Policia e Kosovës ka njoftuar se është duke kryer bastisje në pesë lokacione në veri të vendit, lidhur me sulmin terrorist ndaj Policisë së Kosovës mëngjesin e së dielës, ku u vra polici Afrim Bunjaku.
Operacioni policor është duke vazhduar nga njësitet relevante të Policisë së Kosovës, me prezencën në vend ngjarje të Prokurorit të PSRK-së.
Derisa sipas Kontaktplus medium lokal në veri ka publikuar disa foto të reja nga bastisja në pjesën veriore të Mitrovicës.
Pronat nënkryetarit të Listës Serbe, Milan Radojiçiq, janë në mesin e objekteve që po bastisen sot nga Policia e Kosovës në kuadër të aksionit që po zhvillohet në veri të vendit, bëjnë të ditur burime të KosovaPress-it.
Sipas videove të publikuara nga ministri i Punëve të Brendshme, Xhelal Sveçla, Radojiçiq ishte pjesë e grupit terrorist të sulmit terrorist të 24 shtatorit që ndodhi në Banjskë të Zveçanit. Ai është i sanksionuar i ShBA-së dhe i kërkuar nga institucionet e Kosovës.
Ndryshe, Policia e Kosovës ka nisur sot në orët e hershme një aksion në pesë lokacione të veriut të vendit.
Drejtori i policisë për rajonin e veriut, Veton Elshani ka thënë se deri më tash gjithçka ka shkuar mirë.
“Policia ka ndërmarr një aksion të gjerë nëpër disa lokacione në veri dhe deri tash gjithçka është duke shkuar mirë dhe sipas planit”, ka thënë shkurt Elshani.
Ai nuk ka dhënë detaje shtesë.
Policia e Kosovës ka njoftuar se ka kryer kontrolle në në pesë lokacione në tri komunat në veri të Kosovës.
Në njoftimin e policisë thuhet se këto operacione po zhvillohen lidhur me ngjarjet e fundit në fshatin Banjskë, ku në një sulm terrorist mbeti i vrarë rreshteri policor Afrim Bunjaku e u plagosën dy të tjerë.
Bëhet e ditur se këto kontrolle janë duke u zhvilluar në koordinim me EULEX-in dhe KFOR-in.
“Sot, me datën 29.09.2023 Policia e Kosovës është duke zbatuar urdhëresën e gjykatës kompetente për kontrolle, në pesë lokacione në tri komunat në veri të Kosovës. Këto operacione janë duke u zhvilluar lidhur me ngjarjet e fundit të ndodhura në fshatin Banjskë. Operacioni policor është duke vazhduar nga njësitet relevante të Policisë së Kosovës, me prezencën në vend ngjarje të Prokurorit (të PSRK-së). Me këtë rast Policia e Kosovës njofton qytetarët se nuk kanë nevojë për ndonjë shqetësim. Këto urdhër kontrolle, janë duke u zbatuar në koordinim me EULEX dhe KFOR”, thuhet në njoftim.
Kujtojmë se Policia e Kosovës ka gjetur arsenal armatimi në Manastirin e Banjskës ku terroristët serbë u strehuan të dielën e 24 shtatorit. Armatimi që u gjet aty arrinë vlerën prej 5 milionë eurosh dhe ishte i bollshëm për qindra njerëz.
Sulmin e së dielës e kanë dënuar institucionet e Kosovës dhe bashkësia ndërkombëtare.
Misioni i Bashkimit Evropian për Sundim të Ligjit në Kosovë (EULEX) hodhi poshtë pretendimet e zyrtarëve serbë se nuk është lejuar që të marrë pjesë në operacionin policor më 24 shtator në Banjskë, pasi u sulmua Policia e Kosovës.
“EULEX-i në asnjë mënyrë nuk është ndaluar që të marrë pjesë apo të vëzhgojë operacionet që janë kryer nga Policia e Kosovës më 24 shtator”, thanë për Radion Evropa e Lirë nga ky mision i bllokut evropian.
