ATV

Blog

  • Marrëveshja me SHBA në për informacionet konfidenciale Qeveria thotë se do të zbatohet legjislacioni

    Marrëveshja me SHBA në për informacionet konfidenciale Qeveria thotë se do të zbatohet legjislacioni

    Përgatiti: Nora Luta

    Mënyra e ndarjes së informacionit, përmbajtja dhe asgjësimi i informacioneve konfidenciale, furnizimi me armatim.

    Këto dhe të tjera masa të sigurisë për ruajtjen e informacionit të klasifikuar në fushën e sigurisë parashihen në dokumentin e firmosur mes Kosovës dhe Shteteve të Bashkuara të Amerikës.

    Sipas Qeverisë, për këtë marrëveshje do të zbatohet legjislacioni aktual për mbrojtjen e informacionit të klasifikuar. Ndërsa, përgjegjës për implementim do të jetë Agjencia e Kosovës për Inteligjencë dhe Departamenti i Mbrojtjes së ShBA-së.

    “Ligjet tona e përcaktojnë qartë se kur mund të klasifikohet informacioni. Një gjë e tillë aplikohet në interes të mbrojtjes së sigurisë. Pra, edhe marrëveshja përcjell këtë frymë. Implementimi do të bëhet nga Agjencia e Kosovës për Inteligjencë dhe Departamenti i Mbrojtjes i ShBA-së. Ndikimi është direkt te mbrojtja e sigurisë, pasi që informacioni që klasifikohet në pajtim të dy palëve, do të ruhet e mbrohet në bazë të rregullave të dakorduara dhe legjislacionit të aplikueshëm në dy vendet”, thotë zëdhënësi i Qeverisë së Kosovës, Përparim Kryeziu.

    Si e tillë marrëveshja po konsiderohet se përforcon kapacitetet për ruajtjen e sigurisë kombëtare. E sipas ish-zëvendësministrit të brendshëm, Valdet Hoxha, bart edhe një mesazh për organizatat ndërkombëtare të sigurisë.

    Marrëveshjen e sheh si shumë të rëndësishme për vendin, edhe deputeti Hysen Berisha nga Komisioni për Çështjet e Sigurisë dhe Mbrojtjes, por ngre dilemat se nëse ajo duhet të ratifikohet në Kuvend, partia e tij, PDK-ja, nuk do ta mbështesë.

    Megjithatë, Zyra e Kryeministrit në një përgjigje me shkrim, duke e cituar nenit 10 të Ligjit për Marrëveshjet Ndërkombëtare, ka thënë se për t’u zbatuar kjo marrëveshje nuk kërkohet ratifikimi i saj në parlament.

    “Neni 10 i Ligjit për Marrëveshjet Ndërkombëtare përcakton cilat marrëveshje duhen ratifikuar nga Kuvendi i Republikës. Marrëveshja me ShBA-në mbi masat e sigurisë me qëllim të mbrojtjes së informacionit të klasifikuar, nuk bie nën përkufizim të nenit 10. Marrëveshja në fjalë përcjell fjalën e legjislacionit të aplikueshëm në Kosovë për mbrojtjen e informacionit të klasifikuar dhe përcakton mënyrën e shkëmbimit, ruajtjes, mbrojtjes dhe humbjes së informacionit të klasifikuar”, tha Kryeziu.

    Qeveria e Kosovës dhe ajo e Shteteve të Bashkuara të Amerikës nënshkruan marrëveshje mbi masat e sigurisë me qëllim të mbrojtjes së informacionit të klasifikuar javën e kaluar.

    Në ceremoninë e nënshkrimit të saj ishte edhe ministri i Mbrojtjes, Ejup Maqedonci, i cili ka shprehur garanci se informacionet e klasifikuara të fushës së sigurisë e mbrojtjes, do të ruhen sipas legjislacionit.

  • Kurti dhe Vuçiq, mund të takohen në Bruksel muajin e ardhshëm

    Kurti dhe Vuçiq, mund të takohen në Bruksel muajin e ardhshëm

    Përgatiti: Fatlum Jashari

    Bashkimi Evropian synon që në Shtator të organizojë një takim të radhës të nivelit të lartë në kuadër të dialogut Kosovë – Serbi.

