ATV

Blog

  • Kosova nuk e di çfarë ka në thellësinë përtej 100 metrash

    Kosova nuk e di çfarë ka në thellësinë përtej 100 metrash

    Përgatiti: Fatlum Jashari

    Ndonëse njihet për pasuritë nëntokësore, Kosova nuk e di saktësisht çfarë ka në shtresat që tejkalojnë thellësinë e 100 metrave.

    Që nga përfundimi i luftës nuk janë kryer studime të thella që do të mund të zbulonin potencialin nëntokësor, përtej mineraleve të ndryshme në Trepçë dhe zonat përreth në veri, por edhe thëngjillit në pjesën qendrore apo zona të tjera.

    Për të zbuluar potencialin nëntokësor të Kosovës, Qendra Shqiptare për Studime Strategjike në Tiranë, ndër vite, u ka propozuar qeverive në Prishtinë, përfshirë aktuales, realizimin e një studim i përgjithshëm gjeologjik.

    Mos kryerjen e një studimi që do të tregonte për depozitat eventuale të karbonit, gazit dhe naftës, 24 vjet pas luftës, Geri Selenica nga kjo qendër e vlerëson turp.

    “Kam biseduar me një kryeministër disa kohë më parë dhe ai harxhoi 500 mijë euro për flamuj për festën kombëtare dhe nuk kanë harxhuar 3 milionë euro për të bërë një studim se çka ka Kosova poshtë. Duhet të kuptoni që Kosova është rezerva e dytë më e madhe elektrike në Evropën kontinentale. Aty ku ka qymyre ka edhe hidrokarbure tjera. Kështu që, si duket, faktikisht Jugosllavia këtë e ka ditur, por në Kosovë nuk ua kanë bërë me dije. Ky është studimi numër një që duhet të bëjë Kosova”, tha Selenica.

    Mes tjerash, në propozimin e Qendrës – bashkëngjitur me disa oferta konkrete, thuhet se ekspertët e gazit dhe naftës janë pozitivë lidhur me praninë eventuale të rezervave të naftës dhe gazit, që mund të identifikohen gjatë studimit.

    Studimi me dy hallka, sipas Selenicës, si hap të parë do të kishte studimin e përgjithshëm gjeologjik të formacioneve në Kosovë.

    “Dhe e dyta, duhet bërë një studim bërë një studim gjeo-fizik. Inxhinierët tanë e kanë përcaktuar shumë saktë se ku është zona potencialisht që mund të ketë naftë dhe gaz në Kosovë dhe ky do një studim gjeo-fizik. Jo studim të rëndë gjeofizik, por një studim gjeofizik me një teknologji që quhet tiluromangetike, dhe me shkarkesa elektrike, ti arrin të shikosh deri në 4 kilometra. Aq mjafton që të kuptosh nëse ke shtresa naftëmbajtëse ose gazmbajtëse”, tha Selenica.

    Në kontekstin e politikave strategjike, ai i vlerësoi si shumë të rëndësishme zhvillimet e fundit lidhur me naftën në Shqipëri.

    “Sa i përket lajmit të mirë nga Shqipëria, ky është nj lajm që kemi ditur, se ka 50 vjet që janë zbuluar këto rezerva nafte dhe gazi, dhe janë gjigante. Është zona midis Beratit dhe Elbasanit. Por, nuk kemi pasur teknologjinë për ta nxjerrë naftë dhe gazin nga thellësi 6000 deri në 7000 metra”, tha Selenica.

    Nafta e zbuluar në zonën e Shpiragut, sipas Selenicës është e cilësisë shumë të lartë – deri në 39 API dhe se në total do të arrijë kapacitetin, deri në 50 mijë tonë në ditë.

    Edicionin Qendror të lajmeve në ATV e gjeni në videon më poshtë:

  • Shteti i lejon naftëtarët t’i “vjedhin” qytetarët

    Shteti i lejon naftëtarët t’i “vjedhin” qytetarët

    Përgatiti: Arton Hamiti

    Që nga fillimi i muajit korrik, për një litër naftë kosovarët kanë paguar mesatarisht 20 deri në 30 centë më shumë se çmimi i importit, përfshirë taksat.

    Në muajin gusht, sipas të dhënave të Doganës, çmimi mesatar i importit për një litër naftë, pa taksa ishte, 73 centë, ndërsa me taksa 1 euro e 28 centë.