Presidenti i Serbisë, Aleksandar Vuçiq, dhe shefi i zyrës për Kosovën në Qeverinë serbe, Petar Petkoviq, kanë thënë se Kosova nuk e lejoi EULEX-in që të marrë pjesë në operacionin policor, pasi një grup i armatosur sulmoi Policinë e Kosovës në Banjskë të Zveçanit.
Vuçiq gjatë një takimi me përfaqësuesit e QUINT-it dhe Bashkimit Evropian më 26 shtator, tha se i ka pyetur ata pse “EULEX-i është refuzuar” që të marrë pjesë në operacionin në veri.
“Pas sulmit të kryer ndaj Policisë së Kosovës dhe më pas intervenimit të Policisë, patrullat mobile të njësisë policore të EULEX-it dhe Njësisë policore rezervë, por edhe pjesëtarë të tjerë të stafit të EULEX-it kanë qenë në kontakt të ngushtë me Policinë e Kosovës dhe kanë shkuar në zonën përreth manastirit të Banjskës në veri të Kosovës”, thanë nga EULEX-i.
Nga ky mision shtuan se kanë monitoruar nga afër operacionin policor dhe kanë qenë në kontakt të ngushtë me Policinë e Kosovës dhe misionin paqeruajtës të NATO-s në Kosovë, KFOR.
Grupi i maskuar dhe i armatosur – që sipas autoriteteve në Kosovë përbëhej prej rreth 30 personash – fillimisht sulmoi Policinë e Kosovës në Banjskë, teksa autoritetet e rendit nisën një aksion për heqjen e një barrikade në rrugë.
Më pas, sulmuesit u strehuan në manastirin e Banjskës dhe prej aty u përleshën gjatë gjithë ditës me zyrtarët policorë. Si pasojë e shkëmbimit të zjarrit, tre sulmues të dyshuar janë vrarë.
Si Vuçiq, ashtu edhe Petkoviq, kanë pretenduar se dy serbë janë vrarë pasi janë dorëzuar dhe kanë kërkuar që EULEX-i të përfshihet në hetime dhe që ky mision të ndërmjetësojë lejimin e hetuesve serbë të kryejnë autopsinë e sulmuesve të vrarë.
Ky mision i BE-së nuk tregoi nëse ka pranuar një kërkesë të tillë nga Serbia, por tha se nuk ka “mandat ekzekutiv për të kryer hetime”.
“Misioni ka monitoruar dhe do të vazhdojë të monitorojë aktivitetet e kryera nga autoritetet në Kosovë që lidhen me sulmin, sikurse hetimet, konfiskimet dhe bastisjet. Në përputhje me mandatin që kanë dhe me legjislacionin e Kosovës, përfaqësuesit e EULEX-it ishin të pranishëm gjatë kryerjes së autopsisë, në cilësinë e monitoruesve”, u tha në përgjigjen e EULEX-it.
Kosova ka fajësuar Serbinë për sulmin në Banjskë, të cilën e cilëson si sulm terrorist dhe ka kërkuar të kryhet një hetim ndërkombëtar për këtë ngjarje. Serbia ka mohuar se ka gisht në këtë ngjarje.
Sulmi është dënuar fuqishëm nga Shtetet e Bashkuara dhe Bashkimi Evropian. /REL
Përgatiti: Sara Shehu
Në orët e para të mëngjesit të së enjtes, në Prishtinë te Rruga C, një veturë është bërë shkrumb e hi.
Vetura Audi A7 ishte pronë e një shtetase të Shqipërisë, e cila nuk pranoi të flasë për rastin.
Megjithatë, banorët të cilët jetojnë në këtë pjesë të kryeqytetit, thonë se dëgjuan një zhurmë të madhe.
“Unë jam kanë aty, e kam ni krismën, ka ba shumë krismë të madhe. Na jena tut që oshtë naj bombë najsen. Kanë ardhë tani policia kanë këqyr për rastin. Ndër të parët e kom dëgju”, tha Nasmi Begaj, banor.
Banorët kërkojnë më shumë siguri, për shkak të frekuentimit të madh që ka kjo pjesë e kryeqytetit.