    Pas takimit me kryeministrin Albin Kurti, në Bled të Sllovenisë, përfaqësuesi i Posaçëm i BE-së për dialogun, Miroslav Lajcak, njoftoi se takimi do të ketë në fokus normalizimin e marrëdhënieve dhe zbatimin e kërkesave të 3 Qershorit, për deeskalim të situatës në veri të Kosovës.

    Tri ditë para takimit Kurti-Lajcak, Kosova shtyu për dy javë ultimatumin për lirimin e objektit komunal në Mitrovicë të Veriut nga strukturat ilegale, dhe e vendosi në diskutim publik
    udhëzimin administrativ për procedurat për largimin e kryetarëve.

    Udhëzimi që u mundëson qytetarëve të iniciojnë shkarkimin e kryetarit të komunës pritet të miratohet para fundit të javës.

    Me këto veprime, sipas profesorit Tomorr Avdia, Qeveria ka bërë hapa të mjaftueshëm për të krijuar hapësirën e kërkuar nga Bashkimi Evropian.

    “Presioni të jetë i dyanshëm dhe në koordinim për të dhënë efekte, sepse nëse një partneri të vogël e të dobët si shteti ynë i ushtrohet presion tejmase dhe palës tjetër Serbisë, janë të kujdesshëm, nuk e bëjnë një gjë të tillë në proporcion me forcën që ka Serbia, atëherë raportet mund të eskalojnë në forma të tjera”, tha Avdia.

    Në këtë kontekst, profesori Seb Bytyçi vlerëson se duhet kujdes, pasi çdo veprim në terren i Kosovës mund shërbejë si arsye për mos-heqje të masave.

    “Nxjerrja e U.A. është në përputhje me kërkesat e BE-së dhe marrëveshjes për deeskalimin, pra kemi të bëjmë me përgatitjen e terrenit për zgjedhje, kurse çështja e ndërtesës delikate, sepse çdo lëvizje e Kosovës kontrollohet me sy të ashpër”, tha Bytyçi.

    Profesori Avdia thekson nevojën që, në takimin e radhës, BE-ja t’ua bëjë të qartë liderëve të Kosovës dhe Serbisë, përmbushjen e kërkesave dhe zotimeve për të lëvizur procesin përpara.

    “Krijimi i një mini-krize të re debalancon komplet procesin, jo vetëm atë të zgjedhjeve, por edhe hapat tjerë të cilët negociatorët përpiqen t’i japin një ritëm më të shpejtë në këtë fillim-vjeshte, sepse duket se gongu po troket në mbarim të këtij afati të këtij viti”, tha Avdia.

    Takimi i fundit direkt ndërmjet kryeministrit të Kosovës, Albin Kurti, dhe presidentit të Serbisë, Aleksandar Vucic, u zhvillua më 2 Maj, ndërsa më 22 Qershor, në Bruksel, liderët e dy shteteve zhvilluan takime të ndara me Përfaqësuesin e Lartë, Josep Borrell.

  • Kundërshtimet në Klinë kanë arritur të ndalin ndërtimin e Fabrikës së çimentos në fshatin Dollc

    Kundërshtimet në Klinë kanë arritur të ndalin ndërtimin e Fabrikës së çimentos në fshatin Dollc

    Përgatiti: Jeta Selmanaj

    Kundërshtimet e protestat e qytetarëve dhe të Asamblesë Komunale të Klinës kanë arritur të ndalin ndërtimin e Fabrikës së çimentos në fshatin Dollc.

    Aktvendimi i Gjykatës Themelore të Prishtinës i ka dhënë të drejtë vendimit të Asamblesë Komunale për kundërshtimin e ndërtimit të fabrikës nga kompania “Wallingford International Kosova” L.L.C.

    “Aktvendimi i Gjykatës i jep të drejtë vendimit të Asamblesë Komunale në Klinë dhe i bie praktikisht që vendimi i kësaj asambleje është i plotfuqishëm dhe është obligues për komunën që të zbatohet. Ky vendim i asamblesë vlen të theksohet: anulohen të gjitha pëlqimet dhe dokumentet e tjera urbanistike të cilat janë dhënë lidhur me gurorë për furnizim me lëndë të parë për fabrikat e çimentos. Po ashtu, obligohet Drejtoria e Urbanizmit dhe Mbrojtjes së Mjedisit që paraprakisht pas pranimit të kërkesave dhe draft-dokumenteve urbanistike, sipas këtij vendimi, t’i drejtohet kuvendit komunal”, tha Veton Raci, organizator i protestave.