    Ndërkaq, në pikat e shitjes një litër naftë, tash e disa javë, shitet deri në 1 euro e 49 centë.

    Në muajin korrik, çmimi mesatar i importit për një litër naftë ishte më pak se 1 euro e 16 centë – derisa qytetarëve u shitej deri në 1 euro e 43 centë.

    Pavarësisht faktit se vendimi i Qeverisë për çmimin tavan parasheh që naftëtarët të fitojnë 12 centë për 1 litër naftë, me çmimin aktual ata fitojnë rreth 20 centë.

    Ndonëse pranoi se ka kompani që nuk e respektojnë çmimin tavan, ministri i Financave, Herkuan Murati nuk tregoi për masat qe do të ndërmerren.

    “Pra mund te flitet për një marzhë të caktuar ka disa kompani të cilat nuk e kanë respektuar dhe janë në procedura te mëtejme dhe MINT-i do te marrë masat e duhura” , tha Murati.

    Pavarësisht konstatimit të ministrit dhe gjendjes në terren, nga Shoqata e Naftëtarëve thanë se vendimi po respektohet.

    “Sa i përket vendimit të ministrisë vendimi në bazë informatave është duke u respektuar. 12 centë marzha e fitimi për pikat e karburantit me pakicë dhe 2 centë marzha e fitimit për import”, thotë Fadil Berjani, kryetar i Shoqatës së Naftëtarëve.

    Sipas kryetarit të Shoqatës se Naftëtarëve, kosovarët po shërbehen me çmimet më të volitshme në rajon.

    Kronikën e plotë e gjeni në Edicionin Qendror të lajmeve në ATV, në videon më poshtë:

  • Vonesat në regjistrimin e popullsisë penalizojnë komunat

    Vonesat në regjistrimin e popullsisë penalizojnë komunat

    Përgatiti: Krenare Mulliqi

    Ferizaj është njëra nga komunat që po dëmtohet nga grandet për shkak të vonesave në regjistrimi të popullsisë.

    Kjo pasi që sipas regjistrimit të fundit të popullsisë në vitin 2011, Ferizaj rezulton te këtë 108 mijë banor, rreth 15 mijë më pak sa është aktualisht, ndërsa buxheti ndahet në bazë të statistikave të vjetra.

    Për shkak të mos regjistrimit të popullsisë, sipas Ajetit po rrezikohen edhe fondet nga Bashkimi Evropian.

    Njohës të ekonomisë vlerësojnë se vonesat në regjistrimin e popullsisë mund të shkaktojnë edhe pasoja tjera për vendin.

    Përmes një vendimi Qeveria, dje shtyu procesin e regjistrimit të popullsisë me 1 nëntor më arsyetimin se nuk janë kryer të gjitha përgatitjet, ani pse ishte paraparë të fillonte nga 1 shtatori.

    Kronikën e plotë e gjeni në Edicionin Qendror të lajmeve në ATV, në videon më poshtë:

  • Hovenier: Solidariteti i Kosovës me Ukrainën ka rëndësi dhe ka pasur ndikim

    Hovenier: Solidariteti i Kosovës me Ukrainën ka rëndësi dhe ka pasur ndikim

    Ambasadori i ShBA-së në Kosovë, Jeffrey Hovenier e ka uruar Ukrainën në Ditën e saj të Pavarësisë.

    Sipas tij, ShBA-ja e përsërit angazhimin e saj për ta mbrojtur pavarësinë, integritetin territorial dhe sovranitetin e Ukrainës.

    “Ndërsa urojmë Ukrainën për këtë ditë historike, ne përsërisim angazhimin tonë të palëkundur për të mbrojtur pavarësinë, integritetin territorial dhe sovranitetin e saj”, shkroi Hovenier në Twitter.

    Ai ka publikuar një fotografi të një banderole të madhe të vendosur në objektin e ambasadës amerikane në Prishtinë me mesashin “Të bashkuar me Ukrainën.

    “Siç tha Presidenti Biden muajin e kaluar, ‘Angazhimi ynë ndaj Ukrainës nuk do të dobësohet. Ne do të qëndrojmë për lirinë dhe lirinë sot, nesër dhe për aq kohë sa të duhet’. E thënë me fjalë të thjeshta: pushtimi brutal dhe në shkallë të plotë i Presidentit Putin në Ukrainë është një veprim që kërcënon paqen dhe sigurinë jo vetëm të një vendi, por të gjithë Europës dhe më gjerë”, thuhet në deklaratën e Hovenier, të cilën e ka shpërndarë në një postim në Twitter.