“Kanë mujtë tjera me u djegë aty, ose i oshtë vnu zjarri ose i dobtë kerri. Duhet siguri me pasë ma shumë, kamera duhet me pasë se s’ka knej. Se vallah prej kësaj situate janë frikësu me pleqtë, me fëmijë, të gjithë. Jemi në një kohë të keqe tu jetu”, tha Mejdi Isufi, banor i lagjes.
Policia nëpërmes një përgjigje me shkrim për ATV-në, ka bërë të ditur se kanë
filluar hetimet për të kuptuar shkaqet që çuan deri të djegia e veturës.
“Aktualisht, Policia ka nisur ndërmarrjen e veprimeve hetimore për sqarimin e plotë të rrethanave që karakterizojnë ngjarjen”, thuhet në përgjigjen e Policisë.
Përgatiti: Arton Hamiti
Presidentja Vjosa Osmani ka kërkuar që Kosova së bashku me Shtetet e Bashkuara ta përgatisë draftin për statutin e Asociacionit të komunave me shumicë serbe.
Pasi tha se marrëveshja drejt normalizimit të raporteve mes Kosovës dhe Serbisë, e arritur gjatë këtij viti nuk është perfekte, Osmani e cilësoi obligim ndërkombëtar që duhet përmbushur.
“Ne duhet të ulemi me SHBA-në, të përgatisim draftin tonë, draftin e Republikës së Kosovës. Fillimisht [vetëm me SHBA-në], unë mendoj se kështu është zgjidhja, të ulemi me partnerët tanë në SHBA, të prezantojmë para sekretarit amerikan të Shtetit, Antony Blinken, draftin tonë, i cili është në përputhje me Kushtetutën e Kosovës, në përputhje me vendimin e Gjykatës Kushtetuese, në përputhje me letrën e ish-shefes së diplomacisë së BE-së, Federica Mogherinit”, tha Osmani.
Komenti i Bashkimit Evropian në lidhje me qëndrimin e presidentes Osmani për hartimin e draft-statutit të Asociacionit, ishte i shkurtër.
“BE-ja ua ka prezantuar idetë dhe pritjet partnerëve në disa raste, së fundi madje në deklaratën e 27 shteteve anëtare të BE-së”, thuhet në komentin e BE-së.
Teksa e cilësoi si hap pozitiv të presidentes, politologu Fidan Ukaj vlerëson se nuk është momenti i duhur të flitet për Asociacionin e Komunave me shumicë serbe.
Deri më tani, për formimin e Asociacionit të komunave me shumicë serbe, kanë qarkulluar drafte si: Draft-statuti i Ekipit Menaxhues, ekip ky që u shkarkua më pas, draft-vizioni i kryeministrit Albin Kurti, draft-statuti i kryeministrit Edi Rama, dhe draft-statuti i hartuar nga një organizatë gjermane.
Derisa Qeveria e Kosovës frikësohet se një asociacion njëetnik do të mund të cenonte funksionalitetin e shtetit, faktori ndërkombëtar vazhdimisht ka insistuar në formimin e tij, që është edhe kërkesa kryesore e Beogradit.
Përgatiti: Fatlum Jashari
Në ditën e pestë të operacionit, në fshatin Banjskë të Zveçanit, Policia vazhdoi me angazhimet e saj hetimore, lidhur me sulmin terrorist nga i cili u vra rreshteri Afrim Bunjaku dhe u plagosën dy të zyrtarë të tjerë policorë.
Krahas specialëve, të cilët janë vendosur përgjatë rrugëve, në fshat e përreth manastirit, dhe kujdesen për sigurinë, Policia angazhoi edhe njësi të tjera të specializuara në kërkim dhe hetim.
“Situata në përgjithësi në këtë fshat dhe në krejt rrethinën është e qetë, këtë mund ta konfirmoj. Gjithçka në rregull… Operacioni policor vazhdon, nuk do të thotë që ka përfunduar në përgjithësi. Sot ju e shihni njësinë policore me qen, të cilët kohë pas kohe e frekuentojnë terrenin malor dhe në vende të caktuara, të dyshimta, bëjmë verifikime”, tha zëvendësdrejtori i Policisë së Kosovës në rajonin e veriut, Veton Elshani.