    Udhëheqësi i banorëve që kundërshtuan ndërtimin e kësaj fabrike, Veton Raci, ka kërkuar nga kryetari i komunës së Klinës ta shkarkojë Lorenc Marlekajn dhe drejtorin aktual të Urbanizmit, Enver Berisha, i cili ka dhënë leje për ndërtimin e kësaj fabrike.

    “Kërkojmë që pezullimi të shndërrohet në vendim për anulimin e pëlqimit mjedisor për kompaninë “Wallingford International Kosova” L.L.C. Po ashtu, nga niveli komunal kërkojmë që me marrjen e këtij vendimi të Gjykatës Themelore në Prishtinë, kryetari i komunës të nxjerrë vendim për shkarkimin e drejtorit, Lorenc Marlekaj, si dhe shkarkimin e drejtorit aktual të Urbanizmit, Enver Berisha, i cili kishte nxjerrë vendim për lëshimin e lejes për ndërtimin e fabrikës së çimentos”, tha Raci.

    Rreth 3 mijë qytetarë kishin nënshkruar peticionin kundër ndërtimit të fabrikës. Kundërshtimet për ndërtimin e fabrikës e kishin përkrahur edhe kryetarët e Pejës, Istogut e Malishevës, komuna këto në afërsi të Klinës.

    Ankesa kryesore e protestuesve ishte ndotja e ambientit gjë që mund të çonte në largimin e banorëve nga zona.

  • Eshtë protestuar kundër dhunës së ushtruar ndaj një pjesëtari të komunitetit rom nga Policia

    Eshtë protestuar kundër dhunës së ushtruar ndaj një pjesëtari të komunitetit rom nga Policia

    Përgatiti: Nexhmie Hyseni

    Burhan Ibrahimoviq, pjesëtar i komunitetit rom, po pretendon se është rrahur keq nga disa zyrtarë policorë në stacionin e policisë në Graçanicë më 19 gusht.

    Ibrahimoviq, që tash e tri vjet jeton në Prishtinë, thotë se kjo ndodhi pas shoqërimit të tij në polici pas një konflikti verbal që ai kishte me një fqinje të tij në Graçanicë.

    Në mbështetje të tij, dhjetëra protestues u mblodhën të martën para stacionit policorë në Graçanicë me qëllim të, siç u tha, rritjes së vetëdijes së qytetarëve të Kosovës dhe institucioneve të saj, në shërbim të parandalimit të shkeljes së të drejtave të njeriut.

    “Pas 10 minutave të atij konflikti ku zonja ka thirrë Policinë dhe ka ardhë, më kanë marrë dhe më kanë pru në stacion të policisë, ku më kanë mbajtë një orë e gjysmë. Pastaj më kanë dhënë një gjobë dhe nuk kanë treguar për çfarë arsye është. Pasi kam arritë, lart qëndronin rreth pesë policë dhe kam pyet pse është gjoba, do ta marr do shkoj te një avokat në Prishtinë, ku do ta filloj procesin në mënyrë ligjore”, tha Ibrahimoviq.

    Në këtë pikë, pas fjalosjes me policët, ai thotë se e kanë futur në një dhomë tjetër, ku edhe ka nisur dhuna ndaj tij.
    “Menjëherë pas atij konflikti, policët më dërguan me një dhomë, ku filluan të godisnin me grushte, syri ka qenë i enjtur dhe dhembjen në qafë e ndjej ende. Pastaj, sërish më kanë marrë në paraburgim ku më kanë mbajtur një orë, kam kërkuar ujë, por as nuk dëgjonin. Ka ardhë një mjeke këtu, ku më ka pyetur nëse kam dhimbje, por prej frikës së policit kam thënë nuk kam asgjë”, tha Ibrahimoviq.

    Driton Berisha nga Lëvizja “Opre Roma Kosova” ka kërkuar nga institucionet përkatëse veprime konkrete lidhur me rastin.

    “Burhani e ka shprehur këtë shqetësim, ka pas rrahje brenda Stacionit të Policisë, një gjë që ka konfirmuar edhe raporti mjekësor. Jemi me të, që të kërkojmë drejtësi duke u mbështetur në institucione ligjore. Këtë rast do ta përcjellim deri në fund, dhe të japim një shembull që mos t’i ndodhë askujt kjo që i ndodhi Burhanit”, tha Driton Berisha, “Opre Roma Kosova”.