    Po ashtu, diplomati amerikan theksoi se “solidariteti i Kosovës ka rëndësi dhe ka pasur ndikim”, transmeton Paparaci.

    “Solidariteti i Kosovës ka rëndësi dhe ka pasur ndikim. Siç e kam thënë edhe më parë: ajo që ju, Kosovë, qëndroni dhe me kë qëndroni, ka rëndësi. Populli i Kosovës është pjesë përbërëse e kësaj përpjekjeje globale për ta refuzuar sfidën brutale të Putinit ndaj një kombi të pavarur dhe sovran. Shtetet e Bashkuara, Kosova dhe partnerët tanë do të vazhdojnë të qëndrojnë të bashkuar me Ukrainën sot, ndërsa ne e kremtojmë së bashku ditën kombëtare të Ukrainës dhe çdo ditë në mbështetjen tonë për vlerat demokratike dhe sigurinë evropiane”, thuhet në deklaratën e tij.

  • ​Hollivudi xhiron film bazuar në librin propagandues serb? Haxhixhemajli apelon për kujdes të asaj që promovohet

    ​Hollivudi xhiron film bazuar në librin propagandues serb? Haxhixhemajli apelon për kujdes të asaj që promovohet

    Hulumtuesja e lartë në institutin “Octopus”, Arta Haxhixhemajli, ka reaguar pas deklaratave të autorit të librit “Zemra serbe e Johanit”, Veselin Dzeletoviq, se me bashkëpunëtorët nga Hollivudi po xhirojnë një filmin bazuar në librin e tij. Ajo në formë pyetëse ka lënë të nënkuptohet se mbështetja e Hollivudit në këtë mënyrë i bën jehonë propagandës ruse.

    Libri “Zemra serbe e Johanit” ka përmbajtje propagandistike. Prandaj, po konsiderohet se mesazhi ose përmbajtja e filmit mund të përputhet me disa nga idetë që propaganda ruse po promovon.

    Duke theksuar se ky libër flet për “trafikimin e organeve në Kosovë”, Haxhixhemajli ka apeluar për vetëdijësim për historitë që promovohen dhe shpërndahen.

    “Autori Veselin Dzeletoviq diskuton filmin ‘Serbsko srce Johanovo’ mbi trafikimin e organeve në Kosovë. A i bën jehonë mbështetja e Hollivudit shqetësimeve të propagandës ruse? Le të jemi të vetëdijshëm për historitë që promovojmë dhe shpërndajmë”, ka shkruar ajo në “X”.

    Ndërsa autori serb, Veselin Dzeletoviq ka deklaruar për Kurir se “buxheti për filmin është 15 milionë euro” dhe se “po vijnë bashkëproducentët nga Hollivudi”.

    “Shpresoj, besoj në Zotin, që në muajt e ardhshëm të fillojmë xhirimet e atij filmi të madh hollivudian. Bashkëproducentët tanë vijnë nga Hollivudi. Ata sjellin një shumë të mirë parash. Është një film i madh, buxheti ynë është 15 milionë euro. Ne po bëjmë gjithçka me kaq shumë kujdes dhe kujdesemi për gjithçka, sepse është një histori që, për mendimin tim, mund të ndryshojë shumë gjëra. Kushdo që e ka lexuar romanin e di se çfarë po ndodh atje poshtë”, pretendon ai sipas mediave serbe.

  • Mbledhje e jashtëzakonshme për shkak të rastit në Psikiatri ku vdiq një pacient

    Mbledhje e jashtëzakonshme për shkak të rastit në Psikiatri ku vdiq një pacient

    Bordi Drejtues i SHSKUK’së sot ka mbajtur mbledhje të jashtëzakonshme, me kërkesë të ministrit të Shëndetësisë, Arben Vitia.

    Sipas njoftimit të SHKUK’së, pika e vetme e rendit të ditës ka qenë vdekja e pacientit në dhomën e Klinikës së Psikiatrisë.

    “Pas diskutimeve, Bordi Drejtues ka kërkuar nga drejtori i përgjithshëm i ShSKUK-së, konform përgjegjësive dhe autorizimeve ligjore të bëjë vlerësim të gjendjes dhe bazuar në kompetencat e tij të ndërmarrë veprimet ligjore ndaj personave përgjegjës. Po ashtu, do të ndërmerren veprime të tjera ligjore, me qëllim të parandalimit të rasteve të tilla”, thuhet në njoftim.