Hetimet po vazhdojnë kryesisht në malet përreth dhe shtigjet që terroristët i përdorën për të ikur.
“Për gjithçka, trupa, armë, municion, eksploziv, çdo gjë që mund të hasim, çdo gjë që kemi gjetur herën e kaluar, nëse ka ende”, tha Elshani.
Puna e Policisë vazhdoi edhe në vend-pritën ku mbeti i vrarë rreshteri Bunjaku.
Teksa kontrollet e kohëpaskohshme të automjeteve vazhdojnë, rrugët janë hapur për qarkullim.
Megjithatë, i mbyllur mbetet Manastiri dhe ndërtesa përcjellëse në të cilën u pa nënkryetari i Listës Serbe, Milan Radojicic.
Krahas Policisë së Kosovës, në intervale të caktuara te ky monument fetar ortodoks qëndrojnë edhe ekipe të KFOR-it dhe EULEX-it.
Ndërsa, rrugëve malore që shpijnë kah kufiri me Serbinë, përveç Policisë, u panë edhe patrullime nga KFOR-i.
Përgatiti: Arton Hamiti
Pas sulmit terrorist të 24 shtatorit, që la të vdekur rreshterin Afrim Bunjaku dhe plagosi 3 kolegë të tij, dialogu mes Kosovës dhe Serbisë më nuk është i njëjtë.
Ndikimi i sulmit në Banjskë të Zveçanit, në procesin e dialogut, për Valon Murtezajn është i pamohueshëm.
“Mund të themi që, ka qenë dialogu para 24 shtatorit dhe do të jetë procesi i dialogut pas 24 shtatorit. Arsyeja është sepse pas një sulmi të tillë të organizuar mirë dhe të planifikuar sipas evidencave aktuale, të bërë nga shteti i Serbisë, por në vazhdën e agresionit rus në Ukrainë”, tha Murtezaj.
Sipas profesorit të diplomacisë, pas një hetimi të gjithmbarshëm duhet të përcaktohen hapat e ardhshëm në procesin e dialogut.
“Tani më, një rol tepër të rëndësishëm e ka Bashkimi Evropian dhe Shtetet e Bashkuara të Amerikës. Më nuk mund të thuhet se nuk ka ndodhur asgjë. Pra sulmi terrorist, akti terrorist, e ka bërë që dialogu në të ardhmen të jetë serioz, në mënyrë që të nxirret përfundimi i këtij procesit që është njohja e Kosovës nga Serbia”, tha Murtezaj.
Megjithatë, në një takim potencial të radhës, pala kosovare është në pozitë më të favorshme, pas ngjarjes së fundit në veri.
“Presioni ndërkombëtar ka qenë mbi Kosovën ndërkohë tash, ky sulm terrorist ka kriju një momentum të ri në dialog, sepse tashmë është shpërfaqë fytyra e vërtetë e presidentit të Serbisë, Aleksandër Vucic”, tha Fitim Mulolli nga Polcon.
Pa dhënë detaje për një takim eventual të nivelit të lartë në kuadër të dialogut, zëdhënësi i Bashkimit Evropian, Peter Stano, tha se urgjencë për takime mes kryeministrit Albin Kurti dhe presidentit Aleksandër Vuçiq, ka pasur edhe para 24 shtatorit.
Ndryshe, vrasja e rreshterit Afrim Bunjaku, nga grupi terrorist serb, ndodhi 10 ditë pas takimit të dy liderëve që u zhvillua më 14 shtator, me ndërmjetësimin e Bashkimit Evropian.
Përgatiti: Sara Shehu
Ndonëse me Ligjin e ri për Paga, mjekët dhe specialistët kanë pagën më të lartë në rajon, punëtorët shëndetësorë vazhdojnë të jenë të pakënaqur.
Teksa kërkojnë ndryshime në Ligjin për Pagat, Ministri i Shëndetësisë, Arben Vitia, tha se është e pamundur që kërkesat e Federatës së Sindikatave të Shëndetësisë të realizohen.
