëtar dhe kategorive të dala nga lufta.

Haradinaj në takim me kategoritë e luftës, ka thënë se të njëjtit nuk mund të ndahen nga paga minimale.

Ai ka theksuar se është veteran i vërtetë, derisa sipas tij Kurti nuk është i tillë.

Kritik ndaj Kurtit janë shprehur edhe organizatat e dala nga lufta, të cilët kanë thënë se kjo qeveri ka harruar rrugën e sakrificës së Kosovës.

Xhavit Jashari, nga Shoqata e Familjeve të Dëshmorëve të UÇK-së, ka thënë se do të presin vendimin e Gjykatës Kushtetuese për Ligjin për pagën minimale, që më pastaj të ndërmarrin veprimet e mëtutjeshme.

Prokuroria Speciale e Shtetit e ka konfirmuar se ish-drejtori i Policisë së Malit të Zi, Vesellin Veloviq, është arrestuar të hënën, dhe ndaj tij rëndojnë akuzat për “akte kriminale të krijimit të një organizate kriminale, abuzim me pozitë zyrtare dhe kontrabandë”.

Me akuza të njëjta përballen edhe tre persona tjerë.

“Departamenti i Policisë Speciale, me urdhër të Zyrës së Prokurorit Special, i ka privuar nga liria V.V dhe M.N, dhe ndaj tyre është ngritur padi penale, si dhe ndaj A.M dhe N.M., të cilët janë në kërkim”, është thënë në deklaratën e Prokurorisë.

Në të është thënë se zyrtarët policorë i kanë bastisur edhe banesat dhe objektet tjera në pronësi të të arrestuarve.

“Dëshmitë kundër tyre janë mbledhur në bashkëpunim me Agjencinë e Bashkimit Evropian për Bashkëpunim dhe Sundim të Ligjit – EUROPOL”.

Mes tjerash, autoritetet e Malit të Zi, kanë paralajmëruar se aktivitetet e tyre në këtë drejtim, do të vazhdojnë edhe në ditët në vijim.

Kush është Vesellin Veloviq?

Veloviq ka qenë drejtori i Policisë së Malit të Zi në periudhën 2007-2011, dhe prej mesit të vitit 2018 deri në fund të vitit 2020.

Në periudhën mes dy mandatave, ai ka qenë këshilltar i ish-presidentit të Malit të Zi, Filip Vujanoviq, për çështje të sigurisë dhe mbrojtjes, dhe në Qeverinë e ish-kryeministrit Millo Gjukanoviq, nga viti 2014 ai ka qenë sekretar i Këshillit Kombëtar të Sigurisë.

Prej fundit të vitit 2020, pas ndryshimit të Qeverisë në Mal të Zi, ka qenë këshilltar i Gjukanoviqit për çështje të sigurisë, deri më 20 maj të këtij viti.

Gjukanoviq i ka humbur zgjedhjet presidenciale në prill të këtij viti.

Veloviq ka pasur funksione të rëndësishme në Policinë e Malit të Zi, edhe para pavarësisë së shtetit.

Në periudhën 1995- 2005, ai ka qenë komandant i Njësitit Special kundër-Terrorizmit.

Në fund të viteve 1990, gjatë trazirave politike në mes të Gjukanoviqit, atëbotë kryeministër i Malit të Zi, dhe ish-presidentit të shtetit, Momor Bullatoviq, i cili ka qenë besnik ndaj ish-liderit jugosllav, Sllobodan Millosheviq, Veloviq e ka parandaluar në janar të vitit 1998, një tentim të mbështetësve të Bullatoviqit për ta pushtuar ndërtesën qeveritare.

Më vonë, Veloviq është lidhur me disa afera në ekonomi, në të cilat ka marrë pjesë policia.

Ai është arrestuar për sulm ndaj një zyrtari në protestat e shtatorit të vitit 2021 në Cetinje, teksa është kundërshtuar shugurimi i Mitropolitit Joaniki në Kishn Ortodokse Serbe në atë qytet.

Ai është liruar pas dy ditëve në mbajtje, dhe më pas, në maj, Gjykata Supreme në Podgoricë, e ka përmbysur vendimin e shkallës së parë për lirimin e Veloviqit.

Njëmbëdhjetë persona kanë vdekur pas rrëzimit të kulmit të një gjimnazi në verilindje të Kinës, pasi në këtë institucion kanë qenë duke u stërvitur vajzat e ekipit të volejbollit, ka raportuar media shtetërore.

Dëshmitarët u kanë thënë mediave lokale se shumica e viktimave janë fëmijë, ndonëse diçka e tillë nuk është konfirmuar nga zyrtarët.

Prindërit e shqetësuar janë parë afër një spitali në afërsi duke pritur për informacione të reja.

Vetëm tetë prej 19 personave që kanë qenë brenda palestrës kanë mbijetuar.

Në disa hetime preliminare është gjetur perlit, substancë e formuar nga qelqi vullkanik, i cili është shtresuar nën çati dhe ka mbledhur ujë, duke rezultuar me shembje të hënën.

Prindërit u kanë thënë zyrtarëve të shkollës se ka pasur mungesë të madhe të komunikimit përgjatë përpjekjeve për kërkim-shpëtim.

“Ata më kanë thënë se bija ime ka vdekur, mirëpo ne nuk e kemi parë atë kurrë. Të gjithë fëmijët kanë qenë të mbuluar me baltë dhe gjak kur i kemi parë në spital. I kam lutur që të më lejojnë ta identifikojë fëmijën. Çka nëse nuk ka qenë fëmija im?” ka thënë një burrë në një video të shpërndarë në rrjetet sociale.

Incidentet me shembje ndërtesash janë të shpeshta në Kinë, dhe shpesh si shkak janë përmendur standardet e ndërtimit./REL/