    Pas raportimit të rastit, Inspektorati Policor i Kosovës ka konfirmuar gjatë së martës së ka nisur hetimet për sqarimin e rrethanave të ngjarjes, porse deri më tani, ndonëse kanë kaluar 10 ditë nga ngjarja, ende nuk ka marrë ndonjë vendim për suspendimin e zyrtarëve policorë të përfshirë në rast.

  • 9 shkolla po rinovohen në Fushë Kosovë, në disa prej tyre mësimi mund të mos fillojë më 1 shtator

    9 shkolla po rinovohen në Fushë Kosovë, në disa prej tyre mësimi mund të mos fillojë më 1 shtator

    Përgatiti: Kastriot Tahiri

    Po enden në oborrin e shkollës, por këta fëmijë mësimin rrezikojnë të mos e fillojnë të premten e 1 shtatorit, pasi rinovimet në objektin e shkollës zor që do mund të kryhen brenda ditëve të mbetura.

    Kjo është gjendja e shkollës fillore “Vëllezërit Frashëri” në fshatin Miradi e Epërme, në komunën e Fushë Kosovës, sipas banorëve kompania e cila është kontraktuar nga komuna tash e 5 ditë, nuk është duke punuar këtu.

    Përkundër gjendjes në terren, nga komuna janë optimistë se punimet do të kryhen brenda afatit.

    Punimet sipas kontratës nuk janë larg përfundimit dhe po punohet e nëse nuk kryhet krejt, kemi me punu edhe të shtunën e të dielën. Për renovimin e këtyre shkollave kemi pasë 1 muaj e gjysmë kohë, e pamjaftueshme, edhe por mësimi do të përfundojë”, tha Fatlum Berisha nga DKA në Fushë Kosovë .

    Veçse një gjë të tillë nuk po e besojnë as stafi i kësaj shkolle.

    “Nuk është në rregull, as shkolla e as kopshti, nuk e di, edhe banorët janë të shqetësuar për këtë. Po i marrin tenderët shkel e shko këtu nuk po punohet”, tha Ahmet Nishori, punëtor teknik.

    ATV-ja ka mësuar se punimet në këtë shkollë fillore, e cila është e ndarë në tri paralele, do të duhej të fillonin që me një korrik, por punimet aty kanë filluar tek para 10 ditësh. Madje, nga këto ditë vetëm në 5 prej tyre është punuar, meqë u ndërprenë për shkak të punimeve jocilësore.

    Përveç shkollës “Vëllezërit Frashëri”, edhe shumë shkolla të tjera në tërë territorin e Kosovës janë në rinovim e sipër, pak ditë para fillimit të vitit të ri shkollor. Kjo praktikë e vonimit të përgatitjeve është e papranueshme për njohësit e arsimit.

    “Vonesat e komunave në përgatitje afër shtatorit ka qenë problem i kamotshëm. Është e papranueshme se si në të gjithë ata muaj pushim punimet të vazhdojnë edhe në shtator”, tha Rinor Qehaja, instituti “Edd Guard”.

    Ministria e Arsimit nuk ka treguar për ATV-në se sa objekte shkollore në nivel vendi janë në renovim e sipër.

  • ​Oficerët doganor parandalojnë kontrabandimin e barnave

    ​Oficerët doganor parandalojnë kontrabandimin e barnave

    Dogana e Kosovës, e përkrahur nga Policia, ka zbuluar një sasi të konsiderueshme barnash të kontrabanduara nga Shqipëria dhe Serbia.

    Rasti ka ndodhur në regjionin e Prishtinës derisa është ndaluar një automjet i dyshuar.

    “Dogana e Kosovës, e përkrahur nga Policia e Kosovës, ka ndaluar një automjet të dyshuar. Në këtë rast është zbuluar një sasi e konsiderueshme barnash të kontrabanduara nga Shqipëria dhe Serbia. Mallrat e kontrabanduara janë konfiskuar dhe procedurat ligjore kundër personave të përfshirë në këtë kundërvajtje kanë filluar”, ka njoftuar Dogana e Kosovës.

  • Komisioni Evropian: Fokusi është zgjerimi në BE, jo afati kohor

    Komisioni Evropian: Fokusi është zgjerimi në BE, jo afati kohor

    Komisioni Evropian (KE) nuk është i përqendruar në afate kohore në procesin e zgjerimit të Bashkimit Evropian (BE), por për t’i ndihmuar vendet kandidate për të përparuar në këtë proces, tha të martën zëdhënësja e KE-së, Dana Spinat.