    Njoftimi i plotë:

    Sot, Bordi Drejtues i ShSKUK-së, me kërkesë të ministrit të Shëndetësisë, Dr. Arben Vitia, ka mbajtur mbledhje të jashtëzakonshme ku pikë e vetme e rendit të ditës ishte ngjarja e fundit e ndodhur në Klinikën e Psikiatrisë.

    Pas diskutimeve, Bordi Drejtues ka kërkuar nga drejtori i përgjithshëm i ShSKUK-së, konform përgjegjësive dhe autorizimeve ligjore të bëjë vlerësim të gjendjes dhe bazuar në kompetencat e tij të ndërmarrë veprimet ligjore ndaj personave përgjegjës.

    Po ashtu, do të ndërmerren veprime të tjera ligjore, me qëllim të parandalimit të rasteve të tilla.

  • Zëdhënësi i VV-së ftohet nga Prokuroria Speciale

    Zëdhënësi i VV-së ftohet nga Prokuroria Speciale

    Zëdhënësi i Lëvizjes Vetëvendosje, Arlind Manxhuka, është ftuar nga Prokuroria Speciale, pasi kishte reaguar lidhur me lirimin e Dejan Pantiqit.

    Lajmin e ka bërë të ditur vetë Manxhuka, i cili përmes një postimi në facebook, ka thënë se është aktive sipas tij, kur ka të bëjë me qytetarë që ndërlidhen me VV-në.

    “Prokuroria Speciale nuk është se ishte pasive, përkundrazi ajo është më aktive se kurrë në përndjekje të qytetarëve me prefixin VV. Pra, ky është keywordi që i bënë përshtypje kësaj Prokurorie”, ka shkruar Manxhuka.

    Postimi i plotë i tij:

    Rreth 250 denoncime të shkeljeve e proceseve korruptive janë bërë nga ana e ministrive përgjatë kësaj kohe të qeverisjes. Veprimet e prokurorisë jo që ishin të mangëta, por shpeshherë rrëzuan raste me situatë të qartë.

    Por, Prokuroria Speciale nuk është se ishte pasive, përkundrazi ajo është më aktive se kurrë në përndjekje të qytetarëve me prefixin VV. Pra, ky është keywordi që i bënë përshtypje kësaj Prokurorie.

    Në këtë linjë, për nesër jam ftuar për intervistim nga Prokuroria Speciale, në lidhje me reagimin tim në rastin e lirimit të kriminelit/terrorist Dejan Pantiq. Detajet besoj do t’mi jep nesër prokurorja.

    Unë i plotësoj të gjitha kushtet për të marrë ftesë nga prokuroria si për nga prefixi ashtu edhe nga keywordi, por kjo përpjekje e nomenklaturës së moçme si në politikë ashtu edhe në Prokurori për të frikësuar qytetarin e Kosovës, aktivistin e Lëvizjes VETËVENDOSJE! është dëshmuar të jetë e kotë.

    Nuk do të ja dalin.

  • Hovenier e Kurti nënshkruajnë marrëveshje për mbrojtjen e informacionit të klasifikuar

    Hovenier e Kurti nënshkruajnë marrëveshje për mbrojtjen e informacionit të klasifikuar

    Qeveria e Kosovës dhe Ambasada e Shteteve të Bashkuara të Amerikës, kanë nënshkruar marrëveshje mbi masat e sigurisë me qëllim të mbrojtjes së informacionit të klasifikuar, raporton EO.

    Marrëveshja u nënshkrua nga ambasadori amerikan Jeffrey Hovenier dhe kryeministri Albin Kurti. Ambasadori Hovenier e quajti shumë të rëndësishme këtë marrëveshje.

    Me këtë rast kryeministri Kurti tha se marrëveshja parasheh veprimet e të dy palëve në raport me informacionin e humbur, mënyrën e asgjësimit të informacionit të klasifikuar, e ndarjes së tij në raport me palët e autorizuara.

    “Koncepti i sigurisë kombëtare është udhërrëfyes i qeverisjes së përgjithshme. Qeveria e ka për detyrë të sigurohet që qytetarët janë të mbrojtur, dhe një gjë e tillë e bën përmes veprimeve të mençura politike, ekonomike, diplomatike e ushtarake”.