“Me Federatën deri tani kemi pasur shumë takime, mirëpo nuk janë shumë sa ka nevojë, kërkesat e federatës janë ato që janë. Ne ju kemi treguar që për disa kërkesa përkundër faktit që i mirëkuptojmë, momentalisht nuk janë të realizueshme”, tha Vitia.
Por përkundër kësaj, Vitia tha se do ta vazhdojnë dialogun me Federatën për gjetjen e gjuhës së përbashkët.
“Ndoshta jo me dinamikën e nevojshme, por dialogu social po vazhdon dhe me padurim po pres që përkundër shumë mospajtimeve që i kemi, do ta përfundojmë këtë dialog me një kontratë, atë që do ta nënshkruajmë si kontratë kolektive. Nuk do të nënshkruajmë kontratë që do të duket që Ministria ka nënshkruar diçka e kur vjen puna te zbatimi dalin 100 e 1 mijë probleme. Shpresoj që në takimin e radhës të jemi disa hapa para”, tha Vitia.
Nga ana tjetër, Kryetarja e FSSHK-së, Tevide Imeri, tha se zbritja e pagave nuk duhet të zbatohet.
“Pakënaqësia ime është zbritja e pagave, sidomos në stafin mbështetës, kërkoj qe kjo mundësi të mos zbatohet, zbritja e pagave mos të bëhet për shkak edhe të inflacionit, çmimet janë rrit pothuajse 100%”, tha Imeri.
Kurse, Burim Tahiri, nga Zyra e Avokatit të Popullit, ka shtuar se kanë regjistruar edhe ankesa për këtë ligj.
“Ne si institucion procedurën e hartimit dhe miratimit të këtij ligji, jemi mundu me përcjell, pas miratimit të këtij ligji janë disa pozicione që kanë përfituar, janë mbi 130 ankesa që janë në institucionin e Avokatit të Popullit, ne kemi pritë më shumë ankesa më shumë reagim, por praktika e zbatimit të ligjit ka shpërfaq edhe diçka tjetër, të gjithë duhet me u rezervu prej saj derisa Gjykata Kushtetuese të vendos çka duhet të bëhet më këtë”, tha Tahiri.
Ligji për pagat në sektorin publik, u diskutua në një tryezë të rrumbullakët të organizuar nga Iniciativa Kosovare për Stabilitet, në bashkëpunim me FSSHK-në.
Përgatiti: Pranvera Krasniqi
Tash e tutje, Kosova pritet të ketë sistem më të avancuar në ofrimin e shërbimeve administrative pas nënshkrimit të projektit për qeverisje digjitale.
Mbështetja financiare e projektit 5-vjeçar, sipas ministrit të Financave, Hekuran Murati, është kredi koncesionare prej 20 milionë dollarësh.
“Ky projekt që financohet nga Banka Botërore është kredi koncesionare prej 20 milionë dollarësh, nga Asociacioni Ndërkombëtar për Zhvillim (IDA) i Grupit të Bankës Botërore. Kredia ka maturitet prej 25 vjetësh dhe grejs-periudhë prej 5 vjetësh, me normë interesi 1,25%”, tha Murati.
Sipas Muratit, projekti i cili do të zbatohet nga Agjencia Për Shoqërinë e Informacionit, do të fokusohet në tri pika themelore.
“Projekti ka tre komponentë, transformimin digjital të Qeverisë, transformimin digjital për shërbime publike dhe ngritjen e kapaciteteve. Te transformimi digjital i Qeverisë, një shembull i kësaj do të ishte nënshkrimi digjital, i cili na është kërkuar nga Banka Botërore”, tha Murati.
Projekti u nënshkrua edhe nga menaxheri i Bankës Botërore për Kosovën dhe Maqedoninë e Veriut, Massimiliano Paolucci.
“Digjitalizimi i suksesshëm i shërbimeve dhe nxitja e përdorimit të tyre do t’i përforcojnë përpjekjet e Kosovës për luftimin e korrupsionit, për përmirësimin e fuqizimit të grave, si dhe për luftimin e ndryshimeve klimatike”, tha Paolucci.
Ndër të tjera, ai ka thënë se Kosova është vendi i vetëm në rajon që ka internet të shtrirë në 100% të territorit.