    Spinat i bëri këto komente në një konferencë për shtyp në Bruksel më 29 gusht, pas propozimit të presidentit të Këshillit Evropian, Charles Michel, që viti 2030 të caktohet si afat deri kur vendet e tashme kandidate dhe BE-ja të jenë të gatshme për zgjerim.

    Por, derisa e pranoi se zgjerimi është prioritet politikë për Komisionin Evropian, ajo iu përgjigj Michelit duke thënë se “nuk jemi të fokusuar në afate kohore, por t’i ndihmuar kandidatët në përmbushjen e kritereve dhe për t’u bërë gati”.

    “Presidentja [e Komisionit Evropian, Ursula von der Leyen] në mënyrë specifike ka thënë se sa të përkushtuar jemi ne që ta bëjmë të suksesshëm zgjerimin. Gjithmonë kemi thënë se zgjerimi është prioritet dhe kandidatët duhet të anëtarësohen kur të jenë gati. Kemi punuar për së afërmi me kandidatët për t’i ndihmuar që ata të kryejnë reformat”, tha Spinat.

    Ajo shtoi se ky proces duhet të mbetet proces i bazuar në merita dhe se kandidatët duhet të lëvizin në përputhje me suksesin e tyre në përmbushjen e kritereve.

    Zëdhënësja e Komisionit Evropian ka përsëritur se suksesi në zgjerim kërkon që edhe kandidatët edhe BE-ja të bëhen gati. Ajo ka paralajmëruar se liderët e BE-së do të diskutojnë për zgjerimin në samitin e Granadës në Spanjë, më 5 tetor 2023.

    “Kemi instrumente për t’i ndihmuar kandidatët për t’u afruar me BE-në edhe para se të bëhen anëtare. Komisioni ka dëshmuar se është i përkushtuar që ta mbajë procesin e zgjerimit si prioritet”, theksoi ajo.

    Spinat tha se ”nuk është në dijeni se ka pasur kontakte mes Michelit dhe Ursula von der Leyen për këtë çështje”, para se Michel të dilte me propozimin e tij.

    Më 28 gusht, Michel bëri thirrje që viti 2030 të caktohet si afati deri kur Bashkimi Evropian dhe vendet kandidate të jenë të gatshëm për zgjerim.

    Gjatë fjalimit në Forumin Strategjik të Bledit, ai përsëriti disa herë se tash e tutje vendeve kandidate duhet referuar si “vende të ardhshme anëtare të BE-së”.

    Në Forumin e Bledit në Slloveni morën pjesë liderët e vendeve të rajonit të Ballkanit Perëndimor, por edhe liderë të disa shteteve të BE-së.

    Michel e pranoi se rruga e gjatë e shteteve të Ballkanit Perëndimor drejt BE-së, që ka nisur para më shumë se 20 vjetësh, ka shkaktuar zhgënjim te shumë njerëz, si në rajon, ashtu edhe në bllokun evropian.

    Zgjerimi i fundit i BE-së ka ndodhur me 1 korrik të vitit 2013 kur Kroacia ishte bërë vendi më i ri anëtarë. Prej atëherë nuk ka pasur zgjerim ndërsa Britania e Madhe është larguar nga BE-ja duke e lënë atë përsëri me 27 vende anëtare./REL

  • Vuçiq: Pres shumë presione e kërcënime për Kosovën

    Vuçiq: Pres shumë presione e kërcënime për Kosovën

    Presidenti i Serbisë, Aleksandar Vuçiq, ka thënë se muajt në vazhdim nuk do të jenë të lehtë dhe se pret shumë presione dhe kërcënime rreth Kosovës.

    “Më duket se muajt në vazhdim nuk do të jenë të lehtë dhe pres shumë presione dhe kërcënime dhe zbatim të atyre kërcënimeve për Kosovën nga ata që janë pamjaftueshëm përgjegjës dhe nuk e kuptojnë se paqja nuk është vetëm në interes të serbëve, por edhe të shqiptarëve”, ka thënë Vuçiq gjatë një vizite në punimet për rindërtimin e urës mbi lumin Mllava në Petrovac.