    “Siguria kombëtare është e drejtë dhe nevoje. Ajo përkthehet në vullnetin dhe obligimin e Qeverisë te merr vendime me të cilat garanton pavarësinë, sovranitetin dhe integritetin territorial të shtetit, detyrë kjo e cila kërkon jo rrallë ruajtjen e informacionit si konfidencial”.

    “Mbrojta e atillë e informacionit parashihet me ligi dhe siguron mbrojtje përderisa interesi kombëtar dikton një gjë të tillë. Prandaj sot, se bashku me ambasadorin Hovenier u dakorduam që informacioni i kategorizuar si i tillë do ruhet ashtu siç e parasheh legjislacioni nacional dhe nuk do zbulohet përveç ndaj atyre që posedon certifikatë të sigurisë, pa marrë parasysh pozitën apo titullin që personi i interesuar në informacion të klasifikuar gëzon”, tha Kurti.

  • Zelensky: Ukraina nuk ka asnjë lidhje me vdekjen e raportuar të Prigozhinit

    Zelensky: Ukraina nuk ka asnjë lidhje me vdekjen e raportuar të Prigozhinit

    Presidenti i Ukrainës, Volodymyr Zelensky ka thënë se Ukraina nuk ka asnjë lidhje me vdekjen e raportuar të udhëheqësit të Wagnerit, Yevgeny Prigozhin, sipas agjencisë ruse të lajmeve “Interfax”.

    Është raportuar se Prigozhin ka vdekur pas rrëzimit të një aeroplani në rusi, por këto raportime ende nuk janë konfirmuar, shkruan Sky News.

    Ndërkaq, akuza në lidhje me këtë rast ka pasur ndaj presidentit rus, Vladimir Putin, por ky deri më tani nuk ka bërë ndonjë koment.

  • Reagon vëllai i Oliver Ivanoviqit: Vuçiq u vonua shumë për kërkim falje

    Reagon vëllai i Oliver Ivanoviqit: Vuçiq u vonua shumë për kërkim falje

    Miroslav Ivanoviq, vëllai i Oliver Ivanoviqit, ka thënë se kërkim falja nga Gjermania për deklaratën e ministrit serb të policisë Bratisllav Gashiq se vrasësit e ish-liderit të Iniciativës Qytetare “Serbia, Demokracia, Drejtësia” janë nën mbrojtjen e shtetit gjerman, ishte dashur të bëhet shumë më herët mga presidenti Aleksandar Vuçiq.

    “Një deklaratë e tillë, si ajo e Gashiqit, nuk tolerohet dhe nuk harrohet në botën diplomatike. Dhe për këtë duhet të merren disa masa me dëshmi për një kërkim falje serioze për ta nxjerrë këtë vend nga ky skandal”, ka thënë Mirosllav Ivanoviq, për gazetën serbe Danas

    Siç ka shtuar ai, “është e sigurt që së paku duhej të përmendet edhe familja e Oliverit në të gjitha këto, sepse ata nuk e kuptojnë dhe nuk e kanë idenë se çfarë do të thotë publikimi i një informacioni të tillë, madje edhe shumë më të butë, për familjen dhe disponimin e familjes”.

    Aleksandar Ivanoviq, nipi i Olliver Ivanoviqit, tha se “ky është një turp i madh që sigurisht nuk mund të zgjidhet duke i kërkuar falje Gjermanisë dhe duke mbetur ministri Bratisllav Gashiq në postin e ministrit të Policisë”.

    Ai ka vlerësuar se pas këtij skandali, Gashiq do të duhet të japë dorëheqje ose të shkarkohet me procedurë urgjente.

    “Pas kësaj, i takon prokurorit të vërtetojë arsyet pse ministri Gashiq, tashmë është e qartë për të gjithë, qëllimisht ka mashtruar opinionin kur së fundi e ka valëvitur dosjen e Oliver Ivanoviqit në Kuvendin e Serbisë dhe ka thënë se rasti është zgjidhur, se dihet kush është vrasësi dhe ku është, nën mbrojtjen e shtetit gjerman”, ka theksuar Ivanoviq.

    Dje Vuçiqi i ka kërkuar falje Gjermanisë për pretendimin e Gashiqit, duke deklaruar se Serbia kishte folur me pjesëtarët e shërbimit gjerman dhe kishte marrë garanci dhe prova se ata nuk i fshehin të dhënat.