    Vuçiq ka folur edhe për zhvillimet në Mal të Zi. Ai tha se nuk ndërhyjnë në punët e brendshme të këtij shteti dhe se do të presin formimin e qeverisë malazeze, “Ne e respektojmë Malin e Zi, e vlerësojmë dhe do të presim se si do të shkojnë gjërat, pastaj do të komentojmë”, ka thënë ai.

  • Mustafa i PDK-së për artikullin në Economist Impact: Deputetët e VV-së po mundohen ta shesin si raportim ndërkombëtar

    Mustafa i PDK-së për artikullin në Economist Impact: Deputetët e VV-së po mundohen ta shesin si raportim ndërkombëtar

    Koordinatori për Financa i PDK-së, Arben Mustafa, ka reaguar pas mburrjes së pushtetit me një shkrimi të sponsorizuar e të publikuar në Economist Impact.

    Mustafa ka thënë se deputetët e VV-së, po mundohen që këtë raportim ta shesin si raportim ndërkombëtar.

    “Kjo tregon gjendjen e rëndë të kësaj partie në kërkim të ndonjë lajmi për t’ia shitur publikut si sukses të Qeverisë Kurti – sukses ky që nuk po gjindet askund.” – ka shkruar ai.

    Më tej, ai ka pyetur se cili është kontributi i qeverisë në sukseset e kompanive që përmenden në artikullin e sponsorizuar nga Oda Ekonomike e Kosovës.

    Shkrimi i tij i plotë:

    Artikullin e sponsorizuar nga Oda Ekonomike e Kosovës (OEK) në revistën Economist Impact, ku flitet për suksesin e kompanive kosovare, deputetët e VV-së po mundohen ta shesin si raportim ndërkombëtar rreth gjendjes së ekonomisë së Kosovës.

    Kjo tregon gjendjen e rëndë të kësaj partie në kërkim të ndonjë lajmi për t’ia shitur publikut si sukses të Qeverisë Kurti – sukses ky që nuk po gjindet askund.

    OEK me plot të drejtë mundet dhe duhet t’i promovojë sukseset e kompanive kosovare, por shtrohet pyetja se cili është kontributi i kësaj qeverie në sukseset e këtyre kompanive?!

    Me pasigurinë që ka krijuar dhe qasjen armiqësore ndaj kompanive të suksesshme, kjo qeveri po e shkatërron klimën e të bërit biznes në Kosovë.

  • ​Bosch: Kur do ta kuptojnë ndërkombëtarët lojën dinake të Serbisë?

    ​Bosch: Kur do ta kuptojnë ndërkombëtarët lojën dinake të Serbisë?

    Ish-ambasadori i Holandës në Kosovë, Robert Bosch, ka thënë se presidenti i Serbisë, Aleksander Vuçiq e ka hedhur poshtë marrëveshjen e Ohrit në ditën që ishte hartuar dhe për këtë nuk është qortuar nga ndërkombëtarët.

    Diplomati që shërbeu në Kosovë ka pyetur se kur do ta kuptojnë ndërkombëtarët lojën dinake të Serbisë.

    “Kur do të ketë drejtësi në rajon”, ka thënë ai.

    “Një tjetër dëshmi e lojës dinake që po luan Serbia: për ta normalizimi do të thotë Kosova pjesë e Serbisë! Kur do ta kuptojnë më në fund ndërkombëtarët? Vuçiq e hodhi poshtë marrëveshjen e Ohrit në të njëjtën ditë që ishte hartuar dhe as nuk u qortua për këtë. Kur do të ketë drejtësi në rajon?”, ka shkruar Bosch në Facebook.

    Ish-ambasadori i Holandës në Kosovë ka reaguar pas përplasjes në mes të kryeministrit Albin Kurti, dhe kryeministres së Serbisë Ana Bernabiq, në forumin e Bledit në Slloveni.

    Aty, Kurti ka thënë se Serbia nuk po e zbaton marrëveshjen për rrugën drejt normalizimit çka edhe e bënë më të vështirë normalizimin.

    Ndërsa Bernabiq ka thënë se “është vetëm një shtet dhe nuk ka dy shtete”.

    Në reagimin e tij, kryeministri Kurti ka thënë se normaliteti në psikologji nënkupton mungesë të konfuzitetit mes realitetit dhe fantazisë, duke shtuar se “ky është një regjistër tjetër ku nuk mund të kontribuoj”./KP